လက်နက်ကိုင်အကြမ်းဖက်သမားများသည် အပြစ်မဲ့ အရပ်သားပြည်သူများ နေထိုင်ရာ မြို့၊ ရပ်ကွက်၊ ကျေးရွာများအတွင်း၌ တိုက်ပွဲများဖော်ဆောင်ခြင်း၊ လက်နက်ကြီး၊ စိန်ပြောင်းများ၊ ရှော့တိုက်ဒုံး၊ Drop Bomb များဖြင့် ပစ်ခတ်တိုက်ခိုက်ခြင်းများအား လုပ်ဆောင်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဖေဖော်ဝါရီ ၂၁ ရက် မွန်းလွဲ ၃ နာရီတွင် မန္တလေးတိုင်းဒေသကြီး၊ ချမ်းအေးသာစံမြို့နယ်ရှိ မန္တလေးပြည်သူ့ဆေးရုံကြီး၌ ဗုံးသီးပေါက်ကွဲစ ထိမှန်ဒဏ်ရာများဖြင့် အမျိုးသား တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ မတ္တရာမြို့နယ်၊ ကွေ့တောကျေးရွာသို့ PDF အမည်ခံ အကြမ်းဖက်အဖွဲ့က အများပြည်သူ ထိခိုက်စေရန်ရည်ရွယ်၍ လက်နက်ကြီးများဖြင့် ပစ်ခတ်တိုက်ခိုက်ခဲ့ရာ ကျေးရွာအတွင်းသို့ လက်နက်ကြီးဗုံးသီး တစ်လုံး ကျရောက်ပေါက်ကွဲခဲ့မှုကြောင့် အဆိုပါကျေးရွာနေ ဦးဝေယံကျော်(၃၁)နှစ်တွင် ဗုံးသီးပေါက်ကွဲစ ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။
ထိုသို့ အပြစ်မဲ့အရပ်သားပြည်သူများ အေးချမ်းစွာနေထိုင်လျက်ရှိသော မြို့၊ ရပ်ကွက်၊ ကျေးရွာအတွင်းသို့ အကြမ်းဖက်သမားများမှ တိုက်ပွဲများဖော်ဆောင်ခြင်းနှင့် လက်နက်ကြီး၊ စိန်ပြောင်းများ၊ ရှော့တိုက်ဒုံး၊ Drop Bomb များဖြင့် ပစ်ခတ်တိုက်ခိုက်ခြင်းများ လုပ်ဆောင်မှုကြောင့် အပြစ်မဲ့ အရပ်သားပြည်သူများ ထိခိုက်ဒဏ်ရာရရှိခဲ့မှုအပေါ် ဒေသခံပြည်သူများက လုံးဝလက်ခံနိုင်ခြင်းမရှိဘဲ ဆန့်ကျင်ကန့်ကွက်လျက်ရှိကြောင်းနှင့် လုံခြုံရေးတပ်ဖွဲ့ဝင်များက လိုအပ်သောလုံခြုံရေးလုပ်ငန်းများကို ပြည်သူလူထုနှင့်ပူးပေါင်းကာ တိုးမြှင့်လုပ်ဆောင်လျက်ရှိကြောင်း သတင်းရရှိသည်။

Source: www.moha.gov.mm 

ရုရှားအနေဖြင့် နိုင်ငံအပေါ် ဆန့်ကျင်သည့် မည်သည့်ဆောင်ရွက်မှုမျိုးကိုမဆို ထိပ်တိုက်ရင်ဆိုင်ရန်  အသင့်ရှိသည်ဟု ပြင်သစ်နိုင်ငံရှိ ရုရှားသံရုံးက ဖေဖော်ဝါရီ လ၂၄ ရက်တွင်ထုတ်ပြန်သည်။

ပြင်သစ်နိုင်ငံ  မာဆေးမြို့ရှိ    ရုရှားကောင်စစ်ဝန်ချုပ် ရုံးဝင်းအတွင်း ဖေဖော်ဝါရီလ ၂၄ ရက် နံနက်ပိုင်းက ပေါက်ကွဲမှုဖြစ်ပွားပြီးနောက် ပဲရစ်မြို့ရှိ ရုရှားသံရုံး၏ ထုတ်ပြန်ချက်ထွက်ပေါ်လာခြင်းဖြစ်သည်။ ပေါက်ကွဲမှုသည် အမည်မသိလူအချို့က မီးလောင်ပေါက်ကွဲစေသည့် အရာဝတ္ထုများကို ကောင်စစ်ဝန်ချုပ်ရုံးရှိ ပန်းခြံအတွင်းသို့ ပစ်သွင်းခဲ့ခြင်းဖြစ်ကြောင်း RT သတင်းဌာနက ဖော်ပြထားသည်။

ပေါက်ကွဲမှုကြောင့် အရေးပေါ်တုံ့ပြန်မှုများကို လုပ်ဆောင်ခဲ့ရပြီး မီးသတ်တပ်ဖွဲ့ဝင်များက ကောင်စစ်ဝန်ချုပ်ရုံး၏ ခြံဝင်းအတွင်းဖြစ်ပွားသည့် မီးလောင်ကျွမ်းမှုကို ငြှိမ်းသတ်ခဲ့ရကြောင်း သိရသည်။

မိမိတို့အနေဖြင့်  ယူကရိန်းထောက်ခံသူများ၏ ရန်စမှုများ ဖြစ်ပေါ်လာမည်ကို မျှော်လင့်ထားပြီး ရုရှားနိုင်ငံအား ဆန့်ကျင်သည့် မည်သည့်လုပ်ဆောင်ချက်မျိုးကို မဆို ထိရောက်စွာ တန်ပြန်သွားမည်ဖြစ်ကြောင်း ကောင်စစ်ဝန်ချုပ်ရုံးမှ   သံတမန်များက ပြောသည်။

ဖေဖော်ဝါရီလ ၂၄ရက်သည် ရုရှားနိုင်ငံက ယူကရိန်းတွင် အထူးစစ်ဆင်ရေး ဆင်နွှဲသည့် တတိယမြောက် နှစ်ပတ်လည်နေ့ဖြစ်ပြီး ပြင်သစ်နိုင်ငံရှိမြို့ကြီးအချို့တွင် ယူကရိန်းကို ထောက်ခံသည့်အနေဖြင့်   ချီတက်ဆန္ဒ ပြပွဲများကျင်းပရန် စီစဉ်ထားကြောင်း သိရသည်။  

Source: Myawady Web Portal          

၂၀၂၅ ခုနှစ်၊ ဖေဖော်ဝါရီ ၂၀ ရက် မွန်းလွဲ ၁၂ နာရီ ၃၀ မိနစ်တွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် စစ်ကိုင်းတိုင်းဒေသကြီး၊ ကလေးမြို့၊ စမ်းမြို့(ကွက်သစ်)ရပ်ကွက်၊ D-3 လမ်းတွင် ခန့်ဇဆွန့် မောင်းနှင်လာသည့် LAND CRUISER PRADO အမျိုးအစား မော်တော်ယာဉ်ကို သတင်းအရ ရှာဖွေရာ ယာဉ်နောက်ခန်းအတွင်းမှ ပလတ်စတစ် ဆပ်ပြာခွက် ၂၂၀ ခွက်ဖြင့်ထည့်လျက် ဘိန်းဖြူ ၂ ဒသမ ၂ ကီလို သိမ်းဆည်းရမိခဲ့ပြီး ကွင်းဆက်အရ မွန်းလွဲ ၁ နာရီတွင် ကလေးမြို့နယ်၊ နတ်ကြီးကုန်းကျေးရွာအုပ်စု၊ အိပ်စွပ်ကျေးရွာရှိ မလားလ်နိပ်မော၏ နေအိမ်ကို ဝင်ရောက်ရှာဖွေရာ နေအိမ်အတွင်းမှ ပလတ်စတစ်ဆပ်ပြာခွက် ၄၄၀ ခွက်ဖြင့်ထည့်လျက် ဘိန်းဖြူ ၄ ဒသမ ၄ ကီလို သိမ်းဆည်းရမိခဲ့၍ စုစုပေါင်းဘိန်းဖြူ ၆ ဒသမ ၆ ကီလို (တစ်ကီလိုလျှင် ငွေကျပ် သိန်း ၅၀၀ နှုန်းဖြင့် ၎င်းဒေသတန်ဖိုးငွေကျပ် သိန်း ၃,၃၀၀) သိမ်းဆည်းရမိခဲ့သဖြင့် ခန့်ဇဆွန့် (၅၀)နှစ်နှင့် မလားလ်နိပ်မော(၆၅)နှစ်တို့အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူခဲ့ပါသည်။
အလားတူ ဖေဖော်ဝါရီ ၂၁ ရက် နံနက် ၁၁ နာရီတွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ရှမ်းပြည်နယ်(အရှေ့ပိုင်း)၊ တာချီလိတ်မြို့၊ ဝိန်းကျောက်ရပ်ကွက်၊ အာခါဈေးလမ်းတွင် စိုင်းကျော်(ခ)အိုက်စိုင်း မောင်းနှင်လာသည့် မော်တော်ဆိုင်ကယ်ကို ရပ်တန့်စစ်ဆေးရှာဖွေရာ ၎င်းလွယ်ထားသည့် လွယ်အိတ်အတွင်းမှ ဘိန်းဖြူ သုည ဒသမ ၃၅ ကီလို(တစ်ကီလိုလျှင် ငွေကျပ် သိန်း ၁၅၀ နှုန်းဖြင့် ၎င်းဒေသတန်ဖိုးငွေကျပ် ၅၂ ဒသမ ၅ သိန်း) သိမ်းဆည်းရမိခဲ့ပြီး ကွင်းဆက်အရ တာချီလိတ်မြို့၊ ဝိန်းကျောက်ရပ်ကွက်ရှိ စိုင်းမောင်ဆိုင်း ငှားရမ်းနေထိုင်သည့် နေအိမ်မှ အိုက်စ် (မက်သ်အဖက်တမင်း) ၃ ကီလို(တစ်ကီလိုလျှင် ငွေကျပ် သိန်း ၁၀၀ နှုန်းဖြင့် ၎င်းဒေသတန်ဖိုးငွေကျပ် သိန်း ၃၀၀)နှင့် မော်တော်ဆိုင်ကယ် တစ်စီးတို့ကို သိမ်းဆည်းရမိခဲ့သဖြင့် စိုင်းကျော်(ခ)အိုက်စိုင်း(၄၅)နှစ်နှင့် စိုင်းမောင်ဆိုင်း(၄၅)နှစ်တို့အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားကြောင်း သတင်းရရှိသည်။

Source: www.moha.gov.mm 

ထိုင်းနိုင်ငံအပါအဝင် အိမ်နီးချင်းနိုင်ငံအချို့ကို တစ်ဆင့်ခံဖြတ်သန်း၍  မြန်မာနိုင်ငံအတွင်းသို့ နယ်စပ်လမ်းကြောင်းများမှတစ်ဆင့် တရားမဝင် ဝင်ရောက်လာပြီး ကရင်ပြည်နယ်၊ မြဝတီမြို့၊ ရွှေကုက္ကိုလ်နှင့် KK Park နယ်မြေများတွင် တရားမဝင် Online  လောင်းကစားမှုများ၊ Online လိမ်လည်မှုများ၊ ဒုစရိုက်မှုများ ကျူးလွန်ခဲ့ကြသူများကို စစ်ဆေးဖော်ထုတ်လျက်ရှိရာ ၂၀၂၅ ခုနှစ်၊ ဖေဖော်ဝါရီ ၂၃ ရက်တွင် ပြည်ပနိုင်ငံသား ၁၂၆ ဦးကို ထပ်မံထိန်းသိမ်းနိုင်ခဲ့သည်။

အဆိုပါ ထိန်းသိမ်းထားသည့် ပြည်ပနိုင်ငံသားများကို သက်ဆိုင်ရာနိုင်ငံများသို့ အမြန်ဆုံး ပြန်လည်လွှဲပြောင်းပေးနိုင်ရေး လိုအပ်သည့်ကိုယ်ရေးအချက်အလက်များနှင့် မှတ်တမ်းများ စာရင်းကောက်ယူခြင်းလုပ်ငန်းကို ဌာနဆိုင်ရာပူးပေါင်းအဖွဲ့များဖြင့် နေ့ချင်းပြီး ဆောင်ရွက်ပေးလျက်ရှိသည်။
၂၀၂၅ ခုနှစ်၊ ဇန်နဝါရီ ၃၀ ရက်မှ ဖေဖော်ဝါရီ ၂၂ ရက်အထိ မြန်မာနိုင်ငံအတွင်းသို့ တရားမဝင် ဝင်ရောက်လာသည့် ပြည်ပနိုင်ငံသား စုစုပေါင်းဦးရေ ၂၁၁၁  ဦးကို စစ်ဆေးဖော်ထုတ်ထိန်းသိမ်းနိုင်ခဲ့ကာ ၎င်းတို့အနက်မှ ၆၇၃ ဦးကို ထိုင်းနိုင်ငံမှတစ်ဆင့် သက်ဆိုင်ရာနိုင်ငံသို့ ဥပဒေလုပ်ထုံးလုပ်နည်းများနှင့်အညီ စနစ်တကျလွှဲပြောင်းပေးအပ်ခဲ့ပြီး ကျန်ရှိသည့် ပြည်ပနိုင်ငံသား ၁၄၃၈ ဦးကို သက်ဆိုင်ရာနိုင်ငံများသို့ လွှဲပြောင်းပေးရန် အသင့်ဖြစ်နေပြီဖြစ်ကြောင်းနှင့် ၎င်းတို့ကို ကောင်းမွန်စွာ ထိန်းသိမ်းထားရှိကြောင်း သိရသည်။ 
 အဆိုပါ ထိန်းသိမ်းခဲ့သည့် ပြည်ပနိုင်ငံသား ၂၁၁၁ ဦးသည်  တရုတ်၊ အင်ဒိုနီးရှား၊ ဗီယက်နမ်၊ မလေးရှား၊ ပါကစ္စတန်၊ အိန္ဒိယ၊ ယူဂန္ဓာ၊ အီသီယိုးပီးယား၊ နီပေါ၊ ထိုင်း၊ ရဝမ်ဒါ၊ ကင်ညာ၊  ကာဇက်စတန်၊ ကမ္ဘောဒီးယားနှင့် တရုတ်(တိုင်ပေ)တို့မှ နိုင်ငံသားများဖြစ်ကြပြီး အများစုမှာ တရုတ်နိုင်ငံသားများဖြစ်ကြကြောင်း သတင်းရရှိသည်။

Source: www.moha.gov.mm 

ယူကရိန်းနှင့်စစ်ပွဲ၌ ရုရှားအတွက် ခဲယမ်းမီးကျောက်လိုအပ်ချက်၏ ၅၀ % ကို မြောက်ကိုရီးယားမှ ထောက်ပံ့ပေးနေခြင်းဖြစ်သည်ဟု ယူကရိန်း စစ်ထောက်လှမ်းရေးအကြီးအကဲ ကီရေလိုဘူဒ်နောဗ် က ဖေဖော်ဝါရီ ၂၄ ရက်နေ့တွင် ပြောကြားခဲ့ပါသည်။ 

ယူကရိန်း၊ အမေရိကန်နှင့် တောင်ကိုရီးယားတို့၏ သုံးသပ်ချက်များအရ မြောက်ကိုးရီးယားသည် ၁၉၅၀ ပြည့်နှစ် နောက်ပိုင်းစစ်ပွဲများတွင် ပြုံယမ်းအစိုးရ၏ နိုင်ငံတကာစစ်ပွဲများတွင် ပထမဆုံးပါဝင်ပတ်သက်မှု ဖြစ်ကြောင်း၊ မြောက်ကိုးရီးယားက ရုရှားကို ၁၇၀ မီလီမီတာ ဟောင် ဝစ်ဇာများနှင့် ၂၄၀ မီလီမီတာ ဒုံးကျည်ပစ်လွှတ်သည့်စနစ်များကို ထောက်ပံ့နေကြောင်း သတင်းစာရှင်းလင်းပွဲ၌ ဘူဒ်နော်ဗ်ကဆိုပါသည်။ 

မြောက်ကိုရီးယားသည် ရုရှားအား ပဲ့ထိန်းဒုံးကျည်များ ထောက်ပံ့ပေး ထားပြီးဖြစ်ကာ ၂၀၂၅ ခုနှစ်တွင် ၁၄၈ စင်း ပစ်လွှတ်ခဲ့ပြီး ရုရှားက အမြောက်နှင့်မော်တာကျည် ၇ သန်းကျော်ကို ၂၀၂၅ ခုနှစ်တွင် ထုတ်လုပ်ရန်စီစဉ်နေကြောင်း ယူကရိန်း ပြည်ပထောက်လှမ်းရေး အကြီးအကဲ အိုလက် အိုင်ဗာရှန်ကို ကဆိုပါသည်။ 

တာဝေးပစ်ဒုံးကျည်များနှင့် ပတ်သက်၍ ရုရှားနိုင်ငံသည် ယခုနှစ်အတွင်း အစင်းရေ ၃၀၀၀ ခန့် ထုတ်လုပ်ရန်စီစဉ်နေပြီး ဥရောပနိုင်ငံများထက် ထုတ်လုပ်မှုပိုများကြောင်း အိုင်ဗာရှန်ကိုက ထပ်လောင်းပြောကြားခဲ့ပါသည်။

ကိုးကား-Myanmar National Post

၂၀၂၅ ခုနှစ်၊ ဖေဖော်ဝါရီ ၁၆ ရက် ည ၁၀ နာရီ ၃၀ မိနစ်တွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ပုသိမ်ကြီးမြို့နယ်၊ နန်းဦးလွင်ကျေးရွာအုပ်စု၊ ကန်ကောက်အရှေ့ကျေးရွာရှိ ဝင်းအောင်နှင့် မသန်းလှေတို့၏ နေအိမ်တွင် မူးယစ်ဆေးဝါးများအား ဘေထုပ်အတွင်းထည့်၍ ဟုမ္မလင်းမြို့သို့ လူမဲ့တန်ဆာဖြင့် ပေးပို့မည်ဖြစ်ကြောင်း သတင်းအရ ဝင်ရောက်ရှာဖွေရာ နေအိမ်မှ ပလတ်စတစ်ဆပ်ပြာခွက် ၈၅၄ ခွက်ဖြင့်ထည့်လျက် ဘိန်းဖြူ ၈ ဒသမ ၅၄ ကီလို (တစ်ကီလိုလျှင် ငွေကျပ် ၂၅၀ သိန်းနှုန်းဖြင့် ၎င်းဒေသတန်ဖိုးငွေ ကျပ် ၂,၁၃၅ သိန်း) သိမ်းဆည်းရမိခဲ့ပြီး ဖေဖော်ဝါရီ ၁၈ ရက် ညနေ ၆ နာရီ ၅၀ မိနစ်တွင် ဘိန်းဖြူ ဆပ်ပြာခွက်များအား ရောင်းချပေးသူ မချိုချိုသန်း(ခ)မချိုအား မင်္ဂလာဒုံမြို့နယ်၊ ချစ်တီးကုန်းရပ်ကွက်၊ အောင်မင်္ဂလာအဝေးပြေးကားဝင်းတွင် ဆက်လက်ဖမ်းဆီးရမိခဲ့သဖြင့် ဝင်းအောင်(၃၇)နှစ်၊ မသန်းလှေ (၄၅)နှစ်နှင့် မချိုချိုသန်း(ခ)မချို (၅၅)နှစ်တို့အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူခဲ့ပါသည်။
အလားတူ ဖေဖော်ဝါရီ ၂၁ ရက် နံနက် ၁ နာရီတွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် သာစည်မြို့နယ်၊ ကျွဲတပ်ဆုံကျေးရွာအုပ်စု၊ ကျွဲတပ်ဆုံကျေးရွာအနီးတွင် SCANIA အမျိုးအစား ခရီးသည်တင်မော်တော်ယာဉ်ကို ရပ်တန့်စစ်ဆေးရှာဖွေရာ ယာဉ်ပေါ်ပါခရီးသည် လွမ်းဝေထွန်းထံမှ စိတ်ကြွရူးသွပ်ဆေးပြား ၂၀,၀၀၀ ပြား (တစ်ပြားလျှင် ငွေကျပ် ၁၅၀၀ နှုန်းဖြင့် ၎င်းဒေသတန်ဖိုးငွေ ကျပ်သိန်း ၃၀၀) သိမ်းဆည်းရမိခဲ့သဖြင့် လွမ်းဝေထွန်း(၄၆) နှစ်အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားကြောင်း သတင်းရရှိသည်။

Source: www.moha.gov.mm 

ဥရောပသမဂ္ဂသည် ယူကရိန်းပဋိပက္ခနှင့် ဥရောပနိုင်ငံများ၏ လုံခြုံရေးဆိုင်ရာ အထူးထိပ်သီးအစည်းအဝေးကို မတ်လ ၆ ရက်နေ့တွင် ကျင်းပမည်ဖြစ်ကြောင်း ဥရောပကောင်စီဥက္ကဋ္ဌ Antonio Costa က ပြောကြားခဲ့သည်။

ဥရောပခေါင်းဆောင်များအချင်းချင်း ညှိနှိုင်းဆွေးနွေးမှုများပြုလုပ်ခဲ့ပြီး အဆိုပါညှိနှိုင်း ဆွေးနွေးမှုအပြီး လက်ရှိကြုံတွေ့နေရသော စိန်ခေါ်မှု များကို ရင်ဆိုင်ဖြေရှင်းရာတွင် ဥရောပနိုင်ငံများ၏ ကာကွယ်ရေးနှင့် လုံခြုံရေးအင်အား တောင့်တင်းခိုင်မာရေး၊ ယူကရိန်းနိုင်ငံငြိမ်းချမ်းရေး ရေရှည်တည်တံ့ရန်နှင့် လုံခြုံရေးတို့အတွက် အရေးပါသော ပံ့ပိုးမှုများ ပြုလုပ်သွားရန်" ဟူ၍ EU နိုင်ငံများပူးပေါင်း၍ ကတိကဝတ်ပြုခဲ့ကြောင်း Costa က ပြောကြားခဲ့သည်။

 ကိုးကား-TASS

Photo: Bloomberg

ဘာသာပြန်ဆိုသူ-ဒေါ်မေသူခိုင်၊ လက်ထောက်ညွှန်ကြားရေးမှူး၊ နစက-၃

အစွန်းရောက်အကြမ်းဖက်သမားများသည် အေးချမ်းစွာနေထိုင်လျက်ရှိသော ပြည်သူများနှင့် တရားဥပဒေစိုးမိုးရေးအတွက် ဝိုင်းဝန်းဆောင်ရွက်နေသော အုပ်ချုပ်ရေးပိုင်းဆိုင်ရာ တာဝန်ရှိသူများအား ထိခိုက်ဒဏ်ရာရရှိစေရန် ရည်ရွယ်ချက်များဖြင့် အကြမ်းဖက်ဖောက်ခွဲရေးလုပ်ရပ်များအား ငွေကြေးထောက်ပံ့ကာ နောက်ကွယ်မှ သွေးထိုးမြှောက်ပင့်လှုံ့ဆော်မှုများဖြင့် အများပြည်သူ သွားလာအသုံးပြုသော လမ်းမကြီးများ၊ ရထားလမ်းများ၊ ဌာနဆိုင်ရာ ရုံးအဆောက်အအုံများနှင့် လူနေအိမ်များအား ဖောက်ခွဲရေးပစ္စည်းကိရိယာများအသုံးပြု၍ မိုင်းထောင်ဖောက်ခွဲခြင်း၊ အဝေးမှ ပစ်ခတ်ဖောက်ခွဲခြင်းများ ပြုလုပ်လျက်ရှိပါသည်။
 ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဖေဖော်ဝါရီ ၂၀ ရက် နံနက် ၈ နာရီ ၁၅ မိနစ်တွင် စစ်ကိုင်းတိုင်းဒေသကြီး၊ ရွှေဘိုမြို့နယ်ပြည်သူ့ဆေးရုံကြီးသို့ မိုင်းပေါက်ကွဲစ ထိမှန်ဒဏ်ရာများဖြင့် အမျိုးသား တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ ရွှေဘိုမြို့နယ်၊ ရွာတော်ကျေးရွာနေ ဦးခြူး(၅၅)နှစ်သည် ပန်းရံကျေးရွာအနီးရှိ လယ်ကွင်းအတွင်း အလုပ်လုပ်ကိုင်နေစဉ် PDF အမည်ခံ အကြမ်းဖက်အဖွဲ့က ထောင်ထားသည့် မိုင်း တစ်လုံးအား နင်းမိပေါက်ကွဲခဲ့သဖြင့် ၎င်းတွင် မိုင်းပေါက်ကွဲစ ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။
အထက်ပါဖြစ်စဉ်မှ အကြမ်းဖက်မှုကျူးလွန်ခဲ့သူများအား ဥပဒေနှင့်အညီ ထိရောက်စွာ အရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း သတင်းရရှိသည်။

Source: www.moha.gov.mm 

ထိုင်းနိုင်ငံအပါအဝင် အိမ်နီးချင်းနိုင်ငံအချို့ကို တစ်ဆင့်ခံဖြတ်သန်း၍ မြန်မာနိုင်ငံအတွင်းသို့ နယ်စပ်လမ်းကြောင်းများမှတစ်ဆင့် တရားမဝင် ဝင်ရောက်လာပြီး ကရင်ပြည်နယ်၊ မြဝတီမြို့၊ ရွှေကုက္ကိုလ်နှင့် KK Park နယ်မြေများတွင် တရားမဝင် Online လောင်းကစားမှုများ၊ Online လိမ်လည်မှုများ၊ ဒုစရိုက်မှုများကျူးလွန်ခဲ့ကြသူများကို စစ်ဆေးဖော်ထုတ်လျက်ရှိရာ ၂၀၂၅ ခုနှစ်၊ ဖေဖော်ဝါရီ ၂၂ ရက်တွင် ပြည်ပနိုင်ငံသား ၂၂၂ ဦးကို ထပ်မံထိန်းသိမ်းနိုင်ခဲ့သည်။

အဆိုပါ ထိန်းသိမ်းထားသည့် ပြည်ပနိုင်ငံသားများကို သက်ဆိုင်ရာနိုင်ငံများသို့ အမြန်ဆုံး ပြန်လည်လွှဲပြောင်းပေးနိုင်ရေး လိုအပ်သည့် ကိုယ်ရေးအချက် အလက်များနှင့် မှတ်တမ်းများ စာရင်းကောက်ယူခြင်းလုပ်ငန်းကို ဌာနဆိုင်ရာ ပူးပေါင်းအဖွဲ့များဖြင့် နေ့ချင်းပြီး ဆောင်ရွက်ပေးလျက်ရှိသည်။

ထိုသို့ဆောင်ရွက်ပေးနေမှုကို ပြည်ထဲရေးဝန်ကြီးဌာန၊ မြန်မာနိုင်ငံရဲတပ်ဖွဲ့၊ ဒုတိယရဲချုပ်(၁) ရဲဗိုလ်ချုပ် တင်ကိုကိုက လိုက်လံကြည့်ရှုစစ်ဆေးပြီး ဌာနဆိုင်ရာ တာဝန်ရှိသူများနှင့် တွေ့ဆုံကာ စာရင်းဇယားအချက်အလက်များ မှန်ကန်ပြည့်စုံစေရေး၊ ထိန်းသိမ်းထားသည့် ပြည်ပနိုင်ငံသားများ၏ နေထိုင်စားသောက်ရေး၊ ကျန်းမာရေးနှင့် ပြန်လည်လွှဲပြောင်းရေး လုပ်ငန်းစဉ်များကို ယခုထက် ပိုမိုမြန်ဆန် အဆင်ပြေချောမွေ့စေရေး ကိစ္စရပ်များကို ဆွေးနွေးမှာကြားသည်။ထို့နောက် မြန်မာနိုင်ငံရဲတပ်ဖွဲ့ ဒုတိယရဲချုပ်(၁)နှင့် တာဝန်ရှိသူများသည် သက်ဆိုင်ရာနိုင်ငံများသို့ ပြန်လည်လွှဲပြောင်းပေးရန် စာရင်းကောက်ယူစိစစ်ပြီး အသင့်ဖြစ်နေသည့် ပြည်ပနိုင်ငံသားများအား ကောင်းမွန်စွာ ထိန်းသိမ်းထားရှိမှုအခြေအနေကို လိုက်လံကြည့်ရှုစစ်ဆေးသည်။
 ၂၀၂၅ ခုနှစ်၊ ဇန်နဝါရီ ၃၀ ရက်မှ ဖေဖော်ဝါရီ ၂၁ ရက်အထိ မြန်မာနိုင်ငံအတွင်းသို့ တရားမဝင် ဝင်ရောက်လာသည့် ပြည်ပနိုင်ငံသား စုစုပေါင်းဦးရေ ၁၉၈၅ ဦးကို စစ်ဆေးဖော်ထုတ် ထိန်းသိမ်းနိုင်ခဲ့ကာ ၎င်းတို့အနက်မှ ၅၆၁ ဦးကို ထိုင်းနိုင်ငံမှတစ်ဆင့် သက်ဆိုင်ရာနိုင်ငံများသို့ ဥပဒေလုပ်ထုံးလုပ်နည်းများနှင့်အညီ စနစ်တကျလွှဲပြောင်းပေးအပ်ခဲ့ပြီး ကျန်ရှိသည့် ပြည်ပနိုင်ငံသား ၁၄၂၄ ဦးကို သက်ဆိုင်ရာနိုင်ငံများသို့ လွှဲပြောင်းပေးရန် အသင့်ဖြစ်နေပြီဖြစ်ကြောင်းနှင့် ၎င်းတို့ကို ကောင်းမွန်စွာ ထိန်းသိမ်းထားရှိကြောင်း သတင်းရရှိသည်။

Source: www.moha.gov.mm 

ကုလသမဂ္ဂလုံခြုံရေးကောင်စီသည် ဖေဖော်ဝါရီလ ၂၄ ရက်နေ့တွင် အမေရိကန်ပြည်ထောင်စုမှ တင်သွင်းခဲ့သည့် ယူကရိန်းဆိုင်ရာ ကြားနေဆိုင်ရာ ဆုံးဖြတ်ချက်မူကြမ်းကို မဲခွဲဆုံးဖြတ်သွားမည်ဖြစ်ကြောင်း ကုလသမဂ္ဂ ရှိ တရုတ်နိုင်ငံ၏ အမြဲတမ်းကိုယ်စားလှယ်အဖွဲ့က ပြောကြားခဲ့ပါသည်။

“မဲပေးမှုကို ညနေ ၃ နာရီ (GMT ၀၀:၀၀) တွင် ကျင်းပမည်ဖြစ်သည်” ဟု အမြဲတမ်းကိုယ်စားလှယ်အဖွဲ့က ပြောကြားခဲ့ပါသည်။

အမေရိကန်ပြည်ထောင်စုသည် ယူကရိန်းအတွက် ကုလသမဂ္ဂ အထွေထွေညီလာခံ၏ ရုရှားဆန့်ကျင်ရေး ဆုံးဖြတ်ချက်မူကြမ်း၏ ပူးတွဲရေးသားသူ အဖြစ် ပါဝင်ရန် ပထမဆုံးအကြိမ် ငြင်းဆန်ခဲ့ပြီး ၎င်းမှ တင်သွင်းခဲ့သည့် စာတမ်းတွင် ပဋိပက္ခစတင်မှုနှင့်ပတ်သက်၍ ရုရှားကို စွပ်စွဲချက်များ မပါရှိကြောင်းသိရှိရပါသည်။ စာတမ်းတွင် ရုရှား-ယူကရိန်း ပဋိပက္ခတွင် လူများ၏ သေဆုံးမှုနှင့်ပတ်သက်၍ ဝမ်းနည်းကြောင်းကိုလည်း ဖော်ပြထားပြီး ၎င်းပဋိပက္ခ မြန်မြန်ဆန်ဆန် ပြီးဆုံးရန် တိုက်တွန်းထားပါသည်။

အစောပိုင်းသတင်းများအရ အမေရိကန်ပြည်ထောင်စုသည် ယူကရိန်းရှိ ပဋိပက္ခကို ဖြေရှင်းရန် ၎င်း၏ဆုံးဖြတ်ချက်မူကြမ်းကို ကုလသမဂ္ဂ လုံခြုံရေး ကောင်စီက မဲခွဲဆုံးဖြတ်ရန် အဆိုပြုနိုင်ကြောင်း ဖော်ပြခဲ့ပါသည်။ ၎င်းမူကြမ်းသည် ယူကရိန်းနှင့် အနောက်နိုင်ငံများ၏ ဆုံးဖြတ်ချက်မူကြမ်းနှင့် နှိုင်းယှဉ်ပါက ပိုမိုကြားနေသော သဘောဆောင်ပါသည်။ အမေရိကန်၏ ဆုံးဖြတ်ချက်မူကြမ်းစာသားကို ဖေဖော်ဝါရီလ ၂၁ ရက်နေ့တွင် လုံခြုံရေးကောင်စီအဖွဲ့ဝင်နိုင်ငံများ၏ ကိုယ်စားလှယ်များထံ ပေးပို့ခဲ့ပါသည်။

ကိုးကား- TASS

Photo: France24

ဘာသာပြန်ဆိုသူ-ရုရှားပညာတော်သင်ကျောင်းသားများ