ဘင်္ဂလားဒေ့ရှ်စစ်တပ်အကြီးအကဲ၏ သတိပေးမှုကြောင့် အစိုးရအဖွဲ့ ခေါင်းဆောင် မိုဟာမက်ယူနွတ်က မြန်မာနိုင်ငံ ရခိုင်ပြည်နယ်တွင် လူသားချင်းစာနာထောက်ထားမှုစင်္ကြံ ဖော်ဆောင်ရေးအစီအစဉ်ကို နောက်ဆုတ်လိုက်ကြောင်း India Today သတင်းတွင် ဖော်ပြခဲ့သည်။ အဆိုပါစင်္ကြံကို အကောင်အထည်ဖော်ရန် ကုလသမဂ္ဂက ဘင်္ဂလားဒေ့ရှ် ယာယီအစိုးရအဖွဲ့ကို အကြံပြုခဲ့ခြင်းဖြစ်သည်။

တရုတ်(တိုင်ပေ)အစိုးရနှင့် တွေ့ဆုံဆွေးနွေးမှုများလုပ်ဆောင်ရန် ဆန္ဒ ရှိသည်ဟု တရုတ်အစိုးရက ထုတ်ပြန်ပြောကြားခဲ့ပါသည်။ သို့သော်လည်း အဆိုပါတွေ့ဆုံဆွေးနွေးမှုများသည် အခြေအနေအမျိုးမျိုး သတ်မှတ်ထားခြင်း ရှိလိမ့်မည်ဟုလည်း တရုတ်အစိုးရကပြောကြားခဲ့ပါသည်။

တရုတ်နှင့်ပါကစ္စတန်နိုင်ငံတို့သည် နှစ်နိုင်ငံကြား ကုန်သွယ်မှုနှင့် ရင်းနှီး မြှုပ်နှံမှုများကို ပိုမိုနက်ရှိုင်းလာစေရေးလုပ်ဆောင်ရန် သဘောတူညီခဲ့ ကြကြောင်း ပါကစ္စတန်အစိုးရကပြောကြားခဲ့ပါသည်။ အမေရိကန်က ကြားဝင်စေ့စပ်ပေးမှုနှင့်အတူ အိန္ဒိယနှင့်ပါကစ္စတန်ကြား အပစ်အခတ် ရပ်စဲရေးသဘောတူညီချက်ရရှိခဲ့ပြီးနောက် ရက်ပိုင်းအကြာ၌ ယခုကဲ့သို့ သဘောတူညီချက်ထွက်ပေါ်လာခြင်းဖြစ်ပါသည်။

အိမ်ဖြူတော်က Harvard တက္ကသိုလ်အား နိုင်ငံတကာကျောင်းသားများ စာရင်းသွင်းခွင့်ကို ရုပ်သိမ်းလိုက်ပြီး ကျောင်းဝင်းအတွင်း ဂျူးမုန်းတီးရေး လှုပ်ရှားမှုများနှင့် DEI (မတူကွဲပြားမှု၊ တရားမျှတမှု၊ ပါဝင်မှု) အစီအစဉ်များကို ဖြေရှင်းရန် ပျက်ကွက်ခဲ့သည်ဟုဆိုကာ Ivy League အဖွဲ့အစည်း နှင့် ဆက်လက်ဖြစ်ပွားနေသော ပဋိပက္ခများကို ပိုမိုပြင်းထန်လာစေခဲ့သည်။