အမေရိကန် ကားထုတ်လုပ်ရေးကုမ္ပဏီ တက်စလာ (Tesla) ၏ ဒါရိုက်တာ ဘုတ်အဖွဲ့သည် တည်ထောင်သူ အီလွန်မက် (Elon Musk) အား အစားထိုးရန် အမှုဆောင်အရာရှိချုပ်(စီအီးအို) အသစ်ရှာဖွေရန် စတင် လုပ်ဆောင်နေပါသည်။
တက်စလာ၏ စတော့ရှယ်ယာဈေးနှုန်းနှင့် အမြတ်ငွေများ ကျဆင်းလာမှုများကြောင့် ယင်းဆုံးဖြတ်ချက်ချမှတ်ရခြင်းဖြစ်သည်ဟု သတင်းတွင် ဖော်ပြချက်အရ သိရပါသည်။
အိန္ဒိယဝန်ကြီးချုပ်မိုဒီသည် မေလ ၉ ရက်တွင် မော်စကိုမြို့၌ ကျင်းပမည့် Victory Day အောင်ပွဲနေ့အခမ်းအနားသို့ တက်ရောက်မည် မဟုတ်ကြောင်း ကရင်မလင် ပြောခွင့်ရ ဒီမီထရီ ပက်စ်ကော့ဗ်က ဧပြီ ၃၀ ရက် (ဗုဒ္ဓဟူးနေ့) တွင် ပြောကြားလိုက်ပါသည်။
“အိန္ဒိယခေါင်းဆောင်မလာဖြစ်ပါ။ ယခုအခမ်းအနားကို အိန္ဒိယက အမြင့်ဆုံးအဆင့် ကိုယ်စားမပြုတော့ပါ” ဟု ၎င်းက ပြောကြားထား ပါသည်။
ပါကစ္စတန်လေယာဉ်အားလုံး အိန္ဒိယလေကြောင်းပိုင်နက်ထဲ ဝင်ရောက် ဖြတ်သန်း အသုံးပြုခွင့်ကို မေလ ၂၃ ရက်နေ့အထိ တားမြစ် ပိတ်ပင်လိုက်ပြီ ဖြစ်ကြောင်း အိန္ဒိယအစိုးရက ဧပြီ ၃၀ (ဗုဒ္ဓဟူးနေ့)တွင် ထုတ်ပြန် ကြေညာလိုက်သည့် NOTAM (လေယာဉ်များအတွက် အသိပေးချက်) အရ သိရပါသည်။
“အိန္ဒိယလေကြောင်းပိုင်နက်ကို ပါကစ္စတန်၌ မှတ်ပုံတင်ထားသည့် လေယာဉ်များ၊ ပါကစ္စတန်လေကြောင်းလိုင်းများပိုင်ဆိုင်သည့် လေယာဉ်များ (ငှားရမ်းထားသည်ဖြစ်စေ) ၊ စစ်ဘက်သုံး လေယာဉ်များအား အသုံးပြု ခွင့်မပြု” ဟု ထုတ်ပြန်ချက်တွင် ဖော်ပြထားသည်။
အမေရိကန် နိုင်ငံခြားရေးဝန်ကြီး မာကိုရူဘီယိုသည် ပါကစ္စတန် ဝန်ကြီးချုပ် မိုဟာမက်ရှာဘတ်ရှာရစ်နှင့် အိန္ဒိယနိုင်ငံခြားရေးဝန်ကြီး ဆူဘရာမန်ယမ် ဂျိုင်ရှန်ကားတို့နှင့် ဖုန်းဆက်ပြောဆိုကာ နှစ်နိုင်ငံအကြား တင်းမာမှုများ လျှော့ချရန် တိုက်တွန်းခဲ့ကြောင်း အမေရိကန်နိုင်ငံခြားရေးဝန်ကြီးဌာန၏ ထုတ်ပြန်ချက်အရ သိရပါသည်။
တောင်အာရှတွင် တင်းမာမှုလျှော့ချရန်နှင့် ငြိမ်းချမ်းရေး ထိန်းသိမ်းရန်အတွက် ပါကစ္စတန်နှင့်အတူ လုပ်ဆောင်ရန် ဝန်ကြီး ရူဘီယိုက အိန္ဒိယ ကို တိုက်တွန်းထားကြောင်း သီးသန့်ထုတ်ပြန်ချက်တစ်ခုတွင် ဖော်ပြ ထားသည်။