ဆားဘီးယားသမ္မတ Aleksandar Vucic သည် မေလ ၉ ရက်တွင် မော်စကိုမြို့၌ ကျင်းပမည့် နှစ် ၈၀ ပြည့် ဒုတိယ ကမ္ဘာစစ် အောင်ပွဲ အခမ်းအနား တက်ရောက်မည်ဖြစ်ကြောင်း၊ ယင်းနေ့ ညနေပိုင်းတွင် ရုရှား သမ္မတ ဗလာဒီမာပူတင်နှင့် တွေ့ဆုံ၍ ဆားဘီးယား၏ ရေနံ၊ သဘာဝ ဓာတ်ငွေ့စသည့်ကိစ္စများအပြင် အခြားအရာအားလုံးကို ဆွေးနွေးရန် ရည်ရွယ်ထားကြောင်း မီဒီယာများကို ပြောကြားလိုက်ပါသည်။

အမေရိကန်အစိုးရသည် နိုင်ငံပေါင်း ၇၀ နှင့် အကောက်ခွန် လျှော့ချရေးအတွက် ဆွေးနွေးညှိနှိုင်းမှုများ ပြုလုပ်မည်ဖြစ်ကြောင်း၊ ထိုဆွေးနွေးမှု များတွင် အဆိုပါနိုင်ငံများ၏ တရုတ်နိုင်ငံနှင့်စီးပွားရေး ပူးပေါင်းမှုကို ကန့်သတ်ရန် သတ်မှတ်ချက်များ ထည့်သွင်းနိုင်ကြောင်း The Wall Street Journal သတင်းအရ သိရပါသည်။

ယူကရိန်းနှင့် အမေရိကန် ဧပြီလ ၁၇ ရက်က သတ္တုတွင်းထွက် သဘောတူညီချက် ကနဦး ပထမခြေလှမ်းအဖြစ် လက်မှတ်ရေးထိုးမှုတွင် ယူကရိန်းအတွက် လုံခြုံရေး အာမခံချက် တစုံတရာ မဖော်ပြထားကြောင်း ယူကရိန်းလွှတ်တော်အမတ် Yaroslav Zheleznyak က ၎င်း၏ Telegram တွင် ရေးသားထားပါသည်။  

နှစ်နိုင်ငံ အပြုသဘောဆောင်သောပူးပေါင်းဆောင်ရွက်မှုကို အသိအမှတ်ပြုရန်နှင့် နှစ်ဘက်အကျိုးရှိမည့် ကနဦးနားလည်မှုစာချွန်လွှာကို ဧပြီ ၁၇ တွင် လက်မှတ်ရေးထိုးလိုက်ကြကြောင်း ယူကရိန်း ပထမလက်ထောက် ဝန်ကြီးချုပ် Yulia Sviridenko က ယင်းနေ့ ညနေပိုင်းတွင် ထုတ်ဖော် ကြေညာလိုက်ပါသည်။

မြောက်ကိုရီးယားနိုင်ငံသို့ ၂၀၂၄ ခုနှစ်၊ ဇွန်လ ၁၈ ရက်မှ ၁၉ ရက်အထိ တရားဝင် အလည်အပတ်သွားရောက်ခဲ့သည့် ခရီးစဉ်တွင် ရုရှားသမ္မတ ဗလာဒီမာပူတင်ကို မြောက်ကိုရီးယားခေါင်းဆောင် ကင်ဂျုံအန်းက လက်ဆောင် ပေးသည့် ရှားပါးမျိုးစိတ် အမဲလိုက် ခွေး ၂ ကောင်မှာ ယခုအခါ ကျန်းမာ၍ နေသားကျပြီး ပူတင်နှင့် ပျော်မွေ့နေပြီဖြစ်ကြောင်း ကရင်မလင်ပြောခွင့်ရ ဒီမီထရီပက်စကိုဗ်က ပြောကြားလိုက်ပါသည်။