အစ္စရေးထောက်လှမ်းရေးအဖွဲ့ မော့ဆက်သည် အမေရိကန်ကြားဝင် အပစ်ခတ်ရပ်စဲရေး စတင်ပြီးနောက် ရက်အနည်းငယ်အတွင်း အီရန်ကို တိုက်ခိုက်မှုများအတွင်း CIA ၏ နီးကပ်စွာ ပူးပေါင်းဆောင်ရွက်မှုကို ကျေးဇူးတင်ကြောင်း ဖော်ပြလိုက်သည်။

မော့ဆက်ဒါရိုက်တာ ဒေးဗစ်ဘာနီးယားက “အရေးပါသော မိတ်ဖက်ဖြစ်သည့် CIA နှင့် ၎င်း၏ဒါရိုက်တာတို့အား အောင်မြင်စွာ အကောင်အထည်ဖော် နိုင်ခဲ့သည့် ပူးပေါင်းဆောင်ရွက်မှုများနှင့် မော့ဆက်အား မှန်ကန်သော ဆုံးဖြတ်ချက်များ ချမှတ်ရာတွင် ပံ့ပိုးပေးမှုအတွက် ကျေးဇူးတင်ကြောင်း” ဟု AFP က ကိုးကားဖော်ပြသည့် ဗုဒ္ဓဟူးနေ့ (ဇွန် ၂၅) ထုတ်ပြန်ချက်တွင် ပြောကြားခဲ့သည်။

သတင်းများအရ အစ္စရေးအေးဂျင့်များသည် ဇွန်လ ၁၃ ရက်တွင် စတင် ခဲ့သည့် Operation Rising Lion ၏အစိတ်အပိုင်းအဖြစ် အီရန်သို့ ဒရုန်းများခိုးသွင်းကာ အဆင့်မြင့်ဗိုလ်ချုပ်များနှင့် နျူကလီးယား သိပ္ပံ ပညာရှင်များကို လုပ်ကြံခဲ့သည်။ ဝန်ကြီးချုပ် ဘင်ဂျမင် နေတန်ယာဟု က အီရန်တစ်ဝှမ်း လေကြောင်းတိုက်ခိုက်မှုများနှင့်အတူ အဆိုပါတိုက်ခိုက်မှု များသည် အီရန်အား နျူကလီးယားလက်နက်များ ရရှိပိုင်ဆိုင်ခြင်းမှ တားဆီးရန် ရည်ရွယ်ကြောင်း ပြောကြားခဲ့သည်။

အမေရိကန်သည် ဇွန် ၂၂ ရက်တွင် ဖော်ဒိုးရှိ မြေအောက်ယူရေနီယမ် ချဲ့ထွင်ရေးစင်တာအပါအဝင် နျူကလီးယားနေရာသုံးခုကို ပစ်မှတ်ထား တိုက်ခိုက်မှုတွင် ပါဝင်ခဲ့သည်။

မော့ဆက်ဒါရိုက်တာ ဒေးဗစ်ဘာနီးယားက “ဆယ်စုနှစ်များအတွင်း မိမိ တို့၏လုံခြုံရေးကို ခြိမ်းခြောက်ခဲ့သော အီရန်၏အန္တရာယ်ကို အကြီးအကျယ် ချေမှုန်းနိုင်ခဲ့ပြီ” “မိမိတို့သည် အီရန်၏သိရှိထားသော စီမံကိန်းအားလုံး ကို သတိပြုစောင့်ကြည့်နေမည်။ ထိုစီမံကိန်းများအကြောင်းကို သေသေ ချာချာ သိရှိထားပြီးဖြစ်သည်” ဟုဆိုသည်။

CIA ဒါရိုက်တာ ဂျွန်ရက်ကလစ်ဖ်ကလည်း သီးခြားထုတ်ပြန်ချက်တွင် အီရန်၏နျူကလီးယားအစီအစဉ်ကို “ပြင်းထန်စွာ ထိခိုက်စေခဲ့သည်” ဟု ပြောကြားခဲ့သည်။

ဝါရှင်တန်၏ ကြားဝင်ဆောင်ရွက်ပေးမှုဖြင့် အပစ်ခတ်ရပ်စဲရေးသည် အင်္ဂါနေ့ (ဇွန် ၂၄) မှစတင် အာဏာသက်ရောက်ပြီး ယခုအချိန်ထိ ဆက်လက် တည်မြဲနေသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

CIA ဒါရိုက်တာ ဂျွန် ရက်ကလစ်ဖ် (John Ratcliffe) က အီရန်၏ နျူကလီးယား အစီအစဉ်ကို ပြန်လည်တည်ဆောက်ရန် နှစ်ပေါင်းများစွာ ကြာမြင့်မည်ဟု ပြောကြားခဲ့သည်။ ယခုဖြစ်စဉ်မှာ အမေရိကန်ကယူရေနီယမ် ထပ်တိုးသန့်စင်ရေး စက်ရုံများကို ဇွန် ၂၂ ရက်က တိုက်ခိုက်မှုပြုလုပ်ပြီးနောက် ဖြစ်ပွားခဲ့ခြင်းဖြစ်သည်။

၎င်း၏ ထုတ်ပြန်ချက်သည် နာတန်ဇ် (Natanz)၊ ဖော်ဒိုး (Fordow) နှင့် အစ္စဖာဟန် (Isfahan) ရှိ အဆိုပါစက်ရုံများအား အမေရိကန်၏ “ဘန်ကာ ဘာ့စတာ” ဗုံးများဖြင့် တိုက်ခိုက်ခံရပြီးနောက် ပျက်စီးမှုအခြေအနေနှင့် ပတ်သက်၍ ရက်ပေါင်းများစွာ မရေရာမှုများ ရှိနေခဲ့သည့် အချိန်တွင် ထွက်ပေါ်လာခြင်းဖြစ်သည်။

“CIA အနေဖြင့် ယုံကြည်စိတ်ချရသော ထောက်လှမ်းရေး အချက်အလက် များအရ အီရန်၏ နျူကလီးယားအစီအစဉ်သည် မကြာသေးမီက တိကျစွာ တိုက်ခိုက်မှုများကြောင့် ပြင်းထန်စွာ ပျက်စီးခဲ့ကြောင်း အတည်ပြုနိုင် ပါသည်” ဟု ရက်ကလစ်ဖ်က ဗုဒ္ဓဟူးနေ့ (ဇွန် ၂၅) တွင် ထုတ်ပြန်ခဲ့သည်။

၎င်းက ဆက်လက်၍ “၎င်းတွင် သမိုင်းကြောင်းအရ ယုံကြည်စိတ်ချရပြီး တိကျမှန်ကန်သော အရင်းအမြစ်/နည်းလမ်းတစ်ခုမှ ရရှိသည့် သတင်း အချက်အလက်အသစ်များအရ အီရန်၏ အဓိက နျူကလီးယား စက်ရုံအချို့သည် ဖျက်ဆီးခံခဲ့ရပြီး ၎င်းတို့ကို ပြန်လည်တည်ဆောက်ရန် နှစ်ပေါင်း များစွာ ကြာမြင့်မည်ဖြစ်ကြောင်း” ဖော်ပြခဲ့သည်။

သမ္မတ ဒေါ်နယ်ထရမ့်နှင့် ကာကွယ်ရေးဝန်ကြီး ပိဟက်ဆက် (Pete Hegseth) တို့က အဆိုပါတိုက်ခိုက်မှုများသည် အီရန်၏ နျူကလီးယား လက်နက် ထုတ်လုပ်နိုင်စွမ်းကို “အပြီးတိုင် ဖျက်ဆီးလိုက်ပြီ” ဟု ကြေညာခဲ့သော်လည်း၊ အမေရိကန်မီဒီယာများက ပျက်စီးမှုအခြေအနေကို ပိုမိုကြီးမားအောင် ချဲ့ကားဖော်ပြခဲ့ကြောင်း နောက်ပိုင်းတွင် သတင်းထုတ်ပြန်ခဲ့သည်။ 

ပင်တဂွန်၏ ကာကွယ်ရေးထောက်လှမ်းရေးအေဂျင်စီ (DIA) ၏ အစောပိုင်း အကဲဖြတ်ချက်များအရ အဆိုပါတိုက်ခိုက်မှုသည် အီရန်၏ နျူကလီးယား အစီအစဉ်၏ အဓိက အစိတ်အပိုင်းများကို မဖျက်ဆီးနိုင်ခဲ့ဘဲ လပိုင်းသာ နောက်ကျသွားစေခဲ့သည်ဟု ရလဒ်များနှင့် ရင်းနှီးသော အရင်းအမြစ် များကို ကိုးကား၍ မီဒီယာအချို့က ဖော်ပြခဲ့သည်။

သို့သော် အစ္စရေးအရာရှိများက Axios သတင်းဌာနအား အဆိုပါ တိုက်ခိုက်မှုများသည် "အလွန်ကြီးမားသော" ပျက်စီးမှုကို ဖြစ်စေခဲ့သည် ဟု ပြောကြားခဲ့သည်။

ထရမ့်ဘက်မှလည်း အမေရိကန်မီဒီယာများက တိုက်ခိုက်မှုများ၏ အရေးပါမှု လျှော့ချရန် ကြိုးစားနေသည်ဟု စွပ်စွဲခဲ့ပြီး၊ နောက်ပိုင်းတွင် ဒုတိယကမ္ဘာစစ်အတွင်းက ဟီရိုရှီးမားနှင့် နာဂါဆာကီမြို့များကို အဏုမြူ ဗုံးချခဲ့သည့် အဖြစ်အပျက်နှင့် နှိုင်းယှဉ်ပြောဆိုခဲ့သည်။

အမေရိကန်သည် အစ္စရေး၏ ဗုံးကြဲတိုက်ခိုက်မှုတွင် ပါဝင်ခဲ့ပြီး ဝန်ကြီးချုပ် ဘင်ဂျမင် နေတန်ယာဟုက အီရန်အား နျူကလီးယားလက်နက်များ ရရှိပိုင်ဆိုင်မှုကို တားဆီးရန် ကြိုးပမ်းမှုတစ်ခုအဖြစ် ဖော်ပြခဲ့သည်။

စစ်ဘက်ဆိုင်ရာ နျူကလီးယားအစီအစဉ် မရှိကြောင်း ငြင်းဆန်နေသည့် တီဟီရန်မှ သုတေသနနှင့် အရပ်ဘက် ရည်ရွယ်ချက်များအတွက် ယူရေနီယမ် ထပ်တိုးသန့်စင်မှုကို ဆက်လက်လုပ်ဆောင်မည်ဟု ကတိ ပေးထားသည်။ ရုရှားဘက်မှလည်း အဆိုပါတိုက်ခိုက်မှုများကို ရှုတ်ချခဲ့ပြီး အီရန်၏ နျူကလီးယားလုပ်ဆောင်မှုများနှင့်ပတ်သက်၍ အနောက်နိုင်ငံ များက မှားယွင်းသော သတင်းများ ဖြန့်ဝေနေသည်ဟု စွပ်စွဲခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

26 June 2025

၂၀၂၅ ခုနှစ်၊ ဇွန် ၂၀ ရက်က မန္တလေးတိုင်းဒေသကြီး၊ မဟာအောင်မြေမြို့နယ်၌ သေနတ်အတုဖြင့် ခြိမ်းခြောက်ကာ လုယက်မှုကျူးလွန်သူများအား သက်သေခံ ပစ္စည်းများနှင့်အတူ ဖော်ထုတ်ဖမ်းဆီးရမိခဲ့ကြောင်း သိရသည်။
ဖြစ်စဉ်မှာ ၂၀၂၅ ခုနှစ်၊ ဇွန် ၂၀ ရက် ည ၈ နာရီ ၃၀ မိနစ်တွင် မန္တ‌လေးတိုင်းဒေသကြီး၊ မဟာအောင်မြေမြို့နယ်၊ ရဲမွန်တောင်ရပ်ကွက်နေ ကိုထက်လင်းအောင်(၂၉)နှစ်သည် ချမ်းမြသာစည်မြို့နယ်၊ မြို့သစ်(၃)ရပ်ကွက်ဘက်မှ ၎င်း၏နေအိမ်သို့ 70W-XXXX HONDA CLICK နီ/နက်ရောင် ဆိုင်ကယ်ဖြင့် တစ်ဦးတည်း မောင်းနှင်ပြန်လာစဉ် မဟာအောင်မြေမြို့နယ်၊ ရဲမွန်တောင်ရပ်ကွက်၊ ၃၉ လမ်း၊ ၅၁ x ၅၂ လမ်းကြားအရောက်၌ အမျိုးသား သုံးဦး(စိစစ်ဆဲ)က ဆိုင်ကယ်အရှေ့မှ ပိတ်ရပ်ကာ သေနတ်ဖြင့်ချိန်ကာ ခြိမ်းခြောက်ပြီး ၎င်းစီးနင်းလာသည့် ဆိုင်ကယ်အား လုယက်ယူဆောင်သွားသည့် ဖြစ်စဉ်ဖြစ်ပွားခဲ့သဖြင့် မဟာအောင်မြေမြို့မရဲစခန်း၌ ရာဇသတ်ကြီးပုဒ်မ ၃၈၂/၁၁၄ ဖြင့် အမှုရေးဖွင့်ကာ  ပြစ်မှုကျူးလွန်သူများအား စုံစမ်းဖော်ထုတ်ခဲ့ပါသည်။ 
ဖြစ်စဉ်မှ သေနတ်ပြခြိမ်းခြောက်ကာ လုယက်မှုကျူးလွန်သူများအား ဖော်ထုတ်ဖမ်းဆီးရမိနိုင်ရေး မြန်မာနိုင်ငံရဲတပ်ဖွဲ့ဝင်များက အသွင်ယူသတင်းစုံစမ်းခြင်း၊ စုံစမ်းထောက်လှမ်းခြင်းများ ဆောင်ရွက်ခဲ့ရာ ၂၀၂၅ ခုနှစ်၊ ဇွန် ၂၅ ရက် ညနေ ၄ နာရီတွင် ခြိမ်းခြောက်လုယက်မှုကျူးလွန်ခဲ့သူများအနက်မှ မဟာအောင်မြေမြို့နယ်၊ ဟေမမာလာတောင်ရပ်ကွက်နေ ညီညီထွန်း(ခ)စီစီ(၁၉)နှစ် (ဘ)ဦးသောင်းထွန်းအား မဟာမြိုင်(၂)ရပ်ကွက်၊ ၆၃ x ၄၃ လမ်းထောင့်၌ စူပါကပ်ဆိုင်ကယ် တစ်စီး၊ ၎င်းဆိုင်ကယ်ခွကြားအတွင်း ဆာလာအိတ်ဖြင့် ထုပ်ပိုးသိုဝှက်၍ သယ်ဆောင်လာသည့် အရှည် ၃၂ လက်မခန့်ရှိ လွယ်ကြိုးပါ ကော်သေနတ်အရှည်(အတု) တစ်လက်တို့နှင့်အတူ ဖမ်းဆီးရမိခဲ့သည်။
ဖမ်းဆီးရမိတရားခံ ညီညီထွန်း(ခ)စီစီ၏ ထွက်ဆိုချက်အရ ၎င်းသည် ဇွန် ၂၀ ရက် ညပိုင်းတွင် စစ်ကိုင်းတိုင်းဒေသကြီး၊ ဆားလင်းကြီးမြို့နယ်၊ ကျောက်မျက်ကျေးရွာနေ စိုးမိုးအောင်(ခ)ဖိုးကျော်(၂၅)နှစ်(ဘ)ဦးသန်းအောင်ကျော်၊ ဟာနစ်(စိစစ်ဆဲ)တို့နှင့်အတူ မဟာအောင်မြေမြို့နယ်၊ ရဲမွန်တောင်ရပ်ကွက်၊ ၅၁ x ၅၂ လမ်းကြား၌ အမျိုးသား တစ်ဦးထံမှ HONDA CLICK ဆိုင်ကယ် တစ်စီးအား သေနတ်ပြခြိမ်းခြောက်ကာ လုယက်ယူဆောင်ပြီး ချမ်းမြသာစည်မြို့နယ်ရှိ အပေါင်ဆိုင် တစ်ဆိုင်၌ ပေါင်နှံ၍ ၎င်းတို့သုံးဦး ခွဲဝေသုံးစွဲခဲ့ကြောင်း၊ စိုးမိုးအောင်(ခ)ဖိုးကျော်မှာ မဟာအောင်မြေမြို့နယ်၊ စင်္ကြာနွယ်စဉ်ရပ်ကွက်၊ ၃၇ လမ်း၊ ၇၃ x ၇၅ လမ်းကြားရှိ “Dream37” တည်းခိုခန်း၌ တည်းခိုနေထိုင်ကြောင်း ထပ်မံဖော်ထုတ်သိရှိရသဖြင့် ရဲတပ်ဖွဲ့ဝင်များက ဖမ်းဆီးရမိနိုင်ရေး ဆောင်ရွက်ခဲ့ရာ စိုးမိုးအောင်(ခ)ဖိုးကျော်အား “Dream37” တည်းခိုခန်း အခန်းအမှတ်(၆၀၄၀)အတွင်းမှ အရိုး/အသွား ၁၃ လက်မခန့်ရှိ ဓားဦးချွန် တစ်ချောင်း၊ ဆိုင်ကယ် တစ်စီးနှင့်အတူ ဖမ်းဆီးရမိခဲ့သည်။
ထို့နောက် ရဲတပ်ဖွဲ့ဝင်များသည် လုယက်ယူဆောင်ခြင်းခံရသည့် ဆိုင်ကယ်အား ပြန်လည်သိမ်းဆည်းရရှိနိုင်ရေး ဆောင်ရွက်ခဲ့ရာ 70W-XXXX HONDA CLICK နီ/နက်ရောင် ဆိုင်ကယ်အား ချမ်းမြသာစည်မြို့နယ်ရှိ အပေါင်ဆိုင်မှ ပြန်လည်သိမ်းဆည်းနိုင်ခဲ့ပါသည်။
ဖြစ်စဉ်တွင် သေနတ်အတုပြ၍ ခြိမ်းခြောက်ကာ လုယက်မှုကျူးလွန်သူ သုံးဦးအနက် ညီညီထွန်း(ခ)စီစီနှင့် စိုးမိုးအောင်(ခ)ဖိုးကျော်တို့ နှစ်ဦးအား သက်သေခံပစ္စည်းများနှင့်အတူ ဖော်ထုတ်ဖမ်းဆီးနိုင်ခဲ့ပြီး ဖမ်းဆီးရန်ကျန်တရားခံ ဟာနစ်(စိစစ်ဆဲ)အား အမြန်ဆုံးဖမ်းဆီးရမိနိုင်ရေးနှင့် ဖမ်းဆီးရမိတရားခံများအား ဥပဒေနှင့်အညီ ထိရောက်စွာအရေးယူနိုင်ရေး ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA

26 June 2025

လက်နက်ကိုင်အစွန်းရောက် အကြမ်းဖက်သမားများအနေဖြင့် တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားများလွှမ်းမိုးစေရန်လည်းကောင်း၊ ၎င်းတို့နှင့်အမြင်အယူအဆမတူသူ အပြစ်မဲ့ အရပ်သားပြည်သူများအား “သူလျှို၊ ဒလန်၊ သတင်းပေး” ဟုစွပ်စွဲ၍လည်းကောင်း၊ “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ ဓား၊ သေနတ်များ အသုံးပြု၍ ရက်စက်စွာ လုပ်ကြံတိုက်ခိုက်၊ သတ်ဖြတ်ခြင်းများ ပြုလုပ်လျက်ရှိသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၂၅ ရက် နံနက် ၉ နာရီတွင် မွန်ပြည်နယ်၊ ရေးမြို့နယ်ရှိ လမိုင်းမြို့တိုက်နယ်ဆေးရုံ၌ ကျည်ထိမှန် ဒဏ်ရာများဖြင့် သေဆုံးနေသည့် အမျိုးသား တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ မွန်ပြည်နယ်၊ ရေးမြို့နယ်၊ စံပြကျေးရွာနေ ဦးမြင့်စိုး(ခ)ကိုညာ(၆၂)နှစ်သည် ၎င်း၏နေအိမ်၌ ရှိနေစဉ် KNU အဖွဲ့မှ အကြမ်းဖက်မှုကိုလိုလားသူများနှင့် PDF အမည်ခံ အကြမ်းဖက်သမားများပူးပေါင်းအဖွဲ့ အင်အား နှစ်ဦး(စိစစ်ဆဲ)က ဆိုင်ကယ် တစ်စီးဖြင့် ရောက်ရှိလာပြီး သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ၎င်းတွင် ကျည်ထိမှန် ဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။ 
ထိုသို့ အပြစ်မဲ့ အရပ်သားပြည်သူများအား “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ လုပ်ကြံသတ်ဖြတ်မှု ကျူးလွန်ခဲ့သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA

အိန္ဒိယသည် အကြမ်းဖက်ဝါဒအား လုံးဝသည်းခံမှုမရှိကြောင်း၊ အကြမ်းဖက် သမားများကို မည်သည့်နေရာတွင်ဖြစ်စေ ပစ်မှတ်ထားတိုက်ဖျက်ရန် မတွန့်ဆုတ်ဟု ကာကွယ်ရေးဝန်ကြီး Rajnath Singh က ပြောကြား ခဲ့သည်။

ကြာသပတေးနေ့ (ဇွန် ၂၆) တွင် ရှန်ဟိုင်း ပူးပေါင်းဆောင်ရွက်ရေးအဖွဲ့ (SCO) ၏ ကာကွယ်ရေးဝန်ကြီးများအစည်းအဝေးအတွက် တရုတ်နိုင်ငံ Qingdao တွင် ရောက်ရှိနေသော ဝန်ကြီး Singh က အဖွဲ့ဝင် နိုင်ငံ အားလုံးအား အကြမ်းဖက်ဝါဒကို ပြတ်သားစွာ ရှုတ်ချရန် တိုက်တွန်း ခဲ့သည်။

“အိန္ဒိယ၏ အကြမ်းဖက်ဝါဒအပေါ် သည်းခံမှုလုံးဝမရှိသည့် သဘောထား သည် ယနေ့ မိမိတို့၏ လုပ်ဆောင်ချက်များတွင် ထင်ဟပ်နေစေပါသည်။ ခုခံကာကွယ်ရန် မိမိတို့၏ အခွင့်အရေးလည်း ပါဝင်ပါသည်” ဟု ၎င်းက ဆိုသည်။

မေလ ၇ ရက်က ပါကစ္စတန်ထိန်းချုပ်သည့် နယ်မြေအတွင်းရှိ အကြမ်းဖက် သံသယရှိသည့် စခန်းများကို နယူးဒေလီ၏ တိုက်ခိုက်မှုနှင့်ပတ်သက်၍ အိန္ဒိယကာကွယ်ရေးဝန်ကြီးက ထပ်လောင်းပြောကြားရာတွင် “အကြမ်းဖက်ဝါဒ၏ အချက်အချာနေရာများသည် လုံခြုံစိတ်ချရသည့်နေရာများ မဟုတ် တော့ကြောင်း မိမိတို့ပြသခဲ့ပြီး ၎င်းတို့ကို ပစ်မှတ်ထားရန် မတွန့်ဆုတ်ပါ” ဟု ဖြည့်စွက်ပြောကြားခဲ့သည်။

Singh က SCO အဖွဲ့ဝင်များအနေဖြင့် “ငြိမ်းချမ်းရေး၊ လုံခြုံရေးနှင့် ယုံကြည်မှု ကင်းမဲ့မှုဆိုင်ရာ” စိန်ခေါ်ချက်များကို အတူတကွဖြေရှင်းရန် လိုအပ်ကြောင်း ပြောကြားခဲ့သည်။ “အိန္ဒိယသည် ပြုပြင်ပြောင်းလဲထားသော ဘက်စုံ ပူးပေါင်း ဆောင်ရွက်မှုစနစ်က နိုင်ငံအချင်းချင်း ပဋိပက္ခများကို ကာကွယ်ရန် ညှိနှိုင်းမှုနှင့် ပူးပေါင်းဆောင်ရွက်မှုယန္တရားများ ဖန်တီးပေးခြင်းဖြင့် အထောက်အကူဖြစ်စေမည်ဟု ယုံကြည်သည်။ မည်မျှကြီးမားပြီး အင်အား ကြီးသော နိုင်ငံဖြစ်စေ တစ်နိုင်ငံတည်းဖြင့် ရင်ဆိုင်နိုင်မည် မဟုတ်ပါ” ဟု ၎င်းက မှတ်ချက်ပြုခဲ့သည်။

ဝန်ကြီး Rajnath Singh က “မိမိတို့၏ ရည်ရွယ်ချက်များအတွက် အကြမ်းဖက် ဝါဒကို အားပေးကူညီသူများ၊ အားဖြည့်သူများနှင့် အသုံးချ သူများသည် အကျိုးဆက်ကို ခံစားရမည်ဖြစ်သည်” ဟု ပါကစ္စတန်ကို သွယ်ဝိုက်ညွှန်းကား၍ ပြောကြားခဲ့သည်။ အချို့နိုင်ငံများသည် နယ်စပ် ဖြတ်ကျော် အကြမ်းဖက်ဝါဒကို မူဝါဒတစ်ခုအဖြစ် အသုံးပြုကာ အကြမ်းဖက် သမားများအား ခိုလှုံခွင့်ပေးကြသည်ဟု ၎င်းက ဖြည့်စွက် ပြောကြား ခဲ့သည်။

နယူးဒေလီရှိ သတင်းစာရှင်းလင်းပွဲတွင် ပြောရေးဆိုခွင့်ရှိသူ Randhir Jaiswal က “အိန္ဒိယဘက်မှ အကြမ်းဖက်ဝါဒဆိုင်ရာ စိုးရိမ်ပူပန်မှုများကို ကြေညာစာတမ်းတွင် ထည့်သွင်းရန် တောင်းဆိုခဲ့သော်လည်း နိုင်ငံတစ် နိုင်ငံက လက်မခံခဲ့သဖြင့် ကြေညာချက်ကို အတည်မပြုနိုင်ခဲ့ပါ” ဟု ရှင်းလင်းခဲ့သည်။

အိန္ဒိယလွှတ်တော်အမတ် Shashi Tharoor က “ပါကစ္စတန်သည် အကြမ်းဖက်သမားများအား ခိုလှုံခွင့်ပေးနေဆဲဖြစ်ပြီး လေ့ကျင့်ရေးစခန်းများ လွတ်လပ်စွာလုပ်ဆောင်ခွင့်ပြုထားသည်” ဟု RT နှင့်အင်တာဗျူး တွင် ပြောကြားခဲ့သည်။

ပါကစ္စတန်အစိုးရသည် အိန္ဒိယနိုင်ငံအတွင်း အကြမ်းဖက် လှုပ်ရှားမှုများ တွင် ပါဝင်ပတ်သက်မှုရှိသည်ဟူသော စွပ်စွဲချက်များကို ငြင်းဆန်ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

26 June 2025

အကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများ ထိခိုက်ဒဏ်ရာ ရရှိစေရန်နှင့် အကြောက်တရားများ လွှမ်းမိုးစေရန် ရည်ရွယ်ချက်များဖြင့် ဖမ်းဆီးသတ်ဖြတ်ခြင်း၊ ရပ်ကွက်/ကျေးရွာများအတွင်းသို့ လက်နက်ကြီး၊ လက်နက်ငယ်များ၊ Drone ဖြင့် Drop Bomb များ ပစ်ချတိုက်ခိုက်ခြင်းများနှင့် အများပြည်သူသွားလာ အသုံးပြုနေသည့် လမ်းများပေါ်၌ မိုင်းထောင်ထားခြင်း၊ ဖောက်ခွဲခြင်းများအား ဆင်ခြင်တုံတရားကင်းမဲ့စွာ ပြုလုပ်လျက်ရှိသည်။
 ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၂၅ ရက် ည ၇ နာရီ ၃၀ မိနစ်တွင် မန္တလေးတိုင်းဒေသကြီး၊ ပြင်ဦးလွင်မြို့နယ်ပြည်သူ့ဆေးရုံသို့ ဗုံးသီးပေါက်ကွဲစ ထိမှန်ဒဏ်ရာများဖြင့် အမျိုးသမီးတစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ ရှမ်းပြည်နယ်(မြောက်ပိုင်း)၊ ကျောက်မဲမြို့နယ်၊ အမှတ်(၃)ရပ်ကွက်သို့ အကြမ်းဖက်အဖွဲ့(စိစစ်ဆဲ)က အများပြည်သူထိခိုက်စေရန် ရည်ရွယ်၍ လက်နက်ကြီးဖြင့် ပစ်ခတ်တိုက်ခိုက်ခဲ့ရာ ရပ်ကွက်အတွင်း လက်နက်ကြီးဗုံးသီးများ ကျရောက်ပေါက်ကွဲခဲ့မှုကြောင့် အဆိုပါရပ်ကွက်နေ ဒေါ်ဖြိုးဝေဝေကျော်(၃၄)နှစ်တွင် ဗုံးသီးပေါက်ကွဲစ ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။
ထိုသို့ PDF အမည်ခံအကြမ်းဖက်သမားများက အပြစ်မဲ့ အရပ်သားပြည်သူများ အေးချမ်းစွာ နေထိုင်လျက်ရှိသော ရပ်ကွက်/ကျေးရွာများအတွင်းသို့ လက်နက်ကြီး၊ လက်နက်ငယ်၊ Drop Bomb များဖြင့် ပစ်ခတ်တိုက်ခိုက်ခြင်း၊ အများပြည်သူသွားလာ လှုပ်ရှားနေသည့်နေရာများ၌ မိုင်းထောင်ဖောက်ခွဲခြင်းများအား ဆင်ခြင်တုံတရားကင်းမဲ့စွာ ပြုလုပ်ခဲ့မှုများကြောင့် အပြစ်မဲ့ အရပ်သားပြည်သူများ ထိခိုက်ဒဏ်ရာရရှိခဲ့မှုအပေါ် ဒေသခံပြည်သူများက လုံးဝလက်ခံနိုင်ခြင်းမရှိဘဲ ဆန့်ကျင်ကန့်ကွက်လျက်ရှိကြောင်းနှင့် လုံခြုံရေးတပ်ဖွဲ့ဝင်များက လိုအပ်သော လုံခြုံရေးလုပ်ငန်းများကို ပြည်သူလူထုနှင့်ပူးပေါင်းကာ တိုးမြှင့်လုပ်ဆောင်လျက်ရှိကြောင်း သတင်းရရှိပါသည်။

MOHA

26 June 2025

PDF အမည်ခံအကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများ ထိခိုက်ဒဏ်ရာရရှိစေရန်နှင့် အကြောက်တရားများ လွှမ်းမိုးစေရန် ရည်ရွယ်ချက်များဖြင့် ဖမ်းဆီး သတ်ဖြတ်ခြင်း၊ ရပ်ကွက်/ကျေးရွာများအတွင်းသို့ လက်နက်ကြီး၊ လက်နက်ငယ်များ၊ Drone ဖြင့် Drop Bomb များ ပစ်ချတိုက်ခိုက်ခြင်းများနှင့် အများပြည်သူသွားလာ အသုံးပြုနေသည့် လမ်းများပေါ်၌ မိုင်းထောင်ထားခြင်း၊ ဖောက်ခွဲခြင်းများအား ဆင်ခြင်တုံတရားကင်းမဲ့စွာ ပြုလုပ်လျက်ရှိသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၂၅ ရက် မွန်းလွဲ ၁ နာရီ ၄၀ မိနစ်တွင် စစ်ကိုင်းတိုင်းဒေသကြီး၊ ပုလဲမြို့နယ်၊ ဇီးဖြူကုန်းကျေးရွာသို့ PDF အမည်ခံ အကြမ်းဖက်အဖွဲ့က အများပြည်သူ ထိခိုက်စေရန် ရည်ရွယ်၍ Drone ဖြင့် Drop Bomb များ ပစ်ချတိုက်ခိုက်ခဲ့ရာ ကျေးရွာအတွင်းသို့ Drop Bomb များ ကျရောက်ပေါက်ကွဲခဲ့မှုကြောင့် အဆိုပါကျေးရွာရှိ “ကေသရာဇာရာမ” ဘုန်းကြီးကျောင်းဝင်းမှ ပင်မကျောင်းဆောင်တွင် ဗုံးသီးကျရောက်ပေါက်ကွဲကာ မီးလောင်ပျက်စီး သွားခဲ့သောကြောင့် သံဃာတော်နှင့်ပြည်သူများ ထိခိုက်ဒဏ်ရာရရှိမှု မရှိကြောင်း သိရသည်။
ထိုသို့ PDF အမည်ခံ အကြမ်းဖက်သမားများက အပြစ်မဲ့ အရပ်သားပြည်သူများ အေးချမ်းစွာ နေထိုင်လျက်ရှိသော ရပ်ကွက်/ကျေးရွာများအတွင်းသို့ လက်နက်ကြီး၊ လက်နက်ငယ်၊ Drop Bomb များဖြင့် ပစ်ခတ်တိုက်ခိုက်ခြင်း၊ အများပြည်သူသွားလာ လှုပ်ရှားနေသည့် နေရာများ၌ မိုင်းထောင်ဖောက်ခွဲခြင်းများအား ဆင်ခြင်တုံတရားကင်းမဲ့စွာ ပြုလုပ်ခဲ့မှုများကြောင့် သာသနိကအဆောက်အအုံများ မီးလောင်ပျက်စီးခဲ့မှုအပေါ် ဒေသခံပြည်သူများက လုံးဝလက်ခံနိုင်ခြင်းမရှိဘဲ ဆန့်ကျင်ကန့်ကွက် လျက်ရှိကြောင်းနှင့် လုံခြုံရေးတပ်ဖွဲ့ဝင်များက လိုအပ်သော လုံခြုံရေးလုပ်ငန်းများကို ပြည်သူလူထုနှင့် ပူးပေါင်းကာ တိုးမြှင့်လုပ်ဆောင်လျက်ရှိကြောင်း သတင်းရရှိပါသည်။

MOHA

24 June 2025

လက်နက်ကိုင်အစွန်းရောက် အကြမ်းဖက်သမားများအနေဖြင့် တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားများ လွှမ်းမိုးစေရန်လည်းကောင်း၊ ၎င်းတို့နှင့်အမြင်အယူအဆမတူသူ အပြစ်မဲ့ အရပ်သားပြည်သူများအား “သူလျှို၊ ဒလန်၊ သတင်းပေး” ဟုစွပ်စွဲ၍လည်းကောင်း၊ “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ ဓား၊ သေနတ်များ အသုံးပြု၍ ရက်စက်စွာ လုပ်ကြံတိုက်ခိုက်၊ သတ်ဖြတ်ခြင်းများ ပြုလုပ်လျက်ရှိသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၂၃ ရက် နံနက် ၁၀ နာရီ ၄၀ မိနစ်တွင် မန္တလေးတိုင်းဒေသကြီး၊ ချမ်းအေးသာစံမြို့နယ်ရှိ မန္တလေးအထွေထွေရောဂါကုဆေးရုံကြီးသို့ ကျည်ထိမှန်ဒဏ်ရာများဖြင့် အမျိုးသား တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ စစ်ကိုင်းတိုင်းဒေသကြီး၊ မုံရွာမြို့နယ်၊ ရွှေဇလုပ်ရပ်ကွက်နေ မောင်ရင်ဦး(၁၉)နှစ်သည် ၎င်း၏နေအိမ်မှ အဆိုပါရပ်ကွက်ရှိ “ကေလာသာရာမ” ဘုန်းကြီးကျောင်းသို့ သွားရောက်စဉ် ဘုန်းကြီးကျောင်းဝင်းအတွင်းရှိ ရေအိုးစင်အနီးအရောက်၌ PDF အမည်ခံ အကြမ်းဖက်အဖွဲ့ အင်အား(စိစစ်ဆဲ)က သေနတ်ဖြင့် ပစ်ခတ်ထွက်ပြေးသွားခဲ့သဖြင့် ၎င်းတွင် ကျည်ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။
ထိုသို့ အပြစ်မဲ့ အရပ်သားပြည်သူများအား “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ လုပ်ကြံသတ်ဖြတ်မှု ကျူးလွန်ခဲ့သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA

26 June 2025

လက်နက်ကိုင်အကြမ်းဖက်အဖွဲ့များသည် တိုင်းဒေသကြီးနှင့် ပြည်နယ်များရှိ မြို့၊ ရွာများအတွင်း တိုက်ပွဲများဖော်ဆောင်ခြင်း၊ လက်နက်ကြီးများဖြင့် အဝေးမှ ပစ်ခတ်ခြင်း၊ Drone ဖြင့် Drop Bomb များ ပစ်ချတိုက်ခိုက်ခြင်း၊ လက်လုပ်ဗုံး၊ လက်လုပ်မိုင်းများဖြင့် မိုင်းထောင်ဖောက်ခွဲ တိုက်ခိုက်ခြင်းများအား လုပ်ဆောင်လျက်ရှိသည့်အပြင် အေးချမ်းစွာ နေထိုင်လျက်ရှိသည့် ဒေသခံပြည်သူများကိုပါ ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်း မစာနာသည့် လူမဆန်သော အကြမ်းဖက်မှုများနှင့် ရာဇဝတ်မှုများအား ကျူးလွန် လုပ်ဆောင်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၂၅ ရက် ည ၉ နာရီ ၃၅ မိနစ်တွင် မကွေးတိုင်းဒေသကြီး၊ စလင်းမြို့နယ်၊ အလယ်ပိုင်းကျေးရွာနေ ဦးသန်းထွန်း(၅၁)နှစ်သည် ၎င်း၏နေအိမ်၌ ရှိနေစဉ် PDF အမည်ခံ အကြမ်းဖက်သမား ခြောက်ဦး(စိစစ်ဆဲ)က ဆိုင်ကယ် ခြောက်စီးဖြင့် ရောက်ရှိလာပြီး ဦးသန်းထွန်းအား ဖမ်းဆီးကာ အဆိုပါကျေးရွာအရှေ့ဘက် သုံးမိုင်ခန့်အကွာရှိ ဆင်ပွတ်ကျေးရွာဘက်သို့ ဖမ်းဆီးခေါ်ဆောင်သွားခဲ့ကြောင်း သိရသည်။
အထက်ပါဖြစ်စဉ်မှ ဒေသခံပြည်သူများအား ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော ရာဇဝတ်မှုများအား ကျူးလွန်လုပ်ဆောင်လျက်ရှိသည့် အကြမ်းဖက်သမားများအား ဖော်ထုတ်ဖမ်းဆီးအရေးယူနိုင်ရေးနှင့် ဖမ်းဆီးခေါ်ဆောင်ခံရသူအား ပြန်လည်ကယ်တင်နိုင်ရေး လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA

ယူကရိန်းအရာရှိများ၏ ဖော်ပြချက်အရ ရုရှားတပ်များ၏ တိုက်ခိုက်မှု များကြောင့် တနင်္လာနှင့် အင်္ဂါနေ့ (ဇွန် ၂၃ ၊ ၂၄) တို့တွင် ၄၈ နာရီအတွင်း ယူကရိန်းနိုင်ငံသား အရပ်သားဒါဇင်ချီ၍ သေဆုံးခဲ့ပြီး လပေါင်း များစွာ အတွင်း အသေအပျောက်အများဆုံး နေ့ရက်များဖြစ်ခဲ့သည်။

ရုရှား၏တိုက်ခိုက်မှုများတွင် သေဆုံးခဲ့သူများထဲ၌ အသက် ၅ နှစ်အရွယ် ကလေးနှင့် အသက် ၁၁ နှစ်အရွယ်မိန်းကလေးတစ်ဦးလည်း ပါဝင်နေပြီး ယင်းတိုက်ခိုက်မှုများကို ယူကရိန်း၏မဟာမိတ်များ နယ်သာလန်နိုင်ငံတွင် NATO ထိပ်သီး အစည်းအဝေးအတွက် ရောက်ရှိနေချိန် လုပ်ဆောင် ခဲ့ခြင်း ဖြစ်သည်။

ယူကရိန်းအရာရှိများက အင်္ဂါနေ့ (ဇွန် ၂၄) တွင် ရုရှား၏ ဒုံးကျည် တစ်စင်းသည် နိုင်ငံ၏အရှေ့တောင်ပိုင်းရှိ အကြီးဆုံးမြို့ဖြစ်သော ဒနီပရိုမြို့ကို ထိမှန်ခဲ့ရာတွင် လူ ၁၅ ဦး သေဆုံးခဲ့ကြောင်း၊ တနင်္လာနေ့ (ဇွန် ၂၃) က ကိယက်ဗ်မြို့ရှိ တိုက်ခန်းတစ်ခုကို ဗုံးကြဲတိုက်ခိုက်မှုတွင် လူ ၉ ဦး သေဆုံးခဲ့ကြောင်း ပြောကြားခဲ့သည်။

နိုင်ငံတစ်ဝှမ်းရှိ ဆူမီ၊ ခါဆွန်၊ ဒိုနက်စ်နှင့် အိုဒက်ဆာဒေသများအပါအဝင် တိုက်ခိုက်မှုများတွင် အခြားလူဦးရေ အနည်းဆုံး နှစ်ဒါဇင်ကျော် သေဆုံးခဲ့သည်။

ဒေသခံအရာရှိများက ယခင်တိုက်ခိုက်မှုများနှင့်မတူဘဲ အဆိုပါဒုံးကျည် တိုက်ခိုက်မှုသည် ဒနီပရိုမြို့တွင် ကြီးမားသောပျက်စီးမှုဖြစ်စေခဲ့သည်ဟု ပြောကြားခဲ့သည်။

မြို့တော်ဝန် Borys Filatov က ကျောင်းများ၊ ကျန်းမာရေးဌာနများ၊ မြူနီစီပယ်နေရာများနှင့် လူနေထိုင်ရာအဆောက်အအုံများအပါအဝင် အဆောက်အအုံပေါင်း ၅၀ နီးပါး ပျက်စီးခဲ့သည်ဟု ဆိုသည်။

“ဤသည်မှာ စစ်ကြီးဖြစ်ပွားသည့်ကာလအတွင်း မြို့တော်တစ်ခုလုံး မကြုံဖူးသေးသည့် အကြီးစားပျက်စီးမှုဖြစ်ပါသည်။ သေဆုံးဒဏ်ရာရသူ အရေအတွက်မှာ အလွန်များပြားလှသဖြင့် လူနာတင်ယာဉ်များပင် အချိန်မီ လိုက်လံသယ်ယူနိုင်ခြင်း မရှိပါ” ဟု ၎င်းက ဖြည့်စွက် ပြောကြား ခဲ့သည်။

အာဏာပိုင်များ၏ထုတ်ပြန်ချက်အရ လူ ၁၇၀ ကျော် ဒဏ်ရာရရှိခဲ့ပြီး အင်္ဂါနေ့ (ဇွန် ၂၄) ညနေအထိ မြို့တွင်းဆေးရုံများတွင် လူ ၁၀၀ ခန့် ဆက်လက် ကုသမှုခံယူနေရဆဲဖြစ်သည်။

လူဦးရေ ၅၀၀ ခန့်လိုက်ပါစီးနင်းလျက်ရှိသော ခရီးသည်တင် ရထားတစ်စင်းလည်း အဆိုပါတိုက်ခိုက်မှုတွင် ပျက်စီးခဲ့သည်။

“မြို့တစ်ဝှမ်းရှိ နေအိမ်အဆောက်အဦများနှင့် မြူနီစီပယ် အဆောက်အဦများတွင် ပြတင်းပေါက်မှန် ၂၀၀၀ ကျော်ကွဲကြေခဲ့ပါသည်” ဟု ၎င်းက ပြောကြားခဲ့သည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂