သန့်ဇင် (NP News) - နိုဝင်ဘာ ၁၆ 

မြန်မာပြည်အလယ်ပိုင်းဒေသများဖြစ်သည့် စစ်ကိုင်းတိုင်း၊ မန္တလေးတိုင်းနှင့် မကွေးတိုင်းတို့တွင် နယ်မြေခံ PDF လက်နက်ကိုင်အဖွဲ့များစွာရှိနေပြီး အုပ်ချုပ်ရေးမှူးများ အကြမ်းဖက်သတ်ဖြတ်ခံရမှု ယခင်ထက်တိုးလာကြောင်း NP News က ရရှိထားသည့် သတင်းအချက်အလက်များအရ သိရသည်။
အဆိုပါဒေသများတွင် အကြမ်းဖက်သတ်ဖြတ်မှုများကို နယ်မြေခံလက်နက်ကိုင် (PDF) အဖွဲ့များက အများဆုံး ကျူးလွန်နေခြင်းဖြစ်ပြီး အထက်ပါနေရာဒေသများတွင် ၎င်းလက်နက်ကိုင်အဖွဲ့များက အာဏာရှိကြောင်း ပြသရန်အတွက် သတ်ဖြတ်နေခြင်းများဖြစ်ကြောင်း သေနင်္ဂဗျူဟာလေ့လာရေးအဖွဲ့မှ အမှုဆောင်ဒါရိုက်တာ ဦးသိန်းထွန်းဦးက ဆိုသည်။
“တရားဝင်အစိုးရသည် အရေးမပါဘူး။ သူတို့သာ အရေးပါသူဆိုတာ ပြရအောင်လုပ်ကြတာ။ သူတို့က တော်လှန်ရေးလို့ အော်နေကြပြီး တော်လှန်ရေးဆိုပေမယ့် အကြမ်းဖက်ကို အရမ်းနွယ်တယ်။ ဒီအတိုင်းဆက်သွားနေရင် အကြမ်းဖက်ပုံစံပဲ ဆက်တိုက်ရောက်သွားလိမ့်မယ်။ အခုလည်း ဒီအတိုင်းပါပဲ။ အခုက ခေတ်ကာလတစ်ခုလည်းကြာသွားပြီ။ သူတို့အရင်ကပြောထားတဲ့ ကြီးကြီးကျယ်ကျယ်ရည်ရွယ်ချက်တွေက ပေါက်မြောက်အောင် မြင်လာတာမရှိဘူး။ ဒီနေရာမှာ ဆက်လက်အာဏာတည်မြဲနေကြောင်း ပြဖို့အတွက်ကတော့ ရပ်ကျေးအုပ်ချုပ်ရေးမှူးတို့ အပြစ်မဲ့ပြည်သူတို့ သူတို့က ပစ်မှတ်တွေဖြစ်ကုန်တာ” ဟု ၎င်းက ဆိုသည်။
ထို့ပြင် နိုဝင်ဘာလ ၁ ရက်မှ လက်ရှိအချိန်ထိ မကွေးတိုင်းဒေသကြီးတွင် PDF လက်နက်ကိုင်အဖွဲ့များ၏ လုပ်ကြံသတ်ဖြတ်မှုကြောင့် ရပ်ကျေးအုပ်ချုပ်ရေးမှူးနှင့် ဒေသခံပြည်သူ (၆)ဦးထက်မနည်း သေဆုံးခဲ့ရကြောင်း မြန်မာနိုင်ငံရဲတပ်ဖွဲ့၏ သတင်းထုတ်ပြန်ချက်များအရ သိရသည်။
မန္တလေးတိုင်းဒေသကြီးတွင်လည်း ၁၀ရက်ကျော်ကာလအတွင်း ရပ်ကွက်အုပ်ချုပ်ရေးမှူးနှင့် အပြစ်မဲ့ပြည်သူ (၃)ဦး ထက်မနည်း သတ်ဖြတ်ခံခဲ့ရကာ ထိခိုက်ဒဏ်ရာရရှိသူများလည်းရှိခဲ့ကြောင်း သိရသည်။
အလားတူ ပြီးခဲ့သည့် နိုဝင်ဘာ ၁၂ ရက်ကလည်း မန္တလေးတိုင်းဒေသကြီး၊ ညောင်ဦးနှင့် ကျောက်ပန်းတောင်းမြို နယ်တို့မှ ရပ်ကျေးအုပ်ချုပ်ရေးမှူး(၂)ဦးအား PDF အဖွဲ့(၄)ဖွဲ့က ပူးပေါင်းသတ်ဖြတ်ခဲ့ကြောင်းကို ၎င်းတို့၏ လူမှုကွန်ယက်စာမျက်နှာများထက်တွင် ဝန်ခံချက်ထုတ်ပြန်ထားခဲ့ဖူးသည်။
ထိုသို့ ရပ်ကွက်အုပ်ချုပ်ရေးမှူးများအား PDF လက်နက်ကိုင်အဖွဲ့များက ပစ်မှတ်ထား သတ်ဖြတ်နေခြင်းသည် နစကအစိုးရ၏ အမှူထမ်းများအပေါ် ရန်သူဟု သတ်မှတ်ကာ အကြမ်းဖြတ်မှုများလုပ်ဆောင်နေခြင်းဖြစ်ကြောင်း ပြည်သူ့ပါတီမှ ရန်ကုန်တိုင်းဒေသကြီးဥက္ကဋ္ဌ ဦးလှဌေး က ဆိုသည်။
“ဒီလူတွေသတ်ဖြတ်ခံနေရတာကို ကျွန်တော်တို့ဘေးအမြင်နဲ့ပြောရမယ်ဆိုရင် လုံခြုံရေးတာဝန်ယူပေးမှု အားနည်းလို့။ လုံခြုံရေးအား နည်းတဲ့အပေါ်မှာ ဖြစ်ပေါ်လာတဲ့ အနေအထားလို့ပဲ ကျွန်တော်တို့က သုံးသပ်ရမှာပဲလေ။ နယ်မြေအမျိုးမျိုးရှိတာပေါ့လေ။ နယ်မြေအမျိုးမျိုးမှာကလည်း လက်လှမ်းမမှီတော့တဲ့လုံခြုံရေးကို ပြည့်ပြည့်ဝဝ မပေးနိုင်တော့တဲ့နယ်မြေတွေလည်း ရှိနေတာဖြစ်တယ်။ အဲဒီနယ်မြေတွေမှာရှိနေတဲ့အစိုးရနဲ့ တာဝန်ယူဆောင်ရွက်နေတဲ့လူတွေကလည်း ကိုယ့်ကိုကိုယ်လည်း ဂရုစိုက်ဖို့လိုတာပေါ့နော်။‌ နေတာထိုင်တာ။ သွားတာလာတာကစ။ မိမိနေထိုင်နေတဲ့ဘဝဟာ လုံခြုံသလားမလုံခြုံသလားဆိုတာကို တွေးရမှာပေါ့။ မလုံခြုံရင်လည်း လုံခြုံအောင် ဘယ်လိုနေရမလဲဆိုတဲ့အနေအထားမျိုးကို သူတို့ကိုယ်တိုင်ကလည်း တွေးဖို့လိုအပ်တယ်” ဟု ၎င်းက ဆိုသည်။
၂၀၂၁ ခုနှစ်၊ ဖေဖော်ဝါရီလမှ စတင်ကာ လက်ရှိအချိန်ထိ နိုင်ငံတစ်ဝန်း၌ အုပ်ချုပ်ရေးမှူးများ အကြမ်းဖက် သတ်ဖြတ်ခံရသူ (၈၀၀)ကျော်ထိ ရှိခဲ့ကြောင်း နစက၏ သတင်းထုတ်ပြန်ချက်များအရ သိရသည်။

Source- NP News

၁၄. ၁၁. ၂၀၂၄
Written by Nay Moe

မိုးကုတ်မြို့ ဗုံးအကြဲခံရပြီးနောက်မှာ ထပ်အကြဲမခံရဖို့အတွက် Starlink အင်တာနက်လိုင်းတွေနဲ့ CDMA ဖုန်းလိုင်းတွေ ပိတ်ပေးဖို့ TNLA ရဲ့ မိုးကုတ်ထွေအုပ်ရုံးက ညွှန်ကြားချက်ထုတ်ပြန်ထားတယ်လို့ သိရပါတယ်။

ဖြစ်စဥ်က နိုဝင်ဘာ ၁၁ ရက်မှာ မိုးကုတ်မြို့နယ်၊ လယ်ဦးအုပ်စု၊ အထက်လယ်ဦးရပ်နဲ့ ကသဲအုပ်စု၊ လူးထရပ်တို့က TNLA ရဲ့ ကျောက်အရောင်းအဝယ်ပြုရာနေရာတွေကို လေကြောင်းတိုက်ခိုက်မှုလုပ်ဆောင်ခဲ့တာကြောင့် လူ ၆ ဦးသေဆုံးပြီး ကလေးငယ်တစ်ဦးနဲ့ လူများစွာထိခိုက်ခဲ့ရတဲ့အပြင် အဆောက်အအုံ ၆၅ လုံး ပျက်စီးခဲ့တယ်လို့ သိရပါတယ်။

ဒီဖြစ်စဥ်မှာ TNLA ရဲ့ အတည်ပြုထုတ်ပြန်ချက်က လူ ၉ ဦးသေပြီး ၁၃ ဦး ဒဏ်ရာရခဲ့တာလို့ ထုတ်ပြန်ခဲ့ပေမဲ့ မိုးကုတ်ထွေအုပ်မှာတော့ TNLA လက်နက်ကိုင်ဘက်က သေဆုံးသူ ၃ ဦးကို မဖော်ပြတော့တာ တွေ့ရပါတယ်။ ဒီလိုမျိုး တိုက်ခိုက်မှုတွေ ဆက်မဖြစ်ဖို့အတွက် TNLA ထွေအုပ်က တာဝန်ရှိသူတွေအနေနဲ့ မိမိအုပ်စုနယ်မြေအတွင်းက အင်တာနက်ဆက်သွယ်ရေး Star Link ဝန်ဆောင်မှုလုပ်ငန်းတွေ CDMA ဖုန်း ဝန်ဆောင်မှုလုပ်ငန်းတွေ ပိတ်ပင်ပေးဖို့၊ မသင်္ကာရန်သူသတင်းပေးတွေ့ရှိရင် အမြန်ဆုံး တိုင်ကြားပေးဖို့နဲ့ TNLA ညွှန်ကြားချက်မလိုက်နာတဲ့ မိုးကုတ်ပြည်သူတွေကို အရေးယူပြီး သက်ဆိုင်ရာကို သတင်းပို့တိုင်ကြားဖို့ ညွှန်ကြားခဲ့သလို မိုးကုတ်မြို့အတွင်းက Star Link ဝန်ဆောင်မှုလုပ်ငန်းပေးသူစာရင်းတွေကိုပါ ပူးတွဲပေးပို့ ပိတ်သိမ်းစေခဲ့တယ်လို့ သိရပါတယ်။

Source- MT News

အမေရိကန်ကာကွယ်ရေးဝန်ကြီးဌာနသည် ၎င်းတို့၏ နျူကလီးယားတားဆီးရေး မဟာဗျူဟာကို ပြင်ဆင်ရန် ကြေညာထားပြီး၊ ၎င်းတွင်နျူကလီးယားလက်နက်များ တပ်ဆင်ထားသော Ohio အမျိုးအစား ရေငုပ်သင်္ဘော များ၏အသင့်ဖြစ်မှုကိုတိုးမြှင့်ခြင်း၊ B-61 နျူကလီးယား ဆွဲငင်အားဗုံး၏အမျိုးအစားသစ် ထုတ်လုပ်မှုတိုးမြှင့်ခြင်း နှင့်အမေရိကန်၏ မဟာမိတ်များအပေါ် တိုးချဲ့သော တားဆီးရေးကတိကဝတ်များကို အားကောင်းစေခြင်းတို့ ပါဝင်ကြောင်း သိရှိရပါသည်။

ကိုးကား - DOD News

ယူကရိန်းနိုင်ငံသို့ တောင်ကိုရီးယားဘက်က လက်နက်ထောက်ပံ့ပေးပို့မှုသည် ဆိုးလ်နှင့် မော်စကိုကြားက ဆက်ဆံရေးကို လုံးဝပျက်ပြားစေမည်ဖြစ်ပြီး ရုရှားအနေဖြင့် လိုအပ်သလို နည်းလမ်းမျိုးစုံဖြင့် တုံ့ပြန်သွားမည်ဖြစ်ကြောင်း ရုရှားဖက်ဒရေးရှင်း၏ လက်ထောက်နိုင်ငံခြားရေးဝန်ကြီး Andrey Rudenko က TASS ကို ပြောကြားလိုက်ပါသည်။ “ရုရှားနိုင်ငံသားတွေကို သတ်ဖို့အတွက် တောင်ကိုရီးယားလက်နက်တွေ အသုံးပြုခွင့်ပေးလိုက်တာက နှစ်နိုင်ငံကြားဆက်ဆံရေး လုံးဝ ပျက်ပြားစေမှာဆိုတာ သိထားရပါမယ်”  ဟု Andrey Rudenko က ပြောကြားထားပါသည်။ 

ကိုးကား -  TASS

ရုရှားသမ္မတ ဗလာဒီမာပူတင်နှင့် တူရကီသမ္မတ အာဒိုဂန် တို့သည် တယ်လီဖုန်းဖြင့် စကားပြောဆိုခဲ့ကြပြီး နှစ်နိုင်ငံအကြား ကုန်သွယ်မှုနှင့် စီးပွားရေးပူးပေါင်း ဆောင်ရွက်မှုများ ပိုမိုကောင်းမွန်လာစေရန် နည်းလမ်းများကို ဆွေးနွေးခဲ့ကြကြောင်း ကရင်မလင်က ထုတ်ပြန်ချက်တွင် ဖော်ပြထားသည်။

ပူတင်နှင့် အာဒိုဂန်တို့သည် အောက်တိုဘာ ၂၃ ရက်က ရုရှားနိုင်ငံ၊ Kazan ၌ ကျင်းပသည့် BRICS ထိပ်သီးအစည်းအဝေးပြင်ပတွင် အလွတ်သဘော တွေ့ဆုံခဲ့ကြပြီး ကုန်သွယ်ရေးနှင့် စီးပွားရေးဆိုင်ရာဆက်ဆံရေးများ ဖွံ့ဖြိုးတိုးတက်လာမည့် အလားအလာများအပြင် တူရကီတွင် နိုင်ငံတကာဓာတ်ငွေ့ဗဟိုချက်မ တစ်ခု ဖန်တီးမည့် စီမံကိန်းကိုလည်း ဆွေးနွေးခဲ့ကြကြောင်း သိရှိရပါသည်။ 

ကိုးကား -  TASS (Russia New Agency)

James Scott Rhys Andersen အမည်ရှိ ဗြိတိန် ကြေးစားစစ်သားတစ်ဦးအား ရုရှားနိုင်ငံ Kursk ဒေသတွင် ဖမ်းဆီးချုပ်နှောင်ထားကြောင်း စစ်ဖက်ဆိုင်ရာ အရင်းအမြစ်တစ်ခုက TASS ကို ပြောကြားလိုက်ပါ သည်။

သူသည် ၂၀၁၉ ခုနှစ်မှ ၂၀၂၃ ခုနှစ်အထိ ဗြိတိန်တပ်ဖွဲ့၏ ဆက်သွယ်ရေးတပ်ရင်း (Signal Regiment) တစ်ခုတွင် တာဝန်ထမ်းဆောင်ခဲ့ပြီး စစ်မှုထမ်းခြင်းမှ ထုတ်ပယ်ခြင်းခံရပြီးနောက် ငွေကြေးနှင့်မိသားစု ပြဿနာ များအတွက် ယူကရိန်းနိုင်ငံခြားသားတပ်ဖွဲ့သို့ ဝင်ရောက်ခဲ့ခြင်းဖြစ်ကြောင်း အဖမ်းဆီးခံရသူများနှင့် အမေးအဖြေအစီအစဉ် ထုတ်လွှင့်နေသည့် Troyka ဟု ခေါ်သော Telegram ချန်နယ်တစ်ခုတွင် အဆိုပါစစ်သားက ဖြေဆိုထားပါသည်။ 

ကိုးကား - TASS( Russia New Agency)

စစ်သားများကို လေ့ကျင့်ပေးသော “ချက်ချန်း”ဟု ခေါ်သည့်တံဆိပ်ကပ်ထားသော ယူကရိန်းအရာရှိတစ်ဦးအနေဖြင့် ၎င်း၏တပ်ဖွဲ့ရှိ ယူကရိန်းတိုက်ခိုက်ရေးသမား ၇၀ ရာခိုင်နှုန်းသည် ရုရှားနိုင်ငံအား နယ်မြေစွန့်လွှတ်ပေးရန် အဆင်သင့်ဖြစ်နေကြောင်း ပြောဆိုခဲ့သည်ဟု ဖော်ပြထားပါသည်။

ကိုးကား - The Economist

ယူကရိန်းတို့သည် ရုရှားဒေသရှိ Kursk ဒေသကို နောက်ထပ် ATACMS ဒုံးကျည်ဖြင့် ပစ်ခတ်တိုက်ခိုက်မှုကြောင့် Kursk ဒေသရှိ  Khalino ရုရှားတပ်မတော်၏ စစ်တပ်အခြေစိုက် လေယာဉ်ကွင်းတစ်ခုကို ထိမှန်ခဲ့ပြီး ရုရှားတို့၏ S-400 လေကြောင်းရန် ကာကွယ်ရေးစနစ်ပျက်စီးသွားကြောင်း ဖော်ပြထားပါသည်။

ကိုးကား - ယူကရိန်း သတင်းရင်းမြစ်

ရုရှားနိုင်ငံ၊ Kursk ဒေသသို့ တိုက်ခိုက်လာသော ယူကရိန်းစစ်တပ်၏ ဒုံးကျည်နှစ်စင်းနှင့် ဒရုန်း ၂၇ စင်း တို့ကို ရုရှားလေကြောင်းရန် ကာကွယ်ရေးစနစ်များက ဖျက်ဆီးနိုင်ခဲ့ကြောင်း ဒေသတွင်းအစိုးရအဖွဲ့အကြီးအကဲ Smirnov က ပြောကြားခဲ့ပါသည်။

ကိုးကား - Kursk ဒေသတွင်းအစိုးရအဖွဲ့

အမေရိကန် ရွေးကောက်ခံသမ္မတသစ် ဒေါ်နယ်ထရမ့်သည် ရုရှား-ယူကရိန်းပဋိပက္ခအတွက် အထူးသံတမန်အဖြစ် ၎င်း၏ထောက်လှမ်းရေးအကြီးအကဲဟောင်း Richard Grenell ကိုရွေးချယ်ရန်စဉ်းစားနေကြောင်း ယုံကြည်ရသည့် သတင်းရင်းမြစ်လေးခုမှ ကိုးကား၍ Sputnik သတင်းအေဂျင်စီက ဖော်ပြထားပါသည်။

“Richard Grenell သည် ဂျာမနီနိုင်ငံဆိုင်ရာ ထရမ့်၏ သံအမတ်အဖြစ်တာဝန်ထမ်းဆောင်ခဲ့ပြီး၊ ထရမ့်၏ ၂၀၁၇-၂၀၂၁ခုနှစ် သမ္မတသက်တမ်းအတွင်း အမျိုးသားထောက်လှမ်းရေးဌာန၏ အမှုဆောင်ဒါရိုက်တာအဖြစ် တာဝန်ထမ်းဆောင်ခဲ့သော Richard Grenell သည် အဆိုပါရာထူးအတွက် ရွေးချယ်ခံရပါက စစ်ပွဲကိုရပ်တန့်ရန် ထရမ့်၏ ကြိုးပမ်းမှုတွင် အဓိကအခန်းကဏ္ဍမှပါဝင်မည်ဖြစ်ကြောင်း၊ ရုရှား-ယူကရိန်းပဋိပက္ခကို ဖြေရှင်းရန်အတွက် သီးသန့် အထူးသံတမန်မရှိသေးသော်လည်း ရွေးကောက်ခံသမ္မတ ဒေါ်နယ်ထရမ့်သည် ထိုကဏ္ဍကိုဖန်တီးရန်စဉ်းစားနေကြောင်း အတွင်းရေးဆွေးနွေးမှုများအရ သိရှိရကြောင်း”အမည်မဖော်လိုသော သတင်းရင်းမြစ်လေးခုမှ ပြောကြားခဲ့ကြောင်း သိရှိရပါသည်။

ကိုးကား - Sputnik သတင်းအေဂျင်စီ