လက်နက်ကိုင်အကြမ်းဖက်သမားများသည် အပြစ်မဲ့ အရပ်သားပြည်သူများ နေထိုင်ရာ မြို့၊ ရပ်ကွက်၊ ကျေးရွာများအတွင်း၌ တိုက်ပွဲများဖော်ဆောင်ခြင်း၊ လက်နက်ကြီး၊ ရှော့တိုက်ဒုံး၊ Drop Bomb များဖြင့် ပစ်ခတ်တိုက်ခိုက်ခြင်းများအား လုပ်ဆောင်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ မတ် ၂၃ ရက် ညနေ ၄ နာရီ ၅၀ မိနစ်တွင် မကွေးတိုင်းဒေသကြီး၊ စလင်းမြို့နယ်ပြည်သူ့ဆေးရုံသို့ ဗုံးသီးပေါက်ကွဲစ ထိမှန်ဒဏ်ရာများဖြင့် အမျိုးသမီး တစ်ဦးနှင့် ကလေးငယ်တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ စလင်းမြို့နယ်၊ မြောင်းလှဦးကျေးရွာနှင့် ပေါက်ဆိမ်ပေါက်ကျေးရွာများသို့ PDF အမည်ခံ အကြမ်းဖက်အဖွဲ့က ရှော့တိုက်ဒုံးများဖြင့် ပစ်ခတ်တိုက်ခိုက်ခဲ့ရာ အဆိုပါကျေးရွာများအတွင်းသို့ ရှော့တိုက်ဒုံးသီးများ ကျရောက်ပေါက်ကွဲခဲ့မှုကြောင့် မြောင်းလှဦးကျေးရွာနေ မောင်ကော့ကန်အခြေခံပညာ အထက်တန်း ကျောင်းခွဲမှ အထက်တန်းပြဆရာမ ဒေါ်ကေခိုင်ဦး(၃၃)နှစ်နှင့် ပေါက်ဆိမ်ပေါက်ကျေးရွာနေ မောင်မင်းသုခ(၄)နှစ်တို့တွင် ဗုံးသီးပေါက်ကွဲစ ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။

ထိုသို့ အပြစ်မဲ့ အရပ်သားပြည်သူများ အေးချမ်းစွာ နေထိုင်လျက်ရှိသော မြို့၊ ရပ်ကွက်၊ ကျေးရွာများအတွင်းသို့ အကြမ်းဖက်သမားများမှ တိုက်ပွဲများဖော်ဆောင်ခြင်းနှင့် လက်နက်ကြီး၊ ရှော့တိုက်ဒုံး၊ Drop Bomb များဖြင့် ပစ်ခတ်တိုက်ခိုက်ခြင်းများ လုပ်ဆောင်မှုကြောင့် နိုင်ငံ့ဝန်ထမ်းများနှင့် ကလေးငယ်များ ထိခိုက်ဒဏ်ရာရရှိခဲ့မှုအပေါ် ဒေသခံပြည်သူများက လုံးဝလက်ခံနိုင်ခြင်းမရှိဘဲ ဆန့်ကျင် ကန့်ကွက်လျက်ရှိကြောင်းနှင့် လုံခြုံရေးတပ်ဖွဲ့ဝင်များက လိုအပ်သော လုံခြုံရေးလုပ်ငန်းများကို ပြည်သူလူထုနှင့် ပူးပေါင်းကာ တိုးမြှင့်လုပ်ဆောင်လျက်ရှိကြောင်း သတင်းရရှိသည်။

Source: www.moha.gov.mm

အစွန်းရောက်အကြမ်းဖက်သမားများသည် အေးချမ်းစွာ နေထိုင်လျက်ရှိသော ပြည်သူများနှင့် တရားဥပဒေစိုးမိုးရေးအတွက် ဝိုင်းဝန်းဆောင်ရွက်နေသော အုပ်ချုပ်ရေးပိုင်းဆိုင်ရာ တာဝန်ရှိသူများအား ထိခိုက်ဒဏ်ရာရရှိစေရန် ရည်ရွယ်ချက်များဖြင့် အကြမ်းဖက်ဖောက်ခွဲရေးလုပ်ရပ်များအား ငွေကြေးထောက်ပံ့ကာ နောက်ကွယ်မှ သွေးထိုးမြှောက်ပင့်လှုံ့ဆော်မှုများဖြင့် အများပြည်သူသွားလာအသုံးပြုသော လမ်းမကြီးများ၊ ရထားလမ်းများ၊ ဌာနဆိုင်ရာ ရုံးအဆောက်အအုံများနှင့် လူနေအိမ်များအား ဖောက်ခွဲရေးပစ္စည်းကိရိယာများ အသုံးပြု၍ မိုင်းထောင်ဖောက်ခွဲခြင်း၊ အဝေးမှ ပစ်ခတ်ဖောက်ခွဲခြင်းများ ပြုလုပ်လျက်ရှိပါသည်။

ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ မတ် ၂၂ ရက်နေ့ နံနက် ၁၀ နာရီ ၂၀ မိနစ်တွင် တနင်္သာရီတိုင်းဒေသကြီး၊ ပုလောမြို့နယ်ရှိ ပလောက်တိုက်နယ်ဆေးရုံ၌ မိုင်းပေါက်ကွဲစ ထိမှန်ဒဏ်ရာများဖြင့် အမျိုးသမီး တစ်ဦး ရောက်ရှိနေကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ ပုလောမြို့နယ်၊ ဆင်ထိုးကြီးကျေးရွာနေ ဒေါ်စန်းရီ(၅၆)နှစ်သည် ၎င်း၏ နေအိမ်မှ ကျေးရွာအရှေ့တောင်ဘက်ရှိ တောအတွင်းသို့ သွားရောက်စဉ် ကျေးရွာအထွက်အရောက် PDF အမည်ခံ အကြမ်းဖက်အဖွဲ့က ထောင်ထားသည့် မိုင်း တစ်လုံးအား နင်းမိပေါက်ကွဲခဲ့မှုကြောင့် ၎င်းတွင် မိုင်းပေါက်ကွဲစ ထိမှန်ဒဏ်ရာများ ရရှိခဲ့ခြင်းဖြစ်ကြောင်း သိရသည်။
အထက်ပါဖြစ်စဉ်မှ အကြမ်းဖက်မှုကျူးလွန်ခဲ့သူများအား ဥပဒေနှင့်အညီ ထိရောက်စွာ အရေးယူနိုင်ရေး လုံခြုံရေးတပ်ဖွဲ့ဝင်များက စုံစမ်းဖော်ထုတ်လျက်ရှိကြောင်း သတင်းရရှိသည်။

Source: www.moha.gov.mm

အစွန်းရောက်အကြမ်းဖက်သမားများသည် နိုင်ငံတော်အတွင်း လမ်းပန်းဆက်သွယ်ရေးများ ပြတ်တောက်စေရန် ရည်ရွယ်၍ အများပြည်သူသွားလာအသုံးပြုသော လမ်းမကြီးများ၊ ရထားလမ်းများ၊ ဌာနဆိုင်ရာ ရုံးအဆောက်အအုံများနှင့် လူနေအိမ်များအား ဖောက်ခွဲရေးပစ္စည်းကိရိယာများ အသုံးပြု၍ မိုင်းထောင်ဖောက်ခွဲခြင်း၊ အဝေးမှ ပစ်ခတ်ဖောက်ခွဲခြင်းများ ပြုလုပ်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ မတ် ၂၂ ရက် မွန်းလွဲ ၁၂ နာရီတွင် တနင်္သာရီတိုင်းဒေသကြီး၊ တနင်္သာရီမြို့နယ်၊ ချောင်းနှစ်ပေါက်ကျေးရွာအနီး ထုံခါ-သဲဖြူ-မောတောင်ကားလမ်းမိုင်တိုင်အမှတ် ၃ မိုင် ၂ ဖာလုံနှင့် ၃ ဖာလုံကြားရှိ တံတားအမှတ်(၁/၄) ချောင်းနှစ်ပေါက်တံတားအား အကြမ်းဖက်အဖွဲ့(စိစစ်ဆဲ)က မိုင်းထောင်ဖောက်ခွဲဖျက်ဆီးသွားခဲ့ကြောင်း သတင်းအရ လုံခြုံရေးတပ်ဖွဲ့ဝင်များက ဖြစ်စဉ်အား စိစစ်ခဲ့ရာ အကြမ်းဖက်သမားများ၏ မိုင်းထောင်ဖောက်ခွဲမှုကြောင့် အဆိုပါနေရာရှိ အလျား ၂၄၀ ပေ၊ အကျယ် ၂၈ ပေ၊ သံကူကွန်ကရစ်အမျိုးအစားတံတားတွင် တံတား၏ ၃ ခန်းမြောက် ဝဲ/ယာလက်ရန်းနှင့် ကြမ်းခင်းများပြိုကျပျက်စီးခဲ့ပြီး မော်တော်ယာဉ်များ ဖြတ်သန်းသွားလာ၍မရကြောင်း သိရသည်။
အထက်ပါဖြစ်စဉ်မှ ပျက်စီးသွားသည့် တံတားအား အမြန်ဆုံးပြန်လည်ပြုပြင်နိုင်ရေး တာဝန်ရှိသူများက ဆောင်ရွက်လျက်ရှိပြီး အများပြည်သူသွားလာအသုံးပြုလျက်ရှိသည့် တံတားအား မိုင်းထောင်ဖောက်ခွဲဖျက်ဆီးသွားခဲ့သည့် အကြမ်းဖက်သမားများအား ဖမ်းဆီးအရေးယူနိုင်ရေး လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိသည်။

Source: www.moha.gov.mm

ဘယ်လာရုစ်နှင့် ရုရှားနိုင်ငံတို့သည် လုံခြုံရေးဆိုင်ရာ သဘောတူညီချက်စာချုပ်ကိုစောင့်ကြည့်ရန် အထူးကိုယ်စားလှယ်များ ခန့်အပ်မည်ဖြစ်ကြောင်း သိရှိရပါသည်။ 

ဘယ်လာရုစ်နှင့် ရုရှားနိုင်ငံတို့သည် (ရုရှား- ဘယ်လာရုစ် ပြည်ထောင်စု နိုင်ငံ) ၏ မူဘောင်အတွင်း လုံခြုံရေးအာမခံချက်များဆိုင်ရာ စာချုပ်အား အကောင်အထည်ဖော်မှုကို စောင့်ကြည့်ရန် အထူးကိုယ်စားလှယ်များ အဖွဲ့အစည်းကို စတင်အကောင်အထည်ဖော်သွားမည်ဖြစ်သည်။ 

ဘယ်လာရုစ် လုံခြုံရေးကောင်စီ၏ အတွင်းရေးမှူး အလက်ဇန်းဒါး ဗိုလ်ဖိုဗစ်က နိုင်ငံခြားရေးဝန်ကြီးဌာနများ၏ စွမ်းဆောင်ရည်ကိုလည်း အသုံးပြုသွားမည်ဟု ဖော်ပြခဲ့ပါသည်။   

ဘယ်လာရုစ် လုံခြုံရေးကောင်စီ၏ အတွင်းရေးမှူး ဗိုလ်ဖိုဗစ်က ဘယ်လာရုစ်-၁ ရုပ်သံလိုင်းတွင် ထုတ်လွှင့်ခဲ့သည့် ၎င်း၏ ပြောကြားချက်တွင် “အဆိုပါစာချုပ်ကို စောင့်ကြည့်ရေးရှုထောင့်မှ ရုရှားဖက်ဒရေးရှင်း နှင့် ဘယ်လာရုစ်သမ္မတနိုင်ငံတို့၏ နိုင်ငံခြားရေးဝန်ကြီးဌာနများ၏စွမ်းဆောင်ရည်များဖြင့် အထူးကိုယ်စားလှယ်များ အဖွဲ့အစည်းကိုအနာဂတ်တွင် စတင်ရန် စီစဉ်ထားပြီး၊ ၎င်းတို့သည် ထိုစာချုပ်၏ပြဋ္ဌာန်းချက်များအား အကောင်အထည်ဖော်မှုကို ခြေရာခံသွားမည် ဖြစ်သည်” ဟု ရှင်းလင်းခဲ့သည်။ 

အဆိုပါအစီအစဉ်သည် ပြည်ထောင်စုနိုင်ငံ၏ လုံခြုံရေးနှင့် စီးပွားရေး ပူးပေါင်းဆောင်ရွက်မှုများကို ပိုမိုထိရောက်စွာ အကောင်အထည်ဖော်နိုင်ရန် ရည်ရွယ်ပြီး၊ နှစ်နိုင်ငံ၏အကျိုးစီးပွားကို သဟဇာတဖြစ်စေမည့် ယန္တရားတစ်ရပ်အဖြစ် ရပ်တည်မည်ဖြစ်ပါသည်။

ကိုးကား - Tass

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

Trump နှင့် ၎င်း၏ကိုယ်စားလှယ်အဖွဲ့သည် ယူကရိန်းစစ်ပွဲကို အဆုံးသတ်ရန် သဘောတူညီချက်တစ်ခုရရှိနိုင်ရေး ကြိုးပမ်းနေသည့် ဆောင်ရွက်မှုများသည် Kyiv ထက် Moscow အတွက် ပိုမို အကျိုးကျေးဇူးရှိစေနိုင်သည်ဟု ဥရောပနိုင်ငံများက လက်ခံယုံကြည်လျက် ရှိကြကာ ဆယ်စုနှစ်များအတွင်း ပထမဆုံးအကြိမ် ၎င်းတို့၏ ကိုယ်ပိုင် စစ်အင်အားကို ခိုင်မာစွာတည်ဆောက်နိုင်ရေး အာရုံစိုက်လာကြသည်။

ဂျာမနီသည် ကာကွယ်ရေးအသုံးစရိတ်မြှင့်တင်ရန် လိုအပ်နေမှုကို အမြန်ဆုံးဖြည့်တင်းနိုင်ရေးအတွက် ပြောင်းလဲမှုများကို အလျင်အမြန် ဆောင်ရွက်လာခဲ့သည်။ Bundeswehr ဟုလူသိများသော ၎င်း၏ လက်နက်ကိုင်တပ်ဖွဲ့များသည် နှစ်ပေါင်းများစွာ အသုံးစရိတ် လျှော့ချခဲ့မှုများအတွက် စစ်ရေးစွမ်းရည်အားနည်းမှု၏ သားကောင်ဖြစ်ခဲ့ရသည်။ သို့သော် ယခုအခါ ထိုအခြေအနေသည် ပြောင်းလဲတော့မည်ဖြစ်ပြီး ဂျာမနီဝန်ကြီးချုပ် Friedrich Merz က ဂျာမနီသည် စစ်အေးတိုက်ပွဲအပြီး နောက်ပိုင်း ၎င်း၏စစ်တပ်ကို ကြီးမားသော ရင်းနှီးမြှုပ်နှံမှုများပြုလုပ်ရန် အချိန်ကောင်းဖြစ်သည်ဟု ဆုံးဖြတ်ခဲ့သည်။

ဂျာမနီသည် ၎င်း၏ဖွဲ့စည်းပုံအခြေခံဥပဒေဆိုင်ရာ ကြွေးမြီကန့်သတ်ချက်ကို အဓိကပြုပြင်ပြောင်းလဲမှုတစ်ခုအဖြစ် ပြဋ္ဌာန်းခဲ့ပြီး ယူရို ဘီလီယံ ချီသော ရန်ပုံငွေများကို ဖြေလျှော့ပေးခဲ့သည်။ ဂျာမနီသည် ကာကွယ်ရေးအသုံးစရိတ်ကို GDP ၏ ၃.၅% ကို သုံးစွဲပါက ၁၀ နှစ်ကာလအတွင်း ယူရို ၆၀၀ ဘီလီယံ (ဒေါ်လာ ၆၅၂ ဘီလီယံ) အထိ ရှိနိုင်သည်ဟု CNN က ဖော်ပြခဲ့သည်။

NATO မဟာမိတ် ၅ နိုင်ငံက ဂျာမနီအလယ်ပိုင်းရှိ ဖော်ပြမထားသော နေရာတစ်ခုတွင် စစ်ရေးလေ့ကျင့်မှုများ လုပ်ဆောင်ခဲ့ပြီး အဆိုပါ လေ့ကျင့်မှုသည် မဟာမိတ်အဖွဲ့၏ အခြားအဖွဲ့ဝင်တစ်ဦးအား “ပြည်ပ ရန်သူ” တစ်ဦး၏ တိုက်ခိုက်မှုကို တုန့်ပြန်သော လေ့ကျင့်ရေးအစီအစဉ်များကို ဆောင်ရွက်ခဲ့ကြခြင်းဖြစ်သည်” ဟု CNN ကဆိုသည်။

စစ်ရေးလေ့ကျင့်မှု အစီအစဉ်အပြီး Hammerstein က CNN ကို “ဂျာမနီ သည် ဥရောပ၏ ဦးဆောင်နိုင်ငံတစ်ခုဖြစ်ပြီး မဟာမိတ်နိုင်ငံများအတွက် အပြည့်အဝရပ်တည်ပေးသွားမည်ဖြစ်သည်” ဟု ပြောကြားခဲ့သည်။

သက်တမ်းကုန်ဆုံးတော့မည့် ဝန်ကြီးချုပ် Olaf Scholz က နိုင်ငံအတွက်ကာကွယ်ရေးနှင့် လုံခြုံရေးမူဝါဒအသစ် လိုအပ်ကြောင်း Bundeswehr အတွက် အထူးဂရုစိုက်မှု လိုအပ်ကြောင်း ပြောကြားခဲ့ကာ Bundeswehr ၏ အသုံးစရိတ်ကို ယူရို ၁၀၀ ဘီလီယံသုံးစွဲရန် သတ်မှတ်ခဲ့ပြီး ထိုသို့ ပြုလုပ်ရန် Scholz က နိုင်ငံ၏ဖွဲ့စည်းပုံအခြေခံဥပဒေကို ပြင်ဆင်ရန် လိုအပ်ကြောင်းကိုလည်း ညွှန်ပြခဲ့သည်။

ကိုးကား-CNN

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်က ယီမင်အခြေစိုက်ဟူသီလက်နက်ကိုင်အဖွဲ့ကို တိုက်ခိုက်မှုများ ဆက်လက်လုပ်ဆောင်နေမှုနှင့်အတူ အရှေ့အလယ်ပိုင်းဒေသ ရေပြင်တွင် ဒုတိယမြောက်လေယာဉ်တင်သင်္ဘောကို ဖြန့်ကြက်ချထားခြင်းအပါအဝင် အမေရိကန်စစ်အင်အား တိုးချဲ့မည့်အစီအစဉ်များကိုအမေရိကန် သမ္မတဒေါ်နယ်ထရမ့်အစိုးရက ပြန်လည်သုံးသပ်လျက် ရှိကြောင်း သိရပါသည်။

လွန်ခဲ့သော သီတင်းပတ်များအတွင်း အမေရိကန်တပ်ဖွဲ့များသည် ယီမင် အခြေစိုက်ဟူသီလက်နက်ကိုင်အဖွဲ့၏ အခြေခံအဆောက်အဦများကို ပစ်မှတ်ထားသည့် တိကျသောလေကြောင်းတိုက်ခိုက်မှုများ လုပ်ဆောင် ခဲ့ကြောင်းလည်း သိရပါသည်။

ထို့အပြင် နေ့စဉ်တိုက်ခိုက်မှုများ ဆက်လက်လုပ်ဆောင်နေမှုနှင့်အတူ အမေရိကန်စစ်ဌာနချုပ် ပင်တဂွန်သည် နောက်ထပ်တပ်ဖွဲ့ဝင်များနှင့် လေကြောင်းရန်ကာကွယ်ရေးစနစ်များ ဖြန့်ကြက်ချထားရန် အစီအစဉ်များကို အပြီးသတ်လုပ်ဆောင်နေသည်ဟု တာဝန်ရှိသူများက ပြောကြားခဲ့ပါသည်။

အဆိုပါအစီအစဉ်များ၏ အဓိကရည်ရွယ်ချက်သည် ဟူသီ လက်နက်ကိုင်အဖွဲ့၏ စစ်ရေးစွမ်းရည်များကို ကျဆင်းစေပြီး ပင်လယ်နီ အတွင်း သွားလာ နေသည့် ကုန်တင်သင်္ဘောများကို တိုက်ခိုက်နေခြင်းကို ဟန့်တားရန်ဖြစ်သည်ဟုလည်း သိရပါသည်။ ထို့အပြင် ကုန်တင်သင်္ဘောများကိုဟူသီလက်နက်ကိုင်အဖွဲ့၏တိုက်ခိုက်မှုများ ရပ်တန့်သွားသည့်အချိန်အထိ ယင်းစစ်ဆင်ရေးများကို ဆက်လက်လုပ်ဆောင်ရန် တာဝန်ရှိသူများက မျှော်လင့်ထားသည်ဟုလည်း သိရပါသည်။

ကိုးကား-NP News

ရုရှားနိုင်ငံက အခြားဥရောပနိုင်ငံများကို တိုက်ခိုက်မည် မဟုတ်သည်မှာ ရာနှုန်းပြည့် သေချာကြောင်း   အမေရိကန်အထူးသံတမန် စတိဝှစ်ကော့က ပြောကြားလိုက်ကြောင်း သိရသည်။

ရုရှားနိုင်ငံက အခြားဥရောပနိုင်ငံများသို့  ကျူးကျော်တိုက်ခိုက်မည် ဟူသော ပြောဆိုချက်များသည် ရယ်ဖွယ်ကောင်းပြီး ယုတ္တိမရှိသော ပြောဆိုမှုများသာဖြစ်ကြောင်း ဝှစ်ကော့က အမေရိကန်သတင်းထောက်တစ်ဦးဖြစ်သူ တပ်ကာ ကာလ်ဆန်နှင့် မတ်လ ၂၁ ရက်တွင်  ပြုလုပ်သည့် တွေ့ဆုံမေးမြန်းခန်း တစ်ခု၌ ပြောကြားခြင်းဖြစ်သည်။

ထို့ပြင် ရုရှားနိုင်ငံသည် ယူကရိန်းနိုင်ငံအား   သိမ်းပိုက်လိုခြင်း မရှိကြောင်း၊ အကြောင်းမှာ ယူကရိန်းအား သိမ်းပိုက်ခြင်းသည် အစ္စရေးက ဂါဇာကမ်းမြောင် ဒေသအား သိမ်းပိုက်ခြင်းကဲ့သို့ ဖြစ်လာမည်ဖြစ်ကြောင်း၊ သို့သော် ယူကရိန်းပဋိပက္ခဖြစ်ပွားစဉ် အတွင်း နေတိုးအဖွဲ့ဝင် ဥရောပနိုင်ငံတချို့က   ရုရှားနိုင်ငံသည် နေတိုးအဖွဲ့ဝင်နိုင်ငံများအား မကြာမီနှစ်များအတွင်း တိုက်ခိုက်ရန် စီစဉ်ထားသည်ဟု ပြောဆိုလျက်ရှိကြောင်း၊ ၎င်းနိုင်ငံများ၏ ပြောဆိုချက်များသည်  ယုတ္တိမရှိသည့်ပြောဆိုမှုများသာဖြစ်ကြောင်း အမေရိကန်သမ္မတ ဒေါ်နယ်ထရမ့်၏ အရှေ့အလယ်ပိုင်းဆိုင်ရာ   အထူးသံတမန် ဝှစ်ကော့က ဆက်လက်ပြောကြားထားသည်။

ထို့အတူ ယူကရိန်းအပစ်အခတ် ရပ်စဲရေး သဘောတူညီချက်ကို မကြာမီချမှတ်နိုင်မည်ဖြစ်ပြီး ထိုသို့ သဘောတူညီချက်ချမှတ်ပြီးသည်နှင့်တစ်ပြိုင်နက် အမေရိကန်အစိုးရက ရုရှားနိုင်ငံအပေါ် ချမှတ်ထားသည့် ပိတ်ဆို့မှုများကို ဖြေလျှော့ပေးနိုင်ဖွယ်ရှိကြောင်း ၎င်းကဆက်လက် ပြောကြားသည်။

ယခုပြုလုပ်သည့် ဝှစ်ကော့၏ တွေ့ဆုံမေးမြန်းခန်းသည် ၎င်းနှင့် ရုရှားသမ္မတ ဗလာဒီမာပူတင်တို့ကြား ယခုလအစောပိုင်းက တွေ့ဆုံဆွေးနွေးမှုများ လုပ်ဆောင်ခဲ့ပြီးနောက် ထွက်ပေါ်လာခြင်းဖြစ်ကြောင်း သိရသည်။  

Source: https://myawady.net.mm/

ထိုင်းနိုင်ငံအပါအဝင် အိမ်နီးချင်းနိုင်ငံအချို့ကို တစ်ဆင့်ခံဖြတ်သန်း၍ မြန်မာနိုင်ငံအတွင်းသို့ နယ်စပ်လမ်းကြောင်းများမှ တရားမဝင် ဝင်ရောက်လာပြီး ကရင်ပြည်နယ်၊ မြဝတီမြို့၊ မယ်ထော်သလေးနယ်မြေမှ အွန်လိုင်းလောင်းကစားမှုများ၊  အွန်လိုင်းလိမ်လည်မှုများအပါအဝင် ဒုစရိုက်မှုများ ကျူးလွန်ခဲ့ကြသည့် ပြည်ပနိုင်ငံသားများကို စစ်ဆေးဖော်ထုတ် ထိန်းသိမ်းလျက်ရှိရာ ၂၀၂၅ ခုနှစ်၊ မတ် ၂၂ ရက်တွင် တရုတ်နိုင်ငံသား ၅၀ ဦး၊ အီသီယိုးပီးယားနိုင်ငံသား ၁၀၀ ဦးနှင့် ကင်ညာနိုင်ငံသား ၂၂ ဦးတို့အား  ထပ်မံထိန်းသိမ်းနိုင်ခဲ့သည်။

ဦးစွာ ကရင်ပြည်နယ်အစိုးရအဖွဲ့၊ လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီး  မင်းသူကျော်နှင့်တာဝန်ရှိသူများသည် မတ် ၂၂ ရက် နံနက်ပိုင်းတွင် သက်ဆိုင်ရာနိုင်ငံများသို့ ပြန်လည်လွှဲပြောင်းပေးမည့် ပြည်ပနိုင်ငံသားများအား ကောင်းမွန်စွာထိန်းသိမ်းထားရှိမှုနှင့် ထပ်မံဖော်ထုတ်ထိန်းသိမ်းနိုင်ခဲ့သည့် ပြည်ပနိုင်ငံသား ၁၇၂ ဦးတို့၏ ကိုယ်ရေးအချက်အလက်များ၊ မှတ်တမ်းများ စာရင်းကောက်ယူနေမှုအခြေအနေတို့ကို လိုက်လံကြည့်ရှုစစ်ဆေးပြီး သက်ဆိုင်ရာဌာနအလိုက် တာဝန်ရှိသူများနှင့် တွေ့ဆုံကာ စာရင်းဇယားအချက်အလက်များ မှန်ကန်ပြည့်စုံစေရေး၊ ထိန်းသိမ်းထားသည့် ပြည်ပနိုင်ငံသားများ၏ နေထိုင်စားသောက်ရေး၊ ကျန်းမာရေး၊ လုံခြုံရေး၊ လွှဲပြောင်းပေးရေးလုပ်ငန်းစဉ်များ နှောင့်နှေးကြန့်ကြာမှုမရှိစေရေးနှင့် အမြန်ဆုံး စနစ်တကျပြန်လည်လွှဲပြောင်းပေးနိုင်ရေး ကိစ္စရပ်များအပေါ် လိုအပ်သည်များကို  ဖြည့်စွက်မှာကြားကာ ပေါင်းစပ်ညှိနှိုင်းမှုများ  ဆောင်ရွက်ပေးသည်။ 
၂၀၂၅ ခုနှစ်၊ ဇန်နဝါရီ ၃၀ ရက်မှ မတ်၂၂ ရက်အထိ မြန်မာနိုင်ငံအတွင်းသို့ တရားမဝင် ဝင်ရောက်လာသည့် ပြည်ပနိုင်ငံသား စုစုပေါင်း ၈,၀၄၂ ဦးအား စစ်ဆေးဖော်ထုတ်ထိန်းသိမ်းနိုင်ခဲ့ကာ ၎င်းတို့အနက်မှ ၅,၁၄၇ ဦးအား ထိုင်းနိုင်ငံမှတစ်ဆင့် သက်ဆိုင်ရာနိုင်ငံများသို့ ဥပဒေလုပ်ထုံးလုပ်နည်းများနှင့်အညီ စနစ်တကျလွှဲပြောင်းပေးခဲ့ပြီး ကျန်ရှိသည့် ပြည်ပနိုင်ငံသား ၂,၈၉၅ ဦးအား သက်ဆိုင်ရာနိုင်ငံများသို့ လွှဲပြောင်းပေးရန် အသင့်ဖြစ်နေပြီဖြစ်ကြောင်းနှင့် ၎င်းတို့ကို ကောင်းမွန်စွာထိန်းသိမ်းစောင့်ရှောက်ထားရှိသည်။  
အဆိုပါ ထိန်းသိမ်းခဲ့သည့် ပြည်ပနိုင်ငံသား ၈,၀၄၂ ဦးသည် တရုတ်၊ အင်ဒိုနီးရှား၊ ဗီယက်နမ်၊ မလေးရှား၊ ပါကစ္စတန်၊ အိန္ဒိယ၊ ယူဂန္ဓာ၊ အီသီယိုးပီးယား၊ နီပေါ၊ ထိုင်း၊ ရဝမ်ဒါ၊ ကင်ညာ၊ ကာဇက်စတန်၊ ကမ္ဘောဒီးယား၊ ဂါနာ၊ ဘင်္ဂလားဒေ့ရှ်၊ ဂျပန်၊ သီရိလင်္ကာ၊ အာဖရိက၊ တူနီးရှား၊ အယ်လ်ဂျီးရီးယား၊ ကွန်ဂို၊ ကင်မရွန်းနှင့် တရုတ်(တိုင်ပေ)တို့မှ နိုင်ငံသားများဖြစ်ကြပြီး အများစုမှာ တရုတ်နိုင်ငံသားများဖြစ်ကြကြောင်း သတင်းရရှိသည်။

တိုင်းဒေသကြီးနှင့် ပြည်နယ်များရှိ မြို့နယ်အချို့တွင် အပြစ်မဲ့ အရပ်သားပြည်သူများအား ပြည်သူလူထုအတွင်း အကြောက်တရားလွှမ်းမိုးစေရန်လည်းကောင်း၊ ၎င်းတို့နှင့် အမြင်အယူအဆမတူသူ အရပ်သားပြည်သူများအား “သူလျှို၊ သတင်းပေး၊ ဒလန်” ဟုစွပ်စွဲ၍လည်းကောင်း၊ “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ လက်နက်ကိုင်အကြမ်းဖက်သမားများက ဓား၊ သေနတ်များအသုံးပြု၍ ရက်စက်စွာ လုပ်ကြံတိုက်ခိုက်၊ သတ်ဖြတ်ခြင်းများ ပြုလုပ်လျက်ရှိပါသည်။
ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ မတ် ၂၂ ရက် ညနေ ၆ နာရီ ၃၀ မိနစ်တွင် မန္တလေးတိုင်းဒေသကြီး၊ ငါန်းဇွန်မြို့နယ်၊ သံကုန်းကျေးရွာ၌ ဓားဖြင့် ထိုးခုတ်ခံရ၍ အမျိုးသား တစ်ဦး သေဆုံးသွားကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါကျေးရွာနေ ဦးညွန့်လှ(၆၀)နှစ်သည် ၎င်း၏နေအိမ်ရှေ့၌ လမ်းလျှောက်နေစဉ် PDF အမည်ခံ အကြမ်းဖက်သမား ၁၀ ဦး(စိစစ်ဆဲ)က ဆိုင်ကယ် ငါးစီးဖြင့် ရောက်ရှိလာပြီး “သတင်းပေး/ဒလန်” ဟု ပြောဆိုစွပ်စွဲ၍ ဓားဖြင့် ထိုးခုတ်သတ်ဖြတ်သွားခဲ့သဖြင့် ၎င်းတွင် ဓားဒဏ်ရာများရရှိကာ သေဆုံးသွားခဲ့ခြင်းဖြစ်ကြောင်း သိရသည်။
ထိုသို့ အပြစ်မဲ့ အရပ်သားပြည်သူများအား “ငါနှင့်မတူ၊ ငါ့ရန်သူ” ဟူသည့် တစ်ဖက်သတ်အစွန်းရောက် ဂိုဏ်းဂဏစွဲအပေါ် အခြေခံကာ အကြောင်းမဲ့ ပစ်ခတ်သတ်ဖြတ်မှု ကျူးလွန်ခဲ့သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း သတင်းရရှိသည်။

Source: www.moha.gov.mm

အစ္စရေး-ဟားမက် စစ်ပွဲစတင်ချိန်မှစ၍ ဂါဇာတွင် ပါလက်စတိုင်းလူမျိုး ၅၀,၀၀၀ ကျော် သေဆုံးခဲ့ကြောင်း ဂါဇာကျန်းမာရေးဝန်ကြီးဌာနက တနင်္ဂနွေနေ့ (မတ် ၂၃) တွင် ပြောကြားခဲ့သည်။ ဤသည်မှာ အစ္စရေးက တိုက်ခိုက်မှုများ ပြန်လည်စတင်ပြီး ရှေ့ဆက်ရမည့်နေ့ရက်များတွင် ပိုမိုခက်ခဲလာမည့် စစ်ပွဲ၏အကျိုးရလဒ်များအပေါ် ဆက်လက် ကြုံတွေ့ ရဦးမည့် ဝမ်းနည်းဖွယ်ရာ အခြေအနေတစ်ခုပင်ဖြစ်သည်။

ဝန်ကြီးဌာနက လွန်ခဲ့သော ၂၄ နာရီအတွင်း လူ ၄၁ ဦး ထပ်မံ သေဆုံး ခဲ့ကြောင်း ထုတ်ပြန်ခဲ့ပြီး သေဆုံးသူအရေအတွက်သည် ၅၀,၀၂၁ ဦး အထိ ရှိလာခဲ့သည်။

ဂါဇာရှိအာဏာပိုင်များသည် သေဆုံးဒဏ်ရာရသူ အရေအတွက်ကို အရပ်သားများနှင့် ဟားမက် အဖွဲ့ဝင်များကို ခွဲခြားဖော်ပြခြင်း မရှိသော်လည်း ကျန်းမာရေးဝန်ကြီးဌာနနှင့် ကုလသမဂ္ဂက သေဆုံးသူအများစုမှာ အမျိုးသမီးများနှင့် ကလေးများဖြစ်ကြောင်း ဆိုသည်။ ထို့အပြင်လူထောင်ပေါင်းများစွာသည် အပျက်အစီးများအောက်တွင် ရှိနေသေးသည် ဟု ခန့်မှန်းရသောကြောင့် အမှန်တကယ်သေဆုံးမှုအရေအတွက်သည် ထိုထက်ပို၍များပြားနိုင်ကြောင်း သတင်းများကဆိုသည်။

ကိုးကား-CNN

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂