ရုရှားကာကွယ်ရေးဝန်ကြီးဌာနက တနင်္ဂနွေနေ့ (ဇွန် ၁) တွင် ထုတ်ပြန်ချက် အရ ကိယက်ဗ်မှ တာဝန်ရှိသည်ဟု စွပ်စွဲထားသော ကမီကာဇေ ဒရုန်း တိုက်ခိုက်မှုများဖြင့် ရုရှားနိုင်ငံတစ်ဝှမ်းရှိ စစ်ဘက်ဆိုင်ရာ လေယာဉ်ကွင်း များကို တိုက်ခိုက်ခံခဲ့ရကြောင်းသိရှိရသည်။ အများစုမှာ အောင်မြင်စွာ ကာကွယ်နိုင်ခဲ့သော်လည်း အချို့တွင် ပစ္စည်းထိခိုက်ဆုံးရှုံးမှုများ ဖြစ်ပေါ် ခဲ့ကြောင်း ဝန်ကြီးဌာနက ဖြည့်စွက်ပြောကြားခဲ့သည်။
ယူကရိန်းနိုင်ငံ၏ ကြည်းတပ် ဦးစီးချုပ် Mikhail Drapaty သည် ယူကရိန်းတပ်မတော် လေ့ကျင့်ရေးစခန်းတစ်ခုတွင် ပစ်ခတ်တိုက်ခိုက်ခံရမှုများကြောင့် ယူကရိန်းစစ်သည်များ သေဆုံးမှုအတွက် တာဝန်ယူကာ ရာထူးမှနုတ်ထွက်သွားကြောင်း သိရှိရပါသည်။
Colorado ပြည်နယ် Boulder မြို့တွင် တနင်္ဂနွေနေ့ (ဇွန် ၁) က Hamas အဖွဲ့၏ ထိန်းသိမ်းခံ အစ္စရေးဓားစာခံများ၏ ဓာတ်ပုံများကို ကိုင်ဆောင်ကာ ထောက်ခံဆန္ဒပြပွဲပြုလုပ်နေသည့် လူစုလူဝေးအတွင်းသို့ Molotov Cocktail မီးလောင်ဗုံးများဖြင့် ပစ်ခတ်ခဲ့သူအား ဖမ်းဆီးခဲ့ကြောင်း သိရှိရသည်။
ဖြစ်စဉ်မှတ်တမ်းဗီဒီယိုများတွင် အင်္ကျီမပါသည့် လူတစ်ဦးသည် Molotov Cocktail မီးလောင်ဗုံးများကိုင်ဆောင်ကာ “ပါလက်စတိုင်း လွတ်မြောက်ရေး” ဟု အော်ဟစ်နေပုံကို တွေ့ရပြီး နောက်ပိုင်းတွင် ရဲများက ဝင်ရောက် ဖမ်းဆီးခဲ့သည်ကို မြင်တွေ့ရသည်။
ရုရှားနိုင်ငံခြားရေးဝန်ကြီး ဆာဂျေ လာဗရော့ဗ်သည် တနင်္ဂနွေနေ့ (ဇွန် ၁) က အမေရိကန်နိုင်ငံခြားရေးဝန်ကြီး မာကို ရူဘီယိုနှင့် အစ္စတန်ဘူလ်တွင် ကျင်းပမည့် မော်စကို-ကိယက်ဗ်ဆွေးနွေးပွဲနှင့် ရုရှားနယ်မြေအတွင်း ယူကရိန်းတိုက်ခိုက်မှုများအကြောင်း ဖုန်းဆက်ဆွေးနွေးခဲ့ကြသည်။