အီဒင်ဘာ့ဂ် ဇူလိုင် ၂၁

ရိုးစင်းသည့်မျက်လုံးစစ်ဆေးနည်းတစ်မျိုးသည် လာမည့် ၁ဝ နှစ်အတွင်း နှလုံးရုတ်တရက် ဖောက်နိုင်ခြေ သို့မဟုတ် လေဖြတ် နိုင်ခြေ ရှိ၊ မရှိကို ခန့်မှန်းနိုင်ကြောင်း ဇူလိုင် ၂၀ ရက် သတင်း များအရ သိရသည်။

မျက်လုံးနောက်ဘက်အတွင်း အာရုံခံလွှာ သွေးကြောများ၏ ဓာတ်ပုံများကို လူ့ဉာဏ်ရည်တု နည်းပညာ (Al) အကူအညီသုံး၍ လေ့လာဆန်းစစ်ခြင်းဖြင့် လာမည့် ၁၀ နှစ်အတွင်း နှလုံးရုတ်တရက် ဖောက်နိုင်ခြေနှင့် လေဖြတ်နိုင်ခြေ ရှိ၊ မရှိကို ကြိုတင်ခန့်မှန်းနိုင်သည်ဟု စကော့တလန် သုတေသနပညာရှင်များက ပြောကြားကြောင်း သိရသည်။

အလင်းအာရုံခံလွှာ သွေးကြောများ ပျက်စီးနေခဲ့ပါက သို့မဟုတ် ကျဉ်းမြောင်းနေပါက လာမည့် ၁ဝ နှစ်အတွင်း လေဖြတ်နိုင်ခြေနှင့် နှလုံးရုတ်တရက်ဖောက်နိုင်ခြေတို့ မြင့်တက်လာနိုင်ကြောင်း သုတေသနပညာရှင်များ၏ အဆိုအရ သိရသည်။

လက်တွေ့စမ်းသပ်မှုမှပေါ်ထွက်လာသည့် ရလဒ်များအရ မိမိတို့၏ AI နည်းပညာသုံး မျက် လုံးစစ်ဆေးနည်းသည် လာမည့် ၁ဝ နှစ်အတွင်း နှလုံးရုတ်တရက် ဖောက်နိုင်ခြေနှင့် လေဖြတ်နိုင် ခြေ ရှိ၊ မရှိကို ၂၀ ရာခိုင်နှုန်း တိကျစွာ ခန့်မှန်းနိုင်သည်ဟု စကော့တလန် သုတေသနပညာ ရှင်များက ပြောကြားကြောင်း သိရသည်။

ရတနာပုံသတင်းစာ

Photo: Yahoo Finance

အင်ကာရာ ဇူလိုင် ၂၁

Pfizer ကုမ္ပဏီ၏ ကိုရိုနာ ဗိုင်းရပ်ကာကွယ်ဆေးကြောင့် မျက်လုံးထိခိုက်ပျက်စီးနိုင်ခြေ မြင့်တက်လာနိုင်ကြောင်း သုတေသနပညာရှင်များ၏ အဆိုကို ကိုးကား၍ ဇူလိုင် ၂၀ ရက်သတင်း များအရ သိရသည်။

တူကီယဲနိုင်ငံမှ သုတေသနပညာရှင်များသည် Pfizer ကိုရိုနာ ဗိုင်းရပ်ကာကွယ်ဆေး ပထမ အလုံး မထိုးနှံမီနှင့် ဒုတိယအလုံး ထိုးနှံပြီး နှစ်လအကြာတို့၌ မျက်လုံးမျက်ကြည်လွှာ၏ အတွင်း ဘက်ပိုင်းအလွှာဖြစ်သော Endothelium အလွှာ၏ ပြောင်းလဲမှုများကို လေ့လာခဲ့ကြသည်။

လေ့လာချက်မှပေါ်ထွက်လာသည့် ရလဒ်များအရ Pfizer ကာကွယ်ဆေးကို နှစ်လုံးအပြည့် ထိုးနှံပြီးချိန်တွင် မျက်ကြည်လွှာ ထူထဲလာပြီး Endothelium အလွှာကို ဖွဲ့စည်းပေးထားသည့် ဆဲလ်များအရေအတွက် ကျဆင်းလာသည်ကို တွေ့ရကြောင်း သုတေသနပညာရှင်များက ပြောကြားသည်။

အထက်ပါအပြောင်းအလဲများကို ထောက်ရှုပါက Pfizer ကိုရိုနာဗိုင်းရပ် ကာကွယ်ဆေးထိုးနှံ ထားသူများ၌ မျက်လုံး၏ Endothelium အလွှာ ယာယီအားဖြင့် အားနည်းသွားနိုင်သည်ကို တွေ့ရ ကြောင်း သုတေသနပညာရှင်များ က ပြောကြားသည်။

မျက်ကြည်လွှာ ထူထဲလာမှုနှင့် Endothelium ဆဲလ်များ လျော့နည်းလာမှုတို့ကြောင့် Corneal Edema၊ Bullous Keratopathy ကဲ့သို့သော မျက်လုံးရောဂါများ ဖြစ်ပွားနိုင်သည်ဟု တူကီယဲ သုတေသနပညာရှင်များက ပြောကြားကြောင်း သိရသည်။

ရတနာပုံသတင်းစာ

နယူးယောက် ဇူလိုင် ၂၀

အူရောင်ငန်းဖျားရောဂါ(တိုက်ဖွိုက်)ဖြစ်ပွားစေသည့် Salmonella Enterica Serovar Typhi (S. Typhi) ခေါ် ဗက်တီးရီးယားများက အသုံးများသည့် ပဋိဇီဝဆေးဒဏ်ခံနိုင်ရည်ရှိသော ဗက်တီးရီးယားအဖြစ် ပြောင်းလဲလာကြောင်း သုတေသနပညာရှင်များ၏ အဆိုကို ကိုးကား၍ ဇူလိုင်၁၉ ရက်တွင်ဖော်ပြထားသည်။

အမေရိကန်နိုင်ငံ စတန်းဖို့ဒ် တက္ကသိုလ်မှ သုတေသနပညာရှင်များသည် ဘင်္ဂလားဒေ့ရှ်၊ အိန္ဒိယ၊ နီပေါနှင့် ပါကစ္စတန်နိုင်ငံတို့မှ တိုက်ဖွိုက်လူနာများထံမှရယူထားသည့် S.Typhi ဗက်တီးရီးယား နမူနာ ၇၆၀ဝ ကျော်၏ မျိုးဗီဇများ ကို လေ့လာခဲ့ကြသည်။

လေ့လာချက်မှပေါ်ထွက်လာသည့်ရလဒ်များအရ S.Typhi ဗက်တီးရီးယားများမှာ ပဋိဇီဝဆေးဒဏ်ခံနိုင်ရည်ရှိလာသော ဗက်တီးရီးယားများအဖြစ် မျိုးဗီဇပြောင်းလာသည် ကိုတွေ့ရကြောင်း သုတေသနပညာရှင်များကပြောကြားခဲ့သည်။ ထို့ပြင် S.Typhi ဗက်တီးရီးယား၏ ခေတ်သစ်ပဋိဇီဝဆေးများ လိုက်မမီနိုင်လောက်အောင် မြန်ဆန်နေကြောင်း သိပ္ပံပညာရှင်များက သတိပေးထားသည်။

တိုက်ဖွိုက်ရောဂါကို တစ်ကမ္ဘာလုံး အတိုင်းအတာအရ လူပေါင်း ၁၁ သန်းထိ နှစ်စဉ်ခံစားနေရပြီး သေဆုံးမှုနှုန်းမှာလည်း နှစ်စဉ် ၁၀၀၀၀၀ ခန့်ထိရှိသည်။ 

သို့ရာတွင် S.Typhi ဗက်တီးရီးယားများ မျိုးဗီဇပြောင်းလဲလာမှုကြောင့် တိုက်ဖွိုက်ရောဂါကို ကုသရာတွင်အသုံးပြုနေသည့် ပဋိဇီဝဆေးများ ထိရောက်မှုမှာ ကျဆင်းသွားနိုင်ကြောင်း သုတေသနပညာရှင်များက ပြောကြားခဲ့ကြောင်း သိရသည်။

ရတနာပုံသတင်းစာ

နယူးယောက်   ဇူလိုင် ၂၀

ညပိုင်းအိပ်ပျော်ရန် အခက်အခဲရှိသူများအနေဖြင့် နာတာရှည် ရောင်ရမ်းမှုပြဿနာရှိနေပါက စိတ်ကျဝေဒနာခံစားရနိုင်ခြေ ပုံမှန်ထက် မြင့်မားနေတတ်ကြောင်း ဇူလိုင် ၁၉ ရက် သတင်းများတွင် ဖော်ပြထားသည်။

ညပိုင်းအိပ်ပျော်ရန် အခက်အခဲရှိသူ သက်ကြီးပိုင်းများအနေဖြင့် ရောင်ရမ်းမှုပြဿနာရှိခဲ့ပါက စိတ်ကျရောဂါခံစားရနိုင်ခြေ ပုံမှန်ထက် သုံးဆမြင့်တက်လာနိုင်ကြောင်း ကယ်လီဖိုးနီးယား တက္ကသိုလ်(လော့စ်အိန်ဂျလိစ်)မှ အမေရိကန်သုတေသနပညာရှင်များက ပြောကြားသည်။

အမေရိကန် သုတေသနပညာရှင်များသည် ညဘက်အိပ်မပျော်နိုင်မှုပြဿနာရှိသူ ၅၃ ဦးပါဝင်သည့် အသက် ၆ဝ အထက် လူပေါင်း ၁၆၀ ကို လက်တွေ့စမ်းသပ်မှုများ ပြုလုပ်ခဲ့သည်။

လက်တွေ့စမ်းသပ်မှုတွင် ပါဝင်သော လူနာများကို ရေတို ကိုယ်တွင်းရောင်ရမ်းမှုဖြစ်စေတတ်သော Endoxin ခေါ် ဆေးဝါးတစ်မျိုး တိုက်ကျွေး၍ စောင့်ကြည့်ခဲ့သည်။

စမ်းသပ်မှုမှ ပေါ်ထွက်လာသည့် ရလဒ်များအရ ညပိုင်းအိပ်မရမှုပြဿနာရှိနေသူများ၌ ကိုယ်တွင်းရောင်ရမ်းမှုပြဿနာရှိခဲ့ပါက စိတ်ကျရောဂါဖြစ်နိုင်ခြေ ပုံမှန်ထက် သုံးဆမြင့်တက်လာသည်ကို တွေ့ရကြောင်း သုတေသနပညာရှင်များက ပြောကြားသည်။

ရတနာပုံသတင်းစာ

Photo: Technology Networks

ကိုပင်ဟေဂင်   ဇူလိုင် ၁၇

ကလေးဘဝ ကာကွယ်ဆေးများတွင် ပါဝင်သည့် အလူမီနီယံ သတ္တုဓာတ်နှင့် ရေရှည်ကျန်းမာရေးပြဿနာများကြားဆက်စပ်မှုမရှိကြောင်း သုတေသနပညာရှင်များ၏ အဆိုကိုကိုးကား၍ ဇူလိုင် ၁၆ ရက် သတင်းများတွင် ရေးသားတင်ပြထားသည်။

ပိုမိုအားကောင်းသော ခုခံအားစနစ်တုံ့ပြန်မှုကို တည်ဆောက်ရာတွင် လူ့ကိုယ်ခန္ဓာကို ကူညီနိုင်ရေးအတွက် ကလေးများအတွက် ထုတ်လုပ်သည့် ရောဂါကာကွယ်ဆေးများ၌ အလူမီနီယံသတ္တုဓာတ်ကို ထည့်သွင်းလေ့ရှိသည်။

သို့ရာတွင် ၎င်းကာကွယ်ဆေးများ၌ ပါဝင်သည့် အလူမီနီယံသတ္တုဓာတ်များသည် အော်တစ်ဇင်ရောဂါ၊ ပန်းနာရင်ကျပ်ရောဂါနှင့် ခုခံအားစနစ် ဖောက်ပြန်မှုရောဂါများကဲ့သို့ ရေရှည်ကျန်းမာရေးပြဿနာများနှင့် ဆက်စပ်နေနိုင်သည်ဟူသော အယူအဆများလည်း ပေါ်ထွက်လာခဲ့သည်။

သို့ရာတွင် ဒိန်းမတ်သုတေသနပညာရှင်များ၏ လေ့လာတွေ့ရှိချက်အရ ကလေးဘဝထိုးနှံရသည့် ကာကွယ်ဆေးများတွင် ပါဝင်သည့် အလူမီနီယံ သတ္တုဓာတ်သည် အထက်ပါ ရေရှည်ကျန်းမာရေးပြဿနာများနှင့် ဆက်စပ်မှုမရှိကြောင်း သိရသည်။

ဒိန်းမတ် သုတေသနပညာရှင်များသည် ၁၉၉၇ ခုနှစ်နှင့် ၂၀၁၈ ခုနှစ်ကြား မွေးဖွားခဲ့သော ကလေး ၁ ဒသမ ၂ သန်းကျော်တို့၏ အချက်အလက်များကို လေ့လာပြီးနောက် ၎င်းတို့၏ တွေ့ရှိချက်ကို တင်ပြခဲ့ကြခြင်းဖြစ်သည်။

ရတနာပုံသတင်းစာ

အော့တဝါ ဇူလိုင် ၁၇ 
Ozempic ကဲ့သို့ GLP-1 အုပ်စုဝင်ဆေးများကို သုံးစွဲသူများ၌ အစာပြွန်လမ်းကြောင်း အက်စစ် မြန်ဆန်လာမှုပြဿနာနှင့် ရင်ဆိုင်ရနိုင်ခြေ မြင့်မားနေနိုင်ကြောင်း ဇူလိုင် ၁၆ ရက် သတင်းများအရ သိရသည်။

အထူးသဖြင့် GLP- 1 ဆေးများ သုံးစွဲနေသူများမှာ ပုံစံ-၂ ဆီးချို ရောဂါလူနာများဖြစ်ကြပါက အစာပြွန်လမ်းကြောင်းတစ်လျှောက် အက်စစ်မြန်ဆန်မှုရောဂါ (GERD) ဖြစ်နိုင်ခြေ ပို၍မြင့်မားနေနိုင်ကြောင်း သိရသည်။

ကနေဒါ သုတေသနပညာရှင်များသည် GLP -1ဆေးများသုံးစွဲနေသည့် ပုံစံ-၁ ဆီးချိုလူနာ ၂၄၇၀၀ နှင့် SGLT-1 အုပ်စုဝင်ဆေးများသုံးစွဲနေရသည့် ပုံစံ-၂ ဆီးချိုလူနာ ၈၉၀၀၀ ကျော်တို့ကို နှိုင်းယှဥ် လေ့လာခဲ့ကြသည်။

လေ့လာချက်မှပေါ်ထွက်လာသည့် ရလဒ်များအရ GLP-1 သုံးစွဲသူလူနာများသည် SGLT -1 ဆေးသုံးစွဲသူ လူနာများထက် GERD ရောဂါဖြစ်နိုင်ခြေ ပို၍မြင့် မားနေတတ်ကြောင်း သိရသည်။

မိမိတို့၏ လေ့လာတွေ့ရှိချက် အရ GLP- 1 ဆေးများသုံးစွဲနေသည့် ပုံစံ-၂ ဆီးချိုလူနာများ၌ GERD ရောဂါပေါ်လာနိုင်ခြေ ပုံမှန်ထက်၂၇ ရာခိုင်နှုန်း ပိုမြင့်မားနေတတ်သည်ကို တွေ့ရကြောင်း သုတေသန ပညာရှင်များက ပြောကြားသည်။

Ref: Russia Today

Trs: KKO

YDNB Newspaper

Photo -MDPI

ထိုင်းနိုင်ငံတွင် ကျင်းပပြုလုပ်မည့် (၃၈) ကြိမ်မြောက် Thai King’s Cup ၂၀၂၅ ပိုက်ကျော်ခြင်းပြိုင်ပွဲ၌ ဝင်ရောက်ယှဉ်ပြိုင်မည့် မြန်မာ့လက်ရွေးစင် ပိုက်ကျော်ခြင်းကစားသမား (၂၅)ဦး၏ စာရင်းကို ဇူလိုင် (၁၇)ရက်တွင် မြန်မာနိုင်ငံ ပိုက်ကျော်ခြင်းအဖွဲ့က အသိပေးထုတ်ပြန်ထားသည်။

ပြိုင်ပွဲကို ဇူလိုင်လ (၂၂)ရက်မှ (၂၇) ရက်အထိ ကျင်းပသွားမည်ဖြစ်ပြီး အဆိုပါ ပြိုင်ပွဲ၌ လက်ရွေးစင်အမျိုးသားပိုက်ကျော်ခြင်း ကစားသမား (၁၂) ဦး၊ အမျိုးသမီး ကစားသမား (၁၃)ဦးကို ရွေးချယ်ထားကြောင်း သိရသည်။

ပြိုင်ပွဲဝင် မြန်မာ့လက်ရွေးစင် အားကစားသမားများအတွက် စုစုပေါင်း ကျပ်(၇,၃၇၃,၀၀၀)တန်ဖိုးရှိ အားကစားဝတ်စုံများကို Glory Sport အားကစားဝတ်စုံ လုပ်ငန်းက Main Sponsor အဖြစ် ပံ့ပိုးကူညီပေးထားကြောင်းလည်း သိရသည်။

မြန်မာ့လက်ရွေးစင် ပိုက်ကျော်ခြင်းအဖွဲ့သည် ပြီးခဲ့သည့် ဇွန်လ(၁)ရက်မှ (၄)ရက်အထိ ကျင်းပခဲ့သည့် China – A sean Cup 2025 ပြိုင်ပွဲ၌ ရွှေတံဆိပ်(၂)ခု ကြေးတံဆိပ် (၂) ခုတို့ကို ဆွတ်ခူးပေးထားခဲ့သေးသည်။

Popular Myanmar

ရန်ကုန် ဇူလိုင် ၁၇

ဘရာဇီးလ်နိုင်ငံ ဘရာဇီးလ်နိုင်ငံတကာပူးပေါင်းဆောင်ရွက်ရေးအေဂျင်စီ (Brazilian Cooperation Agency-ABC)မှ မြန်မာနိုင်ငံသို့ လူသားချင်းစာနာထောက်ထားမှုဆိုင်ရာ ပံ့ပိုးမှုတစ်ရပ်အနေဖြင့် ကျန်းမာရေးဝန်ကြီးဌာန ပြည်သူ့ကျန်းမာရေးဦးစီးဌာန၏ ကာကွယ်ဆေးထိုးနှံခြင်းလုပ်ငန်းများတွင် အသုံးပြုရန်အတွက် လှူဒါန်းသည့် အမေရိကန်ဒေါ်လာ ကိုးသောင်းခန့်တန်ဖိုးရှိ ဘီစီဂျီကာကွယ်ဆေး ငါးသိန်း Doses သည် ယမန်နေ့ညနေပိုင်းက MAI လေကြောင်းလိုင်းဖြင့် ရန်ကုန်အပြည်ပြည်ဆိုင်ရာလေဆိပ်သို့ ရောက်ရှိခဲ့သည်။

အဆိုပါ ဘီစီဂျီကာကွယ်ဆေး (BCG vaccine) အားမွေးကင်းစ ကလေးငယ်များ မွေးဖွားပြီးသည်မှ ၂၄ နာရီအတွင်း ထိုးနှံပေးရန်လိုအပ်ပြီး မွေးဖွားပြီး ၂၄ နာရီအတွင်းမထိုးနှံနိုင်ပါက အသက်နှစ်လမတိုင်မီတွင်လည်းကောင်း၊ အသက်နှစ်လအရွယ်တွင် အခြားကာကွယ်ဆေးများနှင့် ပူးတွဲ၍လည်းကောင်းထိုးနှံခြင်းအားဖြင့် မြန်မာနိုင်ငံ၏ ပြင်းထန်တီဘီရောဂါကာကွယ်ရေးလုပ်ငန်းများ အောင်မြင်စွာဆောင်ရွက်ရန်အတွက် အထောက်အကူဖြစ်စေကြောင်း သိရသည်။

MOI

လန်ဒန်  ဇူလိုင် ၁၆

အဆစ်အမြစ် ရောင်ရမ်းမှု၊ နာကျင်ကိုက်ခဲမှုများကို နှစ်လအတွင်း လျှော့ချပေးနိုင်မည့် လေ့ကျင့်ခန်းပြုလုပ်မှုပုံစံတစ်မျိုးကို သုတေသနပညာရှင်များက ဖော်ထုတ်ထားကြောင်း ဇူလိုင် ၁၅ရက်သတင်းများအရ သိရသည်။

အထက်ပါလေ့ကျင့်ခန်း ပြုလုပ်မှုပုံစံကို သွေးလေးဖက်နာရောဂါလူနာများအတွက်ရည်ရွယ်၍ ဖော်ထုတ်ထားခြင်းဖြစ်ကြောင်း ဗြိတိန်နိုင်ငံ လန်ဒန်ဘုရင့်ကောလိပ်မှ သုတေသနပညာရှင်များက ပြောကြားသည်။

အဆစ်အမြစ် ရောင်ရမ်းမှုရောဂါလူနာများနှင့် သွေးလေးဖက်နာရောဂါ လူနာများအနေဖြင့် ကြွက်သားသန်မာရေး လေ့ကျင့်ခန်းများကို သီတင်းတစ်ပတ်လျှင် နှစ်ကြိမ်ထိ အချိန်ပေးလုပ်ခဲ့ပါက နှစ်လအတွင်း နာကျင်ကိုက်ခဲမှု ပြဿနာကို လျှော့ချနိုင်ကြောင်း သိရသည်။

လက်ရှိတွင် ဗြိတိန်သုတေသနပညာရှင်များသည် သွေးလေးဘက်နာရောဂါလူနာများနှင့် အဆစ်အမြစ်ရောင်ရမ်းမှုရောဂါလူနာများကို အထက်ပါလေ့ကျင့်ခန်းပြုလုပ်မှုပုံစံနှင့် ဆေးဝါးများ တွဲဖက်၍ စမ်းသပ်ကုသရန် စီစဉ်ထားကြောင်း သိရသည်။

သွေးလေးဖက်နာရောဂါသည် ကျန်းမာသည့် အရိုးအဆစ်တစ်ရှူးများကို ခုခံအားစနစ်က မှားယွင်းတိုက်ခိုက်ချိန်တွင် ဖြစ်ပွားတတ်သည့် ရောဂါဖြစ်ကြောင်း သိရသည်။

ရတနာပုံသတင်းစာ

Photo: St.Andrew's Parks and Playground

ကမ္ဘာ့အသက်အကြီးဆုံး မာရသွန်အပြေးသမားအဖြစ် ယူဆရသည့် ဗြိတိန်-အိန္ဒိယနိုင်ငံသား Fauja Singh သည် ကားတိုက်မှုကြောင့် အသက် ၁၁၄ နှစ်အရွယ်တွင် ကွယ်လွန်သွားပြီဖြစ်ပါသည်။

Fauja Singh သည် ပန်ဂျပ်ပြည်နယ်ရှိ ၎င်း၏ မွေးရပ်ကျေးရွာလေး၌ လမ်းဖြတ်ကူးနေစဉ် အမည်မသိရသေးသူ မောင်းနှင်လာသော ကားဖြင့် ဝင်တိုက်မိသဖြင့်ဒေသခံများက ဆေးရုံသို့ အမြန်ဆုံးပို့ဆောင်ပေးကြသော်လည်း အချိန်မမီဘဲ ဆုံးပါးသွားပြီဖြစ်ကြောင်း ဒေသရဲတပ်ဖွဲ့က သတင်းထုတ်ပြန်ခဲ့ပါသည်။

Fauja Singh သည် အသက် ၁၀၀ ကျော်အထိ အသက်အရွယ်အလိုက် ကျင်းပသော မာရသွန်ပြေးပွဲများ ပါဝင်ယှဉ်ပြိုင်ကာ စံချိန်အကြိမ်ကြိမ် ချိုးနိုင်ပြီး ကမ္ဘာကျော်လာသူ တစ်ဦးဖြစ်ပါသည်။ အသက် ၈၉ နှစ် အရွယ် တွင် အပြေးပြိုင်ပွဲများတွင် စတင်ပြေးခဲ့ပြီး ၂၀၀၀ ပြည့်နှစ်မှ ၂၀၁၃ ခုနှစ် အတွင်း မာရသွန်အပြေးပြိုင်ပွဲတွင် ၉ ကြိမ်တိုင်တိုင် ဝင်ရောက် ယှဉ်ပြိုင် ပြီးနောက် နောက်ပိုင်းတွင် အနားယူခဲ့ပါသည်။ 

BBC အနေဖြင့် ၎င်းနှင့်နောက်ဆုံးအကြိမ် တွေ့ဆုံစဉ်က အင်တာဗျူးရာတွင် မိမိမှာ နေ့စဉ် ရွာတစ်ဝိုက် မိုင်အနည်းငယ်စီ လမ်းလျှောက်ကာ ကျန်းမာရေး ကို ဂရုစိုက်ရပါကြောင်း၊ လူတစ်ယောက်သည် မိမိခန္ဓာကိုယ်ကို မိမိ ကိုယ်တိုင်သာ ဂရုစိုက်ရမည် ဖြစ်ကြောင်း ပြောကြားဖူးပါသည်။

Fauja Singh ကွယ်လွန်မှုသတင်းကြောင့် ဂုဏ်ပြုစကားများ များစွာ ထွက်ပေါ်လာခဲ့ပါသည်။ အိန္ဒိယဝန်ကြီးချုပ်မိုဒီက Fauja Singh သည် မယုံကြည်နိုင်အောင် စိတ်ဓာတ်ခိုင်မာသူ အထူးချွန်ဆုံး အားကစား သမား ဟု ဂုဏ်ပြုပြောကြားလိုက်ပါသည်။ 

ကိုးကား- BBC

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃