၂၈-၃-၂၀၂၅ ရက်နေ့က လှုပ်ခတ်ခဲ့သော မန္တလေးမြေငလျင်ကြီးကြောင့် မန္တလေးတိုင်းဒေသကြီး ၊ တံတားဦးခရိုင်၊ တံတားဦးမြို့နယ်အတွင်းရှိ ငလျင်ဘေးဒဏ်သင့် ပြည်သူများအား အမျိုးသားသဘာဝဘေးစီမံခန့်ခွဲမှု ကော်မတီမှ ထောက်ပံ့ပေးအပ်သော ထောက်ပံ့ပစ္စည်းများ ပေးအပ်ပွဲအခမ်းအနားကို ဧပြီ ၂၂ရက်နေ့ နံနက် (၁၀) နာရီက တံတားဦးမြို့ မြို့နယ်ခန်းမ၌ ကျင်းပကြောင်းသိရသည် ။

အခမ်းအနားတွင် တံတားဦးမြို့နယ် အမျိုးသားသဘာဝဘေးစီမံခန့်ခွဲမှုကော်မတီ ဥက္ကဋ္ဌ၊ မြို့နယ်စီမံအုပ်ချုပ်ရေး အဖွဲ့ ဥက္ကဋ္ဌ ဦးဖြိုးဇော်ကိုကိုက အမှာစကားပြောကြားရာတွင် ၂၈-၃-၂၀၂၅ ရက်နေ့က လှုပ်ခတ်ခဲ့သော မန္တလေး မြေငလျင်ကြီးကြောင့် ပြည်သူများအတွက် အလွန်ပင်စိတ်မကောင်းဖြစ်မိပါကြောင်း၊ ထို့အပြင် ပြည်သူများ အနေဖြင့် ကျန်းမာရေးစောင့်ရှောက်မှုများကိုလည်း အချိန်မီဆောင်ရွက်ပေးနိုင်သကဲ့သို့ ကူညီရှာဖွေ ကယ်ဆယ်ရေး လုပ်ငန်းများ၊ ရှင်းလင်းဆောင်ရွက်ခြင်းလုပ်ငန်းများကိုလည်း ဆောင်ရွက်ပေးနိုင်ခဲ့ပါကြောင်း၊ ထိုနည်းတူ ပြည်သူ များအတွက် နေထိုင်ရေး ၊ အစားအသောက် ၊ လူသုံးကုန်ပစ္စည်းများ ရရှိရေးတို့ကိုလည်း အချိန်မီ ဆောင်ရွက် ပေးခဲ့ပါကြောင်း၊ သန့်ရှင်းသော သောက်သုံးရေ ရရှိရေးကိုလည်းကြိုးပမ်းဆောင်ရွက်ပေးခဲ့ပါကြောင်းနှင့်  အမျိုးသား သဘာဝဘေးစီမံခန့်ခွဲမှုကော်မတီနှင့် အလှူရှင်များမှ ထောက်ပံ့သောပစ္စည်းများကို ဘေးသင့်ပြည်သူများ လက်ဝယ် အရောက် ဖြန့်ဖြူးထောက်ပံ့ ပေးစေလိုကြောင်း အကျယ်တဝင့်ရှင်းလင်းပြောကြားသည် ။

ဆက်လက်၍ တံတားဦးမြို့နယ် အမျိုးသားသဘာဝဘေးစီမံခန့်ခွဲမှုကော်မတီ ဥက္ကဋ္ဌ၊ မြို့နယ် စီမံအုပ်ချုပ်ရေးအဖွဲ့ ဥက္ကဋ္ဌ ဦးဖြိုးဇော်ကိုကိုနှင့်တာဝန်ရှိသူများ ၂၈-၃-၂၀၂၅ ရက်နေ့က လှုပ်ခတ်ခဲ့သော မန္တလေးမြေငလျင်ကြီးကြောင့် ငလျင်ဘေးဒဏ်သင့်ပြည်သူများအား ထောက်ပံ့ပစ္စည်းများ‌ ထောက်ပံ့ပေးအပ်ကြသည်။

တံတားဦးမြို့နယ်အနေဖြင့် ၂၈-၃-၂၀၂၅ ရက်နေ့က လှုပ်ခတ်ခဲ့သော မန္တလေးမြေငလျင်ကြီးကြောင့် တံတားဦး မြို့နယ်အနေဖြင့် လုံးဝပျက်စီးသည့်အိမ်ပေါင်း (၈၁၆) အိမ် ၊ တစ်စိတ်တစ်ပိုင်းပျက်စီးသည့်အိမ်ပေါင်း (၁၀၄၅) အိမ် ရှိပါကြောင်း ပျက်စီးဆုံးရှုံးသည့်အိမ်များအတွက် အမျိုးသားသဘာဝဘေးစီမံခန့်ခွဲမှုကော်မတီမှ စားသောက်ကုန်များ၊ ဆေးဝါးပစ္စည်းများ ၊ ကယ်ဆယ်ရေးပစ္စည်းများနှင့်လူသုံးကုန်ပစ္စည်းများ၊ကို ထောက်ပံ့ပေးခဲ့ကြောင်းသိရသည်။

ပေးပို့သူ- ဦးရဲတင့်( ပြန်/ဆက်)

နွေရာသီတွင် ရာသီဥတုပူပြင်းလာပြီ ဖြစ်သဖြင့် ခန္ဓာကိုယ်အတွင်းရှိ ရေနှင့်ဓာတ်ဆားဓာတ်များ ဆုံးရှုံးမှု ပိုမိုများပြားပါသည်။ အပူဒဏ် အန္တရာယ်ကြောင့် မိတ်နှင့် ယားဖုများထွက်ခြင်း၊ ပင်ပန်းနွမ်းနယ်ခြင်း၊ မူးဝေခြင်း၊ ခေါင်းကိုက်ခြင်း၊ ကြွက်တက်ခြင်း၊ ချွေးခြောက်ခြင်း၊ ကိုယ်အပူချိန်မြင့်တက်ခြင်း၊ သတိလစ်ခြင်းတို့အပြင် ပြင်းထန်စွာခံစားရပါက အသက်အန္တရာယ် ထိခိုက်နိုင်ပါသည်။

ပြည်သူများအနေဖြင့် အပူဒဏ်အန္တရာယ်ကြောင့် မလိုလားအပ်သော အကျိုးဆက်များ မဖြစ်ပေါ်စေရေးအတွက် 

(၁) ကလေးသူငယ်များ၊ သက်ကြီးရွယ်အိုများနှင့် ဆီးချိုရောဂါ၊ နှလုံးရောဂါ၊ သွေးတိုးရောဂါအခံရှိသူများအနေဖြင့် နေ့လယ်နေ့ခင်းအချိန်တွင် အရိပ်ရာအေးမြ၍ လေဝင်လေထွက်ကောင်းသော နေရာများတွင် နားနေပါ။

(၂) ပူပြင်းသည့် နေရောက်အောက်တွင် ပြင်းထန်စွာအလုပ်လုပ်ခြင်းနှင့် ကိုယ်လက်လှုပ်ရှားမှုပြုလုပ်ခြင်းတို့ကို ရှောင်ကြဉ်ပါ။

(၃) ပူပြင်းသည့်နေရောင်အောက်တွင် သွားလာလှုပ်ရှားရန်၊ အလုပ်လုပ်ရန် လိုအပ်ပါကလည်း အရိပ်လုံလောက်စွာရနိုင်သည့် ဦးထုပ်များ ဆောင်းသွားပါ။ အရိပ်ရအေးမြသည့် နေရာများတွင် ခေတ္တ အနားယူခြင်းကိုလည်း မကြာခဏ ပြုလုပ်ပါ။

(၄) အလင်းပြန်သော အဖြူရောင် (သို့မဟုတ်) အရောင်ဖျော့သော ပွပွချောင်ချောင် ချည်ထည်များကို ဝတ်ဆင်ပါ။ 

(၅) နေပူထဲမှ ပြန်လာပြီး ချက်ချင်းရေချိုးခြင်းနှင့် နံနက် (၁၀)နာရီမှ ညနေ (၅) နာရီအထိ လွင်တီးခေါင်ပြင်၊ မြစ်ကမ်းနား၊ ရေချိုးဆိပ်များ၌ အဝတ်လျှော်ဖွပ်ခြင်း၊ ရေချိုးခြင်း စသည်တို့ကို ရှောင်ကြဉ်ပါ။

(၆) ပူပြင်းသော နေရောင်အောက်တွင် အလွန်အေးသောအခန်းနှင့် ကားအတွင်းမှ ပူပြင်းသော နေရောင်ထဲသို့ ချက်ချင်းထွက်ခြင်းနှင့် အလွန်အေးသော အခန်းနှင့် ကားအတွင်းသို့ ချက်ချင်းဝင်ရောက်ခြင်းတို့ကို ရှောင်ကြဉ်ပါ။ 

(၇) အရက်သေစာသောက်သုံးခြင်းကြောင့် အပူဒဏ်အန္တရာယ်ကို ပိုမိုခံစားရစေနိုင်ပြီး ဖြစ်ပွားပါက ပိုမို ပြင်းထန်စွာ ခံစားရနိုင်သဖြင့် ရှောင်ကြဉ်ပါ။

(၈) ခန္ဓာကိုယ်အတွင်း ရေနှင့်ဓာတ်ဆားဓာတ်များ ဆုံးရှုံးမှုမဖြစ်ပေါ်စေရန်နှင့် ရေနှင့် ဓာတ်ဆားရည်ကို လုံလောက်အောင် သောက်သုံးပါ။

(၉) မိတ်နှင့်ယားဖုများ ထွက်ပါက ရေအေးဝတ်ကပ်ခြင်း၊ သနပ်ခါးလိမ်းခြင်းတို့ကို ပြုလုပ်ပါ။

(၁၀)      အပူဒဏ်အန္တရာယ်ခံစားနေရသော လူနာအား အရိပ်ရအေးမြ၍ လေဝင်လေထွက်ကောင်းသော နေရာတွင်ထားရှိခြင်း၊ ရေနှင့်ဓာတ်ဆားရည်များ သောက်သုံးစေခြင်း၊ လူနာ၏ ခန္ဓာကိုယ်အပူချိန်အမြန်ကျဆင်းစေရန် နဖူး၊ လည်ပင်း၊ ချိုင်းကြား (၂) ဖက်နှင့် ပေါင်ခြံ (၂) ဖက်တို့အား ရေအေးပတ်တိုက်ပေးခြင်း စသည်တို့အား ဦးစွာဆောင်ရွက်၍ နီးစပ်ရာဆေးရုံ/ ဆေးခန်း/ ကျန်းမာရေးဌာနသို့ အမြန်ဆုံး သွားရောက်ပြသ၍ ကုသမှုခံယူစေပါ။

ကိုးကား-MRTV

ရန်ကုန်   ဧပြီ    ၂၃

မလေးရှားနိုင်ငံ ဝန်ကြီးချုပ်ဟောင်း H.E. Tun Abdullah Bin Haji Ahmad Badawi  သည်  ဧပြီလ ၁၄  ရက်တွင် ကွယ်လွန်သွားခဲ့ခြင်းအတွက် အမှတ် ၈၂ ပြည်ထောင်စုရိပ်သာလမ်း ဒဂုံမြို့နယ် ရန်ကုန်မြို့ရှိ မြန်မာနိုင်ငံဆိုင်ရာ မလေးရှားနိုင်ငံ သံရုံးတွင် ဖွင့်လှစ်ထားရှိသော  ဝမ်းနည်းကြောင်းမှတ်တမ်းစာအုပ်တွင် ပြည်ထောင်စုသမ္မတမြန်မာနိုင်ငံအစိုးရကိုယ်စား နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံးဝန်ကြီးဌာန(၂) ပြည်ထောင်စုဝန်ကြီး ဦးကိုကိုလှိုင်သည် ယနေ့မွန်းလွဲပိုင်းတွင် သွားရောက် လက်မှတ်ရေးထိုးသည်။

ဦးစွာ ပြည်ထောင်စုဝန်ကြီးသည် မလေးရှားနိုင်ငံသံရုံးမှ သံရုံးယာယီတာဝန်ခံနှင့် တာဝန်ရှိသူများအား သံရုံးဧည့်ခန်းမတွင် ခင်မင်ရင်းနှီးစွာ တွေ့ဆုံ၍ မလေးရှားနိုင်ငံ ဝန်ကြီးချုပ်ဟောင်း ကွယ်လွန်ခဲ့ခြင်းအပေါ် ဝမ်းနည်းကြောင်းနှင့် စာနာထောက်ထားကြောင်း သတင်းစကားပြောကြားခဲ့ပြီး ဝမ်းနည်းကြောင်း မှတ်တမ်းစာအုပ်၌ လက်မှတ်ရေးထိုးသည်။

H.E. Tun Abdullah Bin Haji Ahmad Badawi  သည် မလေးရှားနိုင်ငံ၏ ငါးဦးမြောက်ဝန်ကြီးချုပ်အဖြစ် ၂၀၀၃ ခုနှစ်မှ ၂၀၀၉ ခုနှစ်အထိ ခြောက်နှစ်ကြာ တာဝန်ထမ်းဆောင်ခဲ့ကြောင်း သိရသည်။

Source: Myawady Webportal

မန္တလေးတိုင်းဒေသကြီး၊ တံတားဦးခရိုင်၊ တံတားဦးမြို့နယ် ပြည်သူ့ဆေးရုံကြီးဝန်းအတွင်း သန့်ရှင်းသာယာလှပရေးအတွက် တံတားဦးခရိုင် စီမံအုပ်ချုပ်ရေးအဖွဲ့၏ ဦးဆောင်မှုဖြင့်ခရိုင်အဆင့်ဌာနဆိုင်ရာများ၊ တံတားဦး မြို့စီမံအုပ်ရေးအဖွဲ့မှ တာဝန်ရှိသူများ ၊ မြို့နယ်အဆင့်ဌာနဆိုင်ရာများ၊ ဝန်ထမ်းများပူးပေါင်းပြီး ပြည်သူ့အကျိုးပြု စုပေါင်းသန့်ရှင်းရေးကို ဧပြီ ၂၄ ရက်၊ နံနက် (၇) နာရီက အဆိုပါပြည်သူ့ဆေးရုံကြီး၌ ဆောင်ရွက်ကြကြောင်း သိရသည် ။

အဆိုပါ စုပေါင်းသန့်ရှင်းရေးပြုလုပ်ရာသို့ တံတားဦးခရိုင်စီမံအုပ်ချုပ်ရေးအဖွဲ့ ဥက္ကဋ္ဌ ဦးကျော်ငြိမ်းနှင့် တာဝန်ရှိသူများ၊ မြို့နယ်စီမံအုပ်ချုပ်ရေးအဖွဲ့၊ အဖွဲ့ဝင်(၁) ဗိုလ်မှူးသန်းနိုင်ဦးနှင့် တာဝန်ရှိသူများ၊ မြို့နယ်အဆင့်ဌာနဆိုင်ရာများ၊ ဝန်ထမ်းများ၊ မြို့မရဲစခန်းမှ ရဲတပ်ဖွဲ့ဝင်များ၊ မြို့နယ်ပြည်သူ့ဆေးရုံမှဝန်ထမ်းများနှင့်အတူ  ပြည်သူ့ဆေးရုံကြီးဝန်းအတွင်းရှိ ချုံနွယ်များ၊ ပေါင်းပင်၊ မြက်ပင်များခုတ်ထွင်ရှင်းလင်းခြင်း၊ အမှိုက်သရိုက်များ ရှင်းလင်းခြင်းတို့ကို စုပေါင်းဆောင်ရွက်ကြပြီး ထွက်ရှိလာသော အမှိုက်သရိုက်များနှင့် ချုံနွယ်များကို မြို့နယ်စည်ပင်သာယာရေးအဖွဲ့ပိုင် အမှိုက်သိမ်းယာဉ်ဖြင့် စနစ်တကျစွန့်ပစ်ကြသည်။ စုစုပေါင်းသန့်ရှင်းဆောင်ရွက်ရာသို့ ခရိုင်စီမံအုပ်ချုပ်ရေးအဖွဲ့ ဥက္ကဋ္ဌ ဦးကျော်ငြိမ်းနှင့် တာဝန်ရှိသူများက လိုက်လံကြည့်ရှုအားပေးကြပြီး လိုအပ်သည်များကို သက်ဆိုင်ရာ ဌာနဆိုင်ရာများ ပေါင်းစပ်ညှိနှိုင်းဆောင်ရွက်ပေးသည်။ အဆိုပါ သန့်ရှင်းရေးပြုလုပ်ခြင်းကို မြို့နယ်အဆင့် ဝန်ထမ်းများနှင့် လူမှုရေးအဖွဲ့ဝင်များ စုစုပေါင်းအင်အား(၂၂၀)ဦး တက်ရောက်ဆောင်ရွက်ကြကြောင်းသိရသည် ။         

ပေးပို့သူ- ဦးရဲတင့်( ပြန်/ဆက်)

ရန်ကုန်  ဧပြီ ၂၃

ပုပ်ရဟန်းမင်းကြီး ဖရန်စစ်သည် ဧပြီလ ၂၁ ရက်တွင် ကွယ်လွန်သွားခဲ့ခြင်းအတွက် အမှတ် ၄၆ (စီ) အောင်တော်မူလမ်းသွယ် သံလွင်လမ်း ရွှေတောင်ကြားဗဟန်းမြို့နယ် ရန်ကုန်တိုင်းဒေသကြီးရှိ မြန်မာနိုင်ငံဆိုင်ရာ ဟိုလီဆီး (ဗာတီကန်မြို့ပြနိုင်ငံ) သံရုံးတွင် ဖွင့်လှစ်ထားရှိ‌သော ဝမ်းနည်းကြောင်းမှတ်တမ်းစာအုပ်တွင် ပြည်ထောင်စုသမ္မတမြန်မာနိုင်ငံအစိုးရ ကိုယ်စား နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံးဝန်ကြီးဌာန(၂) ပြည်ထောင်စုဝန်ကြီး ဦးကိုကိုလှိုင် သည် ယနေ့မွန်းလွဲ ၁ နာရီတွင် သွားရောက်လက်မှတ်ရေးထိုးသည်။

ဦးစွာ ပြည်ထောင်စုဝန်ကြီးသည် ဟိုလီဆီး (ဗာတီကန်မြို့ပြနိုင်ငံ) သံရုံးမှ သံရုံးယာယီတာဝန်ခံနှင့် တာဝန်ရှိသူများအား သံရုံးဧည့်ခန်းမတွင် ခင်မင်ရင်းနှီးစွာ တွေ့ဆုံ၍ ပုပ်ရဟန်းမင်းကြီးကွယ်လွန်ခဲ့ခြင်းအပေါ် ဝမ်းနည်းကြောင်းနှင့် စာနာထောက်ထားပါကြောင်း သတင်းစကားပြောကြားခဲ့ပြီး ဝမ်းနည်းကြောင်းမှတ်တမ်းစာအုပ်၌ လက်မှတ်ရေးထိုးသည်။

ပုပ်ရဟန်းမင်းကြီး ဖရန်စစ်သည် ၂၀၁၃ ခုနှစ်တွင် ပုပ်ရဟန်းမင်းကြီးအဖြစ် စတင်ဆောင်ရွက်ခဲ့ပြီး ၂၀၁၇ ခုနှစ်တွင် မြန်မာနိုင်ငံသို့ တရားဝင်ချစ်ကြည်ရေးခရီးလာရောက်ခဲ့ကြောင်း သိရသည်။

Source: မြဝတီသတင်းစာ

ရန်ကုန်အပြည်ပြည်ဆိုင်ရာ လေဆိပ်အခွန် (PSC) ကို ပြည်ပခရီးစဥ်အတွက် (၂၅) ဒေါ်လာနှင့် ပြည်တွင်းခရီးစဥ်အတွက် ကျပ် (၁၅,၀၀၀) တိုးမြှင့်ကောက်ခံမည်ဖြစ်ကြောင်း သိရသည်။

ယင်းသို့တိုးမြှင့်ကောက်ခံခြင်းသည် မေလ (၁၂) ရက်မှ စတင်၍ ရန်ကုန်အပြည်ပြည်ဆိုင်ရာလေဆိပ်မှ ထွက်ခွာမည့် ခရီးသွားဧည့်သည်များအားလုံး Check-in တွင် လေဆိပ်အခွန်အဖြစ် အသက်ဝင်မည် ဖြစ်သည်။

ထို့ကြောင့် မေလ (၁၂) ရက်နှင့် မေလ (၁၂) ရက်နောက်ပိုင်း ခရီးသွားရန် လက်မှတ်ကြိုတင်ဝယ်ယူထားသော ခရီးသည်များသည်လည်း ယင်းလေဆိပ်ခွန် တိုးမြှင့်ကောက်ခံခြင်းတွင် အကျုံးဝင်ပြီး ပေးဆောင်ရမည်ဖြစ်သည်ဟု Yangon International Airport (YIA) က ကြေညာထားသည်။

Passenger Service Charge (PSC) ဆိုသည်မှာ လေဆိပ် (သို့) လေယာဉ်ကွင်းများတွင် ခရီးသည်များကို ဆောင်ရွက်ပေးသည့် ဝန်ဆောင်မှုအတွက် ကောက်ခံသော အခကြေးငွေဖြစ်ပြီး Airport Tax (လေဆိပ်အခွန်) ဟုလည်း ခေါ်ဆိုကြကာ လေယာဉ်လက်မှတ်ဈေးနှုန်းထဲတွင် တစ်ပါတည်းထည့်သွင်းရောင်းချခြင်းမျိုး ဖြစ်သည်။

Source: Popular Myanmar

နေပြည်တော်   ဧပြီ ၂၁

မကွေးတိုင်းဒေသကြီး ပခုက္ကူမြို့နယ်၌ ဧပြီလ ၂၀ က်က ဝိုင်ယာရှော့ခ်ဖြစ်ရာမှတစ်ဆင့် မီးလောင်မှုဖြစ်ပွားခဲ့ကြောင်း သိရသည်။

ဖြစ်စဉ်မှာ ဧပြီ ၁၉ ရက်ည ၁၂ နာရီခွဲတွင် ပခုက္ကူမြို့နယ် UA Interveb စီးကရက်စက်ရုံ၌ မီးလောင်မှုဖြစ်ပွားကြောင်းသတင်းအရ ပခုက္ကူမြို့မရဲစခန်းမှ တပ်ဖွဲ့ဝင်များ၊ မြို့နယ်မီးသတ်ဦးစီးဌာနမှ မီးသတ်တပ်ဖွဲ့ဝင်များပါဝင်သော ပူးပေါင်းအဖွဲ့က မီးသတ်ယာဉ် သုံးစီးဖြင့် သွားရောက်မီးငြှိမ်းသတ်ခဲ့ရာ ၂၅ မိနစ်ခန့်အကြာတွင် မီးငြိမ်းသွားခဲ့ပြီး ဖြစ်စဉ်အား စိစစ်ခဲ့ရာ ပခုက္ကူမြို့နယ် ရွှေချောင်းကျေးရွာနေ စက်ရုံမှူး ခင်မောင်သန်း (၅၈) နှစ်သည် အဆောက်အအုံအတွင်း၌ စီးကရက်ဖာများအား အဲကွန်းလွှတ်ပေးထားရာမှ လျှပ်စစ်ဝိုင်ယာရှော့ခ်ဖြစ်ကာ မီးစတင်လောင်ခဲ့ခြင်းဖြစ်ပြီး မီးလောင်မှုကြောင့် ဂိုဒေါင်အတွင်းရှိ စီးကရက်ဖာ ၂၅ ဖာ မီးလောင်ပျက်စီးဆုံးရှုံးခဲ့သဖြင့် ခင်မောင်သန်းအား ပခုက္ကူမြို့မရဲစခန်းက အမှုဖွင့်အရေးယူထားကြောင်း သတင်းရရှိသည်။

Source: မြန်မာ့အလင်းသတင်းစာ 

နေပြည်တော်ရှိ ရုံးအဆောက်အအုံများကို ပြန်လည်တည်ဆောက်ရာတွင် မြေစမ်းသပ်မှုဆောင်ရွက်ပြီးမှသာ အသစ်တည်ဆောက်ခြင်းနှင့် ပြုပြင်ခြင်းလုပ်ငန်းများ ဆောင်ရွက်သွားမည်ဖြစ်ကြောင်း နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က ပြောကြားသည်။
အဆိုပါစကားကို ယမန်နေ့ (ဧပြီလ၁၈ရက်)က ပြည်ထောင်စုအစိုးရအဖွဲ့ လုပ်ငန်းညှိနှိုင်းအစည်းအဝေးတွင် ထည့်သွင်းပြောကြားခဲ့ခြင်း ဖြစ်သည်။
အစိုးရရုံးဌာနများနှင့် ပတ်သက်၍ နေပြည်တော်တွင် ထိခိုက်မှုဖြစ်ပေါ်ခဲ့သည့် အဆောက်အအုံများအနက် ဖို့မြေပေါ်တွင် တည်ဆောက်ထားသော အဆောက်အအုံများမှာ ပိုမိုထိခိုက်ပျက်စီးသည်ကို တွေ့ရကြောင်း နစကဥက္ကဋ္ဌက ဆိုသည်။
ထို့ကြောင့် ရုံးအဆောက်အအုံများ ပြန်လည်တည်ဆောက်ရာတွင် မြေစမ်းသပ်မှု (Soil Test) များ ဆောင်ရွက်ပြီးမှသာ အသစ်တည်ဆောက်ခြင်းနှင့် ပြုပြင်ခြင်းလုပ်ငန်းများကို ဆောင်ရွက်သွားရမည်ဖြစ်ပြီး တွက်ချက်၍ရသည့် ငလျင်ကြောပေါ်တွင် တည်ရှိနေသည့် အဆောက်အအုံများကို ပြောင်းရွှေ့နေရာချထားရေးအတွက် ဆောင်ရွက်သွားရန်လည်း လိုကြောင်း ထည့်သွင်းပြောကြားခဲ့သည်။
ထို့ပြင် နေပြည်တော်၏ မြို့အကွက်ချမှုပုံစံကိုလည်း ပြန်လည်တွက်ချက်ရေးဆွဲသွားရန် စီစဉ်နေပြီး ငလျင်မကြာခဏလှုပ်ခတ်လျက်ရှိသည့် နိုင်ငံများမှ အဆောက်အအုံများ တည်ဆောက်ထားရှိမှုများကို နမူနာယူ၍ တည်ဆောက်မှုများ ဆောင်ရွက်သွားရန်လိုကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောကြားခဲ့သည်။
ရုံးဌာနအဆောက်အအုံများ ပြန်လည်ပြုပြင်တည်ဆောက်ရေးလုပ်ငန်းများ ဆောင်ရွက်ရာတွင် အနည်းငယ်သာထိခိုက်ပျက်စီးခဲ့သည့် အဆောက်အအုံများကို ဦးစားပေးအနေဖြင့် ပြုပြင်ဆောင်ရွက်သွားရန်လိုပြီး အင်ဂျင်နီယာများက စမ်းသပ်ပြီးမှသာ သတ်မှတ်ချက်များနှင့်အညီ ဆောင်ရွက်သွားရန်လိုကြောင်း နစကဥက္ကဋ္ဌ ကဆိုသည်။
ထိုသို့ ဝန်ထမ်းအိမ်ရာများ ပြန်လည်တည်ဆောက်ရေးလုပ်ငန်းများ ဆောင်ရွက်ရာတွင် ရစ်ချ်တာစကေး (၈) အထိခံနိုင်သည့် အဆောက်အအုံများဖြစ်အောင် ဆောင်ရွက်သွားရမည်ဖြစ်ကြောင်းလည်း ထည့်သွင်းပြောကြားခဲ့သည်။

ကိုးကား-နိုင်ငံတော်စီမံအုပ်ချုပ်ရေးကောင်စီရုံး

ငလျင်ဒဏ်သင့် ဝန်ထမ်းမိသားစုများအတွက် ယာယီနေထိုင်မည့်နေရာများကို ဆောက်လုပ်ရာတွင် စနစ်တကျဖြင့်တည်ဆောက်ပေးသွားရန်နှင့် နိုင်ငံတော်မှ စီစဉ်ဆောင်ရွက် ပေးသွားမည်ဖြစ်ကြောင်း နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က ပြောကြားသည်။

အလားတူ သောက်ရေ၊ သုံးရေများ လုံလောက်စွာရရှိရေး စီစဉ်ဆောင်ရွက်ပေးရန်နှင့် ဝန်ထမ်းများ၏ စားရေးအဆင်ပြေစေရေးအတွက်လည်း နိုင်ငံတော်မှ စီစဉ်ဆောင်ရွက်ပေးထားသည်ဟုလည်းဆိုသည်။

မန္တလေးငလျင်ကြီးကြောင့် ထိခိုက်ပျက်စီးမှုများဖြစ်ပေါ်ခဲ့သည့် နေပြည်တော်ရှိ ပြည်ထောင်စုဝန်ကြီးရုံးများသို့ ဧပြီလ ၁၈ ရက်နေ့က ကောင်စီဒုတိယဥက္ကဋ္ဌ၊ ဒုတိယဝန်ကြီးချုပ် ဒုတိယဗိုလ်ချုပ်မှူးကြီး စိုးဝင်း၊ ကောင်စီအတွင်းရေးမှူး ဗိုလ်ချုပ်ကြီး အောင်လင်းဒွေး၊ တွဲဖက်အတွင်းရေးမှူး ဗိုလ်ချုပ်ကြီးရဲဝင်းဦး၊ ပြည်ထောင်စုဝန်ကြီးများ၊ နေပြည်တော်ကောင်စီ ဥက္ကဋ္ဌ တို့နှင့်အတူ လိုက်လံကြည့်ရှု စစ်ဆေးစဥ် ပြောကြားခဲ့ခြင်းဖြစ်သည်။

အလားတူ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော် ဝန်ကြီးချုပ်က ရုံးအဆောက်အဦများအတွင်းရှိ အရေးကြီးသည့်စာရွက်စာတမ်းများ၊ စက်ပစ္စည်းကိရိယာများနှင့် ရွှေ့ပြောင်း၍ရနိုင်သည့် ပစ္စည်းများကို အမြန်ဆုံးရွှေ့ပြောင်းသွားရန်လိုကြောင်း ပြောကြားသည်။

ထို့အပြင် ပျက်စီးထိခိုက်မှုများဖြစ်ပေါ်ခဲ့သည့် ရုံးဌာနအဆောက်အဦများအား ပြန်လည်တည်ဆောက်ရေး လုပ်ငန်းများဆောင်ရွက်ရာတွင် ရေရှည်ခိုင်ခံ့မှုရှိစေရန်နှင့် ငလျင်ဒဏ်ခံနိုင်သည့် အဆောက်အဦများဖြစ်စေရေးအတွက် ငလျင်ပညာရှင်များ၊ ဆောက်လုပ်ရေးပညာရှင်များ၏ အကြံဉာဏ်များရယူ တည်ဆောက်သွားရန်လိုကြောင်း၊

အဆောက်အဦများအား တစ်လုံးတည်းကြီးမားစွာတည်ဆောက်ခြင်းထက် အကန့်လိုက်၊ အလုံးလိုက်ခွဲ၍ တည်ဆောက်မည်ဆိုပါက ငလျင်ဒဏ်ကို ပိုမိုခံနိုင်မည်ဖြစ်ကြောင်း၊ အဆောက်အဦများစတင်ဆောက်လုပ်စဉ်ကတည်းက ရေရှည်ခိုင်ခံ့စေရန်အတွက် လိုအပ်သည့်ရေလိုင်း၊ မီးလိုင်းများကိုလည်း စနစ်တထည့်သွင်းတွက်ချက် တည်ဆောက်သွားရန်လိုကြောင်းဖြင့်လည်း ပြောကြားခဲ့သည်ဟု သိရသည်။  

ကိုးကား-MHT

မြန်မာနိုင်ငံတွင် ဆယ်စုနှစ်များစွာအတွင်း အပြင်းအထန်ဆုံးလှုပ်ခတ် ခဲ့သော မန္တလေးငလျင်ကြောင့် မြန်မာ့နှစ်သစ်ကူးသင်္ကြန်ကာလသည် အတိုင်းအတာတစ်ခုအထိ ပျော်ရွှင်မှုနည်းပါးစွာကျော်ဖြတ်ရဦးမည် ဖြစ် သည်။စစ်ကိုင်း၊မန္တလေးနှင့် နေပြည်တော်အပါအဝင်မြို့ပေါင်းများစွာ၌ သက်ရောက်ခဲ့သည့်ငလျင်ကြီးသည် အသက်ဆုံးရှုံးမှုများ ဖြစ်ပေါ်စေခဲ့ သည်။ငလျင်ကြီးကြောင့်မြန်မာနိုင်ငံတစ်ဝှမ်း လူဦးရေ ၃၆၀၀ ကျော် သေ ဆုံးကာ အခြေခံအဆောက်အအုံနှင့် အဆောက်အဦးပေါင်း ၆ သောင်း ကျော် ပျက်စီးဆုံးရှုံးခဲ့ကြောင်းတရားဝင်သတင်းထုတ်ပြန်ချက်များအရ သိရသည်။ လာမည့်ရက်ပိုင်းအတွင်းကျင်းပမည့် သင်္ကြန်ကာလသည် ပျော်ရွင်မှုများကို ယူဆောင်လာရန်အခက်အခဲရှိနေပြီး ဝမ်းနည်းကြေကွဲဖွယ်ကာလအတွင်း နှစ်သစ်ကူးကာလကိုဖြတ်ကျော်ရမည်ဖြစ်သည်။ သက်ဆိုင် ရာက မဟာသင်္ကြန်ကာလအတွက်ကြိုတင်ဆောက်လုပ်ခဲ့သော ပျော်ပွဲရွင်ပွဲ မဏ္ဍပ်များကိုပြန်လည် ဖြုတ်သိမ်းပြီး သာမန်ရေကစားမဏ္ဍပ်နှင့် စတုဒိသာ မဏ္ဍပ်များသာဆောက်လုပ်ထားကြောင်းသိရသည်။ ငလျင်ဒါဏ်ကြောင့် ပျက်စီးဆုံးရှုံးမှုများနှင့် သေဆုံးသူများအတွက် ဝမ်းနည်းခြင်းအထိမ်းအမှတ် နေ့များ သတ်မှတ်ပေးထားရာ နှစ်သစ်ကူးကာလသည် ပျော်ရွှင်မှုများ ကွယ်ပျောက်လာကြောင်းသိရသည်။သာမန်အားဖြင့် ဈေးဝယ်စင်တာများ၊စူပါမားကတ်များ၊ကုန်တိုက်များတွင် သင်္ကြန်အထူးဈေးရောင်းပွဲနှင့် ပျော်ပွဲ ရွှင်ပွဲများကျင်းပလေ့ရှိသော်လည်း လက်တလောတွင် တိတ်ဆိတ်မှုများသာ လွှမ်းမိုးနေလေသည်။ငလျင်ဒါဏ်မခံရသောရန်ကုန်မြို့တွင် သင်္ကြန်ကာလ နှစ်ကူးရက်များအတွင်း မြို့နယ်အလိုက် အပျော်တန်း‌မိသားစုအလိုက် ရေပက်ခံမဏ္ဍပ်များသာရှိနိုင်ပြီး ယခင်နှစ်များထက် စည်ကားမှုနည်းပါး နိုင်ကြောင်း သိရသည်။ မြန်မာသက္ကရာဇ် ၁၃၈၆ခု နှစ်မှ ၁၃၈၇ ခုနှစ်သို့ မကြာမီကူးပြောင်းတော့မည်ဖြစ်ရာ နှစ်သစ်အတွက် ကြေကွဲဝမ်းနည်း ဖွယ်ရာများကို နှစ်သစ်ကူးသင်္ကြန် အတာရေနှင့်ဆေးကြောနိုင်စေရန် တောင်းဆုပြုရုံမှတပါးအခြားမရှိပေ။

ကိုးကား-NP News