မေလ ၂၇ ရက် (အင်္ဂါနေ့) တွင် တရုတ်နိုင်ငံ၊ ရှန်ဒုန်းပြည်နယ်၊ ဂေါမိမြို့မှ Shandong Youdao Chemical ဓာတုစက်ရုံ၌ ကြီးမားသော ပေါက်ကွဲမှု ဖြစ်ပွားခဲ့သည်။ ပေါက်ကွဲမှုကြောင့် မီးခိုးမီးလျှံများ ကောင်းကင်သို့ ထိုးတက်ခဲ့ပြီး အနီးရှိ အဆောက်အဦများ၏ ပြတင်းပေါက်များ ကွဲအက်ကာ ပျက်စီးမှုများ ဖြစ်ပေါ်ခဲ့သည်။ ဒေသခံအာဏာပိုင်များက ကယ်ဆယ်ရေးလုပ်ငန်းများ စတင်ဆောင်ရွက်လျက်ရှိသည်။

စီးပွားရေးဆိုင်ရာ မရေရာမှုများ၊ ပထဝီဝင်နိုင်ငံရေး စိန်ခေါ်မှုများကြောင့် ပိုမိုရှုပ်ထွေးလာသော နိုင်ငံတကာအခင်းအကျင်းအား လမ်းညွှန်တည့်မတ်ရန်အတွက် ဒေသအချင်းချင်း ပူးပေါင်းဆောင်ရွက်မှု တိုးမြှင့်ရေးနှင့် ကြံ့ကြံ့ခံနိုင်စွမ်း တည်ဆောက်ရေးတို့မှာ ဒုတိယအကြိမ် အာဆီယံ-GCC ထိပ်သီး အစည်းအဝေး၌ အဓိကဆွေးနွေးမည့် အကြောင်းအရာများထဲတွင်ပါဝင်ကြောင်း မလေးရှားနိုင်ငံ ဝန်ကြီးချုပ် အန်ဝါ အီဘရာဟင်က ကွာလာလမ်ပူမြို့တွင် မေ ၂၇ ရက်၌ ပြောကြားခဲ့သည်။

ရုရှား-ယူကရိန်း နှစ်ဖက်သည် မေ ၁၆ ရက်တွင် တူကီယဲနိုင်ငံ အစ္စတန် ဘူလ်မြို့ စစ်သုံ့ပန်းလဲလှယ်မှု သဘောတူညီချက် ရရှိပြီးနောက် စစ်သုံ့ပန်း အများအပြားလဲလှယ်သည့် ပထမအဆင့်လုပ်ငန်းများ ပြီးစီးပြီဖြစ်ကြောင်း ရုရှားကာကွယ်ရေးဝန်ကြီးဌာနက မေ ၂၃ ရက်တွင် သတင်းထုတ်ပြန် ပြောကြားခဲ့သည်။

ယူကရိန်းက ရုရှားစစ်သည် ၂၇၀ ဦးနှင့် အရပ်သား ၁၂၀ ဦးကို လွှဲပြောင်းပေးခဲ့ကြောင်း၊ ထို့အပေါ် တုံ့ပြန်သည့်အနေဖြင့် ရုရှားက ယူကရိန်းသို့ ယူကရိန်းစစ်သုံ့ပန်း ၂၇၀ ဦးနှင့် အရပ်သား ၁၂၀ ဦးကို လွှဲပြောင်းပေးခဲ့ကြောင်း သတင်းထုတ်ပြန်ချက်တွင် ဖော်ပြထားသည်။

ယူကရိန်းအပေါ် ရုရှား၏ ၃ ရက်ဆက်တိုက် အကြီးအကျယ် တိုက်ခိုက်မှုများနှင့်ပတ်သက်၍ ယင်းမှာ ရုရှား၏ “နိုင်ငံရေး ရွေးချယ်မှု” ဖြစ်ကြောင်း နှင့် အနောက်နိုင်ငံများအနေဖြင့် ရုရှားအပေါ် ပိတ်ဆို့အရေးယူမှုများ ဆက်လက်တိုးမြှင့်လုပ်ဆောင်ရန် တိုက်တွန်းကြောင်း ယူကရိန်းသမ္မတ ဇီလန်းစကီးက မေ ၂၆ ရက်တွင် လူမှုမီဒီယာတွင် ၎င်း၏ သဘောထား ဖော်ပြခဲ့သည်။