နေပြည်တော်၊ နိုဝင်ဘာ ၁၈

စစ်ကိုင်းတိုင်းဒေသကြီး၊ ရွှေဘိုမြို့နယ်၊ အမှတ်(၈) ရပ်ကွက်ရှိ လက်ဝဲသုန္ဒရလမ်းပေါ်၌ ဆိုင်ကယ်အား စစ်ဆေးရန် ရပ်တန့်ခိုင်းစဉ် မောင်းနှင်ထွက်ပြေးခဲ့သဖြင့် လုံခြုံရေးတပ်ဖွဲ့ဝင်များက ပစ်ခတ်ဖမ်းဆီးခဲ့ရကြောင်း သိရသည်။

ဖြစ်စဉ်မှာ နိုဝင်ဘာလ ၁၅ ရက်နေ့ ည ၈ နာရီခွဲတွင် ရွှေဘိုမြို့နယ်၊ အမှတ်(၈) ရပ်ကွက်ရှိ လက်ဝဲသုန္ဒရ လမ်းပေါ်၌ လုံခြုံရေး တပ်ဖွဲ့ဝင်များက ပိတ်ဆို့စစ်ဆေးမှုများဆောင်ရွက်နေစဉ် အဆိုပါလမ်းအတိုင်း တောင်ဘက်မှ မြောက်ဘက်သို့ မောင်းနှင်လာသည့် အမျိုးသားနှစ်ဦး(စိစစ်ဆဲ)မောင်းနှင်လာသည့် ဆိုင်ကယ်အား စစ်ဆေးရန် ရပ်တန့်ခိုင်းစဉ် မောင်းနှင်ထွက်ပြေးခဲ့သဖြင့် လုံခြုံရေးတပ်ဖွဲ့ဝင်များက သတိပေးခြောက်လှန့်ပစ်ခတ်၍ လိုက်လံဖမ်းဆီးခဲ့ရာအသက်(၆၀)နှစ်ခန့်အမျိုးသားတစ်ဦး(စိစစ်ဆဲ)နှင့် အသက်(၃၀)နှစ်ခန့်အမျိုးသားတစ်ဦး(စိစစ်ဆဲ)တို့အားကျည်ထိမှန်ဒဏ်ရာများဖြင့်ဖမ်းဆီးရမိခဲ့ကြောင်း သိရသည်။

၎င်းတို့နှစ်ဦးထံမှ MG-1 လက်ပစ် ဗုံး ၁ လုံး၊ လေးခွ ၁ လက်နှင့် လောက်စာလုံး ၁၅ လုံးတို့အား သိမ်းဆည်း ရမိခဲ့သဖြင့် ဥပဒေနှင့်အညီ အရေးယူဆောင်ရွက်ရန် ဒဏ်ရာရရှိသူနှစ်ဦးအား ဆေးကုသပေးနိုင်ရေး ရွှေဘို ခရိုင်ပြည်သူ့ဆေးရုံကြီးသို့ ပို့ဆောင်၍ ဆေးကုသပေးနေစဉ် ရရှိထားသော ဒဏ်ရာများဖြင့် သေဆုံးသွားခဲ့ကြောင်း သိရသည်။

Source- People Media

နိုဝင်ဘာလ ၁၈ ရက်

လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနမှ နိုင်ငံသားတစ်ဦးချင်းစီအတွက် ထုတ်ပေးလျက်ရှိသည့် UID (Unique Identification Number)များကို နံပါတ်အတုများ အသုံးပြု၍ နိုင်ငံကူးလက်မှတ်လျှောက်ထားမှုများအား ဖော်ထုတ်အရေးယူသွားမည်ဖြစ်ကြောင်း ထုတ်ပြန်ကြေညာထားသည်။

UID နံပါတ်သည် နိုင်ငံသားများ၏ ကိုယ်ရေးအချက်အလက်များနှင့် ဇီဝဆိုင်ရာအချက်အလက်များကို အခြေခံထားသည့် ဂဏန်း ၁၀ လုံးပါ သီးသန့်နံပါတ်ဖြစ်ပြီး၊ လက်ရှိတွင် သက်ဆိုင်ရာလဝကမြို့နယ်ရုံးများနှင့် Mobile Team များမှ အခမဲ့ထုတ်ပေးလျက်ရှိသည်ဟု ဆိုသည်။

သို့သော် အချို့ပြည်သူများသည် ကြားပွဲစားများမှတစ်ဆင့် UID နံပါတ်အတုများ ရယူအသုံးပြုနေကြောင်း တွေ့ရှိရသဖြင့် မြန်မာနိုင်ငံကူးလက်မှတ်ထုတ်ပေးရေးရုံးများ၊ အပြည်ပြည်ဆိုင်ရာလေဆိပ်/ရေဆိပ်နှင့် နယ်စပ်ဂိတ်များတွင် စစ်ဆေးဖော်ထုတ်အရေးယူလျက်ရှိကြောင်းသိရသည်။

ထို့ကြောင့် UID နံပါတ်ရယူလိုသူများအနေဖြင့် သက်ဆိုင်ရာလဝကမြို့နယ်ရုံးများသို့ ကိုယ်တိုင်သွားရောက်ဆောင်ရွက်ရမည်ဖြစ်ပြီး၊ UID နံပါတ်အတုများ အသုံးပြုပါက ဥပဒေအရ အရေးယူခံရမည်ဖြစ်ကြောင်း သတိပေးထားသည်။

ထို့ပြင် UID နံပါတ်ရယူရာတွင် အခက်အခဲများရှိခြင်း၊ ငွေကြေးတောင်းခံခြင်းများရှိပါက အီလက်ထရောနစ်မှတ်ပုံတင်စနစ်ဦးစီးဌာန၏ Facebook စာမျက်နှာမှတစ်ဆင့် တိုင်ကြားနိုင်ကြောင်း ဝန်ကြီး ဌာနက ထုတ်ပြန်ထားသည်။

Source- Popular Journal

နိုဝင်ဘာလ ၁၈ ရက်

နေပြည်တော်၊ ဇေယျာသီရိခရိုင်၊ ပုဗ္ဗသီရိမြို့နယ်၊ (၂၈)လမ်း (မြောက်ဘက်)၊ အောင်သာယာရပ်ကွက်တွင် ပါတီရုံးချုပ်ဖွင့်လှစ်ထားရှိသော လူမှုစီးပွားမြှင့်တင်ရေးပါတီကို ၂၀၂၄ ခုနှစ်၊ နိုဝင်ဘာလ ၁၈ ရက်နေ့မှစ၍ နိုင်ငံရေးပါတီများ မှတ်ပုံတင်ခြင်းဥပဒေပုဒ်မ ၉နှင့်အညီ မှတ်ပုံတင်ခွင့်ပြု‌ကြောင်းနှင့် ယင်းပါတီ၏ မှတ်ပုံတင်အမှတ်မှာ (၅၄)ဖြစ်ကြောင်း UEC ကကြေညာလိုက်သည်။

Source- Myanmar National Post

နိုဝင်ဘာ ၁၄

မြန်မာ့စစ်ထောက်လှမ်းရေးအဖွဲ့ MI (Military Intelligence) ကို ပြန်လည်ဖွဲ့စည်းတော့မည်ဟု သတင်းများ ထွက်ပေါ်လာခဲ့သော်လည်း ပြန်လည်ဖွဲ့စည်းရန် အစီအစဉ်မရှိကြောင်းနှင့် ထောက်လှမ်းရေးအရာရှိဟောင်းများကလည်း ပြန်လည်ပါဝင် ဖွယ်မရှိကြောင်း အရာရှိဟောင်းအချို့က ထုတ်ဖော်ပြောကြားသည်။
ထောက်လှမ်းရေးအကြီးအကဲဟောင်းတစ်ဦးဖြစ်သူ ဗိုလ်မှူးချုပ်သိန်းဆွေ ဦးဆောင်သောအဖွဲ့ တရုတ်နိုင်ငံသို့ သွားရောက်ခဲ့သည့်ဖြစ်စဉ်များအတွင်း MI နှင့်ပတ်သက်သောသတင်းများ ဆက်တိုက်ထွက် ပေါ်လာခြင်းဖြစ်ပြီး ထောက်လှမ်းရေးဟောင်းများအသိုင်းအဝိုင်းတွင် ကျယ်လောင်လာခဲ့သည်ဟု ကြားသိရသည်။ ‘‘ ပြန်ဖွဲ့ဖို့ဆိုတာ မဖြစ်နိုင်ပါဘူးဗျာ။ အခုအချိန်အထိ ကျွန်တော်တို့အသိုင်းအဝိုင်းမှာ ဆွေးနွေးတာမရှိသလို ပြန်ခေါ်လည်း လုပ်ကြမှာ မဟုတ်ဘူး။ ပြီးတော့ အသစ်နဲ့အဟောင်း။ မတူတာတွေအများကြီးဗျ။ ပြန်ဖွဲ့မယ်ဆိုရင် ကျွန်တော်မပါတောင် မသိရ ဘဲဖြစ်တာမရှိပါဘူးဗျာ။ တစ်ခုရှိတာက ထောက်လှမ်း ရေးသက်တမ်းက နှစ်(၂၀)။ (၂၀ဝ၄)မှာ ထောက် လှမ်းရေးကို ဖျက်တယ်။ အခု (၂၀၂၄)။ (၁၉၈၃) တုန်းကလည်း (၂၀ဝ၃) အကုန် (၂၀ဝ၄)မှာ ဒါမျိုးရှိခဲ့ ဖူးတယ်။ နှစ်(၂၀) သက်တမ်း ပေါ့ဗျာ။ ထောက်လှမ်း ရေးဆိုတာက အောင်မြင်လေလေ အကုသိုလ်ကြီးလေ လေပဲ။ သူများကိုဖမ်းရတာကိုးဗျ”ဟု ထောက်လှမ်းရေးအရာရှိဟောင်းတစ်ဦးက NP News ကို ပြောသည်။ 
ဗိုလ်ချုပ်ကြီး(ငြိမ်း) ဦးခင်ညွန့်ဦးဆောင်ခဲ့သော စစ်ထောက်လှမ်းရေး MI (ကကလှမ်း)ကို (၂၀ဝ၄)ခုနှစ်တွင် အပြီးတိုင်ဖျက်သိမ်းခဲ့ပြီးနောက် ယင်းနေရာတွင် တပ်မတော် စစ်ဘက်ရေးရာလုံခြုံ ရေးတပ်ဖွဲ့ဖြင့် ပြန်လည်အစားထိုးခဲ့သည်။ အဆိုပါအဖွဲ့ကို လက်ရှိ ယာယီသမ္မတ တာဝန်ထမ်း ဆောင်နေသူ ဦးမြင့်ဆွေ(ဒုတိယဗိုလ်ချုပ်ကြီး-ငြိမ်း)က ဌာနကြီး (၆)ခုဖြင့် ဦးဆောင်တာဝန်ယူခဲ့ခြင်းဖြစ်ပြီး လက်ရှိတွင် ဗိုလ်ချုပ်ကြီး ရဲဝင်းဦးက ဦးဆောင်တာဝန်ယူနေ သည်။ ဗိုလ်ချုပ်ကြီး(ငြိမ်း) ဦးခင်ညွန့်ဦးဆောင်ခဲ့သည့် MI သည် (၁၉၈၈)အရေးအခင်းအပါအဝင် နိုင်ငံတော်၏အရေးကြီးသောကိစ္စရပ်များစွာကို ဖြေရှင်းပေးနိုင်ခဲ့သည့်အပြင် တန်ခိုး ဩဇာကြီးထွားလာသော အဖွဲ့အစည်းအဖြစ်လည်း နိုင်ငံရေးအသိုင်း အဝိုင်းတွင် အမည်ထွက်ခဲ့သည်။ လက်ရှိကာလ တွင်မူ ဗိုလ်မှူးချုပ်သိန်းဆွေနှင့် ဗိုလ်မှူးကြီးလှမင်းတို့၏ တရုတ်ခရီးစဉ်ကိုအကြောင်းပြု၍ နှပ်ကြောင်းပေးသံ များထွက်ပေါ်ခဲ့ခြင်းမျိုးသာဖြစ်နိုင်ပြီး ၎င်းတို့၏ခေါင်း ဆောင်ဖြစ်ခဲ့သူ ဗိုလ်ချုပ်ကြီး(ငြိမ်း)ဦးခင်ညွန့်ထံသို့ MI ပြန်ဖွဲ့ မည်ဆိုသော ကောလာဟလသတင်းများ မရောက်သည့်အပြင် မည်သည့်သဘောထားမှတ်ချက် မှမထွက်သေးကြောင်း ကြားသိရသည်။ ‘‘ထောက် လှမ်းရေးအရာရှိဟောင်းတွေကို (အဘ)ကမှာထား တာရှိတယ်။ နိုင်ငံ့အရေးတွေမှာ ကူညီဖို့ပဲ။ တပ်မ တော်ကို မဝေဖန်နဲ့။ တိုင်းရင်းသားကိစ္စကို မဝေဖန်နဲ့။ ဘာသာရေးကိစ္စကို မဝေဖန်နဲ့။ တိုင်းပြည် ပျက်ရာပျက်ကြောင်း မလုပ်ကြနဲ့။ ပရဟိတကိုတော့ မင်းတို့ လုပ်ချင်သလောက် အစွမ်းကုန်လုပ်။ လာကန်တော့ သူတိုင်းကို ဒါပဲမှာတယ်”ဟု ထောက်လှမ်းရေးဖျက် သိမ်းခံရမည့်ကာလနှင့် အကျဉ်းထောင်မှ ပြန်လွတ် လာသည့် ကာလများ အတွင်းကမှာကြားချက်အကြောင်းကို ၎င်းက ပြန်လည်ဖွင့်ဟသည်။ ပြည်ပြေး သတင်းဌာနအချို့ကမူ စစ်ထောက်လှမ်း ရေးဟောင်းများကို ဗိုလ်ချုပ်မှူးကြီး မင်းအောင်လှိုင်က အကူအညီတောင်းခံ၍ ပြန်လည်အသုံးပြုနေရပြီဟုဖော်ပြ နေကြပြီး စစ်ထောက်လှမ်းရေးများ ပြန်လည်ပါဝင်လာမည်ကို စိုးရိမ်နေကြဟန်ရှိသည်။ ‘‘အောင်ဇော် (ဧရာဝတီ သတင်းဌာန)က ထောက်လှမ်းရေးအကြောင်း ဘာနားလည်မှာမို့လို့လဲဗျာ။ ဒီလိုပေါက်တတ်ကရ ပြောနေမှ ထမင်းစား ရမယ့်ကောင်ဆိုတော့ ပြောချင်တာ လျှောက်ပြောနေမှာပဲ”ဟု MI ကိစ္စနှင့်ဆက်စပ်၍ ၎င်းကပြောသည်။ 
ထောက်လှမ်း ရေးအရာရှိဟောင်းများက တပ်မတော်အတွက် ဝိုင်းဝန်းကူညီမှုများရှိနေ ပင်လျှင် တစ်ဦးချင်း၊ တစ်စုတစ်ဖွဲ့ချင်းသာ ကူညီကြ ခြင်းမျိုးဖြစ်ပြီး ထောက်လှမ်းရေးတပ်ဖွဲ့တစ်ခုလုံး၏ ဦးဆောင်ပါဝင်မှုမျိုးမဟုတ်ကြောင်းလည်း ဆိုသည်။ အခြားတစ်ဖက်တွင်မူ လူထုကြားတွင် တစ်ခေတ်တစ်ခါက နာမည်ကျော်ခဲ့သော ထောက်လှမ်းရေးကွန်ရက် မျိုးကို ယခုခေတ်နှင့်လျော်ညီစွာ ပြင်ဆင်ဖွဲ့စည်း ထားသင့်သည်ဟု ပြောစမှတ်ရှိနေသည်။ နီးနီးစပ်စပ် အဖြစ် စစ်ဘက်ရေးရာ လုံခြုံရေးတပ်ဖွဲ့မှ ဒုတိယခေါင်းဆောင်ဖြစ်သူ ဗိုလ်ချုပ်မင်းသူ ဦးဆောင်သော အဖွဲ့တစ်ခုလည်း (၂၀၂၁) နိုင်ငံရေး အခင်းအကျင်းနှင့်အတူ ပေါ်ပေါက်လာခဲ့ဖူးပြီး ယင်းအဖွဲ့သည် သိုသိပ်လွန်းနေကြောင်းလည်း တွေ့ရသည်။ ‘‘ကျွန်တော် တို့တုန်းက တပ်မတော်ပါတယ်။ ပြည်ထဲရေး၊ နိုင်ငံခြားရေး၊ လဝက၊ အကောက်ခွန်ဘက်က အကုန်ပါတယ်။ ဒါပေမဲ့ ဒါက ပြီးသွားပါပြီ။ ဘယ်သူမှပြန်ဖွဲ့ဖို့ စိတ်မဝင်စားကြတော့ ပါဘူး”ဟု သတင်းရင်းမြစ်က ဆက်လက်ပြောကြားသည်။

Source- NP News

ရုရှားလုံခြုံရေးကောင်စီ အထွေထွေအတွင်းရေးမှူး ဆာဂေးရှိုဂူးသည် အာဖဂန်ကိုယ်စားလှယ်အဖွဲ့နှင့်တွေ့ဆုံမှုတွင် အကြမ်းဖက်လုပ်ရပ်များအတွက် ကုလသမဂ္ဂ၏ ပိတ်ဆို့အရေးယူမှုအောက်တွင်ရှိသည့် တာလီဘန်များအား  ရုရှားဖက်ဒရေးရှင်း၏ black lists စာရင်းမှ ဖယ်ထုတ်ပေးရန် အဆင်သင့်ဖြစ်နေကြောင်း ပြောကြားခဲ့သည်ဟု အာဖဂန်အေဂျင်စီက  ရေးသားဖော်ပြထားပါသည်။

ရုရှားနိုင်ငံကိုယ်စားလှယ်အဖွဲ့နှင့် အာဖဂန်နစ္စတန်မှ ကိုယ်စားလှယ်အဖွဲ့များသည် တနင်္လာနေ့တွင် တွေ့ဆုံခဲ့ကြောင်း portal ၏ ဖော်ပြချက်အရ သိရှိရပါသည်။

ထို့အပြင် ၂၀၂၄ခုနှစ် ဇွန်လ အစောပိုင်းတွင် ရုရှားသမ္မတ ဗလာဒီမာပူတင် က တာလီဘန်အစိုးရနှင့် ဆက်ဆံရေးတည်ဆောက်ရန်လိုအပ်ကြောင်း ပြောကြားခဲ့ပါသည်။

ကိုးကား - အာဖဂန်အေဂျင်စီ

ပြင်သစ်၊ ဗြိတိန်၊ ပိုလန်နှင့် အခြားနိုင်ငံများသည် ယူကရိန်းအား ထောက်ပံ့ရန်အတွက် ဥရောပတပ်ဖွဲ့များစေလွှတ်ရန် ညွန့်ပေါင်းအဖွဲ့တစ်ခု အပြီးသတ် ဖွဲ့စည်းဆောင်ရွက်နေကြောင်း ပြင်သစ်သတင်းစာ Le Mondeကဖော်ပြခဲ့ပါသည်။

အဆိုပါ ဆွေးနွေးမှုများသည် ထရန့်၏ ရွေးကောက်ပွဲ အောင်နိုင်ပြီးနောက် ဆွေးနွေးပွဲများ အရှိန်ရလာပြီး၊ အနောက်နိုင်ငံမှ စစ်သားများအား ယူကရိန်းနိုင်ငံအတွင်း သို့စေလွှတ်ခြင်းနှင့်ပတ်သက်၍ အခြေအတင်ဆွေးနွေးမှု များပြန်လည်အသက်ဝင်လာပြီး ပုဂ္ဂလိကကာကွယ်ရေး ကန်ထရိုက်တာများ သို့မဟုတ် ပုံမှန်စစ်တပ်တပ်ဖွဲ့များအသွင်ဖြင့် ယူကရိန်းနိုင်ငံတွင်းသို့ စေလွှတ်လာနိုင်ကြောင်း နိုဝင်ဘာလ ၂၅ ရက်နေ့တွင် စစ်ဘက်သတင်းရင်းမြစ်များကို ကိုးကား၍ Le Monde က အစီရင်ခံ ဖော်ပြခဲ့ပါသည်။

ကိုးကား - ပြင်သစ်သတင်းစာ  Le Monde

အမေရိကန်ရွေးကောက်ခံသမ္မတ ဒေါ်နယ်ထရန့်သည် အစိုးရသစ်အတွက် ဝါရင့်ရှေ့နေတစ်ဦးဖြစ်သူ Pam Bondi အား ရှေ့နေချုပ် ရာထူးခန့်အပ်ရန် ရွေးချယ် သတ်မှတ်လိုက်ပါသည်။ 

Pam Bondi သည် တရားဥပဒေစိုးမိုးရေးလုပ်ငန်း များကို ကာလရှည်ကြာဆောင်ရွက်ခဲ့သူတစ်ဦး ဖြစ်ပြီး ယခင်ကဖလော်ရီဒါပြည်နယ် ရှေ့နေချုပ်အဖြစ် တာဝန် ထမ်းဆောင်ဖူးသူလည်း ဖြစ်ပါသည်။ 

“သူမက ရှေ့နေသက်တမ်း အနှစ် ၂၀ နီးပါး ရှိပြီး အကြမ်းဖက် ရာဇဝတ်မှုများကို တင်းတင်းကျပ်ကျပ် ကိုင်တွယ်ဆောင်ရွက်နိုင်ခဲ့သူဖြစ်ကြောင်း၊ ဖလော်ရီဒါ ၌ရှိသည့်လမ်းများကိုဘေးကင်းလုံခြုံသွားစေရန် သူမက ဆောင်ရွက်ပေးခဲ့သဖြင့် သူမကို ရွေးချယ်လိုက်ကြောင်း” ထရန့်၏လူမှုမီဒီယာ၌ ပြောကြားထားကြောင်း BBC တွင် ဖော်ပြထားပါသည်။

ကိုးကား- BBC

https://www.bbc.com/news/articles/cjr4g50wxp2o

နိုင်ငံအသီးသီးတွင် အများသူငှာ ဆက်သွယ်ပြောဆိုမှု များကို ကွဲပြားစွာလုပ်ဆောင်ကြောင်း၊ သို့သော် ရုရှား နိုင်ငံတွင် သမ္မတက တစ်ခုခုပြောကြားပါက ယင်းစကား များသည် အချည်းနှီးစကားမဟုတ်ကြောင်း၊ ဆက်သွယ်ရေး လှည့်ကွက်မဟုတ်ကြောင်း၊ အဆိုပါစကား၏ တန်ဖိုးနှင့် အကျိုးဆက်များပါရှိကြောင်း ဟန်ဂေရီဝန်ကြီးချုပ် Orban က Kossuth ရေဒီယိုအစီအစဉ်တွင် ပြောကြား ခဲ့သည်။ 

ရုရှားနိုင်ငံတွင် ခေတ်အမီဆုံး၊ အဖျက်စွမ်းအား အရှိဆုံး လက်နက်များ ပိုင်ဆိုင်သည့် ကမ္ဘာပေါ်တွင် အင်အား အကြီးဆုံးတပ်မတော်ရှိကြောင်း ဟန်ဂေရီ ဝန်ကြီးချုပ် က ထပ်မံပြောကြားခဲ့ကြောင်း သိရှိရသည်။

ကိုးကား - golballookpress

လက်တင်အမေရိက လေးနိုင်ငံသည် ယူကရိန်း-ရုရှား စစ်ပွဲတွင် လက်နက်ပြိုင်ဆိုင်မှု ပြင်းထန်စေမည့် လုပ်ရပ်များကို ရှောင်ရှားရန် ပူးတွဲကြေညာချက်တစ်ရပ်ကို ထုတ်ပြန်ခဲ့သည်။

ဘရာဇီး၊ ချီလီ၊ ကိုလံဘီယာနှင့် မက္ကဆီကို နိုင်ငံလေးနိုင်ငံတို့က အဆိုပါလုပ်ရပ်များသည် ပဋိပက္ခကို ပိုမို ဆိုးရွားစေသည်ဟု ပြောကြားခဲ့ကြောင်း ဖော်ပြ ထားသည်။

ကိုးကား - Agence France-Presse

၂၀၂၅ ခုနှစ်၊ ဇန်နဝါရီလ ၂၀ ရက်နေ့တွင် စတင်တာဝန် ယူမည့် အမေရိကန်အစိုးရအဖွဲ့၏ ပညာရေးဝန်ကြီးနေရာ အတွက် Linda McMahon အမည်ကို ရွေးကောက်ပွဲနိုင် သမ္မတလောင်း ဒေါ်နယ်ထရန့်က နိုဝင်ဘာ ၂၀ ရက်တွင် ကြေညာလိုက်သည်။

“သူမသည် ခေါင်းဆောင်မှုအတွေ့အကြုံ များစွာရှိကြောင်း၊ ပညာရေးနှင့် စီးပွားရေးအကြောင်းကို ကောင်းမွန်စွာ နားလည်ကြောင်း၊ အမေရိကန်ကျောင်းသားများနှင့် အလုပ်သမားများ၏ အနာဂတ်မျိုးဆက်သစ်များအတွက် စွမ်းအားတစ်ခုဖြစ်ကြောင်း၊ အမေရိကန်ပညာရေးကို ကမ္ဘာ့ အဆင့်တစ်ဖြစ်လာစေရန် သူမက ဆောင်ရွက်ပေးနိုင်မည်ဖြစ်ကြောင်း” ထရန့်၏ ကြေညာချက်တွင် ဖော်ပြထားသည်။ 

Linda McMahon သည် ရီပတ်ဘလီကန်၏ အဓိက အလှူရှင်ဖြစ်ပြီး ဒေါ်နယ်ထရန့် ပထမအကြိမ် သမ္မတတာဝန်ယူစဉ်က အမေရိကန်အသေးစားစီးပွားရေးဆိုင်ရာစီမံခန့်ခွဲမှုဌာန၏ အုပ်ချုပ်ရေးမှူးတာဝန်ထမ်းဆောင်ခဲ့သူဖြစ်ကြောင်း CNN သတင်းတွင် ဖော်ပြထားသည်။

ကိုးကား - CNN News