အစ္စရေးနှင့် အမေရိကန်တို့၏ အီရန်ဆန့်ကျင်ရေး ရန်စမှုများသည် အကြောင်းတရားမရှိဘဲ မှားယွင်းသော အပြုအမူများဖြစ်ကြောင်း ရုရှား သမ္မတ ဗလာဒီမာ ပူတင်က အီရန်နိုင်ငံခြားရေးဝန်ကြီး အဘတ်စ် အာရက်ချီ အား ပြောကြားခဲ့သည်။

တနင်္လာနေ့ (ဇွန် ၂၃) တွင် မော်စကိုသို့ရောက်ရှိလာပြီး ရုရှားသမ္မတနှင့် တွေ့ဆုံခဲ့သော အီရန်နိုင်ငံခြားရေးဝန်ကြီးက ၎င်း၏ခရီးစဉ်သည် အမေရိကန်၏ အီရန်နျူကလီးယားစက်ရုံများကို တိုက်ခိုက်မှုအပြီး ရုရှား နှင့် “ပိုမိုနီးကပ်၊ ပိုမိုတိကျပြီး ပိုမိုလေးနက်သော တိုင်ပင်ဆွေးနွေးမှုများ” ပြုလုပ်ရန် လိုအပ်ကြောင်း ယခင်က ဖော်ပြခဲ့သည်။

ဂါဇာတွင် အကျဉ်းချထားခံရသူများ ပြန်လည်ရရှိရေး ကြိုးပမ်းနေသော အဖွဲ့တစ်ဖွဲ့က အစ္စရေး-အီရန် စစ်ရပ်စဲရေးကို စစ်ဘေးဒဏ်ခံနေရသည့် ဂါဇာဒေသအထိ ချဲ့ထွင်ရန် တောင်းဆိုလိုက်သည်။

“အီရန်နှင့် စစ်ရပ်စဲရေး ဆွေးနွေးနိုင်သူများသည် ဂါဇာစစ်ပွဲကိုလည်း အဆုံးသတ်နိုင်စွမ်းရှိပါသည်” ဟု “Hostages and Missing Families Forum” အဖွဲ့က အင်္ဂါနေ့ (ဇွန် ၂၄) ထုတ်ပြန်ချက်တွင် ဖော်ပြခဲ့သည်။

အစ္စရေးသည် အီရန်တွင် စစ်ရေးအောင်မြင်မှုများရရှိပြီးနောက် အမေရိကန် သမ္မတ ဒေါ်နယ်ထရမ့်၏ စစ်ရပ်စဲရေးအဆိုကို သဘောတူညီကြောင်း ဝန်ကြီးချုပ် ဘင်ဂျမင် နေတန်ယာဟု အစိုးရ၏ ထုတ်ပြန်ချက်တွင် ဖော်ပြ ခဲ့သည်။

စစ်ရပ်စဲရေးနှင့်ပတ်သက်သည့် အစ္စရေး၏ ပထမဆုံး တရားဝင် ထုတ်ပြန်ချက် အရ အီရန်ကို နှစ်ပတ်နီးပါး တိုက်ခိုက်မှုများပြုလုပ်ပြီးနောက် အစ္စရေး သည် ၎င်း၏ရည်မှန်းချက်အားလုံးကို အောင်မြင်စွာ လုပ်ဆောင်နိုင်ခဲ့ပြီး ထို့ထက်ပိုမိုကျော်လွန်သွားကြောင်း ဖော်ပြထားသည်။

အီရန်နှင့် အစ္စရေးတို့ကြား ပစ်ခတ်တိုက်ခိုက်မှုရပ်စဲရေး သဘောတူညီချက် ထွက်ပေါ်လာခြင်းကြောင့် ရင်းနှီးမြှုပ်နှံသူများ၏ ရေနံသယ်ယူ ပို့ဆောင်ရေး လမ်းကြောင်းပြတ်တောက်မည့်စိုးရိမ်မှုများ လျော့ပါးသွားကာ အင်္ဂါနေ့ (ဇွန် ၂၄) တွင် ဥရောပဈေးကွက်အတွင်း ရေနံစျေးနှုန်းများ ဆက်လက် ကျဆင်းသွားခဲ့သည်။

ဧည့်သည်တစ်ဦးသည် ဖလောရင့်မြို့ရှိ Uffizi ပြတိုက်တွင် ၁၇ ရာစုက ရေးဆွဲထားသည့် ပန်းချီကားတစ်ချပ်ကို Selfie ဓာတ်ပုံရိုက်ရန် ဟန်ပြင်စဉ် နောက်ပြန်တိုက်မိပြီး ပျက်စီးစေခဲ့ကြောင်း ပြတိုက်၏ ထုတ်ပြန်ချက်ကို CNN က ဖော်ပြခဲ့သည်။

၎င်းဧည့်သည် သည် စနေနေ့ (ဇွန် ၂၁) က အဆိုပါကမ္ဘာကျော်ပြတိုက်သို့ လာရောက်လည်ပတ်စဉ် ပြတိုက်ရှိ ၁၆၉၅-၁၇၀၀ ခုနှစ်ဝန်းကျင်က Anton Domenico Gabbiani ရေးဆွဲခဲ့သော Tuscany မင်းသား Ferdinando de’ Medici ၏ ပုံတူကို မတော်တဆ ပျက်စီးစေခဲ့ကြောင်း တာဝန်ရှိသူများက ပြောကြားခဲ့သည်။

အမေရိကန်သမ္မတ ထရမ့်က ရုရှားလုံခြုံရေးကောင်စီ ဒုတိယဥက္ကဋ္ဌ Dmitry Medvedev အား နျူကလီးယားလက်နက်များအကြောင်း “လွယ်လွယ်ကူကူ” ပြောဆိုခြင်းကို တုံ့ပြန်သတိပေးခဲ့သည်။

ရုရှားသမ္မတဟောင်း Medvedev က အမည်မဖော်လိုသော နိုင်ငံအချို့သည် အီရန်အား အစုလိုက်အပြုံလိုက်ထိခိုက်ပျက်စီးစေနိုင်သော လက်နက်များ (WMD) ထောက်ပံ့ရန် အဆင်သင့်ဖြစ်နေကြောင်း ညွှန်းဆိုပြောဆိုခဲ့ပြီးနောက် ထရမ့်၏ ဝေဖန်မှုထွက်ပေါ်လာခြင်းဖြစ်သည်။

ပြင်သစ်နိုင်ငံသည် အစ္စရေးက အီရန်မြို့တော်ရှိ အီဗင်ထောင်ကို တနင်္လာနေ့ (ဇွန် ၂၃) က တိုက်ခိုက်မှုကြောင့် ၎င်းတို့နိုင်ငံသားများ အန္တရာယ် ကျရောက်ခဲ့သည်ဟု စွပ်စွဲခဲ့သည်။

အီရန်အရာရှိများက ထောင်အချို့အစိတ်အပိုင်းများ ပျက်စီးခဲ့ကြောင်း ပြောကြားခဲ့ပြီး လူမှုကွန်ရက်ပေါ်တွင် မျှဝေနေသည့် ဗီဒီယိုတစ်ခုတွင် ထောင်ရှိ အရှေ့ဘက်မုဒ်ဝကို ပစ်မှတ်ထားတိုက်ခိုက်ထားသည်ကို တွေ့မြင် ရသည်။

ဂျာမနီကာကွယ်ရေးဝန်ကြီး Boris Pistorius သည် အမေရိကန် ကာကွယ်ရေးဝန်ကြီး Pete Hegseth ထံမှ ဥရောပရှိ အမေရိကန်တပ်များရုပ်သိမ်းရန် “လမ်းညွှန်ချက်” ပေးရန် ထပ်ခါတလဲလဲ တောင်းဆို ခဲ့ကြောင်း Financial Times သတင်းစာက ဖော်ပြခဲ့သည်။

အမေရိကန် ဖက်ရှင် အမှတ်တံဆိပ်တစ်ခုဖြစ်သော Calvin Klein သည် ယူကရိန်းပဋိပက္ခ အရှိန်မြင့်တက်လာပြီး အနောက်နိုင်ငံများ၏ ပိတ်ဆို့ အရေးယူမှုများကြောင့် လုပ်ငန်းများကို ရပ်ဆိုင်းခဲ့သည့် သုံးနှစ်ကျော်အကြာတွင် ရုရှားနိုင်ငံ၌ ၎င်း၏ ကုန်အမှတ်တံဆိပ်များကို ပြန်လည် မှတ်ပုံတင်ရန် ကြိုးပမ်းလာသည့် နိုင်ငံခြားကုမ္ပဏီများစာရင်းတွင် ပါဝင်လာခဲ့သည်။

အီရန်နိုင်ငံမှ အမေရိကန်၏ အရှေ့အလယ်ပိုင်းဒေသ စစ်စခန်းများကို ဒုံးကျည်များဖြင့် ပစ်ခတ်တိုက်ခိုက်လိုက်ကြောင်း အီရန်နိုင်ငံပိုင် မီဒီယာ များက တနင်္လာနေ့ (ဇွန် ၂၃) တွင် ဖော်ပြခဲ့သည်။ "Herald of Victory" (အောင်ပွဲ၏ အစပျိုး) ဟု အမည်ပေးထားသော အဆိုပါစစ်ဆင်ရေးတွင် ကာတာနှင့် အီရတ်နိုင်ငံရှိ စစ်စခန်းများကို ပစ်မှတ်ထား တိုက်ခိုက် ခဲ့သည်။