အကျဉ်းသားလဲလှယ်မှု သဘောတူညီချက်အရ ဟားမက်မှ လွှတ်ပေးခဲ့သည့် အစ္စရေးစစ်သားတစ်ဦးက အကျဉ်းခံဘဝအတွင်း သူမ အကြောက်ဆုံးအရာမှာ အစ္စရေး၏ တိုက်ခိုက်မှုများဖြစ်ကြောင်းပြောကြားခဲ့သည်။ “ဒါဟာ အခြားဘယ်အရာထက်မဆို ကျွန်မကို ပိုပြီးအန္တရာယ် ဖြစ်စေသည့်အရာပါ” ဟု Na’ama Levy က ဆိုသည်။

ဝါရှင်တန်အစိုးရသည် ဟားဗတ်တက္ကသိုလ်နှင့်ချုပ်ဆိုထားသော ဖက်ဒရယ် စာချုပ်အားလုံး (စုစုပေါင်း ဒေါ်လာ ၁၀၀ သန်းခန့်) ကို ဖျက်သိမ်းရန် ညွှန်ကြားလိုက်ကြောင်း ထရမ့်အစိုးရ၏ အကြီးတန်းအရာရှိနှစ်ဦးက CNN သို့ပြောကြားခဲ့သည်။ ၎င်းသည် အမေရိကန်တက္ကသိုလ်များကို နိုင်ငံရေး အရ ထိုးနှက်မှုများကြားတွင် ဝါရှင်တန်၏ မူဝါဒဆိုင်ရာ တောင်းဆိုမှုများကို လိုက်နာရန်ငြင်းဆန်နေသော ဟားဗတ်တက္ကသိုလ်အား နောက်ဆုံးထိုးနှက်မှုတစ်ရပ်ဖြစ်သည်။

သမ္မတ ဒေါ်နယ်ထရမ့်နှင့် ရုရှားခေါင်းဆောင် ဗလာဒီမာ ပူတင်တို့ လွန်ခဲ့သည့်သီတင်းပတ်က ဖုန်းဆက်ဆွေးနွေးခဲ့စဉ် ပူတင်က ယူကရိန်းနှင့် စစ်ပြေငြိမ်းရေး သဘောတူညီချက်ရရှိရန် ရုရှား၏ လိုလားချက်များကို ဖော်ပြထားသည့် “ငြိမ်းချမ်းရေး စာချွန်လွှာ” ကို ရက်ပိုင်းအတွင်း ရေးဆွဲပေးပို့မည်ဟု ကတိပြုခဲ့ကြောင်း အိမ်ဖြူတော် အရာရှိတစ်ဦးက ပြောသည်။

လစ်သူယေးနီးယားနိုင်ငံသည် ၂၀၂၁ ခုနှစ်က ဘယ်လာရုစ်နိုင်ငံမှ တမင်တကာ ဖန်တီးခဲ့သည်ဟု စွပ်စွဲထားသော ရွှေ့ပြောင်းအခြေချသူများ အကျပ်အတည်းကြောင့် ဘယ်လာရုစ်ထံမှ ယူရိုငွေ သန်း ၂၀၀ ကျော် (အမေရိကန်ဒေါ်လာ ၂၂၇ သန်း) လျော်ကြေးတောင်းဆိုလိုက်ကြောင်း ဒေသခံသတင်းဌာန BNS က ဖော်ပြသည်။