MNL League Cup 2025 ၏ ကွာတားဖိုင်နယ်ပွဲစဉ်များကို ယခုလအတွင်း ကစားကြတော့မည် ဖြစ်သည်။

ကွာတားဖိုင်နယ် ပွဲစဉ်များတွင် ရန်ကုန်ယူနိုက်တက်နှင့် ဟံသာဝတီယူနိုက်တက်၊ Dagon Port FC နှင့် Yadanarbon FC ၊ မြဝတီနှင့် ရှမ်းယူနိုက်တက်၊ ရခိုင်ယူနိုက်တက်နှင့် ဧရာဝတီယူနိုက်တက်တို့ ဆုံတွေ့နေသည်။

အဆိုပါ ပွဲစဉ်များကို ဇွန်လ (၁၈) ရက်နှင့် (၁၉)ရက်တို့တွင် ရန်ကုန်မြို့၊ သုဝဏ္ဏအားကစားကွင်းနှင့် YUSC stadium တို့တွင် ကစားသွားကြမည် ဖြစ်သည်။

Source: Popular Myanmar

ပဲရစ်   ဇွန် ၁၅

ပဋိသန္ဓေတားဆေး တစ်မျိုးသုံးစွဲနေကြသည့် အမျိုးသမီးများ၌ ဦးနှောက်အတွင်း အကျိတ်ပေါ်ထွက်နိုင်ခြေ ရှိလာနိုင်ဖွယ်ရှိကြောင်း ပြင်သစ်သုတေသနပညာရှင်များက ဇွန် ၁၄ ရက်တွင် ပြောကြားသည်။

ပရိုဂတ်စတာရုန်း (Progesterone) ထည့်သွင်းထားသည့် Mini Pill ခေါ် နေ့စဉ်သောက်ပဋိသန္ဓေတားဆေးများသည် အမျိုးသမီးသန်းပေါင်းများစွာတို့ သုံးစွဲနေကြရသည့် ဆေးများဖြစ်ကြကြောင်း သိရသည်။

သို့ရာတွင် Mini Pill ပဋိပသန္ဓေတားဆေးများကို ငါးနှစ်ကျော်ကြာထိ သုံးစွဲခဲ့သူ အမျိုးသမီးများတွင် Meningioma ခေါ် ဦးနှောက်အကျိတ်ပြဿနာပေါ်ထွက်နိုင်ခြေ မြင့်မားနေတတ်ကြောင်း ပြင်သစ်သုတေသနပညာရှင်များက ပြောကြားသည်။

Meningioma အကျိတ်များကြောင့် ကင်ဆာရောဂါမဖြစ်ပွားနိုင်သော်လည်း အကျိတ်အရွယ်အစားကြီးလာပါက ဦးနှောက်အပေါ် ဖိအားသက်ရောက်လာတတ်ပြီး ခေါင်းကိုက်ခြင်း၊ သတိလစ်ခြင်း၊ အမြင်အာရုံနှင့် မှတ်ဉာဏ်ပြဿနာများ ပေါ်လာတတ်ကြောင်း သိရသည်။

သို့ရာတွင် Mini Pill များကြောင့် Meninigioma ပြဿနာပေါ်နိုင်ခြေမှာ ရာနှုန်းအားဖြင့် အလွန်နည်းပါးနေဆဲဖြစ်ရာ အမျိုးသမီးများအနေဖြင့် Mini Pill များနှင့်ပတ်သက်၍ စိုးရိမ်ရန်မရှိကြောင်း ပြင်သစ် သုတေသနပညာရှင်များက ပြောကြားသည်။

ပြင်သစ် သုတေသနပညာရှင်များသည် Mini Pill ဆေးသုံးစွဲသူအမျိုးသမီး ၈၀၀၀ ကျော်ကို လေ့လာခဲ့ပြီးနောက် ၎င်းတို့၏ တွေ့ရှိချက်ကို တင်ပြခဲ့ကြခြင်းဖြစ်ကြောင်း သိရသည်။

ကိုးကား : ရတနာပုံသတင်းစာ

Photo: The Independent

တံတားဦး ၊ ဇွန် - ၁၃

မန္တလေးတိုင်းဒေသကြီး၊ တံတားဦးခရိုင်၊ တံတားဦးမြို့နယ်၊ ပြည်သူ့ကျန်းမာရေးဦးစီးဌာနမှ မြို့နယ်အတွင်း ကိုဗစ်-၁၉ရောဂါ ကူးစက်ပြန့်ပွားမှုမဖြစ်ပေါ်စေရန် ဇွန်လ ၁၃ ရက်နေ့၊ နံနက် (၉) နာရီက တံတားဦးမြို့ အမှတ် (၂) ရပ်ကွက် မြို့နယ်ခန်းမတွင် နိုင်ငံ့ဝန်ထမ်းများနှင့်ပြည်သူများအား ကာကွယ်ဆေးများ ထိုးနှံပေးကြောင်း သိရသည်။

ထိုသို့ထိုးနှံဆောင်ရွက်ပေးရာတွင် မြို့နယ်ပြည်သူ့ကျန်းမာရေးဦးစီးဌာမှ ဝန်ထမ်းများက အသက် (၁၈) နှစ် ပြည့်ပြီး ကိုဗစ်ကာကွယ်ဆေး တစ်ကြိမ်တစ်ခါမျှ ထိုးနှံခဲ့ခြင်းမရှိသူများ၊ အကြိမ်ရေ မပြည့်သေးသူများနှင့် ထပ်ဆောင်း ထိုးနှံသူများ၊ ကိုဗစ်ကာကွယ်ဆေးထိုးနှံပြီး ခြောက်လပြည့်ပြီးသူများအား လိုအပ်သည့်ကျန်းမာရေးဆိုင်ရာ ကိစ္စရပ် များကို မြို့နယ်ကျန်းမာရေးဝန်ထမ်းများက ဆောင်ရွက်ပေးကြပြီး Pfizer COVID-19 JN – 1(Grey Cap) ကာကွယ်ဆေးထိုးပေးလျက်ရှိကြသည်။ 

တံတားဦးမြို့နယ်အတွင်း ကိုဗစ်-၁၉ရောဂါ ကာကွယ်ဆေးထိုးနှံမှုရာနှုန်းပြည့်လွှမ်းခြုံနိုင်ရေးအတွက် စဉ်ဆက်မပြတ် ဆောင်ရွက်လျက်ရှိကြောင်းမြို့နယ်ကျန်းမာရေးဦးစီးဌာနမှသိရသည်။       

ပေးပို့သူ- ဦးရဲတင့် (ပြန်/ဆက်)

နယူးယောက်   ဇွန် ၁၂

ထောပတ်ကို နေ့စဉ်အနည်းဆုံး ငါးဂရမ်စားသုံးခြင်းဖြင့် ပုံစံ-၂ ဆီးချိုရောဂါဖြစ်နိုင်ခြေကို လျှော့ချနိုင်ကြောင်း သုတေသနပညာရှင်များက ဇွန် ၁၁ ရက်တွင် ပြောကြားသည်။

အမေရိကန်နိုင်ငံ ဘော်စတွန်တက္ကသိုလ်မှ သုတေသနပညာရှင်များ၏ လေ့လာတွေ့ရှိချက်အရ အနည်းဆုံး ထောပတ် ငါးဂရမ် (လက်ဖက်ရည်ဇွန်းတစ်ဇွန်းစာ) ကို နေ့စဉ်စားပါက ပုံစံ-၂ ဆီးချိုရောဂါကို ၃၀ ရာခိုင်နှုန်းထိ လျှော့ချပေးနိုင်ကြောင်း သိရသည်။

ထို့ပြင် ထောပတ် ငါးဂရမ် နေ့စဉ်စားသုံးခြင်းဖြင့် နှလုံးပြဿနာများပေါ်လာနိုင်ခြေကိုလည်း လျှော့ချနိုင်သည်ဟု သုတေသနပညာရှင်များက ပြောကြားထားကြောင်း သိရသည်။

ထောပတ်သည် သွေးအတွင်း ဆိုးကျိုးပြု ကိုလက်စထရောပါဝင်မှုအဆင့်ကို လျှော့ချပေးနိုင်ပြီး သွေးကြောများကို ပိတ်ဆို့တတ်သော အဆီဓာတ်များကိုလည်း လျှော့ချပေးနိုင်ကြောင်း သိရသည်။

သို့ရာတွင် ထောပတ်အစားအသုံးပြုသည့် မာဂျရင်းကို နေ့စဉ်စားသုံးပါက ပုံစံ-၂ ဆီးချိုနှင့် နှလုံးရောဂါများဖြစ်နိုင်ခြေ မြင့်တက်လာနိုင်ကြောင်း သုတေသနပညာရှင်များက သတိပေးထားသည်။

အမေရိကန်သုတေသနပညာရှင်များသည် အသက် ၃၀ အထက်အမျိုးသား၊ အမျိုးသမီးဦးရေ ၂၅၀၀ ခန့်ကို လေ့လာပြီးနောက် ၎င်းတို့၏ တွေ့ရှိချက်ကို တင်ပြခဲ့ကြခြင်းဖြစ်ကြောင်း သိရသည်။

Source: ရတနာပုံသတင်းစာ

မော်စကို၊ ပညာရေး

ရုရှားနိုင်ငံသည် ဝင်ရိုးစုံကမ္ဘာကိုတည်ဆောက်ရေးအတွက် ပညာရေးပုံစံတစ်ခုကို မိတ်ဆက်ကာ မိတ်ဖက်နိုင်ငံများနှင့် မျှဝေသွားမည်ဖြစ်ကြောင်း ရုရှားပညာရေး ဝန်ကြီး အလက်ဆီခရက်ဆော့က အပြည် ပြည်ဆိုင်ရာညီလာခံတစ်ခုမတိုင်မီပြော သည်။

"အနာဂတ်ကိုပုံဖော်ထုဆစ်ခြင်း" ဟု အမည်ပေးထားသည့်ဖိုရမ်ကို ဇွန်လ ၁၁ ရက်မှစ၍ ကာဇန်မြို့၌ကျင်းပလျက်ရှိရာ အဆိုပါဖိုရမ်သို့ နိုင်ငံပေါင်း ၂၀ ကျော်မှ ပညာရေးဝန်ကြီးများတက်ရောက်သည် ဟုအခမ်းအနားစီစဉ်သူများကပြောသည်။ 
ရုရှားနိုင်ငံအနေဖြင့် ဆရာဖြစ်သင်တန်း အတွေ့အကြုံများ၊ သင်ရိုးညွှန်းတမ်း ရေးဆွဲခြင်းနှင့်စာသင်ကျောင်းတည်ဆောက် ရေးတို့ကို မိတ်ဖက်နိုင်ငံများသို့မျှဝေပေး သွားမည်ဖြစ်ကြောင်း၊ ရုရှားနိုင်ငံရှိစာသင် ကျောင်းစနစ်သည် အရည်အသွေးအားဖြင့် ကြည့်ပါက ကမ္ဘာ့အဆင့် ၁၀ အတွင်း ရှိသည်ဟု ပညာရေးဝန်ကြီးကပြောကြောင်း သိရသည်။

Ref: RT

ဝဿန်ကာလ မိုးရာသီရောက်ရှိလာပြီဖြစ်တဲ့အတွက် ရင်သွေးငယ်များအတွက် ခြင်ကတဆင့် ကူးစက်နိုင်တဲ့ သွေးလွန်တုပ်ကွေးရောဂါ ဖြစ်ပွားတတ်တာမို့ အလွန်ဂရုစိုက်ရမယ့် အချိန်ကို ရောက်ရှိနေပြီဖြစ်ပါတယ်။

သွေးလွန်တုပ်ကွေး ရောဂါလက္ခဏာဟာ နှာခေါင်းသွေးလျှံတာ၊ ဝမ်းမဲမဲသွားတာ၊ သွေးအန်တာ၊ တကိုယ်လုံးအေးစက်ပြီး သွေးပေါင်ချိန် အလွန်အမင်းကျဆင်းတာမျိုးများဖြစ်တတ်လို့ ပြည်သူ့ကျန်းမာရေးဌာန အသိပေးချက်တွေက ဆိုထားပါတယ်။

မိဘများအနေနဲ့ မိမိတို့ရဲ့ ရင်သွေးငယ်တွေဟာ သွေးလွန်တုပ်ကွေးရောဂါဖြစ်ပွားတာနဲ့ ရာသီတုပ်ကွေးရောဂါ ဖြစ်ပွားတာမတူညီဘူးဆိုတာကို ဒီစာစုကနေအမှတ်မမှားအောင် အသိပေးချင်တာဖြစ်ပါတယ်။

အချို့သော မိဘများဟာကျန်းမာရေးအသိ အားနည်းချက်တွေကြောင့် သွေးလွန်တုပ်ကွေးနဲ့ ရာသီတုပ်ကွေးရောဂါဖြ စ်ပွားမှုအပေါ် မခွဲခြားတတ်ဘဲ အချိန်လင့်မှ ဆေးရုံဆေးခန်းရောက်လာလို့ ရင်သွေးငယ်အချို့ အသက်ဆုံးရှုံးခဲ့ရတဲ့ သာဓကတွေကလည်း ဒုနဲ့ဒေးပါ။

ရာသီတုပ်ကွေးကာကွယ်ဆေး (Flu vaccine) ထိုးထားရင် သွေးလွန်တုပ်ကွေး(DHF)ကိုပါ ကာကွယ်ပြီးသားလို့ ထင်မှတ်နေကြတာမျိုးတွေကြောင့် တကယ်တော့ ဒီအချက်လေးက မှားယွင်းနေတဲ့ နားလည်မှုလေးပါပဲ။

အခုဆေးရုံဆေးခန်းတွေမှာထိုးနေကြတဲ့ တုပ်ကွေးကာကွယ်ဆေး(Flu vaccine)ဆိုတာချစ်ရတဲ့ ရင်သွေးလေးတွေကို ရာသီတုပ်ကွေး ဗိုင်းရပ်စ်ပိုးရဲ့အန္တရာယ်ကနေ ကာကွယ်ပေးဖို့ရည်ရွယ်ထုတ်လုပ်ထားတာပါ။

လေထဲက နေကူးစက်တတ်တဲ့ အသက်ရှူလမ်းကြောင်းဆိုင်ရာ တုပ်ကွေးရောဂါအတွက်သာဖြစ်ပြီး သွေးလွန်တုပ်ကွေးဆိုတာကတော့ ခြင်တွေကနေ ကူးစက်တတ်တဲ့ ဗိုင်းရပ်စ်ပိုးကြောင့် ဖြစ်ရတာပါ။

သူတို့ နှစ်ခုဟာ ဖြစ်ပွားရတဲ့အကြောင်းရင်းနဲ့ ဗိုင်းရပ်စ်ပိုး အမျိုးအစားချင်း မတူညီပါဘူး။ ဥပမာအနေနဲ့နဲ့ ပြောရရင် ကားမောင်းတဲ့လိုင်စင်က ကားမောင်းဖို့အတွက်ပဲ အသုံးပြုနိုင်သလိုလေယာဉ် မောင်းဖို့အတွက် အသုံးမပြုနိုင်ပါဘူး။

အဲဒီလိုပဲ(Flu vaccine)ကလည်း တုပ်ကွေးအတွက်ပဲ အထူး ထုတ်ထားတဲ့ခုခံ အားဒိုင်းကာလေးပါ။ သွေးလွန်တုပ်ကွေးပိုးကိုတော့ သူကကာကွယ်မပေးနိုင်ပါဘူး။ သွေးလွန်တုပ်ကွေး ကာကွယ်ဆေးရယ်လို့ မြန်မာနိုင်ငံမှာ မကြားမိသေးဘူး။

ဒီတော့ မိဘတွေအနေနဲ့ သားသားမီးမီးလေးတွေ ဖျားနာလာပြီဆိုတာနဲ့ (Flu vaccine)ထိုးထားပေမယ့်လည်း သွေးလွန် တုပ်ကွေးဖြစ်နိုင်ခြေရှိတယ်ဆိုတာကိုအမြဲသတိရပြီး အသက်ရူလမ်းကြောင်းဆိုင်ရာ ရာသီတုပ်ကွေးနဲ့ သွေးလွန်တုပ်ကွေး မတူဘူးဆိုတာကို ခွဲခြား၍ သိနားလည်နိုင်စေဖို့ အသိပေးတင်ပြလိုက်ရပါတယ် …. ။

Source: Popular Myanmar

ဘရာဇီးနိုင်ငံသည် ယခုသီတင်းပတ်အစောပိုင်းက မြို့တော် Brasilia တွင် BRICS အဖွဲ့၏ ၇ ကြိမ်မြောက် လူငယ်စွမ်းအင်ထိပ်သီးအစည်းအဝေးကို အိမ်ရှင်အဖြစ် လက်ခံကျင်းပခဲ့သည်။ ထိုအရေးပါသော စုဝေးပွဲတွင် BRICS နိုင်ငံများမှ လူငယ်ပညာရှင်များ၊ အစိုးရအရာရှိများနှင့် အကြီးတန်း စွမ်းအင်ကျွမ်းကျင်သူများ အပါအဝင် ပါဝင်သူ ၁၀၀ ကျော် တက်ရောက် ခဲ့ကြသည်။

အဆိုပါထိပ်သီးအစည်းအဝေးသည် BRICS အဖွဲ့၏ တရားဝင် လူငယ် ပလက်ဖောင်းဖြစ်ပြီး လက်ရှိတွင် အဖွဲ့ဝင် ၁၀ နိုင်ငံ (ဘရာဇီး၊ ရုရှား၊ အိန္ဒိယ၊ တရုတ်၊ တောင်အာဖရိက၊ အီဂျစ်၊ အီသီယိုးပီးယား၊ အီရန်၊ အာရပ်စော်ဘွားများပြည်ထောင်စုနှင့် အင်ဒိုနီးရှား) ပါဝင်သည်။ ၎င်းသည် ကမ္ဘာ့စွမ်းအင်ကဏ္ဍတွင် အစောပိုင်း အသက်မွေးဝမ်းကျောင်းမှုဆိုင်ရာ ကျွမ်းကျင်သူများနှင့် မူဝါဒချမှတ်သူများကို ဆက်သွယ်ပေးသည်။

BRICS လူငယ်စွမ်းအင်အေဂျင်စီ၏ ခေါင်းဆောင် Aleksandr Kormishin က “အဆိုပါထိပ်သီးအစည်းအဝေးသည် ‘တောင်ကမ္ဘာမှ လူငယ်များအတွက် အဓိကပလက်ဖောင်း’ အဖြစ် ရပ်တည်လာခဲ့ပြီး BRICS နှင့် အခြားနိုင်ငံများမှ လူငယ်ခေါင်းဆောင်များသည် စွမ်းအင်ကဏ္ဍတွင် ပိုမို ကောင်းမွန်သော အနာဂတ်တည်ဆောက်ရန် လက်တွေ့ကျသည့် နည်းလမ်း များကို ဆွေးနွေးနိုင်ကြသည်” ဟု RT သို့ ပြောကြားခဲ့သည်။

၎င်းက “စွမ်းအင်ဝန်ကြီးဌာနများ၊ အဓိကကော်ပိုရေးရှင်းများနှင့် စွမ်းအင် ကဏ္ဍရှိ အကျိုးသက်ဆိုင်သူများမှ ကိုယ်စားလှယ်အဖွဲ့များ တက်ရောက်ခဲ့ကြပြီး ၎င်းတို့သည် အဆိုပါ ကဏ္ဍဖွံ့ဖြိုးတိုးတက်ရေးအတွက် မည်သို့ ပံ့ပိုးနိုင်မည်ကို အစီအစဉ်များ ချမှတ်ခဲ့ကြသည်” ဟု ဖြည့်စွက် ပြောကြား ခဲ့သည်။

၂၀၂၅ ခုနှစ်တွင် ဘရာဇီး၏ အလှည့်ကျ ဥက္ကဋ္ဌအဖြစ် ကျင်းပသည့် အဆိုပါ အခမ်းအနားတွင် လူငယ်ကိုယ်စားလှယ်အဖွဲ့များ၊ ပညာရေး ခေါင်းဆောင်များနှင့် အဓိကစွမ်းအင်ကုမ္ပဏီများ ပါဝင်ခဲ့သည်။ ရေရှည် ပါတနာဖြစ်သော ရုရှားနိုင်ငံပိုင် နျူကလီးယားကော်ပိုရေးရှင်း Rosatom က စွမ်းအင်ကဏ္ဍတွင် လူငယ်ဖွံ့ဖြိုးရေး၏ အရေးပါမှုကို အလေးထား ပြောကြားခဲ့သည်။

“အင်အားစုစည်းခြင်းဖြင့် မိမိတို့သည် ပူးပေါင်းသုတေသနများ ဆောင်ရွက်နိုင်ပြီး ကျွမ်းကျင်မှုများဖလှယ်ကာ ကမ္ဘာ့စျေးကွက်အတွက် အရေးပါသော အဖြေရှာမှုများ ဖန်တီးနိုင်မည်” ဟု Rosatom ၏ CEO Alexey Likhachev က ပြောကြားခဲ့သည်။ “မိမိတို့၏ Obninsk Tech hub သည် ကမ္ဘာအရပ်ရပ်မှ အဆင့်မြင့်နျူကလီးယားပညာရှင်လူငယ်များကို စုစည်း ထားသည်” ဟု ပြောကြားခဲ့သည်။

Kaluga ဒေသရှိ Obninsk မြို့သည် ၁၉၅၄ ခုနှစ်တွင် ကမ္ဘာ့ပထမဆုံး နျူကလီးယားစွမ်းအင်စက်ရုံ စတင်လည်ပတ်ခဲ့သော နေရာဖြစ်သည်။ ၂၀၀၂ ခုနှစ်တွင် အဆင့်ဆင့်ရပ်စဲခဲ့ပြီး ယခုအခါ ပြတိုက်တစ်ခုဖြစ်သော အဆိုပါစက်ရုံသည် ခေတ်ပြိုင်နျူကလီးယားနည်းပညာများအတွက် စမ်းသပ်မြေတစ်ခုအဖြစ် တစ်ချိန်က အသုံးပြုခဲ့သည်။

အဆိုပါ အစည်းအဝေး၏ အဓိကအချက်မှာ BRICS နိုင်ငံများမှ လူငယ် သုတေသီ ၅၀ ကျော်ဖြင့် ပြုစုထားသော နှစ်စဉ်အစီရင်ခံစာ “BRICS လူငယ်စွမ်းအင်အလားအလာများ” ကို အသိပေးမိတ်ဆက်ခြင်း ဖြစ်သည်။ အစီရင်ခံစာတွင် ကာဗွန်နည်းစနစ်များ၊ ရေရှည်တည်တံ့သောလောင်စာ၊ စွမ်းအင်သုံးစွဲနိုင်မှုနှင့် အရေးကြီးသော သတ္တုရိုင်းများ ကဲ့သို့သော အဓိက အကြောင်းအရာများကို ဖော်ပြထားသည်။ ၎င်းကို ၂၀၂၅ ခုနှစ်၊ နိုဝင်ဘာလ တွင် ဘရာဇီးနိုင်ငံ Belem မြို့၌ ကျင်းပမည့် COP30 တွင် တရားဝင် မိတ်ဆက်မည်ဖြစ်သည်။

ထိပ်သီးအစည်းအဝေးတွင် ဘရာဇီး၏ သတ္တုတွင်းနှင့် စွမ်းအင်ဝန်ကြီးဌာန၊ အိန္ဒိယ၏ စွမ်းအင်ဝန်ကြီးဌာန အပါအဝင် အခြားနိုင်ငံတကာ အဖွဲ့အစည်းများမှ အကြီးတန်းကိုယ်စားလှယ်များ မိန့်ခွန်းများ ပြောကြားခဲ့သည်။

အဆိုပါအခမ်းအနားသည် BRICS လူငယ်စွမ်းအင်ပူးပေါင်းဆောင်ရွက်မှု ၁၀ နှစ်ပြည့် အထိမ်းအမှတ်ကိုလည်း ကျင်းပခဲ့ပြီး၊ အဖွဲ့ဝင်နိုင်ငံများ၏ ရေရှည်တည်တံ့သော စွမ်းအင်ဆွေးနွေးပွဲများအတွက် ကတိကဝတ်ကို ထပ်မံအတည်ပြုခဲ့သည်။

အဆိုပါ ထိပ်သီးအစည်းအဝေးကို ဘရာဇီးသတ္တုတွင်းနှင့် စွမ်းအင်ဝန်ကြီးဌာန၊ အမျိုးသားလူငယ်အတွက်ကော်မတီတို့က BRICS လူငယ်စွမ်းအင် အေဂျင်စီနှင့် Rosatom တို့နှင့် ပူးပေါင်း၍ စီစဉ်ကျင်းပခဲ့သည်။

ကိုးကား- RT

ဘာသာပြန်ဆိုသူ - ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရန်ကုန် ဇွန် ၁၁

၂၀၂၅ အာဆီယံ ယူ-၁၉ အမျိုးသမီး ချန်ပီယံရှစ်ပြိုင်ပွဲ အုပ်စုဒုတိယနေ့ကို ယနေ့တွင် ဗီယက်နမ်နိုင်ငံ၌ ဆက်လက် ကျင်းပရာ မြန်မာအသင်းက လာအိုအသင်း ကို ခြောက်ဂိုးပြတ်အနိုင်ရပြီး ဆီမီးဖိုင်နယ် တက်ရောက်ရန် အခွင့်အရေးရှိလာသည်။ 
မြန်မာ ယူ-၁၉ အမျိုးသမီးလူငယ် လက်ရွေးစင်အသင်းသည် လာအိုအသင်း ကို ဂိုးဒါဇင်ဝက်ဖြင့် အနိုင်ယူပြီး ဆီမီး ဖိုင်နယ်တက်ရောက်ရန် အခွင့်အရေးရှိလာသည်။ အဖွင့်ပွဲတွင် အိမ်ရှင်ဗီယက်နမ် ကို အရေးနိမ့်ခဲ့သဖြင့် အုပ်စုပထမဖြစ်ခွင့် ဆုံးရှုံးလုနီးပါးဖြစ်သွားသည့်မြန်မာအသင်းသည် ဆီမီးဖိုင်နယ်တက်ရောက်ရန် လက်ကျန်နှစ်ပွဲကို အာရုံစိုက်ကစားနေပြီး နောက်ဆုံးပွဲတွင် တီမောအသင်းကို အနိုင်ရပါက နောက်တစ်ဆင့်တက်ရောက်ခွင့် ရနိုင်မည်ဖြစ်သည်။

မြန်မာယူ-၁၉ အမျိုးသမီးအသင်းသည် ဗီယက်နမ်နှင့်ကစားခဲ့သည့် ပွဲထွက် လူစာရင်းကို အပြောင်းအလဲပြုလုပ်ထားပြီး မတူညီသည့် လူစာရင်းဖြင့် ပွဲထွက်လာ ကာလှလှထွေး(ဂိုး)၊ မင်းမင်း၊ သီရိနန္ဒာစိုး၊ ယုယုနိုင်၊ သဲအိလှိုင် နှင်းစန္ဒာဝင်း၊ ကေသွယ် ဖြိုးဦး၊ အိသက်ဖြိုး၊ ဒေစီအောင်၊ စုစုခင်၊ ယဉ်လွန်းအိမ်တို့ကိုအသုံးပြုခဲ့သည်။ မြန်မာ အသင်းသည် ပွဲစကတည်းက တိုက်စစ်ဖွင့်ကစားခဲ့ပြီး ၁၈ မိနစ်တွင် အဖွင့်ဂိုးစတင် သွင်းယူနိုင်ခဲ့ကာ ပထမပိုင်းမှာပင် သုံးဂိုး ပြတ်အနိုင်ရနေသည်။ ပထမပိုင်းတွင် မြန်မာအသင်းအတွက် ဂိုးများကို ၁၈ မိနစ် တွင် ဒေစီအောင်၊ ၂၈ မိနစ်တွင် စုစုခင်နှင့် ၄၃ မိနစ်တွင် ယဉ်လွန်းအိမ်တို့က သွင်းယူခဲ့သည်။ ဒုတိယပိုင်းတွင်လည်း မြန်မာအသင်းကသာ ပွဲကိုထိန်းချုပ်နိုင်ခဲ့ပြီး ၄၆ မိနစ်တွင် ဒေစီအောင်၊ ၅၆ မိနစ်တွင် စုစုခင်၊ ၇၂ မိနစ်တွင် အေးအေးစိုးတို့က ဂိုးများ ထပ်မံသွင်းယူခဲ့သည်။ မြန်မာအသင်းသည် အုပ်စုနောက်ဆုံးပွဲအဖြစ် ဇွန်လ ၁၃ ရက်တွင် တီမောအသင်းနှင့် ယှဉ်ပြိုင်ကစားရမည် ဖြစ်သည်။
မောင်သော်

အော့တဝါ  ဇွန် ၁၁

ဖုန်း သို့မဟုတ် တက်ဘလက်ကို နေ့စဉ် နှစ်နာရီကျော်ကြာအသုံးပြုသည့် ဆယ်ကျော်သက်များ၌ စိုးရိမ်သောကနှင့် စိတ်ကျဝေဒနာဝင်နိုင်ခြေ ပုံမှန်ထက်မြင့်တက်လာနိုင်ကြောင်း သုတေသနပညာရှင်များက ဇွန် ၁၀ ရက်တွင် ပြောကြားသည်။

ကနေဒါ သုတေသနပညာရှင်များ၏ လေ့လာတွေ့ရှိချက်အရ တစ်ရက်လျှင် ဖုန်းသုံစွဲချိန် နှစ်နာရီကျော်ရှိသော ဆယ်ကျော်သက်များ၌ စိုးရိမ်သောကဝေဒနာဝင်နိုင်ခြေ ပုံမှန်ထက် နှစ်ဆ၊ စိတ်ကျဝေဒနာဝင်နိုင်ခြေ ပုံမှန်ထက် လေးဆမြင့်တက်လာနိုင်ကြောင်း သုတေသနပညာရှင်များက ပြောကြားသည်။

ဆယ်ကျော်သက်များ ဖုန်းကြည့်ချိန်ကြာမြင့်မှုကြောင့် စိတ်ကျန်းမာရေးပြဿနာများပေါ်လာနိုင်ခြေ မြင့်မားလာမှုပြဿနာမှာ မျှော်လင့်ထားသည်ထက် ပိုဆိုးနေကြောင်း ကနေဒါ သုတေသနပညာရှင်များက သတိပေးထားသည်။

သို့ဖြစ်ရာ မိဘအုပ်ထိန်းသူများအနေဖြင့် ဆယ်ကျော်သက်များ ဖုန်းကြည့်ချိန်ကို တစ်ရက်နှစ်နာရီထက်မပိုစေရန် ကန့်သတ်သင့်ပြီး ကိုယ်လက်လှုပ်ရှားမှုပြုလုပ်ချိန်ကို မြှင့်တင်ပေးသင့်ကြောင်း၊ အသက် ၁၂ နှစ်နှင့် ၁၇ နှစ်ကြား ဆယ်ကျော်သက်လူငယ်ဦးရေ ၅၈၀ တို့ကို ကိုးလကြာအချိန်ယူလေ့လာခဲ့ပြီးနောက် ၎င်းတို့၏ တွေ့ရှိချက်ကို တင်ပြခဲ့ခြင်းဖြစ်ကြောင်း ကနေဒါ သုတေသနပညာရှင်များက ပြောကြားသည်။

Source: ရတနာပုံသတင်းစာ

၂၀၂၇ အာရှဖလား တတိယအဆင့်ခြေစစ်ပွဲ အုပ်စု(E)ဒုတိယပွဲအဖြစ် မြန်မာအသင်းနှင့် ပါကစ္စတန်အသင်းသည် ဇွန် ၁၀ ရက်က ရန်ကုန်မြို့ရှိ သုဝဏ္ဏကွင်း၌ယှဉ်ပြိုင်ကစားရာ မြန်မာ့လက်ရွေးစင်အသင်းက တစ်ဂိုး-ဂိုးမရှိဖြင့် အနိုင်ရခဲ့သည်။

မြန်မာဘောလုံးပရိသတ်များ၏ တစ်ခဲနက်လာရောက်အားပေးမှုနှင့်အတူ မြန်မာ့လက်ရွေးစင်အသင်းသည် အိမ်ကွင်း၌ ပါကစ္စတန်အသင်းကို အနိုင်ကစားခဲ့သည်။ ထို့ကြောင့် မြန်မာ့လက်ရွေးစင်အသင်းသည် အာရှဖလား တတိယအဆင့်ခြေစစ်ပွဲတွင် နှစ်ပွဲဆက်အနိုင်ရရှိပြီး ခြေစစ်ပွဲအောင်မြင်ရန်အခွင့်အရေး ပိုကောင်းလာခဲ့သည်။ ပါကစ္စတန်အသင်းမှာမူ နှစ်ပွဲဆက်အရှုံးကြောင့် လာမည့်ပွဲများတွင် ရုန်းကန်ရမည်ဖြစ်သည်။

မြန်မာ့လက်ရွေးစင်အသင်း နည်းပြချုပ်ဦးမျိုးလှိုင်ဝင်းသည် ဇင်ညီညီအောင်(ဂိုး)၊ ဟိန်းဖြိုးဝင်း၊ သီဟထက်အောင်၊ စိုးမိုးကျော်၊ နန္ဒကျော်၊ ဇော်ဝင်းသိန်း၊ ကျော်မင်းဦး၊ လွင်မိုးအောင်၊ ဟိန်းထက်အောင်၊ မောင်မောင်လွင်၊ သန်းပိုင်တို့ကို ပွဲထွက်လူစာရင်းတွင် အသုံးပြုခဲ့သည်။ မြန်မာ့လက်ရွေးစင်အသင်းသည် ပွဲစကတည်းက တိုက်စစ်ဖွင့်ကစားခဲ့ပြီး ပါကစ္စတန်အသင်းကလည်း ခံစစ်အသားပေးကာ တန်ပြန်တိုက်စစ်ဖြင့် ကစားခဲ့သည်။

ပထမပိုင်းတွင် မြန်မာအသင်းသည် ဂိုးရနိုင်သည့် အခွင့်အရေးသုံးကြိမ်ထက် မနည်းရသော်လည်း ၄၁ မိနစ်တွင် သန်းပိုင်သွင်းယူသည့် ဂိုးသာရခဲ့ခြင်းဖြစ်ပြီး ပထမပိုင်း ကတည်းက အနိုင်ရနေခြင်းဖြစ်သည်။

ပထမပိုင်းရလဒ်အတိုင်း ပြီးဆုံးခဲ့

ဒုတိယပိုင်းတွင် နှစ်သင်းစလုံးကစားသမားများ ပြောင်းလဲကာ တိုက်စစ်မြှင့်ခဲ့ပြီး အခွင့်အရေးကိုယ်စီရသော်လည်း အသုံးမချနိုင်သဖြင့် ပထမပိုင်းရလဒ်အတိုင်း ပြီးဆုံးခဲ့ခြင်းဖြစ်သည်။

အာရှဖလား တတိယအဆင့်ခြေစစ်ပွဲ အုပ်စု(E)တွင် မြန်မာအသင်းက နှစ်ပွဲကစားခြောက်မှတ်ရထားပြီး ပါကစ္စတန်အသင်းမှာမူ နှစ်ပွဲစလုံးရှုံးကာ အမှတ်မရသေးပေ။

အဝေးကွင်းကစားရမည်

မြန်မာအသင်းသည် အုပ်စုတတိယပွဲအဖြစ် အောက်တိုဘာ ၉ ရက်တွင် ဆီးရီးယားအသင်းနှင့် အဝေးကွင်းကစားရမည်ဖြစ်သည်။

ရဲရင့်လွင်၊ ဓာတ်ပုံ-သော်လေး

MOI