အမေရိကန်ပြည်ထောင်စု၊ လော့စ်အိန်ဂျလိစ်မြို့တွင်  လူအစုလိုက် ဆန္ဒပြမှုများဖြစ်ပွားပြီးနောက် သမ္မတဒေါ်နယ်ထရမ့်က အမျိုးသားအစောင့်တပ်ဖွဲ့ကို စေလွှတ်ခဲ့ရကြောင်း အိမ်ဖြူတော်က ဇွန်လ ၈  ရက်တွင် ထုတ်ပြန်ထားသည်။

အစုလိုက်ဆန္ဒပြမှုများသည် ရဲတပ်ဖွဲ့က ကယ်လီဖိုးနီးယား ပြည်နယ်အတွင်းရှိ တရားမဝင် နေထိုင်သူများ၏ နေအိမ်များအတွင်းသို့ စီးနင်းရှာဖွေခဲ့ပြီးနောက် ဖြစ်ပွားခြင်းဖြစ်သည်။ ရဲတပ်ဖွဲ့၏ စီးနင်းမှုအတွင်း လူ ၄၅ ဦး ဖမ်းဆီးခံခဲ့ရကြောင်း  သိရသည်။ 

ဗြိတိန်နိုင်ငံရှိ လေဘာအစိုးရသည် ပြည်သူများ၏ လူမှုဖူလုံရေး အသုံးစရိတ်များကို စစ်ရေးအတွက်အသုံးချနေသည်ဟု ယင်းနိုင်ငံပြည်သူ ထောင်ပေါင်းများစွာက လန်ဒန်မြို့လယ်သို့ ချီတက်ဆန္ဒပြခဲ့ကြောင်း သိရသည်။

ဗြိတိန်ပြည်သူများသည် အဆိုပါချီတက် ဆန္ဒပြမှုကို ဇွန်လ ၇ ရက်တွင် လုပ်ဆောင်ခဲ့ခြင်းဖြစ်ပြီး ဆန္ဒပြသူများတွင် ကုန်သွယ်ရေး သမဂ္ဂအဖွဲ့များ၊ စည်းရုံးလှုံ့ဆော်သူများ၊ နိုင်ငံတစ်ဝန်းမှ တက်ကြွလှုပ်ရှားသူများ ပါဝင်သည်။

အိန္ဒိယနှင့်ပါကစ္စတန် နယ်စပ်အငြင်းပွားမှု လက်ရှိဆက်လက် ဖြစ်ပွားနေစဉ်အတွင်း တရုတ်နိုင်ငံက ၎င်းတို့၏ ပဉ္စမမြောက်မျိုးဆက်သစ် J-35A အမျိုးအစား ကိုယ်ပျောက်တိုက်လေယာဉ်များကို ပါကစ္စတန် နိုင်ငံသို့ လွှဲပြောင်းပေးခဲ့သည်။

အဆိုပါ ကိုယ်ပျောက်တိုက်လေယာဉ်များကို ပါကစ္စတန်နိုင်ငံသို့ ပေးပို့လိုက်ခြင်းသည် အိန္ဒိယလေတပ်မတော်အတွက် ခြိမ်းခြောက်မှု တစ်ရပ်အဖြစ် ထွက်ပေါ်လာခဲ့ကြောင်း Army Recognition Group. က ဇွန်လ ၈ ရက်တွင် ထုတ်ပြန်ထားသည်။

ယခု ၂၀၂၅ ခုနှစ်သည် ယူကရိန်းနိုင်ငံသို့ အခြားနိုင်ငံများက ပေးအပ်သည့် စစ်ရေးအကူအညီ စံချိန်တင်မြင့်တက်လာသည့် နှစ်ဖြစ်ကြောင်း  ယူကရိန်း ကာကွယ်ရေးဝန်ကြီး ရက်တမ်အူမာရော့ဗ် ကပြောသည်။