အမေရိကန်သမ္မတအဖြစ် ဒေါ်နယ်ထရမ့် ကျမ်းသစ္စာကျိန်ဆိုခဲ့သည်မှာ တနင်္ဂနွေနေ့ (ဧပြီ ၂၀) တွင် ၃ လ ပြည့်ပြီဖြစ်ပါသည်။ ၎င်း၏မူဝါဒ များသည် ပြည်တွင်းစီးပွားရေးကို အပျက်သဘောဆောင်သည့်သက်ရောက်မှုရှိနိုင်သည်ဆိုသည့် စိုးရိမ်မှုများ ဖြစ်ပေါ်နေသည့်အချိန် လတ်တလော ကောက်ယူခဲ့သော စစ်တမ်းများတွင် ၎င်းအပေါ် ထောက်ခံမှု နှုန်း ကျဆင်းသွားခြင်းကို ပြသနေပါသည်။

ထရမ့် တက်လာပြီးနောက်ပိုင်း ကုန်သွယ်မှုလိုငွေပြမှုကို လျှော့ချရန်နှင့် အခြားပြည်တွင်းပြဿနာများကို ဖြေရှင်းရန်ရည်ရွယ်သည့် အခွန် စည်းကြပ်မှု အစီအမံများကို ဆက်တိုက်လုပ်ဆောင်ခဲ့သည်။

ရီပတ်ဘလီကန် ဆီးနိတ်အမတ် Ron Johnson က ၂၀၀၁ ခုနှစ်၊ စက်တင်ဘာ ၁၁ တိုက်ခိုက်မှုနှင့်ပတ်သက်သည့် ဖြစ်စဉ်အမှန်အပေါ် အစိုးရ၏ရှင်းလင်းချက်များနှင့် သက်သေအထောက်အထားများနှင့် ပတ်သက်ပြီး ဖြေရှင်းနိုင်ခဲ့ခြင်းမရှိသည့် မေးခွန်းများကို ကိုးကား၍ အမေရိကန်ကွန်ဂရက်လွှတ်တော်မှ နောက်ထပ်စုံစမ်းစစ်ဆေးမှုများ ပြုလုပ်နိုင်ရန် အကြံပြုခဲ့သည်။

မြန်မာနိုင်ငံတွင် မတ်လ ၂၈ ရက်နေ့က လှုပ်ခတ်ခဲ့သည့် မန္တလေး ငလျင်ကြီးကြောင့် ဧပြီလ ၂၀ ရက်နေ့အထိ သေဆုံးသူ (၃၇၀၀) ကျော်ရှိလာပြီး ပျောက်ဆုံးသူ (၁၂၀) လျော့ကျလာပြီ ဖြစ်ကြောင်း နိုင်ငံတော်စီမံအုပ်ချုပ်ရေး ကောင်စီ၏ ထုတ်ပြန်ချက်အရ သိရသည်။

ဘီလီဇ်တွင် ခရီးသည် ၁၃ ဦးပါဝင်သော လေယာဉ်ကို ဓားဖြင့် ထိန်းချုပ်၍ ပြန်ပေးဆွဲခဲ့သည့် အမေရိကန်နိုင်ငံသားတစ်ဦးကို ခရီးသည်တစ်ဦးမှသေနတ်ဖြင့်ပစ်သတ်လိုက်သည့်ဖြစ်စဥ်တစ်ခု ပြီးခဲ့သည့် ကြာသပတေးနေ့ (ဧပြီ ၁၇) က ဖြစ်ပွားခဲ့ကြောင်း Anadolu Agency သတင်းတွင် ဖော်ပြ ထားမှုအရ သိရသည်။