တရုတ်နိုင်ငံသည် အချုပ်အခြာအာဏာကိုကာကွယ်ရန် လိုအပ်သည့် အစီအမံများဆောင်ရွက်သွားမည်ဖြစ်ပြီး မည်သည့်“ခွဲထွက်ရေးလှုပ်ရှားမှု” လုပ်ဆောင်နေမှုကိုမျှ သည်းခံမည်မဟုတ်ကြောင်း ဒီဇင်ဘာလ ၁၁ ရက်တွင် တရုတ်နိုင်ငံက  ပြောကြားလိုက်သည်။  ထိုင်ဝမ်ကျွန်းတစ်ဝိုက်တွင် တရုတ်စစ်လေယာဉ်များ ထပ်မံတိုးလာကြောင်း၊ ရန်စနေမှုအား ရပ်တန့်ပေးရန် ဘေဂျင်းကို တိုက်တွန်းပါကြောင်း ထိုင်ဝမ်ဖက်က ပြောကြားလိုက်သည့်အပေါ်  တရုတ်ဖက်က ထိုသို့တုံ့ပြန်ပြောကြား လိုက်ခြင်းဖြစ်သည်။ စစ်ရေးလှုပ်ရှားမှုအပေါ်  တရုတ်စစ်တပ်က မည်သည့်မှတ်ချက်မှမပေးသကဲ့သို့ အတည်ပြုချက်လည်း မပေးသေးပါ။ 

ကာလရှည်ကြာစွာ အုပ်ချုပ်ခဲ့သည့် သမ္မတအာဆတ်ကို သူပုန်များက ဖြုတ်ချပြီးနောက် ဆီးရီးယားနိုင်ငံ၏ အသွင်ကူးပြောင်းရေးကာလ ဝန်ကြီးချုပ်သစ် ဖြစ်လာသူက နိုင်ငံတည်ငြိမ်အေးချမ်းရန် အချိန်တန်ပြီ ဟု ဒီဇင်ဘာ ၁၀ ရက် က ပြောကြားလိုက်ပါသည်။ 

ထိုင်းနိုင်ငံရှိ အထင်ကရ ဦးနှောက်နှင့် အာရုံကြောပါရဂူ ဒေါက်တာ သီရာဗတ်ဟီမာချတ်ဟာက ဩစတြေးလျ ဓာတ်ခွဲခန်းတစ်ခုမှ လူများကိုသေစေနိုင်သော ဗိုင်းရပ်စ်များ ပါဝင်သည့် ဓာတ်ခွဲခန်းသုံးပြွန်အခု ၃၀၀ ကျော် ပျောက်ဆုံးနေမှုအပေါ် စိုးရိမ်ကြောင်း သတိပေးပြောကြား ခဲ့သည်။

Hendra ဗိုင်းရပ်စ်၊ Lyssa ဗိုင်းရပ်စ်နှင့် Hanta ဗိုင်းရပ်စ်တို့အပါအဝင် ပျောက်ဆုံးနေသော ဗိုင်းရပ်စ်များသည် ဇီဝလုံခြုံမှုကန့်သတ်ချက် အမြင့်ဆုံးအဆင့် ချမှတ်ရန် လိုအပ်သော ဗိုင်းရပ်စ်များဖြစ်သည်။

ဥရောပနိုင်ငံများက ဆီးရီးယားဒုက္ခသည်များ တင်သွင်းသည့် ခိုလှုံခွင့်လျှောက်ထားမှု လုပ်ငန်းစဉ်များကို ရပ်ဆိုင်းလိုက်သည်။ ဆီးရီးယားတွင် သမ္မတ Bashar al-Assad အစိုးရပြုတ်ကျပြီးနောက် ယခုကဲ့သို့ ထွက်ပေါ် လာခြင်းဖြစ်သည်။

ဆီးရီးယားဒုက္ခသည်များနှင့်ပတ်သက်သည့် ခိုလှုံခွင့်ဆိုင်ရာလုပ်ငန်းစဉ်များကို ရပ်ဆိုင်းလိုက်ပြီဟု ဂျာမနီနိုင်ငံက ဒီဇင်ဘာ ၉ ရက်နေ့က ကြေညာခဲ့သည်။ ဂျာမနီသည် ဆီးရီးယား နိုင်ငံပြင်ပရှိ ဆီးရီးယားမှလာသူဦးရေ အများဆုံးနေထိုင်သောနိုင်ငံဖြစ်သည်။

ပြီးခဲ့သည့် သီတင်းပတ်က သမ္မတ Yoon Suk-yeol ၏ စစ်ဥပဒေအရ အုပ်ချုပ်ရေးအမိန့်နှင့်ပတ်သက်သော နေရာများကို စတင်ရှာဖွေစစ်ဆေးလျက်ကြောင်း၊ သမ္မတ Yoon ၏ အရေးပေါ်အမိန့်နှင့်ပတ်သက်သော စုံစမ်းစစ်ဆေးမှု၏ တစ်စိတ်တစ်ပိုင်းအနေဖြင့် သမ္မတရုံးကို စီးနင်းဝင်ရောက်ခဲ့သည်ဟု ရဲတပ်ဖွဲ့က ဒီဇင်ဘာ ၁၁ ရက်နေ့တွင် ပြောကြားခဲ့သည်။ 

ဒီဇင်ဘာလ ၁၁ ရက်နေ့ နံနက်ပိုင်းတွင် ယူကရိန်းသည် အမေရိကန်ပြည်ထောင်စု၏ ATACMS ဒုံးကျည် ၆ စင်း ဖြင့် ရုရှားနိုင်ငံ၏ ရိုစတိုဗ်ဒေသ ၊တာဂန်ရော့ဂ်ရှိ စစ်လေယာဉ်ကွင်းကို တိုက်ခိုက်ခဲ့ကြောင်း ရုရှားကာကွယ်ရေးဝန်ကြီးဌာနက ပြောကြားခဲ့သည်။

တာဂန်ရော့ဂ်လေဆိပ်တွင် ဒုံးကျည်အပိုင်းအစများကျရောက်မှုကြောင့် ရုရှားတပ်ဖွဲ့ဝင်များအကြား ထိခိုက်သေဆုံးမှုများရှိကြောင်း ရုရှားနိုင်ငံကာကွယ်ရေးဝန်ကြီးဌာနက ပြောကြားခဲ့သည်။

ဂျကာတာ  ဒီဇင်ဘာ ၁၁

Apple က ၎င်း၏ နောက်ဆုံးထွက် iphone ၁၆ မော်ဒယ်အတွက် ဈေးကွက်ရရှိရန် ကမ္ဘာ့စတုတ္ထလူဦးရေ အများဆုံးနိုင်ငံဖြစ်သည့် အင်ဒိုနီးရှားနိုင်ငံတွင် အမေရိကန်ဒေါ်လာ ၁ ဘီလီယံ ရင်းနှီးမြှုပ်နှံရန် သ‌ဘောတူခဲ့သည်ဟု ဝန်ကြီးတစ်ဦးက ဒီဇင်ဘာ ၁၁ ရက်တွင် ပြောကြားလိုက်သည်။

ကမ္ဘာ့ဖလားဘောလုံးပြိုင်ပွဲ အိမ်ရှင်အဖြစ် လက်ခံကျင်းပခွင့်ရရှိရေး ဆယ်စုနှစ်များစွာ ကမ်းလှမ်းလာခဲ့သော မော်ရိုကိုနိုင်ငံသည် ယခုအခါ စပိန်၊ ပေါ်တူဂီတို့နှင့်အတူ ၂၀၃၀ ကမ္ဘာ့ဖလားဘောလုံးပြိုင်ပွဲကို ပူးတွဲအိမ်ရှင်အဖြစ် လက်ခံကျင်းပရန် ဖီဖာအဖွဲ့က ရွေးချယ် သတ်မှတ်လိုက်ပြီ ဖြစ်ပါသည်။ 

၁၉၉၄ ကမ္ဘာဖလားဘောလုံးပြိုင်ပွဲကို အိမ်ရှင်အဖြစ် ကျင်းပခွင့်ရရှိရေး ၁၉၈၇ ခုနှစ်ကတည်းကပင် ကမ်းလှမ်းခဲ့သည့် မော်ရိုကိုနိုင်ငံသည် ယခု နှစ်ပေါင်း ၄၀ အကြာ တွင် အိမ်ရှင်နိုင်ငံအဖြစ် ရွေးချယ်ခံရခြင်းဖြစ်ပါသည်။ 

ထိုင်ဝမ်ရေလက်ကြားနှင့် ပစိဖိတ်အနောက်ဘက်ရေပြင်တွင် တရုတ်ရေတပ်နှင့် ကမ်းရိုးတန်းစောင့် သင်္ဘောများအုပ်စုလိုက်ရွေ့လျားနေကြောင်း၊  ဘေဂျင်း၏ စစ်ရေးလှုပ်ရှားမှု ဖြစ်နိုင်ဖွယ်ရှိကြောင်း၊  ကမ်းရိုးတန်း စောင့် သင်္ဘောများနှင့်အတူ တရုတ်ပြည်သူ့လွတ်မြောက်ရေး တပ်မတော်စစ်ရေယာဉ်များပါ ဝင်ရောက်နေကြောင်း၊ ထိုင်ဝမ်ကာကွယ်ရေးဝန်ကြီးဌာန အနေဖြင့်လည်း သတိကြီးစွာစောင့်ကြည့်နေပြီး တန်ပြန်စစ်ရေးလှုပ်ရှားမှု ပြုလုပ်ရန် စတင်နေပြီဖြစ်ကြောင်း  ထိုင်ဝမ်ကာကွယ်ရေး ဝန်ကြီးဌာနက ထုတ်ပြန်လိုက်သည်။ 

လက်ရှိအမေရိကန်ရွေးကောက်ခံသမ္မတ ဒေါ်နယ်ထရန့်သည် ယခင်က အင်တာဗျူးတစ်ခုတွင် “အမေရိကန်နိုင်ငံတွင်မွေးဖွေးသူဖြစ်လျှင် နိုင်ငံသားချက်ချင်း ဖြစ်ခွင့် ရှိသည်ဆိုသည့်ဥပဒေကို ဖျက်သိမ်းရန် စီစဉ်ထားကြောင်း” ပြောကြားခဲ့ပါသည်။ 

အမေရိကန်တွင် ယင်းဥပဒေကို နှစ်ပေါင်း ၁၅၀ ကျော်ကြာ ကျင့်သုံးလာခဲ့သောကြောင့် ဒေါ်နယ်ထရန့်အနေဖြင့် တရားဝင်သမ္မတဖြစ်လာချိန်တွင်  မည်ကဲ့သို့ ဆောင်ရွက်မည်ကို စိတ်ဝင်စားမှုမြှင့်တက်နေပါသည်။