နေပြည်တော် မေ ၂၆

နိုင်ငံရေးပါတီတည်ထောင်လိုသူများက ယင်းတို့တည်ထောင်လိုသော ပါတီအမည်ကိုဖော်ပြ၍ ပြည်ထောင်စုရွေးကောက်ပွဲ ကော်မရှင်သို့ လျှောက်ထားလျက်ရှိကြရာ ယနေ့အထိ ပါတီတည်ထောင်ခွင့်လျှောက် ထားလာသည့်အဖွဲ့ ၂၇ ဖွဲ့ရှိပြီး ယင်းသို့ လျှောက်ထားသည့်အဖွဲ့များအနက်ချင်းပြည်သစ်ကွန်ဂရက်ပါတီသည် နိုင်ငံရေးပါတီများ မှတ်ပုံတင်ခြင်းဥပဒေ၊ နည်းဥပဒေများနှင့် ညီညွတ်ကြောင်း စိစစ်တွေ့ရှိရသဖြင့် ကော်မရှင်က ယနေ့တွင် နိုင်ငံရေးပါတီ တည်ထောင်ခွင့်လျှောက်ထားချက်ကို ခွင့်ပြုလိုက်ကြောင်း သိရှိရသည်။

ထိုင်းနိုင်ငံမှ သက်ဆိုင်ရာအာဏာပိုင်များသည် နိုင်ငံကူးလက်မှတ်အတု ပြုလုပ်ခြင်းနှင့် ပြင်ဆင်ထားခြင်းတို့ကို နည်းပညာမြင့်စက်များဖြင့် စိစစ် ဖော်ထုတ်ဆောင်ရွက်နေကြောင်း ဘန်ကောက်မြို့ရှိ မြန်မာသံရုံးက ယခုရက်ပိုင်းအတွင်း အသိပေးထုတ်ပြန်ထားသည်။

ထိုင်းနိုင်ငံ၌ အနာဂတ်တွင် အာဏာသိမ်းမှုဖြစ်ပွားလာနိုင်ဖွယ် ရှိနေသည် ဆိုသောအချက်နှင့်ပတ်သက်ပြီး ပြောဆိုချက်များကို ထိုင်း ကာကွယ်ရေး ဝန်ကြီး ဝီချာရာချိုင်းက ငြင်းဆန်ခြင်းမျိုးမရှိခဲ့ကြောင်း သိရသည်။ ထိုင်း နိုင်ငံသည် အာဏာသိမ်းမှုများထပ်မံ ဖြစ်လာနိုင်သော အလားအလာများ ရှိနေသည်ဟု ပြီးခဲ့သောရက်ပိုင်းတွင် သတင်းများလည်း ထွက်ပေါ် ခဲ့သည်။