ယူကရိန်းသည် အမေရိကန် ဂြိုဟ်တုပုံရိပ်များ အသုံးပြုခွင့်ကို ဆုံးရှုံးသွားပြီ ဖြစ်ပါသည်။ အမေရိကန်အခြေစိုက် အာကာသနည်းပညာ ကုမ္ပဏီ Maxar ကယူကရိန်းအား ဝန်ဆောင်မှုပေးထားသော အသုံးပြုခွင့် ကို ပိတ်သိမ်းလိုက်ခြင်း ဖြစ်သည်ဟု ဒေသခံ သတင်းဌာနတစ်ခုက သောကြာနေ့တွင် ဖော်ပြခဲ့သည်။

Maxar ၏ ဆုံးဖြတ်ချက်မှာ အမေရိကန်အစိုးရက ယူကရိန်းသို့ စစ်ရေး အကူအညီနှင့် စစ်ဘက်ထောက်လှမ်းရေးမျှဝေရေးကို ခေတ္တ ရပ်ဆိုင်းလိုက်ကြောင်း ဆုံးဖြတ်ချက်ချလိုက်ပြီးနောက်တွင် ထွက်ပေါ်လာခြင်း ဖြစ်သည်။

အမေရိကန် သမ္မတ ဒေါ်နယ်ထရမ့်သည် မဟာဗျူဟာရေး အရ ဂျာမနီရှိ အမေရိကန်တပ်များကို ပြန်လည်ရုတ်သိမ်းပြီး ဟန်ဂေရီသို့ ပြောင်းရွှေ့ရန် စဉ်းစားနေကြောင်းThe Daily Telegraph သတင်းစာက ဒေါ်နယ်ထရမ့် အစိုးရနှင့် နီးစပ်သည့် အရင်းအမြစ်များကို ကိုးကား၍ ဖော်ပြထား ပါသည်။

လက်ရှိတွင် ဂျာမနီတွင် အမေရိကန်တပ်ဖွဲ့ ၃၅,၀၀၀ ဦးခန့်  တာဝန်ထမ်း ဆောင်လျက်ရှိသည်။

တရုတ်၊ ရုရှားနှင့် အီရန် ရေတပ်တို့သည် Security Belt-2025 စစ်ရေးလေ့ကျင့်မှုကို ၂၀၂၅ ခုနှစ်၊ မတ်လအတွင်း အီရန်နိုင်ငံ၏ ပင်လယ်ထဲတွင် ပြုလုပ်မည်ဖြစ်ကြောင်း တရုတ်နိုင်ငံ ကာကွယ်ရေးဝန်ကြီးဌာန၏ WeChat စာမျက်နှာတွင် ထုတ်ပြန်ထားပါသည်။

“မတ်လအစောပိုင်း သို့မဟုတ် မတ်လလယ်ပိုင်းတွင် တရုတ်၊ အီရန်နှင့် ရုရှား ရေတပ်များသည် Security Belt-2025 စစ်ရေးလေ့ကျင့်မှုကို ပြုလုပ်မည်။

အဆိုပါ လေ့ကျင့်မှုများကို အီရန်နိုင်ငံ Chabahar ဆိပ်ကမ်းအနီးရှိ ပင်လယ်ပြင်တွင် ပြုလုပ်မည်” ဟု ထုတ်ပြန်ချက်တွင် ဖော်ပြထားသည်။

ရုရှားနိုင်ငံ၊ Kherson ဒေသ၊ Veliky Kopani မြို့ရှိ ဈေးတစ်ခုကို ယူကရိန်းစစ်တပ်မှ HIMARS ဒုံးကျည်ဖြင့် တိုက်ခိုက်ခဲ့ပြီး ပြည်သူများ သေဆုံးဒဏ်ရာရရှိခဲ့ကြောင်း ဒေသဆိုင်ရာ အုပ်ချုပ်ရေးမှူး Vladimir Saldo က ပြောကြားခဲ့သည်။