အော့တဝါ ဇွန် ၁၈ 
အပြန်အလှန် နှင်ထုတ်ထားသည့် သက်ဆိုင်ရာသံအမတ်ကြီးများကို ပြန်လည်စေလွှတ်ကြရန် အိန္ဒိယနှင့် ကနေဒါနိုင်ငံတို့က ဇွန် ၁၇ ရက်တွင် သဘောတူခဲ့ကြကြောင်း သိရသည်။

ကနေဒါဝန်ကြီးချုပ် မာ့ခ်ကာနေးနှင့် ဂျီ-၇ ထိပ်သီးညီလာခံတက်ရောက်ရန် ကနေဒါနိုင်ငံသို့ရောက်ရှိနေသော အိန္ဒိယဝန်ကြီးချုပ် မိုဒီ တို့ ဇွန် ၁၇ ရက်တွင် တွေ့ဆုံ ဆွေးနွေးခဲ့သည်။

ရုရှားနိုင်ငံခြားရေးဝန်ကြီးဌာနက အစ္စရေး၏ အီရန်နျူကလီးယား စက်ရုံများကို ဆက်လက်တိုက်ခိုက်မှုများသည် အပြည်ပြည်ဆိုင်ရာ လုံခြုံရေးအတွက် လက်ခံနိုင်ဖွယ်မရှိသောလုပ်ရပ်ဖြစ်ပြီး ကမ္ဘာကြီးအား နျူကလီးယား ဘေးအန္တရာယ်ဆီသို့ ဦးတည်နေစေသည်ဟု ထုတ်ပြန်ကြေညာခဲ့သည်။

အစ္စရေးသည် ဇွန်လ ၁၃ နေ့က အီရန်ကို ဗုံးကြဲတိုက်ခိုက်မှုစတင်ခဲ့ပြီး တီဟီရန်သည် နျူကလီးယားဗုံးထုတ်လုပ်နိုင်ရန် နီးကပ်နေပြီဟု စွပ်စွဲ ခဲ့သည်။ အီရန်ဘက်မှ အဆိုပါစွပ်စွဲချက်များကို အခြေအမြစ်မရှိဟု ငြင်းဆိုကာ ဒရုန်းနှင့် ဒုံးကျည်များဖြင့် အစ္စရေးကို ပြန်လည် တိုက်ခိုက် ခဲ့သည်။

အမေရိကန်သမ္မတ ဒေါ်နယ်ထရမ့်က အီရန်ခေါင်းဆောင်ကြီး အယ်လီ ခါမေနီးအား သတ်ဖြတ်ခံရနိုင်ကြောင်း အရိပ်အမြွက် ပြောဆိုလျက် တီဟီရန်အား ခြွင်းချက်မရှိ လက်နက်ချရန် တောင်းဆိုခဲ့သည်။