07 August 2025

တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားများ လွှမ်းမိုးစေရန်လည်းကောင်း၊ ၎င်းတို့နှင့်အမြင်အယူအဆ မတူသူ အပြစ်မဲ့ အရပ်သားပြည်သူများအား “သူလျှို၊ သတင်းပေး၊ ဒလန်” ဟုစွပ်စွဲ၍လည်းကောင်း၊ “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ လက်နက်ကိုင်အကြမ်းဖက်သမားများက သေနတ်၊ ဓားများ အသုံးပြု၍ ရက်စက်စွာ လုပ်ကြံတိုက်ခိုက်၊ သတ်ဖြတ်ခြင်းများ ပြုလုပ်လျက်ရှိပါသည်။

ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဩဂုတ် ၆ ရက် ညနေ ၄ နာရီ ၃၀ မိနစ်တွင် မန္တလေးတိုင်းဒေသကြီး၊ မိတ္ထီလာမြို့နယ်၊ ဝါးရုံစုကျေးရွာအနီး၌ သေနတ်၊ ဓားများဖြင့် ပစ်ခတ် ထိုးခုတ်ခံရ၍ အမျိုးသား တစ်ဦး သေဆုံးသွားကြောင်း သတင်းအရ လုံခြုံရေးတပ်ဖွဲ့ဝင်များက ဖြစ်စဉ်အား စိစစ်ခဲ့ရာ ညနေ ၄ နာရီ ၂၀ မိနစ်တွင် အဆိုပါကျေးရွာနေ ဦးမင်းကြိုင်(၅၃)နှစ်သည် ၎င်း၏နေအိမ်၌ ရှိနေစဉ် PDF အမည်ခံ အကြမ်းဖက်သမား ရှစ်ဦး(စိစစ်ဆဲ)က ဆိုင်ကယ် လေးစီးဖြင့် ရောက်ရှိလာပြီး “ဒလန်” ဟုစွပ်စွဲပြောဆို၍ သေနတ်၊ ဓားများဖြင့် ပစ်ခတ်ထိုးခုတ်သွားခဲ့သဖြင့် ဦးမင်းကြိုင်တွင် ကျည်ထိမှန်ဒဏ်ရာ၊ ဓားဒဏ်ရာများ ရရှိကာ သေဆုံးသွားခဲ့ခြင်းဖြစ်ကြောင်း သိရသည်။

ထိုသို့ အပြစ်မဲ့ အရပ်သားပြည်သူ တစ်ဦးအား “ငါနှင့်မတူ၊ ငါ့ရန်သူ” ဟူသည့် တစ်ဖက်သတ် အစွန်းရောက် ဂိုဏ်းဂဏစွဲအပေါ် အခြေခံကာ သေနတ်၊ ဓားများဖြင့် ပစ်ခတ်ထိုးခုတ်သတ်ဖြတ်မှု ကျူးလွန်ခဲ့သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA

07 August 2025

လက်နက်ကိုင်အကြမ်းဖက်အဖွဲ့များသည် တိုင်းဒေသကြီးနှင့် ပြည်နယ်များရှိ မြို့၊ ရွာများအတွင်း တိုက်ပွဲများဖော်ဆောင်ခြင်း၊ လက်နက်ကြီးများဖြင့် အဝေးမှ ပစ်ခတ်ခြင်း၊ Drone ဖြင့် Drop Bomb များ ပစ်ချတိုက်ခိုက်ခြင်း၊ လက်လုပ်ဗုံး၊ လက်လုပ်မိုင်းများဖြင့် မိုင်းထောင်ဖောက်ခွဲ တိုက်ခိုက်ခြင်းများအား လုပ်ဆောင်လျက်ရှိသည့်အပြင် အပြစ်မဲ့ အရပ်သားပြည်သူများကို ပစ်မှတ်ထား ဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော အကြမ်းဖက်မှုများနှင့် ရာဇဝတ်မှုများအား ကျူးလွန်လုပ်ဆောင်လျက်ရှိပါသည်။

ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဩဂုတ် ၆ ရက် ည ၉ နာရီတွင် မွန်ပြည်နယ်၊ မုဒုံမြို့နယ်၊ ကလော့သော့ကျေးရွာအနောက်ဘက် တစ်မိုင်ခန့်အကွာ ရော်ဘာတောစပ်၌ ကျည်ထိမှန် ဒဏ်ရာများဖြင့် ပုပ်ပွသေဆုံးနေသည့် အမျိုးသား နှစ်ဦးအား တွေ့ရှိရကြောင်း သတင်းအရ လုံခြုံရေး တပ်ဖွဲ့ဝင်များက သွားရောက်စစ်ဆေးခဲ့ရာ ဩဂုတ် ၂ ရက် ည ၈ နာရီတွင် ကလော့သော့ကျေးရွာ အရှေ့ဘက်ရှိ ရော်ဘာခြံသို့ PDF အမည်ခံ အကြမ်းဖက်သမား သုံးဦး(စိစစ်ဆဲ)က ဆိုင်ကယ် သုံးစီးဖြင့် ရောက်ရှိလာပြီး ခြံအလုပ်သမားများဖြစ်သည့် ကလော့သော့ကျေးရွာနေ ဦးထက်အာကာ(၄၁)နှစ်နှင့် ကိုညီညီလွင်(၂၅)နှစ်တို့အား အကြမ်းဖက်ခြိမ်းခြောက်၍ ဖမ်းဆီးခေါ်ဆောင်ကာ ကလော့သော့ ကျေးရွာအနီး ရော်ဘာတောစပ်အရောက် သေနတ်ဖြင့် ပစ်ခတ်သတ်ဖြတ်ခဲ့သဖြင့် ၎င်းတို့နှစ်ဦးတွင် ကျည်ထိမှန် ဒဏ်ရာများဖြင့် သေဆုံးသွားခဲ့ခြင်းဖြစ်ကြောင်း သိရသည်။ 

အထက်ပါဖြစ်စဉ်မှ အပြစ်မဲ့ အရပ်သားပြည်သူများအား ပစ်မှတ်ထားဖမ်းဆီး၍ သေနတ်ဖြင့် ပစ်ခတ်သတ်ဖြတ်သွားခဲ့သည့် အကြမ်းဖက်သမားများအား ဖော်ထုတ်ဖမ်းဆီးအရေးယူ နိုင်ရေးနှင့် နယ်မြေဒေသ တည်ငြိမ်အေးချမ်းရေးအတွက် လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA
 

နေပြည်တော် သြဂုတ် ၆

တရားမဝင်ကုန်သွယ်မှုတိုက်ဖျက်ရေး ဦးဆောင်ကော်မတီ၏ ကြီးကြပ်ကွပ်ကဲမှုဖြင့် နေပြည်တော်ကောင်စီနယ်မြေအပါအဝင် တိုင်းဒေသကြီး၊ ပြည်နယ်များတွင် တရားမဝင်ကုန်သွယ်မှုတိုက်ဖျက်ရေး အထူးအဖွဲ့များကိုဖွဲ့စည်း၍လည်းကောင်း၊ အကောက်ခွန်ဦးစီးဌာနကဦးဆောင်သည့် One Stop Service ဌာနဆိုင်ရာအဖွဲ့များ ဖွဲ့စည်း၍လည်းကောင်း၊ နယ်စပ် ဝင်/ထွက်ဂိတ်များ၊ နယ်စပ်ကုန်သွယ်ရေးရုံးနှင့် စခန်းများ၊ အမြဲတမ်းစစ်ဆေးရေးစခန်းများ၊ ကုန်သွယ်မှုလမ်းကြောင်းတစ်လျှောက်နှင့် ကုန်ပစ္စည်းသိုလှောင်ရုံများ၊ အပြည်ပြည်ဆိုင်ရာဆိပ်ကမ်းများနှင့် လေဆိပ်များ၊ ကမ်းရိုးတန်းဆိပ်ကမ်းများတွင် တရားမဝင်ကုန်သွယ်မှုတိုက်ဖျက်ရေးလုပ်ငန်းများကို ထိရောက်စွာဆောင်ရွက်လျက်ရှိရာ သတင်းအချက်အလက်ရရှိမှုသည် အလွန်အရေးပါလျက်ရှိသည်။

တာဝန်သိ ပြည်သူများ၏ သတင်းပေးတိုင်ကြားမှုများကြောင့် ၂၀၂၅ ခုနှစ် ဇူလိုင်လအတွင်း သတင်းရရှိမှု ၄၆ ကြိမ်ရရှိခဲ့ပြီး သတင်းမှားလေးကြိမ်၊ နောက်ကျ သတင်းနှစ်ကြိမ်နှင့် ဖမ်းဆီးရမိမှု သတင်းမှန်အကြိမ် ၄၀ ဖြစ်ပြီး သတင်းရရှိမှုကြောင့် ဖမ်းဆီးရမိအမှုတွဲ ၈၅ မှု ဖွင့်လှစ်ထားပြီး ဖမ်းဆီးရမိမှုများတွင် သစ်မျိုးစုံ၊ လုပ်ငန်းသုံးပစ္စည်းများ၊ လူသုံး ကုန်ပစ္စည်းများနှင့် စားသောက်ကုန်ပစ္စည်းများဖြစ်သော ကုန်ပစ္စည်း အမျိုး ၅၀ အပါအဝင် ဖမ်းဆီးရမိမှုခန့်မှန်းတန်ဖိုးငွေကျပ် ၂၅၉၄ ဒသမ ၀၁၈ သန်းနှင့် တရားမဝင်ကုန်စည်များ တင်ဆောင်လာသည့် မော်‌တော်ယာဉ်များအပါအဝင် လိုင်စင်မဲ့မော်တော်ယာဉ်များနှင့် လိုင်စင်မဲ့မော်တော် ဆိုင်ကယ်များ ဖမ်းဆီးရမိခဲ့သည်။

ဇူလိုင်လအတွင်း သတင်းပေးတိုင်ကြားခဲ့သည့် တာဝန်သိပြည်သူ များကိုလည်း ဖမ်းဆီးရမိမှုခန့်မှန်းတန်ဖိုးငွေကျပ် ၂၅၉၄ ဒသမ ၀၁၈ သန်း၏ ၂၀ ရာခိုင်နှုန်း ဖြစ်သော ငွေကျပ် ၅၁၈ ဒသမ ၈၀၄ သန်းကို သတင်းပေး ဆုကြေးငွေအဖြစ် ချီးမြှင့်ပေးသွားမည်ဖြစ်ပြီး သက်ဆိုင်ရာဌာနများမှ မြန်မြန်ဆန်ဆန် ဆုချီးမြှင့်နိုင်ရေး ဆောင်ရွက်ပေးလျက်ရှိသည်။

ထို့ကြောင့် တာဝန်သိပြည်သူများအနေဖြင့် တရားမဝင်ကုန်သွယ်မှုသတင်းများနှင့် ပတ်သက်၍ လက်ကိုင်ဖုန်း - ၀၉၄၀၄၃၃၉၉၆၉၊ အော်တိုတယ် လီဖုန်းနံပါတ်-၀၆၇-၄၀၉၈၈၃ နှင့် အီးမေးလ် antiillegaltradeinfo@gmail.com သို့ သတင်းပေးပို့ တိုင်ကြားနိုင်ကြောင်း သိရသည်။

MOI

တော်ဝင်ထိုင်းတပ်မတော် (RTA) သည် ကမ္ဘောဒီးယားနယ်စပ်အနီး Surin ခရိုင်ရှိ အငြင်းပွားဖွယ် Ta Kwai ဘုရားကျောင်းနယ်မြေကို အပြည့်အဝ ထိန်းချုပ်နိုင်ခြင်း မရှိသေးကြောင်း ဝန်ခံခဲ့သည်။

ထိုင်းတပ်မတော် ပြောရေးဆိုခွင့်ရှိသူ ဗိုလ်မှူးကြီး Winthai Suvaree က (Hill 350) တောင်ကုန်းသည် မဟာဗျူဟာအရ အရေးပါသော နေရာ ဖြစ်ပြီး ကမ္ဘောဒီးယားဘက်မှ ချထားသော မြေမြှုပ်မိုင်းများကြောင့် အပြည့်အဝ တပ်စွဲနိုင်ခြင်းမရှိကြောင်း ရှင်းပြခဲ့သည်။

ထို့အပြင် Ta Kwai ဘုရားကျောင်းသည် အငြင်းပွားဖွယ် နယ်မြေဖြစ်ပြီး ထိုင်းနှင့် ကမ္ဘောဒီးယားတပ်များ ထိန်းချုပ်ရန် ကြိုးပမ်းနေကြောင်း ၎င်းက ဆိုသည်။ လက်ရှိတွင် ထိုင်းတပ်များသည် ဘုရားကျောင်းကို တိုက်ရိုက် မထိန်းချုပ်နိုင်သေးသော်လည်း ပတ်ဝန်းကျင်နယ်မြေကို ထိန်းချုပ်ထားပြီး Hill 350 ကို သိမ်းပိုက်ရန် ကြိုးစားနေကြောင်း ပြောကြားခဲ့သည်။

သို့သော် ကမ္ဘောဒီးယားဘက်မှ မိုင်းများထပ်မံချထားခြင်းကြောင့် ထိုင်း တပ်သားများ ဒဏ်ရာရရှိခဲ့ပြီး နောက်ဆုံးအဆင့် စစ်ဆင်ရေးတွင် ရည်မှန်းချက် ၉၉ % အောင်မြင်ခဲ့ကြောင်း ဗိုလ်မှူးကြီးက ပြောကြားခဲ့ သည်။

ထိုင်းနှင့် ကမ္ဘောဒီးယားတပ်များသည် လက်ရှိတွင် ဘုရားကျောင်း ပတ်ဝန်းကျင်တွင် တပ်စွဲထားပြီး တစ်ဖက်နှင့်တစ်ဖက် မီတာ ၅၀ အကွာ တွင် ရှိနေသည်။ ကမ္ဘောဒီးယားဘက်မှ လေကြောင်း စောင့်ကြည့်ရေး ဒရုန်းများကိုလည်း ထိုင်းနယ်စပ်တစ်လျှောက် တွေ့ရှိရကြောင်း 2nd Army Region က ထုတ်ပြန်ခဲ့သည်။

သောကြာနေ့ (ဩဂုတ် ၈) တွင် ထိုင်းတပ်မတော်သည် စစ်သံမှူးများ၊ နိုင်ငံခြားသံတမန်များ၊ နိုင်ငံခြားသတင်းထောက်များနှင့် နိုင်ငံခြားရေး ဝန်ကြီးဌာနမှ ကိုယ်စားလှယ်များကို ဖိတ်ကြားကာ ဒေသအခြေအနေကို ပူးတွဲသုံးသပ်မည်ဖြစ်သည်။

ကိုးကား- Bangkok Post

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

ထိုင်းနိုင်ငံတပ်မတော် စစ်ဒေသ ၂ မှ ထုတ်ပြန်ချက်အရ ကမ္ဘောဒီးယား နိုင်ငံသည် ထိုင်းနိုင်ငံနှင့်နယ်နိမိတ်ချင်းထိစပ်နေသော ဒေသများတွင် စစ်အင်အားဖြည့်တင်းမှုများ ဆက်လက်လုပ်ဆောင်နေပြီး သံသယ ဖြစ်ဖွယ် ဒရုန်းများဖြင့် နယ်စပ်ရှိ ထိုင်းစစ်တပ်စခန်းများကို ထောက်လှမ်းနေ သည်ဟု သိရှိရသည်။

ကြာသပတေးနေ့ (သြဂုတ်လ ၇ ရက်) နံနက်ပိုင်းတွင် ထုတ်ပြန်သည့် ဒေသဆိုင်ရာ စစ်ဌာနချုပ်၏ ထုတ်ပြန်ချက်အရ ကမ္ဘောဒီးယားဘက်မှ နယ်နိမိတ်တစ်လျှောက် တပ်အင်အားများ တိုးမြှင့်ဖြန့်ကြက်ထားကြောင်း ဖော်ပြထားသည်။ ထို့အပြင် အမျိုးအမည်မသိသော ဒရုန်းများကို နယ်စပ်စခန်းများ၌ ဖြန့်ကြက်ချထားသည်ကို တွေ့ရှိရသည်ဟု ဆိုသည်။

ထိုင်းနိုင်ငံ ပြည်သူ့လေကြောင်းအာဏာပိုင်အဖွဲ့ (CAAT) က ဩဂုတ်လ ၇ ရက်နေ့တွင် တစ်နိုင်ငံလုံးအတိုင်းအတာဖြင့် အများပြည်သူ ဒရုန်း အသုံးပြုမှုကို တားမြစ်ကြောင်း ကြေညာခဲ့သည်။ CAAT ညွှန်ကြားရေးမှူး ဗိုလ်မှူးကြီး Manat Chavanaprayoon က အဆိုပါကန့်သတ်ချက်သည် အမျိုးသားလုံခြုံရေးအတွက် ခြိမ်းခြောက်မှုဖြစ်စေနိုင်သော ဒရုန်းများကို အန္တရာယ်မြင့်မားသည့် ပြည်နယ်များတွင် ယခင်ကတည်းက စတင်ကျင့်သုံး ခဲ့သည့် တားမြစ်ချက်၏ တိုးချဲ့မှုတစ်ရပ်ဖြစ်ကြောင်း ရှင်းပြခဲ့သည်။

စစ်ဒေသ ၂ မှ ထပ်မံထုတ်ပြန်ချက်အရ ကမ္ဘောဒီးယားတပ်သား ၂၀ ဦးကို Si Sa Ket ခရိုင်၊ Kantharalak ရှိ Chong Sam Tae နယ်စပ်ဂိတ်တွင် လက်နက်ခဲယမ်း ပြတ်သွားပြီးနောက် လက်နက်ချအညံ့ခံခဲ့သည့် အတွက် ဖမ်းဆီးထားကြောင်း သတင်းထုတ်ပြန်ခဲ့သည်။

အဆိုပါတပ်သားများအား ထိုင်းနိုင်ငံသို့ တရားမဝင်ဝင်ရောက်မှုများဖြင့် တရားစွဲဆိုသွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။ ၎င်းတို့အနက် ၂ ဦးမှာ ဒဏ်ရာရရှိထားပြီး Surin ရှိ Weerawatyothin ဆေးရုံသို့ တင်ပို့ကုသမှုခံယူနေရကြောင်း သိရှိရသည်။

ကိုးကား- Bangkok Post

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

အင်ဒိုနီးရှားနိုင်ငံသည် အရှေ့တောင် အာရှဒေသ၌ တာတိုပစ်အမြင့်ပျံဒုံးကျည်ကို ပထမဆုံးအသုံးပြုသည့် နိုင်ငံဖြစ်လာကြောင်း အရှေ့ကာလီမန်တန်ပြည်နယ်ရှိ စစ်ရေးဆိုင်ရာ ဝါသနာရှင်များ၏  လူမှုကွန်ရက်တွင် တင်ထားသော သတင်းများအရသိရသည်။

ယခုလအစောပိုင်းတွင် လူမှုကွန်ရက် စာမျက်နှာတစ်ခုက   KHAN  ဒုံးကျည်ဓာတ်ပုံများကိုတင်ခဲ့ပြီးနောက် စစ်ဘက်ဆိုင်ရာ ဘလော့များတွင်လည်း အကျယ်တဝင့်ဖော်ပြလာသည့်အပြင် ပြည်တွင်း သတင်းဌာနကြီး တစ်ခုဖြစ်သည့် Kompas တွင်ပါ တရားဝင်ဖော်ပြလာခြင်း ဖြစ်သည်။

တူကီယဲနိုင်ငံရှိ Roketsan ကုမ္ပဏီက ထုတ်လုပ်ထားသော အဆိုပါ တာတိုပစ်အမြင့်ပျံဒုံးကျည်ကို အရှေ့ကာလီမန်တန်ပြည်နယ်ရှိ စစ်စခန်းတစ်ခု၌ထားရှိခြင်း ဖြစ်သည်ကို ဓာတ်ပုံများတွင်တွေ့ရသည်။ ယင်းဒုံးကျည်သည် အလေးချိန်ကီလိုဂရမ် ၂၅၀၀ ရှိပြီး ကီလိုဂရမ် ၄၇၀ ရှိထိပ်ဖူးကို တင်ဆောင်ကာ ကီလိုမီတာ ၂၈၀ ရှိပစ်မှတ် ကိုပစ်ခတ်နိုင်ကြောင်း သိရသည်။

Ref: AGC

MWD Web Portal

နေပြည်တော် သြဂုတ် ၆

တရားမဝင်ကုန်သွယ်မှုတိုက်ဖျက်ရေး ဦးဆောင်ကော်မတီ၏ ကြီးကြပ်ကွပ်ကဲမှုဖြင့် တရားမဝင်ကုန်သွယ်မှုများကို ဥပဒေနှင့်အညီ ထိရောက်စွာတားဆီးအရေးယူနိုင်ရေး ဆောင်ရွက်လျက်ရှိသည်။

သြဂုတ် ၄ ရက်တွင် အကောက်ခွန်ဦးစီးဌာန၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့က စစ်ဆေးမှုများဆောင်ရွက်ခဲ့ရာ အေးရှားဝေါလ် ဆိပ်ကမ်း၌ ကုန်သေတ္တာငါးလုံးအတွင်းမှ တရားဝင်စာရွက်စာတမ်း အထောက်အထားတင်ပြနိုင်ခြင်းမရှိသည့် လူသုံးကုန်ပစ္စည်းတစ်မျိုး (ခန့်မှန်းတန်ဖိုးငွေကျပ် ၃၄၆၅၀၀၀၀) ကို ဖမ်းဆီးရမိခဲ့ပြီး အကောက်ခွန် လုပ်ထုံးလုပ်နည်းများနှင့်အညီ အရေးယူဆောင်ရွက်လျက်ရှိသည်။

ထို့အတူ ကရင်ပြည်နယ် တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့က စစ်ဆေးမှုများဆောင်ရွက်ခဲ့ရာ မြဝတီမြို့ အမှတ်(၁)ရပ်ကွက် နှင်းဆီလမ်းလမ်းဘေးတစ်နေရာ၌ တရားဝင်စာရွက်စာတမ်းအထောက်အထား တင်ပြနိုင်ခြင်းမရှိသည့် လူသုံးကုန်ပစ္စည်းတစ်မျိုး (ခန့်မှန်းတန်ဖိုးငွေကျပ် ၉၀၀၀၀၀၀)ကို ဖမ်းဆီးရမိခဲ့ပြီး အကောက်ခွန်လုပ်ထုံးလုပ်နည်းများနှင့်အညီ အရေးယူဆောင်ရွက်လျက်ရှိသည်။

ထို့အပြင် သြဂုတ် ၅ ရက်တွင် စစ်ကိုင်းတိုင်းဒေသကြီး တရားမဝင်ကုန်သွယ်မှုတိုက်ဖျက်ရေး အထူးအဖွဲ့၏ စီမံခန့်ခွဲမှုဖြင့် တာဝန်ကျ ပူးပေါင်းအဖွဲ့က စစ်ဆေးမှုများဆောင်ရွက်ခဲ့ရာ စစ်ကိုင်းမြို့ ရတနာပုံ တံတားပူးပေါင်းစစ်ဆေးရေးဂိတ်၌ တရားမဝင်ရွှေသတ္တုတူးဖော်ရာတွင် အသုံးပြုသည့် Toyo Battery အလုံး ၁၅၀ အပါအဝင် ဆက်စပ်ပစ္စည်း အမျိုး ၄၀ (ခန့်မှန်းတန်ဖိုးငွေကျပ် ၃၅၇၈၃၀၀၀၀) ကို မြန်မာ့သတ္တု တွင်းဥပဒေအရလည်းကောင်း၊ တရားမဝင်ကျွန်းသစ် ၀ ဒသမ ၆၇၆ တန် (ခန့်မှန်းတန်ဖိုးငွေကျပ် ၄၇၃၇၆၀၀)ကို သစ်တောဥပဒေအရလည်း ကောင်း၊ တရားဝင်စာရွက်စာတမ်းအထောက်အထား တင်ပြနိုင်ခြင်းမရှိသည့် တရုတ်နိုင်ငံထုတ် စားသောက်ကုန်ပစ္စည်းတစ်မျိုး (ခန့်မှန်း တန်ဖိုးငွေကျပ် ၉၀၀၀၀၀၀)ကို ပို့ကုန်သွင်းကုန် ဥပဒေအရလည်းကောင်း စုစုပေါင်း(ခန့်မှန်းတန်ဖိုးငွေကျပ် ၃၇၁၅၆၇၆၀၀) ကို ဖမ်းဆီးအရေးယူ ဆောင်ရွက်လျက်ရှိသည်။

အလားတူ ပဲခူးတိုင်းဒေသကြီး တရားမဝင်ကုန်သွယ်မှုတိုက်ဖျက် ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့က စစ်ဆေးမှုများဆောင်ရွက်ခဲ့ရာ ညောင်ခါးရှည် အမြဲတမ်းစစ်ဆေးရေးစခန်း၌ ရန်ကုန်မြို့မှ မော်လမြိုင်မြို့သို့ သွားရောက်မည့် မော်တော်ယာဉ်တစ်စီးပေါ်မှ တရားဝင်စာရွက်စာတမ်းအထောက်အထား တင်ပြနိုင်ခြင်း မရှိသည့် လုပ်ငန်းသုံးပစ္စည်းနှစ်မျိုး (ခန့်မှန်းတန်ဖိုးငွေကျပ် ၁၀၁၃၁၀၀၀) နှင့် အဆိုပါပစ္စည်းများ တင်ဆောင်လာသည့် Mitsubishi Fuso Truck တစ်စီး (ခန့်မှန်းတန်ဖိုးငွေကျပ် ၇၀၀၀၀၀၀၀) စုစုပေါင်း ခန့်မှန်းတန်ဖိုးငွေကျပ် ၈၀၁၃၁၀၀၀)ကို ဖမ်းဆီးရမိခဲ့ပြီး အကောက်ခွန်လုပ်ထုံးလုပ်နည်းများနှင့်အညီ အရေးယူဆောင်ရွက်လျက်ရှိသည်။

၎င်းအပြင် နေပြည်တော်တရားမဝင်ကုန်သွယ်မှုတိုက်ဖျက်ရေး အထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့များက စစ်ဆေးမှုများဆောင်ရွက်ခဲ့ရာ လယ်ဝေးခရိုင်နှင့် ဥတ္တရခရိုင်တို့အတွင်း၌ တရားမဝင်ကျွန်းသစ် ၃ ဒသမ ၀၅၇ တန်၊ သစ်မာ ၀ ဒသမ ၁၃၃ တန် စုစုပေါင်းခန့်မှန်းတန်ဖိုးငွေကျပ် ၁၇၀၄၂၉၅ ကို ဖမ်းဆီးရမိခဲ့ပြီး သစ်တောဥပဒေနှင့်အညီ အရေးယူဆောင်ရွက်လျက်ရှိသည်။

ထို့အပြင် မန္တလေးတိုင်းဒေသကြီး တရားမဝင်ကုန်သွယ်မှုတိုက်ဖျက် ရေးအထူးအဖွဲ့၏ စီမံခန့်ခွဲမှုဖြင့် တာဝန်ကျပူးပေါင်းအဖွဲ့များက စစ်ဆေးမှုများဆောင်ရွက်ခဲ့ရာ သြဂုတ် ၅ ရက်တွင် ရတနာပုံတံတား(မန္တလေး)စစ်ဆေးရေးဂိတ်၌ မန္တလေးမြို့မှရွှေဘိုမြို့သို့သွားရောက်မည့် မော်တော်ယာဉ်တစ်စီးနှင့် မန္တလေးမြို့မှ စစ်ကိုင်းမြို့သို့သွားရောက်မည့် မော်တော်ယာဉ်တစ်စီးတို့ပေါ်မှ တရားဝင်စာရွက်စာတမ်းအထောက်အထား တင်ပြနိုင်ခြင်းမရှိသည့် လုပ်ငန်းသုံးပစ္စည်း ၁၉ မျိုး (ခန့်မှန်းတန်ဖိုးငွေကျပ် ၂၀၄၀၅၆၄၀)နှင့် အဆိုပါပစ္စည်းများ တင်ဆောင်လာသည့် Hyundai Porter II Pick Up တစ်စီး၊ Mitsubishi Canter Light Truck တစ်စီး (ခန့်မှန်းတန်ဖိုးငွေကျပ် ၄၃၀၀၀၀၀၀)ကို အကောက်ခွန်လုပ်ထုံးလုပ်နည်းများအရလည်းကောင်း၊ သြဂုတ် ၆ ရက်တွင် ပုသိမ်ကြီးမြို့နယ်၊ ပြင်ဦးလွင်မြို့နယ်နှင့် ကျောက်ဆည်မြို့နယ်တို့၌ တရားမဝင်ကျွန်းသစ် ၇၃ ဒသမ ၀၇၄ တန်၊ သစ်မာ ၄ ဒသမ ၉၅၀ တန်၊ အခြားသစ် ၈၅ ဒသမ ၂၅၉ တန် (ခန့်မှန်းတန်ဖိုးငွေကျပ် ၁၁၄၉၀၀၇၃၇)နှင့် အဆိုပါသစ်များ တင်ဆောင်လာသည့် ထော်လာဂျီယာဉ်လေးစီး (ခန့်မှန်းတန်ဖိုးငွေကျပ် ၆၅၀၀၀၀၀၀)ကို သစ်တောဥပဒေအရလည်းကောင်း၊ ချမ်းမြသာစည်မြို့နယ် ကျွန်းလုံးဥသျှောင်ရပ်ကွက်ရှိ နေအိမ်တစ်လုံးအတွင်းမှ တရားဝင်စာရွက်စာတမ်း အထောက်အထားတင်ပြနိုင်ခြင်းမရှိသည့် လူသုံးကုန်ပစ္စည်း ၂၄ မျိုး (ခန့်မှန်းတန်ဖိုးငွေကျပ် ၂၃၆၆၉၃၀၀)ကို အမျိုးသားဆေးဝါးဥပဒေ အရလည်းကောင်း စုစုပေါင်း ခန့်မှန်းတန်ဖိုးငွေကျပ် ၂၆၆၉၇၅၆၇၇ ကို ဖမ်းဆီးအရေးယူဆောင်ရွက်လျက်ရှိသည်။

ယင်းအပြင် သြဂုတ် ၅ ရက်တွင် ပြည်ထဲရေးဝန်ကြီးဌာန မြန်မာနိုင်ငံရဲတပ်ဖွဲ့၏ ဖမ်းဆီးရမိမှု စာရင်းများအရ လိုင်စင်မဲ့မော်တော်ယာဉ်ကိုးစီးနှင့် လိုင်စင်မဲ့မော်တော်ဆိုင်ကယ် အစီး ၂၀ ဖမ်းဆီးရမိခဲ့ပြီး သက်ဆိုင်ရာလုပ်ထုံးလုပ်နည်း၊ ဥပဒေများနှင့်အညီ အရေးယူဆောင်ရွက်လျက်ရှိသည်။

၂၀၂၅ ခုနှစ် သြဂုတ် ၄ ရက်၊ ၅ ရက်နှင့် ၆ ရက်နေ့တို့တွင် ဖမ်းဆီးရမိမှုစုစုပေါင်းမှာ အမှုတွဲ ၄၃ မှု (ခန့်မှန်းတန်ဖိုးငွေကျပ် ၇၆၄၀၂၈၅၇၂)ကို ဖမ်းဆီးရမိခဲ့သည်။ ထိုကဲ့သို့ တရားမဝင်တင်သွင်းလာမှုများကြောင့် တရားဝင်တင်သွင်းသည့် ကုန်သည်လုပ်ငန်းရှင်များအတွက် စျေးကွက်ယှဉ်ပြိုင်နိုင်မှုစွမ်းအား ကျဆင်းခြင်းနှင့် ထိခိုက်နစ်နာမှုများ ဖြစ်ပေါ်နိုင်စေပြီး နိုင်ငံတော်အတွက် ရသင့်ရထိုက်သည့် အခွန်ဘဏ္ဍာဆုံးရှုံးနစ်နာခြင်းများ ဖြစ်ပေါ်စေနိုင်သည်။ သို့ဖြစ်ပါ၍ တရားမဝင် ကုန်စည်တင်သွင်းမှုများအား သက်ဆိုင်ရာတာဝန်ရှိသူများက ယခုထက် ပိုမိုတားဆီးစစ်ဆေးကြပ်မတ် ဆောင်ရွက်သွားမည်ဖြစ်ကြောင်း သတင်းရရှိသည်။

MOI

ရုရှားနိုင်ငံအနေဖြင့် မြေပြင်အခြေစိုက် ဒုံးကျည်များဖြန့်ကြက်ချထားမှုဆိုင်ရာ ကန့်သတ်ချက်များ အားလုံးကို ရုပ်သိမ်း လိုက်ပြီဖြစ်ကြောင်း  ရုရှားသမ္မတရုံးမှပြောရေးဆိုခွင့်ရှိသူ ဒီမီထရီပက်စကော့က ပြောသည်။

ရုရှားနိုင်ငံသည် မြေပြင်အခြေစိုက်တာလတ်ပစ်နှင့်တာ တိုပစ်ဒုံးကျည်များ ဖြန့်ကြက်မှုဆိုင်ရာ သဘောတူညီချက်ကို တစ်ဖက်သတ်လိုက်နာနေခဲ့ခြင်း ဖြစ်ကြောင်း၊ ယခုအခါ ထိုသို့လိုက်နာရန် မလိုအပ်တော့ ကြောင်းနှင့် ကန့်သတ်ချက်များအားလုံး ကိုရုပ်သိမ်းလိုက်ပြီဖြစ်ကြောင်း ဒီမီထရီ ပက်စကော့က သတင်းစာရှင်းလင်းပွဲတွင် ပြောသည်။

အမေရိကန်သမ္မတ ဒေါ်နယ်ထရမ့်က အမေရိကန်၏ နျူကလီးယားစွမ်းအင်သုံး တိုက်ခိုက်ရေး ရေငုပ်သင်္ဘောနှစ်စင်းကို ရုရှားနိုင်ငံအနီးသို့စေလွှတ်ဖြန့်ကြက်ရန် အမိန့်ပေးထားကြောင်း ထရမ့်ကိုယ်တိုင်က လူမှုကွန်ရက်တွင် တင်လိုက်ပြီးနောက် ရုရှားဘက်က အဆိုပါ ကန့်သတ်ချက်များကို ရုပ်သိမ်းလိုက်ခြင်း ဖြစ်သည်။

ရုရှားနှင့်အမေရိကန်တို့သည် တာလတ် ပစ်နျူကလီးယားတပ်ဖွဲ့များသဘောတူညီချက်ကို လက်မှတ်ထိုးထားသော်လည်း ၂၀၁၉ ခုနှစ်ကတည်းက အမေရိကန်နိုင်ငံက ထိုစာချုပ်မှ တစ်ဖက်သတ်နုတ်ထွက်သွားခြင်းဖြစ်သည်။ သို့သော် ရုရှားနိုင်ငံက ထိုစာချုပ်ပါသဘောတူညီချက်များကို တစ်ဖက်သတ်လိုက်နာနေခဲ့ခြင်း ဖြစ်သည် ဟုသိရသည်။       

Ref: Sputnik, LBC

ထိုင်းနိုင်ငံက လက်ရှိအသုံးပြုလျက်ရှိသော F-16 တိုက်လေယာဉ်များနေရာတွင် အစားထိုးရန် ဆွီဒင်နိုင်ငံထုတ် Gripen တိုက်လေယာဉ်လေးစင်းဝယ်ယူမည်ဖြစ် ကြောင်း ဩဂုတ်လ ၅ ရက်တွင် အတည် ပြုလိုက်ပြီဖြစ်သည်။

Saab JAS 39 Gripen အမျိုးအစား တိုက်လေယာဉ်လေးစင်းဝယ်ယူရန် အမေရိကန်ဒေါ်လာသန်း ၆၀၀ ကိုအသုံးပြုသွား မည်ဖြစ်သည်။ ယခုဝယ်ယူမှုသည် ထိုင်း လေတပ်၏ တိုက်ပွဲဝင်စွမ်းရည်များကို တိုးမြှင့်ရန်လုပ်ဆောင်သော  ရေရှည်စီမံကိန်း၏ တစ်စိတ်တစ်ပိုင်းဖြစ်သည်။

ထိုင်းအစိုးရ၏  စစ်လက်နက်ပစ္စည်းဝယ်ယူရေးကော်မတီသည် Gripen တိုက်လေယာဉ်များကို ဝယ်ယူရန် ပြီးခဲ့သည့် နှစ်ကတည်းက စဉ်းစားမှုများ လုပ်ဆောင်ခဲ့ခြင်း ဖြစ်သည်။

ထိုင်းလေတပ်သည် လက်ရှိတွင် သက်တမ်းရင့်နေပြီဖြစ်သည့် Gripen တိုက်လေယာဉ် ၁၁ စင်းနှင့်အတူ သက်တမ်းလွန်နေပြီဖြစ်သည့် F-16 တိုက်လေယာဉ်များကို အသုံးပြုလျက်ရှိသည်။      

Ref: SCMP

MWD Web Portal

အိန္ဒိယကာကွယ်ရေးဝန်ကြီးဌာနက စစ်အင်အားတိုးချဲ့တည်ဆောက်ရန် ဒေါ်လာ ၇.၆ ဘီလီယံတန် ကာကွယ်ရေးဝယ်ယူမှုများကို အတည်ပြု လိုက်ကြောင်း ဩဂုတ် ၅ ရက်နေ့ ထုတ်ပြန်ချက်တွင် ဖော်ပြခဲ့သည်။ ကာကွယ်ရေးဝန်ကြီး Rajnath Singh ဦးဆောင်သော ကာကွယ်ရေး ပစ္စည်းဝယ်ယူမှုကောင်စီ (DAC) က BrahMos ဒုံးကျည်များနှင့် လက်နက် တပ်ဆင်ထားသော ဒရုန်းများ ဝယ်ယူရန် သဘောတူညီခဲ့ပြီး တပ်မတော် ၏ ခေတ်မီတောင့်တင်းရေး အဆိုပြုချက်များကိုလည်း အတည်ပြုပေး ခဲ့သည်။

ကောင်စီက လေတပ်၏ Boeing လေယာဉ်များအပါအဝင် ရှိနှင့်ပြီးသော အရေးကြီးစနစ်များ၏ ရေရှည်ထိန်းသိမ်းရေးနှင့် S-400 လေကြောင်း ကာကွယ်ရေး ဒုံးကျည်စနစ်အတွက် နှစ်စဉ်ထိန်းသိမ်းရေး စာချုပ်ကိုလည်း အတည်ပြုခဲ့သည်။ BrahMos ဒုံးကျည်များနှင့်အတူ အိန္ဒိယရေတပ်သည် Barak-1 ဒုံးကျည်စနစ်ကို အဆင့်မြှင့်တင်ရန် ခွင့်ပြုချက်ရရှိထားကြောင်း ဝန်ကြီးဌာနက ဆိုသည်။

DAC က လေတပ်၏ Saksham/Spyder လက်နက်စနစ်များကို Integrated Air Command and Control System နှင့် ပေါင်းစပ်အသုံးပြုနိုင်ရန် အဆင့်မြှင့်တင်ရေးကိုလည်း အတည်ပြုခဲ့ပြီး လေကြောင်း ကာကွယ်ရေး ကွန်ရက်ကို ပိုမိုအားကောင်းစေမည်ဖြစ်သည်။ အခြား အတည်ပြုချက် များတွင် တပ်မတော်၏ BMP ခြေမြန်တပ်မတော်ယာဉ်များအတွက်အပူလှိုင်း ပုံရိပ်ဖမ်းစက်နှင့် ညဘက်မြင်အာရုံခံကိရိယာများ၊ ရေတပ် အတွက် Compact Autonomous Surface Craft နှင့် လေတပ်အတွက် အဆင့်မြင့်တောင်တန်းဒေသသုံးရေဒါများ ပါဝင်သည်။ "Compact Autonomous Surface Craft ဝယ်ယူမှုသည် အိန္ဒိရေတပ်အား ရေငုပ် သင်္ဘောတိုက်ခိုက်ရေးတာဝန်များတွင် ခြိမ်းခြောက်မှုများကို ဖော်ထုတ်ကာ အမျိုးအစားခွဲခြားနိုင်စွမ်းနှင့် ချေမှုန်းနိုင်စွမ်းများ ပေးစွမ်းမည်" ဟု ဝန်ကြီး ဌာနက ပြောကြားခဲ့သည်။

ထုတ်ပြန်ချက်တွင် အိန္ဒိယတပ်မတော်သည် MALE RPAs (Medium Altitude Long Endurance Remotely Piloted Aircraft) များ ရရှိမည် ဖြစ်ပြီး ယင်းဒရုန်းများသည် ပစ္စည်းတန်ဆာမျိုးစုံကို သယ်ဆောင်နိုင်စွမ်း ရှိကာ ၂၄ နာရီ စောင့်ကြည့်စစ်ဆေးနိုင်စွမ်းနှင့် တိုက်ခိုက်ရေးစွမ်းရည်ကို သိသိသာသာ မြှင့်တင်ပေးမည်ဟု ဖော်ပြထားသည်။

လွန်ခဲ့သည့်လက နယူးဒေလီသည် ပြည်တွင်းစက်မှုလုပ်ငန်းများမှ အဓိကထား ဝယ်ယူရန် ဒေါ်လာ ၁၂ ဘီလီယံတန် လက်နက်နှင့် ခဲယမ်း များ ဝယ်ယူမှုကို အတည်ပြုခဲ့သည်။ ကမ္ဘာ့ထိပ်တန်း ကာကွယ်ရေး သွင်းကုန် နိုင်ငံတစ်ခုဖြစ်သော အိန္ဒိယသည် သမိုင်းကြောင်းအရ ရုရှားကို စစ်လက်နက် ပစ္စည်းနှင့်နည်းပညာများအတွက် မှီခိုလေ့ရှိခဲ့သည်။ မော်စကိုသည် အိန္ဒိယ၏ ပြည်တွင်းလက်နက်ထုတ်လုပ်မှုအစီအစဉ်တွင် တက်ကြွစွာ ပါဝင် ပူးပေါင်းဆောင်ရွက်နေပြီး သဘောတူညီချက်များဖြင့် ရုရှား ကာကွယ်ရေး ပစ္စည်းများကို အိန္ဒိယတွင် ထုတ်လုပ်လျက်ရှိသည်။ 

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂