အမေရိကန်ပြည်သူအများစုသည် အမေရိကန်နိုင်ငံ၏ နိုင်ငံခြား အကျင့်ပျက်ခြစားမှုရှိနေသည် ဟု ယုံကြည်နေကြကြောင်း Public First အကြံပေးကုမ္ပဏီ၏ စစ်တမ်းတစ်ခုက ဖော်ပြထားပါသည်။

The Financial Times သတင်းစာ၏ စစ်တမ်းအရ ပါဝင်ဖြေဆိုသူများ၏ ၆၀% ခန့်သည် လူသားချင်းစာနာမှု ရန်ပုံငွေများမှာ အကျင့်ပျက်ခြစားမှု သို့မဟုတ် စီမံခန့်ခွဲမှုစရိတ်အနေဖြင့်သာ အသုံးပြုသည်ဟု ယုံကြည်ကြောင်း ဖြေကြားထားပါသည်။ ၁၂% သာ ထိုကိစ္စကို သဘောမတူညီကြောင်း ဖြေကြားထားပါသည်။ 

ထိုအချက်မှာ အမေရိကန်သမ္မတ ဒေါ်နယ်ထရမ့်နှင့် လက်ရှိအစိုးရ စွမ်းဆောင်မှုမြင့်တင်ရေးဌာန (DOGE) အကြီးအကဲ အီလွန်မတ်စ်တို့၏ အမြင်နှင့်ကိုက်ညီသည်ဟု The Financial Times သတင်းစာက ဖော်ပြသည်။

ဖေဖော်ဝါရီအစောပိုင်းတွင် ထရမ့်သည် အမေရိကန်နိုင်ငံတကာ ဖွံ့ဖြိုးရေးအေဂျင်စီ (USAID) ၏လုပ်ငန်းများမှာ ရိုးသားမှုမရှိကြောင်း ဖော်ပြခဲ့သည်။ ထို့အပြင် Reuters သတင်းဌာနက အမေရိကန်အစိုးရသည် USAID ၏ ဝန်ထမ်းအရေအတွက်ကို လက်ရှိ ၁၀,၀၀၀ မှ ၂၉၄ သို့ ၃၀ ဆကျော် လျှော့ချရန် စီစဉ်နေကြောင်း ဖော်ပြထားပါသည်။ 

ကိုးကား- TASS

Photo: Financial Times

ယူကရိန်းသမ္မတရွေးကောက်ပွဲကို ၂၀၂၅ ခုနှစ်၊ အောက်တိုဘာ ၂၆ ရက် တွင် ကျင်းပမည်ဖြစ်ကြောင်း ယခင်ယူကရိန်းသမ္မတဟောင်း Pyotr Poroshenko က Strana မီဒီယာသို့ ပြောကြားလိုက်ပါသည်။

၎င်း၏အဆိုအရ ယူကရိန်း ဗဟိုရွေးကောက်ပွဲကော်မရှင်သည် ရွေးကောက်ပွဲ မတိုင်မီ မဲဆန္ဒရှင်စာရင်းများကို စတင်ညှိနှိုင်းလုပ်ဆောင်နေပြီဟု သိရပါသည်။ 

ကိုးကား- TASS

Photo: Britannica

တောင်ကိုရီးယားအစိုးရသည် နိုင်ငံအတွင်း တရုတ်ပိုင် chatbot တစ်ခု ဖြစ်သည့် DeepSeek အသုံးပြုမှုကို ယာယီ ပိတ်ပင်ရန် ဆုံးဖြတ်လိုက်ကြောင်း ကိုယ်ရေးအချက်အလက် ကာကွယ်ရေးကော်မရှင်က ဖေဖော်ဝါရီ ၁၇ ရက်တွင် သတင်းထုတ်ပြန်လိုက်ပါသည်။

 chatbot ဖန်တီးသူများအနေဖြင့် DeepSeek ကို တောင်ကိုရီးယား ဥပဒေနှင့်အညီ လုပ်ဆောင်ချက်ကို အပြောင်းအလဲများပြုလုပ်ပြီးမှသာ အဆိုပါပိတ်ပင်မှုကို ရုတ်သိမ်းသွားမည်ဖြစ်ကြောင်း ပြောကြားထား ပါသည်။

တောင်ကိုရီးယားအာဏာပိုင်များသည် ပြီးခဲ့သည့်လက တရုတ်ဘက်သို့ DeepSeekနှင့်ပတ်သက်၍ တရားဝင်တောင်းဆိုမှုတစ်ခု ကမ်းလှမ်းထားပြီး ကိုယ်ရေးကိုယ်တာ အချက်အလက်များ စုဆောင်းခြင်းအပါအဝင် chatbot ၏ လုပ်ဆောင်ချက်အသေးစိတ်များကို ရှင်းပြရန် တောင်းဆိုခဲ့ခြင်းဖြစ်ကြောင်း ကော်မရှင်က ထောက်ပြထားပါသည်။

တောင်ကိုရီးယား၏ ထိပ်တန်းစွမ်းအင်ကုမ္ပဏီ Korea Hydro & Nuclear Power (KHNP) နှင့် KEPCO KPS တို့မှ ဝန်ထမ်းများ DeepSeek အသုံးပြုခြင်းကို ယခင်ကတည်းက တားမြစ်ခဲ့ပါသည်။

ကိုးကား- TASS

ရုရှားနိုင်ငံခြားရေးဝန်ကြီး ဆာဂေးလာဗရော့ဗ်နှင့် သမ္မတ ဗလာဒီမာ ပူတင်၏ နိုင်ငံခြားရေးမူဝါဒ အကြံပေးဖြစ်သူ ယူရီအူရှာကော့ဗ်တို့သည် ရုရှားသမ္မတနှင့် အမေရိကန်သမ္မတ ဒေါ်နယ်ထရမ့်တို့ လာမည့်အစည်းအဝေး အတွက် အခြေအနေများပြင်ဆင်ရန် ဆော်ဒီအာရေးဗီးယားသို့ ဖေဖော်ဝါရီ ၁၇ ရက်နေ့တွင် သွားရောက်မည်ဖြစ်ကြောင်း ကရင်မလင်၏ ပြောရေးဆိုခွင့်ရှိသူ ဒီမီထရီပက်စကော့က ကြေညာခဲ့သည်။

ပြီးခဲ့သည့်အပတ်က ထရမ့်သည် သမ္မတအဖြစ် ပြန်လည်တာဝန်ယူ ပြီးနောက် ပူတင်နှင့် ပထမဆုံးအကြိမ် တယ်လီဖုန်းမှတစ်ဆင့် မိနစ် ၉၀ ကြာ စကားပြောပြီးနောက် မော်စကိုနှင့် ဝါရှင်တန်တို့က သမ္မတနှစ်ဦးသည် မကြာမီ မျက်နှာချင်းဆိုင်တွေ့ဆုံမည်ဖြစ်ပြီး ထိပ်သီးအစည်းအဝေးကို ဆော်ဒီအာရေးဗီးယား၏ မြို့တော် ရီယာ့ဒ်တွင် ကျင်းပမည်ဖြစ်ကြောင်း ကြေညာခဲ့သည်။

ဖေဖော်ဝါရီ ၁၇ ရက်နေ့တွင် သတင်းထောက်များနှင့် ပြောကြားရာ၌ ပက်စကော့ဗ်က လာဗရော့ဗ်နှင့် အူရှာကော့ဗ်တို့သည် ပူတင်၏ ညွှန်ကြားချက်အရ ရီယာ့ဒ်သို့ သွားရောက်ကာ အမေရိကန် ကိုယ်စားလှယ် အဖွဲ့နှင့် ဖေဖော်ဝါရီ ၁၈ ရက်နေ့တွင် တွေ့ဆုံမည်ဖြစ်ကြောင်း ပြောကြားခဲ့သည်။ ယခုဆွေးနွေးပွဲသည် ယူကရိန်းအရေးအခင်း ဖြေရှင်းရန်နှင့်ပူတင်-ထရမ့် ထိပ်သီးအစည်းအဝေး စီစဉ်ရေးအပါအဝင် နှစ်နိုင်ငံဆက်ဆံရေး ပြန်လည်တည်ဆောက်ရေးကို အာရုံစိုက် ဆောင်ရွက်မည် ဖြစ်သည်ဟု သိရှိရပါသည်။

ထရမ့်သည် ၎င်း၏ရွေးကောက်ပွဲ ကမ်ပိန်းတစ်လျှောက်လုံးတွင် သမ္မတ အဖြစ် ပြန်လည်တာဝန်ယူရပါက ယူကရိန်းပဋိပက္ခကို အမြန်ဆုံး ဖြေရှင်းမည်ဟု ထပ်ခါတလဲလဲ ကတိပြုခဲ့သည်။ 

ကိုးကား-RT

အမေရိကန်-ရုရှား ကိုယ်စားလှယ်အဖွဲ့များ ပါဝင်မည့် ယူကရိန်းဆိုင်ရာ ဆွေးနွေးပွဲများကို လာမည့် ဖေဖော်ဝါရီ ၁၈ ရက်နေ့တွင် ဆော်ဒီ အာရေးဗီးယား၏ မြို့တော် ရီယာ့ဒ်မြို့တွင် ကျင်းပမည်ဖြစ်ကြောင်း Kommersant သတင်းစာက ဖေဖော်ဝါရီ ၁၆ ရက်နေ့တွင် ဖော်ပြ ခဲ့သည်။

The Washington Post ကလည်း ယခင်က အမေရိကန်၏ အကြီးတန်း အရာရှိများသည် လာမည့် ရက်သတ္တပတ်အတွင်း ရုရှား ကိုယ်စားလှယ်များနှင့် ရီယာ့ဒ်မြို့တွင် တွေ့ဆုံဆွေးနွေးမည်ဟု ဖော်ပြခဲ့သည်။

Kommersant ၏ ဖော်ပြချက်အရ အမေရိကန်ဘက်မှ နိုင်ငံခြားရေး ဝန်ကြီး Mark Rubio၊ အမေရိကန် အမျိုးသား လုံခြုံရေးအကြံပေး Mike Walz နှင့် အမေရိကန်သမ္မတ၏ အရှေ့အလယ်ပိုင်းဆိုင်ရာ အထူး ကိုယ်စားလှယ် Steve Witkoff တို့ ပါဝင်မည်ဟု မျှော်လင့်ရသည်။

Politico သတင်းစာက ဖေဖော်ဝါရီ ၁၅ ရက်နေ့တွင် ထိုအစီအစဉ် နှင့်ဆက်နွှယ်သော သတင်းရင်းမြစ်များကို ကိုးကား၍ အမေရိကန် သမ္မတ Donald Trump ၏ အုပ်ချုပ်ရေးအဖွဲ့မှ အကြီးတန်း အရာရှိ များသည် လာမည့်ရက်များအတွင်း ဆော်ဒီအာရေးဗီးယားတွင် ရုရှား နှင့်ယူကရိန်း ညှိနှိုင်းသူများနှင့် ငြိမ်းချမ်းရေးဆွေးနွေးပွဲများ စတင်မည် ဟု ဖော်ပြခဲ့ပြီး Waltz၊ Rubio၊ နှင့် Witkoff တို့သည် ဆော်ဒီ အာရေးဗီးယားသို့ သွားရောက်မည်ဟု ဆိုသည်။ သို့သော် ယူကရိန်း-ရုရှား ဆွေးနွေးပွဲများအတွက် အထူးကိုယ်စားလှယ် Keith Kellogg တက်ရောက်မည် မဟုတ်ဟု သတင်းက ဖော်ပြသည်။

Bloomberg ၏ ဖော်ပြချက်အရ ရုရှားသမ္မတ Vladimir Putin နှင့် အမေရိကန်သမ္မတ Donald Trump တို့သည် လာမည့် လကုန်ပိုင်းတွင် ဆော်ဒီအာရေးဗီးယားတွင် တွေ့ဆုံနိုင်သည်ဟု ဆိုသည်။ အမေရိကန် ကိုယ်စားလှယ်အဖွဲ့တွင် အမျိုးသားလုံခြုံရေးအကြံပေးများ ပါဝင်မည်ဖြစ်ပြီး ဖေဖော်ဝါရီ ၂၈ ရက်တွင် တွေ့ဆုံနိုင်ရေး စီစဉ်လျက်ရှိကြောင်း သိရှိရပါသည်။

ကိုးကား-RT

ယူကရိန်း သမ္မတ Zelensky လည်း ရုရှားနှင့် အမေရိကန်တို့အကြား ငြိမ်းချမ်းရေးဆွေးနွေးပွဲများတွင် ပါဝင်မည်ဖြစ်ကြောင်း Trump က ပြောကြားခဲ့သည်။

“ပူတင်က စစ်ပွဲကို အမြန်အဆုံးသတ်လိုကြောင်း နှင့် ရုရှားသမ္မတနှင့် တွေ့ဆုံမှုသည် မကြာမီတွင် ဖြစ်လာနိုင်ကြောင်း” Trump က ပြောကြားခဲ့ပါသည်။

ကိုးကား- ဒေသတွင်းမီဒီယာ

တရုတ်အာဏာပိုင်များက ယူကရိန်းပဋိပက္ခအဆုံးသတ်ရေး စေ့စပ်ညှိနှိုင်းဆွေးနွေးပွဲမှ မျှတသော သဘောတူညီချက်တစ်ခုရရှိရန် မျှော်လင့်ပြီး ရုရှား-ယူကရိန်း နှစ်နိုင်ငံငြိမ်းချမ်းရေးရရှိရန် ကြိုးပမ်းဆောင်ရွက်ရာတွင် ပါဝင်ကူညီပေးသွားမည်ဖြစ်ကြောင်း တရုတ်နိုင်ငံခြားရေးဝန်ကြီး Wang Yi က ယူကရိန်းနိုင်ငံခြားရေးဝန်ကြီး Andrey Sibiga နှင့် မြူးနစ်လုံခြုံရေးညီလာခံ၌ တွေ့ဆုံစဉ် ပြောကြားခဲ့ခြင်းဖြစ်သည်။

“နှစ်နိုင်ငံအကြား ငြိမ်းချမ်းရေးပြန်လည်ရရှိရေးအတွက် ကြိုးပမ်းအားထုတ်မှုများ အားလုံးကို ထောက်ခံပါကြောင်းနှင့် နှစ်ဖက်နိုင်ငံများအတွက် လက်ခံနိုင်ဖွယ်ရှိသော တရားမျှတပြီး ခိုင်မာသော ငြိမ်းချမ်းရေးသဘောတူညီချက်တစ်ခုကို ရရှိစေရန် မျှော်လင့်ပါကြောင်း” ဟု တရုတ် နိုင်ငံခြားရေးဝန်ကြီးက ပြောကြားထားသည်။

ယူကရိန်းပဋိပက္ခကို နိုင်ငံရေးနည်းလမ်းဖြင့် ဖြေရှင်းရေးအတွက် တရုတ်နိုင်ငံက ဆက်လက်ပါဝင်ကူညီဆောင်ရွက်သွားမည်ဖြစ်ပြီး ငြိမ်းချမ်းရေးရရှိအောင်လည်း ကြိုးပမ်းအားထုတ်သွားမည်ဖြစ်ကြောင်း ဝမ်ယိက ထပ်မံ ပြောကြားခဲ့သည်။

ကိုးကား-TASS

Photo: China Daily

ယူကရိန်းသမ္မတ ဇီလန်စကီးသည် မကြာမီကာလအတွင်း အာရပ်စော်ဘွား ပြည်ထောင်စု၊ ဆော်ဒီအာရေးဗီးယားနှင့် တူရကီနိုင်ငံများသို့ သွားရောက်မည်ဖြစ်ကြောင်း ကြေညာလိုက်ပါသည်။

အဆိုပါခရီးစဉ်အတွင်း ရုရှားနှင့် အမေရိကန် ကိုယ်စားလှယ်များနှင့် တွေ့ဆုံမည်မဟုတ်ကြောင်း၊ သွားရောက်မှုတွင် လူသားချင်းစာနာမှု အစီအစဉ်ဖြစ်သည့် အကျဉ်းသားများ လဲလှယ်မှုကိစ္စ ပါဝင်နေကြောင်း   ၎င်းက မြူးနစ်မြို့တွင် သတင်းထောက်များကို ပြောကြားခဲ့ပါသည်။

ကနဦးစွာ ဆော်ဒီအာရေးဗီးယားနိုင်ငံသို့ ချက်ချင်း သွားရောက်မည် ဖြစ်ကြောင်း၊ ဆော်ဒီဘုရင်နှင့် တွေ့ဆုံမည်ဖြစ်ကြောင်း၊ ထပ်မံ၍ ၂ ရက် ၃ ရက်အကြာတွင် တူရကီသမ္မတ အာဒိုဂန်နှင့် တွေ့ဆုံမည်ဖြစ်ကြောင်း၊ ရုရှားနှင့်အမေရိကန်တို့နှင့် တွေ့ဆုံမည်မဟုတ်ကြောင်း ဇီလန်စကီးက ပြောကြားထားပါသည်။ 

အမေရိကန်သမ္မတ ဒေါ်နယ်ထရမ့်က ယူကရိန်းအရေးကိစ္စဖြေရှင်းရန် ဆော်ဒီအာရေဗီးယားနိုင်ငံ၌ နောက်အပတ်တွင် ဆွေးနွေးမှုများ ပြုလုပ်မည်ဟု ပြောကြားထားပါသည်။ 

ကိုးကား-TASS

Photo: Apa.az

အမေရိကန်သမ္မတ ဒေါ်နယ်ထရမ့်နှင့် ရုရှားသမ္မတဗလာဒီမာ ပူတင် တို့သည် ယူကရိန်းစစ်ပွဲ ဖြေရှင်းဆွေးနွေးရန် ဖေဖော်ဝါရီလ မကုန်ဆုံးမီ ဆော်ဒီအာရေဗီးယားတွင် တွေ့ဆုံရန် စီစဉ်နေကြသည်။ အဆိုပါ ခေါင်းဆောင် နှစ်ဦးတွေ့ဆုံမှုမပြုလုပ်မီ အမေရိကန်နှင့်ရုရှားနိုင်ငံများမှ အဆင့်မြင့်အရာရှိများသည် ဖေဖော်ဝါရီ ၂၁ ရက်တွင် ဆော်ဒီအာရေး ဗီးယားနိုင်ငံတွင် ကြိုတင်တွေ့ဆုံဆွေးနွေးရန် စီစဉ်ထားကြောင်း သိရှိရပါသည်။

ဆော်ဒီအာရေးဗီးယားနိုင်ငံဘက်က ထိုဆွေးနွေးမှုများကို ဦးဆောင်ရန် အမျိုးသားလုံခြုံရေးဝန်ကြီး Mohammed al-Aiban ကို တာဝန်ပေးအပ်ထားပါသည်။

ဆော်ဒီအာရေးဗီးယားနိုင်ငံတွင် မကြာမီပြုလုပ်မည့် ဆွေးနွေးပွဲများမှာ ရုရှား-အမေရိကန်ဆက်ဆံရေးတွင် အလွန်အရေးပါနေပြီး ယူကရိန်းစစ်ပွဲ အဆုံးသတ်နိုင်ရေး အဖြေရှာနိုင်ရန် အစိုးရများအချင်းချင်း၏ အစီအစဉ်များကိုလည်း အကျိုးသက်ရောက်မှု ရှိလာနိုင်ပါသည်။ 

ကိုးကား- TASS

ဆက်စပ်သတင်းများ- https://sacministry.gov.mm/my/news/2609

အမေရိကန်ဘက်မှ အစပြုမှုဖြင့် ရုရှားဖက်ဒရေးရှင်းနှင့် အမေရိကန် ပြည်ထောင်စု၏ နိုင်ငံခြားရေးမူဝါဒဌာန အကြီးအကဲများအကြား တယ်လီဖုန်းဖြင့် စကားပြောဆိုမှုများ ပြုလုပ်ခဲ့ကြကြောင်း ရုရှား နိုင်ငံခြားရေးဝန်ကြီးဌာနက သတင်းထုတ်ပြန်ခဲ့ပါသည်။

အဆိုပါ တယ်လီဖုန်းဆက်သွယ်ပြောဆိုမှုအတွင်း ရုရှားနိုင်ငံခြားရေးဝန်ကြီး လာရော့ဗ်နှင့် အမေရိကန် နိုင်ငံခြားရေးဝန်ကြီး ရူဘီယိုတို့သည် ရုရှား-အမေရိကန် ဆက်ဆံရေးတွင် ပြဿနာများကို ဖြေရှင်းရန်အတွက် ဆက်သွယ်ရေးလမ်းကြောင်းတစ်ခုထားရှိရန် သဘောတူညီခဲ့ကြကြောင်း ရုရှားနိုင်ငံခြားရေးဝန်ကြီးဌာနက သတင်းထုတ်ပြန်ခဲ့ပါသည်။

နိုင်ငံခြားရေးမူဝါဒရေးရာဌာန အကြီးအကဲများသည် အပြန်အလှန် လေးစားမှုရှိသော နိုင်ငံအချင်းချင်း တွေ့ဆုံဆွေးနွေးမှု ပြန်လည် ထူထောင်ရန်အတွက် အတူတကွ ပူးပေါင်းလုပ်ဆောင်ရန် အဆင်သင့်ရှိကြောင်း အတည်ပြုပြောကြားခဲ့ပါသည်။ 

ယူကရိန်းနှင့် ပါလက်စတိုင်းနိုင်ငံတစ်ဝှမ်း ပဋိပက္ခဖြေရှင်းရာတွင် ပူးပေါင်းဆောင်ရွက်လိုကြောင်း ရုရှားနိုင်ငံခြားရေးဝန်ကြီးလာဗရော့ နှင့် အမေရိကန် နိုင်ငံခြားရေးဝန်ကြီး ရူဘီယိုတို့က ထုတ်ဖော် ပြောကြားခဲ့ကြောင်း ရုရှားနိုင်ငံခြားရေးဝန်ကြီးဌာနက သတင်းထုတ်ပြန်ခဲ့ပါသည်။ မကြာမီကာလအတွင်းတွင် ရုရှားနှင့် အမေရိကန်တို့သည် နိုင်ငံခြားရေး လုပ်ငန်းများ ဆောင်ရွက်ရာတွင် အတားအဆီးများကို ဖယ်ရှားရန် ကျွမ်းကျင်သူများ အစည်းအဝေးကို ကျင်းပသွားမည်ဖြစ်ကြောင်း ရုရှား နိုင်ငံခြားရေးဝန်ကြီးဌာနက ကြေညာခဲ့ပါသည်။

ထို့အပြင် ရုရှားနိုင်ငံခြားရေး ဝန်ကြီး လာဗရောဗ့် နှင့် အမေရိကန် နိုင်ငံခြားရေးဝန်ကြီး ရူဘီယို တို့သည် အမေရိကန်တွင် ရုရှားသံတမန် တာဝန်များ ထမ်းဆောင်ခြင်းဆိုင်ရာ အခြေအနေများကို တင်းကျပ်သည့် မူဝါဒကို အမြန်အဆုံးသတ်ရန် လုပ်ငန်းတာဝန်များကို ဆွေးနွေးခဲ့ကြသည်ဟု ရုရှားနိုင်ငံခြားရေး ဝန်ကြီးဌာနက မှတ်ချက်ပြုခဲ့ပါသည်။

ကိုးကား - TASS