20 June 2025

အစွန်းရောက်အကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများနှင့် တရားဥပဒေစိုးမိုးရေးအတွက် ဝိုင်းဝန်းဆောင်ရွက်နေသော အုပ်ချုပ်ရေးပိုင်းဆိုင်ရာ တာဝန်ရှိသူများအား ထိခိုက်ဒဏ်ရာရရှိစေရန် ရည်ရွယ်ချက်များဖြင့် အကြမ်းဖက်ဖောက်ခွဲရေးလုပ်ရပ်များအား ငွေကြေးထောက်ပံ့ကာ နောက်ကွယ်မှ သွေးထိုးမြှောက်ပင့်လှုံ့ဆော်မှုများဖြင့် အများပြည်သူသွားလာ အသုံးပြုသော လမ်းမကြီးများ၊ ရထားလမ်းများ၊ ဌာနဆိုင်ရာ ရုံးအဆောက်အအုံများနှင့် လူနေအိမ်များအား ဖောက်ခွဲရေးပစ္စည်းကိရိယာများ အသုံးပြု၍ မိုင်းထောင်ဖောက်ခွဲခြင်း၊ အဝေးမှ ပစ်ခတ် ဖောက်ခွဲခြင်းများ ပြုလုပ်လျက်ရှိပါသည်။
ထိုသို့လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၁၉ ရက် မွန်းလွဲ ၁ နာရီ ၅၅ မိနစ်တွင် မကွေးတိုင်းဒေသကြီး၊ မင်းဘူးခရိုင်၊ စလင်းမြို့နယ်အထွေထွေအုပ်ချုပ်ရေးဦးစီးဌာနရုံးရှေ့ မင်းဘူး-စလင်း-ဆင်ဖြူကျွန်း ကားလမ်းအရှေ့ဘက်ခြမ်း၌ လက်လုပ်အသံမိုင်း တစ်လုံး ပေါက်ကွဲခဲ့သဖြင့် လူ/အဆောက်အအုံ ထိခိုက်/ပျက်စီးမှု မရှိကြောင်း သိရှိရပါသည်။
အထက်ပါဖြစ်စဉ်မှ အကြမ်းဖက်မှုကျူးလွန်ခဲ့သူများအား ဥပဒေနှင့်အညီ ထိရောက်စွာ အရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း သတင်းရရှိပါသည်။

MOHA

ဒီမိုကရက်တစ်ပါတီမှ နယူးယောက်မြို့တော်ဝန်လောင်း Zohran Mamdani အား လုပ်ကြံသတ်ဖြတ်မည်၊ ကားဗုံးခွဲမည်ဟု အကြိမ်ကြိမ် ခြိမ်းခြောက်ခံရပြီး ရဲတပ်ဖွဲ့မှ စုံစမ်းစစ်ဆေးမှုစတင်ခဲ့သည်။

ဇွန်လ ၁၉ ရက်နေ့တွင် Zohran Mamdani ၏ ရွေးကောက်ပွဲအဖွဲ့က ၎င်းထံသို့ “စိတ်အနှောင့်အယှက်ဖြစ်စရာ” အသံမက်ဆေ့ချ်များ မကြာခဏ ရောက်ရှိလာကြောင်း၊ ၎င်းတွင် လုပ်ကြံသတ်ဖြတ်မည်၊ ကားဗုံးခွဲမည် ဟူသော ခြိမ်းခြောက်မှုများ ပါဝင်ကြောင်း ထုတ်ပြန်ခဲ့သည်။

“Zohran Mamdani တွင် ကားပိုင်ဆိုင်မှုမရှိသော်လည်း၊ ၎င်းအား ပစ်မှတ်ထားသည့် အကြမ်းဖက်ခြိမ်းခြောက်မှုများသည် တစ်ဦးတည်းမှ အကြိမ်ကြိမ်ဖြစ်နေပြီး စိုးရိမ်စရာဖြစ်ကာ မိမိတို့ အထူး သတိထား နေမည်” ဟု ၎င်း၏ရွေးကောက်ပွဲအဖွဲ့က ပြောကြားခဲ့သည်။

နယူးယောက်ရဲတပ်ဖွဲ့မှ ပြောရေးဆိုခွင့်ရှိသူက နောက်ပိုင်းတွင် Mamdani အား ပစ်မှတ်ထားသည့် “အစ္စလာမ်ဘာသာရှုတ်ချမှုဆိုင်ရာ ပြောဆိုချက် များနှင့်ပတ်သက်၍ စုံစမ်းစစ်ဆေးမှုစတင်ခဲ့ကြောင်း” အတည်ပြုခဲ့သည်။ ယခုအချိန်အထိ အဆိုပါဖြစ်စဉ်နှင့်သက်ဆိုင်သည့် မည်သည့် သံသယဖြစ်ဖွယ်ကိုမျှ ဖမ်းဆီးထားခြင်းမရှိသေးပေ။

နယူးယောက်ပြည်နယ်လွှတ်တော်အမတ်ဖြစ်သူ အသက် ၃၄ နှစ်အရွယ် Zohran Mamdani ကို ယူဂန်ဒါနိုင်ငံတွင် အိန္ဒိယမိဘများမှ မွေးဖွားခဲ့ပြီး၊ နယူးယောက်ရှိ Columbia တက္ကသိုလ်တွင် ပါမောက္ခတစ်ဦးဖြစ်သည့် အစ္စလာမ်ဘာသာဝင် ဖခင်နှင့်အတူ အမေရိကသို့ ရွှေ့ပြောင်း နေထိုင်ခဲ့သည်။

“၎င်းအား ခြိမ်းခြောက်မှုများသည် ယနေ့အမေရိကန်နိုင်ငံရေး၏ ဝမ်းနည်းဖွယ် အမှန်တရား ကို ရောင်ပြန်ဟပ်နေကြောင်း” ၎င်းကပြောသည်။ ထို့အပြင် “မွတ်စ်လင်မ်ဆန့်ကျင်ရေး၊ ဘာသာရေးနှင့် လူမျိုးရေးအခြေပြု မညီညွတ်မှု နှင့် အမုန်းစကားများကို မြှင့်တင်ရန် ဒေါ်လာသန်းပေါင်းများစွာ အကုန် ခံနေကြသည့်” နိုင်ငံရေးအဖွဲ့အစည်းများကိုလည်း ဝေဖန်ခဲ့သည်။

နယူးယောက်မြို့တော်ဝန်လောင်းအဖြစ် ပြိုင်ပွဲဝင်နေသည့် ယခင် ပြည်နယ်အုပ်ချုပ်ရေးမှူး Andrew Cuomo က X (Twitter) တွင် အမေရိကန်နိုင်ငံရေးနှင့် လူမှုအဖွဲ့အစည်းအတွင်း အကြမ်းဖက်မှုကို ကန့်ကွက်သည့်အနေဖြင့် မက်ဆေ့ဂျ်တစ်စောင် ရေးသားခဲ့သည်။ “နိုင်ငံ သည် အထိခိုက်မခံသော အချိန်ကာလတစ်ခုကို ဖြတ်သန်းနေရပြီး၊ မိမိ တို့သည် စကားလုံးများကို ပျော့ပြောင်းစွာသုံးကာ ပြည်သူတို့၏ ပြဿနာများကို အဓိကထား ဖြေရှင်းရန် လိုအပ်ပါသည်” ဟု ၎င်းက ဖြည့်စွက် ပြောကြားခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

20 June 2025

လက်နက်ကိုင်အစွန်းရောက် အကြမ်းဖက်သမားများအနေဖြင့် တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားများလွှမ်းမိုးစေရန်လည်းကောင်း၊ ၎င်းတို့နှင့်အမြင်အယူအဆမတူသူ အပြစ်မဲ့ အရပ်သားပြည်သူများအား “သူလျှို၊ ဒလန်၊ သတင်းပေး” ဟုစွပ်စွဲ၍လည်းကောင်း၊ “ငါနှင့်မတူ၊ ငါ့ရန်သူ” ဟူသည့် တစ်ဖက်သတ် အစွန်းရောက် ဂိုဏ်းဂဏစွဲအပေါ် အခြေခံကာ ဓား၊ သေနတ်များ အသုံးပြု၍ ရက်စက်စွာ လုပ်ကြံတိုက်ခိုက်၊ သတ်ဖြတ်ခြင်းများ ပြုလုပ်လျက်ရှိသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၁၉ ရက် ည ၉ နာရီ ၁၀ မိနစ်တွင် မန္တလေးတိုင်းဒေသကြီး၊ စဉ့်ကိုင်မြို့နယ်၊ ရဲရွာသစ်ကျေးရွာ၌ သေနတ်ဖြင့် ပစ်ခတ်ခံရ၍ အမျိုးသား တစ်ဦး သေဆုံးသွားကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါကျေးရွာနေ ဦးရွှေသိန်း(၄၃)နှစ်သည် ၎င်း၏နေအိမ်၌ ရှိနေစဉ် PDF အမည်ခံ အကြမ်းဖက်သမား ငါးဦး(စိစစ်ဆဲ)က ဆိုင်ကယ် နှစ်စီးဖြင့် ရောက်ရှိလာပြီး သေနတ်ဖြင့် ပစ်ခတ်သတ်ဖြတ်သွားခဲ့သဖြင့် ဦးရွှေသိန်းတွင် ကျည်ထိမှန်ဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။
ထိုသို့ အပြစ်မဲ့ အရပ်သားပြည်သူများအား “ငါနှင့်မတူ၊ ငါ့ရန်သူ” ဟူသည့် တစ်ဖက်သတ် အစွန်းရောက် ဂိုဏ်းဂဏစွဲအပေါ် အခြေခံကာ လုပ်ကြံသတ်ဖြတ်မှု ကျူးလွန်ခဲ့သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA

နေပြည်တော် ဇွန် ၁၉

တရားမဝင်ကုန်သွယ်မှုတိုက်ဖျက်ရေးဦးဆောင်ကော်မတီ၏ ကြီးကြပ်ကွပ်ကဲမှုဖြင့် တရားမဝင်ကုန်သွယ်မှုများကို ဥပဒေနှင့်အညီ ထိရောက်စွာတားဆီးအရေးယူနိုင်ရေး ဆောင်ရွက်လျက်ရှိသည်။

အကောက်ခွန်ဦးစီးဌာန၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့များက စစ်ဆေးမှုများ ဆောင်ရွက်ခဲ့ရာ ဇွန် ၁၇ ရက်တွင် အေးရှားဝေါလ်ဆိပ်ကမ်း၌ ကုန်သေတ္တာ သုံးလုံးအတွင်းမှ တရားဝင်စာရွက်စာတမ်းအထောက်အထား တင်ပြနိုင်ခြင်းမရှိသည့် လုပ်ငန်းသုံးပစ္စည်းနှစ်မျိုး (ခန့်မှန်းတန်ဖိုး ငွေကျပ် ၃၄၁၁၈၆၄၇၀) ကိုလည်းကောင်း၊ သီလဝါဆိပ်ကမ်း၌ ကုန်သေတ္တာ ၁၆ လုံးအတွင်းမှ တရားဝင်စာရွက်စာတမ်းအထောက်အထား တင်ပြနိုင်ခြင်းမရှိသည့် လုပ်ငန်းသုံးပစ္စည်း ၁၀၂ မျိုး (ခန့်မှန်းတန်ဖိုး ငွေကျပ် ၁၅၆၀၈၁၀၈၅) ကိုလည်းကောင်း၊ ဇွန် ၁၈ ရက်တွင် ရန်ကုန်အပြည်ပြည်ဆိုင်ရာလေဆိပ်၌ Singapore Airlines လေယာဉ်ခရီးစဉ်အမှတ် SQ-762/ SF - 5799 ဖြင့် စင်ကာပူနိုင်ငံမှ မြန်မာနိုင်ငံသို့ လိုက်ပါလာသည့် မြန်မာနိုင်ငံသား ခရီးသည်တစ်ဦး ၏ ဝန်စည်အတွင်းမှ တရားဝင်စာရွက်စာတမ်းအထောက်အထား တင်ပြနိုင်ခြင်းမရှိသည့် လူသုံးကုန်ပစ္စည်းတစ်မျိုး (ခန့်မှန်းတန်ဖိုးငွေကျပ် ၃၆၀၀၀၀၀) ကိုလည်းကောင်း၊ မရမ်းချောင်အမြဲတမ်းစစ်ဆေးရေးစခန်း၌ ဘားအံမြို့မှ ရန်ကုန်မြို့သို့ မောင်းနှင်လာသည့် မော်တော်ယာဉ်တစ်စီးပေါ်မှ တရားဝင်စာရွက်စာတမ်းအထောက်အထား တင်ပြနိုင်ခြင်းမရှိသည့် လူသုံးကုန်ပစ္စည်းတစ်မျိုး (ခန့်မှန်းတန်ဖိုးငွေကျပ် ၈၉၆၀၀၀၀) နှင့် အဆိုပါပစ္စည်းများ တင်ဆောင်လာသည့် Nissan Condor Truck တစ်စီး (ခန့်မှန်းတန်ဖိုး ငွေကျပ် ၄၀၀၀၀၀၀၀) ကိုလည်းကောင်း၊ အမှတ် (၂) လမ်းမကြီး လေးထောင့်ကန် Max ဆီဆိုင်အနီး၌ ဘားအံမြို့မှ ရန်ကုန်မြို့သို့ မောင်းနှင်လာသည့် မော်တော်ယာဉ်တစ်စီးပေါ်မှ တရားဝင်စာရွက်စာတမ်းအထောက်အထား တင်ပြနိုင်ခြင်းမရှိသည့် လုပ်ငန်းသုံးပစ္စည်း ခြောက်မျိုး (ခန့်မှန်းတန်ဖိုး ငွေကျပ် ၁၅၃၃၈၅၀၀) နှင့် အဆိုပါပစ္စည်းများ တင်ဆောင်လာသည့် Dong Feng Truck တစ်စီး (ခန့်မှန်းတန်ဖိုးငွေကျပ် ၄၅၀၀၀၀၀၀) ကိုလည်းကောင်း စုစုပေါင်းခန့်မှန်းတန်ဖိုးငွေကျပ် ၆၁၀၁၆၆၀၅၅ ကို ဖမ်းဆီးရမိခဲ့ပြီး အကောက်ခွန်လုပ်ထုံးလုပ်နည်းများနှင့်အညီ အရေးယူဆောင်ရွက်လျက်ရှိသည်။

ဇွန် ၁၈ ရက်တွင် နေပြည်တော် တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှု ဖြင့် တာဝန်ကျပူးပေါင်းအဖွဲ့က စစ်ဆေးမှုများဆောင်ရွက်ခဲ့ရာ ပျဉ်းမနားခရိုင် ဇမ္ဗူသီရိမြို့နယ်အတွင်း၌ တရားမဝင်ကျွန်းသစ် ၀ ဒသမ ၅၀၂ တန် (ခန့်မှန်းတန်ဖိုး ငွေကျပ် ၄၄၂၂၀၀) ကို ဖမ်းဆီးရမိခဲ့ပြီး သစ်တော ဥပဒေနှင့်အညီ အရေးယူဆောင်ရွက်လျက်ရှိသည်။

ထို့ပြင် တနင်္သာရီတိုင်းဒေသကြီး တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့က စစ်ဆေးမှုများ ဆောင်ရွက်ခဲ့ရာ မြိတ်မြို့ ရှမ်းချောင်းလမ်းမကြီး AST ဆီဆိုင်အနီး၌ မြိတ်မြို့မှ ရန်ကုန်မြို့သို့ သွားရောက်မည့် မော်တော်ယာဉ်တစ်စီးပေါ်မှ တရားဝင်စာရွက်စာတမ်းအထောက်အထား တင်ပြနိုင်ခြင်းမရှိသည့် လုပ်ငန်းသုံးပစ္စည်း သုံးမျိုး၊ လူသုံးကုန်ပစ္စည်းနှစ်မျိုး (ခန့်မှန်းတန်ဖိုးငွေကျပ် ၂၅၃၈၀၀၀၀) နှင့် အဆိုပါပစ္စည်းများ တင်ဆောင်လာသည့် Zhong Tong Bus တစ်စီး (ခန့်မှန်းတန်ဖိုးငွေကျပ် ၁၁၀၀၀၀၀၀၀) စုစုပေါင်းခန့်မှန်းတန်ဖိုးငွေကျပ် ၁၃၅၃၈၀၀၀၀ ကို ဖမ်းဆီးရမိခဲ့ပြီး အကောက်ခွန်လုပ်ထုံးလုပ်နည်းများနှင့်အညီ အရေးယူဆောင်ရွက်လျက်ရှိသည်။

ယင်းအပြင် ပဲခူးတိုင်းဒေသကြီး တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့က စစ်ဆေးမှုများ ဆောင်ရွက်ခဲ့ရာ ညောင်လေးပင်ခရိုင်အတွင်း၌ တရားမဝင်ကျွန်းသစ် ၁ ဒသမ ၂၀၅ တန် (ခန့်မှန်းတန်ဖိုး ငွေကျပ် ၁၀၆၀၄၀၀) ကို ဖမ်းဆီးရမိခဲ့ပြီး သစ်တောဥပဒေနှင့်အညီ အရေးယူဆောင်ရွက်လျက်ရှိသည်။

အလားတူ မန္တလေးတိုင်းဒေသကြီး တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့များက စစ်ဆေးမှုများ ဆောင်ရွက်ခဲ့ရာ ကျွဲတပ်ဆုံစစ်ဆေးရေးဂိတ်၌ မန္တလေးမြို့မှ တောင်ကြီးမြို့သို့ သွားရောက်မည့် မော်တော်ယာဉ်တစ်စီးပေါ်မှ တရားဝင်စာရွက်စာတမ်းအထောက်အထား တင်ပြနိုင်ခြင်းမရှိသည့် လူသုံးကုန်ပစ္စည်း ၁၆ မျိုး (ခန့်မှန်းတန်ဖိုးငွေကျပ် ၄၃၃၈၉၃၀၀)နှင့် အဆိုပါပစ္စည်းများ တင်ဆောင်လာသည့် Mitsubishi Canter Truck တစ်စီး (ခန့်မှန်း တန်ဖိုးငွေကျပ် ၂၈၀၀၀၀၀၀) ကိုလည်းကောင်း၊ ကျောက်ဆည်မြို့ မြို့ရှောင်လမ်း ဝင်းထက်ဆီဆိုင်အနီး၌ အေးသာယာမြို့မှ မန္တလေးမြို့သို့ မောင်းနှင်လာသည့် မော်တော်ယာဉ်တစ်စီးပေါ်မှ တရားဝင်စာရွက်စာတမ်းအထောက်အထား တင်ပြနိုင်ခြင်းမရှိသည့် လုပ်ငန်းသုံးပစ္စည်းရှစ်မျိုး (ခန့်မှန်းတန်ဖိုး ငွေကျပ် ၁၀၅၂၃၆၂၅၀) နှင့် အဆိုပါပစ္စည်းများ တင်ဆောင်လာသည့် Hino Profia Truck တစ်စီး (ခန့်မှန်းတန်ဖိုးငွေကျပ် ၃၀၀၀၀၀၀၀) ကို လည်း ကောင်း စုစုပေါင်းခန့်မှန်းတန်ဖိုးငွေကျပ် ၂၀၆၆၂၅၅၅၀ ကို ဖမ်းဆီးရမိခဲ့ပြီး အကောက်ခွန်လုပ်ထုံးလုပ်နည်း များနှင့်အညီ အရေးယူဆောင်ရွက်လျက်ရှိသည်။

ဇွန် ၁၈ ရက်တွင် ပြည်ထဲရေးဝန်ကြီးဌာန မြန်မာနိုင်ငံရဲတပ်ဖွဲ့၏ ဖမ်းဆီးရမိမှုစာရင်းများအရ လိုင်စင်မဲ့မော်တော်ယာဉ် ၁၂ စီးနှင့် လိုင်စင်မဲ့မော်တော်ဆိုင်ကယ် ၅၉ စီး ဖမ်းဆီးရမိခဲ့ပြီး သက်ဆိုင်ရာလုပ်ထုံးလုပ်နည်း၊ ဥပဒေများနှင့်အညီ အရေးယူဆောင်ရွက်လျက်ရှိသည်။

ဇွန် ၁၇ ရက်နှင့် ၁၈ ရက်တို့တွင် ဖမ်းဆီးရမိမှု စုစုပေါင်းမှာ အမှုတွဲ ၁၈ မှု (ခန့်မှန်းတန်ဖိုးငွေကျပ် ၉၅၃၆၇၄၂၀၅)ကို ဖမ်းဆီးရမိခဲ့သည်။ တရားမဝင် ကုန်သွယ်မှုများကြောင့် အသေးစား၊ အငယ်စားနှင့် အလတ်စား ပြည်တွင်းစီးပွားရေးလုပ်ငန်းများမှ ထုတ်လုပ်သည့်ကုန်ပစ္စည်းများ စျေးကွက်အတွင်း မျှတစွာ ယှဉ်ပြိုင်နိုင်မှုမရှိခြင်းနှင့် စျေးကွက်ပျောက်ဆုံးခြင်းတို့ ဖြစ်ပေါ်စေပြီး ပြည်တွင်းကုန်ထုတ်လုပ်ငန်းများ ရေရှည်ရပ်တည်နိုင်ရေးအတွက် ကြီးမားသည့် ခြိမ်းခြောက်မှုများကို ဖြစ်ပေါ်စေပါသဖြင့် တရားမဝင်ကုန်သွယ်မှုများအား သက်ဆိုင်ရာတာဝန်ရှိသူများက ယခုထက်ပိုမို၍ တားဆီးစစ်ဆေးကြပ်မတ်ဆောင်ရွက်သွားမည်ဖြစ်ကြောင်း တရားမဝင်ကုန်သွယ်မှုတိုက်ဖျက်ရေးဦးဆောင်ကော်မတီမှ သတင်းရရှိသည်။

MNP

သမ္မတ ဒေါ်နယ်ထရမ့်၏ အီရန်ကို စစ်ရေးအရ တုံ့ပြန်မည့် ဆုံးဖြတ်ချက် မချမီ ညှိနှိုင်းဆွေးနွေးရန် နှစ်ပတ်ကြာ အချိန်ပေးရန် ဆုံးဖြတ်ချက်သည် လွန်ခဲ့သောတစ်ပတ်က အစ္စရေးက ဗုံးကြဲတိုက်ခိုက်မှု စတင်ပြီးနောက် လမ်းဆုံးနေခဲ့သော ဆွေးနွေးပွဲများကို အရေးတကြီး ပြန်လည်စတင်ရန် အားထုတ်မှုများကို လှုံ့ဆော်ပေးလိုက်သည်။

အမေရိကန် အစိုးရအရာရှိများ၏ ပြောကြားချက်အရ ထရမ့်နှင့် ၎င်း၏ အကြံပေးများသည် အစ္စရေး၏ အဆက်မပြတ် တိုက်ခိုက်မှုများနှင့် ၎င်း၏ ဒုံးပစ်လက်နက်များ ဆုံးရှုံးမှုများကို ခံစားနေရသော အီရန်သည် ၎င်း၏ ခေတ်မီနျူကလီးယား လက်နက်များဖွံ့ဖြိုးရေးလုပ်ငန်းစဉ်များကို စွန့်လွှတ်ရန် အပါအဝင် ယခင်က ငြင်းဆိုခဲ့သော သဘောတူညီချက်များကို လိုက်လျောပြီး ၎င်း၏ တင်းခံထားသောရပ်တည်ချက်မှ ပြန်လည်ရုန်းထွက်လာမည်ဟု မျှော်လင့်နေကြသည်။

သမ္မတထရမ့်သည် အီရန်ကို တိုက်ခိုက်ရန်အတွက် အမိန့်ပေးရန် အသင့်ပြင်ဆင်နေကြောင်း ညွှန်းဆိုနေသော စစ်ရေးဆန်ဆန် သတင်း စကားများ ရက်ပေါင်းများစွာ ထုတ်ပြန်ပြီးနောက် ဆုံးဖြတ်ချက်ကို ရွှေ့ဆိုင်းလိုက်ခြင်းသည် ၎င်း ရှောင်ရှားမည်ဟု ကတိပြုခဲ့သော နိုင်ငံခြား ပဋိပက္ခမျိုးထဲသို့ အမေရိကန်ကို ဆွဲသွင်းနိုင်သည့် အလားအလာများ အပါအဝင် ဖြစ်ပေါ်လာနိုင်မည့် အခြားအကျိုးဆက်များကို ပိုမို စဉ်းစား ဆုံးဖြတ်ရန် အချိန်ပိုရရှိစေသည်။ 

သို့သော် ထရမ့်၏ ကျဉ်းမြောင်းသော အချိန်ဇယားအတွင်း သံတမန် နည်းလမ်းဖြင့် အဖြေရှာရန် ကြိုးပမ်းမှုများသည် အစောပိုင်းတွင် ကြီးမားသောအခက်အခဲများကို ကြုံတွေ့နိုင်သည်။

ဗြိတိန်၊ ဂျာမနီနှင့် ပြင်သစ်နိုင်ငံတို့၏ နိုင်ငံခြားရေးဝန်ကြီးများသည် သောကြာနေ့ (ဇွန် ၂၀) တွင် ဂျီနီဗာသို့ သွားရောက်ကာ အီရန် ကိုယ်စားလှယ် များနှင့် ဆွေးနွေးမည်ဖြစ်ပြီး အီရန်သို့ ဝစ်ကော့ဖ်က နောက်ဆုံးအကြိမ် အဆိုပြုခဲ့သော သဘောတူညီချက်၏ အသေးစိတ် အချက်အလက်များကို အသိပေးထားသည်။ အဆိုပါသဘောတူညီချက်ကို အီရန်အစိုးရက အစ္စရေး၏ တိုက်ခိုက်မှုများ မစတင်မီ အဆုံးတွင် ငြင်းဆိုခဲ့သည်။ အမေရိကန် အရာရှိတစ်ဦးက ဂျီနီဗာတွင် သောကြာနေ့ (ဇွန် ၂၀) တွင် ကျင်းပမည့် အစည်းအဝေးအောင်မြင်မည်ဟု မျှော်လင့်ထားခြင်း မရှိကြောင်း ပြောကြားခဲ့သည်။ သို့သော် အိမ်ဖြူတော် အရာရှိတစ်ဦးက တိုးတက်မှု ရရှိရန် အခွင့်အလမ်းများကို ဖွင့်ထားသည်ဟု ဆိုသည်။

အိမ်ဖြူတော် တာဝန်ရှိသူတစ်ဦးက “အဆိုပါဆွေးနွေးပွဲသည် ဥရောပ ခေါင်းဆောင်များနှင့် အီရန်အကြားဖြစ်ပြီး ထရမ့်သည် ၎င်း၏ မဟာမိတ်များ၏ သံတမန်ရေးကြိုးပမ်းမှုများကို ထောက်ခံပါသည်။ ၎င်းတို့သည် အီရန်အား ထရမ့်၏သဘောတူညီချက်ကို လက်ခံလာစေရန် လုပ်ဆောင် နိုင်ခြေရှိပါသည်” ဟု ပြောကြားခဲ့သည်။

အစ္စရေး၏တိုက်ခိုက်မှုစတင်ပြီးနောက် တစ်ပတ်အတွင်း အီရန်မှ အမေရိကန်သို့ ပေးပို့ခဲ့သော တသမတ်တည်းသော သတင်းစကားမှာ ‘အစ္စရေး၏ လက်ရှိစစ်ဆင်ရေး မပြီးဆုံးခင်အချိန်ထိ အမေရိကန်နှင့် နောက်ထပ်ဆွေးနွေးမည်မဟုတ်” ဟူ၍ဖြစ်ကြောင်း အရင်းအမြစ်များက ပြောကြားခဲ့သည်။

အမေရိကန်သည် ယခုအချိန်ထိ အစ္စရေးအား ၎င်း၏တိုက်ခိုက်မှုများကို ရပ်တန့်ရန် ဖိအားမပေးသေးပေ။ ထရမ့်ကိုယ်တိုင်ကလည်း ဆက်လက် လုပ်ဆောင်ရန် အစ္စရေးဝန်ကြီးချုပ် နေတန်ယာဟုထံ အကြံပြုခဲ့သည်။ လက်ရှိအချိန်ထိ အီရန်သည် ၎င်း၏ယူရေနီယမ် ချဲ့ထွင်မှုဆိုင်ရာ ရပ်တည်ချက်မှ ရုန်းထွက်ရန် လိုလားကြောင်း မည်သည့်လက္ခဏာမျှ မပြသေးဘဲ အီရန်အစိုးရအတွက် အဆိုပါကိစ္စသည် မပြောင်းလဲနိုင်သော အနီရောင်မျဉ်း (red line) ဖြစ်နေဆဲဖြစ်သည်။

ဆုံးဖြတ်ချက်ကို ရွှေ့ဆိုင်းခြင်းဖြင့် ထရမ့်သည် တစ်ရက်အလိုက မဖြစ်နိုင် ဟုယူဆထားသော သံတမန်နည်းလမ်းဖြင့်ဖြေရှင်းမှု အပေါ် ပိုမိုအားကိုး လာဟန်ရှိသည်။ ယခုသီပတ်အတွင်း ကျင်းပခဲ့သော အစည်းအဝေး များတွင် ထရမ့်သည် အကြံပေးများအား အမေရိကန်၏ ဘန်ကာ-ဘတ်စတာ ဗုံးများ (bunker-buster bombs) ဖြင့် အီရန်၏ ဖော်ဒိုး မြေအောက် နျူကလီးယားစက်ရုံကို အပြည့်အဝဖျက်ဆီးနိုင်မှုနှင့် ထိုကဲ့သို့သော စစ်ဆင်ရေးတစ်ခု မည်မျှကြာမြင့်နိုင်သည်ကို မေးမြန်းခဲ့ကြောင်း သိရသည်။

သမ္မတထရမ့်သည် နှစ်ပေါင်းများစွာ ကြာရှည်မည့် ပဋိပက္ခ ဖြစ်ပွားစေ နိုင်သည့် လုပ်ရပ်များကို ရှောင်ရှားလိုကြောင်း အခါခါအလေးပေး ပြောဆို ခဲ့သည်။ သို့သော် ၎င်း၏ အနီးကပ်အကြံပေး စတီဗ် ဘန်နွန် အပါအဝင် များစွာသောပုဂ္ဂိုလ်တို့က အကယ်၍ စစ်ရေးလုပ်ငန်းစဉ်ကို ဆက်လုပ်ဆောင်ပါက ရှည်လျားသည့် ပဋိပက္ခ မလွဲမသွေဖြစ်လာမည်ဟု ပြောဆို အကြံပေးခဲ့ကြသည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

20 June 2025

လက်နက်ကိုင်အကြမ်းဖက်အဖွဲ့များသည် တိုင်းဒေသကြီးနှင့် ပြည်နယ်များရှိ မြို့၊ ရွာများအတွင်း တိုက်ပွဲများဖော်ဆောင်ခြင်း၊ လက်နက်ကြီးများဖြင့် အဝေးမှပစ်ခတ်ခြင်း၊ Drone ဖြင့် Drop Bomb များ ပစ်ချတိုက်ခိုက်ခြင်း၊ လက်လုပ်ဗုံး၊ လက်လုပ်မိုင်းများဖြင့် မိုင်းထောင်ဖောက်ခွဲတိုက်ခိုက်ခြင်းများအား လုပ်ဆောင်လျက်ရှိသည့်အပြင် အေးချမ်းစွာ နေထိုင်လျက်ရှိသည့် ဒေသခံပြည်သူများကိုပါ ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော အကြမ်းဖက်မှုများနှင့် ရာဇဝတ်မှုများအား ကျူးလွန်လုပ်ဆောင်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၁၈ ရက် ည ၉ နာရီ ၃၀ မိနစ်တွင် မကွေးတိုင်းဒေသကြီး၊ မင်းဘူး(စကု)မြို့နယ်ရှိ ညောင်ကိုင်းကျေးရွာနှင့် မဲချောင်ကျေးရွာများသို့ PDF အမည်ခံ အကြမ်းဖက်အဖွဲ့ အင်အား ၁၀ ဦးခန့်က ဆိုင်ကယ် ငါးစီးဖြင့် ရောက်ရှိလာပြီး ညောင်ကိုင်းကျေးရွာနေ ကိုဝင်းလှိုင်(စိစစ်ဆဲ)နှင့် ကိုကျော်အောင်(စိစစ်ဆဲ)တို့ နှစ်ဦး အားလည်းကောင်း၊ ည ၁၀ နာရီ ၃၀ မိနစ်တွင် မဲချောင်ကျေးရွာနေ ကိုသန်းဇော်(စိစစ်ဆဲ)အားလည်းကောင်း ဖမ်းဆီးခေါ်ဆောင်ကာ ဖြူကုန်းကျေးရွာသို့ ပြန်လည်ထွက်ခွာသွားကြောင်း သိရသည်။
အထက်ပါဖြစ်စဉ်မှ ဒေသခံပြည်သူများအား ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများ စသော လူသားချင်းမစာနာသည့် လူမဆန်သော ရာဇဝတ်မှုများအား ကျူးလွန်လုပ်ဆောင်လျက်ရှိသည့် အကြမ်းဖက်သမားများအား ဖော်ထုတ်ဖမ်းဆီး အရေးယူနိုင်ရေးနှင့် ဖမ်းဆီးခေါ်ဆောင်ခံရသည့် ပြည်သူများအား ပြန်လည်ကယ်တင်နိုင်ရေး လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA

20 June 2025

၂၀၂၅ ခုနှစ်၊ ဇွန် ၁၅ ရက် ည ၈ နာရီတွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် သတင်းအရ ရှမ်းပြည်နယ်၊ လားရှိုးမြို့၊ လားရှိုး-နမ္မတူသွားကားလမ်း၌ စိုးမင်းလတ်(ခ)လေးလုံး(၃၁)နှစ် မောင်းနှင်ပြီး ဝေဝေဦး(ခ)မီနား(၃၁)နှစ် လိုက်ပါလာသည့် ဆိုင်ကယ်နှင့် ထွန်းလှဦး(ခ)အိုက်ဦး(၄၀)နှစ် မောင်းနှင်လာသည့် ဆိုင်ကယ်တို့အား စစ်ဆေးရှာဖွေခဲ့ရာ စိတ်ကြွရူးသွပ်ဆေးပြား ၆၀,၀၀၀ ပြား (တစ်ပြားလျှင် ၅၀၀ ကျပ်နှုန်းဖြင့် ဒေသကာလ တန်ဖိုးငွေကျပ် သိန်း ၃၀၀)နှင့် ဘိန်းဖြူ အလေးချိန် ၀ ဒသမ ၉၉ ကီလို (တစ်ကီလိုလျှင် ငွေကျပ် ၁၅ သိန်းနှုန်းဖြင့် ဒေသကာလ တန်ဖိုးငွေကျပ် ၁၄၈ ဒသမ ၅ သိန်း)တို့အား ဖမ်းဆီးရမိပြီး ကွင်းဆက်စစ်ဆေးဖော်ထုတ်ချက်အရ ဇွန် ၁၅ ရက် ည ၉ နာရီတွင် ရှမ်းပြည်နယ်၊ လားရှိုးမြို့၊ ရပ်ကွက်(၁၂)၊ နယ်မြေ(၄)နေ ခင်စန်းမေ(ခ)ကရီးမား(၅၇)နှစ်၏နေအိမ်အား ဝင်ရောက်ရှာဖွေခဲ့ရာ နေအိမ်အတွင်းမှ စိတ်ကြွရူးသွပ်ဆေးပြား ၁,၀၀၀ ပြား (တစ်ပြားလျှင် ၅၀၀ ကျပ်နှုန်းဖြင့် ဒေသကာလ တန်ဖိုးငွေကျပ် ၅ သိန်း)နှင့် ဘိန်းဖြူ အလေးချိန် ၀ ဒသမ ၁၇ ကီလို(တစ်ကီလိုလျှင် ငွေကျပ် သိန်း ၁၅၀ နှုန်းဖြင့် ဒေသကာလ တန်ဖိုးငွေကျပ် ၂၅ ဒသမ ၅ သိန်း)တို့အား ဆက်လက်ဖမ်းဆီးရမိသဖြင့် စိုးမင်းလတ်(ခ) လေးလုံး(၃၁)နှစ်၊ ဝေဝေဦး(ခ)မီနား(၃၁)နှစ်၊ ထွန်းလှဦး(ခ)အိုက်ဦး(၄၀)နှစ်နှင့် ခင်စန်းမေ(ခ)ကရီးမား(၅၇)နှစ်တို့ လေးဦးအား မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အမှုဖွင့်အရေးယူထားကြောင်း သတင်းရရှိပါသည်။

MOHA

ဗီယန်နာ၊ ပဋိပက္ခ

အီရန်နိုင်ငံက နျူကလီးယားဗုံးကိုထုတ်လုပ်နိုင်ရေး အစီအစဉ်တကျလုပ်ဆောင်နေသည်ဟူသော မည်သည့်သက်သေမျှမရှိကြောင်း အပြည်ပြည်ဆိုင်ရာအဏုမြူစွမ်း အင်အေဂျင်စီအကြီးအကဲ ရာဖေးဂရော့စီကပြောသည်။

အီရန်နိုင်ငံအနေဖြင့် နျူကလီးယားဗုံး ကိုရရှိရန် အလွန်နီးစပ်နေပြီဖြစ်ကြောင်း ယုံကြည်သည်ဟု အမေရိကန်သမ္မတ ဒေါ်နယ်ထရမ့်ကပြောပြီးနောက်အပြည်ပြည် ဆိုင်ရာ အဏုမြူစွမ်းအင်အေဂျင်စီက ဇွန်လ ၁၉ ရက်တွင်ပြောခြင်းဖြစ်သည်။ 
 

အလားတူ အမေရိကန်နိုင်ငံ၏အမျိုး သားထောက်လှမ်းရေးဌာနအကြီးအကဲ ဖြစ်သည့် တူစီဂတ်ဘာ့ကလည်း အီရန် နိုင်ငံသည် နျူကလီးယားဗုံးများကိုဖန်တီး

နေခြင်းမရှိကြောင်း ပြောသည်။ 

Ref: RT

Photo- Al jazeera

MWD Daily Newspaper

သမ္မတ ဒေါ်နယ်ထရမ့်သည် အီရန်ကို တိုက်ရိုက်တိုက်ခိုက်ရန် အမေရိကန် ၏စီမံချက်များကို လျှို့ဝှက်စွာ အတည်ပြုခဲ့သော်လည်း ဆက်လက် ဆောင်ရွက်ရန် အမိန့်မပေးရသေးကြောင်း Wall Street Journal သတင်းတွင် ဖော်ပြထားသည်။ တီဟီရန်မှ အမေရိကန်၏ မည်သည့် စစ်ရေးဝင်ရောက်စွက်ဖက်မှုကိုမဆို ပြန်လည်ပြုပြင်မရနိုင်သော ပျက်စီး စေမှုဖြင့် တုံ့ပြန်မည်ဟု သတိပေးခဲ့သည်။

အမေရိကန်သမ္မတသည် အမေရိကန်နိုင်ငံအနေဖြင့် အစ္စရေး၏ တစ်ပတ် နီးပါးကြာမြင့်သည့် ဗုံးကြဲတိုက်ခိုက်မှုတွင် ပါဝင်လာနိုင်ခြေကို အသုံးပြု၍ တီဟီရန်အား ၎င်း၏သတ်မှတ်ချက်များကို ကန့်သတ်ချက်မရှိ လိုက်နာ စေရန် ဖိအားပေးမည်ဟု WSJ မှ ဗုဒ္ဓဟူးနေ့ (ဇွန် ၁၈) တွင် ရေးသား ဖော်ပြခဲ့သည်။

ထရမ့်သည် ဝါရင့်အကြံပေးများအား အီရန်ကိုတိုက်ခိုက်ရန် အစီအစဉ် များကို အတည်ပြုပေးခဲ့ကြောင်း အင်္ဂါနေ့ (ဇွန် ၁၇) ညနှောင်းပိုင်းတွင် ပြောကြားခဲ့သော်လည်း တီဟီရန်မှ ၎င်း၏နျူကလီးယားချဲ့ထွင်မှု အစီ အစဉ်ကို လုံးဝရပ်ဆိုင်းရန် သဘောတူမည်/မတူမည်ကို ရှင်းလင်းစွာ သိရှိပြီးမှသာ နောက်ဆုံးအမိန့်ပေးရန် စောင့်ဆိုင်းနေကြောင်း ဆွေးနွေးမှု များနှင့်ရင်းနှီးသော အရင်းအမြစ်များကို ကိုးကား၍ သတင်းဌာနမှ ရေးသားဖော်ပြခဲ့သည်။

အမေရိကန်သမ္မတသည် ၎င်း၏အကြံပေးများအား အမေရိကန်၏ Massive Ordnance Penetrator (MOP) ဗုံးများဖြင့် တောင်အတွင်း နက်ရှိုင်းစွာတည်ရှိသော အီရန်၏ Fordow နျူကလီးယားစက်ရုံကို ထိုးဖောက်ဖျက်ဆီးနိုင်မှု ရှိ/မရှိ မေးမြန်းခဲ့ကြောင်း Axios သတင်းဌာနမှ မျှဝေခဲ့သည်။

အစ္စရေးတွင် ပေါင် ၃၀,၀၀၀ (၁၃,၆၀၀ ကီလိုဂရမ်) လေးသော ဘန်ကာ ဖျက်ဗုံးများနှင့် ၎င်းတို့ကိုသယ်ဆောင်နိုင်သည့် လေယာဉ်များ မရှိသော် လည်း Fordow စက်ရုံပျက်စီးမှုမရှိသရွေ့ ပဋိပက္ခကိုရပ်စဲမည်မဟုတ်ဟု အစ္စရေးအရာရှိများကပြောကြားခဲ့သည်။

MOP ဗုံးများကိုသယ်ဆောင်နိုင်သည့် တစ်ခုတည်းသော ဗုံးကြဲ လေယာဉ် များဖြစ်သည့် အမေရိကန် B-2 Spirit လေယာဉ် ၆ စီးကို ယူကေ-အမေရိကန်ပူးပေါင်းအခြေစိုက် Diego Garcia စခန်းတွင် အီရန်အား တိုက်ခိုက်နိုင်သည့် အကွာအဝေးအတွင်း တပ်စွဲထားကြောင်း Financial Times ကဖော်ပြခဲ့သည်။

ထိုဗုံးကြဲလေယာဉ်များ၏ တိုက်ခိုက်မှုများသည် ယူကေအား ပဋိပက္ခတွင်းသို့ ဆွဲသွင်းနိုင်သည်ဟု ဒေါင်းနင်းလမ်း (ယူကေအစိုးရ) က စိုးရိမ် နေကြောင်း သတင်းဌာနမှဖော်ပြခဲ့သည်။

အမေရိကန်သည် လတ်တလောရက်များအတွင်း အရှေ့အလယ်ပိုင်း ဒေသတွင် ၎င်း၏စစ်အင်အားများကို ပိုမိုစုစည်းလာခဲ့ပြီး လေယာဉ်ဆီဖြည့်ရန် လေယာဉ်ဆီတင်သင်္ဘောများ၊ လေကြောင်းကာကွယ်ရေး စွမ်းရည်ရှိသော စစ်သင်္ဘောများနှင့် တိုက်လေယာဉ်တင် သင်္ဘောအုပ်စု နောက်ထပ်တစ်ခုကို ရွှေ့ပြောင်းခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ဝါရှင်တန်သည် အီရန်ကို တိုက်ခိုက်ရန် ဆုံးဖြတ်ပါက ကြီးမားသော အမှားတစ်ခုကို ကျူးလွန်မိမည်ဖြစ်ကြောင်း ကရင်မလင် ပြောရေးဆိုခွင့်ရှိသူ ဒီမီထရီ ပက်စ်ကော့ဗ်က RT သို့ ပြောကြားခဲ့သည်။ အမေရိကန် သည် အစ္စလာမ်မစ်သမ္မတနိုင်ငံအီရန်နှင့် အစ္စရေးနိုင်ငံတို့အကြား ဖြစ်ပွားနေသော ပဋိပက္ခတွင် တိုက်ရိုက်ပါဝင်ခြင်းသည် ဒေသတွင်း အခြေအနေကို ပိုမိုဆိုးရွားစေမည်ဟု ၎င်းက သတိပေးခဲ့သည်။

အမေရိကန်သမ္မတ ဒေါ်နယ်ထရမ့်သည် မကြာသေးမီကာလများအတွင်း တီဟီရန်ကို တိုက်ရိုက်ခြိမ်းခြောက်မှုများ ပြုလုပ်ခဲ့ပြီး ၎င်း၏ နျူကလီးယား အစီအစဉ်အား အပြည့်အဝစွန့်လွှတ်ရန် တောင်းဆိုခဲ့သည်။ Wall Street Journal က ဗုဒ္ဓဟူးနေ့ (ဇွန် ၁၈) တွင် အီရန်ကို တိုက်ခိုက်ရန် အစီအစဉ် တစ်ခုကို လျှို့ဝှက်စွာ အတည်ပြုပြီးဖြစ်ကြောင်း ဖော်ပြခဲ့သော်လည်း သမ္မတ က ထိုဖော်ပြမှုသည် မမှန်ကန်ဟု ပြောကြားခဲ့သည်။ အိမ်ဖြူတော် က ထရမ့်သည် လာမည့် သီတင်း ၂ ပတ်အတွင်း နောက်ဆုံး ဆုံးဖြတ်ချက် ကို ချမှတ်မည်ဟု ဖြည့်စွက်ပြောကြားခဲ့သည်။

“မော်စကိုက ဒါဟာ မှားယွင်းသည့် လှုပ်ရှားမှု ဟု ယူဆပါသည်” ဟု ပက်စ်ကော့ဗ်က ရုရှား၏ တုံ့ပြန်မှုနှင့်ပတ်သက်၍ မေးမြန်းခံရသည့်အခါ ပြောကြားခဲ့သည်။ “ဒါဟာ နောက်ထပ် တင်းမာမှုတွေကို ဦးတည်စေမည့် အဓိက တင်းမာမှုတစ်ခုဖြစ်ပြီး ဒေသတွင်း အခြေအနေကို ပိုမို ရှုပ်ထွေး စေမှာပါ၊ ဒီလိုပဋိပက္ခတွေဟာ တစ်ဒေသလုံးကို မီးစွဲလောင်စေနိုင်ပါသည်” ဟု ပက်စ်ကော့ဗ်က သတိပေးခဲ့ပြီး ရုရှားသည် ပဋိပက္ခကို ဖြေရှင်းရာ တွင် ကူညီရန် အဆင်သင့်ရှိကြောင်းလည်း ၎င်းက ဖြည့်စွက် ပြောကြား ခဲ့သည်။

အမေရိကန် သို့မဟုတ် အစ္စရေး၏ လက်ချက်ဖြင့် အီရန်တွင် အစိုးရ အပြောင်းအလဲဖြစ်နိုင်ခြေနှင့်ပတ်သက်၍ မေးမြန်းခံရသည့်အခါ ပက်စ်ကော့ဗ် က ထိုသို့သော ဆွေးနွေးမှုများသည် လက်မခံနိုင်ဟု ရှင်းလင်းစွာ ဖော်ပြ ခဲ့သည်။ “ယခုကဲ့သို့ စကားဝိုင်းတွေရှိခြင်းကို လက်မခံနိုင်ဟု မိမိတို့ ယူဆပါသည်၊ ယခုလိုလုပ်ရပ်တွေလုပ်ဖို့ဆိုတာက ပိုပြီးတော့ လက်မခံ နိုင်ပါ” ဟု ၎င်းက ပြောကြားခဲ့သည်။

ပက်စ်ကော့ဗ်၏ပြောကြားချက်အရ ရုရှားသမ္မတသည် အခြေအနေ တစ်ရပ်လုံးကို “ပြည့်ပြည့်စုံစုံ သိရှိနားလည်ထားပြီး” ငြိမ်းချမ်းရေးဖော်ဆောင်သူအဖြစ် လုပ်ဆောင်နိုင်စွမ်းရှိပြီး ပဋိပက္ခစတင်ပြီးနောက် အစ္စရေးနှင့် အီရန်နှစ်နိုင်ငံစလုံး၏ ခေါင်းဆောင်များနှင့် စကားပြောဆိုခဲ့သည့် ကမ္ဘာ့ခေါင်းဆောင်အနည်းငယ်ထဲမှ တစ်ဦးဖြစ်ကြောင်း ၎င်းက ထောက်ပြခဲ့သည်။ သို့ရာတွင် အစ္စရေးနှင့် အီရန်နှစ်နိုင်ငံစလုံးသည် တိုက်ခိုက်မှုများကို ဆက်လက်လုပ်ဆောင်ရန် စိတ်ပိုင်းဖြတ်ထားသည့်အတွက် လက်ရှိတွင် ဆွေးနွေးမှုများအတွက် အခွင့်အလမ်း နည်းပါး နေသေးကြောင်း ပက်စ်ကော့ဗ်က ဝန်ခံခဲ့သည်။

ဗုဒ္ဓဟူးနေ့ (ဇွန် ၁၈) ညပိုင်းက သတင်းထောက်များနှင့်ပြုလုပ်ခဲ့သော အမေးအဖြေအစီအစဉ်တွင် ပူတင်ကိုယ်တိုင်က မော်စကိုသည် အမေရိကန်၊ အစ္စရေးနှင့် အီရန်အပါအဝင် ပါဝင်ပတ်သက်သူအားလုံးထံ သဘောထား ပြေလျော့မှုဆိုင်ရာ မူဘောင်များစွာကို အဆိုပြုခဲ့ကြောင်း ပြောကြားခဲ့သည်။ အီရန်၏ ငြိမ်းချမ်းစွာ နျူကလီးယားနည်းပညာရယူပိုင်ခွင့်နှင့် အစ္စရေး၏ လုံခြုံရေးအာမခံရှိမှုနှစ်ခုလုံးကို ကာကွယ်ပေးမည့် အပြန်အလှန် လုံခြုံရေးအာမခံချက်များပါဝင်သည့် ဖြေရှင်းချက်တစ်ရပ်ကိုလည်း ၎င်းက အဆိုပြုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂