13 August 2025

အကြမ်းဖက်သမားများသည် အေးချမ်းစွာ နေထိုင်လျက်ရှိသော အပြစ်မဲ့ အရပ်သားပြည်သူများအား ထိခိုက်ဒဏ်ရာရရှိစေရန်နှင့် အကြောက်တရားများ လွှမ်းမိုးစေရန် ရည်ရွယ်ချက်များဖြင့် ဖမ်းဆီးသတ်ဖြတ်ခြင်း၊ ရပ်ကွက်/ကျေးရွာများအတွင်းသို့ လက်နက်ကြီး၊ လက်နက်ငယ်များ၊ Drone ဖြင့် Drop Bomb များ ပစ်ချတိုက်ခိုက်ခြင်း၊ ခရီးသည်တင်မော်တော်ယာဉ်များ၊ ကုန်တင်မော်တော် ယာဉ်များအား မိုင်းဆွဲတိုက်ခိုက်ခြင်း၊ လက်နက်ကြီး/လက်နက်ငယ်များဖြင့် ပစ်ခတ်တိုက်ခိုက်ခြင်းများစသည့် အကြမ်းဖက်မှုလုပ်ရပ်များကို ဆင်ခြင်တုံတရားကင်းမဲ့စွာ ပြုလုပ်လျက်ရှိသည်။

ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဩဂုတ် ၉ ရက် နံနက် ၁၁ နာရီ ၂၀ မိနစ်တွင် မွန်ပြည်နယ်၊ ဘီးလင်းမြို့နယ်၊ အလူးကျေးရွာအနီး ရန်ကုန်-မော်လမြိုင်ကားလမ်း မိုင်တိုင်အမှတ် ၁၂၀ မိုင် ၄ ဖာလုံနှင့် ၅ ဖာလုံကြား၌ ကားလမ်းအား PDF အမည်ခံ အကြမ်းဖက်အဖွဲ့က အများပြည်သူ ထိခိုက်စေရန် ရည်ရွယ်၍ အကြမ်းဖက် မိုင်းဆွဲတိုက်ခိုက်ခဲ့မှုကြောင့် ပေါက်ကွဲမှုဖြစ်ပွားသည့်နေရာအနီး ဖြတ်သန်းသွားလာလျက်ရှိသော 5B-XXXX FORLAND မြေသယ်ယာဉ်အား မောင်းနှင်လာသည့် မွန်ပြည်နယ်၊ ပေါင်မြို့နယ်၊ ရင်းငြိမ်ကျေးရွာနေ ဦးစိုးမင်းထွန်း(၄၄)နှစ်တွင် မိုင်းပေါက်ကွဲစထိမှန် ဒဏ်ရာများရရှိခဲ့ပြီး မန္တလေးတိုင်းဒေသကြီး၊ စဉ့်ကိုင်မြို့နယ်၊ နဘဲပင်ကျေးရွာနေ ကိုဇေယျာစိုး(၂၇)နှစ် မောင်းနှင်လာသည့် 7L-XXXX ISUZU ၂၂ ဘီးမော်တော်ယာဉ်ပေါ်တွင် လိုက်ပါလာသူ ကိုကုလား (ခ)ချစ်သဲဦး(စိစစ်ဆဲ)တွင် မိုင်းပေါက်ကွဲစထိမှန် ဒဏ်ရာများရရှိကာ သေဆုံးသွားခဲ့သဖြင့် သေဆုံး/ ဒဏ်ရာရရှိသူ နှစ်ဦးအား ဘီးလင်းမြို့နယ်ပြည်သူ့ဆေးရုံသို့ ပို့ဆောင်ထားရှိကြောင်းနှင့် ကိုဇေယျာစိုးတွင် ထိခိုက်ဒဏ်ရာရရှိခဲ့ခြင်း မရှိကြောင်း သိရသည်။

ထိုသို့ အများပြည်သူသွားလာနေသည့် ကားလမ်းအား အကြမ်းဖက်မိုင်းဆွဲတိုက်ခိုက်ခဲ့သည့် အကြမ်းဖက်သမားများအား ဖမ်းဆီးအရေးယူနိုင်ရေးနှင့် နယ်မြေဒေသ တည်ငြိမ်အေးချမ်းရေးအတွက် လုံခြုံရေးတပ်ဖွဲ့ဝင်များက လိုအပ်သော လုံခြုံရေးလုပ်ငန်းစဉ်နှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA

ရုရှားတပ်များ တိုးချဲ့သိမ်းပိုက်လာနေသော ယူကရိန်း၏ Donetsk ဒေသ အနီးရှိ နယ်မြေများမှ မိသားစုများနှင့် ကလေးများကို မဖြစ်မနေ ရွှေ့ပြောင်းရန် ယူကရိန်းအာဏာပိုင်များက အမိန့်ထုတ်ပြန်ခဲ့သည်။

Donetsk ဒေသဆိုင်ရာ စစ်အုပ်ချုပ်ရေးအကြီးအကဲ Vadym Filashkin ၏အဆိုအရ Bilozerka မြို့၊ Svyatohorivka ကျေးရွာ၊ Bilozerka ကျေးရွာပေါင်း ၆ ရွာနှင့် Dobropillia ကျေးရွာပေါင်း ၆ ရွာတို့တွင် မဖြစ်မနေရွှေ့ပြောင်းမှုများ စတင်လုပ်ဆောင်နေပြီဖြစ်သည်။

ထိုကျေးရွာများတွင် ကလေးဦးရေ ၁,၁၅၀ ခန့်ရှိမည်ဟု Filashkin က ဗုဒ္ဓဟူးနေ့ (သြဂုတ် ၁၄) တွင် ပြောကြားခဲ့သည်။

တစ်ဖက်တွင် ရွှေ့ပြောင်းရေးအဖွဲ့နှင့်လက်တွဲလုပ်ကိုင်နေသော ယူကရိန်း ရဲတစ်ဦးက CNN အား Pokrovsk မှ ရွှေ့ပြောင်းမှုများသည် လတ်တလော ရက်ပိုင်းအတွင်း ရုရှား drone များ၏ ပျံသန်းလှုပ်ရှားမှု မြင့်မားလာ နေခြင်းကြောင့် ဆက်လက်နေထိုင်ရန်လုံးဝမဖြစ်နိုင်တော့ကြောင်း ပြောကြား ခဲ့သည်။ ရွှေ့ပြောင်းလိုသူများသည် ယခုအခါ ခြေလျင်ထွက်ပြေးပြီး ရွှေ့ပြောင်းရေးအဖွဲ့များက လာရောက်ခေါ်ယူရန် စောင့်ဆိုင်းနေရသည်။

ဒေသဆိုင်ရာ စစ်အုပ်ချုပ်ရေးဌာန၏ ဗုဒ္ဓဟူးနေ့ (သြဂုတ် ၁၄) နောက်ဆုံး အချက်အလက်များအရ Pokrovsk တွင် အရပ်သား ၁,၃၂၇ ဦး ကျန်ရှိ နေသေးကြောင်း သိရှိရသည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

13 August 2025

တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အုပ်ချုပ်ရေးပိုင်းဆိုင်ရာ တာဝန်ရှိ သူများအား ပြည်သူလူထုအတွင်း အကြောက်တရားများ လွှမ်းမိုးစေရန်လည်းကောင်း၊ ၎င်းတို့နှင့် အမြင်အယူအဆမတူသူ အပြစ်မဲ့ အရပ်သားပြည်သူများအား “သူလျှို၊ သတင်းပေး၊ ဒလန်” ဟုစွပ်စွဲ၍ လည်းကောင်း၊ “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ လက်နက်ကိုင်အကြမ်းဖက်သမားများက ဓား၊ သေနတ်များ အသုံးပြု၍ ရက်စက်စွာ လုပ်ကြံတိုက်ခိုက်၊ သတ်ဖြတ်ခြင်းများ ပြုလုပ်လျက်ရှိပါသည်။

ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဩဂုတ် ၁၂ ရက် ညနေ ၄ နာရီ ၃၀ မိနစ်တွင် မန္တလေးတိုင်းဒေသကြီး၊ မိတ္ထီလာမြို့နယ်၊ တပျော်ကျေးရွာ၌ သေနတ်/ဓားများဖြင့် ပစ်ခတ်ထိုးခုတ် ခံရ၍ အမျိုးသား တစ်ဦး သေဆုံးသွားခဲ့ကြောင်း သတင်းအရ လုံခြုံရေးတပ်ဖွဲ့ဝင်များက သွားရောက် စစ်ဆေးခဲ့ရာ ညနေ ၄ နာရီ ၂၅ မိနစ်တွင် အဆိုပါကျေးရွာနေ ကျေးရွာအုပ်ချုပ်ရေးမှူးဖြစ်သူ ဦးရွှေတင်(၆၇)နှစ်သည် ၎င်း၏နေအိမ်၌ ရှိနေစဉ် PDF အမည်ခံ အကြမ်းဖက်သမား လေးဦး(စိစစ်ဆဲ)က ဆိုင်ကယ် နှစ်စီးဖြင့် ရောက်ရှိလာပြီး “တပျော်ကျေးရွာအုပ်ချုပ်ရေးမှူးလား” ဟု မေးမြန်းပြောဆို၍ သေနတ်/ဓားများဖြင့် ပစ်ခတ်ထိုးခုတ်သွားခဲ့သောကြောင့် ဦးရွှေတင်တွင် ကျည်ထိမှန် ဒဏ်ရာ၊ ဓား ဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။

ထိုသို့ အုပ်ချုပ်ရေးပိုင်းဆိုင်ရာ တာဝန်ရှိသူများအား “ငါနှင့်မတူ၊ ငါ့ရန်သူ” ဟူသည့် တစ်ဖက်သတ် အစွန်းရောက် ဂိုဏ်းဂဏစွဲအပေါ် အခြေခံကာ သေနတ်/ဓားများဖြင့် ပစ်ခတ်ထိုးခုတ်မှု ကျူးလွန်ခဲ့ သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA

ဇူလိုင်လကုန်ပိုင်းက ရုရှားတို့၏ တိုက်ခိုက်မှုတစ်ခုသည် ယူကရိန်းရှိ နိုင်ငံခြားသား ကြေးစားစစ်သားများအား ကြီးမားသော ထိခိုက်မှုများ ဖြစ်စေခဲ့ကြောင်း နယူးယောက်တိုင်းမ်သတင်းစာက အင်္ဂါနေ့ (ဩဂုတ် ၁၂) တွင် ဖော်ပြခဲ့သည်။ အဆိုပါတိုက်ခိုက်မှုသည် ယူကရိန်းစစ်ဘက် ထောက်လှမ်းရေး မှ ဖွင့်လှစ်ထားသော လေ့ကျင့်ရေးစခန်းတစ်ခုကို ပစ်မှတ်ထားခဲ့ခြင်း ဖြစ်သည်။

ရုရှားစစ်တပ်သည် ယူကရိန်းအလယ်ပိုင်းရှိ Kropivnitsky မြို့အနီးတွင် တည်ရှိသည့် အဆိုပါလေ့ကျင့်ရေးစခန်းကို ဇူလိုင် ၂၁ ရက်နေ့တွင် နိုင်ငံခြား      ကြေးစားစစ်သားများ နေ့လယ်စာစားနေချိန်၌ တိုက်ခိုက်ခဲ့ခြင်း ဖြစ်သည်။ အမည်မဖော်လိုသူ အမေရိကန်စစ်သားတစ်ဦး၏ ပြောကြားချက်အရ အနည်းဆုံး လေ့ကျင့်ဆဲစစ်သား ၁၅ ဦး သေဆုံးပြီး ၁၀၀ ကျော် ဒဏ်ရာ ရရှိခဲ့သည်။ အဆိုပါတိုက်ခိုက်မှုတွင် အမေရိကန်၊ ကိုလံဘီယာ၊ ဒိန်းမတ် နိုင်ငံသားများအပြင် ထိုင်ဝမ်မှ စစ်သားများလည်း သေဆုံးမှုတွင် ပါဝင် ခဲ့ကြောင်း သတင်းတွင် ဖော်ပြထားသည်။

ယူကရိန်းစစ်တပ်နှင့် စစ်ဘက်ထောက်လှမ်းရေးတို့သည် ရုရှားက စစ်ရေး ပစ်မှတ်များအပေါ် ထိရောက်သောတိုက်ခိုက်မှုများကို ထုတ်ဖော်လေ့ မရှိသော်လည်း အဆိုပါတိုက်ခိုက်မှုသည် အမှန်တကယ်ဖြစ်ပွားခဲ့ပြီး အချို့သော အသေအပျောက်များ ရှိခဲ့သည်ကို အတည်ပြုခဲ့ကြောင်း NYT ၏ ဖော်ပြချက်အရ သိရသည်။ သို့ရာတွင် ၎င်းတို့သည် ကိန်းဂဏန်း အတိအကျကို ထုတ်ပြန်ရန် ငြင်းဆန်ခဲ့သည်။

ရုရှားကာကွယ်ရေးဝန်ကြီးဌာနသည် ယူကရိန်းတပ်များ၊ အမျိုးသားရေး ဝါဒီတပ်ဖွဲ့များနှင့် နိုင်ငံခြားသား ကြေးစားစစ်သားများ၏ စခန်းနေရာ ၁၄၂ ခုကို တိုက်ခိုက်ခဲ့ကြောင်း ဇူလိုင် ၂၁ ရက်နေ့ သတင်း ထုတ်ပြန်ချက် တွင် ဖော်ပြခဲ့သော်လည်း Kropivnitsky အနီးရှိ လေ့ကျင့်ရေး စခန်း တိုက်ခိုက်မှုကို သီးခြားမဖော်ပြခဲ့ပေ။

ယူကရိန်းသည် အလုံးအရင်းဖြင့် စစ်ဘေးတိမ်းရှောင်ခြင်းများနှင့် စစ်ပြေးများ များပြားခြင်းများကြောင့် ယူကရိန်းပဋိပက္ခတွင် ဆုံးရှုံးမှုများကို ဖြည့်တင်းရန် ရုန်းကန်နေရချိန်တွင် နိုင်ငံခြားသားများကို စုဆောင်းနေ ပါသည်။ အစိုးရသည် ဧပြီလတွင် နိုင်ငံခြားသားများ စုဆောင်းရေး စည်းမျဉ်းများကို ရိုးရှင်းအောင်ပြုလုပ်ခဲ့ပြီး ၎င်းတို့၏ ခရီးစရိတ်၊ အစားအစာနှင့် နေထိုင်ရေးအတွက် စီစဉ်ပေးရန် တာဝန်ရှိသူများအား ညွှန်ကြားခဲ့သည်။

မော်စကို၏ ၂၀၂၄ ခုနှစ် ဒီဇင်ဘာလက ခန့်မှန်းချက်အရ ပဋိပက္ခ စတင် သည့်အချိန်မှစ၍ နိုင်ငံပေါင်း ၁၁၀ ကျော်မှ နိုင်ငံခြားသား ၁၅,၀၀၀ ကျော်သည် ယူကရိန်းဘက်မှ တိုက်ပွဲဝင်ခဲ့ကြပြီး အများစုမှာ ပိုလန်၊ အမေရိကန်နှင့် ဂျော်ဂျီယာနိုင်ငံသားများ ဖြစ်ကြောင်း သိရသည်။ ၎င်းတို့ အနက် ၆,၅၀၀ နီးပါးမှာ တိုက်ပွဲတွင် သေဆုံးခဲ့သည်ဟု သတင်းများအရ သိရသည်။

မော်စကိုမှ အဆက်မပြတ် သတိပေးထားသည်မှာ ယူကရိန်းစစ်တပ်တွင် တာဝန်ထမ်းဆောင်နေသော ယူကရိန်းနိုင်ငံသားမဟုတ်သူများအား ကြေးစား စစ်သားများနှင့် ရာဇဝတ်မှုကျူးလွန်သူများအဖြစ် သတ်မှတ်မည်ဖြစ်ပြီး စစ်သားများအား ပေးအပ်လေ့ရှိသော ဂျီနီဗာကွန်ဗင်းရှင်း၏ အကာအကွယ် မျိုးကို ခံစားခွင့်မပေးနိုင်ဟူ၍ ဖြစ်သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

13 August 2025

အကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများ ထိခိုက်ဒဏ်ရာရရှိစေရန်နှင့် အကြောက်တရားများ လွှမ်းမိုးစေရန် ရည်ရွယ်ချက်များဖြင့် ဖမ်းဆီးသတ်ဖြတ်ခြင်း၊ ရပ်ကွက်/ကျေးရွာများအတွင်းသို့ လက်နက်ကြီး၊ လက်နက်ငယ်များ၊ Drone ဖြင့် Drop Bomb များ ပစ်ချတိုက်ခိုက်ခြင်းများအား ဆင်ခြင်တုံတရားကင်းမဲ့စွာ ပြုလုပ်လျက်ရှိသည်။

 ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဩဂုတ် ၁၂ ရက် ည ၉ နာရီ ၅ မိနစ်တွင် မန္တလေးတိုင်းဒေသကြီး၊ မတ္တရာမြို့နယ်ပြည်သူ့ဆေးရုံသို့ ဗုံးသီးပေါက်ကွဲစ ထိမှန်ဒဏ်ရာများဖြင့် သေဆုံးနေသည့် အမျိုးသမီး တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက် စစ်ဆေးခဲ့ရာ မတ္တရာမြို့နယ်၊ ကန်ဖြူကျေးရွာနေ ဒေါ်အေး(၅၀)နှစ်သည် ၎င်း၏နေအိမ်၌ ရှိနေစဉ် နေအိမ်ခြံဝင်းအတွင်းသို့ PDF အမည်ခံ အကြမ်းဖက်အဖွဲ့က အများပြည်သူ ထိခိုက်စေရန် ရည်ရွယ်၍ ပစ်ခတ်လိုက်သည့် လက်နက်ကြီးဗုံးသီး တစ်လုံး ကျရောက်ပေါက်ကွဲခဲ့မှုကြောင့် ၎င်းတွင် ဗုံးသီးပေါက်ကွဲစ ထိမှန်ဒဏ်ရာများ ရရှိခဲ့၍ ဆေးကုသနိုင်ရေး မတ္တရာမြို့နယ်ပြည်သူ့ဆေးရုံသို့ ပို့ဆောင်ဆေးကုသမှုပေးနေစဉ် ရရှိထားသော ဒဏ်ရာများဖြင့် သေဆုံးသွားခဲ့ခြင်းဖြစ်ကြောင်း သိရသည်။

ထိုသို့ အပြစ်မဲ့ အရပ်သားပြည်သူများ အေးချမ်းစွာ နေထိုင်လျက်ရှိသော ရပ်ကွက်/ကျေးရွာ များအတွင်းသို့ လက်နက်ကြီး၊ လက်နက်ငယ်၊ Drop Bomb များဖြင့် ပစ်ခတ်တိုက်ခိုက်ခြင်းများအား ဆင်ခြင်တုံတရားကင်းမဲ့စွာ ပြုလုပ်နေမှုများကြောင့် အပြစ်မဲ့ အရပ်သားပြည်သူများ ထိခိုက်ဒဏ်ရာ ရရှိသေဆုံးခဲ့မှုအပေါ် ဒေသခံပြည်သူများက လုံးဝလက်ခံနိုင်ခြင်းမရှိဘဲ ဆန့်ကျင်ကန့်ကွက်လျက် ရှိကြောင်းနှင့် လုံခြုံရေးတပ်ဖွဲ့ဝင်များက လိုအပ်သော လုံခြုံရေးလုပ်ငန်းများကို ပြည်သူလူထုနှင့် ပူးပေါင်းကာ တိုးမြှင့်လုပ်ဆောင်လျက်ရှိကြောင်း သတင်းရရှိပါသည်။

MOHA

13 August 2025

တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားများ လွှမ်းမိုးစေရန်လည်းကောင်း၊ ၎င်းတို့နှင့်အမြင်အယူအဆ မတူသူ အပြစ်မဲ့ အရပ်သားပြည်သူများအား “သူလျှို၊ သတင်းပေး၊ ဒလန်” ဟုစွပ်စွဲ၍လည်းကောင်း၊ “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ လက်နက်ကိုင်အကြမ်းဖက်သမားများက ဓား၊ သေနတ်များ အသုံးပြု၍ ရက်စက်စွာ လုပ်ကြံ တိုက်ခိုက်၊ သတ်ဖြတ်ခြင်းများ ပြုလုပ်လျက်ရှိပါသည်။

ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဩဂုတ် ၁၂ ရက် နံနက် ၈ နာရီ ၄၀ မိနစ်တွင် ပဲခူးတိုင်းဒေသကြီး၊ ကြို့ပင်ကောက်မြို့နယ်၊ ကံကြီးကျေးရွာ၌ ဓားဖြင့် ထိုးခုတ်ခံရ၍ အမျိုးသား တစ်ဦး သေဆုံးခဲ့ကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ နံနက် ၃ နာရီတွင် ကြို့ပင်ကောက်မြို့နယ်၊ ဂွေးကောင်းပင်ကျေးရွာနေ မောင်ဖြိုး(ခ)ဖြိုးဝေမောင် (၃၈)နှစ်သည် ၎င်း၏နေအိမ်မှ ကံကြီးကျေးရွာသို့ ခြေလျင်သွားရောက်စဉ် ကံကြီးကျေးရွာအဝင် အရောက်၌ PDF အမည်ခံ အကြမ်းဖက်သမား ခြောက်ဦး(စိစစ်ဆဲ)က “ဒလန်” ဟု စွပ်စွဲပြောဆိုကာ လက်ပြန်ကြိုးတုပ်၍ ကံကြီးကျေးရွာရွာလယ်လမ်းမသို့ ဖမ်းဆီးခေါ်ဆောင်သွား၍ ဓားဖြင့် ထိုးခုတ် သတ်ဖြတ်သွားခဲ့သဖြင့် မောင်ဖြိုး(ခ)ဖြိုးဝေမောင်တွင် ဓားဒဏ်ရာများရရှိကာ သေဆုံးသွားခဲ့ခြင်း ဖြစ်ကြောင်း သိရသည်။

ထိုသို့ အပြစ်မဲ့ အရပ်သားပြည်သူများအား “ငါနှင့်မတူ၊ ငါ့ရန်သူ” ဟူသည့် တစ်ဖက်သတ် အစွန်းရောက် ဂိုဏ်းဂဏစွဲအပေါ် အခြေခံကာ သေနတ်ဖြင့် ပစ်ခတ်သတ်ဖြတ်မှု ကျူးလွန်ခဲ့ သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA

နေပြည်တော် သြဂုတ် ၁၂

တရားမဝင်ကုန်သွယ်မှုတိုက်ဖျက်ရေးဦးဆောင်ကော်မတီ၏ ကြီးကြပ်ကွပ်ကဲမှုဖြင့် တရားမဝင်ကုန်သွယ်မှုများကို ဥပဒေနှင့်အညီ ထိရောက်စွာ တားဆီးအရေးယူနိုင်ရေး ဆောင်ရွက်လျက်ရှိသည်။

သြဂုတ် ၁၀ ရက်တွင် အကောက်ခွန်ဦးစီးဌာန၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့က စစ်ဆေးမှုများ ဆောင်ရွက်ခဲ့ရာ ရန်ကုန်အပြည်ပြည်ဆိုင်ရာလေဆိပ်၌ MAI Airlines လေယာဉ်ခရီးစဉ်အမှတ် 8M-234 /SF – 7501 ဖြင့် စင်ကာပူနိုင်ငံမှ မြန်မာနိုင်ငံသို့ လိုက်ပါလာသည့် မြန်မာနိုင်ငံသားခရီးသည်တစ်ဦး၏ ဝန်စည်များအတွင်းမှ တရားဝင်စာရွက်စာတမ်းအထောက်အထား တင်ပြနိုင်ခြင်းမရှိသည့် လူသုံးကုန်ပစ္စည်း ခုနစ်မျိုး စုစုပေါင်း ခန့်မှန်းတန်ဖိုးငွေကျပ် ၂၈၃၈၇၈၀၀ ကို ဖမ်းဆီးရမိခဲ့ပြီး အကောက်ခွန်လုပ်ထုံးလုပ်နည်းများနှင့်အညီ အရေးယူဆောင်ရွက်လျက်ရှိသည်။

ယင်းအပြင် ကရင်ပြည်နယ် တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့က စစ်ဆေးမှုများ ဆောင်ရွက်ခဲ့ရာ ဘားအံမြို့နယ် သာယာကုန်းကျေးရွာအနီး၌ မော်တော်ယာဉ်နှစ်စီးပေါ်မှ တရားဝင်စာရွက်စာတမ်းအထောက်အထား တင်ပြနိုင်ခြင်းမရှိသည့် လူသုံးကုန်ပစ္စည်းလေးမျိုး (ခန့်မှန်းတန်ဖိုးငွေကျပ် ၁၄၂၄၀၀၀၀၀)နှင့် အဆိုပါပစ္စည်းများ တင်ဆောင်လာသည့် Mitsubishi Fuso Truck တစ်စီး၊ Isuzu Giga Truck တစ်စီး (ခန့်မှန်းတန်ဖိုးငွေကျပ် ၇၀၀၀၀၀၀၀) စုစုပေါင်းခန့်မှန်းတန်ဖိုးငွေကျပ် ၂၁၂၄၀၀၀၀၀ ကို ဖမ်းဆီးရမိခဲ့ပြီး အကောက်ခွန်လုပ်ထုံးလုပ်နည်းများနှင့်အညီ အရေးယူဆောင်ရွက်လျက်ရှိသည်။

ထို့ပြင် သြဂုတ် ၁၁ ရက်တွင် စစ်ကိုင်းတိုင်းဒေသကြီး တရားမဝင် ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့က စစ်ဆေးမှုများ ဆောင်ရွက်ခဲ့ရာ စစ်ကိုင်းမြို့ ရတနာပုံတံတားပူးပေါင်းစစ်‌ဆေးရေးဂိတ်၌ တရားမဝင် ရွှေသတ္တုတူးဖော်ရာတွင် အသုံးပြုသည့် ခြောက်လက်မ သံပိုက်လုံး ၄၅ လုံး အပါအဝင် ဆက်စပ်ပစ္စည်းအမျိုး ၂၀ (ခန့်မှန်းတန်ဖိုးငွေကျပ် ၁၂၃၉၀၀၀၀၀၀) ကို မြန်မာ့သတ္တုတွင်းဥပဒေအရလည်းကောင်း၊ တရားဝင်စာရွက်စာတမ်းအထောက်အထား တင်ပြနိုင်ခြင်းမရှိသည့် အိန္ဒိယနိုင်ငံထုတ်စားသောက် ကုန်ပစ္စည်းတစ်မျိုး (ခန့်မှန်းတန်ဖိုးငွေကျပ် ၄၉၀၀၀၀၀) ကို ပို့ကုန် သွင်းကုန်ဥပဒေအရလည်းကောင်း၊ ကလေးမြို့ တာဟန်းရပ်ကွက်၌ တရားမဝင်စက်သုံးဆီ၊ ဒီဇယ်ဆီ ဂါလန် ၅၀၊ ဓာတ်ဆီ ၈၅ ဂါလန် (ခန့်မှန်းတန်ဖိုးငွေကျပ် ၃၆၂၈၀၀၀)ကို ရေနံနှင့်ရေနံထွက်ပစ္စည်းဆိုင်ရာဥပဒေအရလည်းကောင်း၊ စုစုပေါင်းခန့်မှန်းတန်ဖိုးငွေကျပ် ၁၃၂၄၂၈၀၀၀ ကို ဖမ်းဆီးအရေးယူဆောင်ရွက်လျက်ရှိသည်။

အလားတူ ပဲခူးတိုင်းဒေသကြီး တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့က စစ်ဆေးမှုများ ဆောင်ရွက်ခဲ့ရာ ညောင်ခါးရှည် အမြဲတမ်းစစ်ဆေးရေးစခန်း၌ ဘားအံမြို့မှ ဖြူးမြို့သို့ မောင်းနှင်လာသည့် မော်တော်ယာဉ်တစ်စီးပေါ်မှ တရားဝင်စာရွက်စာတမ်းအထောက်အထားတင်ပြနိုင်ခြင်းမရှိသည့် စားသောက်ကုန်ပစ္စည်းခြောက်မျိုး (ခန့်မှန်းတန်ဖိုးငွေကျပ် ၄၁၁၁၆၀၀) နှင့် အဆိုပါပစ္စည်းများ တင်ဆောင်လာသည့် Higer Mini Bus တစ်စီး (ခန့်မှန်းတန်ဖိုးငွေကျပ် ၂၅၀၀၀၀၀၀) စုစုပေါင်း ခန့်မှန်းတန်ဖိုးငွေကျပ် ၂၉၁၁၁၆၀၀ ကို ဖမ်းဆီးရမိခဲ့ပြီး အကောက်ခွန်လုပ်ထုံးလုပ်နည်းများနှင့်အညီ အရေးယူဆောင်ရွက်လျက်ရှိသည်။

ယင်းအပြင် ရှမ်းပြည်နယ် တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏စီမံခန့်ခွဲမှုဖြင့် တာဝန်ကျပူးပေါင်းအဖွဲ့များက စစ်ဆေးမှုများ ဆောင်ရွက်ခဲ့ရာ ဟိုပုံးတပ်နယ်အတွင်း၌ ဖမ်းဆီးရမိခဲ့သော မော်တော်ယာဉ်များတွင် တင်ဆောင်လာသော တရားဝင်စာရွက်စာတမ်း အထောက်အထား တင်ပြနိုင်ခြင်းမရှိသည့် လုပ်ငန်းသုံးပစ္စည်း ၅၇ မျိုး၊ လူသုံးကုန်ပစ္စည်းနှစ်မျိုး (ခန့်မှန်းတန်ဖိုးငွေကျပ် ၁၁၇၇၁၅၈၅၄၅)ကိုလည်း‌ကောင်း၊ မူဆယ်မြို့ ဆင်ဖြူဂိတ်အကျော် လမ်းဘေးတစ်နေရာ၌ စုပုံထားသော အကောက်ခွန်မဲ့လူသုံးကုန်ပစ္စည်း ၁၀၂ မျိုး (ခန့်မှန်း တန်ဖိုးငွေကျပ် ၁၃၅၀၇၅၀၀) ကိုလည်းကောင်း စုစုပေါင်းခန့်မှန်းတန်ဖိုး ငွေကျပ် ၁၁၉၀၆၆၆၀၄၅ ကို ဖမ်းဆီးရမိခဲ့ပြီး အကောက်ခွန်လုပ်ထုံးလုပ်နည်းများနှင့်အညီ အရေးယူဆောင်ရွက်လျက်ရှိသည်။

ထို့အပြင် သြဂုတ် ၁၁ ရက်တွင် ပြည်ထဲရေးဝန်ကြီးဌာန မြန်မာနိုင်ငံ ရဲတပ်ဖွဲ့၏ ဖမ်းဆီးရမိမှု စာရင်းများအရ လိုင်စင်မဲ့မော်တော်ယာဉ်ငါးစီးနှင့် လိုင်စင်မဲ့မော်တော်ဆိုင်ကယ် ၂၉ စီး ဖမ်းဆီးရမိခဲ့ပြီး သက်ဆိုင်ရာလုပ်ထုံးလုပ်နည်း၊ ဥပဒေများနှင့်အညီ အရေးယူဆောင်ရွက်လျက်ရှိသည်။

သြဂုတ် ၁၀ ရက်နှင့် ၁၁ ရက်တို့တွင် ဖမ်းဆီးရမိမှု စုစုပေါင်းမှာ အမှုတွဲ ၂၄ မှု (ခန့်မှန်းတန်ဖိုးငွေကျပ် ၁၅၉၂၉၉၃၄၄၅)ကို ဖမ်းဆီးရမိခဲ့သည်။ နိုင်ငံတော်၏ စီးပွားရေးဦးတည်ချက်များနှင့်အညီ ကုန်သွယ်မှုကဏ္ဍ ဖွံ့ဖြိုးတိုးတက်အောင် ဆောင်ရွက်ရာတွင် တရားမဝင်ကုန်သွယ်မှုများသည် အဓိကအဟန့်အတားဖြစ်ပေါ်စေပြီး လူမှုစီးပွားရေးကဏ္ဍအပေါ် များစွာဆိုးကျိုးသက်ရောက်ခြင်းများကြောင့် ၎င်းတရားမဝင် တင်သွင်းမှုများအား သက်ဆိုင်ရာ တာဝန်ရှိသူများက ယခုထက်ပိုမို၍ တားဆီးစစ်ဆေးကြပ်မတ်ဆောင်ရွက်သွားမည်ဖြစ်ကြောင်း တရားမဝင်ကုန်သွယ်မှုတိုက်ဖျက်ရေးဦးဆောင်ကော်မတီမှ သိရသည်။     

MOI

ထိုင်းဘုရင့်တပ်မတော်က အင်္ဂါနေ့ (ဩဂုတ် ၁၂) နံနက်ပိုင်းက ထိုင်းနိုင်ငံ Surin နယ်စပ်ဒေသ Ta Muen Thom ဘုရားဟောင်းအနီးတွင်ကမ္ဘောဒီးယား တို့ထောင်ထားသော မြေမြှုပ်မိုင်းပေါက်ကွဲမှုအပေါ် ကန့်ကွက်ကြောင်းထုတ်ပြန်ခဲ့ပြီး မိမိကိုယ်ကို ခုခံကာကွယ်ခွင့်အရေးကို အသုံးပြုနိုင်ကြောင်း ပြောကြားလိုက်သည်။ ထိုင်းတပ်မတော် ပြောရေး ဆိုခွင့်ရှိသူ ဗိုလ်ချုပ် Winthai Suvaree က "အဆိုပါမိုင်းပေါက်ကွဲမှုသည် Surin နယ်စပ်ဒေသ Ta Muen Thom ဘုရားဟောင်းနေရာမှ ၁ ကီလိုမီတာအကွာတွင်ရှိသည့် တပ်သားများ၏ ပုံမှန်စောင့်ကြည့် လှည့်လည်ရာ လမ်းကြောင်း၌ ယနေ့(ဩဂုတ်၁၂) နံနက် ၉ နာရီ ၁၀ မိနစ်တွင် ဖြစ်ပွား ခဲ့ခြင်းဖြစ်ပါသည်" ဟု ရှင်းပြခဲ့သည်။

ဖြစ်စဉ်တွင် အမှတ် ၂၆၁၀ ပြည်သူ့စစ်တပ်ဖွဲ့မှ ပြည်သူ့စစ် ၇ ဦးသည် တာဝန်ထမ်းဆောင်နေစဉ် Sgt Theerapol Piakhanthee သည် မိုင်းနင်း မိခဲ့ပြီး ၎င်း၏ဘယ်ဘက်ဖနောင့်တွင် ပြင်းထန်ဒဏ်ရာရရှိခဲ့ကာ Phanom Dong Rak ဆေးရုံတွင် ကုသမှုခံယူနေရကြောင်း ဗိုလ်ချုပ် Winthai က ပြောကြားခဲ့သည်။ ထိုင်းတပ်မတော် ပြောရေးဆိုခွင့်ရှိသူက "အဆိုပါ ဖြစ်စဉ်သည် ကမ္ဘောဒီးယားဘက်မှ စစ်ရေးရပ်စဲရေး သဘောတူညီချက် နှင့် အထူးသဖြင့် လူသတ်မိုင်းအားလုံး အသုံးပြုခြင်းနှင့် တပ်ဆင်ခြင်းကို တားမြစ်ထားသည့် အော့တဝါစာချုပ်အပါအဝင် အပြည်ပြည်ဆိုင်ရာ လူသားချင်းစာနာထောက်ထားရေး ဥပဒေများကို ချိုးဖောက်နေကြောင်း ထင်ရှားသော သက်သေပင် ဖြစ်သည်။ ၎င်းသည် ထိုင်းနယ်မြေအတွင်းရှိ ထိုင်းတပ်ဖွဲ့များအပေါ် တိုက်ရိုက်တိုက်ခိုက်မှုတစ်ခုပင် ဖြစ်သည်" ဟု ပြောကြားခဲ့သည်။

ဗိုလ်ချုပ် Winthai Suvaree က "ထိုကဲ့သို့ဖြစ်ရပ်များသည် နယ်စပ် ဒေသများတွင် မကြာခဏဖြစ်ပွားလျက်ရှိပြီး ကမ္ဘောဒီးယား၏ မကောင်းသော ရည်ရွယ်ချက်နှင့် ထိုင်းနိုင်ငံအပေါ် အဆက်မပြတ်ခြိမ်းခြောက်မှုများကို ထင်ဟပ်နေစေပါသည်။ ၎င်းသည် ထိုင်းနိုင်ငံ၏ နယ်မြေ အချုပ်အခြာ အာဏာကို ချိုးဖောက်ရာရောက်ပြီး မကြာသေးမီက ကျင်းပခဲ့သောအထွေထွေနယ်စပ်ကော်မတီအစည်းအဝေးတွင် သဘောတူညီခဲ့သည့်စစ်ရပ်စဲရေးသဘောတူညီချက်ကိုလည်း ဆန့်ကျင်နေခြင်းဖြစ်သည်။အဆိုပါအချက်က ကမ္ဘောဒီးယားသည် စစ်ရပ်စဲရေးသဘောတူညီချက် အကောင်အထည်ဖော်ဆောင်နေစဉ်အတွင်း လက်နက်များကို အသုံးပြု နေဆဲဖြစ်ကြောင်း ဖော်ပြနေပါသည်" ဟု ပြောကြားခဲ့သည်။ ကမ္ဘောဒီးယား ဘက်မှ စနစ်တကျစီစဉ်ကာ မြေမြှုပ်မိုင်းများကို အသုံးပြုပြီး ထိုင်းနိုင်ငံ ကို တိုက်ခိုက်နေသည်ဟု ၎င်းက ယုံကြည်နေသည်။

"ထိုင်းတပ်မတော်သည် ငြိမ်းချမ်းစွာ ဆောင်ရွက်လျက်ရှိပြီး နယ်စပ် ပဋိပက္ခကို စတင်ဖန်တီးခဲ့ခြင်း မရှိပါ ၊ သို့သော် ဖိအားများ ဆက်လက် တိုးမြင့်လာပါက ကမ္ဘောဒီးယား၏ စစ်ရပ်စဲရေး သဘောတူညီချက် ချိုးဖောက်မှုနှင့် ထိုင်းနိုင်ငံ၏အချုပ်အခြာအာဏာကို ထိပါးမှုတို့ကြောင့် ထိုင်းတပ်ဖွဲ့ဝင်များခံစားရသော ဆုံးရှုံးမှုများကို ကိုင်တွယ်ဖြေရှင်းနိုင်ရန် အတွက် အပြည်ပြည်ဆိုင်ရာဥပဒေအရ မိမိကိုယ်ကို ခုခံကာကွယ်ခွင့်ကို အသုံးပြုရန် မိမိတို့အနေဖြင့် မလွဲမသွေ ဖိအားပေးခံရနိုင်ပါသည်" ဟု ဗိုလ်ချုပ် Winthai က ပြောကြားခဲ့သည်။ ဇူလိုင်လ ၁၆ ရက်နေ့မှစတင်၍ ကမ္ဘောဒီးယားဘက်မှ ထိုင်းနယ်မြေကို ကျူးကျော်ဝင်ရောက်ပြီးနောက် မြေမြှုပ်မိုင်းပေါက်ကွဲမှုများဖြစ်ပွားခဲ့ရာတွင် ကမ္ဘောဒီးယားဘက်မှ ထိုင်း နယ်မြေတွင် ထောင်ထားသော မြေမြှုပ်မိုင်းများကြောင့် ထိုင်းတပ်ဖွဲ့ဝင် ၅ ဦး ၏ ခြေထောက်များ ထိခိုက်ဆုံးရှုံးခဲ့ရသည်။ ကမ္ဘောဒီးယားနိုင်ငံနှင့် နယ်နိမိတ်ချင်းထိစပ်နေသော Si Sa Ket ၊ Surin နှင့် Ubon Ratchathani ဒေသများတွင် မြေမြှုပ်မိုင်း ၅ လုံး ပေါက်ကွဲမှုများကြောင့် ဒဏ်ရာရခဲ့သည့် ထိုင်းတပ်ဖွဲ့ဝင် ၁၃ ဦးတွင် အဆိုပါ တပ်ဖွဲ့ဝင် ၅ ဦး ပါဝင်ခဲ့သည်။

ကိုးကား- Bangkok Post

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

12 August 2025

လက်နက်ကိုင်အကြမ်းဖက်အဖွဲ့များသည် တိုင်းဒေသကြီးနှင့် ပြည်နယ်များရှိ မြို့၊ ရွာများအတွင်း တိုက်ပွဲများဖော်ဆောင်ခြင်း၊ လက်နက်ကြီးများဖြင့် အဝေးမှ ပစ်ခတ်ခြင်း၊ Drone ဖြင့် Drop Bomb များပစ်ချတိုက်ခိုက်ခြင်း၊ လက်လုပ်ဗုံး၊ လက်လုပ်မိုင်းများဖြင့် မိုင်းထောင်ဖောက်ခွဲ တိုက်ခိုက်ခြင်းများအား လုပ်ဆောင်လျက်ရှိသည့်အပြင် နိုင်ငံ့ဝန်ထမ်းများကိုပါ ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော အကြမ်းဖက်မှုများနှင့် ရာဇဝတ်မှုများအား ကျူးလွန်လုပ်ဆောင်လျက်ရှိပါ သည်။

ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဩဂုတ် ၁၁ ရက် နံနက် ၁၁ နာရီတွင် မန္တလေးတိုင်းဒေသကြီး၊ မြင်းခြံမြို့နယ်၊ အခြေခံပညာအထက်တန်းကျောင်းခွဲ(အနိမ့်)မှ အလယ်တန်းပြကာယဆရာဖြစ်သူ မြင်းခြံမြို့နယ်၊ အမှတ်(၂)ရပ်ကွက်နေ ဦးကျော်ရင်(၃၀)နှစ်အား PDF အမည်ခံ အကြမ်းဖက်သမားများက ဖမ်းဆီးခေါ်ဆောင်သွားကြောင်း သတင်းအရ လုံခြုံရေး တပ်ဖွဲ့ဝင်များက ဖြစ်စဉ်အား စိစစ်ခဲ့ရာ ဦးကျော်ရင်သည် ဗဟိုဝန်ထမ်းတက္ကသိုလ်(အထက်မြန်မာပြည်)၌ ဖွင့်လှစ်မည့် မွမ်းမံသင်တန်းသို့ တက်ရောက်ရန် ဩဂုတ် ၇ ရက်တွင် မြင်းခြံမြို့မှ မန္တလေးမြို့သို့ ခရီးသည်တင်မော်တော်ယာဉ်ဖြင့် လိုက်ပါသွားခဲ့ရာ တောင်သာမြို့နယ်၊ ညောင်တိုကျေးရွာလမ်းခွဲအနီးအရောက်၌ PDF အမည်ခံ အကြမ်းဖက်သမားများက အဆိုပါမော်တော်ယာဉ်အား တားဆီးစစ်ဆေးကာ ၎င်းအား ဖမ်းဆီးခေါ်ဆောင်သွားခြင်းဖြစ်ကြောင်း သိရသည်။

 အလားတူ ဩဂုတ် ၁၁ ရက် မွန်းလွဲ ၂ နာရီတွင် မန္တလေးတိုင်းဒေသကြီး၊ တောင်သာမြို့နယ်၊ ညောင်တိုကျေးရွာလမ်းခွဲအနီး၌ အမျိုးသမီး တစ်ဦးအား PDF အမည်ခံ အကြမ်းဖက်သမားများက ဖမ်းဆီးခေါ်ဆောင်သွားကြောင်း သတင်းအရ လုံခြုံရေးတပ်ဖွဲ့ဝင်များက ဖြစ်စဉ်အား စိစစ်ခဲ့ရာ နေပြည်တော်ပြည်ထောင်စုနယ်မြေ၊ လူဝင်မှုကြီးကြပ်ရေးဦးစီးဌာနမှ ဦးစီးမှူးဖြစ်သူ ဒေါ်သင်းသင်းခိုင်(ခ)မိမိလေး(၅၁)နှစ်သည် ဩဂုတ် ၈ ရက်တွင် နေပြည်တော်မှ မြင်းခြံမြို့သို့ ခရီးသည်တင်မော်တော်ယာဉ်ဖြင့် လိုက်ပါလာစဉ် တောင်သာမြို့နယ်၊ ညောင်တိုကျေးရွာလမ်းခွဲအနီးအရောက်၌ PDF အမည်ခံ အကြမ်းဖက်သမားများက အဆိုပါမော်တော်ယာဉ်အား တားဆီးစစ်ဆေးကာ ၎င်းအား ဖမ်းဆီးခေါ်ဆောင်သွားခြင်းဖြစ်ကြောင်း သိရသည်။

အထက်ပါဖြစ်စဉ်မှ နိုင်ငံ့ဝန်ထမ်းများအား ပစ်မှတ်ထားဖမ်းဆီး၍ ခြိမ်းခြောက်ငွေ တောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော ရာဇဝတ်မှုများအား ကျူးလွန်လုပ်ဆောင်လျက်ရှိသည့် အကြမ်းဖက်သမားများအား ဖော်ထုတ်ဖမ်းဆီး အရေးယူနိုင်ရေးနှင့် ဖမ်းဆီးခံရသူအား ပြန်လည်ကယ်တင်နိုင်ရေး လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA

တောင်ကိုရီးယားတပ်မတော်ရှိ စစ်သားအရေအတွက်သည် ပြီးခဲ့သည့် ခြောက်နှစ်တာကာလအတွင်း ၂၀% ကျဆင်းသွားကြောင်း အစီရင်ခံစာ တစ်စောင်က ဖော်ပြထားပါသည်။ ထိုသို့ကျဆင်းရသည့် အဓိကအချက်မှာကမ္ဘာ့ကလေးမွေးဖွားနှုန်း အနိမ့်ဆုံးနိုင်ငံဖြစ်သည့် တောင်ကိုရီးယားတွင် မဖြစ်မနေစစ်မှုထမ်းရမည့် အရွယ်ရောက်ယောက်ျားလူဦးရေ သိသိသာသာ ကျဆင်းလာခြင်းကြောင့်ဖြစ်ကြောင်း ထိုအစီရင်ခံစာက ဖော်ပြထား ပါသည်။

တောင်ကိုရီးယားတပ်မတော်၏ အရွယ်အစားသည် ၂၀၀၀ ပြည့်လွန်နှစ် များအစောပိုင်းက တပ်သား ၆၉၀,၀၀၀ ခန့်ရှိခဲ့ရာမှ တဖြည်းဖြည်း ကျဆင်း လာကာ ၂၀၁၀ ပြည့်လွန်နှစ်နှောင်းပိုင်းတွင် ပိုမိုကျဆင်းလာပြီး ယခု အခါ တပ်သား ၄၅၀,၀၀၀ ခန့်သာရှိတော့သည်။ မြောက်ကိုရီးယားတွင် တပ်မတော်သား ၁.၂ သန်းခန့်ရှိသည်ဟု ၂၀၂၂ ခုနှစ်က ကာကွယ်ရေး ဝန်ကြီးဌာန၏ နောက်ဆုံးခန့်မှန်းချက်အရ သိရှိထားရပါသည်။

တောင်ကိုရီးယားသည် ကမ္ဘာ့ပေါ်တွင် အိုမင်းရင့်ရော်မှု အမြန်ဆုံး လူ့ အဖွဲ့အစည်းတစ်ရပ် ဖြစ်နေပြီး ၂၀၂၄ ခုနှစ်တွင် အနိမ့်ဆုံး ကလေး မွေးဖွားနှုန်း ၀.၇၅ သာရှိပါသည်။ ၎င်းမှာ အမျိုးသမီးတစ်ဦး၏ မျိုးပွား နိုင်သောဘဝတွင် မျှော်မှန်းထားသည့် ပျမ်းမျှကလေးမွေးဖွားနှုန်းကို ညွှန်ပြ နေပါသည်။ ၂၀၂၀ ပြည့်နှစ်တွင် ၅၁.၈ သန်းအထိ ရှိခဲ့သော နိုင်ငံ၏ လူဦးရေသည် ၂၀၇၂ ခုနှစ်အရောက်တွင် ၃၆.၂ သန်းသို့ ကျဆင်းလာမည် ဟု အစိုးရ၏ခန့်မှန်းချက်အရ သိရပါသည်။

၂၀၂၅ ခုနှစ်တွင် တောင်ကိုရီးယား၏ ကာကွယ်ရေးအသုံးစရိတ်မှာ ဝမ် ၆၁ ထရီလီယံ (ပေါင် ၃၃ ဘီလီယံ) ကျော်ရှိပြီး မြောက်ကိုရီးယား၏ ခန့်မှန်း စီးပွားရေးအရွယ်အစားထက် ပိုမိုကြီးမားပါသည်။ သို့သော် နိုင်ငံ့ စစ်တပ် သည် ကာကွယ်ရေးအတွက် အသင့်ဖြစ်သည်ဟု လုံလောက်ရသော အရေ အတွက်ထက် စစ်သား ၅၀,၀၀၀ လိုအပ်နေဆဲဖြစ်ကြောင်း ကာကွယ်ရေး ဝန်ကြီးဌာနက ပြောကြားထားပါသည်။ 

ကိုးကား- The Guardian

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ ဝန်ကြီး-၃