ရုရှား-ယူကရိန်းစစ်ပွဲတွင် ရုရှားဘက်က ပါဝင်ကူညီပေးနေသည့် မြောက်ကိုးရီးယားတပ်များကို တားမြစ်ပေးရေးဆောင်ရွက်ပေးရန် အမေရိကန်သမ္မတဂျိုးဘိုင်ဒင်က တရုတ်သမ္မတရှီကျင့်ဖျင်ကို တိုက်တွန်းလိုက်ပါသည်။

ထရန့်အား တာဝန်လွှဲပြောင်းပေးရေး မတိုင်မီ ဘိုင်ဒင်၏ နောက်ဆုံးအကြိမ်တွေ့ဆုံမှုဖြစ်သည့် နိုဝင်ဘာလ ၁၆ ရက်နေ့က ကျင်းပသော အာရှပစိဖိတ်စီးပွားရေးပူးပေါင်းမှု ထိပ်သီးအစည်းအဝေးတွင် အမေရိကန်သမ္မတက တရုတ်သမ္မတကို  ယင်းသို့ တိုက်တွန်းလိုက်ကြောင်း သိရှိရသည်။

Source- theguardian.com

နိုဝင်ဘာ ၁၇

ဂျပန်နိုင်ငံ၊ နိုင်ငံခြားရေးဝန်ကြီး Takeshi Iwaya သည် မကြေညာဘဲ အလည်အပတ် ခရီးစဉ်အဖြစ် ကိယက်ဗ်မြို့သို့ ရောက်ရှိခဲ့သည်။

ရုရှားနှင့် မြောက်ကိုရီးယားတပ်များ၏ ပူးပေါင်းတိုက်ခိုက်မှုတွင် ယူကရိန်းအပေါ် ဂျပန်၏ ရပ်တည်ချက်ကို ပြသရန် ဂျပန်နိုင်ငံခြားရေးဝန်ကြီးဌာန အကြီးအကဲ ရောက်ရှိလာကြောင်း ဂျပန်နိုင်ငံခြားရေးဝန်ကြီးဌာန၏ ပြောကြားချက်ကို ကိုးကား၍ ထုတ်ပြန်ချက်တွင် ဖော်ပြသည်။

Iwaya သည် ယူကရိန်းနိုင်ငံခြားရေးဝန်ကြီး Andriy Sybiha နှင့် တွေ့ဆုံမည်ဖြစ်ပြီး နောက်ပိုင်းတွင် သမ္မတ Zelensky နှင့်လည်းတွေ့ဆုံမှုများပြုလုပ်ခဲ့ကြောင်း သတင်းရရှိပါသည်။

Source: ဂျပန်နိုင်ငံခြားရေးဝန်ကြီးဌာန၏သတင်းထုတ်ပြန်ချက်

လီမာ နိုဝင်ဘာ ၁၆

ဂျပန်ဝန်ကြီးချုပ် အီရှီဘာနှင့် တရုတ်သမ္မတရှီကျင့်ဖျင်တို့သည် နှစ်နိုင်ငံဆက်ဆံရေးနှင့် ပတ်သက်ပြီး ဆွေးနွေးရာတွင် အပြုသဘောဆောင်ပြီး တည်ငြိမ်သောဆက်ဆံရေးကို တည်ဆောက်ကြမည်ဖြစ်ကြောင်း အတည်ပြုပြောကြားခဲ့သည်။

တွေ့ဆုံဆွေးနွေး

ခေါင်းဆောင်နှစ်ဦးသည် ပီရူးနိုင်ငံမြို့တော် လီမာ၌ နိုဝင်ဘာ ၁၅ ရက်တွင် ကျင်းပသည့် အာရှ-ပစိဖိတ် စီးပွားရေးပူးပေါင်းဆောင်ရွက်ရေးဖိုရမ်၏ ပြင်ပအစည်းအဝေးအဖြစ် မိနစ် ၃၀ ကြာ တွေ့ဆုံဆွေးနွေးခဲ့ကြောင်း သိရသည်။ အဆိုပါ အစည်းအဝေးသည် ၎င်းတို့နှစ်ဦး၏ ပထမဆုံး ထိပ်သီးဆွေးနွေးပွဲဖြစ်သည်။

ဘုံမဟာဗျူဟာအကျိုးစီးပွားများကို အခြေခံ၍ အပြန်အလှန်အကျိုးရှိသော ဆက်ဆံရေးကို မြှင့်တင်ရန်နှင့် အပြုသဘောဆောင်ပြီး တည်ငြိမ်သော နှစ်နိုင်ငံဆက်ဆံ‌ရေးကို တည်ဆောက် သွားမည်ဖြစ်ကြောင်း ဂျပန်ဝန်ကြီးချုပ် အီရှီဘာက ပြောကြားသည်။

ထို့ပြင် ဖူကူရှီးမား ဒိုင်အိချိနျူကလီးယားစက်ရုံမှ သန့်စင်ထားသောရေများကို သမုဒ္ဒရာထဲသို့ စွန့်ထုတ်ပြီးနောက် ဂျပန်ပင်လယ်စာတင်သွင်းမှုကို တရုတ်နိုင်ငံက ရပ်ဆိုင်းခဲ့သည်။ ပင်လယ်စာ တင်သွင်းမှုကို ပြန်လည်စတင်ရန် နှစ်နိုင်ငံအနေဖြင့် ပြီးခဲ့သည့် စက်တင်ဘာလက သဘောတူခဲ့ သည့် အဆိုပါ သဘောတူညီချက်ကို တရုတ်သမ္မတရှီကျင့်ဖျင်က စဉ်ဆက်မပြတ် အကောင် အထည်ဖော်ဆောင်သွားမည်ဖြစ်ကြောင်း မှတ်ချက်ပြုပြောကြားသည်။

အရှေ့တရုတ်ပင်လယ်အခြေအနေနှင့် တရုတ်နိုင်ငံ၏ စစ်ရေးလှုပ်ရှားမှုများ၊ တိုးချဲ့လုပ်ဆောင်မှု များနှင့်ပတ်သက်၍ ဂျပန်နိုင်ငံ၏ စိုးရိမ်ပူပန်မှုများကို ဝန်ကြီးချုပ် အီရှီဘာက သမ္မတ ရှီကျင့်ဖျင်အား ပြောကြားသည်။

မတူကွဲပြားသည့် အမြင်များအပေါ် ဆက်လက်ဆွေးနွေးရန် ခေါင်းဆောင်နှစ်ဦးက သဘောတူ ခဲ့ကြောင်း သိရသည်။

တရုတ်နိုင်ငံတွင် ဂျပန်ကျောင်းသူတစ်ဦး ဓားဖြင့်ထိုးခံရမှုနှင့်ပတ်သက်ပြီး တရုတ်နိုင်ငံအတွင်း ဂျပန်လူမျိုးများ ဘေးကင်းလုံခြုံမှုရှိစေရန်အတွက် ဝန်ကြီးချုပ် အီရှီဘာက သမ္မတရှီကျင့်ဖျင်အား တောင်းဆိုခဲ့သည်။ ဂျပန်လူမျိုးများအပါအဝင် နိုင်ငံခြားသားများအားလုံး ဘေးကင်းလုံခြုံစေရန် အတွက် သမ္မတ ရှီကျင့်ဖျင်က ကတိပြုခဲ့ကြောင်း သိရသည်။

ကိုးကား- အင်န်အိတ်ချ်ကေ

Source- ကြေးမုံသတင်းစာ

အနောက်နိုင်ငံခေါင်းဆောင်တွေနှင့် ၂ နှစ်လောက် အဆက်အသွယ်မလုပ်သည့် ရုရှားသမ္မတ Vladimir Putin ကို ဂျာမနီဝန်ကြီးချုပ် Olaf Scholz က ပထမဆုံးအကြိမ်အဖြစ် နိုဝင်ဘာ ၁၅ နေ့က တယ်လီဖုန်းဖြင့် ဆက်သွယ်ပြောကြားမှုကို ယူကရိန်းသမ္မတက အပြစ်တင်ဝေဖန်လိုက်ပါသည်။

စစ်ပွဲအဆုံးသတ်ပြီး ငြိမ်းချမ်းရေးစကားလမ်းကြောင်းပြုလုပ်ရန် ဂျာမနီဝန်ကြီးချုပ်က ရုရှားသမ္မတထံ တယ်လီဖုန်းမှတစ်ဆင့် တိုက်တွန်းပြောကြားခဲ့ပါသည်။

ယူကရိန်းသမ္မတ Volodymyr Zelensky က  ထိုသို့ဖုန်းဖြင့် စတင်ဆက်သွယ်မှုမှာ ပူတင်နှင့် ရုရှား၏ အထီးကျန်ဆန်နေမှုကို အားနည်းသွားစေကြောင်း  ဝေဖန်ပြောကြားလိုက်ကြောင်း သိရှိရသည်။

Source- independent.com

နိုဝင်ဘာ ၁၄ 

ဒီမိုကရက်တစ်ပါတီသည် သမ္မတရွေးကောက်ပွဲတွင် ရှုံးနိမ့်ခဲ့သည့်အပြင် အထက်လွှတ်တော်၊ အောက်လွှတ်တော်နှင့် ဒေသဆိုင်ရာအစိုးရရွေးကောက်ပွဲများတွင်လည်း ရှုံးနိမ့်ခဲ့ရပြီး ရီပတ်ဘလီကင်ပါတီက အထက်လွှတ်တော်၊အောက်လွှတ်တော်နှင့် ဒေသဆိုင်ရာအစိုးရနေရာအများစုတွင် အနိုင်ရရှိလိုက်ကြောင်း The Guardian သတင်းကဖော်ပြခဲ့သည်။ 

အမေရိကန်သမ္မတဂျိုးဘိုင်ဒင်သည် နိုဝင်ဘာ ၁၃ ရက်တွင် ရွေး‌ကောက်ခံ သမ္မတ ဒေါ်နယ်ထရမ့်နှင့် တွေ့ဆုံသွားမည်ဖြစ်ကြောင်း အိမ်ဖြူတော်က ထုတ်ပြန်ကြေညာလိုက်သည်။

အာဏာလွှဲပြောင်းမည့် သမ္မတသည် ထုံးတမ်းအစဉ်အလာအတိုင်း ရွေးကောက်ခံသမ္မတကို လက်ခံကြိုဆိုခြင်းဖြစ်သည်။ သို့သော်လည်း ထရမ့်သည် ပြန်လည်ရွေးကောက်ခံမှု ရှုံးနိမ့်ခဲ့သော ၂၀၂၀ ရွေးကောက်ပွဲအပြီးတွင် ဘိုင်ဒင်ကို ထိုကဲ့သို့ လုပ်ဆောင်ခဲ့ခြင်းမရှိကြောင်း သိရသည်။

ယခုအကြိမ် အကူးအပြောင်း၌ လာမည့်အစိုးရအဖွဲ့သို့ ငြိမ်းချမ်းစွာ ကူးပြောင်းမှုဖြစ်စေမည်ဟု ဘိုင်ဒင်က နိုဝင်ဘာ ၇ ရက်က နိုင်ငံတော်မိန့်ခွန်းပြောကြားစဉ် ကတိပြုပြောကြားထားသည်။ ထရမ့်သည် လွန်ခဲ့သည့် နိုဝင်ဘာ ၆ ရက်တွင် အောင်ပွဲခံမိန့်ခွန်းပြောကြားပြီးကတည်းက အများပြည်သူရှေ့မှောက်သို့ ထွက်ပေါ်လာခြင်းမရှိသေးပေ။

ရွေးကောက်ခံသမ္မတသည် နိုင်ငံတောင်ပိုင်း ဖလော်ရီဒါပြည်နယ်ရှိ ၎င်း၏ နေအိမ်တွင် မဲဆွယ် စည်းရုံးရေးအမှုဆောင်များနှင့် အစိုးရအဖွဲ့အတွက် ကိုယ်စားလှယ်လောင်းများကို ထည့်သွင်း စဉ်းစားနေပုံရကြောင်း သိရသည်။

ထရမ့်က မဲဆွယ်စည်းရုံးရေးမန်နေဂျာ ဆူဇီဝိုင်းလ်ကို အိမ်ဖြူတော် အရာရှိချုပ်အဖြစ် နိုဝင်ဘာ ၇ ရက်တွင် ခန့်အပ်ကြောင်း ကြေညာလိုက်ပြီးကတည်းက နောက်ထပ် ကြေညာချက်အသစ် ထုတ်ပြန်ခြင်းမရှိသေးပေ။

အင်န်အိတ်ချ်ကေ

Source- မြန်မာ့အလင်း

 ပေကျင်း နိုဝင်ဘာ ၁၀

တရုတ်သမ္မတရှီကျင့်ဖျင်သည် တရုတ်နိုင်ငံသို့ အလည်အပတ်ရောက်ရှိနေသည့် အင်ဒိုနီးရှားသမ္မတ ပရာဘိုဝို ဆူဘီရန်တိုနှင့် ပေကျင်းမြို့တော်၌ ယမန်နေ့က တွေ့ဆုံဆွေးနွေးခဲ့ကြောင်း ဆင်ဟွာ သတင်းအရ သိရသည်။

တရုတ်နိုင်ငံသည် အင်ဒိုနီးရှားအစိုးရနှင့် နှစ်နိုင်ငံအကြား ဘုံအကျိုးစီးပွားကို ဖော်ဆောင်မည့်ကိစ္စရပ်များ ကို ပူးပေါင်းဆောင်ရွက်ရန် အသင့်ရှိသည်ဟု သမ္မတ ရှီကျင့်ဖျင်က ပြောကြားသည်။

အင်ဒိုနီးရှားသမ္မတ ပရာဘိုဝိုသည သမ္မတအဖြစ် ရာထူးတာဝန်များကို စတင်ထမ်းဆောင်ပြီးနောက် ပထမဆုံးပြည်ပခရီးစဉ်အဖြစ် တရုတ်နိုင်ငံသို့ လာရောက်ခြင်းဖြစ်သည်။

နှစ်နိုင်ငံအကြား အပြန်အလှန်အကျိုးရှိသော ပူးပေါင်းဆောင်ရွက်မှုကို အကောင်အထည်ဖော်ဆောင်ရွက်မည်ဟု သမ္မတရှီက ပြောကြားသည်။

ယခုနှစ်သည် ငြိမ်းချမ်းစွာအတူယှဉ်တွဲနေထိုင်ရေးမူများ ချမှတ်ခဲ့သည့် နှစ်(၇၀)ပြည့်မြောက်သည့်နှစ်ဖြစ်ပြီး လာမည့်နှစ်သည် ဘန်ဒေါင်းညီလာခံကျင်းပခဲ့သည့် နှစ်(၇၀)ပြည့်မြောက်သည့်နှစ်ဖြစ်ကြောင်း သမ္မတရှီက မှတ်ချက်ပြုပြောကြားသည်။

ထို့ပြင် အရည်အသွေးမြင့် ရပ်ဝန်းနှင့် ပိုးလမ်းမစီမံကိန်းဆိုင်ရာ ပူးပေါင်းဆောင်ရွက်မှု၊ ‌ဒေသတွင်း ဘက်စုံစီးပွားရေးစင်္ကြံဆိုင်ရာ ပူးပေါင်းဆောင်ရွက်မှုအပါအဝင် ပူးပေါင်းဆောင်ရွက်မှုများ အကောင်အထည်ဖော်ရာတွင် အားကောင်းစေရန် ရှီက တိုက်တွန်းပြောကြားသည်။

အင်ဒိုနီးရှားသည် တရုတ်-အင်ဒိုနီးရှား နှစ်နိုင်ငံဘက်စုံမဟာဗျူဟာ ညှိနှိုင်းဆောင်ရွက်မှုကို ပိုမို ခိုင်မာစေရန်၊ ပိုမိုနီးကပ်သော ဘက်စုံမဟာဗျူဟာမိတ်ဖက်များဖြစ်လာရန်နှင့် ဒေသတွင်းနှင့် ကမ္ဘာလုံးဆိုင်ရာ လွှမ်းမိုးမှုရှိသော အသိုက်အဝန်းကို အတူတကွတည်ဆောက်သွားရန် မျှော်လင့်ထားကြောင်း အင်ဒိုနီးရှားသမ္မတ ပရာဘိုဝိုက ပြောကြားသည်။

အင်ဒိုနီးရှားသည် တရုတ်နိုင်ငံနှင့် အရည်အသွေးမြင့်ရပ်ဝန်းနှင့် ပိုးလမ်းမဆိုင်ရာ ပူးပေါင်းဆောင်ရွက်မှု အပါအဝင် မဏ္ဍိုင်ငါးရပ် ပူးပေါင်းဆောင်ရွက်မှုမူဘောင်ကို မြှင့်တင်ရန်နှင့် အခြေခံအဆောက်အအုံ၊ စွမ်းအင်နှင့် ဓာတ်သတ္တု၊ ဆေးဝါး၊ စိုက်ပျိုးရေး၊ အိမ်ရာ၊ ပင်လယ်ရေကြောင်းဖွံ့ဖြိုးတိုးတက်ရေး၊ စားရေ ရိက္ခာဖူလုံရေး၊ ဆင်းရဲနွမ်းပါးမှုလျှော့ချရေးတို့တွင် ဘက်စုံပူးပေါင်းဆောင်ရွက်မှုကို အားကောင်းခိုင်မာ စေရေးအတွက် အကောင်အထည်ဖော်ဆောင်ရွက်ရန်ဆန္ဒရှိကြောင်း အင်ဒိုနီးရှားသမ္မတ ပရာဘိုဝိုက ထပ်‌လောင်းပြောကြားသည်။

ကိုးကား- ဆင်ဟွာ

Source- ကြေးမုံသတင်းစာ

မီဒီယာများက ကိုယ်စားလှယ်ဆန္ဒမဲ ၂၇၀ ထက် မနည်းရရှိမည်ဟု ခန့်မှန်းခဲ့ပြီးနောက် ရီပတ်ဘလီကင်သမ္မတလောင်း ဒေါ်နယ်ထရမ့်က ၂၀၂၄ ခုနှစ် အမေရိကန်သမ္မတ ရွေးကောက်ပြိုင်ပွဲတွင် မိမိအနိုင်ရရှိခဲ့ကြောင်း နိုဝင်ဘာ ၆ ရက်အစောပိုင်းက ကြေညာ ခဲ့သည်။

အမေရိကန်သမ္မတရာထူးကို ရရှိရန် ကိုယ်စားလှယ်ဆန္ဒမဲအနည်းဆုံး ၂၇၀ လိုအပ်သည်။

ဖလော်ရီဒါ West Palm Beach ရှိ ၎င်း၏ ရွေးကောက်ပွဲရုံးချုပ်၌ မိန့်ခွန်းပြောကြားရာတွင် အမေရိကန်ကို ကုစားရန် ကတိပေးခဲ့သလို အမေရိကန်-မက္ကဆီကို နယ်စပ်ကိုလည်း ပြင်ဆင်မည်ဖြစ်ကြောင်း ပြောကြားလိုက်သည်။

မိမိတို့နိုင်ငံအနေဖြင့်မည်သည့်အခါမျှမမြင်တွေ့နိုင်သည့် နိုင်ငံရေးအောင်ပွဲတစ်ခုဖြစ်ကြောင်း၊ (၄၅) ဦးမြောက် အမေရိကန်သမ္မတနှင့် (၄၇)ဦးမြောက် အမေရိကန်သမ္မတအဖြစ် ဂုဏ်ယူ ဝင့်ကြွားစွာ မိမိကိုရွေးချယ်ခဲ့သည့်အတွက် အမေရိကန်ပြည်သူများကို ကျေးဇူးတင်ကြောင်း ထရမ့်ကပြောကြားလိုက်သည်။

အမေရိကန်ပြည်သူများအတွက်သာမက အမေရိကန်ပြည်သူများ၏ အနာဂတ်အတွက်ပါ တိုက်ပွဲဝင်မည်ဖြစ်ကြောင်း၊ အမေရိကန်ပြည်သူများနှင့် အနာဂတ်ရင်သွေးများအတွက် ထိုက်တန်သည့် ဘေးကင်းစိတ်ချ၊ သန်မာအားကောင်းပြီး ပြည့်စုံကြွယ်ဝသည့် နိုင်ငံတော်ကြီးကို မဆောင်ကြဉ်းပေးနိုင်သရွေ့ မိမိအနားယူမည် မဟုတ်ကြောင်း ထရမ့်က ပြောကြားခဲ့သည်။

အကြီးအကျယ်ယှဉ်ပြိုင်ရသည့် ပြည်နယ် ခုနစ်ခုအနက် ပြည်နယ်သုံးခုတွင် မစ္စတာထရမ့် အနိုင်ရလိမ့်မည်ဟု မီဒီယာများက ခန့်မှန်းခဲ့ပြီးနောက် နိုဝင်ဘာ ၆ ရက်အစောပိုင်းတွင် ထရမ့်က အောင်ပွဲမိန့်ခွန်းပြောကြားခဲ့ခြင်းဖြစ်သည်။

မစ္စတာထရမ့်သည် ၎င်း၏ပြိုင်ဘက် ဒီမိုကရက်တစ်သမ္မတလောင်းနှင့် လက်ရှိအမေရိကန် ဒုတိယသမ္မတ ကာမလာဟားရစ်ကို ပြည်နယ်လေးခုတွင် ဦးဆောင်လျက်ရှိသည်။

ဆန္ဒမဲများကို နိုင်ငံတစ်ဝန်းဆက်လက်ရေတွက်နေချိန်တွင် ဟားရစ်၏ အိမ်ဖြူတော်သို့ ရောက်ရှိရေး မျှော်မှန်းချက်မှာ တဖြေးဖြေးမှေးမှိန်လာလျက်ရှိသည်။ ဟားရစ်သည် ရွေးကောက်ပွဲညတွင် ၎င်း၏ ထောက်ခံသူများကို စကားပြောနိုင်ဦးမည် မဟုတ်ကြောင်းနှင့် ဆန္ဒမဲများကို အပြီးသတ်မရေတွက်ရသေးကြောင်း အမေရိကန်ဒုသမ္မတ ကာမလာဟားရစ်၏ မဲဆွယ်စည်းရုံးရေးကိုယ်စားလှယ်တစ်ဦးက ပြောကြားခဲ့သည်။

ဆင်ဟွာ၊ အင်န်အိတ်ချ်ကေ

 Source: ၇-၁၁-၂၀၂၄ ရက်စွဲထုတ် မြန်မာ့အလင်းသတင်းစာ

ဝါရှင်တန် အောက်တိုဘာ ၃၀

မကြာမီကျင်းပတော့မည့် သမ္မတရွေးကောက်ပြိုင်ပွဲအတွက် အမေရိကန်ပြည်သူများ မဲမပေးမီတစ်ပတ်အလိုတွင် အမေရိကန်သမ္မတလောင်းနှစ်ဦး၏ ပြိုင်ဆိုင်မှုမှာ အကြိတ်အနယ်ရှိလာခဲ့သည်။

အောက်တိုဘာ ၂၉ ရက်အထိ နိုင်ငံလုံးဆိုင်ရာမဲရုံများတွင် ရီပတ်ဘလီကင်သမ္မတလောင်း ဒေါ်နယ်ထရမ့်က ဒီမိုကရက်တစ်သမ္မတ‌လောင်း ကာမလာ ဟားရစ်ကို ၀ ဒသမ ၄ ရာခိုင်နှုန်းဖြင့် ဦးဆောင်လျက်ရှိကြောင်း အမေရိကန်ရွေးကောက်ပွဲသတင်းအချက်အလက် ဝက်ဘ်ဆိုက်တစ်ခုဖြစ်သည့် Real Clear Politics အရသိရသည်။

ထရမ့်သည် ဂျော်ဂျီယာ၊ အရီဇိုးနား၊ ပင်ဆယ်ဗေးနီးယား၊ ဝစ်ကွန်ဆင်နှင့် မြောက်ကာရိုလိုင်းနားပြည်နယ်များအပါအဝင် ပြည်နယ်အတော်များများတွင် ရာခိုင်နှုန်းအနည်းငယ်သာဖြင့် ဦးဆောင်လျက်ရှိသည်။ ဟားရစ်သည် မီချီဂန်ပြည်နယ်တွင် ရမှတ်တစ်ဝက်ဖြင့် ဦးဆောင်လျက်ရှိသည်။ 

အကြိတ်အနယ်ရှိသည့် ပြိုင်ဘက်ပြည်နယ်များတွင် ရွေးကောက်ပွဲရလဒ်ကို ဆုံးဖြတ်ဖွယ်ရှိသည်။ သမ္မတလောင်းနှစ်ဦးလုံးသည် အဆိုပါပြည်နယ်များတွင် တက်ကြွစွာ မဲဆွယ်စည်းရုံးမှုများ ပြုလုပ်ခဲ့သည်။

သမ္မတရွေးကောက်ပြိုင်ပွဲသည် ဆက်လက်ပြီး အကြိတ်အနယ်ဖြစ်လျက်ရှိသည်။ သို့သော်လည်း ဟားရစ်သည် ကြော်ငြာတွင် ထရမ့်ကို အနည်းငယ်အသာရလျက်ရှိကြောင်း ဘရွတ်ကလင်း အင်စတီကျုမှ အကြီးတန်းအရာရှိတစ်ဦးဖြစ်သူ ဒါရယ်ဝက်စ်က ပြောသည်။

ငွေကြေးဖောင်းပွခြင်းနှင့် စီးပွားရေးအခြေအနေသည် အဓိကပြဿနာများဖြစ်သည်။ သမ္မတ ဂျိုးဘိုင်ဒင်နှင့် ဒုတိယသမ္မတ ဟားရစ်တို့သည် နိုင်ငံ့စီးပွားရေးတွင် အလုပ်လက်မဲ့နည်းအောင် ကြီးကြပ်ခဲ့သော်လည်း လက်ရှိအစိုးရလက်ထက်တွင် ဖြစ်ပေါ်နေသော ဈေးနှုန်းကြီးမြင့်မှုများအပေါ် မဲဆန္ဒရှင်များက အမျက်ထွက်ခဲ့ကြသည်။

ထရမ့်၏ မဲဆွယ်စည်းရုံးမှုတွင် ထရမ့်က ဘိုင်ဒင်- ဟားရစ်အုပ်ချုပ်ရေးသည် မြို့ပြဒေသများတွင် ရာဇဝတ်မှုများ တိုးလာစေသည်ဟု စွပ်စွဲခဲ့သည်။

လက်ရှိ ဘိုင်ဒင်အစိုးရတက်လာပြီးကတည်းက နယ်စပ်ကို တရားမဝင်ဝင်ရောက်လာသည့် သန်းနှင့်ချီသော ရွှေ့ပြောင်းအခြေချသူများကို အစုလိုက်အပြုံလိုက်ပြန်ပို့မည့် ထရမ့်၏ အစီအစဉ်ကိုလည်း ဝေဖန်သူများက ပြစ်တင်ရှုတ်ချခဲ့သည်။

ဆင်ဟွာ        

Source- မြန်မာ့အလင်း

အမေရိကန် ဒုတိယသမ္မတနှင့် ဒီမိုကရက်တစ်သမ္မတလောင်းဖြစ်သူ ကာမလာဟားရစ် သည် အကြိတ်အနယ် ယှဉ်ပြိုင်ရမည့် ပြည်နယ်ဖြစ်သည့် ဂျော်ဂျီယာတွင် လူထုစုဝေးပွဲ ပြုလုပ်ခဲ့ သည်။

၎င်း၏ ပြိုင်ဘက်ဖြစ်သူ ရီပတ်ဘလီကင်သမ္မတလောင်း ဒေါ်နယ်ထရမ့်ကို ဝေဖန်ခဲ့ပြီး မဲဆန္ဒရှင်များ၏ ထောက်ခံမှုကို တောင်းဆိုခဲ့သည်။ ဟားရစ်သည် အတ္တလန္တာ၌ သမ္မတ ရွေးကောက်ပွဲမစတင်မီ နှစ်ပတ်အလိုတွင် အောက်တိုဘာ ၁၉ ရက်က မိန့်ခွန်းပြောကြားခဲ့ခြင်း ဖြစ်သည်။

ဒီမိုကရက်တစ်များသည် အနာဂတ်ကိုသာ အာရုံစိုက်ထားပြီး ထရမ့်ကမူ အတိတ်ကိုသာ အာရုံစိုက်နေသည်ဟု ဟားရစ်ကပြောသည်။ ထရမ့်သည် ကိုယ့်ကိုယ်ကိုယ်သာ အာရုံစိုက်ကြောင်း ဟားရစ်က ဆက်ပြောသည်။ ဟားရစ်၏ မိန့်ခွန်းမှာ အလွန်အားကောင်းကြောင်း အဆိုပါပွဲသို့ တက်ရောက်လာသည့် အသက် ၅၅ နှစ်အရွယ် အမျိုးသမီးတစ်ဦးက ပြောသည်။

ဟားရစ်၏ မိန့်ခွန်း၌ ၎င်းအကြိုက်ဆုံးအချက်မှာ ရှေ့သို့ဆက်သွားရန် လိုအပ်ပြီး စာမျက်နှာသစ်ဖွင့်ရန် လိုအပ်သည့် အချက်ဖြစ်ကြောင်း ပြောသည်။ ၁၉၉၆ ခုနှစ်မှစတင်၍ ဂျော်ဂျီယာပြည်နယ်၌ ရီပတ်ဘလီကင်သမ္မတလောင်းအများစု အနိုင်ရရှိခဲ့သည်။

သို့သော်လည်း ပြီးခဲ့သည့် ၂၀၂၀ ပြည့်နှစ် ရွေးကောက်ပွဲတွင်မူ ဂျိုးဘိုင်ဒင်က ဒေါ်နယ်ထရမ့်ကို မဲရလဒ်အနည်းငယ်ဖြင့် အနိုင်ရရှိခဲ့သည်။ ၂၈ နှစ်တာကလအတွင်း ဒီမိုကရက် တို့၏ ပထမဦးဆုံးအောင်ပွဲလည်းဖြစ်သည်။ နောက်ဆုံးကောက်ယူထားသည့် သဘောဆန္ဒ စစ်တမ်းများအရ‌ ဂျော်ဂျီယာပြည်နယ်၌ သမ္မတလောင်းနှစ်ဦးမှာ အကြိတ်အနယ်ပင်ဖြစ်သည်။ ဟားရစ်ကို ထောက်ခံသူ ၄၇ ရာခိုင်နှုန်းရှိပြီး ထရမ့်ကိုထောက်ခံသူ ၄၈ ဒသမ ၈ ရာခိုင်နှုန်းရှိသည်။

အင်န်အိတ်ချ်ကေ

Source- မြန်မာ့အလင်း