ပြည်ထောင်စုသမ္မတမြန်မာနိုင်ငံတော်အစိုးရ

တပ်မတော်ကာကွယ်ရေးဦးစီးချုပ်ရုံး

ယာယီပစ်ခတ်တိုက်ခိုက်မှုရပ်စဲရေးအတွက် ထုတ်ပြန်ချက်

(မြန်မာသက္ကရာဇ် ၁၃၈၇ ခုနှစ်၊ ကဆုန်လဆန်း ၁၀ ရက်) ၂၀၂၅ ခုနှစ်၊ မေ ၆ ရက်

မေလ ၉ ရက် မော်စကိုတွင် ပြုလုပ်မည့် V-Day အခမ်းအနားသို့ အိန္ဒိယ နိုင်ငံကိုယ်စားပြု ကာကွယ်ရေးဝန်ကြီး Sanjay Seth က တက်ရောက်သွားမည်ဖြစ်ကြောင်း အိန္ဒိယနိုင်ငံဆိုင်ရာ ရုရှားသံရုံးမှ စစ်သံမှူး Sergey Kharchanko က မေလ ၆ ရက်တွင် ထုတ်ဖော်ပြောကြားလိုက်ပါသည်။

နယူးဒေလီရှိ ရုရှားဟောက်စ်တွင် ပြုလုပ်သော အောင်ပွဲသံချပ်ကာယန္တရားများ (Weapons of Victory) ခေါ် ရုရှားလက်နက်ပြပွဲ ဖွင့်ပွဲအခမ်းအနား၌ ကျင်းပသော ဆွေးနွေးပွဲတွင် ၎င်းက အိန္ဒိယ ကိုယ်စားပြုသူအမည်ကို ထုတ်ဖော်ပြောကြားလိုက်ပါသည်။

ကိုးကား- TASS

ဘရာဇီးသမ္မတ Luiz Inacio Lula da Silva သည် မေလ ၉ ရက် မော်စကိုတွင် ကျင်းပမည့် ဒုတိယကမ္ဘာစစ်အောင်ပွဲနေ့၏ ၈၀ နှစ်မြောက် အခမ်းအနားတက်ရောက်ရန် ရုရှားသို့မဝင်မီ ယူကရိန်းအစိုးရ၏ ကိယက်သို့ ဦးစွာ လာရောက်ရန် တောင်းဆိုချက်ကို လျစ်လျူရှုလိုက်ကြောင်း Metropoles သတင်းစာ၏ အရင်းအမြစ်များအရ သိရပါသည်။ 

ထိုအခြေအနေအရ ယူကရိန်းသည် ဘရာဇီးနှင့် သံတမန်ဆက်ဆံရေး အဆင့်လျှော့ချရန် ရွေးချယ်စရာများကို စတင်စဉ်းစားနေပြီဖြစ်ကြောင်း Metropoles ၏ ဖော်ပြချက်အရ သိရပါသည်။

မေလ ၉ ရက်တွင် ကျင်းပမည့် V-Day ကာလဖြစ်သည့် မေလ ၇ ရက်မှ ၉ ရက်အတွင်း အခမ်းအနား လုံခြုံရေးအာမခံရန် အင်တာနက်အသုံးပြုမှုကို ယာယီကန့်သတ်နိုင်ကြောင်း ရုရှားတာဝန်ရှိသူများက ယခင်က ထုတ်ပြန် ထားပါသည်။

ယင်းကိစ္စနှင့်ပတ်သက်၍ မိုဘိုင်းအော်ပရေတာများ၏ လုပ်ငန်းလည်ပတ်မှုကန့်သတ်ချက်များသည် ဘဏ်လုပ်ငန်းအခြေခံအဆောက်အအုံ၏ လုပ်ဆောင် ချက်များကို မထိခိုက်စေကြောင်း OTP Bank မှ ဒစ်ဂျစ်တယ် စီးပွားရေးဖွံ့ဖြိုးရေးဒါရိုက်တာ အိုင်ဗန် ဘက်မတ်က TASS သို့ ပြောကြား လိုက်ပါသည်။

မေ ၆ ရက်တွင် ကျင်းပသော ဂျာမနီဝန်ကြီးချုပ်ရာထူးသစ်အတွက် ဘန်ဒက်စတက်လွှတ်တော်က ဒုတိယအကြိမ်မြောက် မဲခွဲတင်သွင်းကြရာ၌ ခရစ်ယာန်ဒီမိုကရက်တစ်ပါတီခေါင်းဆောင် Friedrich Merz သည် ထောက်ခံမဲ ၃၂၅ မဲ ရရှိကာ ဂျာမနီဝန်ကြီးချုပ်ရာထူးကို အရွေးချယ်ခံလိုက်ပါသည်။

ဂျာမနီလွှတ်တော်၏တရားဝင်ဝက်ဘ်ဆိုက်မှ ယင်းနေ့တိုက်ရိုက် ထုတ်လွှင့်ကြေညာချက်အရ Friedrich Merz သည် သတ်မှတ်ထားသော အများစုမဲ ၃၁၆ မဲထက် ကျော်လွန်၍ ၃၂၅ မဲရရှိခဲ့ပြီး ဆန့်ကျင်မဲ ၂၈၉ မဲနှင့် ကြားနေမဲ ၁ မဲဖြင့် ဂျာမနီဝန်ကြီးချုပ်နေရာအတွက် အနိုင်ရသွားပါသည်။

ဂျာမနီဝန်ကြီးချုပ်ရာထူးအတွက် ခရစ်ယာန် ဒီမိုကရက်တစ်သမဂ္ဂ (CDU) ခေါင်းဆောင် Friedrich Merz အား ဘန်ဒက်စတက်လွှတ်တော်တွင် မဲခွဲဆုံးဖြတ်ကြမည်ဖြစ်ပါသည်။ 

ဂျာမနီတွင် အစိုးရခေါင်းဆောင်ရာထူးဖြစ်သည့် ဝန်ကြီးချုပ်နေရာကို သမ္မတ အဆိုပြုချက်အပေါ် အခြေခံ၍ လွှတ်တော်ကိုယ်စားလှယ်များက ကြိုတင်တိုင်ပင်ဆွေးနွေးခြင်းမရှိဘဲ လျှို့ဝှက်မဲဖြင့် ရွေးချယ် တင်မြှောက် ကြရပါသည်။ ပုံမှန်အားဖြင့် ရွေးကောက်ပွဲတွင် မဲအများဆုံးရရှိသည့် ပါတီမှ ကိုယ်စားလှယ်ကို ရွေးချယ်လေ့ရှိပါသည်။ ယခုမဲအများဆုံး ရရှိ သည့် ပါတီမှာ Friedrich Merz ၏ CDU ဖြစ်နေပါသည်။

အာဆီယံ + ၃ (ဂျပန်၊ တရုတ်၊ တောင်ကိုရီးယား) နိုင်ငံတို့သည် လွတ်လပ်သော ကမ္ဘာ့ကုန်သွယ်ရေးစနစ်ကို အပြည့်အဝ ထောက်ခံကြောင်း ထပ်မံ အတည်ပြုပြောကြားခဲ့သည်။ အမေရိကန်၏ ကုန်သွယ်ခွန်တိုးမြှင့် ကောက်ခံမှုများကြောင့် အာရှဒေသ၏ စီးပွားရေးထိခိုက်နိုင်ခြေကို စိုးရိမ်မှုများ မြင့်တက် နေချိန်တွင် ထိုသို့ထုတ်ပြန်ခဲ့ခြင်းဖြစ်သည်။ 

မေလ ၄ ရက်နေ့တွင် အီတလီနိုင်ငံ၌ ကျင်းပပြုလုပ်သည့် အစည်းအဝေးတွင် အာဆီယံ+၃ (ဂျပန်၊ တရုတ်၊ တောင်ကိုရီးယား) နိုင်ငံများ၏ ဘဏ္ဍာရေး ဝန်ကြီးများနှင့် ဗဟိုဘဏ်အကြီးအကဲများက ပူးတွဲကြေညာချက်တစ်ရပ် ကို ထုတ်ပြန်ခဲ့သည်။ 

ကမ္ဘာလှည့်ခရီးသည်များအား လုပ်ကြံတိုက်ခိုက်မှုဖြစ်စဥ် ဖြစ်ပွားပြီး‌နောက် အိန္ဒိယနှင့် ပါကစ္စတန်နိုင်ငံတို့အကြား ဆက်ဆံရေး ဆိုးရွားစွာ ကျဆင်းလာမှုကြောင့် အဓိက လေကြောင်းလိုင်းများသည် ပါကစ္စတန်၏ လေပိုင်နက် အတွင်း ပျံသန်းပြေးဆွဲရန် ရှောင်ရှားလျက်ရှိသည်။ 

ရုရှားသမ္မတ ဗလာဒီမာ ပူတင်နှင့် အိန္ဒိယဝန်ကြီးချုပ် နာရန်ဒရာ မိုဒီတို့ ဖုန်းဆက်ပြောကြားစဉ် မည်သည့်အကြမ်းဖက်ဝါဒ ပုံစံမျိုးကိုမဆို သံသယမရှိ တိုက်ဖျက်ရန် အရေးကြီးသည်ဟု ခေါင်းဆောင်နှစ်ဦးက အလေးထားပြောကြားခဲ့သည်ဟု ကရင်မလင်မှ ထုတ်ပြန်ထားပါသည်။

ဧပြီလ ၂၂ ရက်က ကက်ရှ်မီးယားဒေသတောင်ပိုင်း ပါဟယ်ဂမ်တွင် အိန္ဒိယ နိုင်ငံသားများ သတ်ဖြတ်ခံရမှုအတွက် အထူးဝမ်းနည်းကြောင်း ရုရှား သမ္မတက ထပ်မံထုတ်ဖော်ပြောကြားထားပါသည်။

Skype ဆက်သွယ်ရေးဝန်ဆောင်မှုသည် မေလ ၅ ရက်တွင် လုပ်ငန်းလည်ပတ်မှု တရားဝင် ရပ်ဆိုင်းသွားပြီဖြစ်ကာ အသုံးပြုသူများအတွက် အကောင့်များ ထပ်မံရရှိနိုင်တော့မည်မဟုတ်ပါ။

Microsoft ကုမ္ပဏီကလည်း မေလ ၅ ရက်တွင် Skype လည်ပတ်မှုများကို ရပ်ဆိုင်းကြောင်းကြေညာခဲ့ပြီး ကုမ္ပဏီအနေဖြင့် ၎င်း၏ Microsoft Teams ပလက်ဖောင်းကို တီထွင်ရန် အာရုံစိုက်သွားမည်ဖြစ်ကြောင်း ပြောကြားထားပါသည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃