ကမ္ဘာဒီးယားနိုင်ငံ၊ ဖနောင်ပင်မြို့၌ ဇူလိုင် ၇ ရက်မှ ဇူလိုင် ၁၂ ရက်အထိကျင်းပခဲ့သည့် အာရှလူငယ်သက်တန်းကြက်တောင်ပြိုင်ပွဲတွင်ဝင်ရောက်ယှဥ်ပြိုင်ခဲ့သည့် မြန်မာလူငယ်ကြက်တောင်အသင်းသည် ရွှေတံဆိပ်(၁၂)ခုအပါအဝင် ဆုတံဆိပ်(၂၃) ခုဆွတ်ခူးနိုင်ခဲ့ကြောင်း သိရသည်။

မြန်မာလူငယ်ကြက်တောင်အသင်းသည် ယူ-၁၅ ၊ ယူ-၁၇ နှင့် ယူ-၂၃ ပြိုင်ပွဲများတွင်ဝင်ရောက်ယှဥ်ပြိုင်ခဲ့ပြီးနောက် ရွှေတံဆိပ်(၁၂)ခု၊ ငွေတံဆိပ်(၃)ခုနှင့် ကြေးတံဆိပ်(၈)ခု(စုစုပေါင်း ၂၃ ခု)ဆွတ်ခူးနိုင်ခဲ့ခြင်းဖြစ်ကြောင်း သိရသည်။

အဆိုပါ မြန်မာလူငယ်ကြက်တောင်အသင်းကစား သမားများဖြစ်သည့် အမျိုးသား(၆)ဦးနှင့် အမျိုး သမီး(၆)ဦးတို့အပါအဝင် မြန်မာနိုင်ငံကြက်တောင်အဖွဲ့ချုပ် ဥက္ကဋ္ဌနှင့် အုပ်ချုပ်၊နည်းပြများသည် မ နက်ဖြန် ဇူလိုင် ၁၄ ရက်တွင် ရန်ကုန်မြို့သို့ပြန်လည်ရောက်ရှိမည်ဖြစ်ကြောင်း သိရသည်။

Popular Myanmar

စတော့ဟုမ်း ဇူလိုင် ၁၄

အမျိုးသမီးများ ရာသီသွေး မပေါ်မီခံစားရသည့် စိတ်ပိုင်းဆိုင်ရာနှင့် ရုပ်ပိုင်းဆိုင်ရာပြဿနာများ (PMS) မှာ ပြင်းထန်ခဲ့ပါက လေဖြတ်နိုင်ခြေနှင့် နှလုံးရုတ်တရက် ဖောက်နိုင်ခြေတို့ မြင့်မားလာနိုင်ကြောင်း ဇူလိုင် ၁၃ ရက် သတင်းများအရ သိရသည်။

အမျိုးသမီးအများစုအနေဖြင့် PMS ပြဿနာကို ခံစားကြရသော်လည်း အမျိုးသမီး သုံးပုံတစ်ပုံခန့် ၌ ပေါ်ထွက်လာသော PMS လက္ခဏာများမှာ ဆေးဝါးကုသမှု ခံယူရန် လိုအပ်လောက်အောင် ပြင်းထန်ကြောင်း သိရသည်။ 

ဆွီဒင် သုတေသနပညာရှင် များ၏အဆိုအရ PMS လက္ခဏာ များပြင်းထန်သည့် အမျိုးသမီးများတွင် လေဖြတ်နိုင်ခြေ ပုံမှန် ထက်၂၇ ရာခိုင်နှုန်း မြင့်တက်လာ နိုင်ပြီး နှလုံးခုန်နှုန်း မူမမှန်မှု ပြဿနာ ပေါ်လာနိုင်ခြေလည်း ပုံမှန်ထက် မြင့်တက်လာနိုင် ကြောင်း၊ နှလုံးခုန်နှုန်း မူမမှန်မှု ပြဿနာကြောင့် နှလုံးရုတ်တရက် ဖောက်နိုင်ခြေလည်း မြင့်တက်လာနိုင်ကြောင်း ဆွီဒင်သုတေသန ပညာရှင်များက ပြောကြားသည်။

သို့ရာတွင် PMS လက္ခဏာများ ပြင်းထန်မှုနှင့် နှလုံးသွေးကြောဆိုင်ရာ ရောဂါများပေါ်လာနိုင်ခြေ မြင့်မားမှုတို့ကြား မည်သို့ဆက်စပ်နေသည်ကို မသိရသေးကြောင်း ဆွီဒင် သုတေသနပညာရှင်များက ဝန်ခံထားသည်။

Ref: Sputnik News

Trs: KKO

YDNB Newspaper
 

ဝယ်လင်တန် ဇူလိုင် ၁၄ 
နယူးဇီလန်နိုင်ငံသည် ၎င်း၏ နိုင်ငံတကာပညာရေးဈေးကွက်ကို ၂၀၃၄ ခုနှစ်အရောက်တွင် နှစ်ဆ မြှင့်တင်ရန် စီစဉ်ထားကြောင်း ယနေ့သတင်းများတွင် ရေးသား ဖော်ပြထားသည်။

နယူးဇီလန်နိုင်ငံ အနေဖြင့်  အချိန်ပိုင်း အလုပ်လုပ်၍ ပညာ သင်ကြားနေကြသော ပြည်ပ ကျောင်းသားများအတွက် စည်းမျဉ်း စည်းကမ်းများ ဖြေလျှော့ပေးခြင်း အပါအဝင် လုပ်ငန်း အစီအမံများ ချမှတ်၍ နိုင်ငံတကာပညာရေး ဈေးကွက်ကို ချဲ့ထွင်ရန်စီစဉ်ထား ကြောင်း နယူးဇီလန်ပညာရေး ဝန်ကြီး အာရီကာစတန်းဖို့ဒ်က ယနေ့တွင် ထုတ်ဖော်ပြောကြား ထားသည်။

ယင်းအပြင် နယူးဇီလန် နိုင်ငံတကာပညာရေးဈေးကွက်၏ တန်ဖိုးကို ၂၀၃၄ ခုနှစ်တွင် နယူးဇီလန်ဒေါ်လာ ၇ ဒသမ ၂ ဘီလီယံ(အမေရိကန်ဒေါ်လာ ၄ ဒသမ ၃၂ဘီလီယံ)ထိ နှစ်ဆမြှင့်တင်ရန် ရည်ရွယ်ထားကြောင်း အာရီကာစတန်းဖို့ဒ်က ပြောကြား ထားသည်။

နယူးဇီလန်နိုင်ငံ၌ နိုင်ငံတကာ ကျောင်းသား၊ကျောင်းသူများ လာရောက်ပညာသင်ကြားမှုနှုန်းသည် ၂၀၂၃ ခုနှစ်မှစ၍ ဖြည်းဖြည်းမှန်မှန် မြင့်တက်လာခဲ့သည်။

နယူးဇီလန်နိုင်ငံ၏ လက်ရှိနိုင်ငံတကာ ပညာရေးဈေးကွက် တန်ဖိုးမှာ နယူးဇီလန်ဒေါ်လာ ၃ ဒသမ ၆ ဘီလီယံထိရှိသည်။

၂၀၂၄ ခုနှစ်တွင် နယူးဇီလန် နိုင်ငံ၌လာရောက်ပညာသင်ကြားသူ နိုင်ငံတကာ  ကျောင်းသား အရေအတွက်မှာ ၈၃၇၀၀ထိရှိခဲ့ကြောင်း သိရသည်။ 

Ref: Xinhua

Trs: KKO

YDNB Newspaper
 

နယူးယောက် ဇူလိုင် ၁၄ 

အထီးကျန်မှု ပြဿနာခံစား နေရသူများ၌ စိတ်ကျဝေဒနာဝင် ရောက်နိုင်ခြေ သိသိသာသာမြင့် တက်လာနိုင်ကြောင်း သုတေသနပညာရှင်များ၏အဆိုကို ကိုးကား ၍ ဇူလိုင် ၁၃ ရက် သတင်းများ အရ သိရသည်။

သုတေသန ပညာရှင်များ၏ လေ့လာတွေ့ရှိချက်အရ အထီး ကျန်မှုခံစားနေရသူ သက်ကြီးပိုင်းများအနက် ၅၀ ရာခိုင်နှုန်းမှာ စိတ်ကျဝေဒနာနှင့် ရင်ဆိုင်နေရ ကြောင်း သိရသည်။

နှိုင်းယှဉ်ကြည့်ပါက အထီး ကျန်မှုပြဿနာမရှိသူ သက်ကြီးပိုင်းများကြား၌ ၁၀ ရာခိုင်နှုန်း သည်သာ စိတ်ကျဝေဒနာခံစားရတတ်ကြောင်း သုတေသနပညာ ရှင်များက ပြောကြားသည်။

အမေရိကန်နိုင်ငံ ဟိုးတပ် တက္ကသိုလ် ဆေးကောလိပ်မှ သုတေသန ပညာရှင်များသည် သက်ကြီးပိုင်း ၄၇၀၀၀ ကျော်တို့၏ ကျန်းမာရေးနှင့် လူမှုရေးအချက် အလက်များကို လေ့လာစိစစ်ခဲ့ကြကြောင်း သိရသည်။

လေ့လာချက်မှပေါ်ထွက်လာ သည့်ရလဒ်များအရ အထီးကျန်မှု ပြဿနာခံစားရမှုအဆင့် မြင့်မားသူများ၌ စိတ်ကျန်းမာရေးနှင့်ရုပ် ကျန်းမာရေးပြဿနာများဝင်လာ နိုင်ခြေ သိသိသာသာ မြင့်မားနေ တတ်သည်ကို တွေ့ရကြောင်း သုတေသန ပညာရှင်များက ပြောကြားသည်။

အထီးကျန်မှု ပြဿနာရှိသူများအနေဖြင့် ၎င်းပြဿနာမရှိသူများနှင့်နှိုင်းယှဉ်ပါက စိတ်ကျဝေဒနာ ဝင်ရောက်နိုင်ခြေ ပုံမှန် ထက်ငါးဆမြင့်တက်လာတတ်ပြီး ရုပ်ပိုင်းဆိုင်ရာကျန်းမာရေး အခြေအနေလည်း ယိုယွင်းလာတတ်သည်ဟု သုတေသနပညာရှင်များက သုံးသပ်ထားကြောင်း သိရသည်။ 

Ref: Russia Today

Trs: KKO

YDNB Newspaper

Photo - Amaha

ကျောက်ဆည်၊ ဇူလိုင်-၁၅

မန္တလေးတိုင်းဒေသကြီး၊ ကျောက်ဆည်ခရိုင်၊ ကျောက်ဆည်မြို့နယ် သင်တောင်းအခြေခံပညာမူလတန်း ကျောင်းတွင် ယနေ့နံနက်ပိုင်းက ကျောက်ဆည်ခရိုင်ပြန်ကြားရေးနှင့်ပြည်သူ့ဆက်ဆံရေး ဦးစီးဌာနနှင့် အခြေခံ ပညာဦးစီးဌာနတို့ပူးပေါင်းပြီး ကျောင်းသား/ ကျောင်းသူများ စာဖတ်ရှိန်မြှင့်တင်ရေး အသိပညာပေး ဟောပြောပွဲ နှင့် နံရံကပ်စာစောင်ပြပွဲ ကျင်းပပြုလုပ်ခဲ့ကြောင်း သိရှိရသည်။

အသိပညာပေးဟောပြောပွဲတွင် သင်တောင်းအခြေခံပညာမူလတန်းကျောင်းမှ ကျောင်းအုပ်ဆရာမကြီး ဒေါ်ခင်မာဌေးက စာအုပ်စာပေလူ့မိတ်ဆွေဆိုသည့်အတိုင်း ငယ်ရွယ်စဉ်အချိန်ကပင် စာအုပ်စာပေများ ဖတ်ရှုသည့် အလေ့အကျင့်များဖြစ်အောင် အသိပညာပေးဟောပြောပွဲများ ကျင်းပပြုလုပ်ရခြင်းဖြစ်ကြောင်းနှင့် ကျောက်ဆည် ခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ဦးစီးအရာရှိဒေါ်ခင်နှင်းရီက စာပေဖတ်ရှုသူများသည် အမှားအမှန်ကို ဝေဖန်ပိုင်းခြားနိုင်ပြီး အကောင်းအဆိုးကို ခွဲခြားနိုင်သောကြောင့် အောင်မြင်တိုးတက်သူများ ဖြစ်ကြောင်းနှင့် အားလပ်သည့်အချိန်များတွင် စာအုပ်များဖတ်ရှုသွားကြစေလိုကြောင်း အသိပညာပေး ဟောပြော ခဲ့သည်။ 

အသိပညာပေးဟောပြောပွဲအပြီးတွင် ကျောင်းသား/ ကျောင်းသူများက ကျောက်ဆည်ခရိုင် ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ပြသထားသည့် ကလေးအလုပ်သမားပပျောက်ရေး၊ အရွယ်မရောက်သေးသည့် ကလေးသူငယ်များစစ်မှုထမ်းခြင်းမှ ကာကွယ်ခြင်းအသိပညာပေး နံရံကပ်စာစောင်များကို စိတ်ပါဝင်စားစွာ ကြည့်ရှုခဲ့ကြောင်း သိရသည်။

စုစုအေး(ကျောက်ဆည်)

မတ်လတွင် FIFA ဥက္ကဋ္ဌ Gianni Infantino ဦးဆောင်သော ကိုယ်စားလှယ် အဖွဲ့က FIFA ကလပ်ကမ္ဘာ့ဖလားဆုကို သမ္မတ ဒေါ်နယ် ထရမ့်ထံ အပ်နှင်းခဲ့သည်ဟု သိရှိရသည်။ ဇူလိုင် ၁၃ ရက်နေ့ ဗိုလ်လုပွဲ အပြီးတွင် အမေရိကန်သမ္မတက DAZN သို့ ပြောကြားရာတွင် FIFA ဥက္ကဋ္ဌက FIFA Club World Cup ဆုဖလား ကို အိမ်ဖြူတော် Oval Office တွင် အမှတ်တရထားရှိရန် ၎င်းကို ပေးအပ်ခဲ့သည် ဟုဆိုသည်။ 

ချန်ပီယံအသင်းဖြစ်သည့် Chelsea အတွက် ဖလားအသစ်တစ်ခု ထပ်မံ ပြုလုပ်ခဲ့ပြီး မူရင်းဖလားသည် Oval Office တွင် ရှိနေသည်ဟု ၎င်းက ပြောကြားခဲ့သည်။ FIFA မှ ထရမ့်၏ ပြောဆိုချက်နှင့်ပတ်သက်၍ မှတ်ချက် တစ်စုံတစ်ရာ ထုတ်ပြန်ခြင်းမရှိခဲ့ပေ။

ပုံမှန်အားဖြင့် ဗိုလ်စွဲအသင်းသည် မူရင်းဖလားကို ဂုဏ်ပြုချီးမြှင့်ပွဲ အခမ်းအနားတွင် ရရှိပြီး ၎င်းတို့၏ အောင်ပွဲကို ကျင်းပကြသည်။ ထို့နောက် ကျင်းပရေးကော်မတီမှ မိတ္တူဖလားကို ချီးမြှင့်ကာ မူရင်းဖလား ကို ပြန်လည်သိမ်းဆည်းလေ့ရှိသည်။

ချယ်လ်ဆီးသည် PSG ကို ဗိုလ်လုပွဲတွင် ၃-၀ ဖြင့် အနိုင်ရပြီး ကလပ် ကမ္ဘာ့ဖလားကို ရရှိခဲ့သည်။ ဆုတံဆိပ်ချီးမြှင့်ပွဲတွင် FIFA ဥက္ကဋ္ဌ Gianni Infantino က သမ္မတ Trump အား ရွှေတံဆိပ်တစ်ခုလည်း ပေးအပ် ခဲ့သည်။ 

လူမှုကွန်ရက်စာမျက်နှာ X (Twitter) တွင် ပရိသတ်များက ဟာသ ပြုလုပ်ကြသည်မှာ Trump အားပေးအပ်ခဲ့သော ရွှေတံဆိပ်သည် အမှန် တွင် Chelsea အတွက် ကလပ်ကမ္ဘာ့ဖလားပြိုင်ပွဲတွင် ပြင်ဆင်ချိန်၌ ပါဝင် ခဲ့သော Noni Madueke (ဗိုလ်လုပွဲမတိုင်မီ Arsenal သို့ပြောင်းရန် အင်္ဂလန်သို့ ပြန်သွားသဖြင့် ဗိုလ်လုပွဲတွင် မပါဝင်ခဲ့) ၏ တံဆိပ် ဖြစ်နိုင် သည်ဟု ပြောဆိုကြသည်။

၂၀၂၅ FIFA Club World Cup သည် ပုံစံအသစ်ဖြင့်ကျင်းပသည့် ပထမဆုံး ကလပ်ကမ္ဘာ့ချန်ပီယံပြိုင်ပွဲဖြစ်သည်။ ယခင်ကဲ့သို့ တိုက်ကြီး များ၏ ချန်ပီယံများကိုသာ ဖိတ်ကြားခြင်းမဟုတ်ဘဲ FIFA က အသင်း အရေအတွက်ကို ၃၂ သင်းအထိ တိုးမြှင့်ကာ ကမ္ဘာ့ဖလားကဲ့သို့ပင် ၈ အုပ်စုခွဲခဲ့သည်။ ကမ္ဘာ့ဘောလုံးအဖွဲ့ချုပ်၏ ထုတ်ပြန်ချက်အရ အဆိုပါ ပြိုင်ပွဲသည် ပရိသတ် ၂.၅ သန်းကျော်ကို ဆွဲဆောင်နိုင်ခဲ့ပြီး အမေရိကန် ဒေါ်လာ ၂ ဘီလီယံကျော် ဝင်ငွေရရှိခဲ့ကာ ဗိုလ်စွဲသည့်အသင်းသည် ဒေါ်လာ ၁၂၅ သန်းခန့် ရရှိခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်သမ္မတ ဒေါ်နယ်ထရမ့်က အမေရိကန်နိုင်ငံအတွင်းတွင် အားကစားနှင့်ပတ်သက်၍ အသုံးပြုပြောဆိုနေသော soccer ကို football အဖြစ် ပြောင်းလဲခေါ်ဝေါ်သုံးစွဲကြရန် ညွှန်ကြားချက် ထုတ်ပြန်နိုင်ကြောင်း DAZN ရုပ်မြင်သံကြား အစီအစဉ်သို့ ပြောကြားလိုက်ပါသည်။

အခြားသော အင်္ဂလိပ်စကားပြောနိုင်ငံအများစုတွင် အဆိုပါ အားကစားကို football ဟုသာ ခေါ်ဆိုလေ့ရှိပြီး အမေရိကန်တွင် soccer ဟု သုံးစွဲ ခေါ်ဆိုခြင်း ဖြစ်ပါသည်။ 

“မိမိအနေဖြင့် ထိုသို့ ပြောင်းလဲခြင်းကို ဆောင်ရွက်နိုင်မည်ဟု ထင်ပါသည်” ဟု ဒေါ်နယ်ထရမ့် အားကစားနည်း အမည်ပြောင်းလဲရန် အမိန့် ထုတ်ပြန်နိုင်ခြင်း ရှိ၊ မရှိ အင်တာဗျူးမေးမြန်းချက်အပေါ် ပြန်လည် ဖြေကြားသွားပါသည်။

ဒေါ်နယ်ထရမ့်သည် အမေရိကန်တွင် ဇူလိုင် ၁၃ ရက်က ကျင်းပသော ကမ္ဘာ့ဖလား ကလပ်ဗိုလ်လုပွဲအဖြစ် ယှဉ်ပြိုင်ကစားကြသော အင်္ဂလန် ပရီးမီးယားနာမည်ကြီး ချဲလ်ဆီးအသင်းနှင့် ပြင်သစ်နိုင်ငံ Paris Saint-Germain အသင်းတို့ ပွဲသို့ တက်ရောက် အားပေးကာ ဆုချီးမြှင့်ပေးခဲ့ ပါသည်။ 

ကိုးကား- TASS

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

တောင်အာဖရိကကျန်းမာရေးဝန်ကြီး အာရုန်မိုဆွာလီဒီက အမေရိကန် သမ္မတ၏ HIV/AIDS ရန်ပုံငွေအရေးပေါ်အစီအစဉ် (Pepfar) မှ ငွေကြေး ထောက်ပံ့မှုရုပ်သိမ်းခဲ့သော်လည်း နိုင်ငံ၏ ကမ္ဘာ့အထိပ်တန်း HIV/AIDS ကုသရေးအစီအစဉ် ပြိုလဲသွားမည်မဟုတ်ဟု ပြောကြားခဲ့သည်။

ဤသည်မှာ အမျိုးသားဘဏ္ဍာရေးဌာနမှ အဆိုပါအစီအစဉ်အတွက် ရန်ဒ် ၇၅၃ သန်း ထည့်ဝင်ခဲ့ပြီး ကမ္ဘာလုံးဆိုင်ရာပူးပေါင်း လက်တွဲဖော်များကလည်း ကုသမှုနှင့်သုတေသနလုပ်ငန်းများအတွက် ရန်ဒ် ၆၀၀ သန်း အပိုထည့်ဝင်ရန် ကတိပြုခဲ့ကြခြင်းကြောင့်ဖြစ်သည်ဟု ဆိုသည်။

ယခုနှစ်အစောပိုင်းက အမေရိကန်သမ္မတ ဒေါ်နယ်ထရမ့်အစိုးရသည် Pepfar ရန်ပုံငွေအားလုံးကို ရပ်ဆိုင်းမည်ဟု ကြေညာခဲ့သည်။ USAID ၏ ထောက်ပံ့မှုရုပ်သိမ်းခြင်းဆိုင်ရာဆုံးဖြတ်ချက်သည် အထူးသဖြင့် တောင် အာဖရိကကဲ့သို့သော နိုင်ငံများအတွက် ကြီးမားသော ငွေကြေး လိုအပ်ချက် ကို ဖြစ်ပေါ်စေခဲ့သည်။ တောင်အာဖရိကတွင် HIV/AIDS တိုက်ဖျက်ရေး လုပ်ငန်း၏ ၁၇% ခန့်ကို Pepfar မှ ထောက်ပံ့ခဲ့သည်။

ဗုဒ္ဓဟူးနေ့ (ဇူလိုင် ၉) က ပါလီမန်တွင် ၂၀၂၅-၂၀၂၆ ကျန်းမာရေးဌာန၏ ဘဏ္ဍာရေးအစီအစဉ်ကို တင်ပြရာတွင် မိုဆွာလီဒီက အမျိုးသား ကျန်းမာရေး ဌာန၏ အဓိကဦးစားပေးလုပ်ငန်း သုံးရပ်ကို ရှင်းလင်းတင်ပြခဲ့သည်။ ၎င်းတို့မှာ အမျိုးသားကျန်းမာရေးအာမခံ (NHI) အတွက် အများပြည်သူ ကျန်းမာရေးစနစ်ကို အားဖြည့်ခြင်း၊ HIV/AIDS နှင့် တီဘီကဲ့သို့သော အဓိကရောဂါများကို အမြစ်ဖြတ်တိုက်ဖျက်ခြင်းနှင့် ပုဂ္ဂလိက ကျန်းမာရေး ကဏ္ဍတွင် ကြာမြင့်စွာဆိုင်းငံ့ထားရသော ပြုပြင်ပြောင်းလဲမှုများကို အကောင်အထည်ဖော်ခြင်းတို့ ဖြစ်သည်။

"ကမ္ဘာ့အကြီးဆုံး HIV/AIDS ကုသရေးအစီအစဉ်ကို ပြိုလဲသွားစေရန် မိမိတို့အနေဖြင့် မည်သည့်အခါမျှ ခွင့်မပြုနိုင်ပါ" ဟု ၎င်းက ပြောကြား ခဲ့သည်။

ပြိုလဲမှုဆိုင်ရာ အဆိုပြုချက်များသည် အချိန်မတန်သေးသလို မမှန်ကန်ကြောင်း ၎င်းက ရှင်းလင်းပြောကြားခဲ့ပြီး ငွေကြေးလိုအပ်ချက်ကို ဖြည့်ဆည်းရန် ကောင်းမွန်သောအစီအစဉ်များ ရှိကြောင်း ပြောကြားခဲ့သည်။

ထောက်ပံ့ငွေများ ဖြတ်တောက်ခံရသော်လည်း အစိုးရနှင့် မိတ်ဖက် များက ဝင်ရောက်ဖြည့်ဆည်းပေးနေကြောင်း မိုဆွာလီဒီက ပါလီမန်တွင် အတည်ပြုပြောကြားခဲ့သည်။

"မိမိတို့၏အစီအစဉ်များကို အမျိုးသားဘဏ္ဍာရေးဌာနသို့ တင်ပြပြီးအကူအညီတောင်းခံခဲ့သည်။ တစ်ချိန်တည်းမှာပဲ ပြည်တွင်းနှင့် နိုင်ငံတကာ ရှိ အခြားရန်ပုံငွေထောက်ပံ့သူများထံလည်း ချဉ်းကပ်ခဲ့သည်" ဟု ၎င်းက ဖြည့်စွက်ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ကျောက်ဆည်၊ ဇူလိုင်-၁၂

မန္တလေးတိုင်းဒေသကြီး၊ ကျောက်ဆည်ခရိုင်၊ ကျောက်ဆည်မြို့နယ် အမှတ်(၂) အခြေခံပညာအထက်တန်း ကျောင်းတွင် စာဖတ်ရှိန်မြှင့်တင်ရေး လူငယ်ရေးရာအသိပညာပေးဟောပြောပွဲ၊ လက်ကမ်းစာစောင်ဖြန့်ဝေခြင်း နှင့်နံရံကပ်စာစောင်ပြပွဲအခမ်းအနားကို ယနေ့နံနက် (၉) နာရီက ကျောက်ဆည်ခရိုင် ပြန်ကြားရေးနှင့်ပြည်သူ့ ဆက်ဆံရေးဦးစီးဌာနနှင့် အခြေခံပညာဦးစီးဌာနတို့ပူးပေါင်းပြီး ရွှေသရဖီခန်းမတွင် ပြုလုပ်ခဲ့ရာ တာဝန်ခံ ကျောင်းအုပ်ဆရာမကြီး ဒေါ်ခင်မာထွေးက အဖွင့်အမှာစကား ပြောကြားခဲ့ကြောင်း သိရသည်။

ဆက်လက်ပြီး ကျောက်ဆည်ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ လက်ထောက်ညွှန်ကြားရေးမှူး ဒေါ်တင်တင်ထွေးက အနာဂတ်မျိုးဆက်သစ်ကျောင်းသားလူငယ်များ ဗလငါးတန်ပြည့်စုံစေရေး၊ လူငယ်နှင့် ရည်မှန်းချက် ခေါင်းစဉ်ဖြင့်လည်းကောင်း၊ ခရိုင်ဘေးအန္တရာယ်ဆိုင်ရာစီမံခန့်ခွဲမှုဦးစီးဌာနမှ လက်ထောက် ညွှန်ကြားရေးမှူး ဒေါ်စန်းစန်းဝင်းက ငလျင်ဘေးအန္တရာယ်အတွက် ကြိုတင်ပြင်ဆင်ရန်အချက်များ၊ ငလျင် လှုပ်ခတ်ချိန်တွင် ပြုလုပ်ရန်အချက်များ၊ ငလျင်လှုပ်ခတ်ပြီးချိန်တွင် ဆောင်ရွက်ရန်အချက်များအား အသိပညာပေး ဟောပြောခဲ့ပြီး အသိပညာပေး လက်ကမ်းစာစောင်များဖြန့်ဝေခဲ့ကြောင်း သိရသည်။

အခမ်းအနားအပြီးတွင် ကျောင်းသား၊ ကျောင်းသူများက ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ခင်းကျင်းပြသထားသည့် ကလေးအလုပ်သမားပပျောက်ရေး၊ သဘာဝဘေးအန္တရာယ် ကြိုတင်ကာကွယ်ရေး၊ အရွယ်မရောက်သေးသူ ကလေးငယ်များအား စစ်မှုထမ်းခြင်းမှ ကာကွယ်တားဆီးထိန်းသိမ်းရေး အသိပညာပေး နံရံကပ်စာစောင်များအား စိတ်ပါဝင်စားစွာ ကြည့်ရှုခဲ့ကြောင်း သိရသည်။

သက်မောင်(ကျောက်ဆည်)

တောင်ကိုရီးယားနိုင်ငံ၌ ပြင်းထန်သော အပူလှိုင်းဖြစ်ပေါ်မှုကြောင့် ယင်းနှင့်ဆက်စပ်၍   နေထိုင်မကောင်းသူ အရေအတွက် လျင်မြန်စွာ မြင့်တက်လာကြောင်း ကျန်းမာရေး တာဝန်ရှိသူများက ဇူလိုင်လ ၁၀ ရက်တွင် ပြောသည်။ ထို့ပြင် အပူချိန်နှင့်ပတ်သက်၍ ထိခိုက်မခံသူများအနေဖြင့် ကြိုတင်ကာကွယ်မှုများ ပိုမိုလုပ်ဆောင်ရန် တာဝန်ရှိသူများက တိုက်တွန်းထားသည်။

တာဝန်ရှိသူများက အပူချိန်မြင့်တက်မှုနှင့် ဆက်စပ်၍ဖြစ်ပေါ်လာသည့် နေထိုင်မကောင်းသူများကို စောင့်ကြည့်ရေးစနစ် စတင်လုပ်ဆောင်သော မေလလယ်မှစ၍ ဇူလိုင်လ ၉ ရက်အထိ အရေးပေါ်ဌာနများ သို့ရောက်ရှိလာသူ ၁၂၂၈ ဦးအထိရှိသည်ကို တွေ့ရကြောင်း ကိုရီးယားရောဂါ ကာကွယ်ထိန်းချုပ်ရေး ဌာနက ထုတ်ပြန်ထားသည်။

အဆိုပါ နေထိုင်မကောင်းသူ အရေအတွက်သည် ပြီးခဲ့သည့်နှစ်နှင့် နှိုင်းယှဉ်ပါက နှစ်ဆခွဲခန့်မြင့်တက်လာကြောင်း၊ သေဆုံးသူဦးရေမှာလည်း   သုံးဆအထိ မြင့်တက်လာကြောင်း  ထုတ်ပြန်ချက်၌ ဆက်လက်ဖော်ပြထားသည်။

နိုင်ငံအတွင်းပျမ်းမျှအပူချိန်သည် ဇွန်လနှောင်းပိုင်းမှစ၍ ယခုအချိန်အထိ ၃၁ ဒီဂရီစင်တီဂရိတ် အထက်တွင်ရှိနေသောကြောင့် တောင်သူလယ်သမားများ၊ တံငါ သည်များနှင့် အမိုးအကာပြင်ပတွင် အလုပ်လုပ်ကိုင်ရသူများ နေရောင်အောက်တွင် အချိန်ကြာမြင့်စွာနေထိုင်ခြင်း မပြုရန်နှင့် ရေဓာတ်ပြည့်ဝစွာ စားသောက်ပြီး မကြာ ခဏအနားယူရန်      ရောဂါကာကွယ် ထိန်းချုပ်ရေးဌာန၏ ထုတ်ပြန်ချက်တွင် ဖော်ပြထားသည်။    

MWD Web Portal