စစ်အုပ်ချုပ်ရေးဥပဒေကို ရုတ်သိမ်းရန် တောင်ကိုရီးယားလွှတ်တော်အမတ်များက မဲခွဲဆုံးဖြတ်ခဲ့ကြောင်း YTN သတင်းဌာနက ဖော်ပြထားသည်။

ကိုးကား- YTN သတင်းဌာန

သမ္မတကတော်၏ stock လိမ်လည်မှုကို အထူး စုံစမ်းစစ်ဆေးနိုင်ရေး အမိန့်ထုတ်ရန် လွှတ်တော်က ပြင်ဆင်နေချိန်တွင် ယခုလို Martial Law ကြေညာခြင်းဖြစ်ကြောင်း၊ စစ်အုပ်ချုပ်ရေးကြေညာအပြီး ကိုရီးယားငွေကြေးဖြစ်သည့် “ဝမ်” စျေးကျဆင်းသွားပြီး ကိုရီးယား စတော့ရှယ်ယာဈေးများလည်း ကျဆင်းသွားကြောင်း၊ ကိုရီးယား ငွေကြေး “ဝမ်” သည် ဒေါ်လာနှင့် နှိုင်းယှဥ်ပါက ၂နှစ် အတွင်း အနိမ့်ဆုံးစျေးသို့ ရောက်ခဲ့ကြောင်းသိရှိရသည်။

ကိုးကား - ဒေသတွင်းမီဒီယာ

အတိုက်အခံခေါင်းဆောင် Lee Jae Myung က သမ္မတ Yun Seok Yul ကိုသမ္မတအဖြစ် ဆက်လက်မခန့်အပ်နိုင်ကြောင်းကြေညာခဲ့ပြီး လွှတ်တော်သို့ လာရောက်ရန် ပြည်သူများကို တိုက်တွန်းခဲ့ကြောင်း သိရှိရသည်။

တောင်ကိုရီးယားလွှတ်တော်အမတ်များနှင့် သတင်းထောက်များသည် ဆိုးလ်မြို့ရှိ အမျိုးသားလွှတ်တော် အဆောက်အအုံအတွင်းသို့ အထူးတပ်ဖွဲ့များ ဝင်ရောက်ခြင်းမှတားမြစ်ရန် ကြိုးပမ်းခဲ့ကြသည်။ 

ကိုးကား- ဒေသတွင်းမီဒီယာ

တောင်ကိုးရီးယားပါလီမန်ဥက္ကဋ္ဌက နိုင်ငံအတွင်း စစ်အုပ်ချုပ်ရေးသည် တရားမဝင်ကြောင်း ကြေညာပြီးနောက် တောင်ကိုရီးယားအထူးတပ်ဖွဲ့များသည် တောင်ကိုရီးယားပါလီမန်အဆောက်အအုံမှ ထွက်ခွာသွားကြောင်း YTN သတင်းဌာနက ဖော်ပြထားသည်။

ကိုးကား- YTN သတင်းဌာန

အထူးတပ်ဖွဲ့များက အမျိုးသားလွှတ်တော် အဆောက်အအုံကို ပိတ်ဆို့ထားခြင်းကြောင့် လွှတ်တော်ကိုယ်စားလှယ်များအနေဖြင့် စစ်အုပ်ချုပ်ရေးကို ကန့်ကွက်ရန်အတွက် မဲခွဲဆုံးဖြတ်ရန် ကြန့်ကြာနေကြောင်း သိရှိရသည်။

ကိုးကား - ဒေသတွင်းမီဒီယာ

ဘိုင်ဒင်အစိုးရအဖွဲ့သည် တောင်ကိုရီးယားအစိုးရနှင့် ဆက်သွယ်နေပြီး လက်ရှိအခြေအနေကို အနီးကပ် စောင့်ကြည့်နေကြောင်း အိမ်ဖြူတော်က ပြောကြား ခဲ့သည်။

ကိုးကား - The White House

တောင်ကိုရီးယား သမ္မတ Yoon Suk Yeol က တောင်ကိုရီးယားနိုင်ငံတွင် အရေးပေါ် စစ်အုပ်ချုပ်ရေး ကြေညာခဲ့ကြောင်း နိုင်ငံပိုင် Yonhap သတင်းဌာနက ဖော်ပြခဲ့သည်။

သတင်းအေဂျင်စီ၏ အဆိုအရ တောင်ကိုးရီးယား သမ္မတသည် ညအချိန်တွင် ၎င်း၏ ရုံးခန်း၌ အရေးပေါ် အစည်းအဝေးကျင်းပခဲ့ပြီး ၎င်းအား စွပ်စွဲပြစ်တင်မှု ပြုလုပ်ရန် ကြိုးပမ်းမှုများက ၎င်း၏ အာဏာပျက်ပြယ် သွားမည်ဖြစ်သောကြောင့် နိုင်ငံအတွင်း စစ်အုပ်ချုပ်ရေးကို ကြေညာခဲ့ကြောင်း ဖော်ပြထားသည်။

တောင်ကိုရီးယား စစ်အုပ်ချုပ်ရေး အမိန့်အပြည့်အစုံမှာ အောက်ပါအတိုင်းဖြစ်ပါသည်-

လစ်ဘရယ်ဒီမိုကရေစီကို ကာကွယ်ရန်နှင့် ကိုရီးယား သမ္မတနိုင်ငံအတွင်း လုပ်ဆောင်နေသော နိုင်ငံတော် ဆန့်ကျင်ရေးတပ်ဖွဲ့များ၏ခြိမ်းခြောက်မှုမှ နိုင်ငံသားများ၏ လုံခြုံမှုကို ကာကွယ်ရန်အတွက် အောက်ပါအစီအမံများကို တစ်နိုင်ငံလုံးအတိုင်းအတာဖြင့် ၂၀၂၄ခုနှစ်၊ ဒီဇင်ဘာလ ၃ ရက် ၊ ည ၁၁း၀၀ နာရီအချိန်မှစတင်၍ ကြေညာအပ် ပါသည်-

(၁)   အမျိုးသားလွှတ်တော်နှင့် ဒေသဆိုင်ရာကောင်စီများ၊ နိုင်ငံရေးပါတီများ၏ လှုပ်ရှားမှုများ၊ နိုင်ငံရေး အသင်းအဖွဲ့များ၊ စုဝေးပွဲများနှင့် ဆန္ဒပြပွဲများ အပါအဝင် နိုင်ငံရေးလှုပ်ရှားမှုအားလုံးကို တားမြစ် ထားသည်။

(၂)   လစ်ဘရယ် ဒီမိုကရေစီစနစ်ကို ဖြုတ်ချရန် ငြင်းဆိုခြင်း သို့မဟုတ် သတင်းအတုများ ဖြန့်ဝေခြင်း၊ လူထုအမြင်ကို ခြယ်လှယ်ခြင်းနှင့် မဟုတ်မမှန် ဝါဒဖြန့်ခြင်းတို့ကို တားမြစ်ပိတ်ပင်ထားသည်။

(၃)   သတင်းမီဒီယာများနှင့် ထုတ်ဝေမှုများ အားလုံးကို စစ်အုပ်ချုပ်ရေးအမိန့်ဖြင့် ထိန်းချုပ်မည်ဖြစ်သည်။

(၄)   သပိတ်မှောက်ခြင်း၊ နှောင့်နှေးခြင်းနှင့် လူမှုရေး မငြိမ်မသက်ဖြစ်စေသော စုဝေးပွဲများကို တားမြစ် ထားသည်။

(၅)   လက်ရှိသပိတ်မှောက်နေသည့် ဆရာဝန်များ သို့မဟုတ် ရာထူးမှရပ်စဲထားသော ဆေးဘက်ဆိုင်ရာ ဝန်ထမ်းအားလုံးသည် ၎င်းတို့၏ လုပ်ငန်း တာဝန်များသို့ ပြန်လည်ရောက်ရှိပြီး ၄၈ နာရီအ တွင်း အလုပ်ပြန်လည် စတင်ရမည်ဖြစ်သည်။ လိုက်နာရန် ပျက်ကွက်ပါက စစ်အုပ်ချုပ်ရေးအရ ပြစ်ဒဏ်များ ချမှတ်မည်ဖြစ်သည်။

(၆)   နိုင်ငံတော်ဆန့်ကျင်ရေး သို့မဟုတ် အဖျက်အမှောင့် အင်အားစုများတွင် မပါဝင်သည့် သာမန်ပြည်သူများ အတွက် အဆင်မပြေမှု အနည်းဆုံးဖြစ်အောင် ဆောင်ရွက်သွားမည်ဖြစ်သည်။

(၇)  အဆိုပါ ကြေညာချက်ကို ဖောက်ဖျက်ကျူးလွန်သူ များသည် ကိုရီးယားသမ္မတနိုင်ငံ စစ်အုပ်ချုပ်ရေး ဥပဒေ ပုဒ်မ ၉ အရ ဖမ်းဝရမ်းမပါဘဲ ဖမ်းဆီးခြင်း၊ ထိန်းသိမ်းခြင်း၊ ရှာဖွေဖမ်းဆီးခြင်းတို့ကို ခံရမည် ဖြစ်ပြီး၊ ပုဒ်မ ၁၄ အရ အရေးယူခြင်း ခံရမည် ဖြစ်ပါသည်။

အဆိုပါစစ်အုပ်ချုပ်ရေးကြေညာမှုသည် တောင်ကိုရီးယား နိုင်ငံတွင် (၄) ကြိမ်မြောက် စစ်အုပ်ချုပ်ရေး ကြေညာခဲ့ခြင်း ဖြစ်ပါသည်။ နောက်ဆုံးအကြိမ် စစ်အုပ်ချုပ်ရေး ကြေညာခဲ့သည်မှာ လွန်ခဲ့သော ၄၄ နှစ်နီးပါး ၁၉၈၀ ခုနှစ်တွင် ဖြစ်ခဲ့ပြီး ကျောင်းသား ရာပေါင်းများစွာ သေဆုံး ခဲ့ရကြောင်း သိရှိရသည်။

တောင်ကိုရီးယားသမ္မတ Yun Suk Yeol ကလာမည့် ၁၀ ရက် အတွင်း "နိုင်ငံတော်ဆန့်ကျင်ရေးတပ်ဖွဲ့များ" ကို ရှင်းလင်းမည်ဟု နိုင်ငံပိုင်သတင်းချန်နယ်မှ ပြောကြားခဲ့ ပါသည်။

ကိုးကား - Yonhap သတင်းဌာန

၂၀၂၄ ခုနှစ် အိုက်စလန်ရွေးကောက်ပွဲတွင် ဆိုရှယ် ဒီမိုကရက်တစ်ပါတီ အနိုင်ရကြောင်း တနင်္လာနေ့တွင် နိုင်ငံပိုင်ရုပ်သံက ထုတ်ပြန်ကြေညာလိုက်ပါသည်။ဆိုရှယ်ဒီမိုကရက်ပါတီက မဲအများဆုံး ရရှိသော်လည်း ညွှန့်ပေါင်းအစိုးရဖွဲ့ရန် လိုအပ်မည်ဖြစ်ပါသည်။

ယခုပြီးစီးသွားသည့် အိုက်စလန်နိုင်ငံရွေးကောက်ပွဲတွင် ဆိုရှယ်ဒီမိုကရက်ပါတီက ပါလီမန်အမတ် ၆၃ နေရာတွင် ၁၅ နေရာ(၂၀.၈ ရာခိုင်နှုန်း) ဖြင့် မဲအများဆုံးရရှိခဲ့ပါသည်။ ကွန်ဆာဗေးတစ်လွတ်လပ်ရေးပါတီက ၁၄ နေရာ (၁၉.၄ ရာခိုင်နှုန်း)၊ ဗဟိုလစ်ဘရယ်ပြုပြင်ပြောင်းလဲရေး ပါတီက ၁၁ နေရာ(၁၅.၈ ရာခိုင်နှုန်း) အသီးသီး ရရှိခဲ့ကြ သည်။ ထို့ပြင် အခြားပါတီ ၃ ခု ကလည်း အမတ်နေရာများ ရရှိခဲ့ကြသည်။ 

၂၀၂၄ အိုက်စလန်ရွေးကောက်ပွဲကို စနေနေ့တွင် ကျင်းပခဲ့ပြီး၊ အနိုင်ရပါတီ ဆိုရှယ်ဒီမိုကရက်တစ်၏ ယခု ရွေးကောက်ပွဲတွင် ရရှိသည့်မဲရလဒ်မှာ  ပြီးခဲ့သည့် ၂၀၂၁ ခုနှစ် ရွေးကောက်ပွဲတွင် ရရှိခဲ့သည့် မဲရလဒ်ထက် နှစ်ဆ ပိုမိုများပြားကြောင်း နိုင်ငံပိုင်ရုပ်သံ  RUV က  ကြေညာထားပါသည်။

ကိုးကား  - Al Jazeera

ဂျာမနီ ဝန်ကြီးချုပ် Olaf Scholz သည် လွန်ခဲ့သည် ၂ နှစ်ခွဲအတွင်း ပထမဆုံးအကြိမ်အဖြစ် ယူကရိန်းသို့  ရောက်ရှိခဲ့ကြောင်း Reuters သတင်းဌာနက ဖော်ပြထားသည်။

၎င်းသည် ယူကရိန်းခေါင်းဆောင် ဇယ်လင်စကီးနှင့် တွေ့ဆုံမည်ဖြစ်ပြီး ယူရို သန်း ၆၅၀ တန်ဖိုးရှိ လက်နက်များကို ဒီဇင်ဘာလတွင် ယူကရိန်းသို့ ထပ်မံပေးပို့မည်ဟု ကြေညာခဲ့ကြောင်း ဖော်ပြထားသည်။

ကိုးကား - Reuters 

ဒီဇင်ဘာ ၁ ရက်က စတင်တာဝန်ယူခဲ့သော ဥရောပ ကောင်စီ၏အကြီးအကဲအန်တိုနီယိုကော်စတာ၊ ဥရောပ သမဂ္ဂကော်မရှင်နာ မာတာကော့စ် နှင့် ဥရောပသမဂ္ဂ၏ သံတမန်ရေးဆိုင်ရာ ဥရောပကော်မရှင်နာ ကာယာ ကာလက်စ်တို့သည် ကိယက်ဗ်မြို့သို့ ရောက်ရှိခဲ့ကြောင်း IZ သတင်းဌာနကဖော်ပြထားသည်။

ဥရောပသမဂ္ဂ၏ သံတမန်ရေးဆိုင်ရာ ဥရောပကော်မရှင်နာ ကာယာကာလက်စ်က အီးယူသည် ယူကရိန်းပဋိပက္ခကို အနိုင်ယူစေလိုပြီး ယင်းကို အောင်မြင်ရန် လိုအပ်သမျှ လုပ်ဆောင်ပေးသွားမည်ဖြစ်ကြောင်း၊ ဥရောပကောင်စီ၏ အကြီးအကဲ အန်တိုနီယိုကော်စတာက  ယူကရိန်း ပြည်သူများအတွက် ၎င်းတို့၏ ဆက်လက် ပံ့ပိုးမှုကို ကြေညာခဲ့ကြောင်း၊ ဥရောပသမဂ္ဂ ကော်မရှင်နာ မာတာကော့စ်က ယူကရိန်းနိုင်ငံအား  "လွတ်လပ်မှုနှင့် ငြိမ်းချမ်းမှု အပြည့်အဝရှိသော ဥရောပ အနာဂတ်ဆီသို့" လမ်းကြောင်းပေါ်တွင် ရှိစေရန်ဆောင်ရွက်မည်ဖြစ်ကြောင်း ၎င်းတို့၏လူမှုကွန်ရက် X စာမျက်နှာတွင် ၎င်းတို့၏ ခရီးစဉ်အပေါ် မှတ်ချက်ပေးရေးသားဖော်ပြခဲ့ကြကြောင်း ဖော်ပြထားပါသည်။ 

ဥရောပသမဂ္ဂခေါင်းဆောင်သစ်၏ ရာထူးတာဝန်ယူသည့် ပထမနေ့တွင် ယူကရိန်းနိုင်ငံသို့ လာရောက်လည်ပတ် ခြင်းသည် ဥရောပသမဂ္ဂ၏ တည်ငြိမ်တိုးတက်ရေးထက် စစ်ပွဲဆက်လက်ဖြစ်ပွားရေးကို ပိုမိုစိတ်ဝင်စားနေကြောင်း ပြသနေသည်ဟု ရုရှားလုံခြုံရေးကောင်စီ ဒုတိယ ဥက္ကဌ မက်ဗီဒက်က ပြောကြားခဲ့ကြောင်း TASS သတင်းဌာန က ဖော်ပြထားပါသည်။

ကိုးကား - TASS