ဇူလိုင် ၂၇ ရက်နေ့က လန်ဒန်မှ ဂလပ်စဂိုးသို့ ပျံသန်းနေသော EasyJet လေယာဉ်ပေါ်တွင် လူတစ်ဦးက "အမေရိက ပျက်စီးပါစေ"၊ "Trump သေဆုံးပါစေ" စသည်ဖြင့် အော်ဟစ်ခဲ့ပြီး ဗုံးဖောက်ခွဲမည်ဟု ခြိမ်းခြောက်မှု လုပ်ဆောင်ခဲ့သည်။ အမေရိကန်သမ္မတ Donald Trump စကော့တလန် သို့ လာရောက်လည်ပတ်စဉ် ၎င်း၏ Turnberry ရိပ်သာတွင် ဂေါက်သီး ရိုက်ရန် ပြင်ဆင်နေချိန်တွင် ဖြစ်ပွားခဲ့ခြင်းဖြစ်သည်။
မီဒီယာများတွင် ဖော်ပြမှုများအရ ခန္ဓာကိုယ် တောင့်တင်းခိုင်မာသည့် အသက် ၄၁ နှစ်အရွယ် အမျိုးသားတစ်ဦးသည် "အလ္လာဟူအက္ကဘာ" ဟု အော်ဟစ်ကာ ၎င်းတွင် ဗုံးရှိကြောင်း ပြောဆိုခဲ့ပြီး လေယာဉ်အမှုထမ်းများကို ရန်စခဲ့ခြင်းကြောင့် အနီးရှိ ခရီးသည်များက ဝိုင်းဝန်း ထိန်းချုပ်ခဲ့ ကြကြောင်း သိရှိရသည်။
ဂလပ်စဂိုးလေဆိပ်သို့ ဆင်းသက်ချိန်တွင် လုံခြုံရေး တပ်ဖွဲ့ဝင်များက စောင့်ဆိုင်းကာ ထိုပုဂ္ဂိုလ်ကို ဖမ်းဆီးခဲ့ပြီး စကော့တလန် ရဲတပ်ဖွဲ့က ဆက်လက် ထိန်းသိမ်းထားကြောင်းနှင့် ၎င်းသည် ဒုက္ခသည် သက်သေခံ အထောက်အထားများ ကိုင်ဆောင်ထားသည်ဟု အတည်ပြုခဲ့သည်။
ဖြစ်စဉ်နှင့်ပတ်သက်၍ စစ်ဆေးချက်များအရ လေယာဉ်ပေါ်တွင် ပေါက်ကွဲ စေနိုင်သော ပစ္စည်းများ မတွေ့ရှိရကြောင်းနှင့် အခြားသူများ ပါဝင် ပတ်သက်မှု မရှိကြောင်း လုံခြုံရေးတာဝန်ရှိသူများက ထုတ်ပြန်ခဲ့သည်။
ဗြိတိန်တွင် ရွှေ့ပြောင်းနေထိုင်မှုနှင့် ဆက်စပ်နေသော လုံခြုံရေး ခြိမ်းခြောက်မှု များအပေါ် စိုးရိမ်မှုများ တိုးပွားလာနေပြီး အစိုးရ၏ စာရင်းဇယားများ အရ ၂၀၂၄ ခုနှစ် မတ်လကုန်အထိ အင်္ဂလန်နှင့် ဝေလတွင် ဓားကိုင် ခြိမ်းခြောက်/ တိုက်ခိုက်မှုဆိုင်ရာ မှုခင်း ၅၀,၅၀၀ ကျော်ရှိခဲ့ကြောင်း သိရှိ ရသည်။ ဒုက္ခသည်စခန်းများတွင် ပိုမိုတင်းကျပ်သော ထိန်းချုပ်မှုများ လိုအပ်ကြောင်းနှင့် ရွှေ့ပြောင်းနေထိုင်သူ မှုခင်းကျူးလွန်သူများနှင့်ပတ်သက်၍ ပိုမိုပြတ်သားစွာလုပ်ဆောင်ရန် ဆန္ဒပြမှုများလည်း ရှိခဲ့သည်။
ယခုလအစောပိုင်းတွင် 'Great British National Protest' ဒိုဗာမြို့ ဆန္ဒ ပြပွဲအတွင်း လူထုက နယ်စပ်ထိန်းချုပ်ရေး ပိုမိုတင်းကျပ်ရန် တောင်းဆို ခဲ့သည်။ လွန်ခဲ့သော ခြောက်နှစ်အတွင်း အီရန်၊ အာဖဂန်နစ္စတန်၊ အီရတ်၊ အယ်လ်ဘေးနီးယား၊ ဆီးရီးယားနှင့် အီရီထရီးယားမှ ရွှေ့ပြောင်း နေထိုင် သူများသည် ရေလက်ကြားကို လှေငယ်များဖြင့် ဖြတ်ကျော်ကာ တရား မဝင် ဝင်ရောက်လာသူများ၏ ၇၀% ရှိသည်ဟု စာရင်းများအရ သိရှိ ရသည်။
ကိုးကား- RT
ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂
