ပြီးခဲ့သည့် ဇန်နဝါရီ ၁၈ ရက်(စနေနေ့) နံနက်ပိုင်းက အီရန်နိုင်ငံ မြို့တော်တီဟီရန်ရှိ တရားလွှတ်တော်ချုပ်ရုံးမှ အကြီးတန်းတရားသူကြီးနှစ်ဦးသည် ရုံးချိန် အတွင်း တာဝန်ထမ်းဆောင်နေချိန် သေနတ်သမားတစ်ဦး၏ လက်ချက်ဖြင့် ပစ်သတ်ခံလိုက်ရကြောင်း၊ အဆိုပါသေနတ်သမားမှာလည်း မိမိကိုယ်ကို အဆုံး စီရင်သွားကြောင်း အီရန်နိုင်ငံပိုင်မီဒီယာများ၏ ဖော်ပြချက်အရ သိရပါသည်။
အမေရိကန် သမ္မတ ဒေါ်နယ်ထရမ့် အိမ်ဖြူတော်သို့ ပြန်ရောက်ရှိလာချိန်တွင် မက္ကဆီကိုပင်လယ်ကွေ့ကို အမေရိကန်ပင်လယ်ကွေ့ဟု ပြောင်းလဲခေါ်ဝေါ်မည့် စီမံအုပ်ချုပ်ရေးအမိန့်ကို လက်မှတ်ရေးထိုးထုတ်ပြန်ရန် စီစဉ်နေကြောင်း Fox News က ဖော်ပြထားပါသည်။
သတင်းအရင်းအမြစ်တစ်ခုအရ ဒေါ်နယ်ထရမ့်သည် ဇန်နဝါရီ ၂၀ ရက် သမ္မတကျမ်းသစ္စာဆိုပွဲပြီးနောက် မက္ကဆီကို ပင်လယ်ကွေ့အမည်ပြောင်းလဲခြင်း အမိန့် အပါအဝင် စီမံအုပ်ချုပ်ရေးအမိန့် ၂၀၀ ကျော် လက်မှတ်ရေးထိုးမည်ဖြစ်သည်။
အမေရိကန်ပြည်ထောင်စုတွင် အမျိုးသားလုံခြုံရေးကို အကြောင်းပြ၍ TikTok ပိတ်ပင်သော ဉပဒေ အတည်ပြုခဲ့သောကြောင့် ခဏတာ ရပ်ဆိုင်းခဲ့သော TikTok မှာ ဇန်နဝါရီ ၁၉ ရက်တွင် အမေရိကန်ပြည်ထောင်စု၌ ပြန်လည် အသုံးပြုနိုင်ခဲ့ပြီဖြစ်ပါသည်။
ဇန်နဝါရီ ၁၉ ရက်တွင် ရာထူး သက်တမ်းကုန်သွားပြီ ဖြစ်သည့် ဘိုင်ဒင်အစိုးရ၏ ပိတ်ပင်မှုအပေါ် ပြောင်းပြန်ဖြစ်သွားစေရန် ဆောင်ရွက်ပေးသည့်အတွက် ဒေါ်နယ်ထရမ့် ကို TikTok က ချီးကျူးလိုက်ပါသည်။
ဒုတိယဝန်ကြီးချုပ်နှင့် ဘဏ္ဍာရေးဝန်ကြီးဟောင်း Chrystia Freeland သည် လာမည့် လစ်ဘရယ်ပါတီခေါင်းဆောင်နှင့် ၀န်ကြီးချုပ်ရာထူးနေရာတွင် ဝင်ရောက်ယှဉ်ပြိုင်အရွေးခံရန် မဲဆွယ်စည်းရုံးရေးကမ်ပိန်းများ ပြုလုပ်လျက်ရှိသည်။