မာဆေးမြို့ရှိ ရုရှားကောင်စစ်ဝန်ရုံးအား လက်လုပ်ဗုံးများဖြင့် ပစ်ပေါက် တိုက်ခိုက်ခဲ့သော ယူကရိန်းလိုလားသူ ပြင်သစ်နိုင်ငံသားနှစ်ဦးကို ဖေဖော်ဝါရီ ၂၄ ရက်တွင် ပြင်သစ်တရားရုံးက နေအိမ်အကျယ်ချုပ် ၈ လ ချမှတ်ခဲ့ကြောင်း မီဒီယာများက ဖော်ပြခဲ့ကြသည်။

ပြင်သစ်နိုင်ငံရှိ ရုရှားသံရုံးက အကြမ်းဖက်တိုက်ခိုက်ရန် ကြိုးပမ်းမှု အတွက် ချမှတ်သည့်ပြစ်ဒဏ်မှာ လျှော့ပေါ့လွန်းသည်ဟု ပြစ်တင်ရှုတ်ချ ခဲ့သည်။

ပြင်သစ်နိုင်ငံသားနှစ်ဦးဖြစ်သည့် Vasile H. (၄၈ နှစ်) နှင့် Georges S. (၅၉ နှစ်) တို့သည် “ပေါက်ကွဲစေနိုင်သော (သို့မဟုတ်) မီးလောင် လွယ်စေ နိုင်သောပစ္စည်းများကို ခွင့်ပြုချက်မရှိဘဲ ထုတ်လုပ်ခြင်း” နှင့် “လူနှင့် အဆောက်အဦများအား ထိခိုက်စေနိုင်သော အန္တရာယ်ရှိသည့် ပြစ်မှု ကျူးလွန်ခြင်း” ဟူသော စွပ်စွဲချက်များဖြင့် တရားစွဲဆိုခံခဲ့ရကြောင်း Le Figaro က ဖေဖော်ဝါရီ ၂၇ ရက်နေ့တွင် ရေးသား‌ဖော်ပြခဲ့ကာ ၎င်းတို့ နှစ်ဦးအား နေအိမ်အကျယ်ချုပ် ၈ လ ပြစ်ဒဏ်ကျခံစေရန် အမိန့်ချမှတ်ခဲ့သည်ဟု ဖော်ပြခဲ့ပါသည်။ 

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အုပ်ချုပ်ရေးပိုင်းဆိုင်ရာ တာဝန်ရှိ သူများနှင့် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားလွှမ်းမိုးစေရန် လည်းကောင်း၊ ၎င်းတို့နှင့် အမြင်အယူအဆမတူသူ အရပ်သားပြည်သူများအား “သူလျှို၊ သတင်းပေး၊ ဒလန်” ဟုစွပ်စွဲ၍လည်းကောင်း၊ “ငါနှင့် မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ လက်နက်ကိုင်အကြမ်းဖက်သမားများက ဓား၊ သေနတ်များ အသုံးပြု၍ ရက်စက်စွာ လုပ်ကြံတိုက်ခိုက်၊ သတ်ဖြတ်ခြင်းများ ပြုလုပ်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဖေဖော်ဝါရီ ၂၅ ရက် နံနက် ၈ နာရီ ၄၅ မိနစ်တွင် မကွေးတိုင်းဒေသကြီး၊ ပခုက္ကူမြို့နယ်၊ ပခုက္ကူမြို့၊ အမှတ်(၂)ရပ်ကွက်၌ သေနတ်ဖြင့် ပစ်ခတ်ခံရ၍ အမျိုးသမီး တစ်ဦး သေဆုံးသွားကြောင်း သတင်းအရ လုံခြုံရေးတပ်ဖွဲ့ဝင်များက သွားရောက် စစ်ဆေးခဲ့ရာ အဆိုပါရပ်ကွက်နေ ဒေါ်ယဉ်ယဉ်ချော(၄၄)နှစ်သည် ရပ်ကွက်ရှိ ခေတ်သစ်ပွဲရုံ(ပဲမျိုးစုံ) ရောင်းဝယ်ရေးဆိုင်၌ ရှိနေစဉ် PDF အမည်ခံ အကြမ်းဖက်သမား ငါးဦး(စိစစ်ဆဲ)က မော်တော်ယာဉ် တစ်စီးဖြင့် ရောက်ရှိလာပြီး သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ဒေါ်ယဉ်ယဉ်ချောတွင် ကျည်ထိမှန်ဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။
အလားတူ ဖေဖော်ဝါရီ ၂၆ ရက် နံနက် ၆ နာရီ ၅၅ မိနစ်တွင် မွန်ပြည်နယ်၊ ပေါင်မြို့နယ်၊ ညောင်ကုန်းကြီးကျေးရွာ၌ သေနတ်ဖြင့် ပစ်ခတ်ခံရ၍ အမျိုးသား တစ်ဦး သေဆုံးပြီး အမျိုးသမီး တစ်ဦး ဒဏ်ရာရရှိခဲ့ကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါကျေးရွာနေ ကျေးရွာအုပ်ချုပ်ရေးမှူး ဦးမြင့်စိုး(၆၇)နှစ်သည် ၎င်း၏ဇနီး ဒေါ်မိငယ်(၄၇)နှစ်နှင့်အတူ နေအိမ်၌ရှိနေစဉ် KNU အဖွဲ့မှ အကြမ်းဖက်မှုကို လိုလားသူများနှင့် PDF အမည်ခံ အကြမ်းဖက်သမားများ ပူးပေါင်းအဖွဲ့ အင်အား သုံးဦး(စိစစ်ဆဲ)က ဆိုင်ကယ် နှစ်စီးဖြင့် ရောက်ရှိလာပြီး သေနတ်ဖြင့် ပစ်ခတ်ထွက်ပြေး သွားခဲ့သဖြင့် ဦးမြင့်စိုးတွင် ကျည်ထိမှန်ဒဏ်ရာများရရှိကာ သေဆုံးသွားခဲ့ပြီး ဒေါ်မိငယ်တွင် ကျည်ထိမှန် ဒဏ်ရာများရရှိခဲ့၍ သေဆုံး/ဒဏ်ရာရရှိသူများအား ရင်းငြိမ်တိုက်နယ်ဆေးရုံသို့ ပို့ဆောင်ထားရှိကြောင်း သိရသည်။

ထိုသို့ အုပ်ချုပ်ရေးပိုင်းဆိုင်ရာ တာဝန်ရှိသူများနှင့် အပြစ်မဲ့ အရပ်သားပြည်သူများအား “ငါနှင့် မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ အကြောင်းမဲ့ ပစ်ခတ်သတ်ဖြတ်မှု ကျူးလွန်ခဲ့သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိသည်။

Source: www.moha.gov.mm

၂၀၂၅ ခုနှစ်၊ ဖေဖော်ဝါရီ ၂၃ ရက် ညနေ ၄ နာရီ ၃၀ မိနစ်တွင် မန္တလေးတိုင်းဒေသကြီးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် မန္တလေးတိုင်းဒေသကြီး၊ ကျောက်ပန်းတောင်းမြို့၊ အောင်မင်္ဂလာရပ်ကွက်ရှိ ကားဂိတ်တွင် မော်တော်ဆိုင်ကယ် တစ်စီးနှင့်အတူ ပါဆယ်ပစ္စည်းလာရောက်ထုတ်ယူသူ မျိုးမင်းဦးအား သတင်းအရရှာဖွေရာ ၎င်းထုတ်ယူသည့် ပါဆယ်ထုတ်အတွင်းမှ စိတ်ကြွရူးသွပ်ဆေးပြား ၂၉,၇၀၀ ပြား(တစ်ပြားလျှင် ၂,၀၀၀ ကျပ်နှုန်းဖြင့် ၎င်းဒေသတန်ဖိုးငွေကျပ် ၅၉၄ သိန်း) သိမ်းဆည်းရမိခဲ့ပြီး ကွင်းဆက်အရ ညနေ ၄ နာရီ ၄၅ မိနစ်၌ ကျောက်ပန်းတောင်းမြို့၊ သာယာအေးရပ်ကွက်တွင် စိတ်ကြွရူးသွပ်ဆေးပြားများ သယ်ဆောင်ရောင်းဝယ်ရာ၌ ပူးပေါင်းပါဝင်သူ အေးလွင်အား ဆက်လက်ဖမ်းဆီးရမိခဲ့သဖြင့် မျိုးမင်းဦး(၄၂)နှစ်နှင့် အေးလွင်(၄၁)နှစ်တို့အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အမှုဖွင့်အရေးယူထားကြောင်း သိရသည်။
အလားတူ ဖေဖော်ဝါရီ ၂၃ ရက် နံနက် ၁၀ နာရီ ၄၀ မိနစ်တွင်  မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ရှမ်းပြည်နယ်၊ တောင်ကြီးမြို့၊ ကျောင်းကြီးစုရပ်ကွက်၊ အနောက်မြို့ပတ်လမ်းတွင် မုန်းမုန်း(ခ)ဇော်ဦး မောင်းနှင်လာသည့် TOYOTA WISH အမျိုးအစား မော်တော်ယာဉ်ကို ရပ်တန့်စစ်ဆေးရှာဖွေရာ ယာဉ်ပေါ်မှ စိတ်ပြောင်းဆေးဝါး Happy Water ၂ ဒသမ ၄ ကီလို (တစ်ကီလိုလျှင် သိန်း ၁,၁၀၀ နှုန်းဖြင့် ၎င်းဒေသတန်ဖိုးငွေကျပ် သိန်း ၂,၆၄၀) သိမ်းဆည်း ရမိခဲ့သဖြင့် မုန်းမုန်း(ခ)ဇော်ဦး(၃၁)နှစ်အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အမှုဖွင့်အရေးယူထားကြောင်း သတင်းရရှိသည်။

Source: www.moha.gov.mm

တိုင်းဒေသကြီးနှင့် ပြည်နယ်များရှိ မြို့နယ်အချို့တွင် နိုင်ငံ့ဝန်ထမ်းများ၊ အုပ်ချုပ်ရေးပိုင်းဆိုင်ရာ တာဝန်ရှိသူများနှင့် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားလွှမ်းမိုးစေရန်လည်းကောင်း၊ ၎င်းတို့နှင့် အမြင်အယူအဆမတူသူ အရပ်သားပြည်သူများအား “သူလျှို၊ သတင်းပေး၊ ဒလန်” ဟုစွပ်စွဲ၍လည်းကောင်း၊ “ငါနှင့် မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ လက်နက်ကိုင်အကြမ်းဖက်သမားများက ဓား၊ သေနတ်များ အသုံးပြု၍ ရက်စက်စွာ လုပ်ကြံတိုက်ခိုက်၊ သတ်ဖြတ်ခြင်းများ ပြုလုပ်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဖေဖော်ဝါရီ ၂၄ ရက် နံနက် ၉ နာရီ ၂၀ မိနစ်တွင် ပဲခူးတိုင်းဒေသကြီး၊ လက်ပံတန်းမြို့နယ်၊ ကညင်တန်းကျေးရွာနေ မှော်အင်းကျေးရွာအုပ်စု အုပ်ချုပ်ရေးမှူး ဦးသန်းဦး(၅၈)နှစ်သည် ကညင်တန်းကျေးရွာမှ လက်ပံတန်းမြို့သို့ ဆိုင်ကယ်ဖြင့် မောင်းနှင်ထွက်ခွာလာစဉ် လက်ပံတန်း-မှော်အင်းသွားလမ်းဆုံအရောက် PDF အမည်ခံ အကြမ်းဖက်သမား နှစ်ဦး(စိစစ်ဆဲ)က ဆိုင်ကယ် တစ်စီးဖြင့် မျက်နှာချင်းဆိုင်ဘက်မှ မောင်းနှင်ရောက်ရှိလာပြီး သေနတ်ဖြင့် ပစ်ခတ်သတ်ဖြတ်၍ ၎င်းစီးနင်းလာသည့် HONDA CLICK-125 ဆိုင်ကယ်အား လုယက်ယူဆောင် ထွက်ပြေးသွားခဲ့သဖြင့် ဦးသန်းဦးတွင် ကျည်ထိမှန် ဒဏ်ရာများရရှိကာ သေဆုံးသွားခဲ့ကြောင်း သိရသည်။
အလားတူ ညနေ ၄ နာရီ ၅ မိနစ်တွင် ပဲခူးတိုင်းဒေသကြီး၊ ကြို့ပင်ကောက်မြို့နယ်၊ ကံကြီးကျေးရွာ၌ သေနတ်ဖြင့် ပစ်ခတ်ခံရ၍ အမျိုးသား တစ်ဦးနှင့် အမျိုးသမီး တစ်ဦးတို့ သေဆုံးသွားကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါကျေးရွာနေ ကျေးရွာအုပ်ချုပ်ရေးမှူး ဦးကံမြင့်(၆၇)နှစ်သည် ၎င်း၏ဇနီး ဒေါ်ခင်ဝင်းသူ(၄၂)နှစ်နှင့်အတူ နေအိမ်၌ရှိနေစဉ် PDF အမည်ခံ အကြမ်းဖက်သမား နှစ်ဦး(စိစစ်ဆဲ)က ဆိုင်ကယ် တစ်စီးဖြင့် ရောက်ရှိလာပြီး သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ၎င်းတို့နှစ်ဦးတွင် ကျည်ထိမှန် ဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။
အလားတူ ဖေဖော်ဝါရီ ၂၅ ရက် နံနက် ၆ နာရီ ၃၀ မိနစ်တွင် ပဲခူးတိုင်းဒေသကြီး၊ နတ်တလင်းမြို့နယ်၊ ညောင်လေးပင်ကျေးရွာ၌ သေနတ်ဖြင့် ပစ်ခတ်ခံရ၍ အမျိုးသား နှစ်ဦး သေဆုံးသွားကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါကျေးရွာနေ ဦးနေဝင်း(၅၆)နှစ်သည် တစ်ရွာတည်းနေ ဦးတင်ရှိန်(ခ)ဦးမဲညို(၅၆)နှစ်နှင့်အတူ ၎င်း၏ နေအိမ်ခြံဝင်းအတွင်း စကားပြောနေစဉ် PDF အမည်ခံ အကြမ်းဖက်သမား ၁၀ ဦး(စိစစ်ဆဲ)က ရောက်ရှိလာပြီး သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ၎င်းတို့နှစ်ဦးတွင် ကျည်ထိမှန် ဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။
အလားတူ နံနက် ၆ နာရီ ၃၀ မိနစ်တွင် မကွေးတိုင်းဒေသကြီး၊ တောင်တွင်းကြီးမြို့နယ်၊ စည်သာကြီးကျေးရွာအနီး၌ သေနတ်ဖြင့် ပစ်ခတ်ခံရ၍ အမျိုးသား တစ်ဦး သေဆုံးကာ အမျိုးသမီး တစ်ဦး ဒဏ်ရာရရှိခဲ့ကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါကျေးရွာနေ ရပ်ကွက်/ကျေးရွာစာရေး ဦးမြင့်ဇော်ဦး(ခ)နန်းနန်း(၃၈)နှစ်သည် မိခင် ဒေါ်မကြိုင်(၆၃)နှစ် နှင့်အတူ ကျေးရွာအနီးရှိ လယ်ကွင်းသို့ နွားလှည်းဖြင့် သွားရောက်စဉ် ကျေးရွာအရှေ့ဘက် လေးဖာလုံခန့် အရောက် အသင့်စောင့်ဆိုင်းနေသည့် PDF အမည်ခံ အကြမ်းဖက်သမား နှစ်ဦး(စိစစ်ဆဲ)က သေနတ်ဖြင့် ပစ်ခတ်ထွက်ပြေးသွားခဲ့သဖြင့် ဦးမြင့်ဇော်ဦး(ခ)နန်းနန်းတွင် ကျည်ထိမှန် ဒဏ်ရာများရရှိကာ သေဆုံးသွားခဲ့ပြီး ဒေါ်မကြိုင်တွင် ကျည်ထိမှန် ဒဏ်ရာများရရှိခဲ့၍ သေဆုံး၊ ဒဏ်ရာရရှိသူများအား တောင်တွင်းကြီးမြို့နယ်ပြည်သူ့ဆေးရုံသို့ ပို့ဆောင်ထားရှိကြောင်း သိရသည်။
ထိုသို့ နိုင်ငံ့ဝန်ထမ်းများ၊ အုပ်ချုပ်ရေးပိုင်းဆိုင်ရာတာဝန်ရှိသူများနှင့် အပြစ်မဲ့ အရပ်သားပြည်သူများအား “ငါနှင့် မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ အကြောင်းမဲ့ ပစ်ခတ်သတ်ဖြတ်မှု ကျူးလွန်ခဲ့သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိသည်။

Source: www.moha.gov.mm

တရုတ်ပြည်သူ့လွတ်မြောက်ရေးတပ်မတော် (PLA)သည် ၎င်း၏ လုပ်ထုံးလုပ်နည်းများနှင့်ပတ်သက်၍ ပြင်ဆင်ချက် အမြောက်အများကို ထုတ်ပြန်ဆောင်ရွက်ခဲ့ပြီး တိုက်ပွဲဝင်အသင့်ဖြစ်ရေးနှင့် ပြည်ပစစ်ရေးရည်မှန်းချက်တို့၏ အရေးပါမှုအပေါ် ပိုမိုအလေးထား ဆောင်ရွက်လာခဲ့ပါသည်။

ဧပြီလတွင် စတင်အသက်ဝင်မည့် ပြင်ဆင်ချက်များတွင် “တိုက်ပွဲများအောင်မြင်ရေးမှာ တပ်မတော်၏ အဓိက တာဝန် ဖြစ်သည်” ဟူသည့်အချက်ပါဝင်ပြီး “စစ်ရေးပြင်ဆင်မှုနှင့် တိုက်ပွဲဝင်အသင့်ဖြစ်မှုဆိုင်ရာအခြေခံအချက်များ” ကို ချမှတ်ဖော်ဆောင်ရန်လည်း အစိုးရအနေဖြင့် PLA ကို ညွှန်ကြားထားကြောင်း နိုင်ငံပိုင်သတင်းဌာနဖြစ်သည့် Xinhua သတင်းဌာန၏ ဖော်ပြချက်အရသိရှိရပါသည်။

ပြင်ဆင်ချက်များတွင် “PLA တပ်မတော်အတွင်း တရားဥပဒေစိုးမိုးမှု ပိုမိုကောင်းမွန်ရေး၊ ပါတီ အပေါ် သစ္စာစောင့် သိပြီး ခိုင်မာသည့်တပ်မတော်တစ်ရပ်ဖြစ်အောင် လေ့ကျင့်သင်ကြားပေးရေး၊ တိုက်ရည်ခိုက်ရည်ပြည့်ဝပြီး စိတ်ဓာတ် စည်းကမ်းကောင်းမွန်ရေး” စသည်တို့အတွက် လုပ်ထုံးလုပ်နည်းများကို ပြန်လည်သုံးသပ် ပြင်ဆင်မှုများ ပါဝင်နိုင်ကြောင်း Xinhua သတင်းဌာနက ဖေဖော်ဝါရီလ ၁၄ ရက်နေ့တွင် ရေးသားဖော်ပြထားပါသည်။

တောင်တရုတ်ပင်လယ်အတွင်း အမေရိကန်နှင့် တင်းမာမှုများဖြစ်ပွားနေသည့်အခြေအနေတွင် ဤ ပြင်ဆင် ပြောင်းလဲမှုသည် တရုတ်နိုင်ငံ၏ ဥပဒေမူဘောင်နှင့်လုပ်ထုံးလုပ်နည်းများ တိုးတက်ခိုင်မာအောင် ကြိုးပမ်းအားထုတ်မှု များ၏ အစိတ်အပိုင်းတစ်ရပ်လည်းဖြစ်သည်။

ဤသည်မှာ ဗဟိုစစ်ကော်မရှင်ဥက္ကဋ္ဌ၊ သမ္မတရှီကျင့်ဖျင်၏ ရည်မှန်းချက်များကို လှစ်ဟပြခြင်း ဖြစ်ကြောင်းနှင့် PLA တပ်မတော်သည် ၂၀၃၅ ခုနှစ်တွင် ခေတ်မီတပ်မတော်တစ်ရပ်ဖြစ်ရမည် ဖြစ်ပြီး ၂၀၅၀ ပြည့်နှစ်တွင်ထိပ်တန်း တပ်မတော်တစ်ရပ်ဖြစ်ရမည်ဟု ရှီကျင့်ဖျင်က ထုတ်ဖော်ပြောကြားခဲ့ကြောင်း South China Morning Post သတင်းစာမျက်နှာတွင် ရေးသားဖော်ပြထားပါသည်။

ကိုးကား- South China Morning Post

ဘာသာပြန်ဆိုသူ-ဦးထက်ထက်အောင်၊နစက-၄

တူရကီ၌ အကျဉ်းချခံထားရသော ကာ့ဒ် စစ်သွေးကြွခေါင်းဆောင် တစ်ဦး က ၎င်း၏ Kurdistan Workers' Party ကို လက်နက် ဖြုတ်သိမ်းပြီး ဖျက်သိမ်းရန် တောင်းဆိုလိုက်ပါသည်။

PKK ဟု လူသိများသည့် အဆိုပါ ပါတီသည် လွတ်လပ်ရေးအတွက် တူရကီ အစိုးရကို ၁၉၈၄ ခုနှစ်မှစတင်ကာ တိုက်ခိုက်နေခဲ့ခြင်းဖြစ်ပြီး ယင်းအဖွဲ့ ကို တူရကီအစိုးရနှင့် နိုင်ငံအချို့က အကြမ်းဖက်အဖွဲ့အစည်းအဖြစ် သတ်မှတ်ခဲ့ပါသည်။

ထောင် ၂၆ နှစ် ချခံထားရသည့် PKK ခေါင်းဆောင် Abdullah Ocalan က ၎င်း၏အပေါင်းအပါများမှတစ်ဆင့် ဖေဖော်ဝါရီ ၂၇ ရက်နေ့၌ ထုတ်ပြန်ခဲ့သည့်ကြေညာချက်တွင် အဖွဲ့အားလုံးလက်နက်ချရမည် ဖြစ်ပြီး PKK ကိုလည်း ဖျက်သိမ်းရမည်ဟု ဆိုထားပါသည်။

၎င်းအနေဖြင့် လွန်ခဲ့သော ၁၀ နှစ်က အလားတူတောင်းဆိုမှု ပြုလုပ်ခဲ့သော်လည်း လက်တွေ့ဖြစ်မလာခဲ့ပေ။ တူရကီအစိုးရက အကြမ်းဖက် ဝါဒတိုက်ဖျက်မှု၏ တစ်စိတ်တစ်ပိုင်းအဖြစ် ၎င်းအဖွဲ့အပေါ် ဖိအားပေးမှု များ အရှိန်မြှင့်လုပ်ဆောင်နေခဲ့သည်။

PKK လက်နက်ဖြုတ်သိမ်းရေးနှင့် ဖျက်သိမ်းရေးတောင်းဆိုချက် အကောင်အထည်ပေါ်လာပါက နှစ်ပေါင်း ၄၀ ကျော်ကြာ လက်နက်ကိုင် ပဋိပက္ခ သည် အဓိကကျသော အပြောင်းအလဲတစ်ခု ဖြစ်လာမည်ဖြစ်သည်။

သို့သော် Ocalan ၏ တောင်းဆိုမှုသည် PKK နှင့်သာ သက်ဆိုင်ပြီး “ဆီးရီးယားရှိ ကာ့ဒ်တပ်ဖွဲ့နှင့်မသက်ဆိုင်ကြောင်း” ပြောကြားခဲ့သည်ဟု ဆီးရီးယားရှိ ကာ့ဒ် ဦးဆောင်သည့်တပ်ဖွဲ့များ၏ တပ်မှူး၏ ပြောကြားချက်ကို ကိုးကားပြီး Reuters သတင်းဌာနက ဖော်ပြခဲ့ပါသည်။

ကိုးကား-NHK World

Photo: The Times of Israel

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

အမေရိကန်နှင့် အီရန်နိုင်ငံအကြား တင်းမာမှုများမြင့်တက်နေချိန်တွင် အီရန်သည် ယူရေနီယမ်ထုတ်လုပ်မှုကို အရှိန်မြှင့်လုပ်ဆောင်ခဲ့ကြောင်း ကုလသမဂ္ဂနျူကလီးယားစောင့်ကြည့်လေ့လာရေးအဖွဲ့၏အစီရင်ခံစာ၌ ရေးသား ဖော်ပြထားပါသည်။

ဗီယင်နာမြို့အခြေစိုက် နိုင်ငံတကာအဏုမြူစွမ်းအင်အေဂျင်စီ (IAEA)၏ အစီရင်ခံစာအရ ဖေဖော်ဝါရီလ ၈ ရက် အထိ အီရန်၌ (၆၀) ရာခိုင်နှုန်း အထိ သန့်စင်ထားသည့် ယူရေနီယမ် (၂၇၄ ဒသမ ၈) ကီလိုဂရမ် ရှိခဲ့သည်ဟု သိရပါသည်။ အီရန်၏ယူရေနီယမ်ပိုင်ဆိုင်မှုနှင့်ပတ်သက်ပြီး IAEA က ၂၀၂၄ ခုနှစ်၊ အောက်တိုဘာလ၌ နောက်ဆုံး ထုတ်ပြန်ခဲ့သည့် အစီရင်ခံစာနောက်ပိုင်း ယူရေနီယမ် (၉၂.၅) ကီလိုဂရမ်မြင့်တက်လာ ခဲ့ခြင်း ဖြစ်သည်ဟုလည်း သိရပါသည်။

ယူရေနီယမ်သည် နျူကလီးယားလက်နက်ထုတ်လုပ်ရာ၌ အရေးပါသော ပစ္စည်းအမျိုးအစားတစ်ခုဖြစ်ပြီး ၂၀၂၄ ခုနှစ်၊ အောက်တိုဘာလတွင် ထုတ်ပြန်ခဲ့သည့် IAEA ၏ အစီရင်ခံစာ၌ အီရန်၏ (၆၀) ရာခိုင်နှုန်းအထိ သန့်စင်ထားသော ယူရေနီယမ် သိုလှောင်မှုပမာဏသည် (၁၈၂.၃) ကီလို ဂရမ် ဖြစ်သည်ဟုလည်း ရေးသား ဖော်ပြထားပါသည်။

အစီရင်ခံစာ၌ “အီရန်၌ ယူရေနီယမ်စုဆောင်းမှုနှင့် ထုတ်လုပ်မှု သိသိ သာသာတိုးမြင့်လာခြင်းသည် လွန်စွာစိုးရိမ်စရာကောင်းသည့် ကိစ္စတစ်ခု ဖြစ်ပြီး အဏုမြူဗုံးတစ်လုံးကို ထုတ်လုပ်ရန်အတွက် သန့်စင်ထားသည့် ယူရေနီယမ် (၄၂)ကီလိုဂရမ်သာ လိုအပ်သည်”ဟု ရေးသား ဖော်ပြထား ပါတယ်။ လွန်ခဲ့သည့် ဖေဖော်ဝါရီလ ၈ ရက် အထိ အီရန်၏ သန့်စင်ထားသော ယူရေနီယမ်သိုလှောင်မှု စုစုပေါင်း ပမာဏသည် (၈၂၉၄.၄) ကီလိုဂရမ် ဖြစ်သည်ဟုလည်း ဖော်ပြချက်များအရ သိရပါသည်။

ကိုးကား-NP News

မြန်မာတွင် ကျားဖြန့်လုပ်ရန် စေခိုင်းခံရသူများသည် ထိုင်း၊ ကမ္ဘောဒီးယား နိုင်ငံများမှတစ်ဆင့် အလုပ်လုပ်ကိုင်ရန် ရောက်လာခြင်းဖြစ်ကြောင်း မြန်မာနိုင်ငံဆိုင်ရာဂျပန်သံရုံးက ဖေဖော်ဝါရီ ၂၇ ရက်တွင် အသိပေး ထုတ်ပြန်ချက်တွင် ဖော်ပြထားသည်။

လတ်တလောတွင် ဂျပန်နိုင်ငံ၌ အွန်လိုင်းဂိမ်း၊ လူမှုကွန်ယက် စသည်တို့မှ သိကျွမ်းလာခဲ့ပြီး မျက်မြင်တွေ့ဆုံဖူးခြင်းမရှိသော အသိမိတ်ဆွေမှတစ်ဆင့် ထိုင်း၊ ကမ္ဘောဒီးယားအစရှိသည့် ပြည်ပနိုင်ငံများတွင် အလုပ်လုပ်ကိုင်ရန် မိတ်ဆက်ပေးသည့်အတွက် ၎င်းနိုင်ငံများသို့ထွက်ခွာလာပြီး နောက်ပိုင်းတွင် မြန်မာနိုင်ငံ၊ မြဝတီမြို့ရှိ အွန်လိုင်းငွေလိမ်လည်ရေး စခန်းများသို့ ခေါ်ဆောင်လာခြင်းခံရကာ အွန်လိုင်းလိမ်လည်မှုများ လုပ်ကိုင်ရန်စေခိုင်းခံရသော ဖြစ်ရပ်များဆက်တိုက်ဆိုသလို ဖြစ်ပွားလျက် ရှိကြောင်း ထုတ်ပြန်ထားသည်။

အဆိုပါအွန်လိုင်းငွေလိမ်လည်ရေးစခန်းများ၌ ငွေလိမ်လည်မှုကို လုပ်ဆောင်ခြင်းသည် ပြစ်မှုမြောက်ကြောင်းနှင့် စခန်းများတွင်မူ မျက်ခြည်မပျက်စောင့်ကြည့်ခံရသော အနေအထားဖြင့် လိမ်လည်မှုများကို အတင်းအကြပ်စေခိုင်းခံရပြီး သတ်မှတ်ခွဲတမ်းမပြည့်မီပါက ညှဉ်းပန်း နှိပ်စက်ခံရသည့်အဖြစ်များလည်း ဖြစ်ပေါ်လျက်ရှိကြောင်း ထုတ်ပြန်ချက် အရ သိရသည်။

ထိုပြင် ဂျပန်လူမျိုးများကို သွေးဆောင်လှည့်ဖြားနေသော အွန်လိုင်း ငွေလိမ်ဂိုဏ်းများသည် ဂျပန်လူမျိုးများကိုပစ်မှတ်ထား၍ လိမ်လည်မှုများကို ကျူးလွန်လျက်ရှိပြီး ကျူးလွန်ရန်အတွက်လည်း ဂျပန်နိုင်ငံသားများသာမက ဂျပန်ဘာသာစကားတတ်ကျွမ်းသော မြန်မာလူမျိုးများကို အသုံးချရန် ရည်ရွယ်လာနိုင်ခြေလည်း ရှိကြောင်း မြန်မာနိုင်ငံဆိုင်ရာ ဂျပန်သံရုံးက ဆိုသည်။

ထို့ကြောင့် အွန်လိုင်းဂိမ်းများနှင့်အင်တာနက်‌အစရှိသည်တို့တွင် သိကျွမ်းလာခဲ့ပြီး မျက်မြင်တွေ့ဆုံဖူးခြင်းမရှိသော အသိမိတ်ဆွေမှတဆင့် ဂျပန် ဘာသာစကားကို အသုံးပြုရမည့်အလုပ်လုပ်ကိုင်ရန် ဆွဲဆောင်ခြင်းခံရပါက စူးစမ်းဆင်ခြင်မဲ့ယုံကြည်ခြင်းမျိုးမပြုလုပ်ဘဲ မိသားစုနှင့် မြန်မာနိုင်ငံဆိုင်ရာဂျပန်သံရုံးသို့ တိုင်ပင်ဆွေးနွေးမှုများ ပြုလုပ်နိုင်ကြောင်း အသိပေးထုတ်ပြန်ထားသည်။

ကိုးကား-NP News

ရုရှားနိုင်ငံသည် ယူကရိန်းပဋိပက္ခအား ငြိမ်းချမ်းစွာဖြေရှင်းရန် မည်သည့်အခါမျှ ငြင်းဆိုခဲ့ခြင်း မရှိကြောင်း ရုရှားသမ္မတ ဗလာဒီမာပူတင်က ဖေဖော်ဝါရီလ ၂၇ ရက်တွင် ပြောကြားလိုက်သည်။

ယူကရိန်းပဋိပက္ခအပါအဝင် အခြားအကျပ်အတည်းများကို ငြိမ်းချမ်းစွာဖြင့် ဖြေရှင်းရေးအတွက် တွေ့ဆုံဆွေးနွေးရန် ရုရှားက မည်သည့်အခါမျှ လက်လျှော့ပေးခြင်းမရှိကြောင်း၊ ထိုသို့ လုပ်ဆောင်ရန် အတွက်လည်း ရုရှားနိုင်ငံက အစဉ်ပြောကြားခဲ့ကြောင်း ပူတင်က ပြည်ထောင်စု လုံခြုံရေးအဖွဲ့၏ တွေ့ဆုံဆွေးနွေးပွဲတစ်ခု၌ ပြောကြားခြင်းဖြစ်သည်။

ယူကရိန်းအရေးတွင်သာမက အခြားကမ္ဘာ့ရေးရာ ကိစ္စရပ်များတွင်လည်း နိုင်ငံတကာ၏ ပူးပေါင်းဆောင်ရွက်မှုသည် အရေးပါကြောင်း  သမ္မတပူတင်က ဆက်လက်ပြောကြားသည်။

ရုရှားနှင့် အမေရိကန်ပြည်ထောင်စုတို့၏ နိုင်ငံရေးအရပြင်းပြသည့် စိတ်ဆန္ဒသည် ယူကရိန်းနိုင်ငံတွင်ဖြစ်ပွားနေသည့် လက်နက်ကိုင်ပဋိပက္ခကို အဆုံးသတ်စေမည့် အဓိကသော့ချက်ဖြစ်သည်ဟု ရုရှားအစိုးရအဖွဲ့မှ ပြောရေးဆိုခွင့်ရှိသူ ဒီမီထရီ မက်ဗီဒက်က ဖေဖော်ဝါရီလ ၂၇  ရက်တွင်  ပြောကြားခဲ့ကြောင်း သိရသည်။

Source: Myawady Web Portal

သမ္မတ ဒေါ်နယ်ထရမ့်က ဗြိတိန်စစ်တပ်သည် “၎င်းတို့ကိုယ်တိုင် စောင့်ရှောက်နိုင်ကြသည်” ဟု ပြောကြားခဲ့ပြီး ရုရှားနှင့် ငြိမ်းချမ်းရေး သဘောတူညီချက်တစ်ခုအဖြစ် ဗြိတိန်က ယူကရိန်းသို့ တပ်ဖွဲ့ဝင်များ စေလွှတ်ပါက အမေရိကန်က ထောက်ခံမှုနှင့်ပတ်သက်၍ မေးမြန်းခဲ့မှုအပေါ် ထိုသို့ ပြန်လည်ပြောဆိုခဲ့ခြင်းဖြစ်သည်။

ဗြိတိန်ဝန်ကြီးချုပ် ကီးယာစတာမာသည် ဖေဖော်ဝါရီ ၂၇ ရက်နေ့က ထရမ့်နှင့် ဝါရှင်တန်ရှိ အိမ်ဖြူတော်တွင် တွေ့ဆုံခဲ့ပြီး ၎င်းက "ခိုင်မာပြီး တရားမျှတသော ငြိမ်းချမ်းရေး" ရရှိနိုင်ရေး ရည်မှန်းချက်အား အကောင်အထည်ဖော်ရန် အစီအစဉ်များကို ဆွေးနွေးခဲ့ကြသည်ဟု ဆိုသည်။

“၎င်းက အခြားဥရောပခေါင်းဆောင်များနှင့်အတူ ငြိမ်းချမ်းရေးကိစ္စအား နီးကပ်စွာ လက်တွဲလုပ်ဆောင်နေပြီး သဘောတူညီချက်တစ်ခုရရှိပါက ယူကေတပ်ဖွဲ့ဝင်များကို ယူကရိန်းသို့ စေလွှတ်ရန်အသင့်ရှိကြောင်းနှင့် ဤသို့ဆောင်ရွက်ခြင်းသည် ငြိမ်းချမ်းရေးကို ကြာရှည်စွာတည်တံ့စေမည့်တစ်ခုတည်းသောနည်းလမ်းဖြစ်သည်ဟု” ဟု တွေ့ဆုံပွဲအပြီးတွင် စတာမာ က သတင်းထောက်များအား ပြောကြားခဲ့သည်။

သို့သော် UK တပ်ဖွဲ့ဝင်များစေလွှတ်မှုကြောင့် ရုရှားနှင့် ပဋိပက္ခ ဖြစ်ပွားပါက အမေရိကန်က ထောက်ပံ့ပေးမည့် အစီအစဉ်နှင့်ပတ်သက်၍ မေးမြန်းလာမှုကို ထရမ့်က ရှောင်ရှားခဲ့ပြီး UK သည် “အကူအညီများစွာ လိုအပ်မည်မဟုတ်” ဟု သတင်းထောက်များအား ပြောကြားခဲ့သည်။

UK သည် ၎င်းတို့ကိုယ်တိုင် ကောင်းစွာကာကွယ်စောင့်ရှောက်နိုင်ကြပြီး ခေတ်မီတောင့်တင်းသည့် စစ်အင်အားကို ပိုင်ဆိုင်ထားကြောင်းနှင့် ၎င်းတို့ အကူအညီလိုအပ်ပါက အမေရိကန်အနေဖြင့် အသင့်ရှိနေမည်ဖြစ်ပြီး UK အနေဖြင့် အကူအညီလိုအပ်မည် မဟုတ်ကြောင်း ထရမ့်က ပြောကြားခဲ့ပါသည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂