အီရန်တပ်မတော်သည် စစ်ရေးလေ့ကျင့်မှုအတွင်း ဉာဏ်ရည်တုနည်းပညာ (AI) တပ်ဆင်ထားသည့်  ဒုံးကျည်များကိုအောင်မြင်စွာစမ်းသပ်ပစ်ခတ်နိုင်ခဲ့ကြောင်းသိရသည်။

အီရန်ရေတပ်ဖွဲ့သည် Qaem နှင့် Almas ဒုံးကျည်များကို Great Prophet Authority 19 ဟုအမည်ပေးထားသည့် စစ်ရေးလေ့ကျင့်မှု၏ နောက်ဆုံးနေ့ဖြစ်သည့် ဇန်နဝါရီလ ၂၆ရက်တွင် ပစ်ခတ်စမ်းသပ်ခဲ့ခြင်းဖြစ်သည်။  အီရန်သည်    အဆိုပါစစ်ရေးလေ့ကျင့်မှုကိုယခုလအစောပိုင်းက လုပ်ဆောင်ခဲ့ခြင်းဖြစ်သော်လည်း အသေးစိတ်အချက်အလက်များကို ဖော်ပြခဲ့ခြင်းမရှိပေ။

AI နည်းပညာသုံး အဆိုပါဒုံးကျည်များသည် ဒရုန်းများမှ ပစ်ခတ်ခဲ့ခြင်းဖြစ်ပြီး ယင်းဒုံးကျည်များကို အီရန်က အဆင့်မြှင့်တင်ထားသည့် အခြားလက်နက်စနစ်များနှင့်အတူ ထုတ်ဖော်ပြသ၍ စမ်းသပ်ပစ်ခတ်ခဲ့ခြင်းဖြစ်ကြောင်းသိရသည်။

Qaem  ဒုံးကျည်သည်   အနီအောက်ရောင်ခြည်၊ လေဆာ သို့မဟုတ် ရုပ်သံမှတစ်ဆင့် ပဲ့ထိန်းနိုင်ပြီး အလေးချိန်အားဖြင့် ၈.၅ ကီလိုဂရမ်ရှိ ထိပ်ဖူးများကို အကွာအဝေး ၄၅ ကီလိုမီတာအထိ ပစ်ခတ်နိုင်သည်။ ထို့အတူ Almas   ဒုံးကျည်သည် သံချပ်ကာဖျက်ဒုံးအမျိုးအစားတစ်ခုဖြစ်ပြီး အကွာအဝေးအားဖြင့် ၈ ကီလိုမီတာသို့သာပစ်ခတ်နိုင်သည့် ပေါက်ကွဲအားကိုပြင်းထန်စွာ ဖြစ်ပေါ်စေနိုင်သည့် ထိပ်ဖူးများအားတပ်ဆင်ထားခြင်းဖြစ်သည်။

Source: Myawady Web Portal

ဆူဒန်နိုင်ငံ ဒါဖာဒေသရှိ ဆေးရုံတစ်ရုံကို သူပုန်အဖွဲ့များဝင်ရောက်တိုက်ခိုက်ခဲ့ခြင်းကြောင့် လူပေါင်း ဒါဇင်နှင့်ချီကာသေဆုံးခဲ့ကြောင်း ကမ္ဘာ့ကျန်းမာရေးအဖွဲ့ (WHO) အကြီးအကဲက ဇန်နဝါရီ ၂၆ ရက်နေ့က ပြောကြားခဲ့ပါသည်။ 

ဆူဒန်လက်နက်ကိုင်တပ်ဖွဲ့ (SAF)နှင့် အရပ်သားအစိုးရတို့ အသွင်ကူးပြောင်းမှုအပေါ် တင်းမာမှုများကြောင့် ၂၀၂၃ ခုနှစ်၊ ဧပြီလလယ်ပိုင်းမှစတင်၍ တိုက်ပွဲများဖြစ်ပေါ်ကာ လူပေါင်းသောင်းနှင့်ချီ အသက်ဆုံးရှုံးခဲ့ရပြီး သန်းနှင့်ချီသော ပြည်သူများအိုးအိမ်စွန့်ခွာ ထွက်ပြေးခဲ့ရပါသည်။ 

ဆူဒန်နိုင်ငံ အယ်လ်ဖာဆာမြို့ရှိဆေးရုံကို ရုတ်တရက် တိုက်ခိုက်မှုကြောင့် လူနာများနှင့် လူနာစောင့်များ   ဒဏ်ရာရသူ ၁၉ ဦး နှင့် သေဆုံးသူ ၇၀ ရှိခဲ့သည်ဟု WHO ညွှန်ကြားရေးမှူးချုပ် တီးဒရိုစ်က ၎င်း၏ X တွင် ရေးသားခဲ့ပြီး ၎င်းဆေးရုံသည် အဆိုပါမြို့တွင် တစ်ခုတည်းသော လည်ပတ်နေသည့် ဆေးရုံဖြစ်ကြောင်း ပြောကြားခဲ့သည်။

တိုက်ခိုက်မှုဖြစ်ပွားချိန်တွင် ဆေးရုံ၌လူနာများဖြင့် ပြည့်ကျပ်နေသည်ဟု တီးဒရိုစ်က အလေးပေးပြောကြားခဲ့ပြီး အယ်လ်မယ်ဟာမြို့ရှိ အခြားကျန်းမာရေး အဆောက်အအုံကိုလည်း ဇန်နဝါရီ ၂၅ ရက်နေ့က တိုက်ခိုက်ခဲ့ကြောင်းပြောသည်။ တိုက်ပွဲများကြားတွင် ပျက်စီးသွားသော အဆောက်အအုံများ ပြန်လည် ထူထောင်ရေးအတွက် အထောက်အပံ့များ နိုင်ငံအတွင်းသို့ အပြည့်အဝဝင်ရောက်ခွင့်ကို တောင်းဆိုခဲ့ပြီး အာဖရိကရှိ ကျန်းမာရေးစောင့်ရှောက်မှုနေရာများတွင် တိုက်ခိုက်မှုအားလုံးကို ရပ်တန့်ရန် တိုက်တွန်းခဲ့ပါသည်။

လက်နက်ကိုင် RSF အဖွဲ့သည် လွန်ခဲ့သည့် နှစ်နှစ်နီးပါးခန့် ပဋိပက္ခစတင်ဖြစ်ပွားစဉ်ကတည်းက နိုင်ငံအနောက်ပိုင်း ဒါဖာဒေသတွင် နယ်မြေအများအပြားကို သိမ်းပိုက်ခဲ့သည်။ မြောက်ဒါဖာပြည်နယ်၏ မြို့တော်ဖြစ်သည့် အယ်လ်ဖာရှာသည် မေလကတည်းက RSF ၏ ဝိုင်းထားမှုကိုခံခဲ့ရသော်လည်း စစ်တပ်နှင့် မဟာမိတ်လက်နက်ကိုင်အဖွဲ့များက ယင်းမြို့ကို သိမ်းပိုက်ခြင်းမပြုနိုင်ရန် တားဆီးနိုင်ခဲ့သည်။ 

ဆော်ဒီအာရေးဘီးယားနှင့် အမေရိကန်တို့ ကြားဝင်ဖျန်ဖြေပေးသည့် အပစ်အခတ်ရပ်စဲရေးသဘောတူညီမှုနှင့် ကြိုးပမ်းမှုအများအပြားသည် စစ်ပွဲများအကြားတွင် နောက်ဆုံး၌ အားလုံးပြိုလဲသွားခဲ့ရသည်။ ဆူဒန်သည် အငတ်ဘေးဆိုက်နေပြီဖြစ်ကြောင်း ကုလသမဂ္ဂက အကြိမ်ကြိမ် သတိပေးထားပါသည်။

ကိုးကား-Myanmar National Post

Photo: BBC

မြောက်ကိုရီးယားသည် ဇန်နဝါရီ ၂၅ ရက်နေ့က ရေငုပ်သင်္ဘောများတွင် ဖြန့်ကျက်ချထားရန်နှင့် မြေပြင်ပစ်မှတ်များကို တိုက်ခိုက်ရန်အတွက် ဒီဇိုင်းထုတ်ထားသည့် မဟာဗျူဟာမြောက် ခရုဇ်ဒုံးကျည်ကို အောင်မြင်စွာ စမ်းသပ်နိုင်ခဲ့ပါသည်။ ဒုံးကျည်ပစ်လွှတ်မှုကို မြောက်ကိုးရီးယားနိုင်ငံ ခေါင်းဆောင် ကင်ဂျုံအန်က စောင့်ကြည့်လေ့လာခဲ့ကြောင်း ကိုရီးယားဗဟိုသတင်းအေဂျင်စီ (KCNA) က ဖော်ပြခဲ့ပါသည်။

ပစ်လွှတ်လိုက်သော ဒုံးကျည်များသည် ၇၅၀၀ စက္ကန့် အတွင်း ကီလိုမီတာ ၁၅၀၀ အကွာအဝေးကို ဖုံးလွှမ်းကာ ၎င်းတို့၏ ပစ်မှတ်များကို ထိမှန်ခဲ့ပါသည်။ ထို့ကြောင့် ဒုံးကျည်များ၏ ပျမ်းမျှပျံသန်းမှုအမြန်နှုန်းမှာ တစ်နာရီ လျှင် ၇၂၀ ကီလိုမီတာဖြစ်ပါသည်။ အဆိုပါ စမ်းသပ်မှုသည် အိမ်နီးချင်းနိုင်ငံများ၏ လုံခြုံရေးကို မထိခိုက်စေကြောင်း KCNA က မှတ်ချက်ပြုခဲ့ပါသည်။ 

အေဂျင်စီ၏အဆိုအရ အဆိုပါစမ်းသပ်မှုများသည် ဒေသတွင်းပြောင်းလဲနေသော လုံခြုံရေးအခြေအနေနှင့်အညီ ဖြစ်နိုင်ခြေရှိသော ရန်သူများကို မဟာဗျူဟာမြောက် ဟန့်တားခြင်း၏ ထိရောက်မှုကိုမြှင့်တင်ရန် ရည်ရွယ်သည့် အမျိုးသားကာကွယ်ရေးစွမ်းရည်ကို တည်ဆောက်မည့် အစီအစဉ်၏ တစ်စိတ်တစ်ပိုင်း ဖြစ်ကြောင်း သိရှိရပါသည်။ 

ပြုံယမ်းသည် ၎င်း၏ “စစ်ပွဲကို ဟန့်တားရေးနည်းလမ်းများ ဆက်လက်တိုးတက်စေမည်ဖြစ်ကြောင်း” မြောက်ကိုရီးယားခေါင်းဆောင် ကင်ဂျုံအန်က အလေးပေး ပြောကြားခဲ့ပါသည်။ “ခိုင်ခံ့သည့် စစ်အင်အားများကိုအခြေခံပြီး ရေရှည်တည်တံ့ခိုင်မြဲသည့် ငြိမ်းချမ်းရေးနှင့်တည်ငြိမ်ရေးကို ကာကွယ်ရန် မိမိတို့၏အရေးကြီးသည့် တာဝန်များကို အမြဲတမ်း တာဝန်ကျေပွန်စေရန် ဆက်လက် ထမ်းဆောင်သွားမည်ဖြစ်ကြောင်း မြောက်ကိုရီးယား ခေါင်းဆောင် ကင်ဂျုံအန်က ဆက်လက် ပြောကြားခဲ့သည်။

ကိုးကား - TASS

တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အုပ်ချုပ်ရေးပိုင်းဆိုင်ရာ တာဝန်ရှိသူများနှင့် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားလွှမ်းမိုးစေရန်လည်းကောင်း၊ ၎င်းတို့နှင့် အမြင်အယူအဆမတူသူ အရပ်သားပြည်သူများအား “သူလျှို၊ သတင်းပေး၊ ဒလန်” ဟုစွပ်စွဲ၍ လည်းကောင်း၊ “ငါနှင့် မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ လက်နက်ကိုင်အကြမ်းဖက်သမားများက ဓား၊ သေနတ်များအသုံးပြု၍ ရက်စက်စွာ လုပ်ကြံ တိုက်ခိုက်၊ သတ်ဖြတ်ခြင်းများ ပြုလုပ်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇန်နဝါရီ ၂၂ ရက် နံနက် ၈ နာရီ ၄၅ မိနစ်တွင် ပဲခူးတိုင်းဒေသကြီး၊ မင်းလှမြို့နယ်၊ ဂန့်ဂေါ်ပင်ရွာမကျေးရွာ၌ သေနတ်ဖြင့် ပစ်ခတ်ခံရ၍ အမျိုးသား တစ်ဦး သေဆုံးသွားကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါကျေးရွာနေ ဦးမြင့်စိုး(ခ)မိုးကြီး(ခ)ရှမ်းလေး(၅၂)နှစ်သည် ၎င်း၏နေအိမ်၌ရှိနေစဉ် PDF အမည်ခံ အကြမ်းဖက်သမား ၁၀ ဦး(စိစစ်ဆဲ)က ရောက်ရှိလာပြီး သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ၎င်းတွင် ကျည်ထိမှန် ဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။
ထိုသို့ အပြစ်မဲ့ အရပ်သားပြည်သူတစ်ဦးအား “ငါနှင့် မတူ၊ ငါ့ရန်သူ” ဟူသည့် တစ်ဖက်သတ် အစွန်းရောက် ဂိုဏ်းဂဏစွဲအပေါ် အခြေခံကာ အကြောင်းမဲ့ လုပ်ကြံသတ်ဖြတ်မှု ကျူးလွန်ခဲ့သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိသည်။

Source: www.moha.gov.mm

အပစ်အခတ်ရပ်စဲရေးသဘောတူညီချက်အရ အစ္စရေးတပ်ဖွဲ့သည် လက်ဘနွန်မှ ဇန်နဝါရီ ၂၆ ရက် (တနင်္ဂနွေနေ့)တွင် ဆုတ်ခွာပေးရမည်ဖြစ်သော်လည်း ဆက်လက်တပ်စွဲထားပါသည်။ အစ္စရေးနှင့် ဟစ်ဇ်ဘိုလာတို့အကြား ရက်ပေါင်း ၆၀ အပစ်အခတ်ရပ်စဲရေး သဘောတူညီချက်သည် အမေရိကန်နှင့် ပြင်သစ်တို့၏ ကြားဝင်ညှိနှိုင်းပေးမှုအရ အထမြောက်ခဲ့ပြီးစာချုပ်တွင်လက်ဘနွန်တောင်ပိုင်းမှ အစ္စရေးတပ်ဖွဲ့များနှင့်ဟစ်ဇ်ဘိုလာတပ်ဖွဲ့များက ဆုတ်ခွာပေးရမည်ဟု သတ်မှတ် ထားပါသည်။ 

ယခုဆက်လက်တပ်စွဲထားသည့် အစ္စရေးတပ်ဖွဲ့များ အရေအတွက်မည်မျှရှိကြောင်းနှင့် မည်သည့်အချိန်မှ ဆုတ်ခွာပေးမည်ကို မသိရှိရပါ။ အစ္စရေးနှင့်ဟစ်ဇ်ဘိုလာတို့အကြားပဋိပက္ခများကြောင့် ဟစ်ဇ်ဘိုလာဘက်မှ အရာရှိကြီးများ လုပ်ကြံသတ်ဖြတ်ခံခဲ့ရပြီး အရပ်သား ၄,၀၀၀ ကျော် သေဆုံးခဲ့ပါသည်။ ထို့အပြင် အရပ်သား ၁.၂ သန်းကျော်ဘေးလွတ်ရာသို့ တိမ်းရှောင်နေရသည်ဟုလည်းသိရှိရပါသည်။ အပစ်အခတ်ရပ်စဲရေးသဘောတူညီချက်အရ  လက်ဘနွန် တပ်ဖွဲ့များကလည်း ဆုတ်ခွာပေးရမည်ဖြစ်သော်လည်း ယခုအချိန်ထိ Litani မြစ်အထိသာ ဆုတ်ခွာသည်ကို တွေ့ရှိရကြောင်း"အစ္စရေးဝန်ကြီးချုပ်ရုံးက ဇန်နဝါရီ ၂၄ ရက်တွင် ထုတ်ပြန်ခဲ့ပါသည်။ 

ကိုးကား -BBC

ဘယ်လာရုစ်နိုင်ငံသည် ရုရှားနိုင်ငံ၏ Oreshnik တာလတ်ပစ် ပဲ့ထိန်းဒုံးကျည်စနစ်ကို မကြာမီ ရက်ပိုင်းအတွင်း နိုင်ငံအတွင်း ဖြန့်ကျက်ချထားမည်ဖြစ်ကြောင်း သမ္မတအလက်ဇန္ဒားလူကာရှန်ကိုက ပြောကြားခဲ့သည်။

ရုရှားနိုင်ငံမှ အဆင့်မြင့် တာလတ်ပစ်ပဲ့ထိန်းဒုံးကျည်စနစ် Oreshnik သည် ဘယ်လာရုစ်နိုင်ငံသို့ မကြာမီ ရောက်ရှိမည်ဟု ဘယ်လာရုစ်မှ မျှော်လင့်ထားကြောင်း သမ္မတ အလက်ဇန္ဒားလူကာရှန်ကို က ပြောကြားခဲ့ပြီး ၎င်းသည် နှစ်နိုင်ငံနယ်စပ်နှင့်မဝေးသောနေရာတွင် စခန်းချသွားမည်ဟု ပြောကြားခဲ့ပါသည်။

ဘယ်လာရုစ်သမ္မတ ရွေးကောက်ပွဲကျင်းပနေချိန်တွင် ဇန်နဝါရီ ၂၆ ရက်(တနင်္ဂနွေနေ့)က ပြုလုပ်သည့် သတင်းစာရှင်းလင်းပွဲတစ်ခုတွင် သမ္မတ လူကာရှန်ကို က အဆိုပါလက်နက်အား ဘယ်လာရုစ်နယ်စပ်မှ အရှေ့ဘက် ကီလိုမီတာ ၆၀ ခန့်အကွာရှိ ရုရှားမြို့ Smolensk နှင့် ပိုမိုနီးကပ်သည့်နေရာတွင် ဖြန့်ကျက်ချထားမည်ဖြစ်ကြောင်း ပြောကြားခဲ့ပါသည်။ သို့သော် နောက်ပိုင်းတွင် အခြားတစ်နေရာတွင် ထားရှိရန် ဆုံးဖြတ်နိုင်ကြောင်း ပြောကြားခဲ့ပါသည်။ 

မိမိတို့သည် Oreshnik ကိုယခုကစပြီးမည်သည့်နေ့တွင် မဆိုရှိလိမ့်မည်ဖြစ်ကြောင်း၊ Oreshnik၏ နောက်ထပ်စနစ်က ရုရှားနိုင်ငံထက် ပိုစောပြီး ဘယ်လာရုစ်ကို ပို့ပေးမည်ဟုသမ္မတ ဗလာဒီမာပူတင်နှင့် သဘောတူထားကြောင်း သမ္မတ လူကာရှန်ကိုက ပြောကြားခဲ့ပါသည်။ ပေးပို့သည့်အချိန်ဇယားအပေါ် ညီလာခံအပြီးတွင် အတည်ပြုပေးရန် တောင်းဆိုသည့်အခါ ရက်အတိအကျကို သဘောတူညီခြင်းမရှိသေးကြောင်း ၎င်းက ဝန်ခံခဲ့ပါသည်။

ဖြန့်ကျက်တည်နေရာအတွက် ရွေးချယ်မှုမှာ Oreshnik ၏ နည်းပညာပိုင်းဆိုင်ရာ သတ်မှတ်ချက်များအပေါ် အခြေခံသည်ဟု ၎င်းက ဆက်လက်ပြောကြားခဲ့ပါသည်။

ဘယ်လာရုစ်သည် အနည်းဆုံး Oreshnik ဒုံးခွင်းဒုံးစနစ် ၁၀ ခုကို လက်ခံရယူလိုကြောင်း အစပိုင်းတွင် ပြောကြားခဲ့သော်လည်း၊ အထူးသဖြင့် ရုရှားသည် Oreshnik ကို တပ်ဖြန့်ရန်လိုအပ်သောကြောင့် ယင်းပမာဏကို လွှဲပြောင်းရန်မှာ စီးပွားရေးအရ အလွန်ခက်ခဲမည်ဖြစ်ကြောင်း ဘယ်လာရုစ်သမ္မတက ဝန်ခံခဲ့ပါသည်။ “Oreshnik စနစ်တစ်ခုသည်ဘယ်လာရုစ် ကို ကာကွယ်ရန် လုံလောက်သည်” ဟု၎င်းကထပ်မံပြောကြားခဲ့ပါသည်။ ထို့အပြင် ရုရှားလုံခြုံရေးကောင်စီအတွင်းရေးမှူး ဆာဂေးရှိုးဂူ၏ကျေးဇူးကြောင့် ဘယ်လာရုစ်တွင်နျူကလီးယားလက်နက်များ ပေါ်ပေါက်လာခဲ့ခြင်းဖြစ်ကြောင်း ဘယ်လာရုစ်သမ္မတ အလက်ဇန္ဒားလူကာ ရှန်ကိုက ပြောကြားခဲ့ပါသည်။

ကိုးကား - RT

အစွန်းရောက်အကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများနှင့် တရားဥပဒေစိုးမိုးရေးအတွက် ဝိုင်းဝန်းဆောင်ရွက်နေသော အုပ်ချုပ်ရေးပိုင်းဆိုင်ရာ တာဝန်ရှိသူများအား ထိခိုက်ဒဏ်ရာရရှိစေရန် ရည်ရွယ်ချက်များဖြင့် အကြမ်းဖက်ဖောက်ခွဲရေးလုပ်ရပ်များအား ငွေကြေးထောက်ပံ့ကာ နောက်ကွယ်မှ သွေးထိုးမြှောက်ပင့်လှုံ့ဆော်မှုများဖြင့် အများပြည်သူ သွားလာအသုံးပြုသော လမ်းမကြီးများ၊ ရထားလမ်းများ၊ ဌာနဆိုင်ရာ ရုံးအဆောက်အအုံများနှင့် လူနေအိမ်များအား ဖောက်ခွဲရေးပစ္စည်းကိရိယာများ အသုံးပြု၍ မိုင်းထောင်ဖောက်ခွဲခြင်း၊ အဝေးမှ ပစ်ခတ်ဖောက်ခွဲခြင်းများ ပြုလုပ်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇန်နဝါရီ ၂၂ ရက် မွန်းလွဲ ၃ နာရီ ၃၀ မိနစ်တွင် မန္တလေးတိုင်းဒေသကြီး၊ ပြင်ဦးလွင်ပြည်သူ့ဆေးရုံသို့ မိုင်းပေါက်ကွဲစ ထိမှန်ဒဏ်ရာများဖြင့် အမျိုးသမီး တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ ရှမ်းပြည်နယ်(မြောက်ပိုင်း)၊ နောင်ချိုမြို့နယ်၊ ဂန့်ကော်ကျေးရွာနေ ဒေါ်အုန်းရီ(၇၀)နှစ်သည် ၎င်း၏ တူမ ဒေါ်ခင်ဆွေ(၃၃)နှစ်နှင့်အတူ ကျေးရွာတောင်ဘက်ရှိ ၎င်းပိုင်တောင်ယာခင်းသို့ သွားရောက်စဉ် တောင်ယာခင်းအနီးအရောက် PDF အမည်ခံ အကြမ်းဖက်အဖွဲ့က ထောင်ထားသည့် မိုင်း တစ်လုံးအား နင်းမိပေါက်ကွဲခဲ့သဖြင့် ဒေါ်ခင်ဆွေတွင် မိုင်းပေါက်ကွဲစ ထိမှန်ဒဏ်ရာများရရှိကာ သေဆုံးသွားခဲ့ပြီး ဒေါ်အုန်းရီတွင် မိုင်းပေါက်ကွဲစ ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။
အလားတူ ညနေ ၆ နာရီတွင် စစ်ကိုင်းတိုင်းဒေသကြီး၊ ဝက်လက်မြို့နယ်ပြည်သူ့ဆေးရုံသို့ မိုင်းပေါက်ကွဲစ ထိမှန်ဒဏ်ရာများဖြင့် အမျိုးသား တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ ဝက်လက်မြို့နယ်၊ ရွှေကျင်ကျေးရွာနေ ဦးဇော်မင်းနိုင်(၄၃)နှစ်သည် ၎င်း၏နေအိမ်မှ သဲပုတ်ကုန်းကျေးရွာသို့ ထွက်ခွာလာစဉ် မြင်တော်ကျေးရွာအနီးအရောက် PDF အမည်ခံ အကြမ်းဖက်အဖွဲ့က ထောင်ထားသည့် မိုင်း တစ်လုံး ပေါက်ကွဲခဲ့သဖြင့် ၎င်းတွင် မိုင်းပေါက်ကွဲစ ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။
အထက်ပါဖြစ်စဉ်များမှ အကြမ်းဖက်မှုကျူးလွန်ခဲ့သူများအား ဥပဒေနှင့်အညီ ထိရောက်စွာ အရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း သတင်းရရှိသည်။

Source: www.moha.gov.mm

လက်နက်ကိုင်အကြမ်းဖက်သမားများသည် အပြစ်မဲ့ အရပ်သားပြည်သူများ နေထိုင်ရာ မြို့၊ ရပ်ကွက်၊ ကျေးရွာများအတွင်း၌ တိုက်ပွဲများဖော်ဆောင်ခြင်း၊ လက်နက်ကြီး၊ ရှော့တိုက်ဒုံး၊ Drop Bomb များဖြင့် ပစ်ခတ်တိုက်ခိုက်ခြင်းများအား လုပ်ဆောင်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇန်နဝါရီ ၂၂ ရက် နံနက် ၁၁ နာရီတွင် မန္တလေးတိုင်းဒေသကြီး၊ မိတ္ထီလာခရိုင်ပြည်သူ့ဆေးရုံကြီးသို့ ဗုံးသီးပေါက်ကွဲစ ထိမှန်ဒဏ်ရာများဖြင့် အမျိုးသမီး တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ တောင်သာမြို့နယ်၊ သာစည်ကျေးရွာသို့ PDF အမည်ခံ အကြမ်းဖက်အဖွဲ့က အများပြည်သူ ထိခိုက်စေရန် ရည်ရွယ်၍ လက်နက်ကြီးဖြင့် ပစ်ခတ်တိုက်ခိုက်ခဲ့ရာ ကျေးရွာအတွင်းသို့ လက်နက်ကြီးဗုံးသီး တစ်လုံး ကျရောက်ပေါက်ကွဲခဲ့မှုကြောင့် အဆိုပါကျေးရွာနေ  ဒေါ်မောက်တင်(၆၄)နှစ်တွင် ဗုံးသီးပေါက်ကွဲစ ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။
ထိုသို့ အပြစ်မဲ့ အရပ်သားပြည်သူများ အေးချမ်းစွာ နေထိုင်လျက်ရှိသော မြို့၊ ရပ်ကွက်၊ ကျေးရွာအတွင်းသို့ အကြမ်းဖက်သမားများမှ တိုက်ပွဲများဖော်ဆောင်ခြင်းနှင့် လက်နက်ကြီး၊ ရှော့တိုက်ဒုံး၊ Drop Bomb များဖြင့် ပစ်ခတ်တိုက်ခိုက်ခြင်းများ လုပ်ဆောင်မှုကြောင့် အပြစ်မဲ့ အရပ်သားပြည်သူများ ထိခိုက်ဒဏ်ရာရရှိခဲ့မှုအပေါ် ဒေသခံပြည်သူများက လုံးဝလက်ခံနိုင်ခြင်းမရှိဘဲ ဆန့်ကျင်ကန့်ကွက်လျက်ရှိကြောင်းနှင့် လုံခြုံရေးတပ်ဖွဲ့ဝင်များက လိုအပ်သော လုံခြုံရေးလုပ်ငန်း များကို ပြည်သူလူထုနှင့် ပူးပေါင်းကာ တိုးမြှင့်လုပ်ဆောင်လျက်ရှိကြောင်း သတင်းရရှိသည်။

Source: www.moha.gov.mm

ရုရှား၏ခွင့်ပြုချက်မရှိဘဲ ယူကရိန်းသို့ “ငြိမ်းချမ်းရေး ထိန်းသိမ်းရေးတပ်ဖွဲ့များ” ဝင်ရောက်လာပါက ၎င်းတို့ သည် ရုရှား၏ စစ်ရေးပစ်မှတ်များ ဖြစ်လာလိမ့်မည် ဟု ရုရှားနိုင်ငံခြားရေးဝန်ကြီးဌာနက ပြောကြားခဲ့ပါသည်။

ကိုးကား- ရုရှားနိုင်ငံခြားရေးဝန်ကြီးဌာန

ဥရောပနိုင်ငံများအနေဖြင့် ဥရောပတွင် တပ်ဖြန့်ထားသော အမေရိကန်စစ်သည်များကို ထောက်ပံ့မှုမပေးပါက အမေရိကန်စစ်သည်များကို ပြန်ခေါ်ရန်အတွက် ဒေါ်နယ်ထရမ့်က စီစဉ်နေကြောင်း အီတလီသတင်းစာ တစ်စောင်က ဖော်ပြလိုက်သည်။

ဥရောပသံတမန်သတင်းရင်းမြစ်ကို ကိုးကားပြီး သတင်းစာကဖော်ပြလိုက်ခြင်းဖြစ်ပါသည်။ ဥရောပ၌ အမေရိကန်စစ်သည် ၁သိန်းကျော်ရှိပြီး လက်တလောတွင် စစ်သည် ၂ သောင်းအား ပြန်လည်ခေါ်ယူမည်ဖြစ်ပြီး ကျန်ရှိနေသည့် စစ်သည်များအတွက် အထောက်အပံ့မပေးပါက တဖြည်းဖြည်းပြန်ခေါ်သွားမည်ဟုဆိုသည်။ အကြောင်းမှာ စစ်သည်များကို အမေရိကန် အခွန်ထမ်း ပြည်သူများက ထောက်ပံ့နေရခြင်းအတွက်ကြောင့်ဖြစ်ကြောင်းနှင့် ဥရောပတွင် တာဝန်ထမ်းဆောင်နေသောအမေရိကန်စစ်သည်များအတွက် အမေရိကန် အခွန်ထမ်းများက ပေးဆောင်ရန်မလိုဟု ဆိုပါသည်။ 

ထရမ့်၏ ပထမသက်တမ်းအတွင်း ၂၀၂၀ ပြည့်နှစ်၊ ဇူလိုင်လတွင် နေတိုးကာကွယ်ရေးအသုံးစရိတ် ရန်ပုံငွေကို ဖြည့်ဆည်းရန် ဘာလင်အစိုးရ၏ ပျက်ကွက်မှုကို တုံ့ ပြန်ရန်အတွက် အမေရိကန်သည် ဂျာမနီမှ တပ်ဖွဲ့ဝင် ၁၂,၀၀၀ ကိုရုပ်သိမ်းမည်ဖြစ်ကြောင်း ထရမ့်က ကြေညာခဲ့ဖူးသည်။ 

၂၀၂၁ ခုနှစ်၊ ဖေဖော်ဝါရီလတွင် သမ္မတဂျိုးဘိုင်ဒန်က ဂျာမနီမှ အမေရိကန်တပ်များ ဆုတ်ခွာရန် စီစဉ်ထားမှုကို တရားဝင်ရပ်ဆိုင်းခဲ့ပါသည်။ ၂၀၂၄ ခုနှစ်နှောင်းပိုင်းအထိ ဥရောပတစ်ခွင်တွင် ဌာနခွဲအသီးသီးမှ အမေရိကန်တပ်ဖွဲ့ဝင် ၁သိန်း ခန့် တပ်စွဲထားပါသည်။ 

ကိုးကား-Myanmar National Post