အစ္စရေးက အီရန်၏နျူကလီးယား စက်ရုံများကိုတိုက်ခိုက်ရန်ပြင်ဆင်ထားသည်ဟု အမေရိကန်ထောက်လှမ်းရေး သတင်းများကဖော်ပြထားကြောင်း အမေရိကန် တာဝန်ရှိသူများ၏ ပြောဆိုမှုကို ကိုးကား၍ CNN သတင်းဌာနကထုတ်ပြန်ထားသည်။

သို့သော် အစ္စရေးအနေဖြင့် အီရန်ကို တိုက်ခိုက်မှုပြုလုပ်ရန် ဆုံးဖြတ်ချက် ချထားခြင်းရှိ၊ မရှိကို တိတိကျကျမသိရသေးကြောင်း၊ ထို့အတူ အစ္စရေး၏ တိုက်ခိုက်မှုလုပ်ရန်ဆုံးဖြတ်ချက်အပေါ်အမေရိကန်အစိုးရအဖွဲ့အတွင်း တာဝန်ရှိသူများက သဘောမတူသည်များလည်း ရှိကြောင်း သတင်းဌာန၏ထုတ်ပြန်ချက် တွင်ဖော်ပြထားသည်။

ယူကရိန်းနိုင်ငံအနေဖြင့် ပဋိပက္ခကို မလွဲဧကန်ဖြေရှင်းပြီးနောက် အချုပ်အခြာအာဏာပိုင်နိုင်ငံအဖြစ်ကို ဆက်လက် ထိန်းသိမ်းထားနိုင်ရေးအတွက် နောက် ဆုံးအခွင့်အရေးတစ်ခုသာရှိတော့ကြောင်း နှင့် ယူကရိန်းအစိုးရကို ငြိမ်းချမ်းရေး ဆွေးနွေးပွဲတွင်ပါဝင်ရန်တိုက်တွန်းကြောင်း ရုရှားလုံခြုံရေးကောင်စီ ဒုတိယဥက္ကဋ္ဌ ဒီမီထရီမက်ဗီဒက်ကပြောသည်။

အမေရိကန်သမ္မတဟောင်း  ဂျိုးဘိုင်ဒင်၏အကြံပေးများသည် အမြင့်ဆုံးသော သစ္စာဖောက်မှုကို ကျူးလွန်သည်ဟု လက်ရှိအမေရိကန်သမ္မတဒေါ်နယ်ထရမ့် က စွပ်စွဲလိုက်ကြောင်းသိရသည်။

အဆိုပါအကြံပေးများသည် ဂျိုးဘိုင်ဒင်၏ မှတ်ဉာဏ်ကျဆင်းမှုအပေါ်အခွင့် ကောင်းယူကာ ဘိုင်ဒင်ကိုယ်တိုင်ယခင်ကတည်းကလုပ်ဆောင်လိုခြင်းမရှိသည့် ခွင့်ပြုချက်မရှိသောမူဝါဒများကိုအကောင်အထည်ဖော်ရန် လုပ်ဆောင်ခဲ့ခြင်းဖြစ်သည်ဟု ထရမ့်ကလူမှုကွန်ရက်တွင် ရေးထားသည်။

ပြင်သစ်နိုင်ငံ၊ ပဲရစ်မြို့တွင်ပြုလုပ်မည့် Apparel Sourcing Paris ပြပွဲမှာ မြန်မာ့အထည်အလိပ်ထုတ်ကုန်များ ပါဝင်ပြသနိုင်ရန်ဖိတ်ခေါ်ထားကြောင်း မြန်မာနိုင်ငံအထည်ချုပ်လုပ်ငန်းရှင်များအသင်းမှ သိရသည်။

Messe Frankfurt France မှ ကြီးမှူးကျင်းပမည့် Apparel Sourcing Paris 2025 ကို ၂၀၂၅ ခုနှစ်၊ စက်တင်ဘာလ (၁၅) ရက်မှ (၁၇) ရက်ထိ ပြင်သစ်နိုင်ငံ၊ ပဲရစ်မြို့ရှိ Paris Le Bourget, France ၌ ကျင်းပသွားမည်ဖြစ်ကြောင်း သိရသည်။