အီရန်နှင့် အစ္စရေးကြား ပစ်ခတ်တိုက်ခိုက်မှု ခဏတာ မြင့်တက်ပြီးနောက် ယခုသီတင်းပတ်အတွင်း ကြေညာခဲ့သော စစ်ရပ်စဲရေးသည် ယူကရိန်း ပဋိပက္ခကို ဩဇာလွှမ်းနိုင်ကြောင်း အမေရိကန်၏ အထူးကိုယ်စားလှယ် Steve Witkoff က ပြောကြားခဲ့ပြီး ကိယက်ဗ်နှင့် မော်စကိုကြား ငြိမ်းချမ်းရေးအတွက် ကြိုးပမ်းမှုများ ပြန်လည်ရှင်သန်လာမည်ဟု မျှော်လင့်ကြောင်း ဖော်ပြခဲ့သည်။

ဥရောပသမဂ္ဂနှင့် ဗြိတိန်နိုင်ငံသားများသည် ၎င်းတို့၏ ပြည်တွင်း လူမှုရေးလိုအပ်ချက်များအစား ယူကရိန်းကိုထောက်ပံ့ရန် ငွေကြေးအကုန်အကျ ခံနေရခြင်းမှာ “လုယက်ခြင်းခံနေရခြင်း” ဖြစ်သည်ဟု ရုရှား နိုင်ငံခြားရေးဝန်ကြီး ဆာဂျီလာဗရော့ဗ်က ကြာသပတေးနေ့ (ဇွန် ၂၆) က သတင်းစာရှင်းလင်းပွဲတွင် ပြောကြားခဲ့သည်။

နေတိုးအဖွဲ့၏ မကြာသေးမီက ကြေညာချက်အရ အဖွဲ့ဝင်နိုင်ငံများသည် ၎င်းတို့၏ GDP ၏ ၅% ကို စစ်ရေးအသုံးစရိတ်အဖြစ် လာမည့် ၁၀ နှစ်အတွင်း မြှင့်တင်ရန် ကတိပြုထားသည်။ ယခင်က သတ်မှတ်ထားသော ၂% ရည်မှန်းချက်ထက် နှစ်ဆကျော်များပြားသည်။

အမေရိကန်အစိုးရသည် လွန်ခဲ့သည့်သီတင်းပတ်က အီရန်ကို ဗုံးကြဲ တိုက်ခိုက်မှုများအပြီး အမေရိကန်နယ်မြေအတွင်း လက်တုံ့ပြန်မှု ဖြစ်နိုင်ခြေများအား စိုးရိမ်လာပြီးနောက် အီရန်နိုင်ငံသား ၁၃၀ ကို ဖမ်းဆီး ခဲ့ကြောင်း Fox သတင်းဌာန၏ ဖော်ပြချက်အရ သိရှိရပါသည်။

လွန်ခဲ့သည့် သီတင်းပတ်အတွင်းက အမေရိကန်သည် အစ္စရေး၏ စစ်ဆင်ရေးတွင် ပါဝင်ကာ အီရန်နိုင်ငံရှိ အဓိက နျူကလီးယားစက်ရုံ သုံးခုကို တိုက်ခိုက်ခဲ့သည်။ ထို့နောက် တီဟီရန်မှ ကာတာရှိ အမေရိကန် စစ်စခန်းတစ်ခုကို ဒုံးကျည်များဖြင့် တိုက်ခိုက်ခဲ့ပြီး မကြာမီ စစ်ပြေငြိမ်းရေး ကြေညာခဲ့သည်။

ရုရှား အနောက်ပိုင်း Kursk ဒေသတွင် ယူကရိန်း၏ ဒရုန်း တိုက်ခိုက်မှု ကြောင့် တရုတ်သတင်းထောက် Lu Yuguang ဒဏ်ရာရရှိခဲ့ကြောင်း အရာရှိများက ပြောကြားခဲ့သည်။ Phoenix TV အဖွဲ့သည် ဒေသခံများနှင့် တွေ့ဆုံမေးမြန်းခန်းရိုက်ကူးနေစဉ် ဒရုန်းဖြင့်တိုက်ခိုက်ခံခဲ့ရကြောင်း သတင်းထောက်က TASS သို့ ပြောကြားခဲ့သည်။