နေပြည်တော် ဇန်နဝါရီ ၁၁

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်သည် ယနေ့နံနက်ပိုင်းတွင် မန္တလေးတိုင်းဒေသကြီး ပြင်ဦးလွင်မြို့ရှိ အသေးစား၊ အငယ်စားနှင့် အလတ်စားစီးပွားရေး(MSME)လုပ်ငန်းရှင်များအား ပြင်ဦးလွင်မြို့ မြို့တော်ခန်းမ၌တွေ့ဆုံ၍ ဒေသဖွံ့ဖြိုးတိုးတက်ရေးနှင့် ဒေသထုတ်ကုန်များ တိုးမြှင့်ထုတ်လုပ်နိုင်ရေးဆိုင်ရာများကို ဆွေးနွေးသည်။

အဆိုပါတွေ့ဆုံပွဲသို့ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့်အတူ ကောင်စီတွဲဖက်အတွင်းရေးမှူး ဗိုလ်ချုပ်ကြီး ရဲဝင်းဦး၊ ပြည်ထောင်စုဝန်ကြီးများဖြစ်ကြသည့် ဗိုလ်ချုပ်ကြီး မိုးအောင်၊ ဦးခင်မောင်ရီ၊ ဒေါက်တာချာလီသန်း၊ မန္တလေးတိုင်းဒေသကြီးဝန်ကြီးချုပ် ဦးမျိုးအောင်၊ ကာကွယ်ရေးဦးစီးချုပ်ရုံးမှ အဆင့်မြင့်တပ်မတော်အရာရှိကြီးများ၊ အလယ်ပိုင်းတိုင်းစစ်ဌာနချုပ် တိုင်းမှူး၊ ပြင်ဦးလွင်ခရိုင်မှ ဌာနဆိုင်ရာတာဝန်ရှိသူများ၊ ပြင်ဦးလွင်ခရိုင်အတွင်းရှိ အသေးစား၊ အငယ်စားနှင့် အလတ်စားစီးပွားရေး(MSME) လုပ်ငန်းရှင်များ တက်ရောက်ကြသည်။

ဒေသဆိုင်ရာအချက်အလက်များနှင့် လိုအပ်ချက်များအား အသီးသီးဆွေးနွေးတင်ပြ

ဦးစွာ ပြင်ဦးလွင်ခရိုင်စီမံအုပ်ချုပ်ရေးအဖွဲ့ဥက္ကဋ္ဌ ခရိုင်အုပ်ချုပ်ရေးမှူး ဦးသန့်ဇော်ဦးက ဒေသဆိုင်ရာအချက်အလက်များ၊ စိုက်ပျိုးရေး၊ မွေးမြူရေးဆိုင်ရာအချက်အလက်များ၊ ခရိုင်အတွင်း အသေးစား၊ အငယ်စားနှင့် အလတ်စားစီးပွားရေး(MSME) လုပ်ငန်းများဆောင်ရွက်လျက်ရှိမှုနှင့် လုပ်ငန်းများအောင်မြင်မှုရှိစေရေး ပေါင်းစပ်ညှိနှိုင်းဆောင်ရွက်လျက်ရှိမှု၊ နိုင်ငံတော်အကြီးအကဲ၏ ၂၀၂၄ ခုနှစ်အတွင်း ပြင်ဦးလွင်ဒေသသို့ရောက်ရှိစဉ် ဒေသဖွံ့ဖြိုးတိုးတက်ရေးအတွက် လမ်းညွှန်မှာကြားချက်များအား အကောင်အထည်ဖော်ဆောင်ရွက်ပြီးစီးမှု၊ ပြင်ဦးလွင်ခရိုင် ဖွံ့ဖြိုးတိုးတက်ရေး၊ ခရိုင်အတွင်း MSME လုပ်ငန်းများ ဖွံ့ဖြိုးတိုးတက်စေရေး၊ ဒေသခံပြည်သူလူထုတို့၏ လူမှုစီးပွားဘဝများဖွံ့ဖြိုးတိုးတက်ရေးတို့အတွက် ဆက်လက်ဆောင်ရွက်လျက်ရှိမှုတို့ကို ရှင်းလင်းတင်ပြသည်။

ယင်းနောက် တက်ရောက်လာကြသည့် အသေးစား၊ အငယ်စားနှင့် အလတ်စားစီးပွားရေး (MSME)လုပ်ငန်းရှင်များက လုပ်ငန်းများအလိုက် လုပ်ငန်းဆောင်ရွက်လျက်ရှိသည့်အခြေအနေများ၊ တွေ့ကြုံနေရသည့် လုပ်ငန်းခွင်အခက်အခဲများနှင့် လုပ်ငန်းလိုအပ်ချက်များ၊ ကော်ဖီလုပ်ငန်းဖွံ့ဖြိုးတိုးတက်ရေးနှင့် ထုတ်လုပ်မှုကုန်ကျစရိတ်များ လျော့ကျစေရေးအတွက် နိုင်ငံတော်အနေဖြင့် ဆောင်ရွက်ပေးစေလိုမှုနှင့် အခြားလိုအပ်ချက်များကို ဆွေးနွေးတင်ပြကြသည်။

တင်ပြချက်များအပေါ် ကဏ္ဍအလိုက် ပြန်လည်ရှင်းလင်းဆွေးနွေးပြောကြား

တင်ပြချက်များနှင့်စပ်လျဉ်း၍ ပြည်ထောင်စုဝန်ကြီးများက လုပ်ငန်းများဆောင်ရွက်ရာ၌ လျှပ်စစ်မီးလိုအပ်ချက်အပေါ် ကွင်းဆင်းစစ်ဆေးဆောင်ရွက်ပေးသွားမည့်အခြေအနေများ၊ နို့နှင့် နို့ထွက်ပစ္စည်းထုတ်လုပ်ရာတွင် လိုအပ်ချက်များအား သက်ဆိုင်ရာဝန်ကြီးဌာနများနှင့် ပေါင်းစပ်ညှိနှိုင်းဆောင်ရွက်ပေးသွားမည့်အခြေအနေများ၊ လာမည့်ပြည်ထောင်စုနေ့တွင် တိုင်းဒေသကြီးနှင့် ပြည်နယ်အသီးသီးမှ အသေးစား၊ အငယ်စားနှင့် အလတ်စားစီးပွားရေး (MSME) လုပ်ငန်းထုတ်ကုန်ပြပွဲကို နေပြည်တော်၌ ပြည်ထောင်စုအဆင့်ဆောင်ရွက်ပေးသွားမည့် အခြေအနေများ၊ နိုင်ငံတော်အစိုးရအနေဖြင့် စက်မှုကဏ္ဍဖွံ့ဖြိုးတိုးတက်ရေးဆောင်ရွက်ပေးလျက်ရှိမှုနှင့် စိုက်ပျိုးရေးနှင့် မွေးမြူရေးကိုအခြေခံသည့် စက်မှုလုပ်ငန်းများ ဖွံ့ဖြိုးတိုးတက်ရေး အားပေးဆောင်ရွက်လျက်ရှိမှု၊ စိုက်ပျိုးမြေလျှောက်ထားမှုနှင့်ပတ်သက်၍ သတ်မှတ်စည်းမျဉ်းစည်းကမ်းများ၊ မူဝါဒများနှင့်အညီ ဆောင်ရွက်ပေးလျက်ရှိမှု၊ ကော်ဖီစိုက်ပျိုးခြင်းသည် အရိပ်ရအပင်များကိုပါ ထည့်သွင်းစိုက်ပျိုးရသည် ဖြစ်သဖြင့် Green Economy ကို ဖော်ဆောင်နေခြင်းပင်ဖြစ်သဖြင့် သတ်မှတ်ချက်များနှင့် ကိုက်ညီအောင် ဆောင်ရွက်သွားကြရန် လိုအပ်သည့်အခြေအနေများ၊ ပြင်ဦးလွင်ခရိုင်အနေဖြင့် သစ်တောဖုံးလွှမ်းမှုရာခိုင် နှုန်းရှိသဖြင့် ၁၈ ဒသမ ၈၇ ရာခိုင်နှုန်းရှိပြီး စိမ်းလန်းစိုပြည်သည့် နဂိုရှိရင်းစွဲအရင်းအမြစ် အလှအပများ မပျောက်ပျက်အောင် ထိန်းသိမ်းဆောင်ရွက်သွားရန် လိုအပ်သည့်အခြေအနေများနှင့် သက်ဆိုင်ရာကဏ္ဍအလိုက် အသီးသီးပြန်လည်ဆွေးနွေးပြောကြားကြသည်။

ထို့နောက် မန္တလေးတိုင်းဒေသကြီးဝန်ကြီးချုပ်က ပြင်ဦးလွင်ခရိုင်အတွင်း အသေးစား၊ အငယ်စားနှင့် အလတ်စားစီးပွားရေး(MSME)လုပ်ငန်း ဖွံ့ဖြိုးတိုးတက်ရေးအတွက် တိုင်းဒေသကြီးအစိုးရအဖွဲ့မှ လိုအပ်သည်များ ဖြည့်ဆည်းဆောင်ရွက်ပေးလျက်ရှိမှု၊ ဒေသ၏လူမှုရေးနှင့် စီးပွားရေးကောင်းမွန်စေရေး အလေးထားဆောင်ရွက်ပေးလျက်ရှိမှု အခြေအနေများကို ဖြည့်စွက်ရှင်းလင်းတင်ပြသည်။

ဒေသဖွံ့ဖြိုးတိုးတက်ရေးနှင့် ဒေသထုတ်ကုန်များ တိုးမြှင့်ထုတ်လုပ်နိုင်ရေး လိုအပ်သည်များ ဆွေးနွေးမှာကြား

ဆက်လက်၍ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က တင်ပြမှုများနှင့်စပ်လျဉ်း၍ ဆွေးနွေးပြောကြားရာတွင် ပြင်ဦးလွင်ခရိုင်အတွင်း အသေးစား၊ အငယ်စားနှင့်အလတ်စားစီးပွားရေး(MSME)လုပ်ငန်းများ အောင်မြင်ဖြစ်ထွန်းစေရေးအတွက် လိုအပ်သည်များကို အကြံပြုတိုက်တွန်းဆွေးနွေးနိုင်ရန် လာရောက်တွေ့ဆုံခြင်းဖြစ်ကြောင်း၊ ဒေသအလိုက်ထုတ်ကုန်များသည် အရည်အသွေးပိုင်းကောင်းမွန်သည်ဖြစ်သော်လည်း အချို့သောထုတ်ကုန်များသည် ထုပ်ပိုးမှုအပိုင်း၌ အဆင့်မီမီဖြစ်ရန် လိုအပ်နေဆဲဖြစ်ကြောင်း။

MSME လုပ်ငန်းများနှင့်ပတ်သက်၍ အဓိကအားဖြင့် မူဝါဒများချမှတ်ထားပြီး ကုန်ပစ္စည်းတစ်ခုထုတ်လုပ်ရန်အတွက် ကုန်ကြမ်းပစ္စည်းများ လိုအပ်ချက်မှာ အဓိကအရေးကြီးလိုအပ်ချက်ဖြစ်သဖြင့် ဒေသတွင်းကုန်ကြမ်းများ လုံလောက်စွာထွက်ရှိအောင် ဆောင်ရွက်ရန်လိုကြောင်း၊ ပြင်ဦးလွင်ဒေသအနေဖြင့် ဒေသမှထွက်ရှိသည့် နို့နှင့် နို့ထွက်ပစ္စည်းများ၊ ဂျုံထွက်ပစ္စည်းများ၊ အသီးအနှံများမှ ထုတ်ကုန်ပစ္စည်းများ ထုတ်လုပ်လျက်ရှိကြောင်း၊ ဈေးကွက်လေ့လာဆန်းစစ်ချက်အရ လူအများကြိုက်နှစ်သက်သည့်ပစ္စည်းများကို အရေအတွက်များများဖြင့် အရည်အသွေးပြည့်မီစွာ ထုတ်လုပ်နိုင်မည်ဆိုပါက ပြည်ပသို့ပါ တင်ပို့ရောင်းချနိုင်မည်ဖြစ်ကြောင်း။

စိုက်ပျိုးမွေးမြူရေးကိုအခြေခံသည့် ကုန်ထုတ်လုပ်ငန်းများ ဖွံ့ဖြိုးတိုးတက်ရေး

MSME ကုန်ထုတ်လုပ်ငန်းများ ဆောင်ရွက်ရန်အတွက် ကုန်ကြမ်း၊ နည်းပညာ၊ သွင်းအားစုနှင့် ရင်းနှီးစိုက်ထုတ်ငွေများလိုအပ်ပြီး ကုန်ကြမ်းများလုံလုံလောက်လောက်ရရှိနေရန်လိုကြောင်း၊ ကုန်ထုတ်လုပ်ငန်းများကို ဆောင်ရွက်ရာတွင် အကျိုးဖြစ်ထွန်းမှုရှိရန်လိုပြီး မိမိတို့နိုင်ငံ၏ MSME ကုန်ထုတ် လုပ်ငန်းတွင် ၆၅ ရာခိုင်နှုန်းခန့်သည် စားသောက်ကုန်ထုတ်လုပ်ခြင်းလုပ်ငန်းများဖြစ်ကြောင်း၊ အခြားလူသုံးကုန်ပစ္စည်းထုတ်လုပ်မှု၊ စက်ပစ္စည်းထုတ်လုပ်မှုနှင့် အခြားကုန်ထုတ်လုပ်မှုလုပ်ငန်းများသည် ရာခိုင်နှုန်းအားဖြင့် နည်းပါးနေဆဲဖြစ်သည်ကို တွေ့မြင်ရကြောင်း၊ စားသောက်ကုန်ထုတ်လုပ်မှုလုပ်ငန်းများကို အဓိကအားဖြင့် ဆောင်ရွက်မည်ဆိုပါကလည်း စိုက်ပျိုးရေးနှင့်မွေးမြူရေးလုပ်ငန်းများကို အောင်မြင်အောင်ဆောင်ရွက်နိုင်မှသာ ကုန်ကြမ်းများ လုံလောက်စွာရရှိမည်ဖြစ်ကြောင်း။

ကုန်ထုတ်လုပ်ငန်းများအတွက် လိုအပ်သည့် လျှပ်စစ်မီးလိုအပ်ချက်များနှင့်ပတ်သက်၍လည်း နေရောင်ခြည်စွမ်းအင်သုံး လျှပ်စစ်ဓာတ်အား ထုတ်လုပ်ခြင်းလုပ်ငန်းများကို တစ်ပိုင်တစ်နိုင်ဆောင်ရွက်နိုင်ကြောင်း၊ နိုင်ငံတော်မှလည်း နေရောင်ခြည်စွမ်းအင်သုံး လျှပ်စစ်ဓာတ်အားထုတ်လုပ်ခြင်းလုပ်ငန်းများကို ဆောင်ရွက်လျက်ရှိကြောင်း၊ လျှပ်စစ်ဓာတ်အားပေးစက်ရုံများအနေဖြင့် စွမ်းအားပြည့်ထုတ်လုပ်နိုင်မှုမရှိခြင်း၊ အကြမ်းဖက်သမားများက လျှပ်စစ်ဓာတ်အားပေးစက်ရုံများနှင့် တာဝါတိုင်များအား ဖျက်ဆီးခြင်း၊ ဓာတ်ငွေ့များလုံလောက်စွာရရှိမှုမရှိခြင်းတို့ကြောင့် နိုင်ငံတော်အနေဖြင့် လျှပ်စစ်ဓာတ်အားပြည့်ဝစွာ ဖြန့်ဖြူးပေးရန်အတွက် အခက်အခဲများဖြစ်ပေါ်လျက်ရှိကြောင်း၊ ထို့ပြင် နိုင်ငံတော်မှရည်မှန်းချက်ထား အကောင်အထည်ဖော်ဆောင်ရွက်လျက်ရှိသည့် လျှပ်စစ်ဓာတ်အားပေးစက်ရုံစီမံကိန်းများမှာလည်း ကန့်ကွက်မှုများနှင့် အကြောင်းအမျိုးမျိုးကြောင့် လုပ်ငန်းအကောင်အထည်ဖော်ဆောင်မှု ရပ်တန့်သွားရခြင်းများလည်းရှိကြောင်း၊ ၂၀၀၅ ခုနှစ်ကစတင်၍ အကောင်အထည်ဖော်ဆောင်ရွက်ခဲ့သည့် လျှပ်စစ်ဓာတ်အားပေးစက်ရုံများ တည်ဆောက်ခြင်းစီမံကိန်းများ အောင်မြင်ခဲ့မည်ဆိုပါက ယခုအချိန်တွင် မိမိတို့နိုင်ငံအနေဖြင့် လျှပ်စစ်ဓာတ်အား လုံလောက်စွာရရှိနေမည်ဖြစ်ကြောင်း၊ သို့သော်လျှပ်စစ်ဓာတ်အားပေး စက်ရုံတည်ဆောက်ခြင်း စီမံကိန်းများအား နည်းလမ်းအမျိုးမျိုးဖြင့် အနှောင့်အယှက်ပေးခဲ့မှုများကြောင့် စီမံကိန်းများရပ်တန့်ခဲ့ရခြင်းဖြစ်ကြောင်း၊ မိမိတို့တာဝန်ယူချိန်တွင် လျှပ်စစ်နှင့်ပတ်သက်၍ အခက်အခဲများရှိသဖြင့် အချိန်တိုအတွင်း အောင်မြင်ပြီးမြောက်နိုင်သည့် နေရောင်ခြည်စွမ်းအင်သုံးလျှပ်စစ်ဓာတ်အား ထုတ်လုပ်ခြင်းစီမံကိန်းများကို အားပေးဆောင်ရွက်ခဲ့ကြောင်း၊ အဆိုပါစီမံကိန်းများ အောင်မြင်ပြီးစီးပါက လျှပ်စစ်မီးများ လုံလောက်စွာရရှိလာနိုင်မည်ဖြစ်ကြောင်း။

သွင်းအားစုတွင်ပါဝင်သည့် စက်သုံးဆီများကိုလည်း နိုင်ငံတော်အနေဖြင့် နှစ်စဉ်ပြည်ပမှ တင်သွင်းနေရသဖြင့် နိုင်ငံခြားငွေများစွာသုံးစွဲနေရကြောင်း၊ ပြည်တွင်းမှထုတ်လုပ်သည့် စားသောက်ကုန်များ၊ လူသုံးကုန်များနှင့် အဝတ်အထည်များကို အသုံးပြုပြီး ပြည်တွင်းဖြစ်ကို အားပေးခြင်းဖြင့် နိုင်ငံခြားငွေသုံးစွဲမှုများကို လျှော့ချနိုင်မည်၊ နိုင်ငံ့စီးပွားတိုးတက်ရေးကို များစွာအထောက်အကူပြုစေနိုင်မည်ဖြစ်ကြောင်း၊ ထို့ကြောင့် ပြည်တွင်းဖြစ်ကို အားပေး၍ နိုင်ငံ့စီးပွားရေးကို ထိန်းသိမ်းဆောင်ရွက်သွားရမည်ဖြစ်ကြောင်း။

စိုက်ပျိုးမြေအသုံးချမှုများ စနစ်တကျဖြစ်ရန်နှင့် အကျိုးရှိရှိအသုံးချနိုင်ရန်လို

စိုက်ပျိုးမြေများအပေါ်တွင် စိုက်ပျိုးရေးနှင့် မသက်ဆိုင်သည့်လုပ်ငန်းများ ဆောင်ရွက်ခြင်းမပြုရန်လိုပြီး စည်းကမ်းသတ်မှတ်ချက်များနှင့်အညီ စိုက်ပျိုးရေးလုပ်ငန်းများကို အောင်မြင်အောင် ဆောင်ရွက်ရန်လိုကြောင်း၊ အချို့စိုက်ပျိုးမြေရယူထားသူများအနေဖြင့် စိုက်ပျိုးမြေများပေါ်တွင် သတ်မှတ်ချက်ထက်ကျော်လွန်သည့် အိမ်ရာများဆောက်လုပ်ခြင်းနှင့် အဆောက်အဦဆောက်လုပ်ရန်အတွက် ခြံကွက်များပြုလုပ်ထားသည်ကို တွေ့ရှိရကြောင်း၊ စိုက်ပျိုးမြေများအား အခြားနည်းများဖြင့် အသုံးပြုရာတွင် ဥပဒေစည်းမျဉ်း၊ စည်းကမ်းများနှင့်အညီ အဆင့်ဆင့်တင်ပြ၍ ခွင့်ပြုချက်ရယူဆောင်ရွက်ရန်လိုကြောင်း၊ မြေအသုံးချမှုများ စည်းကမ်းတကျဖြစ်စေရေး တာဝန်ရှိသူများအနေဖြင့် စနစ်တကျဖြင့် ကြပ်မတ်ဆောင်ရွက်သွားကြရန်လိုကြောင်း၊ စိုက်ပျိုးရေး သီးနှံများအထွက်နှုန်း ကောင်းမွန်စေရန်အတွက် မျိုး၊ မြေ၊ ရေ၊ နည်း စသည့် စိုက်ပျိုးရေးအခြေခံနည်းလမ်းလေးသွယ်ကို စနစ်တကျဆောင်ရွက်သွားရန်လိုကြောင်း၊ ပြင်ဦးလွင်မြို့သည် အအေးပိုင်းဒေသဖြစ်သဖြင့် ဂျုံသီးနှံများစိုက်ပျိုးမည်ဆိုပါက ဖြစ်ထွန်းအောင်မြင်နိုင်မည်ဖြစ်ကြောင်း။

MSME ကုန်ထုတ်လုပ်ငန်းများဆောင်ရွက်ရာတွင် အရည်အသွေးပြည့်မီစွာ ထုတ်လုပ်နိုင်ရန်အတွက် နည်းပညာ၊ ထုတ်လုပ်သည့်စက်ပစ္စည်းများနှင့် ကျွမ်းကျင်သည့် လူသားအရင်းအမြစ်များလိုအပ်ကြောင်း၊ နို့ထွက်ပစ္စည်းထုတ်လုပ်မှုနှင့်ပတ်သက်၍ ပြင်ဦးလွင်မြို့မှထွက်ရှိသည့် နို့ထွက်ပစ္စည်းများသည် အဆင့်အတန်းတစ်ခုတွင်ရှိသည်ကို တွေ့ရှိရသဖြင့် လက်ရှိထုတ်လုပ်နေသည့် ထုတ်ကုန်များအပြင် အခြားနို့ထွက်ပစ္စည်း စားသောက်ကုန်အမယ်သစ်များကို ဆက်လက်ထုတ်လုပ်သွားမည်ဆိုပါက ယခုထက် ပိုမိုအောင်မြင်တိုးတက်လာနိုင်မည်ဖြစ်ကြောင်း၊ စားသောက်ကုန်လုပ်ငန်းတွင်ပါဝင်သည့် ဝိုင်ထုတ်လုပ်ခြင်းလုပ်ငန်းကို ဆောင်ရွက်ရာတွင်လည်း အဆင့်မြင့်ဝိုင်ထုတ်လုပ်ခြင်းများကို ဆောင်ရွက်သွားမည်ဆိုပါက ဈေးကွက်ပိုမိုရရှိနိုင်မည်ဖြစ်ကြောင်း၊ ပြင်ဦးလွင်မြို့မှ ထွက်ရှိသည့် ကော်ဖီသည်လည်း အရည်အသွေးကောင်းမွန်ပြီး ဈေးကွက်တစ်ခုရရှိထားပြီးဖြစ်ကြောင်း၊ ပြင်ဦးလွင်မြို့တွင် ရှိပြီးဖြစ်သည့် အခြေခံစိုက်ပျိုးရေးထွက်ကုန်များကိုအသုံးပြု၍ စားသောက်ကုန်ပစ္စည်းများကို အရည်အသွေးပြည့်မီစွာဖြင့် ထုတ်လုပ်သွားရန်လိုကြောင်း၊ အလားတူ ပြင်ဦးလွင်မြို့တွင် မွေးမြူရေးလုပ်ငန်းများဆောင်ရွက်ရန်အတွက်လည်း အခြေခံကောင်းများ ရှိပြီးဖြစ်သည့်အတွက် မွေးမြူရေးလုပ်ငန်းများ အောင်မြင်တိုးတက်အောင်ဆောင်ရွက်ပြီး အေးခဲအသားထုတ်လုပ်မှုများ ထုတ်လုပ်နိုင်သည့်အထိ ဆောင်ရွက်ရန်လိုကြောင်း။

ပြင်ဦးလွင်မြို့သည် ချယ်ရီမြို့တော်၊ ပန်းမြို့တော်ဟု ဂုဏ်သတင်းကျော်ကြားသည့် အပန်းဖြေမြို့တော်တစ်ခုဖြစ်ကြောင်း၊ အေးချမ်းသာယာသည့် မြို့တစ်မြို့ဖြစ်သဖြင့် ပညာသင်ကြားရေးနှင့် ကျန်းမာရေးစောင့်ရှောက်မှုလုပ်ငန်းများကို ဆောင်ရွက်ရန်အတွက် မူဝါဒချမှတ်ထားပြီး ပညာရေးမြို့တော်၊ ကျန်းမာရေးမြို့တော်အဖြစ်လည်း ဂုဏ်သတင်းကျော်ကြားအောင် ဆက်လက်ဆောင်ရွက်သွားရမည်ဖြစ်ကြောင်း၊ မြို့သာယာလှပတိုးတက်ရေးအတွက် မိမိတို့အနေဖြင့် လိုအပ်သည်များကို ဆောင်ရွက်ပေးလျက်ရှိကြောင်း၊ ဒေသခံများအနေဖြင့်လည်း အပန်းဖြေလာရောက်သူများအနေဖြင့် စိတ်ချမ်းသာ၊ ကိုယ်ချမ်းသာဖြင့် သာယာလှပသည့် မြို့၏အလှအပကို ခံစားလည်ပတ်နိုင်ရေးစည်းကမ်းစနစ်တကျဖြင့် ဝိုင်းဝန်းဆောင်ရွက်သွားကြရမည်ဖြစ်ကြောင်း၊ မြို့တွင်နေထိုင်သူများက စနစ်တကျအမှိုက်စွန့်ပစ်ခြင်းများ ဆောင်ရွက်မည်ဆိုပါက Clean City ဖြစ်လာမည် ဖြစ်ပြီး သစ်ပင်ပန်းမန်များ စိုက်ပျိုးမည်ဆိုပါက Green City ဖြစ်လာမည်ဖြစ်ကြောင်း၊ အုပ်ချုပ်ရေးဆိုင်ရာ အဖွဲ့အစည်းများအနေဖြင့်လည်း ဦးဆောင်မှုပေး၍ ဆောင်ရွက်သွားရန်လိုကြောင်း၊ မိမိတို့အနေဖြင့် တိုင်းပြည်ကောင်းအောင် ဆောင်ရွက်နေခြင်းဖြစ်သဖြင့် အားလုံးက ပူးပေါင်းဆောင်ရွက်ပေးကြစေလိုကြောင်း ဆွေးနွေးပြောကြားသည်။

ဒေသထွက်စားသောက်ကုန်များအား ကြည့်ရှုအားပေး

တွေ့ဆုံပွဲအပြီးတွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့် အဖွဲ့ဝင်များသည် တက်ရောက်လာကြသည့် ကော်ဖီလုပ်ငန်းရှင်များနှင့် အသေးစား၊ အငယ်စားနှင့် အလတ်စား စီးပွားရေး(MSME) လုပ်ငန်းရှင်များအား ရင်းရင်းနှီးနှီးနှုတ်ဆက်ခဲ့ပြီး ခင်းကျင်းပြသထားသည့် ဒေသထွက်ကော်ဖီထုတ်ကုန်များနှင့် ဒေသထွက် စားသောက်ကုန်ပစ္စည်းများကို စိတ်ဝင်တစားဖြင့် လေ့လာခဲ့ပြီး ဈေးကွက်ရရှိမှုအခြေအနေများကို မေးမြန်းဆွေးနွေးရာ လုပ်ငန်းအလိုက် တာဝန်ရှိသူများက ပြခန်းများအလိုက် လိုက်လံရှင်းလင်းတင်ပြခဲ့ကြသည်။

ယင်းနောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့်ဇနီး၊ အဖွဲ့ဝင်များသည် အမျိုးသားကန်တော်ကြီးဥယျာဉ်သို့ ရောက်ရှိကြပြီး အမျိုးသားကန်တော်ကြီးဥယျာဉ် နှစ်(၁၀၀)ပြည့်အထိမ်းအမှတ် (၁၇)ကြိမ်မြောက် ပန်းပွဲတော်အား စည်ကားသိုက်မြိုက်စွာဖြင့် ကျင်းပပြုလုပ်ထားရှိမှုများအား ကြည့်ရှုအားပေးပြီး အပန်းဖြေလာရောက်ကြသည့် ပြည်သူများအား ရင်းရင်းနှီးနှီးနှုတ်ဆက်သည်။

ထို့နောက် ဥယျာဉ်အတွင်းရှိ နှစ် ၁၀၀ နီးပါး သက်တမ်းရှိသော ဂင်ဂိုပင် (Ginkgo Biloba) (ကမ္ဘာဦးပင်)အား ကြည့်ရှုပြီး စနစ်တကျထိန်းသိမ်းဆောင်ရွက်သွားရန် တာဝန်ရှိသူများကို မှာကြားသည်။ အဆိုပါ ဂင်ဂိုပင် (Ginkgo Biloba)သည် တရုတ်နိုင်ငံ၊ ဂျပန်နိုင်ငံနှင့်အနောက်နိုင်ငံများတွင် ထင်ရှားကျော်ကြားသည့် အပင်မျိုးစိတ်တစ်ခုဖြစ်ကြောင်း၊ တရုတ်နိုင်ငံအတွင်းရှိ ပြည်နယ်အများအပြား၌ ဆောင်းဦးရာသီတွင် အဝါရောင်အရွက်များ ဖုံးလွှမ်းလျက်ရှိသည့် ဂင်ဂိုပင်များကိုတွေ့ရှိရနိုင်ပြီး အချို့အပင်များသည် နှစ်ပေါင်းထောင်ချီသက်တမ်းရှိပြီဖြစ်ကြောင်း သိရှိရသည်။

ဆက်လက်၍ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်နှင့်ဇနီးတို့က အမျိုးသားကန်တော်ကြီးဥယျာဉ် နှစ်(၁၀၀)ပြည့်အထိမ်းအမှတ်အဖြစ် ချယ်ရီပင်အားစိုက်ပျိုးပေးပြီး ကန်တော်ကြီးဥယျာဉ်အတွင်း လှည့်လည်ကြည့်ရှုကာ ကန်တော်ကြီးအတွင်း မွေးမြူထားသည့် ငါးများနှင့် ဘဲငန်းများအား အစာကျွေးမွေးခဲ့သည်။

ယင်းနောက် ဥယျာဉ်ရှင်းလင်းဆောင်၌ ဥယျာဉ်တာဝန်ခံကုမ္ပဏီမှ အမှုဆောင်အရာရှိချုပ် ဦးရာဇာထွေးက အမျိုးသားကန်တော်ကြီးဥယျာဉ် နှစ်(၁၀၀)ပြည့်အထိမ်းအမှတ် (၁၇)ကြိမ်မြောက် ပန်းပွဲတော်အား စည်ကားသိုက်မြိုက်စွာဖြင့် ကျင်းပခဲ့မှုနှင့် ဥယျာဉ်ရေရှည်တည်တံ့ခိုင်မြဲစေရေး ဆောင်ရွက်လျက်ရှိမှု၊ ဥယျာဉ်ခြံစည်းရိုးအသစ်တည်ဆောက်ရန် လျာထားဆောင်ရွက်လျက်ရှိမှုအခြေအနေများကို ရှင်းလင်းတင်ပြရာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်က နှစ်(၁၀၀)ပြည့် အထိမ်းအမှတ်(၁၇) ကြိမ်မြောက် ပန်းပွဲတော်မှတ်တမ်းဓာတ်ပုံများအား စနစ်တကျထိန်းသိမ်းထားရှိ၍ ပြခန်းပြသထားရှိရန်၊ ဥယျာဉ်အတွင်း အမြဲစိမ်းလန်းစိုပြည်ရန်နှင့် သန့်ရှင်းသာယာလှပမှုရှိစေရန်၊ ကန်တော်ကြီးအတွင်း ရေဝင်ရေထွက်များရှိစေရေး အမြဲထိန်းသိမ်းဆောင်ရွက်လျက်ရှိရန်နှင့် အခြားလိုအပ်သည်များ လမ်းညွှန်မှာကြားသည်။

ထို့နောက် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်ထံ ဥယျာဉ်တာဝန်ခံ ကုမ္ပဏီမှ အမှုဆောင်အရာရှိချုပ်က အမျိုးသားကန်တော်ကြီးဥယျာဉ် နှစ်(၁၀၀)ပြည့်အထိမ်းအမှတ် လက်ဆောင်အား ဂါရဝပြုပေးအပ်ခဲ့ကြောင်း သတင်းရရှိသည်။

Source: www.moi.gov.mm

နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ်  ဗိုလ်ချုပ်မှူးကြီး မင်းအောင်လှိုင်  ပြင်ဦးလွင်မြို့နယ်အတွင်းရှိ အသေးစား၊ အငယ်စားနှင့် အလတ်စား စီးပွားရေး (MSME)လုပ်ငန်းရှင်များနှင့် တွေ့ဆုံ၍ ဒေသဖွံဖြိုးတိုးတက်ရေးနှင့် ဒေသထုတ်ကုန်များတိုးမြှင့်ထုတ်လုပ်ရေးဆိုင်ရာများအား ဆွေးနွေး ပြောကြားသည်။

Source: Myawady Web Portal

အစ္စလာမ်မာဘတ်   ဇန်နဝါရီ ၉

တရုတ်-ပါကစ္စတန် စီးပွားရေးစင်္ကြံအရ ပါကစ္စတန်အနောက်တောင်ပိုင်း ဘလူချီစတန်ပြည်နယ် ဂေါ်ဒါဆိပ်ကမ်းမှတစ်ဆင့် တရုတ်နိုင်ငံနှင့် ပင်လယ်ကွေ့ဒေသနိုင်ငံများအကြား ကုန်သွယ်ရေးမြှင့်တင်ရန် ဆောင်ရွက်မည်ဖြစ်ကြောင်း ပါကစ္စတန်နိုင်ငံ စီမံကိန်း၊ ဖွံ့ဖြိုးတိုးတက်ရေးနှင့် အထူးလုပ်ငန်းများဆိုင်ရာ ဝန်ကြီး အာရှန် အိုဗာက ယနေ့ ပြောကြားသည်။

တရုတ်-ပါကစ္စတန် စီးပွားရေးစင်္ကြံအရ တည်ဆောက်ထားသည့် ၎င်းဆိပ်ကမ်းသည် ‌ဒေသတွင်းစီးပွားရေးနှင့် ကုန်သွယ်ရေးဆိုင်ရာ ဖွံ့ဖြိးတိုးတက်မှုကို အကူအညီပေးခဲ့ကြောင်း ၎င်းက ထပ်လောင်း ပြောကြားသည်။

ပါကစ္စတန်နိုင်ငံ၏ တန်ကြေးရှိသည့် ပိုင်ဆိုင်မှုဟု တင်စားခေါ်ဆိုရသည့် ၎င်းဆိပ်ကမ်းသည် ပင်လယ်ကွေ့ဒေသနိုင်ငံများနှင့် ဗဟိုအာရှနိုင်ငံများအကြား အဓိက ကုန်သွယ်ရေးလမ်းကြောင်းဖြစ်လာခဲ့ပြီး စရိတ်စကနှင့် အချိန်ကုန်သက်သာပြီး ထိရောက်သည့် ကုန်သွယ်ရေးလမ်းကြောင်းကို ဖြစ်လာစေခဲ့ကြောင်း ၎င်းကပြောကြားသည်။

အလုပ်အကိုင်အခွင့်အလမ်းများဖန်တီးရန်နှင့် စီးပွားရေးမြှင့်တင်ရန် ရည်ရွယ်ချက်ဖြင့် ဆိပ်ကမ်းမှတစ်ဆင့် ကုန်သွယ်မှုကို တိုးမြှင့်မည်ဟု သိရသည်။

တရုတ်နိုင်ငံမှ ဆောင်ရွက်သည့် စီးပွားရေးစင်္ကြံစီမံကိန်း၏ အစိတ်အပိုင်းဖြစ်သည့် တရုတ်-ပါကစ္စတန်စီးပွားရေးစင်္ကြံသည် တရုတ်နိုင်ငံအနောက်မြောက်ပိုင်းရှိ ကက်ဂါနှင့် ပါကစ္စတန်ဂေါ်ဒါဆိပ်ကမ်းကို ဆက်သွယ်ထားသောစင်္ကြံတစ်ခုဖြစ်ကာ ၎င်းစီမံကိန်း၏ ပထမအဆင့်တွင် စွမ်းအင်၊ သယ်ယူပို့ဆောင်ရေးနှင့် စက်မှုလုပ်ငန်းကို ဆောင်ရွက်မည်ဖြစ်ကာ အဆင့်သစ်တွင် စိုက်ပျိုးရေးနှင့် အသက်မွေးဝမ်း‌ကျောင်းဆိုင်ရာ နယ်ပယ်များအထိ တိုးချဲ့ဆောင်ရွက်မည်ဖြစ်သည်။

Source: ကြေးမုံသတင်းစာ

Photo- People's Daily

အမေရိကန်နည်းပညာကုမ္ပဏီကြီး Microsoft သည် လာမည့်နှစ်နှစ်အတွင်း cloud computing နှင့် ဉာဏ်ရည်တု အခြေခံအဆောက်အဦအပါအဝင် လေ့ကျင့်ရေးတို့အတွက် အိန္ဒိယတွင် အမေရိကန် ဒေါ်လာ ၃ ဘီလီယံ ရင်းနှီးမြှုပ်နှံမည် ဖြစ်ကြောင်း ကြေညာခဲ့သည်။

အဆိုပါကြေညာချက်ကို လက်ရှိ အိန္ဒိယနိုင်ငံသို့ အလည်အပတ်ရောက်ရှိနေပြီး Bengaluru ၌ ကျင်းပခဲ့ သည့် ပွဲသို့‌ရောက်ရှိနေသည့် Microsoft အမှုဆောင် အရာရှိချုပ် Satya Nadella က ကြေညာခဲ့ခြင်းလည်းဖြစ်သည်။

Microsoft နည်းပညာကုမ္ပဏီကြီးသည် ၂၀၃၀ ပြည့်နှစ် တွင် အိန္ဒိယနိုင်ငံ၌ AI ကျွမ်းကျင်မှုအတွက် လူပေါင်း ၁၀ သန်းကို လေ့ကျင့်ပေးရန်လျာထားသည် ဟုလည်း သိရသည်။

Microsoft က ၎င်း၏ cloud နှင့် ဉာဏ်ရည်တု ဆိုင်ရာ အခြေခံအဆောက်အဦများကို နိုင်ငံအတွင်းရှိ ဒေတာ စင်တာကျောင်းခွဲများတစ်လျှောက် တိုးချဲ့သွားမည် ဖြစ်ကြောင်း သိရှိရသည်။

ယခုရင်းနှီးမြှုပ်နှံမှုသည် အိန္ဒိယနိုင်ငံ၏ လျင်မြန်စွာ တိုးချဲ့နေသော AI start-ups များနှင့် သုတေသန အသိုင်းအဝိုင်း၏ အင်တိုက်အားတိုက် တောင်းဆိုချက် များကို ဖြည့်ဆည်းရန်အတွက် ဉာဏ်ရည်တု ကွန်ပျူတာ ဂေဟစနစ်ကို ဖွံ့ဖြိုးတိုးတက်စေရန် ရည်ရွယ်ခြင်း ဖြစ်သည်ဟုလည်း သတင်းထုတ်ပြန်ချက်တွင် ဖော်ပြ ထားသည်။

ကိုးကား - ဆင်ဟွာ

Samsung Electronics ကုမ္ပဏီသည် ၂၀၂၄ ခုနှစ် စတုတ္ထ ၃ လပတ်အတွက် ကုမ္ပဏီ၏ အမြတ်ငွေသည် စျေးကွက်၏မျှော်မှန်းချက်ထက် နည်းပါးမည်ဟု ခန့်မှန်းထားကြောင်းသိရှိရသည်။ အဆိုပါ တောင်ကိုရီးယားကုမ္ပဏီအနေဖြင့် အမြတ်ငွေနည်းပါးမှုဖြစ်ရသည့်အဓိကအချက်များတွင် ကွန်ပျူတာနှင့် အခြားမိုဘိုင်းထုတ်ကုန်များ၏ ဝယ်လိုအား ကျဆင်းခဲ့ခြင်းလည်း ပါဝင်ကြောင်း သိရှိရပါသည်။

တစ်ပိုင်းလျှပ်ကူးပစ္စည်းထုတ်လုပ်သော အဓိက ကုမ္ပဏီ ကြီးတစ်ခုဖြစ်သည့် Samsung ၏ စတုတ္ထ ၃ လပတ် ကာလအတွင်း ခန့်မှန်းအမြတ်ငွေသည် နှစ်အလိုက် နှိုင်းယှဉ်ပါက ၁၀၀ ရာခိုင်နှုန်းကျော် တက်လာသော်လည်းစျေးကွက်ရှိ အရောင်းအဝယ်သမားများ မျှော်လင့် ထားသည်ထက် များစွာ လျော့နည်းနေပါသည်။

ပဏာအမြတ်ငွေသည် ဝမ် ၆.၅ ထရီလီယံ (အမေရိကန် ဒေါ်လာ ၄.၅ ဘီလီယံ) ဖြစ်ပြီး ယခုလနှောင်းပိုင်း၌ အတည်ပြုအမြတ်ငွေကို ၎င်းကုမ္ပဏီက ကြေညာမည် ဖြစ်သည်။

ယခုကဲ့သို့ ရလဒ်မကောင်းခြင်းသည် စွမ်းရည်မြင့် Memory Chips ဈေးကွက်တွင် Samsung အနေဖြင့် စွမ်းဆောင်မှုနှိုင်းယှဉ်နိုင်စွမ်း ကျဆင်းခဲ့ခြင်းကြောင့် ဖြစ်သည်ဟု လေ့လာသုံးသပ်သူများက ယူဆကြသည်။

အဆိုပါ စတုတ္ထ ၃ လပတ်အတွက် ရောင်းအားသည် အမေရိကန်ဒေါ်လာ ၄.၈ ဘီလီယံတိုးလာပြီး ဒေါ်လာ ၅၁.၅ ဘီလီယံရှိသည်ဟု Samsung က ဆိုပါသည်။

Samsung သည် သုတေသနနှင့် ဖွံ့ဖြိုးတိုးတက်ရေး ကုန်ကျစရိတ်များ မြင့်မားလာခြင်းနှင့် အခြားကုမ္ပဏီများအကြား ပြိုင်ဆိုင်မှုပိုမိုပြင်းထန်လာကြောင်းလည်း ထုတ်ဖော်ပြောကြားခဲ့ပါသည်။

ကိုးကား-NHK World

ဖိလစ်ပိုင်နိုင်ငံသည် ပြီးခဲ့သည့် ၂၀၂၄ခုနှစ်အတွင်း ခရီးသွားလာရေးလုပ်ငန်းများမှ အခွန်ဘဏ္ဍာအဖြစ် ပီဆို ၇၆၀ ဒသမ ၅ ဘီလီယံ  (အမေရိကန်ဒေါ်လာ ၁၃ ဒသမ ၁ ဘီလီယံ) ရရှိခဲ့ကြောင်း  ခရီးသွားလာရေးဌာနက ထုတ်ပြန်သည်။

နိုင်ငံအတွင်းသို့ ၂၀၂၄ ခုနှစ်အတွင်း နိုင်ငံတကာမှ ခရီးသွား ၆ သန်းနီးပါးဝင်ရောက်လာခဲ့ပြီး ၂၀၂၃ ခုနှစ်က ဝင်ရောက်ခဲ့သည့် ခရီးသွားဦးရေထက် ၉ ဒသမ ၁၅ ရာခိုင်နှုန်းမြင့်တက်လာခဲ့ကြောင်း   ခရီးသွားလာရေးဌာနက ဇန်နဝါရီလ ၆ရက်တွင် ထုတ်ပြန်သည့်ကြေညာချက်တွင် ဖော်ပြသည်။

နိုင်ငံအတွင်းသို့ ဝင်ရောက်လာခဲ့သည့် ခရီးသွားများအနက် ၉၁ ဒသမ ၄၂ ရာခိုင်နှုန်း သို့မဟုတ်   လူ ၅ ဒသမ ၄ သန်းကျော်မှာ နိုင်ငံခြားသားများဖြစ်ပြီး    ၈ ဒသမ ၅၈ ရာခိုင်နှုန်း  သို့မဟုတ် လူ  ၅၁၀,၃၈၃ ဦးမှာ ပြည်ပရောက် ဖိလစ်ပိုင်နိုင်ငံသားများ ဖြစ်ကြောင်း သိရသည်။

ခရီးသွားလုပ်ငန်းမှရရှိသည့်   အခွန်ဘဏ္ဍာပမာဏသည် နိုင်ငံအတွင်း ကိုဗစ်၁၉ ရောဂါကူးစက်မှု မဖြစ်ပွားမီကာလက ရရှိသည့်ပမာဏထက် ပိုမိုမြင့်တက်လာကြောင်း၊ ထို့ကြောင့် နိုင်ငံ၏ခရီးသွားလုပ်ငန်းသည် ပြန်လည်ကောင်းမွန်လာခဲ့သည့်အပြင် နိုင်ငံ၏ စီးပွားရေး တည်ငြိမ်စေရန်အတွက်လည်း အထောက်အကူပြုနိုင်ခဲ့ကြောင်း   ခရီးသွားလာရေးဝန်ကြီး ခရစ်စတီးနား ဂါးစီးယားဖရာဆိုက ပြောကြားခဲ့ကြောင်း သိရသည်။

Ref: Xinhua

Source: Myawady Web Portal

အမေရိကန်ပြည်ထောင်စုတွင် ပြီးခဲ့သည့် ၂၀၂၄ ခုနှစ်အတွင်း စီးပွားရေးကုမ္ပဏီ ၆၈၆ ခု ဒေဝါလီခံခဲ့ရခြင်းကြောင့်   ယင်းပမာဏသည် ကမ္ဘာ့ဘဏ္ဍာရေး အကျပ်အတည်းဖြစ်ပွားသည့်   ၂၀၁၀ ပြည့်နှစ်မှစ၍ အမြင့်ဆုံးအဆင့်သို့ ရောက်ရှိလာသည်။

အမေရိကန်ကုမ္ပဏီများ  ပိုမိုဒေဝါလီခံရခြင်းသည် အစိုးရက အတိုးနှုန်းမြှင့်တင်နေပြီး အမေရိကန် နိုင်ငံတစ်ဝန်းလုံးတွင်လည်း ဝယ်လိုအားများ ကျဆင်းနေချိန်ဖြစ်ပွားခဲ့ခြင်း ဖြစ်သည်။ ဒေဝါလီခံခဲ့ရသည့် အဓိကအမေရိကန် စီးပွားရေးလုပ်ငန်းကြီးများတွင် အစားအသောက်သိုလှောင်ရေး ကုမ္ပဏီတစ်ခုဖြစ်သည့်      Tupperware၊ စားသောက်ဆိုင်လုပ်ငန်းများကို ပိုင်ဆိုင်ထားသည့် Red Lobster၊ အဖိုးနှုန်းချိုသာသည့် လေကြောင်းလိုင်းတစ်ခုဖြစ်သော Spirit လေကြောင်းနှင့် အလှကုန်ပစ္စည်းရောင်းချသည့်ကုမ္ပဏီတစ်ခုဖြစ်သော Avon Products တို့ပါဝင်သည်။

အမေရိကန်တွင် ဒေဝါလီခံရန် လျှောက်ထားသည့် စီးပွားရေးလုပ်ငန်းများအရေအတွက်သည် ၂၀၂၄ခုနှစ် ဇွန်လအတွင်း သိသိသာသာ မြင့်တက်လာခဲ့သည်။ ယင်းတစ်လတည်းမှာပင်  စီးပွားရေးလုပ်ငန်း အနည်းဆုံး ၇၅ ခု   ဒေဝါလီခံယူရန် လျှောက်ထားခဲ့ပြီး   ယင်းပမာဏသည် လွန်ခဲ့သည့် ၁၃နှစ်က ပမာဏထက်ပိုမို များပြားနေသည်။

အလားတူပင် ၂၀၂၄ခုနှစ် ဇွန်လ ၁၇ ရက်တွင် အမေရိကန် မော်တော်ကားကုမ္ပဏီတစ်ခုဖြစ်သည့် Fisker Group Inc. ဒေဝါလီခံရန်လျှောက်ထားခဲ့ရသည်။   အဆိုပါကုမ္ပဏီသည်   ၎င်းတို့၏ မော်တော်ကားထုတ်လုပ်မှု လုပ်ငန်းများကို ၂၀၂၄ ခုနှစ်မတ်လကတည်းက ရပ်ဆိုင်းပစ်ခဲ့ခြင်း ဖြစ်သည်။

၂၀၂၄  ခုနှစ် ဇွန်လအကုန်ပိုင်းတွင် အမေရိကန်ပြည်ထောင်စုအတွင်း ဒေဝါလီခံရသည့် စီးပွားရေး လုပ်ငန်းပမာဏမှာ ယခင်နှစ်၊ အလားတူကာလနှင့် နှိုင်းယှဉ်ပါက ၁၆ ဒသမ ၂ ရာခိုင်နှုန်းမြင့်တက်လာခဲ့သည်ဟု အမေရိကန် တရားရုံးများဆိုင်ရာ စီမံခန့်ခွဲရေးရုံးမှ ထုတ်ပြန်သည့် အချက်အလက်များတွင် ဖော်ပြထားသည်။

စီးပွားရေးအခြေအနေများကြောင့် ဒေဝါလီခံယူရန် တရားရုံးများသို့ လျှောက်ထားခဲ့ရသည့် လူပုဂ္ဂိုလ်အရေအတွက်မှာလည်း ၂၀၂၄ ခုနှစ် ဇွန်လအကုန်ပိုင်းတွင် ၄၆၄,၅၅၃ ဦးအထိ   မြင့်တက်လာခဲ့ပြီး ရာခိုင်နှုန်းအားဖြင့် ၁၅ ဒသမ ၃ ရာခိုင်နှုန်းရှိသည်။

ထို့ပြင် သမ္မတဂျိုးဘိုင်ဒင်လက်ထက်တွင် ကမ္ဘာ့စီးပွားရေးအတွင်း အမေရိကန်စီးပွားရေးလုပ်ငန်းများ၏ ပါဝင်မှုသည် ၁၅ ရာခိုင်နှုန်းအောက်အထိ ကျဆင်းလာခဲ့ကြောင်း အပြည်ပြည်ဆိုင်ရာငွေကြေးရန်ပုံငွေအဖွဲ့နှင့် ကမ္ဘာ့ဘဏ်တို့ကထုတ်ပြန်သည့်အချက်များတွင် ဖော်ပြထားသည်။

ထို့ကြောင့်  အရွယ်ရောက်ပြီး အမေရိကန်ပြည်သူ ၄၈ ရာခိုင်နှုန်းက နိုင်ငံ၏လက်ရှိအခြေအနေကို ဆိုးရွားလျက်ရှိသည်ဟု ရှုမြင်နေကြကြောင်း လူထုသဘောထားစစ်တမ်းတစ်ရပ်တွင် ဖော်ပြထားသည်။

ထို့ပြင် ဂျိုးဘိုင်ဒင်သမ္မတအဖြစ် တာဝန်ယူသည့် ၂၀၂၁ ခုနှစ် ဇန်နဝါရီလမှ ၂၀၂၄ ခုနှစ် စက်တင်ဘာလအထိ ကာလသည် အမေရိကန်ပြည်သူများ၏ ဘဏ္ဍာရေးအခြေအနေသည်  ပိုမိုယိုယွင်းလာခဲ့ကြောင်း မစ်ချီဂန်တက္ကသိုလ်က လစဉ်ထုတ်ဝေသည့် အတွေးအမြင်ကဏ္ဍ၌ ဖော်ပြထားသည်။

ဂျိုးဘိုင်ဒင်အစိုးရ၏ Bidenomics စီးပွားရေးစနစ်သည် လုံးဝလျှော့ချ၍မရနိုင်သည့် ကပ်ဆိုက်မှု တစ်ရပ်ဖြစ်သည်ဟု အမေရိကန်ပြည်သူများကယူဆလျက်ရှိသည်။ ဘိုင်ဒင်အစိုးရ၏ မူဝါဒများကြောင့် ဆိုးရွားကြီးမားသည့်ငွေကြေးဖောင်းပွမှုကိုဖြစ်ပေါ်စေပြီး   ဝင်ငွေနည်းသည့် အမေရိကန် ပြည်သူများအနေဖြင့် ၎င်းတို့လိုအပ်သည့်   အခြေခံကုန်ပစ္စည်းများအတွက် ငွေကြေးကို ပိုမိုသုံးစွဲရလျက်ရှိသည်။

ထို့ပြင် ဘိုင်ဒင်အစိုးရ၏ Bidenomics စီးပွားရေးစနစ်သည် နိုင်ငံ့စီးပွားရေးကို ပျက်စီးစေခဲ့သည့်အပြင် အမေရိကန်နိုင်ငံသားမိသားစုအများအပြားသည် ၎င်း၏စီးပွားရေးမူဝါဒနှင့်ကိုက်ညီမှုမရှိ ကြောင်း အမေရိကန်အောက်လွှတ်တော် ဥက္ကဋ္ဌ မိုက်ဂျွန်ဆင်ကပြောကြားသည်။

Ref: Sputnik, UC

Source: Myawady Web Portal

အင်ဒိုနီးရှားနိုင်ငံသည် BRICS အဖွဲ့ဝင်နိုင်ငံအဖြစ်    ဝင်ရောက်ခဲ့ပြီဖြစ်ကြောင်း ဘရာဇီးအစိုးရ၏  ထုတ်ပြန်ချက်တွင် ဖော်ပြထားသည်။

အင်ဒိုနီးရှားနိုင်ငံသည် BRICS အဖွဲ့သို့ ဝင်ရောက်ရန်ဆန္ဒရှိကြောင်း ယခင်ကတည်းက ဖော်ပြခဲ့သည်။   ဘရာဇီးနိုင်ငံသည် ၂၀၂၅   ခုနှစ်အတွက်  BRICS အဖွဲ့၏အလှည့်ကျဥက္ကဋ္ဌအဖြစ် တာဝန်ယူစဉ် အင်ဒိုနီးရှားနိုင်ငံ၏ ပူးပေါင်းပါဝင်မည့် ကြိုးပမ်းချက်ကို အများ၏ဆန္ဒနှင့်အညီ ဇန်နဝါရီလ ၆ ရက်တွင် သဘောတူခွင့်ပြုခဲ့ခြင်း ဖြစ်သည်။

BRICS အဖွဲ့သို့ဝင်ရောက်ရန် အင်ဒိုနီးရှားနိုင်ငံအား ၂၀၂၃ ခုနှစ်ကတည်းက ခွင့်ပြုခဲ့ခြင်းဖြစ်သော်လည်း ယင်းနိုင်ငံအတွင်း၌ ၂၀၂၄ ခုနှစ် သမ္မတရွေးကောက်ပွဲကျင်းပပြီးချိန်မှ ဝင်ရောက်ရန် BRICS အဖွဲ့က တိုက်တွန်းခဲ့ခြင်း ဖြစ်ကြောင်း   သိရသည်။

BRICS အဖွဲ့သည် ကနဦးတွင် ဘရာဇီး၊ ရုရှား၊ အိန္ဒိယ၊ တရုတ်နှင့် တောင်အာဖရိကတို့ဖြင့် ဖွဲ့စည်းထားသော်လည်း ယခုအခါ အင်ဒိုနီးရှား၊ အီဂျစ်၊ အီသီယိုးပီးယား၊ အီရန်နှင့်  အာရပ်စော်ဘွားများ ပြည်ထောင်စု စသည့်နိုင်ငံများပါ အဖွဲ့ဝင်အဖြစ် ပါဝင်လာပြီ ဖြစ်သည်။

Ref: ST

Source: Myawady Web Portal

တရုတ်နိုင်ငံ၏ အစိုးရစီမံခန့်ခွဲသူက တစ်နိုင်ငံလုံးအတိုင်းအတာဖြင့် ဈေးကွက်တစ်ခုတည်းစနစ်ကိုအကောင်အထည်ဖော်မည့် လမ်းညွှန်ချက်များကို ဇန်နဝါရီ ၇ ရက်နေ့ တွင် ထုတ်ပြန်ခဲ့ပါသည်။ တရုတ် နိုင်ငံသည် အနာဂတ်တွင် ဘုံဈေးကွက် ချိတ်ဆက်မှု စနစ်တစ်ခုကို အကောင်အထည်ဖော်ဆောင်ရွက်မည် ဖြစ်ပြီး ဈေးကွက်တွင် တရားမျှတစွာ ယှဉ်ပြိုင်နိုင်ရေး ကိုလည်း ဆောင်ရွက်သွားမည် ဖြစ်ပါသည်။ 

အဆိုပါဈေးကွက်တစ်ခုတည်းစနစ်ကို ကျင့်သုံးမည်ဆိုပါက ဒေသခံအစိုးရများကို ပြည်မကြီးနှင့်ဆန့်ကျင်သော ဘဏ္ဍာရေး၊ အခွန် ၊ဈေးနှုန်းသတ်မှတ်ချက် ၊ မြေယာ ၊ အရင်းအမြစ်များနှင့် သဘာဝပတ်ဝန်းကျင်တို့အတွက် သီးခြားရင်းနှီးမြှုပ်နှံမှု မူဝါဒများကို အကောင်အထည်ဖော်ခွင့်ပြုမည်မဟုတ်ကြောင်း တရုတ်နိုင်ငံအမျိုးသား ဖွံ့ဖြိုးရေးနှင့်ပြုပြင်ပြောင်းလဲရေးကော်မရှင်က ထုတ်ပြန်ခဲ့ပါသည်။ 

ကိုးကား - Reuters

လက်ရှိ BRICS အဖွဲ့၏အလှည့်ကျ ဥက္ကဋ္ဌ တာဝန်ယူထားသည့် ဘရာဇီးလ်က အင်ဒိုနီးရှားသည် BRICS အဖွဲ့၏ တင်းပြည့်အဖွဲ့ဝင်ဖြစ်လာကြောင်း ဇန်နဝါရီ ၆ ရက်ကကြေညာခဲ့သည်။

BRICS ကို ဘရာဇီး၊ရုရှား၊အိန္ဒိယနှင့်တရုတ်တို့က ၂၀၀၉ ခုနှစ်တွင် စတင်တည်ထောင်ခဲ့ပြီး နှစ်နှစ်အကြာတွင် တောင်အာဖရိကသည် အဖွဲ့ဝင်အဖြစ် ပူးပေါင်းခဲ့သည်။ အဖွဲ့အား အပြန်အလှန်ရင်းနှီးမြုပ်နှံမှုနှင့် ငွေကြေး တည်ငြိမ်မှုရရှိစေမည့် စီးပွားရေးစင်္ကြံတစ်ခုအဖြစ် မူလ က မျှော်မှန်းထားသော်လည်း နောက်ပိုင်းတွင် လုံခြုံရေး ကိစ္စရပ်များအပါအဝင် ပိုမိုကျယ်ပြန့်သောကိစ္စရပ်များကိုပူးပေါင်းဆောင်ရွက်နိုင်မည့် ဖိုရမ်တစ်ခုအဖြစ် ပြောင်းလဲ လာသည်။ 

၂၀၂၃ ခုနှစ်ကပင် အဖွဲ့ဝင်လောင်းအဖြစ် BRICS က ထောက်ခံခဲ့သော်လည်း လူဦးရေ သန်း၂၇၀ ကျော် ရှိသည့် ကမ္ဘာ့စတုတ္ထလူဦးရေအများဆုံးနိုင်ငံကို ယခင် နှစ်က အစိုးရသစ်ဖွဲ့စည်းပြီးချိန်တွင်မှ ဝင်ရောက်ရန် အတည်ပြုရွေးချယ်ခဲ့သည်။

၂၀၂၄ ခုနှစ်အတွင်းတွင် အီရန်၊ အီဂျစ်၊ အီသီယိုးပီးယားနှင့် အာရပ်စော်ဘွားများပြည်ထောင်စုတို့က BRICS ၏ တင်းပြည့်အဖွဲ့ဝင်များဖြစ်လာခဲ့ပြီး ယခုနှစ်တွင် ဘီလာရုစ်၊ ဘိုလီးဗီးယား၊ ကာဇက်စတန်၊ ထိုင်း၊ ကျူးဘား၊ ယူဂန်ဒါ၊ မလေးရှားနှင့် ဥဇဘက်ကစ္စတန် တို့က BRICS ၏ တရားဝင် မိတ်ဖက်နိုင်ငံများ ဖြစ်လာ သည်။

BRICSနှင့်ပူးပေါင်းဆောင်ရွက်ရန် အခြားနိုင်ငံ နှစ်ဒါဇင်ကျော်ကလည်း စိတ်ဝင်စားမှုရှိကြောင်း ရုရှားထိပ်တန်း တာဝန်ရှိသူများ၏ ပြောကြားချက်အရ သိရသည်။ မော်စကိုသည် အဖွဲ့၏ အလှည့်ကျ ဥက္ကဋ္ဌအဖြစ် ၂၀၂၄ ခုနှစ်ကတာဝန်ယူခဲ့သည်။

ကိုးကား-RT