နေပြည်တော် ဩဂုတ် ၃

နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် ယနေ့တွင် ဇနီး ဒေါ်ကြူကြူလှ၊ အမျိုးသားကာကွယ်ရေးနှင့်လုံခြုံရေးကောင်စီတွဲဖက်အမှုဆောင်ချုပ် ဗိုလ်ချုပ်ကြီး ရဲဝင်းဦးနှင့် ဇနီး၊ ခရီးစဉ်တွင် လိုက်ပါလာသည့်အဖွဲ့ဝင်များ၊ ပဲခူးတိုင်းဒေသကြီးဝန်ကြီးချုပ်နှင့် တာဝန်ရှိသူများလိုက်ပါ၍ ပဲခူးတိုင်းဒေသကြီး ပဲခူးမြို့ရှိ ရှေးဟောင်းသမိုင်းဝင် တန်ခိုးကြီးဘုရားစေတီများသို့ သွားရောက်ဖူးမြော်ကြည်ညိုသည်။

ဆုတောင်းပြည့် ရွှေမော်ဓော စေတီတော်မြတ်ကြီး

ဦးစွာ နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌနှင့် ဇနီး၊ အဖွဲ့ဝင်များသည် ပဲခူးမြို့ ဆုတောင်းပြည့် ရွှေမော်ဓောစေတီတော်မြတ်ကြီးသို့ ရောက်ရှိဖူးမြော်ကြပြီး မြသပိတ်ဆွမ်းတော်၊ သစ်သီးဆွမ်း၊ ပန်း၊ ရေချမ်း၊ ဆီမီးကပ်လှူပူဇော်သည်။

ယင်းနောက် စေတီတော်မြတ်ကြီး အထက်ပစ္စယံရှိ ဆုတောင်းပြည့်ဘီလူးရန်နိုင် ဘုရားအား ဖူးမြော်ကြည်ညိုပြီး ရွှေသင်္ကန်းကပ်လှူပူဇော်သည်။

ထို့နောက် စေတီတော်မြတ်ကြီးအား လက်ယာရစ်လှည့်လည်ဖူးမြော်ကြည်ညိုကြပြီး တာဝန်ရှိသူများကို စေတီတော်မြတ်ကြီးနှင့် ပရိဝုဏ်တော်အတွင်းရှိ သာသနိကအဆောက်အအုံများ ရေရှည်တည်တံ့ခိုင်မြဲရေး၊ သန့်ရှင်းသပ်ရပ်ပြီး ကြည်ညိုသပ္ပာယ်ဖွယ်ဖြစ်စေရေး စဉ်ဆက်မပြတ် ထိန်းသိမ်းစောင့်ရှောက်သွားရန်လိုကြောင်း၊ ဘုရားဖူးလာ မိဘပြည်သူများ နေပူဒဏ်သက်သာစွာဖြင့် ဘုရားဖူးမြော်ကြည်ညိုနိုင်ရေးအတွက် တပ်မတော်(ကြည်း၊ ရေ၊ လေ)မိသားစုများက စေတီတော်ရင်ပြင်တော်အပြည့် စကျင်ကျောက်ပြားခင်းကျင်း ကပ်လှူလှူဒါန်းပေးသွားမည်ဖြစ်ကြောင်း၊ ထိုသို့ ဆောင်ရွက်ရာတွင်လည်း ရေဝင်ရေထွက်နေရာများ စနစ်တကျပါရှိစေရေး ဆောင်ရွက်သွားရန်လိုကြောင်းနှင့် လုပ်ငန်းဆောင်ရွက်မှုများအား အမြန်ဆုံးပြီးစီးအောင် ကြပ်မတ်ဆောင်ရွက်ပေးသွားရန်လိုကြောင်း မှာကြားခဲ့ပြီး ဘုရားဖူးလာ မိဘပြည်သူများအား ရင်းရင်းနှီးနှီး နှုတ်ဆက်ခဲ့သည်။

ဆက်လက်၍ ရွှေမော်ဓောစေတီတော် သမိုင်းပြတိုက်အတွင်း ခင်းကျင်းပြသထားသည့် ရှေးဟောင်းလက်ရာ ဗုဒ္ဓရုပ်ပွားတော်များ၊ လက်ဝတ်ရတနာများ၊ အသုံးအဆောင်ပစ္စည်းများကိုကြည့်ရှုပြီး စနစ်တကျ ထိန်းသိမ်းကြရန်နှင့် အခြားလိုအပ်သည်များကို မှာကြားသည်။

ယင်းနောက် စေတီတော်မြတ်ကြီးဂေါပကအဖွဲ့ရုံးအတွင်း၌ နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌက စေတီတော်မြတ်ကြီး ဧည့်သည်တော်မှတ်တမ်းစာအုပ်တွင် လက်မှတ်ရေးထိုးပူဇော်သည်။

ထို့နောက် နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌက စေတီတော်မြတ်ကြီးအတွက် ဘက်စုံအလှူငွေများကို ပေးအပ်လှူဒါန်းရာ တာဝန်ရှိသူများက လက်ခံရယူပြီး ဓမ္မလက်ဆောင်များ ပြန်လည်ပေးအပ်သည်။

ရွှေသာလျောင်းရုပ်ပွားတော်မြတ်ကြီး

ဆက်လက်ပြီး နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌနှင့် ဇနီးနှင့်အဖွဲ့ဝင်များသည် “ရှင်ပင်သာလျောင်း” ခေါ် “ရွှေသာလျောင်း” ရုပ်ပွားတော်မြတ်ကြီးအား သွားရောက်ဖူးမြော်ကြည်ညိုပြီး ပန်း၊ ရေချမ်း၊ ဆီမီးများ ကပ်လှူပူဇော်သည်။

ယင်းနောက် ရုပ်ပွားတော်မြတ်ကြီးအား လက်ယာရစ်လှည့်လည်ဖူးမြော်ကြည်ညိုပြီး ရုပ်ပွားတော်မြတ်ကြီး ရေရှည်တည်တံ့ခိုင်မြဲရေးနှင့် သန့်ရှင်းသာယာလှပပြီး လာရောက်ဖူးမြော်သူများ ကြည်ညိုသပ္ပာယ်ဖွယ်ဖြစ်စေရေး လိုအပ်သည့် ပြုပြင်ထိန်းသိမ်းမှုများကို အမြဲမပြတ် ဆောင်ရွက်ရန်လိုအပ်သည်များကို တာဝန်ရှိသူများအားမှာကြားကာ ဘုရားဖူးလာ ပြည်သူများအား ရင်းရင်းနှီးနှီးနှုတ်ဆက်သည်။

ထို့နောက် နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌက ဧည့်သည်တော်မှတ်တမ်းစာအုပ်တွင် လက်မှတ်ရေးထိုးပြီး ဘက်စုံအလှူငွေများ ပေးအပ်လှူဒါန်းရာ တာဝန်ရှိသူများက လက်ခံရယူ၍ ဓမ္မလက်ဆောင် ပြန်လည်ပေးအပ်သည်။

ဆက်လက်၍ အာရုံခံတန်ဆောင်းအတွင်းရှိ သာသနာရေးဆိုင်ရာပစ္စည်းများနှင့် ရိုးရာလက်မှုပစ္စည်းအရောင်းဆိုင်များအား လှည့်လည်ကြည့်ရှုအားပေးသည်။

ဆုတောင်းပြည့် စွယ်တော်ရှင် မဟာစေတီတော်မြတ်ကြီး

ယင်းနောက် နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌနှင့် အဖွဲ့ဝင်များသည် ပဲခူးမြို့မဇင်း ရပ်ကွက်ရှိ ဒုတိယမြန်မာနိုင်ငံတော်ကြီးကို တည်ထောင်တော်မူခဲ့သော ဟံသာဝတီဆင်ဖြူများရှင် ဘုရင့်နောင် မင်းတရားကြီးကိုယ်တော်တိုင် တည်ထားကိုးကွယ်ခဲ့သည့် ဆုတောင်း ပြည့်စွယ်တော်ရှင် မဟာစေတီတော်မြတ်ကြီးသို့ ရောက်ရှိကြပြီး စေတီတော်မြတ်ကြီးအား ဖူးမြော်ကြည်ညိုကာ သစ်သီး ဆွမ်းတော်၊ ပန်း၊ ရေချမ်း၊ ဆီမီးကပ်လှူပူဇော်သည်။

ထို့နောက် နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌက စေတီတော်မြတ်ကြီး ဧည့်သည်တော် မှတ်တမ်းစာအုပ်တွင် လက်မှတ်ရေးထိုးပူဇော်ပြီး စေတီတော်မြတ်ကြီးအတွက် ဘက်စုံအလှူငွေများကို ပေးအပ်လှူဒါန်းရာ တာဝန်ရှိသူများက လက်ခံရယူ၍ ဓမ္မလက်ဆောင်များ ပြန်လည်ပေးအပ်သည်။

ဆက်လက်၍ စေတီတော်မြတ်ကြီး ရေရှည်တည်တံ့ခိုင်မြဲရေးအတွက် လိုအပ်သည့်ပြုပြင်မွမ်းမံ ထိန်းသိမ်းမှုများကို စဉ်ဆက်မပြတ်ဆောင်ရွက်သွားရန် တာဝန်ရှိသူများကို မှာကြားခဲ့သည်။

ယနေ့သည် အများပြည်သူရုံး ပိတ်ရက်ဖြစ်သည်နှင့်အညီ ပဲခူးမြို့ရှိ တန်ခိုးကြီးဘုရားစေတီများ၌ အနယ်နယ်အရပ်ရပ်မှ ဘုရားဖူးလာပြည်သူများဖြင့် စည်ကားများပြားလျက်ရှိကြောင်း သတင်းရရှိသည်။

MOI

နေပြည်တော် ဩဂုတ် ၂

ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာချောချောစိန်သည် ယမန်နေ့နံနက်ပိုင်းက နေပြည်တော်ပညာရေးဝန်ကြီးဌာန ရုံးအမှတ် ၁၃ အစည်းအဝေးခန်းမ၌ ညွှန်ကြားရေးမှူးချုပ်များ၊ တာဝန်ရှိသူများနှင့် တွေ့ဆုံ၍ စာကြည့်တိုက်အခြေပြု သင်ကြားသင်ယူမှု အားပေးမည့်အစီအမံများ ချမှတ် ဆောင်ရွက်ရေး ဆွေးနွေးမှာကြားသည်။

တွေ့ဆုံပွဲသို့ ပညာရေးဝန်ကြီးဌာန ဒုတိယဝန်ကြီး ဒေါက်တာ ဇော်မြင့်နှင့် ဦးနေမျိုးလှိုင်၊ ညွှန်ကြားရေးမှူးချုပ်များနှင့် တာဝန်ရှိသူများ တက်ရောက်ကြသည်။

ဦးစွာ ပြည်ထောင်စုဝန်ကြီးက ပညာရေးဝန်ကြီးဌာန၏ မျှော်မှန်းချက်နှင့် ရည်မှန်းချက်ပန်းတိုင်များကို အောင်မြင်စေရန် ကြိုးပမ်းဆောင်ရွက်သွားကြရမည်ဖြစ်ပါကြောင်း၊ ဦးစီးဌာနအလိုက် မျှော်မှန်းချက်၊ လုပ်ငန်းတာဝန်များ၊ ဆောင်ရွက်ပြီး၊ ဆောင်ရွက်ဆဲနှင့် ဆက်လက်ဆောင်ရွက်မည့် လုပ်ငန်းရပ်များကို တင်ပြကြစေလိုပါကြောင်း၊ မိမိတို့တာဝန်ထမ်းဆောင်စဉ်ကာလအတွင်း ပညာရေးလုပ်ငန်းများ အောင်မြင်စေရန် ဝိုင်းဝန်းပူးပေါင်းဆောင်ရွက်ကြစေလိုပါကြောင်း၊ ကိန်းဂဏန်းအချက်အလက်ဒေတာများ တိကျမှန်ကန်မှုရှိစေရန် အဆင့်ဆင့် ကြပ်မတ်ဆောင်ရွက်ကြရမည်ဖြစ်ပါကြောင်း၊ ရုံးနှင့်ကျောင်းဥပဓိရုပ်ကောင်းမွန်စေရေးနှင့် ကျောင်းပရဝဏ် သန့်ရှင်းသာယာစေရေးအတွက် အမြဲမပြတ် ပုံမှန်ဆောင်ရွက်ကြရန် လိုအပ်ပါကြောင်း၊ စာကြည့်တိုက်များရှိ စာအုပ်စာရင်းများ စနစ်တကျထားရှိရန်နှင့် စာကြည့်တိုက်အခြေပြု သင်ကြားသင်ယူမှု အားပေးမည့်အစီအမံများ ချမှတ်ဆောင်ရွက်ကြရန် ပြောကြားသည်။

ထို့နောက် ဒုတိယဝန်ကြီးများနှင့် ဦးစီးဌာနများမှ ညွှန်ကြားရေးမှူးချုပ်များ၊ ဝန်ကြီးရုံးညွှန်ကြားရေးမှူးများက လက်ရှိဆောင်ရွက်လျက်ရှိသည့် လုပ်ငန်းများ၊ ဆက်လက်ဆောင်ရွက်မည့်လုပ်ငန်းစဉ်များနှင့်စပ်လျဉ်း၍ ရှင်းလင်းတင်ပြကြပြီး ပြည်ထောင်စုဝန်ကြီးက နိဂုံးချုပ်အမှာစကား ပြောကြားခဲ့ကြောင်း သိရသည်။

ကမ္ဘာ့ပညာရေး အဆင့်အတန်းမြင့်မားသော ဖင်လန်နိုင်ငံရှိ စာသင်ကျောင်းများ သည် ယခုအခါ ကမ္ဘာ့အဆင့်ကျဆင်းလာသည့်အတွက် ကျောင်းသားများအနေဖြင့် စာသင်ကျောင်းများတွင် မိုဘိုင်းဖုန်းအသုံး ပြုခွင့်မရှိတော့ကြောင်း သိရသည်။

ဖင်လန်နိုင်ငံအစိုးရသည် ပြင်ဆင်ထား သည့် အခြေခံပညာရေးဥပဒေကို ဧပြီလ တွင် အတည်ပြုခဲ့ခြင်းဖြစ်ပြီး ဩဂုတ်လ ၁ ရက်တွင်  စတင်အသက်ဝင်လာပြီဖြစ် သည်။ ထိုဥပဒေတွင် အသက်ခုနစ်နှစ်မှ ၁၆ နှစ်အထိကျောင်းသားများ အနေဖြင့် အတန်းတက်နေစဉ် အချိန်အတွင်း မိုဘိုင်း ဖုန်း အသုံးပြုမှုကို တားမြစ်ထားသည်။

ထို့ပြင် စာသင်ခန်းများတွင် မိုဘိုင်းဖုန်းများ၊ အခြားမိုဘိုင်းကိရိယာများကို သင်ယူ ရေးအတွက် အသုံးပြုလိုပါက တာဝန်ကျ ဆရာ၏ ခွင့်ပြုချက်ရယူရမည်ဖြစ်ကြောင်း ဥပဒေတွင်ဖော်ပြထားသည်။

တစ်ချိန်တည်းမှာပင် အမျိုးသားပညာ ရေးဌာနသည် ကျောင်းသားများ ဖုန်းသုံးစွဲမှုကို ဥပဒေတွင်ဖော်ပြထားမှုထက် ထမင်းစားချိန်၊ ခေတ္တနားချိန်တို့တွင်လည်း ဖုန်းကိုအသုံးပြုခွင့် မပေးရေး အစရှိသည်ဖြင့် စည်းမျဉ်းများကိုပိုမို တင်းကျပ်စွာ ချမှတ်ရန် တောင်းဆိုထားကြောင်း သိရသည်။

MWD Web Portal

နေပြည်တော် ဩဂုတ် ၂

ရှမ်းပြည်နယ် (မြောက်ပိုင်း)၊ နောင်ချိုမြို့၌ အကြမ်းဖက်သောင်းကျန်းသူများကြောင့် အခြေခံပညာကျောင်းများအား တစ်နှစ်နီးပါး ပိတ်ထားခဲ့ရပြီး ဇူလိုင်လ ၂၅ ရက်မှစ၍ အခြေခံပညာကျောင်းများကို ပြန်လည်ဖွင့်လှစ်၍ ကျောင်းသား၊ ကျောင်းသူများအား စာပေပညာရပ်များကို သင်ကြားပေးလျက်ရှိသည့်အပြင် ကျောင်းအပ်လက်ခံခြင်းကိုလည်း ဆက်လက်ဆောင်ရွက်ပေးလျက်ရှိသည်။

ထိုသို့ ကျောင်းနေအရွယ်ကလေးများအား တန်းစဉ်အလိုက် ပညာသင်ကြားနိုင်ရေး ဆောင်ရွက်ပေးလျက်ရှိရာ ယနေ့တွင်လည်း နောင်ချိုမြို့နယ်အတွင်းရှိ အခြေခံပညာကျောင်း ၁၄ ကျောင်း၌ ကျောင်းသား/ ကျောင်းသူ ၃၉၀ ဦး ထပ်မံ၍ ကျောင်းအပ်နှံသဖြင့် စုစုပေါင်း ကျောင်းသား/ ကျောင်းသူ ၂၉၅၇ ဦး အေးချမ်းပျော်ရွှင်စွာ တက်ရောက်ပညာသင်ကြား လျက်ရှိသည်။

ထိုသို့ ကျောင်းသား/ ကျောင်းသူများ အေးချမ်းပျော်ရွှင်စွာ ပညာသင်ကြားနိုင်ရေးအတွက် အဆိုပါကျောင်းများ၌ တပ်မတော်သားများ ဌာနဆိုင်ရာဝန်ထမ်းများနှင့် ဒေသခံတိုင်းရင်းသားပြည်သူများက ကျောင်းပတ်ဝန်းကျင်ရှိ ချုံနွယ်ပေါင်းမြက် များအားခုတ်ထွင်ရှင်းလင်းခြင်း၊ ရေစီးရေလာကောင်းမွန်စေရေးအတွက် ရေမြောင်းများ တူးဖော် ဆယ်တင်ပေးခြင်း၊ သန့်ရှင်းရေးပြုလုပ်ခြင်းများနှင့် လိုအပ်သည့် ကူညီပံ့ပိုးမှုများ ဆောင်ရွက်ပေးခဲ့ကြကြောင်း သတင်းရရှိသည်။

MOI

ဘာစီလိုနာ  သြဂုတ်  ၁

ဘာစီလိုနာအသင်းက ဝေဖန်မှုများရှိနေသည့် ကြားမှ ဒီမိုကရက်တစ်ကွန်ဂိုအစိုးရနှင့် ယူရို ၄၄ သန်းတန် စပွန်ဆာစာချုပ်ချုပ်ဆိုခဲ့ကြောင်း အတည် ပြုကြေညာသည်။

ဘာစီလိုနာအသင်းသည်  အစောပိုင်းနှစ်များက အသင်းဘဏ္ဍာရေးပိုင်းအခက်အခဲများရှိနေပြီး အသင်း ဝင်ငွေများစွာရရှိရန်        လိုအပ်နေသည့်အတွက် စပွန်ဆာစာချုပ် ချုပ်ဆိုကာ    အသင်းဝင်ငွေမြင့် တက်လာရန် ကြိုးပမ်းခဲ့ရာမှ    လက်ရှိတွင်လည်း ဝေဖန်မှုများမြင့်တက်နေသည့်ကြားမှ ဒီမိုကရက်တစ် ကွန်ဂိုအစိုးရနှင့်   စပွန်ဆာစာချုပ်ချုပ်ဆိုခဲ့ခြင်းဖြစ် သည်။

ဒီမိုကရက်တစ်ကွန်ဂိုအစိုးရသည်  ပြည်တွင်းရေး ပြဿနာများလည်းရှိနေသည့်အတွက် ဝေဖန်မှုများ နှင့်ရင်ဆိုင်နေရသော်လည်း ဘာစီလိုနာအသင်းက ယူရို  ၄၄ သန်းတန် စပွန်ဆာစာချုပ် ချုပ်ဆိုခဲ့သည့်အတွက် ဝေဖန်မှုများမြင့်တက်လာခြင်းဖြစ်သည်။

ဒီမိုကရက်တစ်ကွန်ဂိုအစိုးရသည်    ရဝမ်ဒါနိုင်ငံ အစိုးရကျောထောက်နောက်ခံအုပ်စုတစ်ခုဖြစ်သည့် Visit Rwanda ကဲ့သို့ဖြစ်ပြီး လက်ရှိတွင် Visit Rwanda ကဲ့သို့ပင် ဥရောပထိပ်တန်း ဘောလုံးကလပ်အသင်း တစ်သင်းကို စပွန်ဆာစာချုပ်ချုပ်ဆိုခဲ့ခြင်း ဖြစ်သည်။

အစောပိုင်းက ဘာစီလိုနာအသင်းနည်းတူ ထိပ်တန်းကလပ်အသင်း တစ်သင်းဖြစ်သည့် အာဆင်နယ် အသင်းသည်လည်း ရဝမ်ဒါနိုင်ငံကျောထောက်နောက်ခံ ဖြစ်သည့် Visit Rwanda နှင့် စပွန်ဆာစာချုပ်ချုပ်ဆို ပြီးနောက်   ဝေဖန်မှုများနှင့်ရင်ဆိုင်ခဲ့ရခြင်းဖြစ်ပြီး ယခုအခါတွင်လည်း ဘာစီလိုနာအသင်းက ဒီမိုကရက် တစ်ကွန်ဂိုအစိုးရနှင့်  စာချုပ်ချုပ်ဆိုခဲ့သည့်အတွက် ဝေဖန်မှုများနှင့် ရင်ဆိုင်ခဲ့ရခြင်း ဖြစ်သည်။

လက်ရှိတွင် Visit Rwanda သည် အာဆင်နယ် အသင်းအပြင် တခြားထိပ်တန်းကလပ်အသင်းကြီး များဖြစ်သည့်  ဘိုင်ယန်မြူးနစ်အသင်းနှင့် ပီအက်စ် ဂျီအသင်းတို့နှင့်လည်း  စပွန်ဆာစာချုပ်များချုပ်ဆို ထားခြင်းဖြစ်သည်။

ဘာစီလိုနာအသင်းသည်   ဒီမိုကရက်တစ်ကွန်ဂို အစိုးရနှင့်   စပွန်ဆာစာချုပ်ချုပ်ဆိုခဲ့သည့်အတွက် ၎င်းတို့အသင်း၏         လေ့ကျင့်ရေးဝတ်စုံများတွင် ဒီမိုကရက်တစ်ကွန်ဂိုအစိုးရ၏      လိုဂိုစာတန်းကို     ထည့်သွင်း ဝတ်ဆင်ရမည်ဖြစ်ကြောင်း သိရသည်။

Ref;Goal.com

 MWD Web Portal

နေပြည်တော် ဩဂုတ် ၂

ရှမ်းပြည်နယ် (မြောက်ပိုင်း)၊ နောင်ချိုမြို့နှင့် အဆိုပါဒေသတစ်ဝိုက်ရှိ ဒေသခံတိုင်းရင်းသားပြည်သူများ၏ ကျန်းမာရေးစောင့်ရှောက်မှုလုပ်ငန်းများ အဆင်ပြေချောမွေ့စေရန်အတွက် အကြမ်းဖက်သမားများ ဖျက်ဆီးခဲ့သည့် နောင်ချိုမြို့နယ် ပြည်သူ့ဆေးရုံအား အမြန်ဆုံးပြန်လည်ဖွင့်လှစ်နိုင်ရေးအတွက် ဌာနဆိုင်ရာဝန်ထမ်းများ၊ တပ်မတော်သားများ၊ ဒေသခံတိုင်းရင်းသားပြည်သူများနှင့် စေတနာရှင်ပြည်သူများပူးပေါင်း၍ လိုအပ်သည့်ပြုပြင်၊ ပြင်ဆင်တည်ဆောက်မှုများကို အချိန်နှင့်တစ်ပြေးညီ ဆောင်ရွက်ခဲ့ကြရာ ယနေ့တွင် ပြည်သူ့ဆေးရုံကို ပြန်လည်ဖွင့်လှစ်နိုင်ခဲ့ကြောင်း သိရှိရသည်။

အဆိုပါ နောင်ချိုမြို့နယ် ပြည်သူဆေးရုံဖွင့်ပွဲကို ယနေ့နံနက်ပိုင်းတွင် ပြုလုပ်ရာ တပ်မတော်မှ တာဝန်ရှိသူများ၊ ကျောက်မဲခရိုင်အုပ်ချုပ်ရေးမှူးနှင့် ခရိုင်/ မြို့နယ်အဆင့် ဌာနဆိုင်ရာတာဝန်ရှိသူများ၊ ကျန်းမာရေးဝန်ထမ်းများနှင့် ဒေသခံတိုင်းရင်းသားပြည်သူများ တက်ရောက်ကြပြီး တာဝန်ရှိသူများက ပြည်သူ့ဆေးရုံဆိုင်းဘုတ်အား အမွှေးနံ့သာရည်များပက်ဖျန်း၍ ဆေးရုံအား ဖွင့်လှစ်ပေးသည်။ ထို့နောက် တာဝန်ရှိသူများက ဆေးရုံတက်ရောက်ကုသမှုခံယူလျက်ရှိသော ဒေသခံပြည်သူများအား လိုက်လံကြည့်ရှု၍ ဆေးဝါးကုသထားရှိမှုအခြေအနေများကို ရင်းရင်းနှီးနှီးမေးမြန်းအားပေးစကား ပြောကြားကြသည်။

နောင်ချိုမြို့နယ် ပြည်သူ့ဆေးရုံ ပြန်လည်ဖွင့်လှစ်နိုင်ရေးအတွက် နိုင်ငံတော်အစိုးရ၊ ကျန်းမာရေးဝန်ကြီးဌာနနှင့် ရှမ်းပြည်နယ်အစိုးရအဖွဲ့တို့၏ ဦးဆောင်လမ်းညွှန်မှုဖြင့် ရှမ်းပြည်နယ် (မြောက်ပိုင်း) ကုသရေးဦးစီးဌာန၊ နယ်မြေခံတပ်နယ်/ တပ်ရင်းများ၊ ခရိုင်/ မြို့နယ်အဆင့် ဌာနဆိုင်ရာများ၊ ဒေသခံတိုင်းရင်းသားပြည်သူများနှင့် စေတနာရှင်များ ပူးပေါင်း၍ ပြည်သူ့ဆေးရုံ အရေးပေါ်ဌာနနှင့် လူနာကုသဆောင်များ ပြုပြင်ခြင်း၊ ရွှေ့လျားခွဲစိတ်ခန်းတပ်ဆင်ပေးခြင်း၊ ရွှေ့လျား ဓာတ်မှန်စက်နှင့် အာထရာဆောင်းစက်များ တပ်ဆင်ပေးခြင်းနှင့် လိုအပ်သော ဆေးနှင့် ဆေးပစ္စည်းများ ထောက်ပံ့ပေးခြင်းတို့ကို ဆောင်ရွက်ပေးခဲ့ပြီး ၂၀၂၅ ခုနှစ် ဩဂုတ်လ (၂) ရက်နေ့နံနက်ပိုင်းမှစ၍ လူနာများအား လက်ခံကုသပေးခြင်းနှင့် အရေးပေါ်ခွဲစိတ်ကုသပေးခြင်းလုပ်ငန်းများ ဆောင်ရွက်ပေး လျက်ရှိကြောင်း သိရှိရသည်။

အဆိုပါပြည်သူ့ဆေးရုံအား ပြန်လည်ပြုပြင်ခြင်းများ ဆောင်ရွက်နေသည့်ကာလအတွင်းတွင်လည်း ဒေသခံတိုင်းရင်းသားပြည်သူများ၏ ကျန်းမာရေးစောင့်ရှောက်မှုလုပ်ငန်းများ အဆင်ပြေစေရန်အတွက် ကျန်းမာရေးဝန်ကြီးဌာနနှင့် တပ်မတော်မှ ဆရာဝန်များနှင့် ကျန်းမာရေးဝန်ထမ်းများ ပူးပေါင်း၍ မြနန်းတော်ဝင်မင်္ဂလာခန်းမ၌ ယာယီဆေးရုံဖွင့်လှစ်၍ ဆေးကုသခြင်းလုပ်ငန်းများ ဆောင်ရွက်ပေးခဲ့ရာ ဇူလိုင် ၂၀ ရက်မှ ဩဂုတ် ၁ ရက်အထိ ဒေသခံတိုင်းရင်းသားပြည်သူ စုစုပေါင်း ၁၆၉၅ ဦးအား လိုအပ်သော ကျန်းမာရေးစောင့်ရှောက်မှုများ ဆောင်ရွက်ပေးခဲ့ပြီး အသက် (၅) နှစ်အောက်ကလေး ၁၇၅ ဦးအား ကာကွယ်ဆေးများ ထိုးနှံတိုက်ကျွေးနိုင်ခဲ့ကြောင်း သတင်းရရှိသည်။

MOI

ရန်ကုန် ဇူလိုင် ၃၁

မြန်မာနိုင်ငံအိုလံပစ်ကော်မတီဥက္ကဋ္ဌ ပြည်ထောင်စုဝန်ကြီး Jeng Phang နော်တောင်သည် မြန်မာနိုင်ငံ လူငယ်ရေးရာလုပ်ငန်းကော်မတီအတွင်းရေးမှူး အားကစားနှင့်လူငယ်ရေးရာဝန်ကြီးဌာန လူငယ်ရေးရာဦးစီးဌာန ညွှန်ကြားရေးမှူးချုပ်နှင့်အတူ ဇူလိုင် ၂၇ ရက်မှ ၂၉ ရက်အထိ တရုတ်ပြည်သူ့သမ္မတနိုင်ငံ ပေကျင်းမြို့၌ ကျင်းပခဲ့သည့် လူငယ်ခေါင်းဆောင်ငြိမ်းချမ်းရေးစကားဝိုင်းဆွေးနွေးပွဲနှင့် ကမ္ဘာ့ငြိမ်းချမ်းရေးလူငယ်ညီလာခံ (Young Leaders Peace Dialouge and The World Youth Conference for Peace) များသို့ တက်ရောက်ခဲ့သည်။

ပြည်ထောင်စုဝန်ကြီးနှင့် အဖွဲ့သည် ဇူလိုင် ၂၈ ရက် နံနက်ပိုင်းတွင် CPAFFC(Youth Leaders Peace Dialouge Chinese People's Association for Friend- ship with Foreign Countries National Art Museum of China)အတွင်းရှိ Auditiorium ခန်းမတွင် ကျင်းပသည့် လူငယ်ခေါင်းဆောင်ငြိမ်းချမ်းရေးစကားဝိုင်းဆွေးနွေးပွဲနှင့် ကမ္ဘာ့ငြိမ်းချမ်းရေးလူငယ်ညီလာခံသို့ တက်ရောက်အဖွင့်အမှာစကားပြောကြားခဲ့ပြီး ဆက်လက်ကျင်းပသည့် တစ်စိတ်တစ်ဝမ်းတည်းဖြစ်သော ငြိမ်းချမ်းရေး Consensus for Peace: Voices of Justice from The Global South Amid Escalating and Prolonged Geopolitical Conflicts (ငြိမ်းချမ်းရေးအတွက် သဘောတူညီချက်များ၊ ပထဝီနိုင်ငံရေးပဋိပက္ခများကြောင့် ကမ္ဘာလုံးဆိုင်ရာ တောင်ပိုင်းဒေသရှိ လူငယ်များ၏ တရားမျှတမှုအတွက် စကားသံများ) ခေါင်းစဉ်နှင့် တာဝန်ယူမှုရှိသော လူငယ်ခေါင်းဆောင်များ၏ ငြိမ်းချမ်းရေး Responsibility for Peace: A Shared Approach to Misinfor-mation Government in Era of AI (AI ခေတ်တွင် မှားယွင်းသော သတင်းအချက်အလက်နှင့် ပတ်သက်၍ စီမံခန့်ခွဲပုံအဆင့်ဆင့်) စသည့် ခေါင်းစဉ်များဖြင့် ဆွေးနွေးသည့် စကားဝိုင်းဆွေးနွေးပွဲအခမ်းအနားများသို့ တက်ရောက်ခဲ့သည်။

အခမ်းအနားတွင် နိုင်ငံပေါင်း ၂၅ နိုင်ငံကျော်မှ လူငယ်ကိုယ်စား လှယ် ၁၈၀ ခန့် တက်ရောက်ပါဝင်ဆွေးနွေးကြသည်။

ဇူလိုင် ၂၉ ရက် နံနက်ပိုင်းတွင် ပြည်ထောင်စုဝန်ကြီးနှင့် အဖွဲ့သည် တရုတ်ပြည်သူ့သမ္မတနိုင်ငံ အားကစားဝန်ကြီးဌာန ဒုတိယဝန်ကြီး H.E. Mr. Li Jing ၊ အပြည်ပြည်ဆိုင်ရာ ဝူရှူးအားကစားအဖွဲ့ချုပ် အတွင်းရေးမှူး၊ တရုတ်နိုင်ငံဝူရှူးအားကစားအဖွဲ့ချုပ်ဥက္ကဋ္ဌ Mrs. Zhang Yu Ping တို့နှင့် တွေ့ဆုံ၍ (၃၃) ကြိမ်မြောက် အရှေ့တောင်အာရှအားကစားပြိုင်ပွဲအတွက် မြန်မာ့အားကစားသမားများ ကြိုတင်ပြင်ဆင်ဆောင်ရွက်နေမှုနှင့် မြန်မာ့အားကစားအဆင့်အတန်း ဖွံ့ဖြိုးတိုးတက်မြင့်မားစေရေးအတွက် အားကစားနည်းပြများ ထောက်ပံ့ကူညီပေးနိုင်ရေးကိစ္စတို့ကို အပြန်အလှန်ဆွေးနွေးကြသည်။

ဆက်လက်၍ ပြည်ထောင်စုဝန်ကြီးသည် တာဝန်ရှိသူများနှင့်အတူ Peking University အတွင်းရှိ Khao Teck Paut အားကစားရုံတွင် ကျင်းပပြုလုပ်သည့် ကမ္ဘာလုံးဆိုင်ရာငြိမ်းချမ်းရေးလူငယ်ညီလာခံ (World Youth Confer-ence) သို့ တက်ရောက်ဆွေးနွေးခဲ့သည်။

အဆိုပါအခမ်းအနားသို့ လက်တင်အမေရိကတိုက်၊ မြောက်အမေရိကတိုက်၊ အာဖရိကတိုက်၊ အာရှအလယ်ပိုင်း၊ အရှေ့အာရှ၊ တောင်အာရှ၊ အရှေ့တောင်အာရှ၊ ဥရောပတိုက်တို့မှ နိုင်ငံပေါင်း ၁၃၀ ကျော်၏ လူငယ်ကိုယ်စားလှယ် ၃၀၀၀ ခန့် တက်ရောက်ကြသည်။

ဇူလိုင် ၃၀ ရက် နံနက်ပိုင်းတွင် မြန်မာနိုင်ငံအိုလံပစ်ကော်မတီဥက္ကဋ္ဌ ပြည်ထောင်စုဝန်ကြီး Jeng Phang နော်တောင်နှင့် အဖွဲ့သည် တရုတ်ပြည်သူ့သမ္မတနိုင်ငံ ပေကျင်းမြို့မှ ရန်ကုန်မြို့သို့ လေကြောင်းခရီးဖြင့် ပြန်လည်ရောက်ရှိခဲ့ကြောင်း သိရသည်။

MOI

ကျောက်ဆည်၊ ဩဂုတ်-၁

မန္တလေးတိုင်းဒေသကြီး၊ ကျောက်ဆည်ခရိုင်တွင် ကျောက်ဆည်မြို့နယ်၊ သင်တောင်းကျေးရွာ၊ မဟာရွှေသိမ်တော် ဆုတောင်းပြည့်ဘုရား ကေသီဦးဓမ္မရုံ၌ ဩဂုတ်လ ၁ ရက်နေ့၊ နေ့လယ်(၁၂)နာရီက မြို့နယ်လုံးဆိုင်ရာ ဝိနည်း စာမေးပွဲ၌ အောင်မြင်တော်မူခဲ့ကြသည့် စာအောင်သံဃာတော်များအား အောင်လက်မှတ်နှင့် စာအောင်ဆုများ ဆပ်ကပ်လှူဒါန်းပွဲအခမ်းအနား ကျင်းပပြုလုပ်ခဲ့ကြောင်း သိရှိရသည်။

အခမ်းအနားကို နမောတဿ သုံးကြိမ်ရွတ်ဆို ဘုရားကန်တော့ဖွင့်လှစ်ခဲ့ပြီး တက်ရောက်လာသူများက  နိုင်ငံတော် ဩဝါဒါစရိယ ဘဒ္ဒန္တာမောက္ခာ ရွှေစေတီကျောင်းတိုက်ဆရာတော်ထံမှ ငါးပါးသီလ ခံယူဆောက်တည်၍ မြို့နယ်သံဃနာယကအဖွဲ့ဥက္ကဋ္ဌ ဘဒ္ဒန္တပညာသာမိ မဟာဂန္ဓဝါစကကဏ္ဍိတ ရွှေစေတီကျောင်းတိုက် ဆရာတော် မှ အောင်လက်မှတ်ဆပ်ကပ်ခြင်းနှင့်စပ်လျဉ်း၍ ရှင်းလင်းမိန့်ကြားခဲ့ပြီး ကျောက်ဆည်ခရိုင် ခေတ္တခရိုင် ရဲတပ်ဖွဲ့မှူး ရဲမှူးမြင့်လွင်၊ ဒုတိယမြို့နယ်အုပ်ချုပ်ရေးမှူး ဦးကျော်ကျော်မင်းနှင့်တာဝန်ရှိသူများက ပင့်သံဃာဆရာတော်ကြီး များနှင့် စာအောင်သံဃာတော်များအား  ဝတ္ထုငွေ၊ သင်္ကန်းခြင်းများနှင့် စာအောင် လက်မှတ်၊ စာအောင်ဆုများ ဆက်ကပ်လှူဒါန်းခဲ့ပြီး မန္တလေးတိုင်းဒေသကြီး ဩဝါဒါစရိယရွှေကူညီကျောင်း ဆရာတော် ဘဒ္ဒန္တဇနိတာဘိဝံသ ဆရာတော်ထံမှ ရေစက်သွန်းချ အနုမောဒနာ တရားနာယူကြည်ညိုခဲ့ပြီး အခမ်းအနားကို ဗုဒ္ဓသာသနံ စိရံ တိဋ္ဌတု (၃)ကြိမ်ရွတ်ဆိုဆုတောင်း၍ ရုပ်သိမ်းခဲ့ကြောင်း သိရသည်။

ကျောက်ဆည်မြို့နယ်လုံးဆိုင်ရာ ဝိနည်းစာမေးပွဲတွင် အဋ္ဌမအဆင့်၊ သတ္တမအဆင့်၊ ဆဋ္ဌအဆင့်၊ ပဉ္စမအဆင့်၊ စတုတ္ထအဆင့်၊ တတိယအဆင့်၊ ဒုတိယအဆင့်၊ ပထမအဆင့်နှင့် မူလအဆင့် စုစုပေါင်း စာအောင် သံဃာ (၂၀၀)ပါး အောင်မြင်တော်မူခဲ့ကြောင်း သိရသည်။

သက်မောင်(ကျောက်ဆည်)

နေပြည်တော် ဇူလိုင် ၃၁

ရှမ်းပြည်နယ် (မြောက်ပိုင်း)၊ နောင်ချိုမြို့၌ အကြမ်းဖက်သောင်းကျန်းသူများကြောင့် အခြေခံပညာကျောင်းများအား တစ်နှစ်နီးပါးပိတ်ထားခဲ့ရပြီး ဇူလိုင်လ ၂၅ ရက်နေ့မှစ၍ အခြေခံပညာကျောင်းများကို ပြန်လည်ဖွင့်လှစ်ပြီး ကျောင်းသား၊ ကျောင်းသူများအား စာပေပညာရပ်များကို သင်ကြားပေးလျက်ရှိသည့်အပြင် ကျောင်းအပ်လက်ခံခြင်းကိုလည်း ဆက်လက်ဆောင်ရွက်ပေးလျက်ရှိသည်။

ထိုသို့ ကျောင်းနေအရွယ်ကလေးများအား တန်းစဉ်အလိုက် ပညာသင်ကြားနိုင်ရေးအတွက် အခြေခံပညာကျောင်းများကို ဖွင့်လှစ်ပညာသင်ကြားပေးလျက်ရှိရာ ယနေ့တွင်လည်း ကျောင်းသား/ကျောင်းသူ ၁၈၁၉ ဦး အေးချမ်းပျော်ရွှင်စွာ တက်ရောက်ပညာသင်ကြားလျက်ရှိသည့်အပြင် ထပ်မံလာရောက်ကျောင်းအပ်နှံသူ ကျောင်းသား/ကျောင်းသူများကိုလည်း ကျောင်းအပ်လက်ခံခြင်းများကို ဆက်လက်ဆောင်ရွက်ပေးလျက်ရှိပြီး ကျောင်းလာရောက်အပ်နှံသည့် ကျောင်းသား/ကျောင်းသူများအား ပညာရေးဝန်ကြီးဌာနက အခမဲ့ပေးအပ်သည့် ကျောင်းသုံးစာအုပ်များ၊ စာရေးကိရိယာများနှင့် ကျောင်းဝတ်စုံများကို ဆက်လက်ပေးအပ်သွားမည်ဖြစ်ကြောင်း သိရှိရသည်။

ထို့အပြင် တပ်မတော်မှ ဆရာဝန်များက ကျန်းမာရေးဝန်ကြီးဌာနမှ ဆရာဝန်များ၊ ကျန်းမာရေးဝန်ထမ်းများနှင့် ပူးပေါင်း၍ ဒေသခံတိုင်းရင်းသားပြည်သူများ၏ ကျန်းမာရေးစောင့်ရှောက်မှုလုပ်ငန်းများ အဆင်ပြေချောမွေ့စေရေးအတွက် မြနန်းတော်ဝင်မင်္ဂလာခန်းမ၌ ယာယီဆေးရုံဖွင့်လှစ်ပြီး ဆေးကုသပေးခြင်းများ ဆောင်ရွက်ပေးလျက်ရှိရာ ယနေ့တွင် ဒေသခံတိုင်းရင်းသားပြည်သူ ၁၄၄ ဦးတို့ကို လိုအပ်သည့် ကျန်းမာရေးစောင့်ရှောက်မှုများ ဆောင်ရွက်ပေးခဲ့ကြကြောင်း သတင်းရရှိသည်။

 MOI

နေပြည်တော် ဇူလိုင် ၃၀

မြန်မာနိုင်ငံလူငယ်ရေးရာဗဟိုကော်မတီနှင့် နေပြည်တော်ကောင်စီလူငယ်ရေးရာကော်မတီတို့ ပူးပေါင်းကျင်းပသည့် “မူးယစ်ဆေးဝါးနှင့် စိတ်ပညာအကြောင်း သိကောင်းစရာ” လူငယ်ရေးရာ အသိပညာပေးဟောပြောပွဲကို ယနေ့မွန်းလွဲပိုင်းတွင် အစိုးရစက်မှုလက်မှုသိပ္ပံ (နေပြည်တော်)၌ ကျင်းပသည်။

ဦးစွာ ကျောင်းသားကျောင်း သူများက “လှမ်းလို့ဖိတ်ခေါ် GTI နေပြည်တော်” သီချင်းဖြင့် သီဆိုဖျော်ဖြေကြပြီး မြန်မာနိုင်ငံလူငယ်ရေးရာဗဟိုကော်မတီအတွင်းရေးမှူး၊ အားကစားနှင့်လူငယ်ရေးရာဝန်ကြီးဌာန ဒုတိယဝန်ကြီး ဦးဇင်မင်းထက်က မူးယစ်ဆေးဝါးသည် လူငယ်များ၏ အိပ်မက်များ၊ စွမ်းရည်များနှင့် အနာဂတ်ကိုဖျက်ဆီးနိုင်သည့်အတွက် ဆရာ ဆရာမများအနေဖြင့် ကျောင်းသား ကျောင်းသူများကို ကျောင်းသင်ဘာသာရပ်များအပြင် ဘဝတွင် ကြုံတွေ့လာရမည့် ပြောဆိုဆက်သွယ်မှု၊ စီမံခန့်ခွဲမှု၊ လူမှုဆက်ဆံရေး ကောင်းမွန်မှု၊ ပူးပေါင်းဆောင်ရွက်တတ်မှု၊ ပြဿနာများကို ဖြေရှင်းတတ်မှု၊ မှန်ကန်စွာဆုံးဖြတ်ချက်ချမှတ်နိုင်မှု၊ တီထွင်ဖန်တီးနိုင်မှုတို့အပြင် မူးယစ်ဆေးဝါးကင်းစင်သည့် လူ့ဘောင်သစ်တစ်ခုကို တည်ဆောက်ပေးနိုင်ပြီး ဘဝကိုအောင်မြင်စွာ တည်ဆောက်နိုင်သည့် လူငယ်များဖြစ်အောင် ပြုစုပျိုးထောင် သင်ကြားပေးသွားရန်လိုကြောင်း တိုက်တွန်းပြောကြားသည်။

ထို့နောက် သိပ္ပံနှင့်နည်းပညာဝန်ကြီးဌာန ဒုတိယဝန်ကြီး ဒေါက်တာအောင်ဇေယျက လူငယ်ကဏ္ဍ ဖွံ့ဖြိုးတိုးတက်စေရေးအတွက် မိမိတို့ဝန်ကြီးဌာနအနေဖြင့် ဒေသလိုအပ်ချက်နှင့်ကိုက်ညီသည့် အသိပညာပေးသင်တန်းများနှင့် သက်မွေးပညာသင်တန်းများကို ဖွင့်လှစ်သင်ကြားပေးလျက်ရှိကြောင်း ပြောကြားသည်။

ယင်းနောက် ဒုတိယဝန်ကြီး ဦးဇင်မင်းထက်က အစိုးရစက်မှုလက်မှုသိပ္ပံ(နေပြည်တော်) ကျောင်းအုပ်ဆရာကြီးထံအား ကစားပစ္စည်းများကို ထောက်ပံ့ပေးအပ်သည်။

ဆက်လက်၍ ဒုတိယဝန်ကြီး ဒေါက်တာအောင်ဇေယျနှင့် နေပြည်တော်ကောင်စီ လူငယ်ရေးရာကော်မတီ ဒုတိယဥက္ကဋ္ဌ နေပြည်တော်ကောင်စီဝင် ဦးမြင့်စိုးတို့က အသိပညာပေးဟောပြောမည့် ဇမ္ဗူသီရိမြို့နယ် ကျန်းမာရေးမှူး ဒေါက်တာလင်းပြည့်သိမ်းကို အမှတ်တရ ဂုဏ်ပြုလက်ဆောင် များကို ပေးအပ်ပြီး ဇမ္ဗူသီရိ မြို့နယ်ကျန်းမာရေးမှူးက “မူးယစ်နှင့် စိတ်ပညာအကြောင်း သိကောင်းစရာ” ခေါင်းစဉ်ဖြင့် အသိပညာပေးဟောပြောကာ လူငယ်ရေးရာဦးစီးဌာနမှ တာဝန်ရှိသူကဉာဏ်စမ်းပဟေဠိ မေးခွန်းမေးမြန်းခြင်းနှင့် ဖြေဆိုနိုင်သူများကို အမှတ်တရ ဆုလက်ဆောင်များပေးအပ်ခြင်းတို့ကို ဆောင်ရွက်ခဲ့ကြောင်း သိရသည်။

MOI