ပါဟယ်ဂမ်မြို့မှာဖြစ်ပွားတဲ့အကြမ်းဖက်တိုက်ခိုက်မှုနဲ့ပတ်သက်ပြီး ရာဇဝတ်မှုကျူးလွန်သူများအနက် နှစ်ဦးရဲ့ မိသားစုများနေထိုင်ရာ နေအိမ်များကို အိန္ဒိယစစ်သည်များက ဖောက်ခွဲလိုက်တယ်လို့ သိရပါတယ်။

အကြမ်းဖက်တိုက်ခိုက်မှုကို လုပ်သွားတဲ့သူတွေထဲမှာ အိန္ဒိယနိုင်ငံအတွင်းနေထိုင်သူနှစ်ဦး ပါဝင်နေတယ်လို့ ရဲတပ်ဖွဲ့က စုံစမ်းစစ်ဆေးနိုင်ပြီးနောက် သူတို့နှစ်ဦးရဲ့မိသားစုများကို ဖမ်းဆီးစစ်ဆေးမှုတွေ လုပ်ဆောင်တယ်လို့ ရဲအရာရှိတစ်ဦးနဲ့ ဖမ်းဆီးစစ်ဆေးခံရသူများရဲ့ ဆွေမျိုးများကပြောပါတယ်။

အိန္ဒိယလုံခြုံရေး တပ်ဖွဲ့ဝင်များက ဧပြီလ ၂၄ ရက်ညနဲ့ ၂၅ ရက်တစ်ရက်လုံးမှာ အဲဒီနေအိမ်တွေကို ဝိုင်းပတ်ပိတ်ဆို့ပြီး ဖမ်းဆီးစစ်ဆေးမှုတွေ လုပ်ဆောင်တာ ဖြစ်ပါတယ်။ ဒါ့အပြင် နေအိမ်တွေထဲမှာ ဘယ်သူမှမရှိတော့မှသာ အကြမ်းဖက်သမားများရဲ့   မိသားစုနေအိမ်တွေကို တာဝန်ရှိသူတွေက  ဖောက်ခွဲလိုက်တာ ဖြစ်တယ်လို့ ဆိုပါတယ်။

ဖောက်ခွဲခံလိုက်ရတဲ့ နေအိမ်များထဲမှာ ပါကစ္စတန်နိုင်ငံကိုသွားပြီး အကြမ်းဖက်သင်တန်းတက်ခဲ့သူ အဒေးဟူစီသိုကာရဲ့ နေအိမ်လည်းပါဝင်ပါတယ်။ အိန္ဒိယတာဝန်ရှိသူများက ပါဟယ်ဂမ်အကြမ်းဖက် တိုက်ခိုက်မှုနဲ့ ပတ်သက်ပြီး အကြမ်းဖက်သမားတစ်ဦးချင်းကို ဖမ်းဝရမ်းထုတ်ထားကာ သူတို့ကို ဖမ်းဆီးနိုင်ဖို့အတွက် သတင်းပေးနိုင်သူကို အကြမ်းဖက်သမား တစ်ဦးစီအတွက် ရူပီးနှစ်သန်းစီ ပေးသွားမယ်လို့ ထုတ်ပြန်ထားပါတယ်။        

Ref: TOI

H.M

Source: https://myawady.net.mm/

လာမည့် ဩဂုတ်လတွင် ရုရှားနိုင်ငံ၌ ကမ္ဘာလုံးဆိုင်ရာ ဒရုန်းနည်းပညာ ဖိုရမ် ကျင်းပမည်ဖြစ်ကြောင်း ရုရှားစက်မှုနှင့်ကုန်သွယ်ရေးဝန်ကြီးဌာနမှ ဒရုန်းစနစ်နှင့် Robotic နည်းပညာဌာနခွဲ၏ ခေါင်းဆောင် Alexey Serdyuk က ပြည်နယ်ဒူမားတွင် ကျင်းပသော ဆွေးနွေးပွဲ၌ ထုတ်ဖော်ကြေညာလိုက် ပါသည်။ 

ထိုဖိုရမ်ကို ရုရှား တပ်မတော်၏ Army Forum နှင့်အတူ ကျင်းပမည် ဖြစ်ပါသည်။ ရုရှားသည် ယူကရိန်းစစ်ပွဲတွင် Lancet နှင့် Orion ကဲ့သို့သော ဒရုန်းများ အသုံးပြုမှုဖြင့် ကမ္ဘာ့အာရုံစိုက်မှုရရှိခဲ့ရာ အဆိုပါဒရုန်းဖိုရမ်မှာ စိတ်ဝင်စားဖွယ် ကောင်းနေပါသည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

နိုင်ငံတစ်ဝန်းမြို့နယ် (၁၆) မြို့နယ်မှ PDF အဖွဲ့ဝင် (၃၀) ကျော် လက်နက်ခဲယမ်းများနှင့်အတူ ဥပဒေဘောင်အတွင်း ဝင်ရောက်လာခဲ့ကြောင်း တပ်မတော်ကာကွယ်ရေးဦးစီးချုပ်ရုံး၏ ထုတ်ပြန်ချက်အရ သိရသည်။

ပြစ်မှုကျူးလွန်ခြင်းမရှိသော PDF အဖွဲ့မှ ဥပဒေဘောင်အတွင်းသို့ ပြန်လည် ဝင်ရောက်လာသူများအား မိဘအုပ်ထိန်းသူများထံ ပြန်လည် လွှဲပြောင်းပေးအပ်ခြင်းကို ဧပြီလ ၂၅ ရက်တွင် အလယ်ပိုင်းတိုင်း စစ်ဌာနချုပ်၊ ရန်အောင်မြင်ခန်းမ၌ ပြုလုပ်ခဲ့ခြင်းဖြစ်ကြောင်း သိရသည်။

ဥပဒေဘောင်အတွင်း ပြန်လည်ဝင်ရောက်လာသည့် ပြစ်မှုကျူးလွန်ခြင်း မရှိသော PDF အဖွဲ့ဝင်များသည် မန္တလေး တိုင်းဒေသကြီး၊ အောင်မြေသာစံ မြို့နယ်၊ ပြည်ကြီးတံခွန်မြို့နယ်၊ အမရပူရမြို့နယ်၊ မဟာအောင်မြေ မြို့နယ်၊ ချမ်းအေးသာစံမြို့နယ်၊ စဉ့်ကူးမြို့နယ်၊ တံတားဦးမြို့နယ်၊ မိုးကုတ်မြို့နယ်၊ ရန်ကုန်တိုင်းဒေသကြီး၊ တောင်ဒဂုံမြို့နယ်၊ ကြည့်မြင်တိုင်မြို့နယ်၊ သင်္ဃန်းကျွန်းမြို့နယ်၊ စစ်ကိုင်းတိုင်းဒေသကြီး၊စစ်ကိုင်းမြို့၊ မုံရွာမြို့နယ်၊ ရှမ်းပြည်နယ်(မြောက်ပိုင်း)၊ မဘိမ်းမြို့နယ်၊ နောင်ချိုမြို့နယ်နှင့် ရှမ်းပြည်နယ် (တောင်ပိုင်း)၊ အောင်ပန်းမြို့နယ် တို့မှဖြစ်ပြီး အမျိုးသား(၃၀)ဦး နှင့် အမျိုးသမီး(၂)ဦး ဥပဒေဘောင်အတွင်း ဝင်ရောက်လာခဲ့ကြောင်း သိရသည်။

ထို့ပြင် ၎င်းတို့နှင့်အတူပါလာသည့် Type-81 အမျိုးအစား သေနတ် ၅ လက်၊ ၎င်းကျည်အိမ် ၁၃ ခု၊ ကျည် ၉၀၀ တောင့်နှင့် လက်ပစ်ဗုံး ၅ လုံးတို့ကို အပ်နှံခဲ့ကြသဖြင့် တာဝန်ရှိသူများက သေနတ် ၁ လက်လျှင် ဆုကြေး ငွေကျပ် သိန်း ၅၀ နှုန်းဖြင့် သေနတ် ၅ လက်အတွက် ဆုကြေးငွေကျပ် သိန်း ၂၅၀ ၊ လက်ပစ်ဗုံး ၅ လုံးအတွက် ကျပ် ၃ သိန်းနှင့် ဥပဒေဘောင် အတွင်း ပြန်လည်ဝင်ရောက်လာသူများအတွက် ကျပ်သိန်း ၁၄၀ တို့ကို ထောက်ပံ့ပေးအပ်ခဲ့ကြောင်းလည်း ထုတ်ပြန်ချက်အရ သိရသည်။

ထို့နောက် တာဝန်ရှိသူများက ဥပဒေဘောင်အတွင်း ပြန်လည်ဝင်ရောက်လာသူများအား ဝန်ခံကတိလက်မှတ်ရေးထိုးစေကာ ၎င်းတို့၏ မိဘအုပ်ထိန်းသူများထံသို့ လွှဲပြောင်းပေးအပ်ခဲ့ကြောင်း သိရသည်။

နိုင်ငံတော်စီမံအုပ်ချုပ်ရေးကောင်စီမှ ဥပဒေဘောင်အတွင်း ဝင်ရောက်လာသူများအား ပြန်လည်ကြိုဆိုလက်ခံ၍ လက်နက်/ ခဲယမ်းများပါရှိမှုအတွက်ဆုကြေးငွေများ ပေးအပ်လျက်ရှိခြင်းနှင့် လိုအပ်သည့် ကူညီပံ့ပိုးမှုများ ဆောင်ရွက်ပေးလျက်ရှိခြင်းတို့ကြောင့် ဥပဒေဘောင်အတွင်းသို့ ပြန်လည် ဝင်ရောက်ရန်ဆန္ဒရှိသူများ ကျန်ရှိနေသေးကြောင်းလည်း တပ်မတော်ကာကွယ်ရေးဦးစီးချုပ်ရုံး၏ ထုတ်ပြန်ချက်အရ သိရသည်။ ထို့ကြောင့် ဥပဒေဘောင်အတွင်း ပြန်လည်ဝင်ရောက်လိုသူများအနေဖြင့် နီးစပ်ရာ ခရိုင်၊ မြို့နယ်စီမံအုပ်ချုပ်ရေးအဖွဲ့များ၊ တပ်စခန်းများနှင့် ရဲစခန်းများသို့ အမြန်ဆက်သွယ်သတင်းပေးပို့လာပါက ကြိုဆိုလက်ခံပေးသွားမည် ဖြစ်ကြောင်းလည်း သိရသည်။

ကိုးကား-NP News

ဂျမူး-ကက်ရှ်မီးယားဒေသတွင် ဖြစ်ပွားခဲ့သော အကြမ်းဖက်တိုက်ခိုက်မှုနှင့်ပတ်သက်၍ အစိုးရမှ ပိုမိုပြင်းထန်သော အရေးယူဆောင်ရွက်သွားမည်ဖြစ်ကြောင်း အိန္ဒိယပါလီမန်ရေးရာဝန်ကြီး Kiren Rijiju က အိန္ဒိယ အစိုးရနှင့် နိုင်ငံရေးပါတီများ၏ ကိုယ်စားလှယ်များနှင့် ကျင်းပပြုလုပ်သော အရေးပေါ်အစည်းအဝေး (CCS Meeting) အပြီးတွင် ပြုလုပ်သော သတင်းစာရှင်းလင်းပွဲ၌ ကြေညာလိုက်ပါသည်။

လတ်တလောဖြစ်ပွားခဲ့သည့် အကြမ်းဖက်မှုသည် လွန်စွာဝမ်းနည်းဖွယ်ကောင်းပြီး တစ်နိုင်ငံလုံးအနေဖြင့် စိုးရိမ်ပူပင်ကြရကြောင်း၊ အစိုးရအနေဖြင့် ပိုမိုတင်းကျပ်သော အရေးယူမှုများဆောင်ရွက်ရန် ဆုံးဖြတ်လိုက်ပြီးဖြစ်ပါကြောင်း ပါလီမန်ဝန်ကြီးက ပြောကြားထားပါသည်။ 

အဆိုပါအစည်းအဝေး၌ အကြမ်းဖက်တိုက်ခိုက်မှုဖြစ်စဉ်နှင့်ပတ်သက်၍ အိန္ဒိယ၏ တုံ့ပြန်မှုများကို ကာကွယ်ရေးဝန်ကြီး Rajnath Singh က အသေးစိတ်ရှင်းလင်းတင်ပြခဲ့သည်ဟု သိရပါသည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ရုရှားနိုင်ငံ၊ မော်စကိုဒေသ၊ ဗလာရှီခါမြို့တွင် ကားဗုံးပေါက်ကွဲမှုတစ်ခု ဧပြီ ၂၅ ရက်(သောကြာနေ့) နံနက်ပိုင်းက ဖြစ်ပွားခဲ့ပြီး အဆိုပါ ပေါက်ကွဲမှုအတွင်း ရုရှားတပ်မတော်မှ ထိပ်တန်းအရာရှိတစ်ဦး သေဆုံးခဲ့ကြောင်း ရုရှားအာဏာပိုင်များက အတည်ပြု ပြောကြားခဲ့သည်။

ရုရှားလက်နက်ကိုင်တပ်ဖွဲ့များ၏ စစ်ဦးစီးချုပ်ရုံး၊ စစ်ဆင်ရေးဌာန၏ ဒုတိယအကြီးအကဲဖြစ်သူ ဗိုလ်ချုပ် ယာရိုစလာ့ မော့စကာလစ်သည် Volkswagen Golf ကားတစ်စီး ပေါက်ကွဲမှုအတွင်း သေဆုံးခဲ့ကြောင်း ရုရှား စုံစမ်းရေးကော်မတီက ထုတ်ပြန်သော ကြေညာချက်တွင် ဖော်ပြခဲ့ သည်။

ယင်းပေါက်ကွဲမှုသည် သံစများထည့်ထားသော လက်လုပ်ဗုံးတစ်လုံးကြောင့် ဖြစ်ပွားခဲ့ခြင်းဖြစ်ကြောင်း၊ ယင်းအမှုနှင့်ပတ်သက်၍ ရာဇဝတ်မှုဆိုင်ရာ စုံစမ်းစစ်ဆေးမှုတစ်ခု စတင်ခဲ့ကြောင်းလည်းစုံစမ်းရေးကော်မတီက ပြောကြား ခဲ့သည်။

မှုခင်းဆေးပညာရှင်များနှင့် ဥပဒေစိုးမိုးရေးအရာရှိများအပါအဝင် စုံစမ်း စစ်ဆေးရေးအဖွဲ့သည် မော်စကိုမြို့၏ အရှေ့ဘက် မိုင် ၂၀ အောက်သာ ဝေးကွာသော ဗလာရှီခါမြို့ရှိ ဖြစ်စဉ်နေရာကို စစ်ဆေးမှုများ စတင်နေပြီ ဖြစ်ကြောင်းလည်း သိရသည်။

အဆိုပါဖြစ်စဥ်သည် ရုရှားနိုင်ငံတွင်းလုံခြုံရေးအပေါ် မေးခွန်းထုတ်မှု များစွာ ဖြစ်စေခဲ့သလို ယူကရိန်းစစ်ပွဲများနှင့် ဆက်စပ်နေနိုင်ကြောင်း သုံးသပ်မှု များရှိသော်လည်း ယူကရိန်းကမူ ယခုလက်ရှိအချိန်အထိ ဖြစ်စဥ်အတွက် မှတ်ချက်မပြုပေ။

ကိုးကား- ဒေသတွင်းမီဒီယာ

ဘာသာပြန်ဆိုသူ- Thettant

မော်စကိုတွင် မေလ ၂၇ ရက်မှ ၂၉ ရက်အထိ ကျင်းပမည့် နိုင်ငံတကာ လုံခြုံရေးညီလာခံသို့ နိုင်ငံပေါင်း ၁၅၀ ကျော်မှ အဆင့်မြင့် ကိုယ်စားလှယ်များ တက်ရောက်မည်ဟု ရုရှား လုံခြုံရေးကောင်စီအတွင်းရေးမှူး Sergey Shoigu က TASS သတင်းဌာနသို့ ပြောကြားလိုက်ပါသည်။ 

ထိုညီလာခံတွင် ကမ္ဘာ့တောင်ပိုင်းနှင့် အရှေ့ဖျားဒေသ (Global South & East) နိုင်ငံများနှင့် လုံခြုံရေးပူးပေါင်းဆောင်ရွက်မှု မြှင့်တင်ရန် ရည်ရွယ်၍ အလေးထားဆွေးနွေးမည်ဖြစ်ပါသည်။

ညီလာခံ၌ ရုရှား၏လက်နက်နှင့် စစ်ယာဉ်ပြပွဲ၊ ဆိုက်ဘာလုံခြုံရေး နည်းပညာရပ်ဆိုင်ရာ အထူးပြခန်းများ ဖွင့်လှစ်ပြသမည်ဖြစ်ပါသည်။ ညီလာခံဆွေးနွေးပွဲများကိုလည်း Plenary Session နှင့် Roundtable ပုံစံများဖြင့် ပြုလုပ်မည်ဖြစ်ပါသည်။

ကမ္ဘာ့နိုင်ငံအများစု၏ ပါဝင်သဖြင့် အနောက်နိုင်ငံများ၏ ပိတ်ဆို့မှုများကြားတွင် ရုရှားက Global South နိုင်ငံများနှင့် မဟာမိတ်ဖွဲ့ရန် အားထုတ်နေခြင်းကို ထိုညီလာခံက ထင်ဟပ်ပြသနေပါသည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

တနင်္သာရီတိုင်းဒေသကြီး၊ ရေဖြူမြို့နယ်၊ တလိုင်းယာကျေးရွာအုပ်စု၊ ဒေါက်လောက်ကျေးရွာအနီး ထားဝယ်ရေနက်ဆိပ်ကမ်းသို့ သွားလာသည့် လမ်းပေါ်၌ ထားဝယ်မြစ်အား ဖြတ်သန်းဆောက်လုပ်ထားသည့် အရှည် ၅၀၀ ပေ၊ အနံ ၁၂ ပေရှိသံကူကွန်ကရစ် ဘေလီ တံတားအား ဧပြီ ၂၅ ရက်နေ့၊ နံနက် ၁၀ နာရီခန့်တွင် PDF အမည်ခံအကြမ်းဖက်သမားများက မီးရှို့ဖျက်ဆီးခဲ့မှုကြောင့် ၆ လက်မ ၃ လက်မရှိ သစ်သားဇလီဖားများနှင့်အပေါ်ပြင်ခင်းများ ပေ ၂၀၀ ခန့်မီးလောင်ပျက်စီးခဲ့ကြောင်းနှင့် မော်တော်ယာဉ်များ ဖြတ်သန်းသွားလာနိုင်မှုမရှိကြောင်း သိရှိရသည်။

အဆိုပါ ပျက်စီးခဲ့သည့်တံတားအား ရေဖြူမြို့နယ်လမ်းဦးစီးဌာနမှ အမြန်ဆုံး ပြန်လည်ပြုပြင်သွားမည်ဖြစ်ကြောင်းနှင့် အဆိုပါနေရာတစ်ဝိုက်အား လုံခြုံရေးတပ်ဖွဲ့ဝင်များက လိုအပ်သည့်လုံခြုံရေးလုပ်ငန်းများ ဆောင်ရွက်လျက်ရှိကြောင်း သတင်းရရှိသည်။

ကိုးကား-Myanmar National Post

ဂျပန်နိုင်ငံက အသံနှုန်းလွန်ဒုံးကျည်များကို ကြားဖြတ်ပစ်ချနိုင်ရေးအတွက်ရည်ရွယ်၍အဆင့်မြှင့်တင်ထားသည့် လျှပ်စစ်သံလိုက်လှိုင်းသုံး  Rail Gun ကိုထုတ်ဖော်ပြသလိုက်ကြောင်း သိရသည်။

ဂျပန်ကာကွယ်ရေးဝန်ကြီးဌာနက စစ်ရေယာဉ်တစ်စင်းပေါ် တင်ဆောင်ထားသည့် Rail Gun ၏ဓာတ်ပုံကိုထုတ်ဖော် ပြသခဲ့ခြင်းဖြစ်သည်။ ထို့နောက် လေ့လာသူများက ဂျပန်နိုင်ငံသည် လေကြောင်းရန်ကာကွယ်ရေးအတွက်အဆင့်မြင့်လက်နက်စနစ်ကိုအသုံးပြုနိုင်သော ရေတပ်များအနက်တစ်ခုဖြစ်လာပြီဖြစ်ကြောင်းပြောထားသည်။

ယခုထုတ်ဖော်ပြသသော Rail Gun သည် ၂၀၂၃ ခုနှစ် အောက်တိုဘာလတွင်  စမ်းသပ်ပစ်ခတ်မှုလုပ်ဆောင်စဉ် မြင်တွေ့ခဲ့ရသော ရှေ့ပြေးပုံစံထက် များစွာသောပြုပြင်ပြောင်းလဲအဆင့်မြှင့်တင်မှုများ လုပ်ထားသည်ကိုတွေ့ရကြောင်း လေ့လာသူများကဆက်ပြောသည်။

သမားရိုးကျအမြောက်စနစ်များနှင့်နှိုင်းယှဉ်ပါက Rail Gun အတွက်အသုံးပြုသည့် ကျည်များသည် သေးငယ်ပြီးအသံနှုန်းလွန် ဒုံးကျည်များနှင့်အပြိုင်လိုက်ပါနိုင်သော အမြန်နှုန်းရှိကာ ဒုံးကျည်များထက် ကုန်ကျစရိတ်နည်းပါး၍ လျှပ်စစ်သံလိုက်စက်ကွင်းများကို   အသုံးပြုပစ်ခတ်ခြင်းဖြစ်သည်။

ဂျပန်နိုင်ငံက ယခုကဲ့သို့အဆင့်မြင့်မားသည့် Rail Gun ကိုတီထွင်ဖန်တီးအသုံးပြု လာမည်ဆိုပါက ဂျပန်နိုင်ငံသည်တိုက်စစ် မဟာဗျူဟာလမ်းကြောင်းနောက်သို့လိုက်နေသည်ဟုဆိုနိုင်သောကြောင့်အခြားနိုင်ငံများအတွက် အန္တရာယ်ရှိနိုင်ကြောင်း လေ့လာသူတစ်ဦးကပြောသည်။

Ref: SCMP

Source: https://myawady.net.mm/

ဥရောပသည် စေ့စပ်ညှိနှိုင်းမှုကိုမဟုတ်ဘဲ စစ်ကိုသာလိုလားနေပါကြောင်း၊ လက်ရှိအချိန်အထိ ရုရှားနှင့် သဘောထားကိုက်ညီမှု မရှိပါကြောင်း ကရင်မလင်၏ ပြောရေးဆိုခွင့်ရှိသူ ဒီမီထရီပက်စကိုဗ်က ပြင်သစ် သတင်းစာ Le Point ကို ပြောကြားလိုက်ပါသည်။ 

“ဥရောပက စစ်ကိုသာ လိုလားနေပြီး ညှိနှိုင်းမှုကို မလိုလားပါ။ မိမိတို့ဘက်ကလည်း ၎င်းတို့ကို အတင်းအကျပ် ဆွဲခေါ်ထားမည်မဟုတ်ပါ” ဟု ၎င်းက ဆိုသည်။ 

ဥရောပတစ်ခုလုံးသည် ဘိုင်ဒင်အစိုးရအတွက် အလုပ်လုပ်နေသကဲ့သို့ ဖြစ်နေပါကြောင်း၊ ဥရောပသည် အချုပ်အခြာအာဏာပိုင် မဟုတ်ဘဲ၊ဘိုင်ဒင်အစိုးရ၏ အမိန့်အတိုင်း လိုက်နာဆောင်ရွက်နေခြင်းသာ ဖြစ်ကြောင်း၊ ထို့အတူ သမ္မတတိုင်း၊ ဝန်ကြီးချုပ်တိုင်းသည် ဘိုင်ဒင်၏ အကြံပေးများ သဖွယ် ဖြစ်နေပါကြောင်း၊ ယခုအချိန်အထိ ဝါရှင်တန်ကသာ အဓိက အခန်းကဏ္ဍမှဝင်နေပါကြောင်း ပက်စကိုဗ်က ထောက်ပြထားပါသည်။ 

ကိုးကား- ကရင်မလင်

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ယူကရိန်းပဋိပက္ခသည် စစ်မြေပြင်အတွေ့အကြုံ၏ အဖိုးတန်ရင်းမြစ် ဖြစ်သည်ဟု ရုရှားသမ္မတ ဗလာဒီမာ ပူတင်က ပြောကြားခဲ့ပါသည်။

ကမ္ဘာ့စစ်တပ်အားလုံးသည် ယူကရိန်းပဋိပက္ခတွင် ရုရှားအသုံးပြုခဲ့သော နည်းဗျူဟာများနှင့် နည်းပညာများကို နီးကပ်စွာလေ့လာနေကြောင်း သမ္မတပူတင်က ဗုဒ္ဓဟူးနေ့ (ဧပြီ ၂၃ရက်) တွင် ရုရှား၏ စစ်မှုထမ်းဆောင်ရေး ကော်မရှင်အစည်းအဝေး၌ ထုတ်ဖော်ပြောကြားခဲ့သည်။ ရုရှားသည် ၎င်း၏စစ်မှုထမ်းဆောင်ရေးနယ်ပယ်တွင်အောင်မြင်မှုများကို အခြေခံ၍ ရှေ့ဆက်လုပ်ဆောင်ရမည်ဟု ၎င်းကအလေးထားပြောကြားခဲ့သည်။ 

ရုရှား၏စစ်မြေပြင်အတွေ့အကြုံသည် ကမ္ဘာလုံးဆိုင်ရာစိတ်ဝင်စားမှုကို ရရှိနေကြောင်း၊ “မိမိတို့၏အထူးစစ်ဆင်ရေးလုပ်ငန်းသည် နည်းဗျူဟာရေးရာနှင့် လက်နက်ဖွံ့ဖြိုးရေးအရ ကမ္ဘာ့စစ်တပ်အားလုံး၊ အကြီးဆုံး လက်နက်ထုတ်လုပ်ရေးလုပ်ငန်းရှင်များနှင့် နည်းပညာကုမ္ပဏီများက လေ့လာနေကြသည်” ဟု သမ္မတ ဗလာဒီမာပူတင်က နိုင်ငံ၏ စစ်ဘက်ဆိုင်ရာစက်မှုလုပ်ငန်းကော်မရှင် အစည်းအဝေးပွဲ၌ ဖွင့်ဟပြောကြားခဲ့ ပါသည်။ ရုရှားသည် “တစ်ဆင့်ပို၍သာလွန်နေရမည်” ဟု ၎င်းက ပြောကြား ခဲ့သည်။ 

ရုရှားသမ္မတ ဗလာဒီမာပူတင်က ရုရှား၏စစ်အင်အားကို အဓိက ထောက်ပံ့ပေးနေသော လုပ်ငန်းများမှဝန်ထမ်းများအား ကျေးဇူးတင်ကြောင်း ပြောကြားရင်း၊ ယခုနှစ်တွင် ၂၀၂၄ ခုနှစ်ထက် ပိုမိုစိန်ခေါ်မှုများ ရင်ဆိုင် ရနိုင်ကြောင်း ထောက်ပြခဲ့ပါသည်။ 

၂၀၂၄ ခုနှစ်အတွင်း ရုရှားတပ်များသည် ဒရုန်း ၁.၅ သန်းကျော်နှင့် သံချပ်ကာယာဉ် ၄,၀၀၀ ကျော်ရရှိခဲ့သော်လည်း၊ ယူကရိန်းပဋိပက္ခတွင် အဓိကအရေးပါလာသော FPV (first person view) ဒရုန်းများ လိုအပ် နေဆဲဖြစ်ကြောင်း သမ္မတက ဖော်ပြခဲ့ပါသည်။ 

ထို့ပြင် ရုရှားသည် မောင်းသူမဲ့သင်္ဘောများ၊ စက်ရုပ်များနှင့် စစ်သုံးလေဆာများ ဖွံ့ဖြိုးရေးကို ဦးစားပေးသင့်ကြောင်း၊ ယခုအခါ ထိုနယ်ပယ်များတွင် တိုးတက်မှုအချို့ရှိလာပြီဖြစ်ကြောင်း ၎င်းကအလေးထား ပြောကြား ခဲ့သည်။ 

၂၀၂၄ ခုနှစ် အမေရိကန်စစ်တက္ကသိုလ်၏ စစ်ပွဲဆိုင်ရာအစီရင်ခံစာတွင် အီလက်ထရောနစ်စစ်ပွဲ၏အရေးပါမှုနှင့် စောင့်ကြည့်ရေးစနစ်များကြောင့် ဖြစ်ပေါ်လာသော စစ်မြေပြင်အမြင်သာမှု စိန်ခေါ်ချက်များအပါအဝင် ယူကရိန်းပဋိပက္ခမှသင်ခန်းစာများကို ဖော်ပြထားသည်။ 

တစ်ချိန်တည်းတွင် ယူကရိန်း၌ တိုက်ခိုက်မှုများ ဆက်လက်ပြင်းထန်နေချိန်၌ ရုရှားသည် နည်းပညာဆိုင်ရာ ထိုးထွင်းသိမြင်မှုများကို ထုတ်ယူပြီး ၎င်း၏ ကိုယ်ပိုင်စစ်မြေပြင်စွမ်းဆောင်ရည်ကို တိုးတက်ကောင်းမွန်လာစေရန် လေ့လာသုံးသပ်ရန်အတွက် တင့်ကားများ၊ သံချပ်ကာယာဉ်များ၊ သယ်ဆောင်ရလွယ်သော ဒုံးကျည်စနစ်များနှင့် နေတိုးစံချိန်စံညွှန်းမီဆက်သွယ်ရေးစနစ်များအပါအဝင် အနောက်နိုင်ငံများက ပံ့ပိုးပေးထားသော ကိရိယာအမြောက်အမြားကို သိမ်းပိုက်နိုင်ခဲ့ပါသည်။

ကိုးကား - RT