အမေရိကန်က အီရန်၏နျူကလီးယား အဆောက်အအုံသုံးခုကို တိုက်ခိုက်လိုက် ပြီးနောက် အီရန်ဘက်ကလည်း လက်တုံ့ပြန်မည်ဟု ထုတ်ပြန်ထားကြောင်း သိရသည်။

အမေရိကန်တပ်မတော်သည် တာဝေးသွား B2 အမျိုးအစား ကိုယ်ပျောက်ဗုံးကြဲလေယာဉ်များ အသုံးပြု၍  အီရန်နိုင်ငံ၏ အထင်ကရနျူကလီးယား အဆောက်အအုံများဖြစ်သော ဖော်ဒိုး၊ နာတန့်နှင့် အက်စဖာဟန်နေရာတို့ကို တိုက်ခိုက်ခဲ့ခြင်းဖြစ်ကြောင်း အမေရိကန်သမ္မတဒေါ်နယ်ထရမ့်က ဇွန်လ ၂၁ ရက်တွင်ပြောသည်။

ထို့နောက် ထရမ့်က အီရန်နိုင်ငံအနေဖြင့် ယခုအချိန်တွင် ငြိမ်းချမ်းရေးကိုလက်ခံရတော့မည်ဖြစ်ကြောင်း၊ လက်မခံပါက  ယခုတိုက်ခိုက်မှုထက်  ပိုမိုဆိုးဝါးသည့် တိုက်ခိုက်မှုများနှင့် ရင်ဆိုင်ရစေမည်ဖြစ်ကြောင်း နိုင်ငံတော် မိန့်ခွန်းတွင် ပြောထားသည်။

တစ်ချိန်တည်းမှာပင် အမေရိကန်၏ တိုက်ခိုက်မှုသည် ကုလသမဂ္ဂပဋိညာဉ်စာချုပ်ကို ပြောင်ပြောင်တင်းတင်း ချိုးဖောက်ခြင်းဖြစ်ကြောင်း၊ ယင်းသို့တိုက်ခိုက်ခြင်း ကြောင့် အမေရိကန်အနေဖြင့် အဆုံးမဲ့ အကျိုးဆက်များကို ခံစားရစေမည်ဖြစ် ကြောင်း အီရန်အစိုးရက ဇွန်လ ၂၂ ရက် တွင်ပြောသည်။

ထို့ပြင် အမေရိကန်ဘက်က ယခုကဲ့သို့ တိုက်ခိုက်လာမည်ကို ကြိုတင်မျှော်တွေးထားကြောင်း၊ ယင်းအတွက်ကြောင့် အဆိုပါနေရာများကို ကယ်ဆယ်ရေး လုပ်ငန်းများ လုပ်ဆောင်ထားပြီးဖြစ်ကြောင်း၊ သန့်စင်ပြီး ယူရေနီယံများကို ဘေးကင်းရာနေရာသို့ ရွှေ့ပြောင်းပေးထားပြီးဖြစ်ကြောင်း၊ ပြန်မရနိုင်သော မည်သည့်ဆုံးရှုံးမှုမျှ မရှိကြောင်းနှင့် ယခုတိုက်ခိုက်မှုနှင့်ပတ်သက်၍ အံ့ဩမှုစိုးစဉ်းမျှမဖြစ်ကြောင်း အီရန်လွှတ်တော်ဥက္ကဋ္ဌ၏ အကြံပေး မက်ဒီမိုဟာ မက်ဒီက ပြောထားသည်ဟု သိရသည်။

MWD Web Portal

ရုရှားနိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ Maria Zakharova က အတုအယောင် ဖန်တီးမှု (deepfake) နည်းပညာ တိုးတက်လာမှုကြောင့် ကမ္ဘာသည် “သတင်း အချက်အလက် လှည့်စားမှု” (informational barbarism) ဘက်သို့ ဦးတည်နေကြောင်း သတိပေးခဲ့ပြီး သတင်းဌာနများအနေဖြင့် အချက်အလက်စစ်ဆေးခြင်း (fact-checking) နှင့် ဗီဒီယိုအတုအစစ် စိစစ်ခြင်းတို့ အတွက် ရင်းနှီးမြှုပ်နှံမှုများတိုးမြှင့်ရန် တိုက်တွန်းခဲ့သည်။

လွန်ခဲ့သည့်သီတင်းပတ်က ရုရှားနိုင်ငံမှ အိမ်ရှင်အဖြစ် လက်ခံ ကျင်းပ ခဲ့သော အာရှ-ပစိဖိတ် သတင်းဌာနများအဖွဲ့ (OANA) ၏ ၁၉ ကြိမ်မြောက်အထွေထွေညီလာခံတွင် ကျင်းပသည့် ဆွေးနွေးပွဲတစ်ခုအတွင်း Zakharova က deepfake များကို ကမ္ဘာလုံးဆိုင်ရာ စိုးရိမ်ဖွယ်ရာအဖြစ် သတ်မှတ်ခဲ့သည်။ သူမက မကောင်းသောရည်ရွယ်ချက်ရှိသူများသည် ၎င်းတို့၏ ပစ်မှတ်များကို “မုသားအဆိပ်ဆေးလုံးများ” (Poison Pills of Lies) ဖြင့် တိုက်ခိုက်ရန် အခွင့်အလမ်းတိုင်းကို အသုံးချနေပြီး ၎င်းတို့၏ ရည်မှန်းချက်များအောင်မြင်ရန် AI အခြေခံသော အတုအယောင်အကြောင်းအရာများ (Generative Content) ကို အသုံးပြုလာကြောင်း ပြောကြားခဲ့သည်။

“လွန်ခဲ့သော နှစ်အနည်းငယ်ကအထိ deepfake ဆိုသည်မှာ လူများကို ရှုပ်ထွေးစေနိုင်သည့် အသစ်အဆန်းတစ်ခုသာဖြစ်သော်လည်း ယခုအခါ တွင် deepfake ဗီဒီယိုများ၏ အရည်အသွေးနှင့် အရေအတွက် တိုးလာမှုက လူသားမျိုးနွယ်သည် ထိုကဲ့သို့သော တိုက်ခိုက်မှုများကို ကိုင်တွယ် ဖြေရှင်းနိုင်ရန် အဆင်သင့်ဖြစ်ပြီလားဆိုသည့် မေးခွန်းထုတ်စရာ ဖြစ်လာပါသည်” ဟု Zakharova က ဆိုသည်။ “မိမိတွင် တိကျသော အဖြေ မရှိပါ” ဟု သူမက ဖြည့်စွက်ပြောကြားခဲ့သည်။

ရုရှားနိုင်ငံခြားရေးဝန်ကြီး Sergey Lavrov နှင့် Zakharova ကိုယ်တိုင် အပါအဝင် အတုအယောင်အကြောင်းအရာများကို ဖော်ထုတ် ရှင်းလင်းရန် ကြိုးပမ်းလျက်ရှိသော်လည်း ထိုအရာများ တိုးပွားလာသည်နှင့်အမျှ၎င်းတို့ကို တိုက်ဖျက်ရန် လိုအပ်သည့်အချိန်လည်း ပိုမိုများပြားလာကြောင်း သူမက ဆိုသည်။ အဆိုပါပြဿနာသည် လှည့်ဖြားသူများမှ deepfake များကို မြင့်တက်လာသည့်နှုန်းအတိုင်း အမျိုးမျိုးသောရှုထောင့်များရှိပြီး စနစ်တကျ နည်းလမ်းပေါင်းစုံဖြင့် အပြည်ပြည်ဆိုင်ရာ တုံ့ပြန်မှုကို လိုအပ်နေကြောင်း သူမက ဖြည့်စွက်ပြောကြားခဲ့သည်။

“သတင်းဌာနများနှင့် အဓိကမီဒီယာ အဖွဲ့အစည်းများ အနေဖြင့်အချက်အလက် စစ်ဆေးခြင်းအတွက် အထူးတပ်ဖွဲ့များထားရှိရန်လိုအပ်ပြီး ယုံကြည်စိတ်ချရခြင်းမရှိသော အချက်အလက်များကို ယုံကြည် စိတ်ချရသည်ဟု ပြသရန် အသုံးပြုသည့် နည်းပညာဆိုင်ရာ လှည့်စားမှုများကို ဖော်ထုတ်နိုင်ရန် လေ့ကျင့်ထားရမည်မှာ အလိုလိုသိသာပါသည်” ဟု သူမက ပြောကြားခဲ့သည်။

မီဒီယာစနစ်အတွင်း အကြမ်းဖျဉ်း သတင်းအချက်အလက်များကို အများဆုံးကိုင်တွယ်သည့် သတင်းဌာနများသည် သဘာဝအားဖြင့်အတုအယောင်ပုံရိပ်များကို တိုက်ဖျက်ရာတွင် ရှေ့တန်းမှ ပါဝင်နေကြောင်း Zakharova က ထောက်ပြခဲ့သည်။

နိုင်ငံခြားရေးဝန်ကြီးဌာနသည် ၂၀၁၇ ခုနှစ်တွင် “သတင်းတုများ” ကို တိုက်ဖျက်ရန် အထူးလှုပ်ရှားမှုကို စတင်ခဲ့ပြီးနောက် ရုရှား၏ အမျိုးသား အကျိုးစီးပွားကို ပစ်မှတ်ထားသည့် သတင်းအချက်အလက် တိုက်ခိုက်မှု များအဖြစ် သတ်မှတ်ထားသည့် အကြောင်းအရာများအတွက် ပုံမှန်ငြင်းဆိုချက် ၅,၀၀၀ ကျော်နှင့် အသေးစိတ်ဖော်ထုတ်ချက် ၃၅၀ ကျော်ကို ထုတ်ပြန်ခဲ့ကြောင်း အရာရှိက ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

အီရန်၏ Fordow နျူကလီးယားစင်တာသည် အမေရိကန်တို့၏ တိုက်ခိုက်မှုတွင် ကြီးမားသော ပျက်စီးမှုမရှိကြောင်း Qom ပြည်နယ် ကိုယ်စားလှယ် Mohammad Manan Raisi ကို ကိုးကားပြီး Fars သတင်းဌာနက တနင်္ဂနွေနေ့ (ဇွန် ၂၂) တွင် ဖော်ပြခဲ့သည်။

အမေရိကန်သမ္မတ Donald Trump က Fordow ၊ Natanz နှင့် Esfahan နျူကလီးယားစင်တာများသည် အမေရိကန်တို့၏ တိုက်ခိုက်မှုဖြင့် လုံးဝ ပျက်စီးခဲ့ကြောင်း ထုတ်ဖော်ပြောဆိုခဲ့သည်။

သို့သော် Raisi က “လိမ်ညာသော အမေရိကန်သမ္မတ၏ ပြောဆိုချက် နှင့်ဆန့်ကျင်စွာ Fordow နျူကလီးယားစက်ရုံသည် ကြီးမားစွာ ပျက်စီးခြင်း မရှိဘဲ၊ အဓိကပျက်စီးမှုများမှာ မြေပြင်ပေါ်တွင်သာဖြစ်ပြီး ပြန်လည် ပြုပြင်နိုင်သည်” ဟု ပြောကြားခဲ့သည်။

ထို့အပြင် ၎င်းက အမေရိကန်ဗုံးကြဲမှု၏ သက်ရောက်မှုမှာ “မြေမျက်နှာပြင်ပေါ်တွင်သာ” ဖြစ်ပြီး သေဆုံးသူမရှိဘဲ ရေဒီယိုသတ္တိကြွမှုလည်း ယိုစိမ့်မှု မရှိကြောင်း ဖြည့်စွက်ပြောကြားခဲ့သည်။

ထိုနေ့တွင်ပင် အစိုးရပိုင် IRIB ၏ ဒုတိယညွှန်ကြားရေးမှူး Hasan Abedini က အမေရိကန်တိုက်ခိုက်မှုမတိုင်မီကပင် Fordow ၊ Natanz နှင့် Esfahan နျူကလီးယားစက်ရုံများမှ လူများကို ရွှေ့ပြောင်းထားပြီးဖြစ်ကြောင်း ပြောကြားခဲ့သည်။

“ထပ်တိုးသန့်စင်ထားသော အရန်ယူရေနီယမ်များကို နျူကလီးယား စင်တာများမှ ကြိုတင်ရွှေ့ပြောင်းထားပြီး ပစ်မှတ်ထားခံရပါက ရေဒီယို သတ္တိကြွညစ်ညမ်းမှုဖြစ်စေနိုင်သော ပစ္စည်းများ မကျန်ရှိတော့ပါ” ဟု ၎င်းက ဆိုသည်။

အီရန် ကျန်းမာရေးဝန်ကြီးဌာန ဒုတိယဝန်ကြီး Alireza Raisi ကလည်း အလားတူပြောကြားခဲ့ပြီး ဒေသခံများအတွက် ရေဒီယိုသတ္တိကြွ ညစ်ညမ်းမှု အန္တရာယ် မရှိကြောင်း Tasnim မီဒီယာ၏ ကိုးကားဖော်ပြချက်အရ သိရှိ ရသည်။

ထိုနေ့အစောပိုင်းတွင် Reuters သတင်းဌာနက အမည်မဖော်လိုသော အီရန်အရာရှိအဆင့်မြင့်တစ်ဦး၏ ပြောကြားချက်ကို ကိုးကားကာ ထပ်တိုး သန့်စင်ထားသော ယူရေနီယမ်အများစုကို လျှို့ဝှက်နေရာတစ်ခုတွင် သိမ်းဆည်းထားပြီးဖြစ်ကြောင်း ဖော်ပြခဲ့သည်။

အမေရိကန်တို့၏ ဗုံးကြဲတိုက်ခိုက်မှုနှင့်ပတ်သက်၍ အီရန်၏ အမျိုးသား နျူကလီးယား ဘေးကင်းရေးစနစ်ဗဟိုဌာနက ပစ်မှတ်ထားခံရသော နေရာများတွင် အရေးပေါ်စစ်ဆေးမှုများ ပြုလုပ်ခဲ့ရာ ရေဒီယို သတ္တိကြွ ညစ်ညမ်းမှု သို့မဟုတ် ယိုစိမ့်မှုလက္ခဏာများ မတွေ့ရှိရကြောင်း ပြောကြားခဲ့သည်။

အပြည်ပြည်ဆိုင်ရာအဏုမြူစွမ်းအင်အေဂျင်စီ (IAEA) ကလည်း Fordow ၊ Natanz နှင့် Esfahan တို့တွင် ရေဒီယိုသတ္တိကြွမှုအဆင့်များ တိုးမြင့်လာခြင်း မရှိကြောင်း အတည်ပြုခဲ့သည်။ 

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ရုရှားနိုင်ငံသည် အီရန်နျူကလီးယားစက်ရုံများကို အမေရိကန်လေတပ်မှ ဗုံးကြဲတိုက်ခိုက်မှုအား အပြင်းအထန် ရှုတ်ချခဲ့ပြီး တာဝန်မဲ့မှု၊ ရန်စ တိုက်ခိုက်မှုနှင့် အန္တရာယ်များသော လုပ်ရပ်ဖြစ်ကြောင်း ပြောကြားကာ အရှေ့အလယ်ပိုင်းဒေသအား နျူကလီးယားအကျိုးဆက်များဖြင့် ကြီးမားသော စစ်ပွဲဆီသို့ တွန်းပို့နိုင်သည်ဟု သတိပေးခဲ့သည်။

တနင်္ဂနွေနေ့ (ဇွန် ၂၂) က ကုလသမဂ္ဂ လုံခြုံရေးကောင်စီ၏ အရေးပေါ် အစည်းအဝေးတွင် မိန့်ခွန်းပြောကြားစဉ် ရုရှားသံအမတ်ကြီး Vasily Nebenzia က ဝါရှင်တန်အား ကုလသမဂ္ဂ ပဋိညာဉ်၊ အပြည်ပြည်ဆိုင်ရာ ဥပဒေနှင့် နျူကလီးယား မပြန့်ပွားရေးစာချုပ် (NPT) တို့ကို ချိုးဖောက် သည်ဟု စွပ်စွဲခဲ့သည်။

“အမေရိကန်သည် Pandora's box (အဆိုးများစွာ ထွက်ပေါ်စေမည့် အရာ) ကို ဖွင့်လှစ်လိုက်ပြီဖြစ်ကာ မည်သည့်အကျိုးဆက်များ ဆက်ဖြစ် လာမည်ကို မည်သူမျှ မသိနိုင်တော့ပါ” ဟု Nebenzia က ပြောကြားခဲ့ပြီး IAEA ကြီးကြပ်ထားသော နျူကလီးယားစက်ရုံများကို ပစ်မှတ်ထားသည့် အတွက် ဝါရှင်တန်သည် “နိုင်ငံတကာအသိုင်းအဝိုင်း၏ သဘောထားကို လုံးဝမထီမဲ့မြင်ပြုခြင်းကို တစ်ဖန် ထပ်မံပြသလိုက်သည်” ဟု ဖြည့်စွက် ပြောဆိုခဲ့သည်။

Nebenzia သည် ၂၀၀၃ ခုနှစ် အီရတ်စစ်ပွဲမတိုင်မီ အခြေအနေများနှင့် နှိုင်းယှဉ်ကာ ထိုအချိန်က အမေရိကန်နိုင်ငံခြားရေးဝန်ကြီး Colin Powell က“အခြားလွတ်လပ်သော နိုင်ငံတစ်နိုင်ငံအား ကျူးကျော်ရန် အကြောင်း ပြချက်” အနေဖြင့် မှားယွင်းသော အထောက်အထားများကို တင်ပြခဲ့ပြီး “နှစ်ပေါင်းများစွာ ဒေသခံပြည်သူများအား ကမောက်ကမဖြစ်စေခဲ့သော လက်နက်ကြီးများ မတွေ့ရှိခဲ့သည့် အဖြစ်အပျက်” ကို ထောက်ပြခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

22 June 2025

လက်နက်ကိုင်အစွန်းရောက် အကြမ်းဖက်သမားများအနေဖြင့် တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားများ လွှမ်းမိုးစေရန်လည်းကောင်း၊ ၎င်းတို့နှင့်အမြင်အယူအဆမတူသူ အပြစ်မဲ့ အရပ်သားပြည်သူများအား “သူလျှို၊ ဒလန်၊ သတင်းပေး” ဟုစွပ်စွဲ၍လည်းကောင်း၊ “ငါနှင့်မတူ၊ ငါ့ရန်သူ” ဟူသည့် တစ်ဖက်သတ် အစွန်းရောက် ဂိုဏ်းဂဏစွဲအပေါ် အခြေခံကာ ဓား၊ သေနတ်များ အသုံးပြု၍ ရက်စက်စွာ လုပ်ကြံ တိုက်ခိုက်၊ သတ်ဖြတ်ခြင်းများ ပြုလုပ်လျက်ရှိသည်။

ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၂၁ ရက် မွန်းလွဲ ၂ နာရီ ၃၀ မိနစ်တွင် ပဲခူးတိုင်းဒေသကြီး၊ ကြို့ပင်ကောက်မြို့နယ်ရှိ အလယ်ကုန်းတိုက်နယ်ဆေးရုံသို့ ဓားဒဏ်ရာများဖြင့် သေဆုံးနေသည့် အမျိုးသားတစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက ဖြစ်စဉ်အား စိစစ်ခဲ့ရာ ဇွန် ၂၀ ရက် ညနေ ၄ နာရီတွင် ပဲခူးတိုင်းဒေသကြီး၊ ကြို့ပင်ကောက်မြို့နယ်၊ မှန်ပင်ထူးကျေးရွာနေ ဦးမိုးဇင်(၅၈)နှစ်သည် ၎င်း၏နေအိမ်၌ ရှိနေစဉ် KNU အဖွဲ့မှ အကြမ်းဖက်မှုကို လိုလားသူများနှင့် PDF အမည်ခံ အကြမ်းဖက်သမား ခုနစ်ဦးခန့်(စိစစ်ဆဲ)က ဆိုင်ကယ် သုံးစီးဖြင့် ရောက်ရှိလာပြီး “ဒလန်” ဟုစွပ်စွဲပြောဆို၍ နေအိမ်၏မြောက်ဘက်ရှိ ခြံဝင်းအတွင်းသို့ ဖမ်းဆီးခေါ်ဆောင်ခဲ့ပြီး ဓားများဖြင့် ထိုးခုတ်သတ်ဖြတ်သွားခဲ့သဖြင့် ဦးမိုးဇင်တွင် ဓားဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။

ထိုသို့ အပြစ်မဲ့ အရပ်သားပြည်သူများအား “ငါနှင့်မတူ၊ ငါ့ရန်သူ” ဟူသည့် တစ်ဖက်သတ် အစွန်းရောက် ဂိုဏ်းဂဏစွဲအပေါ် အခြေခံကာ လုပ်ကြံသတ်ဖြတ်မှု ကျူးလွန်ခဲ့သူများအား ဖော်ထုတ် ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက် ရှိကြောင်း သတင်းရရှိပါသည်။

MOHA

22 June 2025

လက်နက်ကိုင်အစွန်းရောက် အကြမ်းဖက်သမားများအနေဖြင့် တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားများ လွှမ်းမိုးစေရန်လည်းကောင်း၊ ၎င်းတို့နှင့်အမြင်အယူအဆမတူသူ အပြစ်မဲ့ အရပ်သားပြည်သူများအား “သူလျှို၊ ဒလန်၊ သတင်းပေး” ဟုစွပ်စွဲ၍လည်းကောင်း၊ “ငါနှင့်မတူ၊ ငါ့ရန်သူ” ဟူသည့် တစ်ဖက်သတ် အစွန်းရောက် ဂိုဏ်းဂဏစွဲအပေါ် အခြေခံကာ ဓား၊ သေနတ်များ အသုံးပြု၍ ရက်စက်စွာ လုပ်ကြံတိုက်ခိုက်၊ သတ်ဖြတ်ခြင်းများ ပြုလုပ်လျက်ရှိသည်။

ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇွန် ၂၀ ရက် ည ၈ နာရီ ၃၀ မိနစ်တွင် ပဲခူးတိုင်းဒေသကြီး၊ ဇီးကုန်းမြို့နယ်၊ ရွှေဖလားကျေးရွာ၌ သေနတ်၊ ဓားများဖြင့် ပစ်ခတ်ထိုးခုတ်ခံရ၍ အမျိုးသားတစ်ဦး သေဆုံးသွားကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါ ကျေးရွာနေ ဦးဘသန်း(ခ)ကုလား(၅၀)နှစ်သည် ၎င်း၏နေအိမ်၌ ရှိနေစဉ် PDF အမည်ခံ အကြမ်းဖက် အဖွဲ့ အင်အား(စိစစ်ဆဲ)ရောက်ရှိလာပြီး “ဒလန်” ဟုစွပ်စွဲပြောဆိုကာ သေနတ်၊ ဓားများဖြင့် ပစ်ခတ်ထိုးခုတ်၍ သတ်ဖြတ်သွားခဲ့သဖြင့် ဦးဘသန်း(ခ)ကုလားတွင် ကျည်ထိမှန်ဒဏ်ရာ၊ ဓားဒဏ်ရာများ ရရှိကာ သေဆုံးသွားခဲ့ခြင်းဖြစ်ကြောင်း သိရသည်။ထိုသို့ အပြစ်မဲ့ အရပ်သားပြည်သူများအား “ငါနှင့်မတူ၊ ငါ့ရန်သူ” ဟူသည့် တစ်ဖက်သတ် အစွန်းရောက် ဂိုဏ်းဂဏစွဲအပေါ် အခြေခံကာ လုပ်ကြံသတ်ဖြတ်မှု ကျူးလွန်ခဲ့သူများအား ဖော်ထုတ် ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက် ရှိကြောင်း သတင်းရရှိပါသည်။

အစ္စရေးနှင့် အမေရိကန်တို့၏ အီရန်အပေါ် ကျူးကျော်စစ်ဆင်မှုများသည် အရှေ့အလယ်ပိုင်းဒေသအတွက် သာမက ကမ္ဘာတစ်ဝှမ်းလုံးအတွက်ပါ ကြီးမားသော အကျိုးဆက်များ ရှိလာနိုင်ကြောင်း အီရန်နိုင်ငံခြားရေး ဝန်ကြီး Abbas Araghchi က သတိပေးပြောကြားခဲ့သည်။ 

“အစ္စရေးနှင့် အမေရိကန်တို့၏ ကျူးကျော်မှုများသည် အပြည်ပြည်ဆိုင်ရာ ဥပဒေကို ခြိမ်းခြောက်နေပြီး ဒေသတွင်းနိုင်ငံများကိုသာမကတစ်ကမ္ဘာလုံးအတွက်ပါ ခြိမ်းခြောက်မှုဖြစ်စေနိုင်သည်” ဟု အီရန် ထိပ်တန်း သံတမန်က ရုရှားသမ္မတ ဗလာဒီမာပူတင်နှင့် တွေ့ဆုံရန် မော်စကိုသို့ ရောက်ရှိစဉ် မီဒီယာများအား ပြောကြားခဲ့ပြီး အီရန်နိုင်ငံအနေဖြင့် မိမိ၏ အချုပ်အခြာအာဏာနှင့် နိုင်ငံသားများအား ကာကွယ်ရန်အတွက်တရားဝင်ခုခံကာကွယ်မှုများ ဆက်လက်ပြုလုပ်သွားမည်ဖြစ်ကြောင်း ဖြည့်စွက်ပြောကြားခဲ့သည်။

ကိုးကား -TASS

ဘာသာပြန်ဆိုသူ-ဒေါ်မေသူခိုင်၊ လက်ထောက်ညွှန်ကြားရေးမှူး၊ နစက-၃

အစ္စရေးဝန်ကြီးချုပ် ဘင်ဂျမင် နေတန်ယာဟုက အီရန်၏ ထပ်တိုး သန့်စင်ပြီးသော ယူရေနီယမ် တည်နေရာနှင့် ပတ်သက်၍ စိတ်ဝင်စားဖွယ် ထောက်လှမ်းရေးသတင်းရှိကြောင်း ပြောကြားခဲ့သည်။ ၎င်းသည် အမေရိကန် ၏ ဖော်ဒိုး၊ နတန်ဇ်နှင့် အစ္စဖာဟန်ရှိ တီဟီရန်၏ နျူကလီးယား စက်ရုံများကို လေကြောင်းတိုက်ခိုက်မှုများ ပြုလုပ်ပြီးနောက် ထိုကဲ့သို့ ပြောကြားခြင်း ဖြစ်သည်။

တနင်္ဂနွေနေ့ (ဇွန် ၂၂) က သတင်းစာရှင်းလင်းပွဲတစ်ခု၌ သတင်းထောက်များအား ပြောကြားရာတွင် နေတန်ယာဟုက အီရန်၏ ၆၀% သန့်စင်ပြီးသော ယူရေနီယမ် ၄၀၀ ကီလိုဂရမ်၏ တည်နေရာကို အစ္စရေးက သိရှိထားကြောင်း အတည်ပြုခဲ့သော်လည်း အသေးစိတ်အချက်အလက်များကိုပေးရန် ငြင်းဆန်ခဲ့သည်။

“မိမိတို့အနေဖြင့် ယင်းအချက်အလက်နှင့်ပတ်သက်၍ အလွန်နီးကပ်စွာ ခြေရာခံနေပါသည်။ ၎င်းသည် နျူကလီးယားအစီအစဉ်၏ အရေးကြီးသော အစိတ်အပိုင်းတစ်ခု ဖြစ်ကြောင်း ပြောပြနိုင်ပါသည်။ ၎င်းသည် တစ်ခု တည်းသော အစိတ်အပိုင်း မဟုတ်ပါ။ သို့သော် ၎င်းသည် အရေးကြီးသော အစိတ်အပိုင်း ဖြစ်ပြီး မိမိတို့တွင် စိတ်ဝင်စားဖွယ် ထောက်လှမ်းရေး သတင်းများ ရှိသော်လည်း မျှဝေမပြောပြနိုင်မှုကို ခွင့်လွှတ်ပါ” ဟု ၎င်းက ပစ္စည်း၏ တည်နေရာနှင့် ပတ်သက်၍ မေးမြန်းခံရသည့်အခါ ပြောကြားခဲ့သည်။

ထို့အပြင် အီရန်၏ မြေအောက် ဖော်ဒိုး နျူကလီးယားစက်ရုံသည် တနင်္ဂနွေနေ့က အမေရိကန် ဗုံးကြဲလေယာဉ်များ၏ တိုက်ခိုက်မှုကြောင့် ပျက်စီးခဲ့ကြောင်း၊ ယင်းတွင် ဘန်ကာ-ဘာစတာ လက်နက်များ ပါဝင်သည်ဟု သတင်းများရှိကြောင်း ၎င်းက ဆိုသော်လည်း ထိခိုက်မှု၏ အတိုင်းအတာကိုမူ ရှင်းလင်းစွာ မသိရှိရသေးကြောင်း ဖော်ပြခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ယီမင်နိုင်ငံမှ ဟူသီတပ်ဖွဲ့များသည် အီရန်ဘက်မှ အမေရိကန်နှင့် အစ္စရေးကို ဒေသတွင်းတွင် တိုက်ခိုက်မှုများ စတင်မည်ဖြစ်ကြောင်း ကြေညာလိုက်သည်။

“ယီမင်နိုင်ငံသည် အမေရိကန်နှင့် အစ္စရေးကို တရားဝင်စစ် ကြေညာ လိုက်ပြီဖြစ်သည်။ သင်တို့၏ သင်္ဘောများကို မိမိတို့၏ရေပိုင်နက်မှ ဝေးရာသို့ ရွှေ့ပါ” ဟု ယီမင်ရှိ ဟူသီလက်နက်ကိုင်တပ်ဖွဲ့၏ ပြောရေး ဆိုခွင့်ရှိသူ ဗိုလ်ချုပ်ကြီး ယာဟယာ ဆာရီး က ဇွန် ၂၂ ရက်တွင် ကြေညာခဲ့သည်။

အဆိုပါကြေညာချက်သည် အမေရိကန်က “Operation Night Hammer” အဖြစ် ဇွန် ၂၂ ရက် နံနက်စောစောပိုင်းတွင် အီရန်၏ အဓိက နျူကလီးယား စက်ရုံသုံးခုကို လေကြောင်းတိုက်ခိုက်မှုပြုလုပ်ပြီးနောက် နာရီပိုင်းအတွင်း ထွက်ပေါ်လာခြင်းဖြစ်သည်။ အစ္စရေးတပ်မတော်ကလည်းအီရန်၏ ဒုံးကျည်အခြေစိုက်နေရာများအပါအဝင် ထောင်ချီသော ပစ်မှတ်များကို ဆက်လက်တိုက်ခိုက်ခဲ့သည်။

ဟူသီတို့သည် “Axis of Resistance” (ခုခံတွန်းလှန်ရေးဝင်ရိုး) အဖွဲ့ဝင် များဖြစ်ပြီး အမေရိကန်နှင့် အစ္စရေး၏ အာရှအလယ်ပိုင်းဒေသ ဩဇာလွှမ်းမိုးမှုကို ဟန့်တားရန် အီရန်မှ ပံ့ပိုးထားသော လက်နက်ကိုင်အဖွဲ့များ ဖြစ်သည်။

အမေရိကန်နှင့် အစ္စရေး အရာရှိများက ဟူသီတို့၏ စစ်ကြေညာချက်နှင့်ပတ်သက်၍ မှတ်ချက်မပြုသေးပေ။

ဟူသီတပ်ဖွဲ့က အကယ်၍ ဝါရှင်တန်သည် တဲလ်အဗစ်နှင့်အတူ လေကြောင်း တိုက်ခိုက်မှုများတွင် ပါဝင်ပါက ပင်လယ်နီဒေသရှိ အမေရိကန် သင်္ဘောများကို ပြန်လည်တိုက်ခိုက်မည်ဟု မကြာသေးမီက သတိပေးခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂

ဆီးရီးယားမီဒီယာများက တနင်္ဂနွေနေ့ (ဇွန် ၂၂) တွင် ထုတ်ပြန်သည့် သတင်းအရ ဆီးရီးယားမြို့တော် ဒမက်စကပ်ရှိ Mar Elias ခရစ်ယာန် ဘုရားကျောင်းတွင် ပေါက်ကွဲမှုတစ်ခုဖြစ်ပွားခဲ့သည်။ အော်သိုဒေါက် ခရစ်ယာန် ဘုရားကျောင်းတွင် တနင်္ဂနွေ ဝတ်ပြုဆုတောင်းမှုပြုနေစဉ် အသေခံဗုံးခွဲတိုက်ခိုက်ခံရခြင်းဖြစ်သည်ဟု သတင်းများက ဖော်ပြသည်။

ဆီးရီးယားကျန်းမာရေးဝန်ကြီးဌာနက SANA သတင်းဌာနသို့ ထုတ်ပြန်ချက်တွင် အနည်းဆုံး လူ ၂၀ သေဆုံးပြီး ၅၂ ဦး ဒဏ်ရာရရှိကြောင်း ဖော်ပြခဲ့သည်။

အွန်လိုင်းတွင် မျှဝေနေသည့် ဓာတ်ပုံနှင့် ဗီဒီယိုများအရ ဘုရားကျောင်းအတွင်းပိုင်းသည် ပြင်းထန်စွာ ပျက်စီးခဲ့ပြီး ဆိုးရွားစွာထိခိုက်ခဲ့သည့် ခန္ဓာကိုယ်အစိတ်အပိုင်းများကို တွေ့ရသည်။

သေနတ်သံများ ထွက်ပေါ်ခဲ့ပြီးမကြာမီ ပေါက်ကွဲမှုဖြစ်ပွားခဲ့ကြောင်း UAE အခြေစိုက် The National သတင်းစာက မျက်မြင်သက်သေများ၏ ပြောကြားချက်ကို ကိုးကားဖော်ပြခဲ့သည်။ သို့သော် သေနတ်ပစ်ခတ်သံ များ၏ အရင်းအမြစ်ကို ချက်ချင်းမသိရှိရသေးပေ။ 

ဆီးရီးယား ပြည်ထဲရေးဝန်ကြီးဌာနက SANA သတင်းဌာနအား ပြောကြားရာတွင် အဆိုပါတိုက်ခိုက်မှုကို အစ္စလာမ်မစ် စတိတ် (IS ၊ ယခင်က ISIS) အကြမ်းဖက်အဖွဲ့က ကျူးလွန်ခဲ့သည်ဟု ဆိုသည်။ တိုက်ခိုက်သူသည် ဘုရားကျောင်းသို့ သွားရောက်နေသူများအား ပစ်ခတ်ပြီးနောက် အသေခံ ဗုံးခွဲခဲ့ခြင်းဖြစ်သည်ဟု ပြောကြားခဲ့သည်။

သို့သော် ဘုရားကျောင်းရှိ ဘုန်းတော်ကြီးတစ်ပါးက ဖြစ်စဉ်နှင့်ပတ်သက်၍ ကွဲလွဲသည့် အချက်အလက်ကို ပြောကြားခဲ့သည်။ ၎င်း၏ပြောကြားချက် အရ တိုက်ခိုက်သူ နှစ်ဦးရှိပြီး၊ ၎င်းတို့သည် ဘုရားကျောင်း အပြင်ဘက်တွင် ပစ်ခတ်ပြီးမှ အတွင်းသို့ဝင်ကာ အသေခံဗုံးဖောက်ခွဲခဲ့ခြင်းဖြစ်သည်။ တိုက်ခိုက်မှုဖြစ်ပွားချိန်တွင် ဘုရားကျောင်းအတွင်း၌ လူ ၄၀၀ ခန့် ရှိနေ ခဲ့သည်ဟု ၎င်းက The National သတင်းစာကို ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊နစက-၂