အမေရိကန်သမ္မတဒေါ်နယ်ထရမ့်နှင့် အီလွန်မက်တို့၏ အစိုးရဆိုင်ရာ မူဝါဒများကို ဆန့်ကျင်ရှုတ်ချသည့်အနေဖြင့် သန်းချီသော ပြည်သူများက ဧပြီလ ၅ ရက်(စနေနေ့)တွင် အကြီးအကျယ် ဆန္ဒပြခဲ့ကြပါသည်။ 

အစ္စရေးဝန်ကြီးချုပ် နေတန်ယာဟုသည် ဧပြီ ၇ ရက်တွင် အမေရိကန် ဝါရှင်တန် သို့ သွားရောက်ပြီး ဒေါ်နယ်ထရမ့်နှင့် တွေ့ဆုံရန် ခရီးစဉ် စီစဉ်ထားကြောင်း Axios သတင်းဌာနက ဖော်ပြထားပါသည်။

တွေ့ဆုံမှုတွင် အမေရိကန်၏ သွင်းကုန်အခွန်များကိစ္စ၊ အီရန် နျူကလီးယား အစီအစဉ်နှင့် ဂါဇာကမ်းမြောင်ဒေသအခြေအနေတို့ကို ဆွေးနွေးမည်ဖြစ်ပါသည်။

အာမေးနီးယားက ဥရောပသမဂ္ဂသို့ ဝင်ရောက်မှု လုပ်ငန်းစဉ် စတင်သည့် ဥပဒေတစ်ရပ်ကို အာမေးနီးယားသမ္မတ Vahagn Khachaturyan က လက်မှတ်ရေးထိုးလိုက်ကြောင်း သမ္မတရုံးက သတင်းထုတ်ပြန်ထား ပါသည်။ 

အာမေးနီးယား ဥပဒေပြုလွှတ်တော်အမတ်များက မတ် ၂၆ ရက်က နိုင်ငံ၏ ဥရောပသမဂ္ဂသို့ ဝင်ရောက်မှု လုပ်ငန်းစဉ် သတ်မှတ်ခြင်း ဆိုင်ရာ ဥပဒေကြမ်းကို ဒုတိယအကြိမ်နှင့်နောက်ဆုံးအကြိမ် အတည်ပြုလိုက် ကြပါသည်။ 

မကြာသေးမီက မြန်မာနိုင်ငံ၌ လှုပ်ခတ်ခဲ့သော ငလျင်ကြောင့် ထိခိုက် ဒဏ်ရာရရှိသူ ၆၁ ဦးကို ရုရှားနိုင်ငံ အရေးပေါ်အခြေအနေဝန်ကြီးဌာန၏ ရွေ့လျားဆေးရုံမှ ဆေးဘက်ဆိုင်ရာကျွမ်းကျင်ပညာရှင်များက ဆေး ကုသမှု ပြုလုပ်ပေးခဲ့ပြီး ၂၄ နာရီအတွင်း ခွဲစိတ်ကုသမှု ၂၄ ကြိမ်တိုင် လုပ်ဆောင်ပေးခဲ့ကြောင်း အဆိုပါဝန်ကြီးဌာနက သတင်းထုတ်ပြန်ထား ပါသည်။