နေပြည်တော် ဇူလိုင် ၂၄

ကော့ကရိတ်မြို့သည် ကရင်ပြည်နယ် ကော့ကရိတ်ခရိုင်တွင်ပါဝင်၍ ဘားအံ-မြဝတီ ကားလမ်းကြီးအပေါ်တွင်တည်ရှိပြီး စီးပွားရေးအချက်အချာကျသော မြို့တစ်မြို့ဖြစ်သည်။ မြန်မာ-ထိုင်း နယ်စပ်မြို့ဖြစ်သော မြဝတီမြို့နှင့် ၄၁ မိုင်ခန့်သာကွာဝေးပြီး ကူးသန်းရောင်းဝယ်ရေးအတွက် အဓိကကျသည့် အာရှလမ်းမကြီး ပေါ်တွင်တည်ရှိကာ ကော့ကရိတ်မြို့မှ မြဝတီမြို့-ဘားအံ-မော်လမြိုင်နှင့် ကြာအင်းဆိပ်ကြီးမြို့များသို့ သွားလာနိုင်သည့် လမ်းပန်းဆက်သွယ်ရေးကောင်းမွန်သော အဓိကအချက်အချာကျသည့် လမ်းဆုံမြို့တစ်မြို့ဖြစ်သည်။                               

ထိုသို့ အာရှလမ်းမကြီးပေါ်ရှိ အဓိက အချက်အချာကျသည့် ကော့ကရိတ်မြို့နှင့် ဘားအံ-ကော့ကရိတ်-မြဝတီ အာရှလမ်းမကြီးအား ထိန်းချုပ်ရန်၊ နယ်စပ် ကုန်စည်စီးဆင်းမှုနှင့် အစိုးရ အုပ်ချုပ်မှုယန္တရားများ ရပ်တန့်စေရန်ရည်ရွယ်၍ KNU ၊ KNLA နှင့် PDF အကြမ်းဖက်ပူးပေါင်းအဖွဲ့များသည် ကော့ကရိတ်မြို့နှင့် နယ်မြေခံတပ်ဌာနချုပ်များအား အပြီးအပိုင် သိမ်းပိုက်ရန်အတွက် ၂၀၂၄ ခုနှစ်၊ ဧပြီလဆန်းပိုင်းမှစ၍ သာလွန်အင်အားများဖြင့် ကော့ကရိတ်-သင်္ကန်းညီနောင် လမ်းဟောင်းအတိုင်း ကော့ကရိတ်မြို့ မြောက်ဘက်ရှိကောင်းမှုကျေးရွာ၊ ရန်ကုတ်ကျေးရွာနှင့် ကြောင်ရှာကုန်းကျေးရွာတို့မှလည်းကောင်း၊ မြို့တောင်ဘက် လမ်းဖာ-အစွန်း-တမိုင်ကုန်းမှလည်းကောင်း၊ စစ်ကြောင်း ၂ ကြောင်းဖြင့် ကော့ကရိတ်မြို့အတွင်းသို့ ဝင်ရောက်နိုင်ရေး ဆောင်ရွက်ခဲ့သည့်အပြင် အဝေးမှနေ၍ လက်နက်ကြီးများဖြင့် မြို့တွင်းသို့ ပစ်ခတ်တိုက်ခိုက်ခဲ့ခြင်းများကြောင့် ရုံး/ဌာနအဆောက်အအုံများနှင့် လူနေအိမ်များ မီးလောင်ပျက်စီးခဲ့ရပြီး ဒေသခံတိုင်းရင်းသား ပြည်သူများအနေဖြင့် မိမိတို့၏ တိုက်တာအိုးအိမ်အဆောက်အအုံများ၊ ဥစ္စာပစ္စည်းများကိုစွန့်ခွာ၍ ဘေးလွတ်ရာသို့ ယာယီနေရပ်စွန့်ခွာခဲ့ရသည်။

တပ်မတော်စစ်ကြောင်းများအနေဖြင့် ကော့ကရိတ်မြို့နှင့် နယ်မြေခံတပ်ရင်းဌာနချုပ်များ ရန်သူ့လက်သို့ ကျရောက်ခြင်းမရှိ စေရေးအတွက် မိမိတို့၏အသက်ကို ပဓာနမထားဘဲ သစ္စာ(၄)ချက် ရွတ်ဆိုကြသည့် တပ်မတော် သားကောင်းရတနာများပီပီ မဆုတ်မနစ်သော ဇွဲ၊ လုံ့လ၊ ဝီရိယဖြင့် ရွပ်ရွပ်ချွံချွံဖြင့် မြို့တွင်းခုခံစစ်မှ တန်ပြန်တိုက်စစ်ဖြင့် တိုက်ခိုက်ခဲ့ ရာ ဧပြီလ ၁၉ ရက်မှ ၂၂ ရက်နေ့အထိ တိုက်ပွဲများဖြစ်ပွားခဲ့ပြီး အကြမ်းဖက်သောင်းကျန်းသူများသည် အထိအခိုက်အကျအဆုံးများစွာ ဖရိုဖရဲပြန်လည်ဆုတ်ခွာ ထွက်ပြေးသွားခဲ့သည်။

ထိုသို့ ဆုတ်ခွာထွက်ပြေးသွား ပြီးနောက် KNU ၊ KNLA လက်နက်ကိုင် အကြမ်းဖက်သောင်းကျန်းသူများသည် NCA လက်မှတ်ရေးထိုးပြီးနောက် နှစ်ဖက်နားလည်မှုဖြင့် ခွင့်ပြုပေးထားသည့် မြန်မာ-ထိုင်း နယ်စပ်အနီး ၎င်းတို့အဖွဲ့အစည်း နေထိုင်သည့်နေရာများ၌ ပြည်တွင်းမှ နိုင်ငံရေးအရောင်ဆိုးခံရခြင်းအပါအဝင် အကြောင်းအမျိုးမျိုးကြောင့် ကရင်ပြည်နယ်နှင့် ထိုင်းနယ်စပ်အနီးသို့ ထွက်ပြေးရောက်ရှိလာသည့် ကျောင်းသား/လူငယ်များအားလုံးအား နိုင်ငံရေး၊ စစ်ရေးမက်လုံးများပေးလျက် သွေးကြွစေပြီး အဆိုပါလူငယ်များအား အကြမ်းဖက်သင်ခန်းစာ သင်ကြားပေးခြင်း၊ လက်နက်တပ်ဆင်ပေးခြင်း စသည့်အခွင့်အရေးများ အပြည့်အဝရယူအသုံးချကာ KNU၊ KNLA အဖွဲ့၏ အင်အားတိုးပွား တောင့်တင်းခိုင်မာစေရေးနှင့် KNU၊ KNLA အဖွဲ့၏ ရှေ့ကာတပ်အဖြစ် အသေခံအသုံးချခြင်း စသည့် ရည်ရွယ်ချက်များဖြင့် ဖွဲ့စည်းထားသည့် PDF အကြမ်းဖက်ပူးပေါင်း အဖွဲ့များပူးပေါင်းလျက် ၎င်းတို့၏ စစ်ရေး ရည်မှန်းချက်များအား ပြန်လည်အကောင်အထည်ဖော် ရန်အတွက် နယ်စပ်ကုန်သွယ်ရေး လမ်းကြောင်းတွင် အဓိကအချက်အချာကျသည့် ဘားအံ-ကျုံဒိုး-ကော့ကရိတ်- မြဝတီ အာရှလမ်းမကြီးနှင့် ကျုံဒိုးမြို့နှင့် ကော့ကရိတ် မြို့အား အပြီးအပိုင် သိမ်းပိုက်နိုင် ရေး ၂၀၂၅ ခုနှစ်၊ ဧပြီလ ၁၃ ရက်မှစ၍ သာလွန်အင်အားများဖြင့် လမ်းကြောင်း ၅ ကြောင်းဖြစ်သည့် အောက်ဘိုတဲ-ရန်ကုတ်-ကော့ကရိတ်လမ်းကြောင်း၊ အောက်ဘိုတဲ- မြပတိုင်-အုန်းတပင်-အင်းကြီး-ကျုံဒိုးလမ်းကြောင်း၊ မိကလုံ-နောင်တမံ-တာဝါလဲ-နွားခြံကုန်း-ကျုံဒိုးလမ်းကြောင်း၊ တောင်ကြာအင်း-မြောက်ကြာအင်း-ကိုးတိုင်-ငါးတိုင်-လေးတိုင်လမ်းကြောင်း၊ စက္ကဝက်-အောင်လှိုင်-တမိုင်ကုန်း-ကော့ကရိတ် လမ်းကြောင်းများဖြင့် ထပ်မံဝင်ရောက်လာပြီး ကျုံဒိုး-ကော့ကရိတ်-မြဝတီ အာရှလမ်းမကြီးအား ပိတ်ဆို့ပြီး ကျုံဒိုးမြို့နှင့် ကော့ကရိတ်မြို့တို့အား အပြင်းအထန်တိုက်ခိုက်လာခဲ့သည်။ ထိုသို့ ပိတ်ဆို့တိုက်ခိုက်မှုများကြောင့် ဒေသတွင်းကုန်စည်စီးဆင်းမှု ရပ်တန့်သွားခဲ့ပြီး အဆိုပါဒေသရှိ ဒေသခံတိုင်းရင်းသား ပြည်သူများသည် ကုန်ဈေးနှုန်းကြီးမြင့်မှုများကို ရင်ဆိုင်ကြုံတွေ့ခဲ့ရကာ နေထိုင်စားသောက်ရေးတို့တွင်များစွာ အခက်အခဲဖြစ်ပေါ်ခဲ့ကာ လူမှုစီးပွားဘဝ ဖွံ့ဖြိုးတိုးတက်မှုများ နိမ့်ကျခဲ့ရကြောင်း သိရှိရသည်။

ထိုသို့ KNU ၊ KNLA နှင့် PDF အကြမ်းဖက်ပူးပေါင်းအဖွဲ့များ နှောင့်ယှက်ပိတ်ဆို့ထားသည့် လမ်းကြောင်းများအား ပြန်လည်ဖွင့်လှစ်နိုင်ရေးနှင့် မော်တော်ယာဉ်များ ပုံမှန်အတိုင်း ပြန်လည်ပြေးဆွဲ သွားလာနိုင်ရေးအတွက် ၂၀၂၅ ခုနှစ်၊ ဧပြီလ ၁၃ ရက်မှစ၍ တပ်မတော်စစ်ကြောင်းများက တပ်မတော်၏ အစဉ်အလာကောင်းများနှင့်အညီ လှေခွက်ချည်းကျန် အလံမလဲသည့် စိတ်ဓာတ်၊ တုံးတိုက်တိုက်ကျားကိုက်ကိုက် စိတ်ဓာတ်၊ တစ်ဗိုလ်ကျ တစ်ဗိုလ်တက် စိတ်ဓာတ်တို့ဖြင့် ကျုံဒိုး-ကော့ကရိတ်ကြားတွင် အဖျက်အမှောင့်လုပ်ငန်းများ လုပ်ဆောင်နေသည့် အကြမ်းဖက်သောင်းကျန်းသူများကို ရဲရဲတက်၊ ရဲရဲတိုက်၊ ရဲရဲချေမှုန်းခဲ့ရာ စစ်ဆင်ရေးကာလ ၃ လကျော်အတွင်း အကြမ်းဖက်သောင်းကျန်းသူများနှင့် တိုက်ပွဲ ကြီး ၇ ကြိမ်၊ ထိတွေ့တိုက်ပွဲ ၈၅ ကြိမ် ဖြစ်ပွားခဲ့ပြီး ရန်သူခေါင်းဆောင်ပိုင်းအချို့ ပြင်းထန်စွာဒဏ်ရာရရှိခြင်းအပါအဝင် ရန်သူထံမှ အလောင်း ၁၇ လောင်း၊ လက်နက်မျိုးစုံ ၃၀ လက်နှင့် ဆက်စပ်ပစ္စည်းများအား သိမ်းပိုက်ရရှိခဲ့ပြီး တပ်မတော်သားအချို့ ထိခိုက်ကျဆုံးခဲ့ပြီး ယနေ့ဇူလိုင်လ ၂၄ ရက်တွင် ကျုံဒိုး-ကော့ကရိတ်လမ်းကြောင်းတစ်လျှောက်အား ပြန်လည်ထိန်းချုပ် ဖွင့်လှစ်နိုင်ခဲ့ကာ ၎င်းတို့၏ စစ်ရေးရည်မှန်းချက်ကို တပ်မတော်က အပြီးတိုင်ရိုက်ချိုးနိုင်ခဲ့သည်။

အကြမ်းဖက်သောင်းကျန်းသူများအနေဖြင့် ဖရိုဖရဲဖြင့် ဆုတ်ခွာထွက်ပြေးစဉ် ဆောင်ရွက်နေကျ ဖြစ်သည့် အဖျက်အမှောင့်လုပ်ငန်းများအား နည်းလမ်းမျိုးစုံဖြင့် လုပ်ဆောင်ခဲ့ပြီး မော်တော်ယာဉ်များအား မီးရှို့ဖျက်ဆီးခြင်း၊ ကားလမ်းများပေါ်၌ သစ်ပင်သစ်ကိုင်းများဖြင့် ကန့်လန့်ဖြတ် ပိတ်ဆို့ခြင်း၊ ကျုံဒိုးမြို့နှင့် ကော့ကရိတ်မြို့ကြားရှိ ညီညာသာလင်းတံတားနှင့် ၅ တိုင် တံတားအပါအဝင် အခြားလမ်း၊ တံတားများအား မိုင်းခွဲဖျက်ဆီး ခြင်းများ လုပ်ဆောင်ခဲ့ကြောင်း တွေ့ရှိရသည်။

ဆက်လက်၍ တပ်မတော်စစ်ကြောင်းများက အဆိုပါလမ်းမကြီးတစ်လျှောက်တွင် ဒေသခံပြည်သူများ၊ ခရီးသွားပြည်သူများ၊ ကုန်စည်ပို့ဆောင်သည့် မော်တော်ယာဉ်များ၊ ခရီးသွားမော်တော် ယာဉ်များဘေးကင်းစွာဖြင့် ပုံမှန်အတိုင်း ပြန်လည်သွားလာနိုင်ရေး၊ အကြမ်းဖက်သောင်းကျန်းသူများ ဖောက်ခွဲဖျက်ဆီးခဲ့သည့် လမ်း၊ တံတားများအား ပြန်လည်ပြုပြင်ခြင်းလုပ်ငန်းများနှင့် မိုင်းရှင်းလင်းရေးလုပ်ငန်းများ ဆောင်ရွက်လျက်ရှိပြီး မြဝတီမှတစ်ဆင့် အာရှလမ်းမကြီးပုံမှန်ပြန်လည် ဖွင့်လှစ်နိုင်ရေး ကျန်ရှိနေသည့် လမ်းပိုင်းအချို့အား အမြန်ဆုံးဆက်လက်ရှင်းလင်းနိုင်ရေး စီမံဆောင်ရွက်လျက်ရှိကြောင်းသိရပြီး ကျုံဒိုး-ကော့ကရိတ်မြို့များ၏ ဒုတိယအကြိမ် ပြန်လည်ထူထောင်ရေးလုပ်ငန်းများနှင့် ပတ်ဝန်းကျင်ကျေးရွာများအား တရားဥပဒေစိုးမိုးရေး၊ နယ်မြေတည်ငြိမ်ရေးနှင့် နယ်မြေစိုးမိုးရေးလုပ်ငန်းများကိုလည်း တစ်ပြိုင်တည်း ဆက်လက်ဆောင်ရွက်သွားမည်ဖြစ်ကြောင်း သတင်းကောင်းပါးအပ်ပါသည်။

MOI

နှစ်နိုင်ငံ အပြန်အလှန်ပစ်ခတ်တိုက်ခိုက်မှုများ မြင့်တက်နေစဉ် ကာလအတွင်း ဇူလိုင် ၂၄ ရက်တွင် ထိုင်းစစ်တပ်က နှစ်နိုင်ငံနယ်စပ်အနီး Phu Makhueaဒေသရှိ ကမ္ဘောဒီးယား လက်နက်သိုလှောင်ရုံကို အထူးတပ်ဖွဲ့ များနှင့် ဒရုန်းသုံး၍ တိုက်ခိုက်သည့် ဗီဒီယိုကို လူမှုကွန်ရက်ပေါ်တွင် ဖြန်ဝေခဲ့သည်။

ထိုင်းမီဒီယာများက ဒရုန်းအချို့၏ ပျံသန်းမှုသည် လွန်စွာနိမ့်လွန်းပြီး ဒရုန်းတစ်စင်းသည် ကမ္ဘောဒီးယား စစ်တပ်မှု တုံ့ပြန်တိုက်ခိုက်မှုကြောင့် ပျက်ကျသွားခဲ့ကြောင်း ဖော်ပြခဲ့ကြသည်။

အဆိုပါ ဒရုန်းများသည် ထိုင်းနိုင်ငံတွင်ထုတ်လုပ်သော ပြည်တွင်းထုတ် စစ်ဘက်သုံးဒရုန်းများဖြစ်ပြီး မော်တာကျည်ဆန်များ၊ ပြည်တွင်းထုတ် ဗုံးသီးများကို သယ်ဆောင်တိုက်ခိုက်နိုင်စွမ်းရှိသည်ဟု ဆိုသည်။

ဒေသတွင်းနိုင်ငံများနှင့် နိုင်ငံတကာမှ လွန်စွာစိုးရိမ်ကြောင်း ထုတ်ပြန်ခဲ့ ကြပြီး ထိုင်းနှင့် ကမ္ဘောဒီးယား နှစ်နိုင်ငံစလုံးအား ဆွေးနွေး ညှိနှိုင်းခြင်းဖြင့် ပဋိပက္ခကို ဖြေရှင်းကြရန် အလေးအနက်ထား တိုက်တွန်းခဲ့ကြသည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

24 July 2025

လက်နက်ကိုင်အကြမ်းဖက်အဖွဲ့များသည် တိုင်းဒေသကြီးနှင့် ပြည်နယ်များရှိ မြို့၊ ရွာများအတွင်း တိုက်ပွဲများဖော်ဆောင်ခြင်း၊ လက်နက်ကြီးများဖြင့် အဝေးမှပစ်ခတ်ခြင်း၊ Drone ဖြင့် Drop Bomb များ ပစ်ချတိုက်ခိုက်ခြင်း၊ လက်လုပ်ဗုံး၊ လက်လုပ်မိုင်းများဖြင့် မိုင်းထောင်ဖောက်ခွဲ တိုက်ခိုက်ခြင်းများအား လုပ်ဆောင်လျက်ရှိသည့်အပြင် အသက်မပြည့်သေးသူ ကျောင်း သားလူငယ်များအား အကြမ်းဖက်အဖွဲ့ဝင်အဖြစ် စေခိုင်းရန် ဖမ်းဆီးခေါ်ဆောင်ခြင်းများကိုပါ လုပ်ဆောင်လျက်ရှိပါသည်။

ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဇူလိုင် ၂၂ ရက် ညနေ ၆ နာရီ ၃၀ မိနစ်တွင် မကွေးတိုင်းဒေသကြီး၊ မင်းဘူးမြို့နယ်၊ ဘုရားကျေးရွာသို့ PDF အမည်ခံ အကြမ်းဖက်အဖွဲ့ အင်အား (စိစစ်ဆဲ) ရောက်ရှိလာပြီး အဆိုပါကျေးရွာနေ အသက်မပြည့်သေးသူ ကျောင်းသားလူငယ်များဖြစ်ကြသည့် မောင်မင်းနောင်(၁၄)နှစ်၊ မောင်ချစ်မင်းခန့်(၁၄)နှစ်၊ မောင်ကောင်းခန့်ဝေ(၁၃)နှစ်၊ မောင်နေမျိုးသူ(၁၄)နှစ်၊ မောင်ထူးခန့်အောင်(၁၄)နှစ်၊ မောင်ကောင်းခန့်အောင်(၁၅)နှစ်၊ မနွေးယုမွန်(၁၅)နှစ်၊ မောင်သက်ပိုင်ဦး(၁၅)နှစ်၊ မစိုးပြည့်သဇင်(၁၅)နှစ်နှင့် မခင်မြတ်နိုးဟန်(၁၄)နှစ်တို့ ၁၀ ဦးအား အကြမ်းဖက်အဖွဲ့ဝင်အဖြစ် စေခိုင်းရန် ဖမ်းဆီးခေါ်ဆောင်သွားခဲ့ကြောင်း သတင်းအရ လုံခြုံရေးတပ်ဖွဲ့ဝင်များပါဝင်သော ပူးပေါင်းအဖွဲ့က ဖမ်းဆီးခေါ်ဆောင်ခံရသူများအား လိုက်လံရှာဖွေခဲ့ရာ ဇူလိုင် ၂၃ ရက် နံနက် ၁၀ နာရီ ၃၅ မိနစ်တွင် ဘုရားကျေးရွာအနောက်မြောက်ဘက် လေးဖာလုံခန့်အကွာ ဒေသအခေါ် ဘုန်းကြီးတောင်ခြေရှိ မန်းချောင်းဘေး၌ မောင်မင်းနောင်ပါ ၁၀ ဦးတို့အား ပြန်လည်တွေ့ရှိ ကယ်တင်နိုင်ခဲ့ကြောင်း သိရသည်။

ထိုသို့ အသက်မပြည့်သေးသူ ကျောင်းသားလူငယ်များအား အကြမ်းဖက်အဖွဲ့ဝင်အဖြစ် စေခိုင်းရန် ဖမ်းဆီးခေါ်ဆောင်သွားခဲ့သည့် အကြမ်းဖက်သမားများအား ဖော်ထုတ်ဖမ်းဆီး အရေးယူနိုင်ရေး လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။

MOHA

ထိုင်းကျန်းမာရေးဝန်ကြီး Somsak Thepsuthin က ဇူလိုင် ၂၄ ရက် နေ့လယ်ပိုင်းတွင် ကမ္ဘောဒီးယားနှင့် နယ်နိမိတ်ချင်းထိစပ်နေသော ဒေသများတွင် ပဋိပက္ခဖြစ်ပွားမှုကြောင့် အရပ်သား ၁၁ ဦးနှင့် စစ်သားတစ်ဦး အနည်းဆုံး သေဆုံးခဲ့ကြောင်း ပြောကြားခဲ့သည်။ ၎င်းက ကမ္ဘောဒီးယား ဘက်မှ ပစ်ခတ်မှုကြောင့် နယ်စပ်အနီးရှိ ဆေးရုံတစ်ခုလည်း ထိမှန်ခဲ့ကြောင်း ဖြည့်စွက်ပြောဆိုခဲ့သည်။

ထိုင်းနိုင်ငံ Surin နယ်စပ်ရှိ Kap Choeng ခရိုင်အုပ်ချုပ်ရေးမှူး Sutthiroj Charoenthanasak က BM-21 ဒုံးကျည်နှစ်စင်းသည် ဇူလိုင် ၂၄ ရက် နံနက် ၉:၄၀ တွင် Ban Jorok ကျေးရွာအတွင်းသို့ ကျရောက် ပေါက်ကွဲခဲ့ကြောင်း၊ ထိုအချိန်တွင် ကျေးရွာသားများသည် ရွှေ့ပြောင်းရန် ပြင်ဆင် နေချိန်ဖြစ်ကြောင်း ပြောကြားခဲ့သည်။ ထိုဒုံးကျည်ကျရောက် ပေါက်ကွဲ မှုကြောင့် လူကြီးတစ်ဦးနှင့် အသက် ၁၂ နှစ်အရွယ် ကလေးတစ်ဦး သေဆုံး ခဲ့ပြီး နှစ်ဦး ဒဏ်ရာရရှိခဲ့သည်။

Sutthiroj က ထိုင်း-ကမ္ဘောဒီးယား စစ်တပ်များအကြား Ta Moan Thom Temple အနီးတွင် ဖြစ်ပွားခဲ့သော ပဋိပက္ခများကြောင့် ခရိုင်အာဏာပိုင်များက နယ်စပ်အနီးရှိ ကျေးရွာ ၈၆ ရွာမှ ကျေးရွာသား ၄၀,၀၀၀ ခန့်ကို ရွှေ့ပြောင်းပေးခဲ့ရကြောင်း ပြောကြားခဲ့သည်။ ထိုကျေးရွာသားများကို အနီးရှိ ပရာဆတ်ခရိုင် (Prasat District) ရှိ ကျောင်းများသို့ ပို့ဆောင် ပေးခဲ့သည်။

ဇူလိုင် ၂၄ ရက်တွင် ကမ္ဘောဒီးယား၏ Khmer Times သတင်းဌာနက ဖော်ပြခဲ့သော ဗီဒီယိုတွင် နယ်စပ်တိုက်ပွဲများ စတင်ပြီးနောက် ကမ္ဘောဒီးယား တပ်မတော်၏ ဒုံးပစ်လက်နက်များမှ ထိုင်းနိုင်ငံဘက်သို့ ဒုံးကျည်များ အဆက်မပြတ် ပစ်လွှတ်နေပုံကို မြေပြင်နှင့် လမ်းပေါ်မှ ရိုက်ကူး ထားသည့် ရုပ်သံများပါရှိသည်။ သို့သော် အဆိုပါဗီဒီယိုတွင် ကမ္ဘောဒီးယား တပ်မတော်က မည်သည့်ဒုံးပစ်လက်နက်အမျိုးအစားကို အသုံးပြုခဲ့သည် ကို ရှင်းရှင်းလင်းလင်း မသိရပေ။ ကမ္ဘောဒီးယား တပ်မတော်တွင် BM-21 Grad, PHL-81, PHL-90B နှင့် RM-70 အပါအဝင် ၁၂၂ မီလီမီတာ ဒုံးပစ် လက်နက်များ၊ ထို့အပြင် ၃၀၀ မီလီမီတာ ဒုံးကျည်များ ပစ်လွှတ်နိုင်သော PHL-03 လက်နက်များနှင့် အခြားဒုံးပစ်စနစ်ဟောင်းများလည်း ရှိသည်။

ထိုင်းစစ်တပ်က F-16 တိုက်လေယာဉ်များ စေလွှတ်ကာ နယ်စပ်အနီးရှိ ကမ္ဘောဒီးယား တပ်များကို တိုက်ခိုက်ခဲ့ကြောင်း ကြေညာခဲ့သည်။ ကမ္ဘောဒီးယား ကာကွယ်ရေးဝန်ကြီးဌာနက ထိုင်းတိုက်လေယာဉ်များက Phnom Penh ထိန်းချုပ်ရာဒေသရှိ Wat Kaew Sikkhakirivoraram လမ်းအနီးတွင် ဗုံးနှစ်လုံးဖြင့်တိုက်ခိုက်ခဲ့ကြောင်း အတည်ပြုခဲ့သော်လည်း အဆောက်အဦပျက်စီးမှု ရှိ၊ မရှိ ဖော်ပြခဲ့ခြင်း မရှိပါ။

ကမ္ဘောဒီးယား ကာကွယ်ရေးဝန်ကြီးဌာနက "ထိုင်းနိုင်ငံက စစ်သား အမြောက်အမြားနှင့် စစ်လက်နက်ကြီးများချထားကာ ကမ္ဘောဒီးယားနယ်မြေကို အင်အားသုံး သိမ်းပိုက်ရန် ကြိုးပမ်းနေခြင်း" ဖြစ်သည်ဟု စွပ်စွဲခဲ့ပြီး "ကုလသမဂ္ဂ ပဋိညာဉ်၊ ASEAN ၏ စံနှုန်းများနှင့် အပြည်ပြည် ဆိုင်ရာဥပဒေအခြေခံမူများကို ထင်ရှားစွာ ချိုးဖောက်ခြင်း" ဟု ပြင်းထန်စွာ ရှုတ်ချခဲ့သည်။ 

ကမ္ဘောဒီးယားဘက်က အငြင်းပွားနယ်စပ်တွင် မြေမြှုပ်မိုင်းများထောင်ခဲ့ပြီး မေလက တိုက်ပွဲတစ်ခုတွင် ထိုင်းစစ်သား တစ်ဦး ဒဏ်ရာရခဲ့ကြောင်း ထိုင်းဘက်က စွပ်စွဲခဲ့သည်။ 

ထိုင်းနိုင်ငံက ကမ္ဘောဒီးယား သံအမတ်ကြီးအား နှင်ထုတ်ခဲ့ပြီး မိမိဘက်မှ သံအမတ်ကို ပြန်ခေါ်ကာ နှစ်နိုင်ငံဆက်ဆံရေး အဆင့်လျှော့ချခဲ့သည်။ ကမ္ဘောဒီးယားကလည်း ဇူလိုင် ၂၄ ရက်တွင် ထိုင်းနှင့် သံတမန်ဆက်ဆံရေးကို "အနိမ့်ဆုံးအဆင့်" သို့ လျှော့ချပြီး ဘန်ကောက်ရှိ သံရုံးဝန်ထမ်းများ ပြန်ခေါ်မည်ဟု ကြေညာခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

နေပြည်တော် ဇူလိုင် ၂၃

မန္တလေးတိုင်းဒေသကြီး၊ သပိတ်ကျင်းခရိုင်၊ သပိတ်ကျင်းမြို့နယ်အတွင်းရှိ သပိတ်ကျင်းမြို့သည် မန္တလေးတိုင်းဒေသကြီး၏ မြောက်ဘက်အကျဆုံးမြို့နယ်ဖြစ်သည်။ ကချင်ပြည်နယ်၊ စစ်ကိုင်းတိုင်းဒေသကြီးနှင့် ရှမ်းပြည်နယ် (မြောက်ပိုင်း) တို့ရှိ မြို့များနှင့် နယ်နိမိတ်ချင်းထိစပ်နေပြီး ဧရာဝတီမြစ်၏ အရှေ့ဘက်ကမ်းပေါ်၌ရှိသော သင်္ဘောဆိပ်မြို့လည်းဖြစ်သည်။ သပိတ်ကျင်းမြို့သည် မန္တလေးမြို့နှင့် ရေကြောင်းအားဖြင့် ၇၇ မိုင်ခန့်သာဝေးကွာပြီး မန္တလေး၊ ဗန်းမော်၊ မြစ်ကြီးနား အစုန် - အဆန်သွားလာနေသည့် ပြည်တွင်းရေကြောင်းပို့ဆောင်ရေးအဖွဲ့မှ သင်္ဘောကြီးများနှင့် မန္တလေးနှင့် သပိတ်ကျင်း အစုန် - အဆန်သွားလာနေသည့် ကူးတို့သင်္ဘောငယ်များလည်းရှိသဖြင့် ရေကြောင်းသွားလာရေးနှင့် ကုန်သွယ်မှုကောင်းမွန်သည့် မြို့တစ်မြို့ဖြစ်သည်။ ကုန်းလမ်းကြောင်းအနေဖြင့် မိုးကုတ်မြို့နှင့် မိုင် ၄၀ ခန့်၊ မန္တလေးမြို့နှင့် မိုင် ၆၀ ခန့်ဝေးပြီး ယင်းမှတစ်ဆင့် မိုးမိတ်၊ ဗန်းမော်၊ မြစ်ကြီးနားစသည့် ကချင်ပြည်နယ်ဘက်သို့လည်းကောင်း၊ ကျောက်မဲ၊ သီပေါစသည့် ရှမ်းပြည်နယ် (မြောက်ပိုင်း) သို့လည်းကောင်း၊ မန္တလေးမြို့သို့လည်းကောင်း၊ ဆက်သွယ်သွားလာနိုင်သည့် အချက်အချာကျသည့် မြို့တစ်မြို့ဖြစ်သည်။

ထိုသို့အချက်အချာကျသည့် သပိတ်ကျင်းမြို့အား မိုးမိတ်၊ မိုးကုတ်မြို့နယ်မှတစ်ဆင့် အကြမ်းဖက်အဖွဲ့အစည်းများဖြစ်သည့် TNLA အဖွဲ့နှင့် PDF အမည်ခံ အကြမ်းဖက်သောင်းကျန်းသူ ပူးပေါင်းအဖွဲ့များသည် ၂၀၂၄ ခုနှစ်၊ ဩဂုတ်လ ၁၈ ရက်မှစ၍ သပိတ်ကျင်းမြို့နယ်အတွင်း လုံခြုံရေးဆောင်ရွက်နေသည့် တပ်စခန်းများ၊ တပ်ရင်း/ တပ်ဖွဲ့နှင့် မြို့/ ရွာများအား အင်အားအလုံးအရင်းဖြင့် ဝင်ရောက်တိုက်ခိုက်ခဲ့ပြီး ဒေသခံပြည်သူများ၏ နေအိမ်များအား မီးရှို့ဖျက်ဆီးခြင်း၊ ပြည်သူများ ပိုင်ဆိုင်သည့် ပစ္စည်းများအား အတင်းအဓမ္မလုယက်ယူဆောင်ခြင်းစသည့် အကြမ်းဖက်လုပ်ရပ်များကို လုပ်ဆောင်ခဲ့သဖြင့် ဒေသခံပြည်သူများအနေဖြင့် မိမိတို့၏ တိုက်တာအိုးအိမ်အဆောက်အအုံများ၊ ဥစ္စာပစ္စည်းများကို စွန့်ခွာ၍ ဘေးလွတ်ရာသို့ ထွက်ပြေးတိမ်းရှောင်ခဲ့ရသည်။

ထိုသို့ သာလွန်အင်အားဖြင့် အလစ်အငိုက် လာရောက်တိုက်ခိုက်မှုကြောင့် သပိတ်ကျင်းမြို့နယ်အတွင်း နယ်မြေလုံခြုံရေးဆောင်ရွက်နေသည့် လုံခြုံရေးတပ်ဖွဲ့ဝင်များသည် သပိတ်ကျင်းမြို့အား အကြမ်းဖက်သောင်းကျန်းသူများ၏ လက်တွင်းသို့ မကျဆုံးစေရေးအတွက် မိမိတို့၏အသက်ကို ပဓာနမထားဘဲ ရဲဝံ့စွန့်စားစွာဖြင့် အပြင်းအထန်ခုခံခဲ့သော်လည်း ထိခိုက်ကျဆုံးဒဏ်ရာရရှိမှုများ များပြားလာခြင်းနှင့် ရန်သူမှ အင်အားအဆမတန် များပြားလာခြင်းကြောင့် ကြားခံစစ်အဆင့်ဆင့်ဖြင့် ဆုတ်ခွာခဲ့ပြီး ၇ မိုင်ကျေးရွာအနီးရှိ နယ်မြေခံတပ်ရင်းဌာနချုပ်၌ မဆုတ်တန်းခံစစ်အဖြစ် အကြမ်းဖက်အဖွဲ့များ၏ တိုက်ခိုက်မှုများကို ခံစစ်ဆင်နွှဲ၍ အကြမ်းဖက်လက်နက်ကိုင်အဖွဲ့များ၏ ထိုးစစ်အရှိန်ကို ရပ်တန့်စေခဲ့ပြီး တန်ပြန်တိုက်ခိုက်နိုင်ရေး လိုအပ်သည့် စစ်ရေးပြင်ဆင်မှုဆိုင်ရာ ကိစ္စရပ်များကို လေကြောင်းထောက်ပံ့ပို့ဆောင်ရေးစနစ်ဖြင့် အချိန်ယူဆောင်ရွက်ခဲ့သည်။

ထိုသို့ လိုအပ်သည့် အုပ်ချုပ်ထောက်ပံ့မှုများအား ဖြည့်တင်းဆောင်ရွက်ခဲ့ပြီး လေကြောင်းပစ်ကူအချို့နှင့် ရေကြောင်းပစ်ကူ၊ လက်နက်ကြီးပစ်ကူများ ပူးပေါင်းကာ မြေပြင်/ ဝေဟင်/ ရေပြင် ဟန်ချက်ညီပေါင်းစပ်ပြီး မြေပြင်သတင်းဖော်ထုတ်၍ တပ်မတော်စစ်ကြောင်းများက အကြမ်းဖက်သောင်းကျန်းသူများ ထိန်းချုပ်ထားသည့် သပိတ်ကျင်းမြို့နယ်အတွင်း အကြမ်းဖက်ချေမှုန်းမှုစစ်ဆင်ရေး (Counter - Terrorism Operation) ဖြင့် တပ်ရင်းဌာနချုပ် ပတ်ဝန်းကျင်၌ စတင်၍ နယ်မြေရှင်းလင်းခဲ့ပြီး တန်ပြန်တိုက်စစ်များ တစ်ဆင့်ပြီးတစ်ဆင့် ခြေကုပ်ယူတိုက်ခိုက်ခဲ့ရာ ၂၀၂၅ ခုနှစ်၊ ဇွန်လ ၃၀ ရက်နေ့တွင် အကြမ်းဖက်သောင်းကျန်းသူများ ထိန်းချုပ်ထားသည့် သပိတ်ကျင်းမြို့နယ်အတွင်းရှိ ၆ မိုင်ကျေးရွာအားလည်းကောင်း၊ ဇူလိုင်လ ၅ ရက်နေ့တွင် ၅ မိုင်ကျေးရွာအားလည်းကောင်း၊ ဇူလိုင်လ ၁၇ ရက်နေ့တွင် ၄ မိုင် ကျေးရွာနှင့် အဆိုပါကျေးရွာအနီး တာဝါတိုင်ကုန်းအားလည်းကောင်း အသီးသီးပြန်လည်သိမ်းပိုက်နိုင်ခဲ့ပြီး ဇူလိုင်လ ၂၃ ရက်နေ့ ယနေ့တွင် သပိတ်ကျင်းမြို့အား တပ်မတော်က အလုံးစုံပြန်လည်သိမ်းပိုက်ထိန်းချုပ်နိုင်ခဲ့သည်။

တပ်မတော်စစ်ကြောင်းများက သပိတ်ကျင်းမြို့နှင့် အဆိုပါဒေသတစ်ဝိုက်အား ပြန်လည်သိမ်းပိုက်ရရှိရေး မိမိတို့၏အသက်ကို ပဓာနမထားဘဲ ရင်ကို မြေကတုတ်လုပ်ကာ ရွပ်ရွပ်ချွံချွံတိုက်ခိုက်ချေမှုန်းခဲ့ရာ စစ်ဆင်ရေးကာလ ၁၁ လအတွင်း အကြမ်းဖက်သောင်းကျန်းသူများနှင့် တိုက်ပွဲကြီး ၁၇ ကြိမ်၊ ထိတွေ့မှုပေါင်း ၄၅ ကြိမ် ဖြစ်ပွားခဲ့ပြီး ရန်သူ့ထံမှ အလောင်း ၅၁ လောင်းနှင့် လက်နက်မျိုးစုံ ၁၁၂ လက်နှင့် ဆက်စပ်ပစ္စည်းများ သိမ်းပိုက်ရရှိခဲ့သည်။

TNLA အဖွဲ့နှင့် PDF အမည်ခံအကြမ်းဖက်အဖွဲ့များအနေဖြင့် သပိတ်ကျင်းမြို့နှင့် ၎င်းဒေသအား ယာယီသိမ်းပိုက်ထိန်းချုပ်ထားစဉ် မြို့/ ရွာများအတွင်းရှိ ဘာသာရေးဆိုင်ရာ အဆောက်အအုံများ၊ စာသင်ကျောင်းများ၊ ဌာနဆိုင်ရာ အဆောက်အအုံများ၊ ဆေးရုံများနှင့် လူနေအိမ်များတွင် ဘန်ကာများဆောက်လုပ်ပြီး တပ်မတော်စစ်ကြောင်းများအား ပစ်ခတ်တိုက်ခိုက်ခြင်း၊ ယာယီနေရပ်စွန့်ခွာနေရသူ ဒေသခံပြည်သူများ၏ အိုးအိမ်များကို ခံစစ်တံတိုင်းအဖြစ် အကာအကွယ်ရယူ၍ ပစ်ခတ်တိုက်ခိုက်ခြင်းများကို လုပ်ဆောင်ခဲ့သည့်အပြင် ဒေသခံပြည်သူများ နေအိမ်များနှင့် ဈေးဆိုင်ခန်းများအား ဖောက်ထွင်း၍ တန်ဖိုးကြီးပစ္စည်းမျ စားသောက်ကုန်နှင့် အသုံးအဆောင်ပစ္စည်းများကို အဓမ္မယူဆောင်ခြင်း၊ အများပြည်သူသွားလာလျက်ရှိသည့် လမ်းများအား မိုင်းထောင်ဖောက်ခွဲဖျက်ဆီးခြင်းစသည့် အဖျက်အမှောင့်လုပ်ငန်းများကို လုပ်ဆောင်ခဲ့ကြောင်း တွေ့ရှိရသည်။

တပ်မတော်စစ်ကြောင်းများအနေဖြင့် သပိတ်ကျင်းမြို့အတွင်းသို့ ယာယီနေရပ်စွန့်ခွာနေကြရသည့် ဒေသခံပြည်သူများအား အန္တရာယ်ကင်းရှင်းစွာ ပြန်လည်ဝင်ရောက်နေထိုင်နိုင်ရေး မြို့တွင်းမိုင်းရှင်းလင်းခြင်းလုပ်ငန်းများ စတင်ရှင်းလင်းခြင်းနှင့် မိမိတို့၏ အိုးအိမ်နေရာများသို့ ပြန်လည်နေထိုင်လိုပြီး ရိုးသားစွာ မိမိတို့၏ လူမှုစီးပွားဘဝ လုပ်ကိုင်စားသောက်လိုသည့် ယာယီနေရပ်စွန့်ခွာ ပြည်သူများအနေဖြင့်လည်း သက်ဆိုင်ရာ လုံခြုံရေးအဖွဲ့များထံ စနစ်တကျသတင်းပို့၍ နေထိုင်နိုင်ရေး သက်ဆိုင်ရာမှ နှိုးဆော်ထားကြောင်း၊ သက်ဆိုင်ရာတိုင်းဒေသကြီး အစိုးရအဖွဲ့မှလည်း ဌာနဆိုင်ရာဝန်ထမ်းများဖြင့် အစိုးရအုပ်ချုပ်မှုယန္တရားများ၊ စာသင်ကျောင်းများ၊ ဆေးရုံများ အမြန်ဆုံးလည်ပတ်နိုင်ရေး စီမံဆောင်ရွက်လျက်ရှိကြောင်း၊ အောင်ပွဲရ တိုက်ပွဲဝင် မြန်မာ့တပ်မတော်သားများအား ဂုဏ်ယူစွာဖြင့် ရရှိသတင်းများကို ဖော်ပြအပ်ပါသည်။

MOI

ထိုင်းနှင့် ကမ္ဘောဒီးယားတို့မှ တပ်ဖွဲ့ဝင်များသည် ဇူလိုင် ၂၄ ရက် (ကြာသပတေးနေ့) အစောပိုင်းတွင် အငြင်းပွားနေသည့် နယ်မြေတွင် အပြန်အလှန် ပစ်ခတ်ခဲ့ကြောင်း နှစ်ဖက်စလုံးက ပြောကြားထား ပါသည်။

မကြာသေးမီ ရက်သတ္တပတ်များအတွင်း တင်းမာမှုများ မြင့်တက်လာသည့် ခမာဗိမာန် (Ta Muen Thom) အနီးတွင် ကမ္ဘောဒီးယားစစ်သားများက ပစ်ခတ်ခဲ့ကြောင်း ထိုင်းစစ်တပ်က ပြောကြားထားသကဲ့သို့ ကမ္ဘောဒီးယား ကာကွယ်ရေး ဝန်ကြီးဌာနကလည်း ထိုင်းစစ်တပ်များ စတင် ပစ်ခတ် သည့်အတွက် မိမိတို့ဘက်က ခုခံကာကွယ်သည့်အနေဖြင့် ပြန်လည် ပစ်ခတ်ခဲ့ကြောင်း ဆိုထားပါသည်။ ကမ္ဘောဒီးယားသည် လက်နက်ကြီး များ ကိုင်ဆောင်ထားသည့် တပ်ဖွဲ့ဝင်များကို ဖြန့်ကြက်ကာ ကင်းထောက် ဒရုန်းတစ်စင်း စေလွှတ်ခဲ့ကြောင်း ထိုင်းစစ်တပ်က ပြောကြားထား ပါသည်။ 

ကမ္ဘောဒီးယား ကာကွယ်ရေးဝန်ကြီးဌာန ပြောရေးဆိုခွင့်ရှိသူက ထိုင်း တပ်များသည် မိမိတို့၏ အချုပ်အခြာအာဏာနှင့် နယ်မြေဂုဏ်သိက္ခာကို ကာကွယ်ရန် လုပ်ဆောင်ရခြင်းဖြစ်ကြောင်း ဆိုထားပါသည်။ 

နှစ်နိုင်ငံ နယ်နိမိတ်တစ်နေရာတွင်  ထိုင်းစစ်သားတစ်ဦး ဒဏ်ရာရရှိ ခဲ့သည့် မြေမြှုပ်မိုင်း ပေါက်ကွဲမှုကြောင့် ထိုင်းက ကမ္ဘောဒီးယား သံအမတ်ကြီး ကို ပြန်ခေါ်ပြီး နာရီပိုင်းအကြာ ကြာသပတေးနေ့(ဇူလိုင် ၂၃) နံနက်ပိုင်း တွင် တိုက်ပွဲ ဖြစ်ပွားခဲ့ခြင်း ဖြစ်ပါသည်။ ကမ္ဘောဒီးယား သံအမတ်ကြီးကို နှင်ထုတ်မည်ဟု ဗုဒ္ဓဟူးနေ့ (ဇူလိုင် ၂၂)တွင် ထိုင်းနိုင်ငံဘက်က  ပြောကြားခဲ့ပါသည်။ ကမ္ဘောဒီးယား စစ်သားတစ်ဦး သေဆုံးပြီး မေလ အတွင်းက လက်နက်ကိုင်ပဋိပက္ခများ ဖြစ်ပွားခဲ့ပါသည်။ ယခုကာလတွင် ထိုင်းနှင့် ကမ္ဘောဒီးယားတို့၏ ဆက်ဆံရေးမှာ ဆယ်စုနှစ်တစ်ခုကျော် အတွင်း အဆိုးရွားဆုံးဖြစ်နေပြီး လွန်ခဲ့သည့်  နှစ်လကတည်းက  နှစ်နိုင်ငံ စလုံးသည် နယ်စပ်တွင် စစ်တပ်များ အခိုင်အမာ ချထားကာ စောင့်ကြည့် နေကြပါသည်။

ကိုးကား - BBC

Photo: Al Jazeera

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

နေပြည်တော် ဇူလိုင် ၂၃

လုံခြုံရေးတပ်ဖွဲ့ဝင်များ ပါဝင်သော ပူးပေါင်းအဖွဲ့သည် ဇူလိုင်လ ၁၁ ရက်နေ့ နံနက် ၈ နာရီခွဲအချိန် လယ်ဝေးမြို့နယ်၊ သစ်ကြိမ်းကျေးရွာအုပ်စု၊ ကြာကန်ကျေးရွာအနီးတွင် အောင်နန်းချိုကျေးရွာဘက်မှ တောင်စဉ်အေးရွာဘက်သို့ စောနေပိုင် (ခ) နေပိုင် မောင်းနှင်လာသော LAND CRUSIER မော်တော်ယာဉ်နှင့် ရှေ့နောက်လိုက်ပါလာသည့် ချစ်နိုင်ထွေး (ခ) မိုးဒီ မောင်းနှင်လာသော ALPHARD မော်တော်ယာဉ်တို့အား စစ်ဆေးရှာဖွေရာ အဆိုပါယာဉ် ၂ စီးပေါ်မှ ဘိန်းဖြူ ၆၇ ဒသမ ၃၃ ကီလို (၎င်းဒေသတန်ဖိုးငွေကျပ် ၁ ဒသမ ၆၈၃၂၅ ဘီလီယံ) ဖမ်းဆီးရမိခဲ့ကြောင်း၊ ကွင်းဆက်ဖော်ထုတ်ချက်အရ အဆိုပါဘိန်းဖြူများအား လက်ခံ၍ မန္တလေးသို့ တာဝန်ခံသယ်ဆောင်သူ သိန်းမြင့် (ခ) သိန်းဟန်သည် တာချီလိတ်ဘက်သို့ တိမ်းရှောင်သွားကြောင်း သိရှိရသဖြင့် ဖော်ထုတ်ဖမ်းဆီးရမိရေး ဆောင်ရွက်ခဲ့ရာ ဇူလိုင်လ ၁၂ ရက်နေ့ နံနက် ၇ နာရီခွဲအချိန်တွင် တာချီလိတ်မြို့၊ ဝမ်ကောင်းရပ်ကွက်၊ ဗိုလ်ချုပ်လမ်းတွင် ဖမ်းဆီးရမိခဲ့ကြောင်း၊ ပူးပေါင်းအဖွဲ့ဖြင့် စစ်ဆေးချက်များအရ ဖမ်းဆီးရမိဘိန်းဖြူများအား လွိုင်ကော်မြို့နေ ခွန်နေလင်းအောင် (ခ) အားသိုက် (ခ) ယောဟန်၏ စေခိုင်းချက်အရ ရှမ်းပြည်နယ် (တောင်ပိုင်း)၊ ဖယ်ခုံမြို့မှ လယ်ဝေးမြို့နယ်၊ အောင်နန်းချိုကျေးရွာအနီးသို့ လွိုင်ကော်မြို့နေ သူရိန်စိုး (ခ) ဖိုးသာထူး (ခ)ဖိုးလုံးမှ လာရောက်ပို့ဆောင်ခဲ့သဖြင့် ရေနီမြို့နေ စောနေပိုင် (ခ) နေပိုင်နှင့် ပျဉ်းမနားမြို့နယ်နေ ချစ်နိုင်ထွေး (ခ) မိုးဒီတို့မှ လက်ခံ၍ပု ဗ္ဗသီရိမြို့နယ်နေ သိန်းမြင့် (ခ) သိန်းဟန်ထံသို့ လွှဲပြောင်း ပေးခဲ့သဖြင့် ၎င်းမှ ရန်ကုန်နှင့် မန္တလေးမြို့သို့ အကြိမ်ကြိမ်သယ်ဆောင်ခဲ့ခြင်းဖြစ်ကြောင်း သိရှိရ၍ ၎င်းတို့အား မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်ဖော်ထုတ်လျက်ရှိကြောင်းနှင့် ၎င်းတို့၏ မူးယစ်ဆေးဝါးသယ်ဆောင်ရောင်းဝယ်ရာမှ ရရှိသည့် ငွေကြေးအကျိုးအမြတ်များ၊ ပိုင်ဆိုင်မှုများကို ပြည်သူ့ဘဏ္ဍာအဖြစ် သိမ်းဆည်းနိုင်ရေးအတွက် ငွေကြေးခဝါချမှုတိုက်ဖျက်ရေးဥပဒေဖြင့် ထပ်မံအရေးယူနိုင်ရေး ဆောင်ရွက်လျက်ရှိကြောင်း မြန်မာနိုင်ငံရဲတပ်ဖွဲ့မှ သတင်းရရှိသည်။

MOI

ဟက်ကာများသည်   ကမ္ဘာကျော် Microsoft ကုမ္ပဏီ၏  အရေးပါသည့် လုံခြုံရေး Share Point Software ၏ အားနည်းချက်ကိုအသုံးချ၍   ကမ္ဘာတစ်ဝန်းတွင် ဆိုက်ဘာတိုက်ခိုက်မှုများ လုပ်ဆောင်လျက်ရှိကြောင်း Washington Post သတင်းစာကြီးက ဇူလိုင်လ၂၁ ရက်တွင် ဖော်ပြသည်။

ဆိုက်ဘာတိုက်ခိုက်မှုများသည် ပြီးခဲ့သည့်ရက်ပိုင်းအတွင်းက ဖြစ်ပွားခြင်းဖြစ်ပြီး ဟက်ကာများသည် Share  Point Software ၏ အားနည်းချက်ကို အခွင့်ကောင်းယူ၍ အစိုးရအဖွဲ့များနှင့်   တစ်ကမ္ဘာလုံးရှိ စီးပွားရေး လုပ်ငန်းများက အသုံးပြုနေသည့် အချက်အလက်ဝေမျှရေးစနစ်အတွင်းသို့ ထိုးဖောက် တိုက်ခိုက်ခြင်းဖြစ်ကြောင်း    အစိုးရအဖွဲ့မှတာဝန်ရှိသူများ၊ ပုဂ္ဂလိကအဖွဲ့အစည်းများနှင့်      သုတေသီများ၏ ပြောကြားချက်ကိုကိုးကား၍ သတင်းစာကဖော်ပြခြင်း ဖြစ်သည်။

ဟက်ကာများသည်    အထူးသဖြင့် အမေရိကန် ပြည်ထောင်စု၊ ဘရာဇီး၊ ဥရောပသမဂ္ဂအဖွဲ့၊  တရုတ်နိုင်ငံ အတွင်းရှိ အဖွဲ့အစည်းများကို    အဓိကထားတိုက်ခိုက်ခြင်းဖြစ်သည်။ အဆိုပါဆိုက်ဘာတိုက်ခိုက်မှုသည်   မည်သည့်နိုင်ငံ၊  မည်သည့်အဖွဲ့အစည်း၏ လက်ချက်ဖြစ်သည်ကို လက်ရှိတွင် မသိရသေးသော်လည်း Microsoft ကုမ္ပဏီအနေဖြင့် လောလောဆယ်တွင် ဆိုက်ဘာတိုက်ခိုက်မှု၏ အကျိုးသက်ရောက်မှုကို ထိန်းချုပ်နိုင်ရေးအတွက် အမေရိကန်အမိမြေလုံခြုံရေးဝန်ကြီးဌာန၊  ကာကွယ်ရေးဝန်ကြီးဌာနတို့ ပူးပေါင်းဆောင်ရွက်လျက်ရှိသည်။

ဆိုက်ဘာတိုက်ခိုက်ခံရသည့် အမေရိကန်အဖွဲ့အစည်းများတွင်     နျူကလီးယားလက်နက်ဆိုင်ရာ   အေဂျင်စီအဖွဲ့လည်းပါဝင်သည်။

ထို့ကြောင့်   နိုင်ငံအများအပြားသည် ယခုအခါ အနောက်နိုင်ငံများမှ နည်းပညာဝန်ဆောင်မှု ကုမ္ပဏီများအပေါ် အမှီသဟဲပြုခြင်းအား  တဖြည်းဖြည်းလျှော့ချ၍ ဆိုက်ဘာလုံခြုံရေးဆိုင်ရာ အန္တရာယ်များကို ကာကွယ်နိုင်ရန်အတွက်     ကိုယ့်နည်းကိုယ့်ဟန်ဖြင့် ကြိုးပမ်းလာကြပြီဖြစ်သည်။ ထို့ပြင် တရုတ်နိုင်ငံသည် လာမည့် ၂၀၂၇ ခုနှစ်မှစ၍  ပြည်ပမှထုတ်လုပ်ထားသည့် Hardware နှင့် Software များ၏နေရာတွင် ပြည်တွင်းဖြစ် နည်းပညာများဖြင့် အစားထိုးနိုင်ရန်  ကြိုးပမ်းလျက်ရှိသည်။                                   

Ref: Rt

MWD Web Portal

အမေရိကန်ပြည်ထောင်စုသည် အာကာသနယ်ပယ်ဖွံ့ဖြိုးတိုးတက်ရေးနှင့် ဒုံးကျည်ကာကွယ်ရေးစနစ်  ထုတ်လုပ်မှုတို့အတွက် အသုံးစရိတ်အဖြစ် ဒေါ်လာ ၄၉ ဒသမ ၆ ဘီလီယံအထိ တိုးမြှင့်အသုံးပြုခဲ့သည်။

အသုံးစရိတ်တိုးမြှင့်မှုကြောင့်  ပြီးခဲ့သည့်နှစ်ကထက် ၇ ဒသမ ၇ ရာခိုင်နှုန်းမြင့်တက်လာကြောင်း Bloom-berg က ဇူလိုင်လ ၂၂ ရက်တွင်ဖော်ပြသည်။

အမေရိကန်အစိုးရသည် လက်ရှိတွင် အာကာသနယ်ပယ်ကာကွယ်ရေးနှင့် Golden Dome ဒုံးကျည် ကာကွယ်ရေးစနစ် ထုတ်လုပ်ရေးကို အကောင်အထည်ဖော်ဆောင်နိုင်ရန် ကြိုးပမ်းနေခြင်းကြောင့် အသုံးစရိတ်မှာ ဆက်လက်မြင့်တက်လာဖွယ်ရှိသည်။

ထို့ပြင် အမေရိကန်အစိုးရအနေဖြင့် အခြားနိုင်ငံများမှ ပြုလုပ်လာနိုင်ဖွယ်ရှိသည့်တိုက်ခိုက်မှုများကို ကာကွယ်ပေးနိုင်မည့် အာကာသလက်နက်များထုတ်လုပ်ရန်အတွက် ၂၀၂၆ ခုနှစ်တွင် ဒေါ်လာ ၁၆ ဘီလီယံနှင့်    နိုင်ငံပိုင်နက်အတွင်းသို့ ပြိုင်ဘက်နိုင်ငံများ၏ဒရုန်းများ၊ ဒုံးကျည်များနှင့်   အသံထက်မြန် သည့်ယာဉ်များ ဝင်ရောက်လာခြင်းကို     ရှာဖွေဖော်ထုတ်နိုင်သည့် ဂြိုဟ်တုအသစ်တစ်စင်း  တည်ဆောက်ရန်အတွက် အနည်းဆုံးဒေါ်လာ ၇ ဒသမ ၂ ဘီလီယံတို့ကို အသုံးပြုမည်ဖြစ်ကြောင်း ဆက်လက်ဖော်ပြထားသည်။

အမေရိကန်ပြည်ထောင်စု၏ အသက်ရှင်ရပ်တည်နိုင်ရေးအတွက် Golden Dome ဒုံးကျည်ကာကွယ်ရေးစနစ်သည် မရှိမဖြစ်လိုအပ်သည်ဟု   အမေရိကန်သမ္မတဒေါ်နယ်ထရမ့်က ယခုနှစ် မေလအတွင်းက ပြောကြားထားပြီး အစိုးရက အဆိုပါအစီအစဉ်အတွက် ဒေါ်လာ ၁၇၅ ဘီလီယံကို လျာထားကြောင်း  Bloomberg    တွင် ဆက်လက်ဖော်ပြထားသည်။

Ref: Iv

MWD Web Portal

24 July 2025

၂၀၂၅ ခုနှစ်၊ ဇူလိုင် ၂၀ ရက် နံနက် ၈ နာရီ ၃၀ မိနစ်တွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် သတင်းအရ ရှမ်းပြည်နယ်၊ မိုင်းဆတ်မြို့နယ်၊ မယ်ပုလုံကျေးရွာအုပ်စု၊ ဂျူးလူကျေးရွာအနီး၌ မိုင်းတွမ်းကျေးရွာဘက်မှ မိုင်းဆတ်မြို့ဘက်သို့ ဆိုင်လူး မောင်းနှင်ပြီး ကျဝေ လိုက်ပါလာသော SHN-12/1S-XXXX ISUZU အမျိုးအစား မော်တော်ယာဉ်အား စစ်ဆေးရှာဖွေခဲ့ရာ ယာဉ်ပေါ်မှ စိတ်ကြွရူးသွပ်ဆေးပြား ၂ သန်း (ဒေသကာလတန်ဖိုး ငွေကျပ် သိန်း ၈,၀၀၀) ဖမ်းဆီးရမိခဲ့ကြောင်း။
ကွင်းဆက်စစ်ဆေးဖော်ထုတ်ချက်အရ ဖမ်းဆီးရမိ စိတ်ကြွရူးသွပ်ဆေးပြားများအား မိုင်းဆတ်မြို့နယ်၊ ဝမ်တုံကျေးရွာမှ မိုင်းတုံမြို့နယ်၊ မဲကင်ကျေးရွာအနီးသို့ သယ်ဆောင်ခြင်းဖြစ် ကြောင်း သိရှိရသဖြင့် ၎င်းတို့အား ဥပဒေအရ အရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်ဖော်ထုတ်လျက်ရှိကြောင်း သတင်းရရှိပါသည်။

MOHA