မတ်လတွင်စတင်ခဲ့သည့် ယီမင်အခြေစိုက် ဟူသီလက်နက်ကိုင်အဖွဲ့အပေါ် အမေရိကန်စစ်တပ်၏ လေကြောင်းတိုက်ခိုက်မှု စစ်ဆင်ရေးများကြောင့် အကြီးတန်းအရာရှိများအပါအဝင် ဟူသီလက်နက်ကိုင်အဖွဲ့ဝင် (၅၀၀) ကျော် သေဆုံးခဲ့ကြောင်း ထောက်လှမ်းရေးနှင့် နီးစပ်သော သတင်းရင်းမြစ်များ၏ ပြောကြားချက်အရ သိရပါသည်။

လွန်ခဲ့သောသီတင်းပတ်(၅)ပတ်ကျော်အတွင်း အမေရိကန်သည် ဟူသီ လက်နက်ကိုင်အဖွဲ့အ‌ပေါ် လေကြောင်းနှင့် ရေကြောင်းမှ ပစ်ခတ် တိုက်ခိုက်မှု များကို နေ့စဉ်နီးပါးလုပ်ဆောင်ခဲ့သော်လည်း ရလဒ်များနှင့်ပတ်သက်ပြီး အသေးစိတ်အချက်အလက်များကို ထုတ်ဖော်ပြောဆိုခဲ့ခြင်းမရှိခဲ့ကြောင်း သိရပါသည်။ သို့သော်လည်း နောက်ဆုံးရ သတင်းအချက်အလက်များ အရအမေရိကန်၏ တိုက်ခိုက်မှုများကြောင့် ဟူသီလက်နက်ကိုင် အဖွဲ့ဝင် (၅၀၀)မှ(၆၀၀)ကြားသေဆုံးခဲ့ပြီး အများစုသည် ဒုံးကျည်စနစ် အော်ပရေတာ များနှင့် ဒရုန်းကျွမ်းကျင်သူများ အပါအဝင် အဆင့်မြင့်အရာရှိများ ဖြစ်သည်ဟု သိရပါသည်။

ထို့အပြင် ယီမင်၏ဒေသအသစ်များဆီသို့ အမေရိကန်၏ စစ်ဆင်ရေး တိုးချဲ့လာမှုများကြောင့် သေဆုံးသူအရေအတွက် မြင့်တက်လာနိုင်ခြေရှိသည်ဟု အဆိုပါကိစ္စနှင့်ရင်းနှီးသည့် သတင်းရင်းမြစ်တစ်ခုက ပြောကြားခဲ့ပါသည်။ အမေရိကန်၏လေကြောင်းနှင့်ရေကြောင်းမှ ပစ်ခတ် တိုက်ခိုက်မှုများကြောင့် ဟူသီလက်နက်ကိုင်အဖွဲ့၏ လေ့ကျင့်ရေးစခန်း အများအပြား ပျက်စီးခဲ့ပြီး တိုက်ခိုက်ခံရသည့်နေရာများတွင် အသက်ရှင် ကျန်ရစ်သူမရှိကြောင်း အဆိုပါသတင်းရင်းမြစ်ကပြောကြားခဲ့ပါသည်။

ကိုးကား-NP News

အီရန်နိုင်ငံက နိုင်ငံအပေါ်ချမှတ်ထားသည့် ပိတ်ဆို့မှုများကိုသာ ဖယ်ရှားပေးမည်ဆိုပါက ၎င်းတို့၏ နျူကလီးယားအစီအစဉ်ကို ပိုမို ပွင့်လင်းမြင်သာမှုရှိစေရေး လုပ်ဆောင်ရန်အသင့်ရှိကြောင်း အစိုးရအဖွဲ့မှ ပြောရေးဆိုခွင့်ရှိသူ ဖာတီမာမိုဟာ ဂျီရာနီက ဧပြီလ ၂၂ ရက်တွင်ပြောသည်။

ပိတ်ဆို့မှုများကိုဖယ်ရှားပေးခြင်းက ပြည်သူများ၏ဘဝများအပေါ် အပြု သဘောဆောင်သည့် သက်ရောက်မှုများရှိစေမည် ဖြစ်ကြောင်း၊ ထို့ကြောင့် ပိတ်ဆို့မှုကို ဖယ်ရှားခြင်းနှင့် အီရန်၏နျူကလီးယားအစီအစဉ်အပေါ် ပိုမို ယုံကြည်လာစေရေး၊ ပွင့်လင်းမြင်သာမှုရှိစေရေး ဆောင်ရွက်ခြင်းတို့ကို အပြန်အလှန်လဲလှယ်သွားမည်ဖြစ်ကြောင်း မိုဟာဂျီရာနီက ပြောကြား ခဲ့သည်။

ထိုသို့လုပ်ဆောင်မည်ဆိုပါက အချိန်တိုအတွင်းမှာပင် အမေရိကန်နှင့် နျူကလီးယားသဘောတူညီချက်တစ်ခုကို ရရှိနိုင်ကြောင်း ၎င်းက ဆက်ပြောထားသည်။

ထို့ပြင် မကြာသေးမီက လုပ်ဆောင်ခဲ့သည့် အီရန်-အမေရိကန် ဒုတိယ အကျော့ဆွေးနွေးမှုသည် အပြုသဘောဆောင်ပြီး တိုးတက်မှုရှိကြောင်း အဆိုပါပြောရေးဆိုခွင့်ရှိသူ က ပြောထားသည်ဟု Sputnik သတင်းဌာန ဖော်ပြချက်အရ သိရှိရပါသည်။

ကိုးကား- Sputnik

ကက်ရှ်မီးယားအကြမ်းဖက်တိုက်ခိုက်ခံရမှုကြောင့် ဒေသတွင်းခရီးသည်များ လာရောက်လည်ပတ်မှုအပေါ် ပြင်းပြင်းထန်ထန် ထိခိုက်ဖွယ်ရှိကြောင်း လေ့လာသူများက သုံးသပ်ကြပါသည်။ အိန္ဒိယနှင့် ပါကစ္စတန်ကြား အငြင်းပွား နယ်မြေအဖြစ် ထင်ရှားသကဲ့သို့ လှပသည့်တောင်များ၊ ချိုင့်ဝှမ်းများနှင့် ဆီးနှင်းများဖုံးလွှမ်းနေသည့် လွင်ပြင်ကျယ်များကြောင့် ကျော်ကြားသော ဒေသတွင် ဖြစ်ပျက်ခဲ့မှုက ကမ္ဘာလှည့်ခရီးသွားများကို ထိတ်လန့်စေခဲ့ကြောင်း The Strait Times က ဖော်ပြခဲ့ပါသည်။ ပြီးခဲ့တဲ့နှစ်က ကက်ရှ်မီးယားကို ခရီးသည် ၃ သန်းအထိ လာရောက်ခဲ့ကြောင်း သိရှိရပါသည်။

အိန္ဒိယသည် ပါကစ္စတန်သံအမတ်များကို တစ်ပတ်အတွင်း ဒေလီက ထွက်ခွာရန် အသိပေးလိုက်ပြီး အစ္စလာမ္မာဘတ်က အိန္ဒိယသံရုံး ဝန်ထမ်းအားလုံးကိုလည်း ပြန်လာရန် ညွှန်ကြားလိုက်ကြောင်း သတင်းများအရ သိရှိရပါသည်။

ကိုးကား- ဒေသတွင်းမီဒီယာ

ပါဟာဂမ်မြို့အနီးတွင် ဖြစ်ပွားခဲ့သော အကြမ်းဖက်တိုက်ခိုက်မှုနှင့် ပတ်သက်၍ အိန္ဒိယသမ္မတ ဒရိုပေါဒီ မူရ်မူ နှင့် နိုင်ငံတော်ဝန်ကြီးချုပ် နာရင်ဒရာ မိုဒီတို့အား ရုရှားသမ္မတ ဗလာဒီမာပူတင်က ဝမ်းနည်းကြောင်း သဝဏ်လွှာပေးပို့ခဲ့ပါသည်။

သဝဏ်လွှာတွင် “ပါဟာဂမ်မြို့အနီးတွင် ဖြစ်ပွားခဲ့သော အကြမ်းဖက်လုပ်ရပ်ကြောင့် မတူညီသည့်နိုင်ငံများမှ ပြည်သူများ အသက်ဆုံးရှုံးရမှုအတွက် မိမိ၏ နက်ရှိုင်းသောဝမ်းနည်းကြောင်း သဝဏ်လွှာ ပေးပို့လိုက် ပါသည်။ ထိုရက်စက်ကြမ်းကြုတ်သောပြစ်မှုအား မည်သည့်ဆင်ခြေမျှရှိနိုင်မည်မဟုတ်ပါ။ အဆိုပါလုပ်ရပ်၏စီစဉ်သူများနှင့် လုပ်ဆောင်သူ များသည် ထိုက်တန်သောပြစ်ဒဏ်ကို ခံယူရလိမ့်မည်ဟု မိမိတို့ မျှော်လင့်ပါသည်” ဟု သဝဏ်လွှာတွင် ဖော်ပြထားသည်။

ရုရှားနိုင်ငံသည် အိန္ဒိယနှင့်အတူ အကြမ်းဖက်မှုအားလုံးကို တိုက်ဖျက်ရာတွင် ပူးပေါင်းဆောင်ရွက်မှုများ ပိုမိုတိုးချဲ့ရန် အသင့်ရှိကြောင်းလည်း သမ္မတ ဗလာဒီမာပူတင်က ထည့်သွင်းပြောကြားခဲ့သည်။ ထို့အပြင် “သေဆုံးသူများ၏ဆွေမျိုးများနှင့် မိတ်ဆွေများထံ မိမိ၏ စိတ်ရင်းမှန်ဖြင့် စာနာမှုနှင့် ထောက်ခံမှုစကားများပေးပို့ပေးပါရန်နှင့် ဒဏ်ရာရသူ အားလုံး အမြန်ဆုံးသက်သာလာပါစေကြောင်း ဝန်ကြီးချုပ်မှတစ်ဆင့် ဆန္ဒပြုပေးပါရန် မေတ္တာရပ်ခံပါသည်” ဟု ၎င်းက ထပ်လောင်းပြောကြားခဲ့ပါသည်။ 

ဧပြီ ၂၂ ရက်(အင်္ဂါနေ့)တွင်  အိန္ဒိယမြောက်ပိုင်း ပါဟာဂမ်မြို့၌ အကြမ်းဖက် သမားများက ကာကီရောင်ဝတ်စုံများ ဝတ်ဆင်ကာ AK-47 သေနတ်များဖြင့် ဘိုင်ဆာရန်တောင်ကြားလွင်ပြင်ရှိ ခရီးသွားများကို ပစ်ခတ် တိုက်ခိုက်ခဲ့ ပါသည်။ ပစ်ခတ်သူများသည် ထွက်ပြေးသွားခဲ့ပြီး အိန္ဒိယ လုံခြုံရေး တပ်ဖွဲ့ များက ဧရိယာကို ဝိုင်းရံထိန်းသိမ်းထားကာ စုံစမ်းရှာဖွေမှုများ ဆောင်ရွက် နေပါသည်။ သေဆုံးသူများတွင် နိုင်ငံခြားသား အနည်းဆုံး နှစ်ဦး ပါဝင်ကြောင်း သိရှိခဲ့ရသည်။ သေဆုံးသူများနှင့် ထိခိုက်ဒဏ်ရာ ရရှိသူများ အနက်တွင် ရုရှားနိုင်ငံသားများပါဝင်သည်ဟု သတင်းမရရှိသေးကြောင်း အိန္ဒိယရှိ ရုရှားသံရုံးက အသိပေးခဲ့ပါသည်။

ကိုးကား - Tass

အရှေ့မြောက်တိုင်းစစ်ဌာနချုပ်အလံများ လွှင့်ထူထားသည့် အစီးရေ ရာချီ ပါဝင်သော မြန်မာ့တပ်မတော်ယာဉ်တန်းများ ဧပြီ ၂၂ ရက် နံနက်ပိုင်း တွင် လားရှိုးမြို့သို့ ဝင်ရောက်လာကြောင်း သိရသည်။

လားရှိုးမြို့တွင် MNDAA တပ်ဖွဲ့များနှင့် နိုင်ငံတော်စီမံအုပ်ချုပ်ရေးကောင်စီ ၏ လုံခြုံရေးဆိုင်ရာ တာဝန်ရှိသူများအပြင် တရုတ်နိုင်ငံ ပစ်ခတ်ရပ်စဲမှု စောင့်ကြည့်ရေးကိုယ်စားလှယ်အဖွဲ့တို့ ယခင်ရက်များက တွေ့ဆုံ ဆွေးနွေး ခဲ့ပြီးနောက် ယခုကဲ့သို့ တပ်မတော်မှ လားရှိုးမြို့အတွင်းသို့ ပြန်လည် ဝင်ရောက်လာခြင်းဖြစ်သည်။

အဆိုပါ မြန်မာ့တပ်မတော်ယာဉ်တန်းများသည် လက်ရှိတွင် ပြည်ထောင်စု လမ်းမကြီးဘေး၌ ရပ်တန့်ထားသည်ဟုသိရပြီး သုံးပွင့်ဆိုင် ဆွေးနွေးပွဲ ပြုလုပ်သည့် လားရှိုးမြို့ ဆင်နှစ်ကောင်ဟိုတယ် အနီးတစ်ဝိုက်တွင် MNDAA တပ်ဖွဲ့ဝင်အချို့ ရှိနေဆဲဖြစ်ကြောင်း ဒေသခံအချို့က ပြောဆိုထားသည်။

MNDAA ထိန်းချုပ်ထားခဲ့သည့် အဆိုပါ လားရှိုးမြို့ကို နိုင်ငံတော်စီမံ အုပ်ချုပ်ရေးကောင်စီ၏ ဒေသဆိုင်ရာ အုပ်ချုပ်ရေးအဖွဲ့ထံသို့ ပြန်လည် လွှဲပြောင်းမည်ဟု ယခင်ရက်ပိုင်းက သတင်းများ ထွက်ပေါ်ခဲ့ပြီး ယခုလို အခြေအနေသို့ ရောက်ရှိလာခဲ့သော်လည်း လားရှိုးမြို့ အုပ်ချုပ်ရေးနှင့် ပတ်သက်၍ မည်ကဲ့သို့ စီမံဆောင်ရွက်သွားမည်ကို ယခုချိန်အထိ ဘက် အသီးသီးမှ တရားဝင်ထုတ်ပြန်ထားခြင်း မရှိသေးပေ။

MNDAA အဖွဲ့အနေဖြင့် ဧပြီ ၂၁ ရက်တွင် လားရှိုးမြို့အတွင်းရှိ ၎င်းတို့၏ အထူးဒေသ (၁) အလံများကို ဖြုတ်သိမ်းခဲ့ပြီး မြန်မာနိုင်ငံအလံများ လွှင့်ထူထားသည်ကို တွေ့ရှိရသည်ဟု ဒေသဆိုင်ရာသတင်းများအရ သိရသည်။

ကိုးကား-MHT

သံချပ်ကာယာဉ်များ၊ လေကြောင်းရန်ကာကွယ်ရေးဒုံးကျည်များ၊ ဟောင်ဝစ်ဇာအမြောက်များနှင့် အခြားစစ်လက်နက်ပစ္စည်းများအပါအဝင် ယူကရိန်းအတွက် စစ်ရေးအကူအညီအသစ်များကို ဂျာမနီအစိုးရက ထုတ်ပြန် ကြေညာခဲ့ကြောင်း သိရပါသည်။

ဂျာမန်အဓိပတိဖြစ်လာခဲ့သည် Chancellor Friedrich Merz က ယူကရိန်း ကို တာဝေးပစ်ဒုံးကျည်များ ထောက်ပံ့ပေးခြင်းနှင့်ပတ်သက်ပြီး ဂျာမနီက ကိုယ်တိုင်ချမှတ်ထားသော တားမြစ်ချက်များကို ၎င်းကချိုးဖောက် နိုင်သည်ဟု ယခုလအစောပိုင်း၌ ပြောကြားခဲ့ပါသည်။ ထို့အပြင် ၎င်း၏ ပြောဆိုချက်များနှင့်ပတ်သက်ပြီး ရုရှားဘက်မှ ပြင်းပြင်းထန်ထန် သတိပေးမှုများ လုပ်ဆောင်ခဲ့ကြောင်းလည်း သိရပါသည်။ ဂျာမနီအစိုးရ သည် ယူကရိန်းသို့ပေးပို့ခဲ့သည့် စစ်ဘက်ဆိုင်ရာ ပစ္စည်းစာရင်းများနှင့် ပတ်သက်ပြီး ပြင်ဆင်ထားသည့်စာရင်းအသစ်ကို လွန်ခဲ့သော ရက်ပိုင်းတွင် ထုတ်ပြန်ခဲ့ကြောင်းလည်း သိရပါသည်။

ထုတ်ပြန်ချက်၌ “ဂျာမနီအစိုးရသည် လာမည့်နှစ်များအတွင်း ယူရို (၂၈) ဘီလီယံ တန်ဖိုးရှိ စစ်‌ရေးအကူအညီများ ယူကရိန်းကိုပေးအပ်ရန် ကတိပြု ထားပြီး ယူရို (၅ ဒသမ ၂) ဘီလီယံ ဝန်းကျင်တန်ဖိုးရှိ စစ်ရေးအကူအညီများသည် ဂျာမနီစစ်တပ်၏ ကိုယ်ပိုင်သိုလှောင်မှုများထဲမှဖြစ်သည်” ဟု ပါရှိသည်။ ထို့အပြင် ဂျာမနီသည် ယူကရိန်းစစ်သား(၁၀,၀၀၀) ကျော်အား ရုရှား-ယူကရိန်းစစ်ပွဲ ဖြစ်ပွားချိန်မှစတင်ပြီး စစ်ရေးလေ့ကျင့်ပေးမှုများပြုလုပ်ပေးခဲ့သည်ဟု ဂျာမနီအစိုးရက ထပ်မံပြောကြားခဲ့ပါသည်။

ကိုးကား-NP News

အမေရိကန်နှင့်ဖိလစ်ပိုင်တို့က စစ်သည် အင်အား ၁၄၀၀၀ ကျော်ဖြင့် ပူးတွဲတိုက်ပွဲဝင် စစ်ရေးလေ့ကျင့်ခန်းကြီးကို   ဧပြီလ ၂၁ ရက်တွင် ဆောင်ရွက်ကြောင်း   သိရသည်။

အဆိုပါစစ်ရေး လေ့ကျင့်ခန်းကို နှစ်စဉ် ဆောင်ရွက်လေ့ရှိပြီး ယခုလေ့ကျင့်ခန်းကို မေလ ၉ ရက်အထိ သီတင်းပတ်သုံးပတ်ကြာ ဆောင်ရွက်သွားမည်ဖြစ်သည်။ ထို လေ့ကျင့်ခန်းတွင် အမေရိကန်မှ NMESIS သင်္ဘောဖျက်ဒုံးကျည်စနစ်နှင့် HIMARS ဒုံးပစ်လောင်ချာတို့ကဲ့သို့သော စစ်လက်နက်ပစ္စည်းများ၏ စွမ်းရည်များကိုပါပြသ သွားမည်ဖြစ်သည်။

ထို့ပြင် စစ်ရေးလေ့ကျင့်ခန်းတွင်ပါဝင်သည့် ကျည်စစ်ကျည်မှန် အသုံးပြုပစ်ခတ် လေ့ကျင့်ခန်းတွင် ဖိလစ်ပိုင်က ၎င်းတို့၏ ပြည်တွင်းဖြစ် ခေတ်မီဒုံးကျည်များကို စမ်းသပ်သွားမည်ဖြစ်ကြောင်း တာဝန်ရှိသူများက  သတင်းစာရှင်းလင်းပွဲတွင် ပြောသည်။

အလားတူ ယခုစစ်ရေးလေ့ကျင့်ခန်း သည် အပြည့်အဝ တိုက်ပွဲဝင်စမ်းသပ်မှု ဖြစ်ကြောင်း၊ နှစ်နိုင်ငံတပ်ဖွဲ့များ၏ စွမ်းရည်များကို ဘက်ပေါင်းစုံမှ တိုင်းတာသွားမည်ဖြစ်ကြောင်း  အမေရိကန်တပ်မတော်မှ စစ်ရေး လေ့ကျင့်ခန်းဆိုင်ရာ ညွှန်ကြားရေးမှူး  ဒုတိယဗိုလ်ချုပ်ကြီး ဂျိမ်းဂလင်းကပြောသည်။

ထိုစစ်ရေး လေ့ကျင့်ခန်းတွင် ဒုံးကျည်ရန်စွယ် ကာကွယ်ရေး၊ ကျူးကျော်လာမှုကို ဟန့်တားရေး၊    ဖိလစ်ပိုင်စစ်ရေယာဉ် တစ်စင်းကို   ပစ်ခတ်နှစ်မြှုပ်ရေးတို့ ပါဝင်ကာ  အမေရိကန်ဘက်က  စစ်သည် ၉၀၀၀ ဝန်းကျင်နှင့်   ဖိလစ်ပိုင်ဘက်က စစ်သည် ၅၀၀၀ ကျော်က လေ့ကျင့်သွားမည် ဖြစ်ကြောင်း သိရသည်။   

Source: https://myawady.net.mm/

အီစတာပွဲတော်အတွက် ရုရှား၏ ယာယီအပစ်အခတ်ရပ်စဲရေး အဆိုပြုချက်ကို ယူကရိန်းဘက်က အစပိုင်းတွင် လက်မခံခဲ့သော်လည်း နောက်ပိုင်းတွင် နိုင်ငံခြားတိုက်ရိုက်ဖိအားကြောင့် ထိုဆုံးဖြတ်ချက် ပြောင်းလဲခဲ့ကြောင်း ရုရှားသမ္မတ ဗလာဒီမာ ပူတင်က ဧပြီ ၂၁ ရက်တွင် ထုတ်ဖော် ပြောကြား လိုက်ပါသည်။ 

“၎င်းတို့၏ပထမဆုံး တုံ့ပြန်မှုက မိမိတို့၏ အဆိုပြုချက်ကို “လူသားများ၏ အသက်များနှင့် ကစားနေသည့်လှည့်ကွက်” ဟု စွပ်စွဲပြီး အပြည့်အဝ ငြင်းပယ်ခဲ့သည်ကို အားလုံးမြင်ခဲ့ကြရပါကြောင်း” ပူတင်က ရှင်းပြခဲ့သည်။ 

“သို့သော် အမြော်အမြင်ကြီးသူများနှင့် ထင်ရှားသည့် နိုင်ငံတကာ အကြီးအကဲများက ယခုလိုငြင်းပယ်မှုများက ယူကရိန်းအစိုးရအတွက် နိုင်ငံရေးအရ အရှုံးကြီးရှုံးစေမည်ဟု သတိပေးသည့်အခါကျတော့ ချက်ချင်းဆိုသလို သဘောထားပြောင်းလဲသွားခဲ့ပါကြောင်း” ၎င်းက ဖြည့်စွက် ပြောကြားခဲ့သည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ရီပတ်ဘလီကန် ဆီးနိတ်အမတ် Ron Johnson က ၂၀၀၁ ခုနှစ်၊ စက်တင်ဘာ ၁၁ တိုက်ခိုက်မှုနှင့်ပတ်သက်သည့် ဖြစ်စဉ်အမှန်အပေါ် အစိုးရ၏ရှင်းလင်းချက်များနှင့် သက်သေအထောက်အထားများနှင့် ပတ်သက်ပြီး ဖြေရှင်းနိုင်ခဲ့ခြင်းမရှိသည့် မေးခွန်းများကို ကိုးကား၍ အမေရိကန်ကွန်ဂရက်လွှတ်တော်မှ နောက်ထပ်စုံစမ်းစစ်ဆေးမှုများ ပြုလုပ်နိုင်ရန် အကြံပြုခဲ့သည်။

၂၀၀၁ ခုနှစ်၊ စက်တင်ဘာ ၁၁ တွင် အယ်လ်ကိုင်ဒါ အကြမ်းဖက်သမား များသည် ခရီးသည်တင်လေယာဉ် ၄ စီး ကို ပြန်ပေးဆွဲခဲ့ပြီး ၎င်းတို့ အနက် ၂ စီးသည် နယူးယောက်မြို့ရှိ World Trade Center မျှော်စင် နှစ်ခုသို့ ဝင်ရောက်တိုက်ခိုက်ခဲ့သည်။ တတိယလေယာဉ်သည် ပင်တဂွန် (အမေရိကန်ကာကွယ်ရေးဝန်ကြီးဌာန) ကို တိုက်ခိုက်ခဲ့ပြီး၊ စတုတ္ထမြောက် လေယာဉ်မှာ ပဲန်ဆယ်ဗေးနီးယား ပြည်နယ်ရှိ လယ်ကွင်းတစ်ခုအတွင်း ပျက်ကျခဲ့သည်။ National Institute of Standards and Technology (NIST) ၏ အဆိုအရ၊ World Trade Center Building 7 သည် အနီးရှိ အခြားမျှော်စင်မှ ပြိုကျသည့် အမှိုက်သရိုက်များကြောင့် မီးလောင်ပြီး ပြိုလဲခဲ့သည်ဟု ဖော်ပြခဲ့သည်။

ဆီးနိတ်အမတ် Johnson သည် ဧပြီ ၂၂ ရက်(တနင်္လာနေ့) တွင် ထုတ်လွှင့်ခဲ့သည့် အမွန်ခံမှုဝါဒီ Benny Johnson ၏ တွေ့ဆုံမေးမြန်းချက်တစ်ခုအတွင်း Building 7 ၏ ပြိုလဲမှုအပါအဝင် ၉/၁၁ စုံစမ်းစစ်ဆေးမှု၏ အချို့သောအချက်များကို မေးခွန်းထုတ်ခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂