ဂရင်းလန်းကျွန်းနှင့်ပတ်သက်၍ ဒိန်းမတ်နိုင်ငံ၏အချုပ်အခြာအာဏာနှင့် နယ်နိမိတ်ဆိုင်ရာ ဂုဏ်သိက္ခာကို တရုတ်နိုင်ငံအနေဖြင့် အပြည့်အဝလေးစားကြောင်း မေလ ၁၉ ရက်နေ့တွင် တရုတ်နိုင်ငံခြားရေးဝန်ကြီး ဝမ်ယိက ဒိန်းမတ်နိုင်ငံခြားရေးဝန်ကြီး လာရ်စ် လုခ် ရက်စ်မူဆန်နှင့်တွေ့ဆုံစဉ် ပြောကြားခဲ့ပြီး တရုတ်နိုင်ငံ၏ အချုပ်အခြာအာဏာနှင့်သက်ဆိုင်သည့်ကိစ္စရပ်များတွင်လည်း တရုတ်နိုင်ငံဘက်မှ ရပ်တည်သွားရန်လည်း ဒိန်းမတ်အား တိုက်တွန်းခဲ့ကြောင်း တရုတ်နိုင်ငံခြားရေး ဝန်ကြီးဌာန၏ သတင်းထုတ်ပြန်ချက်တွင် ဖော်ပြထားသည်။ 

အီသီယိုးပီးယားနိုင်ငံသည် ရုရှားကုမ္ပဏီများ၏ ကော်ဖီထုတ်ကုန်များအပေါ် စိတ်ဝင်စားမှုရှိကြောင်းနှင့် ရုရှားသို့ ကော်ဖီတင်ပို့မှုများ တိုးချဲ့ဆောင်ရွက်သွားမည်ဖြစ်ကြောင်း အီသီယိုးပီးယားသံအမတ်ကြီး Genet Teshome Jirru က TASS သို့ ပြောကြားလိုက်ပါသည်။

အင်အားပြင်းငလျင်ဒဏ်ခံစားခဲ့ရသော ဒေသများမှပြည်သူများအနေဖြင့် ငလျင်ဖြတ်သန်းရာလမ်းကြောင်းတစ်လျှောက်တွင် အဆောက်အအုံများ ပြန်မဆောက်ကြရန် ငလျင်ပညာရှင်များက သတိပေးပြောကြားမှုများ ရှိသည်။ မန္တလေးငလျင်လှုပ်ခတ်ခဲ့ရာ လမ်းကြောင်းတစ်လျှောက်တွင် မြစ်၊ ချောင်း၊ ရေအိုင်နှင့် လျှိုများ ရှိနေပြီး ငလျင်လှုပ်ခတ်ပြီးနောက်မြေအောက်တွင် မည်သို့ပြောင်းလဲမှုများရှိနေသည်ကို မသိနိုင်သည့် အတွက် အဆိုပါ ဖြတ်သန်းရာလမ်းကြောင်းတစ်လျှောက်တွင် နေအိမ်များ ပြန်လည်မဆောက်သင့်ကြောင်း မြန်မာနိုင်ငံ ဘူမိသိပ္ပံအသင်းအဖွဲ့ဝင် ပါမောက္ခဒေါက်တာစန္ဒီချစ်ကိုက ပြောသည်။ 

တရုတ်နိုင်ငံသည် ကမ္ဘာ့ပထမဆုံးဖြစ်လာမည့် “ဒရုန်းတင်ဆောင်ယာဉ်” လေယာဉ်ကို စမ်းသပ်ပျံသန်းရန် ပြင်ဆင်နေပြီး ယင်းယာဉ်သည် ဝေဟင်အမြင့်ပိုင်းတာဝန်များအတွင်း AI ထိန်းချုပ်သော ကာမီကာဇီ ဒရုန်းများကို လွှတ်တင်ပေးနိုင်မည်ဖြစ်သည်။

နိုင်ငံပိုင်ရုပ်သံ CCTV ၏ဖော်ပြချက်အရ "Jiu Tian" (သို့) "High Sky" UAV သည် ဇွန်လကုန်တွင် ပထမဆုံးစမ်းသပ်ခရီးစဉ်ကို ပြီးမြောက်ရန် စီစဉ်ထားသည်ဟု သိရှိရသည်။