ပြင်သစ်နိုင်ငံသည် ဂါဇာအလယ်ပိုင်းတွင် အစ္စရေး၏ စစ်ဆင်ရေး ချဲ့ထွင်မှုကို ပြင်းထန်စွာ ရှုတ်ချကြောင်း ပြင်သစ် နိုင်ငံခြားရေးဝန်ကြီးဌာနက ဇူလိုင် ၂၃ ရက်နေ့တွင် ထုတ်ပြန်ခဲ့သည်။ ယင်းစစ်ဆင်မှုကြောင့် လူပေါင်း သောင်းချီကာ ရွှေ့ပြောင်းခံခဲ့ရသည်ဟု သိရှိရပါသည်။

"အဆိုပါစစ်ဆင်မှုအသစ်သည် အစာအာဟာရချို့တဲ့မှုနှင့် အငတ်ဘေး အန္တရာယ်တို့ဖြင့် ရှုပ်ထွေးနေသော လူသားချင်းစာနာမှုအခြေအနေကို ပိုမိုဆိုးရွားစေသည်" ဟု ပြင်သစ်နိုင်ငံခြားရေးဝန်ကြီးဌာနက ပြောကြားခဲ့ပြီး အစ္စရေးအား ပါလက်စတိုင်းနယ်မြေသို့ အကူအညီများ ဝင်ရောက်မှုကို ပိတ်ဆို့ခြင်းနှင့် အကူအညီရယူရန် ကြိုးပမ်းသူများကို ပစ်ခတ်ခြင်း တို့ကိုလည်း ဝေဖန်ခဲ့သည်။

ပြင်သစ်နိုင်ငံက အစ္စရေးအား ဂါဇာရှိ ပြည်သူများအပေါ် အပြည်ပြည်ဆိုင်ရာဥပဒေအရ တာဝန်များကို လိုက်နာရန်၊ ဂါဇာသို့ အကူအညီများနှင့် သတင်းသမားများ ချက်ချင်းဝင်ရောက်ခွင့်ပြုရန်နှင့် အပြည်ပြည် ဆိုင်ရာ အကူအညီအဖွဲ့များ၏ လုပ်ငန်းများကို ဟန့်တားခြင်းမှ ရပ်တန့်ရန် ထပ်မံတောင်းဆိုခဲ့သည်။

အစ္စရေးမီဒီယာများ၊ အကူအညီအဖွဲ့များနှင့် မျက်မြင်သက်သေများအရ တနင်္လာနေ့ (ဇူလိုင် ၂၁) တွင် အစ္စရေးတင့်ကားများသည် ဂါဇာ အလယ်ပိုင်းရှိ ဒေးယာအလ်ဘာလာမြို့သို့ ဝင်ရောက်ခဲ့သည်။ ယခင်က ၂၁ လကြာ စစ်ပွဲအတွင်း ယင်းမြို့တွင် ကြီးမားသော စစ်ဆင်မှုများ မရှိခဲ့ပေ။

ကုလသမဂ္ဂ၏ လူသားချင်းစာနာမှုဆိုင်ရာ ညှိနှိုင်းမှုရုံး (OCHA) က တနင်္လာနေ့ (ဇူလိုင် ၂၁) တွင် အစ္စရေး၏ ရွှေ့ပြောင်းရန် အမိန့်များအောက်ရှိ နယ်မြေ တွင် လူဦးရေ ၅၀,၀၀၀ မှ ၈၀,၀၀၀ ခန့် နေထိုင်လျက်ရှိသည်ဟု ခန့်မှန်း ခဲ့သည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ကိယက်ဗ်မြို့ရှိ ဆန္ဒပြသူများသည် အဂတိလိုက်စားမှုကို တိုက်ဖျက်ရေး အေဂျင်စီများ၏ လုပ်ဆောင်မှုကို ကန့်သတ်သည့် ဥပဒေကြမ်းကို ထောက်ခံခဲ့သည့် ယူကရိန်းခေါင်းဆောင် ဗလာဒီမာ ဇီလန်စကီး၏ ဆုံးဖြတ်ချက်ကို ကန့်ကွက်ကာ ပြစ်တင်ရှုတ်ချခဲ့ကြသည်။

ဇီလန်စကီးသည် အမျိုးသား အဂတိလိုက်စားမှု တိုက်ဖျက်ရေး ဗျူရို (NABU) နှင့် အထူး အဂတိလိုက်စားမှု တိုက်ဖျက်ရေး ရှေ့နေရုံး (SAPO) တို့၏ လုပ်ငန်းဆောင်တာများတွင် ဝင်ရောက်စွက်ဖက်နိုင်ရန် အာဏာ ပေးအပ်သည့် ဥပဒေကြမ်းကို လက်မှတ်ရေးထိုး အတည်ပြုခဲ့သည်။

အဆိုပါဆောင်ရွက်ချက်သည် NABU ရုံးများကို လုံခြုံရေး စစ်ဆေးမှုများ ပြုလုပ်ပြီးနောက် ရုရှားအတွက် ထောက်လှမ်းမှုပြုလုပ်သည်ဟု စွပ်စွဲခံ ရသော အကြီးတန်း အရာရှိတစ်ဦးကို ဖမ်းဆီးခဲ့ခြင်းနှင့် ဆက်စပ်နေသည်။ အဆိုပါဥပဒေကြမ်းသည် EU တွင် စိုးရိမ်မှုများ ဖြစ်ပေါ်စေခဲ့ပြီး အတိုက် အခံ နိုင်ငံရေးသမားများက ပြင်းထန်စွာ ဝေဖန်ခဲ့ကြသည်။

ဆန္ဒပြသူများသည် ကိယက်ဗ်မြို့လယ်တွင် စုဝေးကာ "ဇယ်လာ (Zelya) ဟာ မာရ်နတ်ပဲ" ဟု ဇီလန်စကီး၏ အမည်ကို သရော်သည့် အနေဖြင့် အော်ဟစ်ခဲ့ကြသည်။ အခြားသူများက "အရှက်ရစရာကောင်းသော သစ္စာ ဖောက်မှု" ဟု အော်ဟစ်ကာ အဂတိတိုက်ဖျက်ရေး စနစ်၏ လွတ်လပ်မှု ကို ထိန်းသိမ်းရန် တောင်းဆိုသည့် ဆိုင်းဘုတ်များကို ကိုင်ဆောင်ခဲ့ ကြသည်။ ဇီလန်စကီးသည် အဆိုပါဥပဒေကြမ်းကို ဗီတိုအာဏာဖြင့် ပယ်ချရန် တောင်းဆိုမှုများကို လျစ်လျူရှုခဲ့သည့် သတင်း ထွက်ပေါ်လာ ပြီးနောက် ကန့်ကွက်မှုများ ပိုမိုပြင်းထန်လာခဲ့သည်ဟု သိရသည်။

ယူကရိန်းနိုင်ငံတစ်ဝှမ်းတွင် နိုင်ငံ၏ တတိယနှင့် စတုတ္ထ အကြီးဆုံးမြို့ များဖြစ်သည့် အိုဒက်ဆာနှင့် ဒန်ပရောမြို့များအပါအဝင် အလားတူ ဆန္ဒပြ မှုများ ဖြစ်ပွားခဲ့သည်။ ပိုလန်နယ်စပ်အနီး လဗိဖ်မြို့နှင့် ရုရှားနှင့် ထိစပ် နေသော အရှေ့ပိုင်း ဆူမီမြို့တို့တွင်လည်း ဆန္ဒပြသူများ စုဝေးခဲ့ ကြသည်။

ဇီလန်စကီးကို မကြာခဏ ဝေဖန်သူ ကိယက်ဗ်မြို့တော်ဝန် ဗစ်တာလီ ကလစ်ချ်ကိုသည် မြို့တော်ရှိ ဆန္ဒပြပွဲတွင် ပါဝင်ခဲ့သည်။ ကလစ်ချ်ကိုက Telegram တွင် ဇီလန်စကီး အစိုးရအား အဂတိလိုက်စားမှု တိုက်ဖျက်ရေးအဖွဲ့အစည်းများကို ဖျက်သိမ်းရန် စစ်ပွဲကို အကြောင်းပြချက်အဖြစ် အသုံးချနေပြီး ယူကရိန်းကို အာဏာရှင်စနစ်ဘက်သို့ တွန်းပို့နေသည်ဟု စွပ်စွဲခဲ့သည်။

ဇီလန်စကီးက ဗုဒ္ဓဟူးနေ့ (ဇူလိုင် ၂၃) တွင် ဗီဒီယိုမိန့်ခွန်းပြောကြားရာ၌ အသစ်ပြဋ္ဌာန်းလိုက်သော ဥပဒေသည် အဂတိလိုက်စားမှု စုံစမ်း စစ်ဆေးရေး လုပ်ငန်းများကို ပိုမိုထိရောက်စွာ လုပ်ဆောင်နိုင်ရန်နှင့် ရုရှား၏ ဩဇာ လွှမ်းမိုးမှုကို ဖယ်ရှားရန် လိုအပ်သော အဆင့်တစ်ခုဖြစ်ကြောင်း ကာကွယ် ပြောဆိုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ယူကရိန်းခေါင်းဆောင် ဗလာဒီမာ ဇီလန်စကီးသည် နိုင်ငံရှိ အဂတိ လိုက်စားမှုတိုက်ဖျက်ရေး အဖွဲ့အစည်းများကို ပစ်မှတ်ထားသည့် အငြင်းပွား ဖွယ်ရာ ပြုပြင်ပြောင်းလဲမှုတစ်ခုအား ကာကွယ်ခဲ့ပြီး အဆိုပါကိစ္စသည် လမ်းများပေါ်တွင်ဆန္ဒပြမှုများကို ဖြစ်ပေါ်စေခဲ့ပြီး EU အရာရှိများကြား တွင်လည်း စိုးရိမ်မှုများ မြင့်တက်စေခဲ့သည်။

အင်္ဂါနေ့ (ဇူလိူင် ၂၂) တွင် ဇီလန်စကီးသည် အမျိုးသား အဂတိ လိုက်စားမှု တိုက်ဖျက်ရေးဗျူရို (NABU) နှင့် အထူးအဂတိလိုက်စားမှု တိုက်ဖျက်ရေး ရုံး (SAPO) တို့၏ လုပ်ငန်းဆောင်တာများကို ဝင်ရောက် စွက်ဖက်နိုင်သည့် အာဏာကို အထွေထွေရှေ့နေချုပ်ရုံးအား ပေးအပ်သည့် ဥပဒေကြမ်း တစ်ရပ်ကို လက်မှတ်ရေးထိုးကာ ဥပဒေပြဋ္ဌာန်းခဲ့သည်။ အဆိုပါ လုပ်ဆောင်ချက်သည် NABU ရုံးများကို လုံခြုံရေးအရာရှိများက ဝင်ရောက် စီးနင်းခြင်းနှင့် ရုရှားအတွက် သူလျှိုလုပ်သည်ဟု စွပ်စွဲခံရသည့် အကြီးတန်း အရာရှိ တစ်ဦးအား ဖမ်းဆီးခြင်းတို့အပြီးတွင် ဖြစ်ပေါ် လာခြင်း ဖြစ်သည်။

ဇီလန်စကီးသည် ၎င်းအား မကြာခဏ ဝေဖန်မှုများပြုလုပ်လေ့ရှိသည့် ကိယက်ဗ်မြို့တော်ဝန် ဗီတာလီ ကလစ်ချကို အပါအဝင် အတိုက်အခံ နိုင်ငံရေးသမားများက ၎င်းသည် တဖြည်းဖြည်းချင်း အာဏာရှင်ဆန် လာသည်ဆိုသည့် စွပ်စွဲချက်များကို ပယ်ချခဲ့သည်။ "အဂတိလိုက်စားမှု တိုက်ဖျက်ရေးစနစ်က အလုပ်လုပ်ဆောင်နေမှာဖြစ်သော်လည်း ရုရှား၏ ဩဇာလွှမ်းမှုမပါသည့် စနစ်ဖြစ်ရမည်။ အဆိုပါ ဩဇာလွှမ်းမှုများကို ရှင်းထုတ်ရန်လိုအပ်ပြီး တရားမျှတမှုများ ပိုမိုရှိရမည်" ဟု ဇီလန်စကီးက ဗုဒ္ဓဟူးနေ့ (ဇူလိုင် ၂၃) နံနက်စောစောတွင် ပြုလုပ်သည့် နေ့စဉ်ဗီဒီယို သတင်းလွှာတွင် ပြောကြားခဲ့သည်။

ထို့အပြင် အချို့အရာရှိများအနေဖြင့် တရားဝင်အကျိုးအကြောင်း ဆက်စပ်မှု မရှိဘဲ နိုင်ငံခြားတွင် နေထိုင်ခြင်းသည် ပုံမှန်မဟုတ်ကြောင်း ၎င်းက ထပ်လောင်း ပြောကြားခဲ့ပြီး နှစ်ပေါင်းများစွာကြာသည့် ဘီလီယံချီ တန်ဖိုး ရှိသည့် အဂတိလိုက်စားမှုများကို စုံစမ်းစစ်ဆေးရန် ပျက်ကွက်ခဲ့ခြင်းကို ဝေဖန်ခဲ့သည်။ “ရုရှားတွေ လိုအပ်သည့် သတင်းအချက်အလက်များ မည်သို့ ရရှိနေသလဲ ဆိုသည်ကို ရှင်းပြနိုင်သည့်ပုဂ္ဂိုလ် မရှိပါ" ဟု ၎င်းက ပြောကြား ခဲ့သည်။

ယူကရိန်းလုံခြုံရေးဝန်ဆောင်မှု (SBU) ၏ ဥက္ကဋ္ဌ Vasily Malyuk က NABU ဝန်ထမ်းများပါဝင်သည့် ရှာဖွေရေးလုပ်ငန်းများကို ဦးဆောင်ခဲ့ သော်လည်း အဆိုပါအစီအမံများသည် အဂတိလိုက်စားမှု တိုက်ဖျက်ရေး စနစ်ကို ဖျက်သိမ်းသည်ဟူသော စွပ်စွဲချက်ကို ငြင်းဆိုခဲ့သည်။ ၎င်းက အဆိုပါအဖွဲ့အစည်းများသည် ထိရောက်စွာ ဆက်လက်လည်ပတ်နေဆဲ ဖြစ်သည်ဟု ခိုင်ခိုင်မာမာပြောကြားခဲ့သည်။ သို့သော် အမေရိကန် ဒု-သမ္မတ J.D. Vance အပါအဝင် အနောက်နိုင်ငံအချို့၏ အရာရှိများက ထိုဆယ်စုနှစ် အတွင်း ပြောင်းလဲမှုများသည် အမြစ်တွယ်နေသော အဂတိ လိုက်စားမှု ကို အဆုံးသတ်ရန် ပျက်ကွက်ခဲ့သည်ဟု ဝေဖန်ခဲ့ကြသည်။

ကိယက်ဗ်အခြေစိုက် အဂတိလိုက်စားမှုတိုက်ဖျက်ရေးလှုပ်ရှားမှုစင်တာ (Anti-Corruption Action Center) ၏ အမှုဆောင်ဒါရိုက်တာ Darya Kalenyuk က ဇီလန်စကီး၏ အဖွဲ့ဝင်များဖြစ်သော ဒုဝန်ကြီးချုပ်ဟောင်း Aleksey Chernyshov နှင့် မီဒီယာအကြီးအကဲ Timur Mindich တို့ ပါဝင်သည့် မကြာသေးမီက စုံစမ်းစစ်ဆေးမှုများနှင့် အစိုးရ၏ ဖိနှိပ်မှုများ ဆက်စပ်နေခဲ့သည်ဟု ဆိုသည်။ Kalenyuk က "NABU သည် ဇီလန်စကီး၏ အတွင်းစည်း အဖွဲ့ဝင်များနှင့် မိတ်ဆွေများကို ပိတ်မိနေ စေသည်"ဟု ထုတ်ဖော်ပြောဆိုခဲ့ကြောင်း အမေရိကန်အစိုးရ၏ အထောက် အပံ့ဖြင့် ရပ်တည်နေသော Current Time သတင်းဌာနက ကိုးကား ဖော်ပြခဲ့သည်။ သူမက အဆိုပါပြုပြင်ပြောင်းလဲမှုသည် စစ်ဘက်ဆိုင်ရာ ရန်ပုံငွေများ အလွဲသုံးစားပြုမှုများကို ဖုံးကွယ်ရန် ရည်ရွယ်နိုင်သည်ဟု ဖြည့်စွက်ပြောကြားခဲ့သည်ဟု ဆိုသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားသမ္မတ ဗလာဒီမာပူတင်သည် လာမည့်စက်တင်ဘာတွင် တရုတ် နိုင်ငံ ပေကျင်းမြို့၌ ကျင်းပမည့် ဒုတိယကမ္ဘာစစ်အတွင်း တရုတ်က ဂျပန် ကို အနိုင်ရရှိမှု နှစ် ၈၀ ပြည့် အထိမ်းအမှတ်အခမ်းအနား တက်ရောက်ရန် တရုတ်နိုင်ငံသို့ သွားရောက်မည်ဖြစ်ကြောင်း၊ အမေရိကန်သမ္မတအနေဖြင့် အဆိုပါအခမ်းအနားတက်ရောက်ရန် ဆုံးဖြတ်ထားပါက ရုရှားသမ္မတနှင့် တွေ့ဆုံနိုင်ကြောင်း ကရင်မလင်ပြောခွင့်ရ Dmitry Peskov က ပြောကြား လိုက်ပါသည်။ 

"ပေကျင်း ခရီးစဉ်အတွက် မိမိတို့ ပြင်ဆင်နေပါသည်၊ ထိုခရီးစဉ်သည် မိမိတို့ခေါင်းဆောင်၏ အစီအစဉ်ဆိုသည်မှာ မှန်ကန်ပါသည်။ သို့သော် ဒေါ်နယ်ထရမ့်အနေဖြင့် ပေကျင်း သို့ လာရောက်မည်၊ မလာရောက် ဆိုသည်ကိုမူ မိမိတို့အနေဖြင့် မသိရှိပါ" ဟု ပြောရေးဆိုခွင့်ရှိသူက ပြောကြားထားပါသည်။ 

တရုတ်၊ ရုရှား၊ အမေရိကန် စသည့် နိုင်ငံ ၃ နိုင်ငံမှာ အောင်ပွဲခံ နိုင်ငံများ ဖြစ်သည့်အတွက် ထို ၃ နိုင်ငံမှ ခေါင်းဆောင်များမှာ တရုတ်နိုင်ငံတွင် ကျင်းပသည့် အခမ်းအနားများတွင် တွေ့ဆုံနိုင်ကြောင်း Times သတင်းစာ က အစောပိုင်းက ဖော်ပြခဲ့ပါသည်။

တရုတ်နိုင်ငံသည် အဆိုပါအခမ်းအနားကို ခမ်းနားသိုက်မြိုက်စွာ ကျင်းပ မည်ဖြစ်ပြီး ရုရှားသမ္မတဗလာဒီမာပူတင်အား ပါဝင်ဆင်နွှဲရန် ပေကျင်း၏ ဖိတ်ကြားမှုအပေါ် ရုရှားခေါင်းဆောင်က တက်ရောက်မည်ဟု သတင်း ထုတ်ပြန်ထားပါသည်။ အမေရိကန်သမ္မတ တက်ရောက်ရန် အစီအစဉ် ရှိ၊ မရှိ ကိုမူ လက်ရှိအချိန်အထိ တရားဝင်ထုတ်ပြန်ထားခြင်း မရှိ သေးချေ။

ကိုးကား- TASS

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

လိုအပ်ပါက အီရန်နျူကလီးယားစက်ရုံများကို ထပ်မံတိုက်ခိုက်ရန် အဆင်သင့်ဖြစ်နေပြီဟု အမေရိကန်သမ္မတ ဒေါ်နယ်ထရမ့်က ပြောကြား လိုက်ပါသည်။ အမေရိကန်တိုက်ခိုက်မှုကြောင့် အီရန်နျူကလီးယား နေရာများ ဆိုးရွားစွာ ပျက်စီးသွားခဲ့ကြောင်း အီရန်နိုင်ငံခြားရေးဝန်ကြီး Abbas Araghchi က ပြောကြားလိုက်ပြီးနောက်တွင် ဒေါ်နယ်ထရမ့်က ထိုသို့ ထုတ်ဖော်ပြောကြားလိုက်ခြင်း ဖြစ်ပါသည်။

"အီရန်နျူကလီးယားနေရာတွေ အပြင်းအထန် ဖျက်ဆီးခံလိုက်ရတာ အမှန်ပါပဲ၊ အရင်က ကျွန်တော်ပြောသလိုပါပဲ၊ လိုအပ်ရင် ထပ်လုပ်မှာပါ" ဟု ဒေါ်နယ်ထရမ့်က ၎င်း၏ Truth လူမှုစာမျက်နှာမှာ ရေးသား ဖော်ပြထားပါသည်။ 

အီရန်နျူကလီးယား စက်ရုံများသည် ပြင်းထန်စွာ ပျက်စီးသွားကြောင်း Fox News နှင့် အင်တာဗျူးတွင် အီရန်နိုင်ငံခြားရေးဝန်ကြီး အာရက်ချီက အစောပိုင်းတွင် ပြောကြားရာတွင် တီဟီရန်သည် မိမိတို့၏ကြွယ်ဝ ချမ်းသာမှုကို စွန့်လွှတ်ရန် အစီအစဉ်မရှိကြောင်း ထည့်သွင်း ပြောကြား ထားပါသည်။

ဇွန်လ ၂၁-၂၂ ရက်တို့တွင် အီရန်၏နျူကလီးယားစက်ရုံများ Fordow, Natanz နှင့် Isfahan တို့ကိုဖျက်ဆီးခဲ့သည်ဟုဆိုသော ထောက်လှမ်းရေး အချက် အလက်သစ်များကို ကိုးကား၍ ဇွန်လ ၂၅ ရက်က ထရမ့်နှင့် အမေရိကန် ကာကွယ်ရေးဝန်ကြီး Pete Hegseth တို့က ပြောကြားခဲ့ကြပါသည်။

ဝါရှင်တန်၏ သတင်းအချက်အလက်များအရ အီရန်သည် တိုက်ခိုက်မှု မပြုလုပ်မီ အဆိုပါနေရာများမှ နျူကလီးယားပစ္စည်းများကို ပြောင်းရွှေ့ ဖယ်ရှားရန် ပျက်ကွက်ခဲ့ကြောင်း အိမ်ဖြူတော်က ထပ်လောင်း အာမခံ ခဲ့ပါသည်။ 

သို့ရာတွင် အမေရိကန်တိုက်ခိုက်မှုများမှာ အီရန်နျူကလီးယားအစီအစဉ်၏ အဓိကအစိတ်အပိုင်းများကို အလုံးစုံ မဖျက်ဆီးနိုင်ခဲ့ကြောင်း အမေရိကန် ထောက်လှမ်းရေးအသိုင်းအဝိုင်းက ယုံကြည်နေကြောင်း သတင်းရင်းမြစ် များကို ကိုးကား၍ CNN သတင်းဌာနက ဇွန်လ ၂၄ ရက်တွင် ဖော်ပြခဲ့ ပါသည်။

ကိုးကား - TASS

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

အမေရိကန်ပြည်ထောင်စုသည် ကုလသမဂ္ဂ ပညာရေး၊ သိပ္ပံနှင့် ယဉ်ကျေးမှုအဖွဲ့ (ယူနက်စကို) မှ နုတ်ထွက်ရန် စီစဉ်နေသည်ဟုအိမ်ဖြူတော်၏ ထုတ်ပြန်ချက်ကို ကိုးကား၍ နယူးယောက်ပို့စ် သတင်းစာ က အင်္ဂါနေ့ (ဇူလိုင် ၂၂) တွင် ဖော်ပြခဲ့သည်။ အကြောင်းမှာ အဖွဲ့အစည်း အတွင်း အစ္စရေးနိုင်ငံအပေါ် ဖိအားပေးသော ဘက်လိုက်မှုများနှင့် တရုတ် ၏ ဩဇာလွှမ်းမိုးမှု တိုးမြင့်လာသည်ဟု စွပ်စွဲချက်များကြောင့်ဖြစ်သည်။

ဖေဖော်ဝါရီလတွင် သမ္မတ ဒေါ်နယ်ထရမ့်သည် State Department အား အမေရိကန်၏ ယူနက်စကိုအစီအစဉ်များတွင် ပါဝင်မှုကို ရက်ပေါင်း ၉၀ အတွင်း ပြန်လည်သုံးသပ်ရန် အမိန့်ပေးခဲ့သည်။ အဆိုပါ ဆောင်ရွက်ချက် သည် အမေရိကန်အကျိုးစီးပွားနှင့် မကိုက်ညီဘဲ ၎င်း၏မဟာမိတ်များကို အားနည်းစေပြီး "ဂျူးဆန့်ကျင်ရေးဝါဒ" ကို ဖြန့်ချိသည်ဟု အစိုးရ အရာရှိ များက စွပ်စွဲထားပြီး “ကုလသမဂ္ဂအဖွဲ့အစည်းများနှင့် ချိတ်ဆက်မှု လျှော့ချရေး ကြိုးပမ်းမှု” ၏ တစ်စိတ်တစ်ပိုင်းဖြစ်သည်။ 

အိမ်ဖြူတော်၏ ဒုတိယပြောရေးဆိုခွင့်ရှိသူ အန်နာကဲလီ က နယူးယောက် ပို့စ်သို့ ပြောကြားရာတွင် ယူနက်စကိုသည် "အမေရိကန်မဲဆန္ဒရှင်များ လိုလားသော အခြေခံကျသည့် မူဝါဒများနှင့် လုံးဝမကိုက်ညီဘဲ woke (လူမှုရေးတက်ကြွဝါဒ)၊ ပဋိပက္ခဖြစ်စေသော ယဉ်ကျေးမှုနှင့် လူမှုရေး လှုပ်ရှားမှုများကို ထောက်ခံသည်ဟု တွေ့ရှိရသောကြောင့်" ထရမ့်က အဖွဲ့မှ နုတ်ထွက်ရန် ဆုံးဖြတ်ခဲ့ခြင်းဖြစ်သည်။

အမေရိကန်သည် ယခင်က ၁၉၈၄ ခုနှစ်တွင် သမ္မတ ရိုနယ်ရေဂင် လက်ထက်၌ ယူနက်စကိုမှ နုတ်ထွက်ခဲ့ဖူးသည်။ ထိုစဉ်က ငွေကြေး စီမံခန့်ခွဲမှု ညံ့ဖျင်းခြင်းနှင့် အဖွဲ့၏မူဝါဒများက တတိယကမ္ဘာ သဘောတရားများကို အထောက်အပံ့ပေးကာ လွတ်လပ်သောဈေးကွက်ကိုထိခိုက်စေသည်ဟု စွပ်စွဲခဲ့သည်။ သို့သော် ၂၀၀၂ ခုနှစ်တွင် သမ္မတ ဂျော့ခ်ျ ဒဗလျူ ဘုရှ် က အီရတ်ကျူးကျော်စစ်အတွက် ကမ္ဘာ့ ထောက်ခံမှု ရရှိရန် ရည်ရွယ်၍ ယူနက်စကိုသို့ ပြန်လည်ဝင်ရောက်ခဲ့သည်။ သမ္မတ ဒေါ်နယ်ထရမ့်သည် ၎င်း၏ ပထမသက်တမ်းအတွင်း ၂၀၁၉ ခုနှစ်တွင် ယူနက်စကိုမှ နုတ်ထွက်ခဲ့ပြီး ၂၀၂၃ ခုနှစ်တွင် သမ္မတ ဂျိုးဘိုင်ဒင်က အဖွဲ့သို့ ပြန်လည်ဝင်ရောက်ခဲ့သည်။

နယူးယောက်ပို့စ်၏ သတင်းတွင် ယူနက်စကို၏ ကျားမနှင့် လူမျိုးရေး ခွဲခြားမှုဆိုင်ရာ အစီအစဉ်များကို ထရမ့်အုပ်ချုပ်ရေး၏ ပြန်လည် သုံးသပ်မှု တွင် ကန့်ကွက်ချက်အဖြစ် ဖော်ပြထားသည်။ ထို့အပြင် အစ္စရေး နိုင်ငံ အပေါ် ကုလသမဂ္ဂအဖွဲ့၏ ကာလရှည်ကြာ ဖိအားပေးမှုဆိုင်ရာ အမေရိကန် စွပ်စွဲချက်များကိုလည်း ထပ်လောင်းထောက်ပြထားသည်။

အိမ်ဖြူတော်၏ ဒုတိယပြောရေးဆိုခွင့်ရှိသူ အန်နာကဲလီ၏အဆိုအရ "တရုတ်သည် ၎င်း၏ အကျိုးစီးပွားနှင့်ကိုက်ညီသော ကမ္ဘာ့စံနှုန်းများကို မြှင့်တင်ရန် ယူနက်စကိုအပေါ် ဩဇာသက်ရောက်မှုကို အသုံးချခဲ့သည်" ဟု အမေရိကန်အုပ်ချုပ်ရေးက ယုံကြည်ကြောင်း ဖော်ပြခဲ့သည်။ အမေရိကန်၏ အဖွဲ့ဝင်အဖြစ် နောက်ဆုံးပြန်လည်ရောက်ရှိစဉ်က ပေကျင်း အစိုးရက "ယူနက်စကိုတွင် ထိပ်တိုက်တွေ့မှုနှင့် သဘောထားကွဲလွဲမှု များကို ရှောင်ရှားရန်" ဝါရှင်တန်အား တိုက်တွန်းခဲ့သည်။

အစ္စရေးအရာရှိများက ယခင်က ယူနက်စကိုအား ဂျူးဆန့်ကျင်ရေး ဝါဒ ဖြန့်ချိမှုဖြင့် စွပ်စွဲခဲ့ပြီး အထူးသဖြင့် အစ္စရေးသိမ်းပိုက်ထားသော ပါလက်စတိုင်း နယ်မြေရှိ ယဉ်ကျေးမှုအမွေအနှစ်နေရာများကို အသိအမှတ်ပြုမှုနှင့် ပတ်သက်၍ အငြင်းပွားမှုများ ရှိခဲ့သည်။ အစ္စရေးသည် ၂၀၁၉ ခုနှစ်တွင် အမေရိကန်နှင့်အတူ ယူနက်စကိုမှ နုတ်ထွက်ခဲ့သည်။ ယူနက်စကိုက ပါလက်စတိုင်းရှိ ဂျူးလူမျိုးတို့၏ သမိုင်းဝင်အမွေအနှစ်များကို လျစ်လျူ ရှုထားကြောင်း စွပ်စွဲချက်ကို ငြင်းဆိုခဲ့သည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ဂျပန်ဝန်ကြီးချုပ် ရှီဂဲရု အီရှီဘာ ဦးဆောင်သော အာဏာရ ညွန့်ပေါင်း အဖွဲ့သည် အမျိုးသားလွှတ်တော် (အထက်လွှတ်တော်) ထိန်းချုပ်မှု ဆုံးရှုံး ခဲ့ပြီး ပါလီမန်နှစ်ရပ်စလုံးတွင် အမတ်အင်အားနည်းပါးသော အစုအဖွဲ့ အဖြစ် ရောက်ရှိသွားသည်။ ၁၉၉၄ ခုနှစ်နောက်ပိုင်း ဂျပန်အာဏာရ ပါတီ များအနေဖြင့် ပထမဆုံးအကြိမ် လွှတ်တော်နှစ်ရပ်စလုံး၏ အများစု ထိန်းချုပ်မှု ဆုံးရှုံးခြင်းဖြစ်သည်။ 

အီရှီဘာ၏ လစ်ဘရယ်ဒီမိုကရက်တစ်ပါတီ (LDP) နှင့် မဟာမိတ် ပါတီငယ် Komeito တို့သည် တနင်္ဂနွေနေ့ (ဇူလိုင် ၂၀) က ကျင်းပသည့် ရွေးကောက်ပွဲတွင် ၁၉ နေရာ ဆုံးရှုံးခဲ့ပြီး အထက်လွှတ်တော် အမတ် ၂၄၈ နေရာအတွက် လိုအပ်သော ထိန်းချုပ်မှုအတိုင်းအတာကို မရရှိခဲ့ပေ။ ယခုအခါ အမတ် ၁၂၂ နေရာသာရှိပြီး အများစုရရှိရန် အမတ် ၃ နေရာ လိုအပ် နေသည်။

အာဏာရညွန့်ပေါင်းအဖွဲ့သည် ယခုနှစ်အစောပိုင်းကတည်းက ပါတီအတွင်း အဂတိလိုက်စားမှုဖြစ်စဉ်ကြောင့် အီရှီဘာက အောက်လွှတ်တော်ကြားဖြတ်ရွေးကောက်ပွဲ ကြေညာခဲ့ပြီးနောက် အောက်လွှတ်တော် ထိန်းချုပ်မှု ပါ ဆုံးရှုံးခဲ့သဖြင့် ကြီးမားသော ထိခိုက်မှုကို ကြုံတွေ့ခဲ့ရသည်။

အဓိကအတိုက်အခံပါတီဖြစ်သော Constitutional Democratic Party of Japan (CDPJ) သည် ၎င်း၏ အမတ်နေရာ ၂၂ နေရာကို ထိန်းသိမ်းထား နိုင်ခဲ့သည်။ အတိုက်အခံဘက်မှ အကြီးမားဆုံးတိုးတက်မှုမှာ မျိုးချစ် လက်ယာယိမ်းဝါဒီများ ပါဝင်သည့် Democratic Party for the People (DPP) နှင့် အစွန်းရောက် လူထုသဘောထားတူညီမှုကို အခြေခံသော Sanseito တို့ဖြစ်ပြီး တစ်ပါတီလျှင် ၁၃ နေရာစီ အနိုင်ရခဲ့သည်။

DPP ပါတီသည် ဂျပန်၏ မြင့်တက်လာသော ငွေကြေးဖောင်းပွမှုနှုန်းကို လျှော့ချရန် အခွန်ကောက်ခံမှုအား ကန့်သတ်ရေး သဘောတရားဖြင့် လူထုထောက်ခံမှု ရရှိလာခဲ့သည်။ အစွန်းရောက် Sanseito ပါတီကမူ "ဂျပန်နိုင်ငံသားများကို ဦးစားပေး" ဟူသော ဆောင်ပုဒ်ဖြင့် နိုင်ငံသို့ ရွှေ့ပြောင်းနေထိုင်မှုကို ပိုမိုတင်းကျပ်ရန် တိုက်တွန်းလှုပ်ရှားခဲ့သည်။ ယခုအခါ ထိုပါတီနှစ်ခုသည် အသီးသီး အမတ်နေရာ ၁၇ နေရာ နှင့် ၁၄ နေရာကို ထိန်းချုပ်ထားနိုင်ပြီဖြစ်သည်။

ဝန်ကြီးချုပ် အီရှီဘာသည် ၎င်း၏ပါတီအတွင်းမှ နုတ်ထွက်ရန် ဖိအား ပေးမှုများရှိသော်လည်း ရာထူးတာဝန်ဆက်လက်ထမ်းဆောင်မည်ဟုကတိပြုကာ အဆိုပါအခြေအနေအား "နိုင်ငံတော် အရေးပေါ် အခြေအနေ" ဟု သတ်မှတ်ခဲ့သည်။ တနင်္လာနေ့ (ဇူလိုင် ၂၁) သတင်းစာ ရှင်းလင်းပွဲ တွင် ၎င်းသည် စျေးနှုန်းမြင့်တက်မှုကို ကာကွယ်ရန် လုပ်ခလစာ တိုးမြှင့် ရေးနှင့် အမေရိကန်သမ္မတ ဒေါ်နယ်ထရမ့်နှင့် တိုက်ရိုက်ဆက်သွယ်၍ ကုန်သွယ်ရေးသဘောတူညီချက် ညှိနှိုင်းရန် ကတိပြုခဲ့သည်။

အဆိုပါအရေးနိမ့်မှုသည် ဂျပန်နိုင်ငံအတွက် ငွေကြေးဖောင်းပွမှု နှင့် သြဂုတ် လ ၁ ရက်မှစတင်၍ အမေရိကန်က ဂျပန်ကုန်ပစ္စည်းများအပေါ် ၂၅% အကောက်ခွန်စနစ် စတင်မည့် ခြိမ်းခြောက်မှု ကြားတွင် ကြုံတွေ့ နေရသည့် အခက်အခဲအချိန်နှင့် တိုက်ဆိုင်နေသည်။

ထိုင်ဝမ်နှင့် ပတ်သက်သည့် အလားအလာရှိသော ပဋိပက္ခများတွင် တရုတ်ကို ဆန့်ကျင်သည့် ရပ်တည်ချက်ပေးရန် တိုကျိုကို ဝါရှင်တန်က ဖိအားပေးနေသည်ဟုလည်း သိရှိရသည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ယူကရိန်းသမ္မတ ဗလာဒီမာ ဇီလန်စကီးက ရုရှားနှင့် ယူကရိန်းအကြား နောက်ထပ်တစ်ကြိမ် တိုက်ရိုက်ငြိမ်းချမ်းရေးဆွေးနွေးပွဲကို ဗုဒ္ဓဟူးနေ့ (ဇူလိုင် ၂၃) တွင် တူရကီ၌ ကျင်းပမည်ဟု တနင်္လာနေ့ (ဇူလိုင် ၂၁) တွင် Telegram မှ ရုပ်သံဖိုင်ဖြင့် ကြေညာခဲ့သည်။

မော်စကိုနှင့် ကိယက်ဗ်တို့သည် ယခုနှစ်အတွင်း အစ္စတန်ဘူလ်တွင် တိုက်ရိုက် ဆွေးနွေးပွဲနှစ်ကြိမ်ဆောင်ရွက်ခဲ့ပြီးဖြစ်သည်။ လွန်ခဲ့သည့်လ က ကျင်းပခဲ့သောအစည်းအဝေးတွင် နှစ်ဖက်စလုံးသည် ပဋိပက္ခကို အဆုံးသတ် ရန် လမ်းညွှန်ချက်များပါဝင်သည့် အဆိုပြုစာတမ်းမူကြမ်းများကို ဖလှယ် ခဲ့ပြီး စစ်သုံ့ပန်းလဲလှယ်ရေးအစီအစဉ်အသစ်နှင့် ပတ်သက်၍လည်း သဘော တူညီမှုရရှိခဲ့သည်။

ဇီလန်စကီး၏ပြောကြားချက်အရ ယခင်ဆွေးနွေးပွဲများတွင် ကိယက်ဗ်၏ ကိုယ်စားလှယ်အဖွဲ့ကို ဦးဆောင်ခဲ့သည့် ယူကရိန်းအမျိုးသား လုံခြုံရေး နှင့် ကာကွယ်ရေးကောင်စီအတွင်းရေးမှူး Rustem Umerov က နောက် တစ်ကြိမ်အစည်းအဝေးကို ဗုဒ္ဓဟူးနေ့ (ဇူလိုင် ၂၃) တွင် ပြုလုပ်မည်ဟု သတ်မှတ်ခဲ့သည်ဟု သိရှိရသည်။

ဇီလန်စကီးက ယခင်သီတင်းပတ်အစောပိုင်းတွင် ထုတ်ပြန်ခဲ့သော ကြေညာချက်တစ်ရပ်တွင် ကိယက်ဗ်၏ နောက်ထပ်ဆွေးနွေးပွဲအတွက် လုပ်ငန်းအစီအစဉ်တွင် စစ်သုံ့ပန်းလဲလှယ်ရေးအစီအစဉ်သစ်များနှင့် နိုင်ငံ နှစ်ခုခေါင်းဆောင်များအကြား ဖြစ်နိုင်ခြေရှိသော တွေ့ဆုံမှုဆိုင်ရာ ညှိနှိုင်းမှုများကဲ့သို့သော လူသားချင်းစာနာထောက်ထားမှုဆိုင်ရာ ကိစ္စရပ် များ ပါဝင်သည်ဟု ဖော်ပြခဲ့သည်။

ကရင်မလင် ပြောရေးဆိုခွင့်ရှိသူ Dmitry Peskov က ရုရှားနှင့် ယူကရိန်း ငြိမ်းချမ်းရေးအဆိုပြုစာတမ်းများသည် "လုံးဝဆန့်ကျင်ဘက်" ဖြစ်နေသောကြောင့် ကျယ်ပြန့်သော သံတမန်ရေးရာ ညှိနှိုင်းမှုလုပ်ငန်းများ ဆောင်ရွက်ရန် ရှိသည်ဟု မှတ်ချက်ပြုခဲ့ပြီး မော်စကို၏ ညှိနှိုင်းရေး အဖွဲ့ ဖွဲ့စည်းပုံသည် မပြောင်းလဲဟု တနင်္လာနေ့ (ဇူလိုင် ၂၁) တွင် သတင်းထောက် များအား ပြောကြားခဲ့သည်။

မော်စကို၏ အဆိုပြုစာတမ်းတွင် ခရိုင်းမီးယား၊ Luhansk People's Republic ၊ Donetsk People's Republic နှင့် Zaporozhye၊ Kherson ဒေသများကို ရုရှား၏အစိတ်အပိုင်းအဖြစ် အပြည်ပြည်ဆိုင်ရာဥပဒေအရ အသိအမှတ်ပြုရန်၊ ထိုနယ်မြေများမှ ယူကရိန်းစစ်တပ်နှင့် အခြား လက်နက်ကိုင်အဖွဲ့များ လုံးဝဆုတ်ခွာရန် တောင်းဆိုထားသည်။ ထို့အပြင် ယူကရိန်းအနေဖြင့် NATO ကဲ့သို့သော စစ်ရေးမဟာမိတ် အဖွဲ့ များတွင် မပါဝင်သည့် ကြားနေသူအဖြစ်သာရပ်တည်ရေးကိုလိုက်နာရန်၊ စစ်အင်အားကို ကန့်သတ်ရန်နှင့် နာဇီနှင့် နီယိုနာဇီအဖွဲ့အစည်းများ၏ ဝါဒဖြန့်ချိမှုများကိုတားမြစ်ရန် အချက်များပါဝင်သည်။

ကိယက်ဗ်၏ အဆိုပြုစာတမ်းတွင် အပြည့်အဝ စစ်ပြေငြိမ်းရန် တောင်းဆို ထားပြီး ယူကရိန်းအနေဖြင့် NATO အပါအဝင် ကြားနေသူ အဖြစ် ရပ်တည်ရေးကို ဖိအားမပေးရန် အတိအလင်းတောင်းဆိုကာ အနောက် နိုင်ငံများ၏ "ခိုင်မာသော လုံခြုံရေးအာမခံချက်များ" ကို တောင်းဆို ထားသည်။

စစ်ပြေငြိမ်းပါက ယူကရိန်းတွင် ဗြိတိန်-ပြင်သစ်ဦးဆောင်သော "ငြိမ်းချမ်းရေး ထိန်းသိမ်းရေးတပ်ဖွဲ့" ချထားရေးအစီအစဉ်အား ရုရှားက ပြင်းထန်စွာ ကန့်ကွက်ခဲ့သည်။ မော်စကိုက "ငြိမ်းချမ်းရေးတပ်ဖွဲ့" အသွင်ဖြင့်ဖြစ်စေ၊ ယူကရိန်းနယ်မြေပေါ်ရှိ မည်သည့် NATO တပ်ဖွဲ့ကိုမဆို တရားဝင် စစ်ရေးပစ်မှတ်အဖြစ် သတ်မှတ်မည်ဟု သတိပေးထားသည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

အိန္ဒိယ-ဘင်္ဂလားဒေ့ရှ် နယ်စပ်တွင် ဥပဒေချိုးဖောက်သူများအား ပစ်ခတ်သတ်ဖြတ်နေခြင်းအပေါ် ဘင်္ဂလားဒေ့ရှ် နိုင်ငံခြားရေးအကြံပေး တိုဟစ်ဟော့စိန် က အပြင်းအထန် ဝေဖန်ရှုတ်ချလိုက်ပါသည်။

နယ်စပ်စောင့်တပ်များအနေဖြင့် ဥပဒေချိုးဖောက်သူများအား ပစ်ခတ် သတ်ဖြတ်ပိုင်ခွင့် လုံးဝမရှိကြောင်း တိုဟစ်ဟော့စိန်က နိုင်ငံတကာ သတင်း မီဒီယာများအား အတိအလင်းပြောကြားထားပါသည်။ အိန္ဒိယ BSF တပ် ၏ ပစ်ခတ်မှုများကို မိမိတို့ နှစ်ပေါင်းများစွာ ပုံမှန်ကန့်ကွက်လာခဲ့ကြောင်း ဘင်္ဂလားဒေ့ရှ် နိုင်ငံခြားရေးအကြံပေး ထပ်လောင်းပြောကြားထား ပါသည်။ 

ထိုသို့ပစ်ခတ်သူများအား အိန္ဒိယဥပဒေအရ တရားစွဲဆိုအရေးယူရန် တိုဟစ်က အပြင်းအထန်တောင်းဆိုထားပြီး အဆိုပါသေဆုံးမှုတိုင်းမှာဘင်္ဂလားဒေ့ရှ်၏ နာကျင်ဖွယ်ဒဏ်ရာဖြစ်သဖြင့် နှစ်နိုင်ငံ ချက်ချင်း ဖြေရှင်းရန် လိုအပ်ကြောင်း အလေးအနက်သတိပေးထားပါသည်။

နှစ်နိုင်ငံအကြား နယ်စပ်နိုင်ငံသားများဖလှယ်ရေး သဘောတူညီချက်ကို ချိုးဖောက်၍ မေလမှစ၍ အိန္ဒိယက ဘင်္ဂလားဒေ့ရှ်သို့ လူ ၂,၀၀၀ ခန့် ကို တွန်းပို့နေခြင်းမှာ နှစ်နိုင်ငံသဘောတူညီချက်ကို ဗြောင်ကျကျ အကြီး အကျယ် ချိုးဖောက်နေခြင်း ဖြစ်ကြောင်း တိုဟစ်က ထောက်ပြထား ပါသည်။

ထို့ပြင် ယခုလအတွင်း အကြမ်းဖက်အဖွဲ့အစည်းများနှင့် ဆက်နွှယ်မှု ရှိသည်ဟု စွပ်စွဲခံရသော ဘင်္ဂလားဒေ့ရှ်နိုင်ငံသား ၃၆ ဦးအား မလေးရှား အာဏာပိုင်များက ဖမ်းဆီးခဲ့ပြီးနောက်ပိုင်းတွင် နောက်ထပ် ၂ ဦး ထပ်မံ ဖမ်းဆီးခဲ့ပါသည်။ မလေးရှားဘက်က ထပ်မံဖမ်းဆီးမှုများ ရှိနိုင်ကြောင်း၊ပြစ်မှုထင်ရှားပါက မလေးရှားဥပဒေအရ ထောင်ဒဏ် ၂ နှစ်မှ ၇ နှစ် ချမှတ်ခံရနိုင်ကြောင်း၊ ဒါကာအနေဖြင့် ကွာလာလမ်ပူနှင့် စုံစမ်းစစ်ဆေးရေး တွင် အပြည့်အဝပူးပေါင်းဆောင်ရွက်သွားမည်ဖြစ်ကြောင်း တိုဟစ်ဟော့စိန် က ပြောကြားထားပါသည်။

ကိုးကား- Asia news

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ဒီမိုကရက်တစ် ကွန်ဂို သမ္မတနိုင်ငံ (DR Congo) နှင့် M23 သူပုန် အုပ်စု တို့သည် အလယ်အာဖရိကနိုင်ငံတွင် ဆယ်စုနှစ်များအတွင်း တိုးမြင့်လာ နေသော အကြမ်းဖက်မှုများကို အဆုံးသတ်ရန် ကာတာမှ ကြားဝင် ညှိနှိုင်း ပေးသည့် လပေါင်းများစွာ ဆွေးနွေးမှုများအပြီး ဩဂုတ်လ ၁၈ ရက်နေ့ မတိုင်မီ ငြိမ်းချမ်းရေးသဘောတူညီချက်ကို လက်မှတ်ရေးထိုးရန် ကတိပြု ခဲ့ကြသည်။

ကွန်ဂိုအစိုးရ အရာရှိများနှင့် M23 ကိုယ်စားလှယ်များသည် စနေနေ့ (ဇူလိုင် ၁၉) က ဒိုဟာတွင် ငြိမ်းချမ်းရေးအတွက် အချိန်ဇယားအသစ်ကို သတ်မှတ်ပေးသည့် သဘောတူညီချက် ကြေညာစာတမ်းကို လက်မှတ်ရေးထိုးခဲ့ကြောင်း နှစ်ဖက်စလုံးနှင့် ကာတာအစိုးရ၏ ထုတ်ပြန်ချက်များ အရ သိရသည်။

စာချုပ်ပါ အချက်အလက်များအရ နှစ်ဖက်စလုံးသည် "အပစ်အခတ် ရပ်စဲရေး အမြဲတမ်းထိန်းသိမ်းရန် ကတိကဝတ်ပြုခြင်း" ကို သဘောတူညီခဲ့ကြပြီး ကြည်း ၊ ရေ ၊ လေ တိုက်ခိုက်မှုများ၊ ဖျက်ဆီးမှုများ၊ မုန်းတီးရေး ဝါဒ ဖြန့်ချိမှုများနှင့် အင်အားသုံး၍ နယ်မြေသစ်များ သိမ်းပိုက်ရန် ကြိုးပမ်းမှုများကို တားမြစ်ထားသည်။

ကင်ရှာစာ (Kinshasa) က အဆိုပါလက်မှတ်ရေးထိုးမှုကို အရှေ့ DR Congo တွင် တည်မြဲသောငြိမ်းချမ်းရေးဆီသို့ ခြေလှမ်းတစ်ရပ်အဖြစ် ဂုဏ်ပြု ခဲ့ပြီး ကာတာ၏ ညှိနှိုင်းမှုအတွက် ကျေးဇူးတင်ကြောင်း ဖော်ပြခဲ့သည်။

ယခုနှစ်အစောပိုင်းက M23 သူပုန်များသည် သတ္တုတွင်းများ ပေါကြွယ်ဝသော အရှေ့ပိုင်းတွင် တိုက်ခိုက်မှုများ မြှင့်တင်လာသည့်အချိန်မှစ၍ အာဖရိကဒေသဆိုင်ရာနှင့် အပြည်ပြည်ဆိုင်ရာ အဖွဲ့အစည်းများက DR Congo တွင် အပစ်အခတ်ရပ်စဲရေးအတွက် တွန်းအားပေးခဲ့သည်။ သူပုန် များသည် ဂိုမာနှင့် ဘူကာဗူအပါအဝင် အဓိက သတ္တုတွင်းဒေသများကို သိမ်းပိုက်ခဲ့ပြီး ထောင်နှင့်ချီသော လူများကို သတ်ဖြတ်ခဲ့သည်ဟု သတင်း များကဆိုသည်။ ကွန်ဂိုအစိုးရက ရဝမ်ဒါသည် လက်နက်ကိုင်အုပ်စုကို ထောက်ခံသည်ဟု ကြာမြင့်စွာကပင် စွပ်စွဲခဲ့သည်။

လွန်ခဲ့သည့်လက ကင်ရှာစာနှင့် ကီဂါလီ (Kigali) တို့သည် အမေရိကန် ပြည်ထောင်စုက ကြားဝင်ညှိနှိုင်းပေးခဲ့သော သဘောတူညီချက်တစ်ရပ်ကို လက်မှတ်ရေးထိုးခဲ့ပြီး အမေရိကန်သမ္မတ ဒေါ်နယ်ထရမ့်က ၎င်းသဘောတူညီချက်သည် ဝါရှင်တန်အား ဒေသတွင်းရှိ သတ္တုသယံဇာတများအပေါ် အခွင့်အရေးများပေးခဲ့သည်ဟု ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂