ဂရင်းလန်းကို အမေရိကန်ထံ ရောင်းချမည် မဟုတ်ကြောင်း ဒိန်းမတ်ဝန်ကြီးချုပ် Mette Frederiksen က အမေရိကန်ရွေးကောက်ခံသမ္မတ ဒေါ်နယ်ထရမ့် ကို ပြောကြားခဲ့ပါသည်။

နိုင်ငံ့လုံခြုံရေးရည်ရွယ်ချက်အတွက် ဒိန်းမတ် ကိုယ်ပိုင်အုပ်ချုပ်ခွင့်ရ ဂရင်းလန်းကို အမေရိကန်က ရယူသင့်ကြောင်း ထရမ့် ကပြောကြားထားခဲ့သည်။

Rederiksen သည် ဇန်နဝါရီ ၁၅ရက်နေ့တွင် ထရမ့်နှင့်တယ်လီဖုန်းမှတစ်ဆင့် စကားပြောခဲ့ကြောင်း ဝန်ကြီးချုပ်ရုံးမှ ထုတ်ပြန်ထားသည်။ Greenland သည် ရောင်းချရန်မဟုတ်ကြောင်း၊ လွတ်လပ်ရေးနှင့်ပတ်သက်ပြီး ဆုံးဖြတ်ချက်ချရန်က Greenland အပေါ်တွင်သာ မူတည်ကြောင်း Mette Frederiksen က ထရမ့်ကို ပြောကြားခဲ့ကြောင်း သိရသည်။

ဒိန်းမတ်မှ သွင်းကုန်များအပေါ် ဒဏ်ခတ်သည့် အကောက်ခွန်ဆိုင်ရာ ခြိမ်းခြောက်မှုများကို ထရမ့်က ရုပ်သိမ်းခြင်းမရှိခဲ့ကြောင်း Mette Frederiksen က သတင်းထောက်များအား ဇန်နဝါရီ ၁၆ရက် နေ့က ပြောကြားခဲ့ပြီး ဒိန်းမတ်နိုင်ငံသည် အမေရိကန်နှင့် ကုန်သွယ်ရေးနယ်ပယ်တွင် ဆိုးရွားသောအခြေအနေတွင်ရှိနေပြီး မည်သည့်ပဋိပက္ခမျိုးမှ ထပ်မံမဖြစ်ပွားစေလိုကြောင်း ၎င်းက ဆက်လက်ပြောကြားခဲ့ပါသည်။

ဒိန်းမတ်စီးပွားရေး လုပ်ငန်းများသည် အမေရိကန်နှင့် ကုန်သွယ်ရေးပဋိပက္ခဖြစ်လာမည်ကို စိုးရိမ်နေကြပြီး Mette Frederiksen သည် ဆေးဝါး၊ ဘီယာနှင့် နိုင်ငံ့ အထင်ကရ အမှတ်တရ အရုပ်ထုတ်လုပ်ရေးကုမ္ပဏီများ အပါအဝင် ဒိန်းမတ်စီးပွားရေးလုပ်ငန်းကြီးများ၏ ကိုယ်စားလှယ်များနှင့် ဇန်နဝါရီ ၁၆ရက်နေ့တွင် တွေ့ဆုံခဲ့ကာ လက်ရှိအခြေအနေနှင့်သတင်းကို ရှင်းလင်း ပြောပြခဲ့ကြောင်း ဖော်ပြထားသည်။

ယခုသီတင်းပတ်အတွင်း ထရမ့် သမ္မတတာဝန်ယူပြီးသည့်နောက် ၎င်နှင့်တွေ့ဆုံဆွေးနွေးမှုကို ဆက်လက် လုပ်ဆောင်မည်ဖြစ်ကြောင်း ဝန်ကြီးချုပ်က ပြောကြားပါသည်။

ကိုးကား-Myanmar National Post

အမေရိကန် သမ္မတ ဒေါ်နယ်ထရမ့် က အမေရိကန်သမိုင်းတွင် အကြီးမားဆုံး ပြည်နှင်ဒဏ်ပေးရေး စစ်ဆင်ရေးကို မကြာမီ စတင်မည်ဖြစ်ကြောင်း ကတိပြုလိုက် ပါသည်။ 

“မကြာမီ အမေရိကန်သမိုင်းတွင် အကြီးမားဆုံး ပြည်နှင်ဒဏ်ပေးရေးစစ်ဆင်ရေးကို စတင်မည်ဖြစ်ကြောင်းနှင့် ယခင် စံချိန်တင်ထားသည့် သမ္မတ Dwight D. Eisenhower ထက်တောင် ပိုမည်ဖြစ်ကြောင်း” ဝါရှင်တန်ရှိ Capital One အားကစားကွင်း၌ ဇန်နဝါရီ ၁၉ ရက်က ပြုလုပ်သည့် လူထုစည်းဝေးပွဲတွင် အမေရိကန် သမ္မတ ဒေါ်နယ်ထရမ့် က ထောက်ခံသူများရှေ့တွင် ပြောဆိုခဲ့ပါသည်။

ကိုးကား - TASS

အိန္ဒိယနှင့်ရုရှားနိုင်ငံတို့သည် သမ္မတဗလာဒီမာပူတင်၏ အိန္ဒိယခရီးစဉ်အတွက် အချိန်ကာလသတ်မှတ်ခြင်းကို အပြီးသတ်လုပ်ဆောင်လျက်ရှိကြောင်း အိန္ဒိယပြည်ပရေးရာဝန်ကြီးဌာနမှ ပြောရေးဆိုခွင့်ရှိသူတစ်ဦးက ပြောသည်။

အိန္ဒိယဝန်ကြီးချုပ် နာရန်ဒရာမိုဒီက ရုရှားနိုင်ငံ ကာဇန်မြို့တွင် ပြီးခဲ့သည့်နှစ်အတွင်းက ကျင်းပသည့် BRICS ထိပ်သီးဆွေးနွေးပွဲ၌ နိုင်ငံအတွင်းသို့ လာရောက်လည်ပတ်ရန် သမ္မတပူတင်အား ဖိတ်ခေါ်ခဲ့ခြင်းဖြစ်သည်။

ထို့ကြောင့် အိန္ဒိယနိုင်ငံ  နယူးဒေလီမြို့တော်သို့ သမ္မတပူတင်လာရောက်မည့် ခရီးစဉ် နေ့ရက်အတိအကျ သတ်မှတ်နိုင်ရန် နှစ်နိုင်ငံစလုံးက သံတမန်နည်းလမ်းများအရ လုပ်ဆောင်လျက်ရှိသည်။ နှစ်နိုင်ငံကြား နောက်ဆုံးကျင်းပသည့် ထိပ်သီးဆွေးနွေးပွဲကို ၂၀၂၄ ခုနှစ်  ဇူလိုင်လအတွင်းက ရုရှားနိုင်ငံ   မော်စကိုမြို့တော်၌ကျင်းပခဲ့ပြီး ယင်းနှစ် အောက်တိုဘာလတွင် ကာဇန်မြို့၌ ဒုတိယအကြိမ်  ထပ်မံတွေ့ဆုံခဲ့ကြောင်းသိရသည်။

အိန္ဒိယနိုင်ငံသည် ရုရှားနိုင်ငံမှ ရေနံကို အဓိကဝယ်ယူတင်သွင်းနေသည့်    နိုင်ငံတစ်နိုင်ငံဖြစ်ပြီး  ၂၀၂၃ ခုနှစ်အတွင်းမှာပင် ဒေါ်လာ ၆၅ ဘီလီယံအထိ မြင့်တက်လာခဲ့သည်။ ယင်းပမာဏမှာ သာမန်ထက် ၅ ဆ ပိုမိုမြင့်တက်လာခြင်းဖြစ်ပြီး နှစ်နိုင်ငံကုန်သွယ်မှုသည် လာမည့် ၂၀၃၀ ပြည့်နှစ်တွင် ဒေါ်လာ ၁၀၀ ဘီလီယံအထိ မြင့်တက်လာစေရန်   သမ္မတပူတင်နှင့်ဝန်ကြီးချုပ် မိုဒီတို့က ဆုံးဖြတ်ထားကြောင်း သိရသည်။

Ref: RT

Source: Myawady Web Portal

အာဇော့ပင်လယ်သည် ရုရှားနိုင်ငံပိုင်ဖြစ်သောကြောင့်  အဆိုပါပင်လယ်အား ၎င်းတို့ပိုင်အဖြစ်ကြေညာသည့် မည်သည့် ကြိုးပမ်းမှုမျိုးကိုမဆို နှိမ်နင်းသွားမည်ဖြစ်ကြောင်း ရုရှားနိုင်ငံခြားရေး ဝန်ကြီးဌာနမှ ပြောရေးဆိုခွင့်ရှိသူ တစ်ဦးက ဇန်နဝါရီလ ၁၈ ရက်တွင် သတိပေးပြောကြားသည်။

ဒိုးနက်စ်ပြည်နယ်နှင့် ခါဆွန်ပြည်နယ်တို့က ၂၀၂၂ ခုနှစ် စက်တင်ဘာလတွင် ရုရှားနှင့်ပူးပေါင်းခဲ့ခြင်းကြောင့် အာဇော့ပင်လယ်သည် ရုရှားနိုင်ငံအတွင်းရှိ ပင်လယ်တစ်ခုဖြစ်လာကြောင်း၊  အဆိုပါပင်လယ်ရှိ ရေပိုင်နက်များအားပိုင်ဆိုင်သည်ဟူသော ပြောဆိုထုတ်ပြန်မှုမျိုးသည် ရုရှားနိုင်ငံ၏ပြည်တွင်းရေးကို ချိုးဖောက်ခြင်းဖြစ်သောကြောင့်  ရုရုားနိုင်ငံက ထိုသို့သောလုပ်ဆောင်မှုများကို နှိမ်နင်းသွားမည်ဖြစ်ကြောင်း မာရီယာဇာခါရိုဗာက ပြောကြားခြင်းဖြစ်သည်။

ဗြိတိန်နှင့် ယူကရိန်းနိုင်ငံတို့က ၎င်းတို့နှစ်နိုင်ငံကြား နှစ် ၁၀၀ မိတ်ဖက်ဆက်ဆံရေးသဘောတူညီချက်တစ်ရပ်ကို ပြီးခဲ့သည့် ရက်သတ္တပတ်အတွင်းက လက်မှတ်ထိုးခဲ့ပြီး ၎င်းတို့အနေဖြင့်   ဘောတစ်ပင်လယ်၊ ပင်လယ်နက်နှင့်   အာဇော့ပင်လယ်များအတွင်း ပူးပေါင်းဆောင်ရွက်မှုများကို တိုးမြှင့်လုပ်ဆောင်ရန်ဆုံးဖြတ်ခဲ့ပြီးနောက် ရုရှားအစိုးရ၏ တုံ့ပြန်မှု  ထွက်ပေါ်လာခြင်းဖြစ်သည်။

ဗြိတိန်အစိုးရသည် အဆိုပါပင်လယ်များအတွင်း  ရေရှည်အခြေချခွင့်ရရှိရန် ဆန္ဒရှိနေပြီး အထူးသဖြင့် အာဇော့နှင့် ပင်လယ်နက်မြေနိမ့်ချိုင့်ဝှမ်းများအတွင်း အခြေချခွင့်ရရှိရန် ကြိုးပမ်းလျက်ရှိကြောင်း ရုရှားက ဆက်လက်ပြောကြားခဲ့ကြောင်း သိရသည်။                    

Ref: Sputnik

Source: Myawady Web Portal

အစ္စရေးနှင့် ဟားမက်စ် လက်နက်ကိုင်အဖွဲ့အကြား အပစ်အခတ်ရပ်စဲရေး သဘောတူညီချက်ကို ပါလက်စတိုင်း ပြည်သူများနှင့် ၎င်း၏ထောက်ခံသူများအတွက် အောင်ပွဲတစ်ခုအဖြစ် အီရန်နိုင်ငံက ချီးကျူးပြောဆိုခဲ့ကြောင်း သိရသည်။ ထို့ပြင် အစ္စရေးနိုင်ငံသည် ၎င်း၏ ကတိဝတ်များကို လေးစားလိုက်နာလိမ့်မည် မဟုတ် ကြောင်း အီရန်အစိုးရက သတိပေးပြောဆိုခဲ့သည်။

အီရန်ဘာသာရေးခေါင်းဆောင် အလီခါမေနီက “ဂါဇာ ကမ်းမြောင်ဒေသမှာရှိသည့် ပြည်သူများ၏ စိတ်ရှည်မှု နှင့် ပါလက်စတိုင်းတို့၏ဇွဲရှိမှုသည် အစ္စရေးအစိုးရကို ဆုတ်ခွာရန် တွန်းအားပေးနိုင်ခဲ့ကြောင်း” ပြောခဲ့သည်။ အစ္စရေးနှင့်ဟားမက်စ်လက်နက်ကိုင်အဖွဲ့ကြား စစ်ပွဲဖြစ်ပွားမှုမှာ အချိန်တစ်နှစ်ကျော်အထိ ရှိလာခဲ့မှုနှင့်အတူ ပြီးခဲ့သည့် ဇန်နဝါရီလ ၁၅ ရက်တွင် အပစ်အခတ် ရပ်စဲရေးကို ထုတ်ပြန်ကြေညာခဲ့ခြင်းဖြစ်သည်။

အစ္စရေး-ဟားမက်စ် စစ်ပွဲဖြစ်ပွားမှုနှင့်အတူ လူပေါင်းသောင်းချီ အသက်ဆုံးရှုံးခဲ့ရပြီး အများစုမှာ ဂါဇာကမ်းမြောင်ဒေသမှဖြစ်ကြောင်း သိရသည်။ ဇန်နဝါရီလ ၁၉ ရက်တွင် စတင် အသက်ဝင်မည့် အဆိုပါ သဘောတူညီချက်တွင် အစ္စရေးဓားစာခံများနှင့် ပါလက်စတိုင်း အကျဉ်းသားများကို လွှတ်ပေးရေးတို့ ပါဝင်ကြောင်းလည်း သိရသည်။

အီရန်အစိုးရသည် အစ္စရေးနှင့်ဟားမက်စ် လက်နက်ကိုင်အဖွဲ့အကြား အပစ်အခတ်ရပ်စဲရေး သဘောတူညီချက်ကို ပါလက်စတိုင်းပြည်သူများအတွက် အောင်ပွဲတစ်ခုအဖြစ် ဂုဏ်ပြုခဲ့ကြောင်းလည်းသိရသည်။ အစ္စရေးသည် ၎င်း၏ စစ်ရေးရည်မှန်းချက်များ မအောင်မြင်မှုနှင့် ထိခိုက်နစ်နာမှုများကြောင့် အဆိုပါသဘောတူညီချက်ကို သဘောတူခဲ့ခြင်းဖြစ်ကြောင်း အီရန်အစိုးရက ထုတ်ပြန်ပြောဆိုခဲ့သည်။

ထို့ပြင် အစ္စရေးအစိုးရသည် ဟားမက်စ်နှင့် လက်ဘနွန်အခြေစိုက် ဟစ်ဇဘိုလာ လက်နက်ကိုင်အဖွဲ့တို့၏ ခေါင်းဆောင်များကို သတ်ဖြတ်ခြင်းအပါအဝင် ၎င်း၏ ရန်သူများအပေါ် ကြီးမားသော ထိခိုက်မှုများရှိအောင် လုပ်ဆောင်နိုင်ခဲ့သော်လည်း ယင်းအဖွဲ့များမှာ လှုပ်ရှားမှုများကို တက်ကြွစွာ လုပ်ဆောင်နေဆဲ ဖြစ်ကြောင်း အီရန်စစ်တပ်က အလေးပေးပြောကြားခဲ့သည်။

ကိုးကား-NP News

‌ဒေါ်နယ်ထရမ့်သည်  ၎င်း၏ သမ္မတသက်တမ်း အစောပိုင်းကာလများအတွင်း တရုတ်နိုင်ငံသို့ သွားရောက်ရန်စီစဉ်နေကြောင်း WSJ က ဖော်ပြထားပါသည်။

အမေရိကန် သမ္မတ ဒေါ်နယ်ထရမ့်သည် ကုန်သွယ်ရေး စစ်ပွဲအသစ်ဖြစ်လာမည့် အလားအလာကြောင့် တရုတ်ပြည်သူ့သမ္မတ ရှီကျင့်ဖျင်နှင့် ဆက်ဆံရေး ပိုမို ကောင်းမွန်လာစေရန် ၎င်း၏ သမ္မတ သက်တမ်း ပထမရက် ၁၀၀ အတွင်း တရုတ်နိုင်ငံသို့ သွားရောက်လိုကြောင်း သတင်းအရင်းမြစ်များကို ကိုးကား၍ Wall Street Journal က ဇန်နဝါရီ ၁၈ ရက်နေ့တွင် ဖော်ပြခဲ့ပါသည်။

ထိုင်ဝမ်အရေးကိစ္စနှင့် ဒေါ်နယ်ထရမ့်၏ တရုတ် သွင်းကုန်များအပေါ် အခွန်စည်းကြပ်ရန် ကတိပြုမှုကြောင့် နှစ်နိုင်ငံကြား ပထဝီနိုင်ငံရေးတင်းမာမှုများ ရင်ဆိုင်ရချိန်တွင် တရုတ်ခေါင်းဆောင်နှင့် ဆက်ဆံရေး ပိုမို နက်ရှိုင်းလာစေရန် ရည်ရွယ်ခြင်းဖြစ်ပါသည်။ အဆိုပါ ကိစ္စနှင့်ပတ်သက်၍ ရင်းနှီးသူများအနေဖြင့် ဒေါ်နယ်ထရမ့် က တရုတ်နိုင်ငံသို့ သွားရောက်ရန် စိတ်ဝင်စားကြောင်း စာရွက်ပေါ်တွင် ပြောကြားခဲ့သော်လည်း အပြီးသတ် ဆုံးဖြတ်ချက် မချရ သေးကြောင်း သိရှိရပါသည်။

ကိုးကား - RT

ဂျာမန်ဘက်မှ အစပြုမှုဖြင့် စကားပြောဆိုခဲ့ခြင်းဖြစ်ကြောင်း ဆလိုဗက်ကီးယားဝန်ကြီးချုပ်က ပြောကြားခဲ့ပါသည်။ ဆွေးနွေးမှု၏ အကြောင်းအရာမှာ ယူကရိန်းနိုင်ငံမှတစ်ဆင့် ဓာတ်ငွေ့ထောက်ပံ့မှုနှင့် ဖြတ်သန်းမှုဆိုင်ရာ ကိစ္စရပ်ဖြစ်ပါသည်။

"ယူကရိန်းမှတစ်ဆင့် ဓာတ်ငွေ့ဖြတ်သန်းမှုကို ရပ်တန့်ရန် ယူကရိန်းခေါင်းဆောင် ဇီလန်းစကီ၏ ဆုံးဖြတ်ချက်သည် ဆလိုဗက်ကီးယားနိုင်ငံအတွက် အလွန်ထိခိုက်စေပြီး EU တစ်ခုလုံးကို ဘီလီယံများစွာ ကုန်ကျစေမည်ဖြစ်ပါသည်။ ဇီလန်းစကီ၏ ဆုံးဖြတ်ချက်ကို မပြောင်းလဲနိုင်ပါက ဆလိုဗက်ကီးယား က အပြန်အလှန် တုံ့ပြန်မှုများ ပြုလုပ်သွားမည်ဖြစ်ကြောင်း ဆလိုဗက်ကီးယားဝန်ကြီးချုပ်မှ ပြောကြားခဲ့ပါသည်။

ဆလိုဗက်ကီးယား ဝန်ကြီးချုပ်က Davos တွင် ယူကရိန်းခေါင်းဆောင် ဇီလန်းစကီနှင့် တွေ့ဆုံဆွေးနွေးရန် ရက်အတော်ကြာကမ်းလှမ်းခဲ့သော်လည်း နောက်ပိုင်းတွင် ကိယက်ဗ်မှ အဆိုပြုချက်ကို တုံ့ပြန်ခြင်းမရှိသေးကြောင်း ပြောကြားခဲ့ပါသည်။

ကိုးကား - RT

Photo: Trend

ရုရှားနှင့် အီရန်ကြား ကျယ်ပြန့်လှသည့် ဘက်စုံမဟာဗျူဟာမြောက် ပူးပေါင်းဆောင်ရွက်ရေး သဘောတူညီချက်သည်  အရှေ့အလယ်ပိုင်းဒေသရှိ လုံခြုံရေးနယ်ပယ်တွင် နှစ်နိုင်ငံပူးပေါင်းဆောင်ရွက်မှုအပေါ် အကျိုးသက်ရောက်စေလာနိုင်မည်ဖြစ်သည်။

အကြောင်းမှာ အီရန်နိုင်ငံသည် အရှေ့အလယ်ပိုင်းဒေသတွင် အင်အားတောင့်တင်းပြီး လွှမ်းမိုးမှုဩဇာကြီးမားသောနိုင်ငံဖြစ်သလို ရုရှားနိုင်ငံသည် ကမ္ဘာ့အင်အားကြီး စူပါပါဝါနိုင်ငံတစ်နိုင်ငံအဖြစ် ရပ်တည်နေခြင်းကြောင့်ပင်ဖြစ်သည်။ ထို့ကြောင့် အီရန်နှင့်ရုရှားနိုင်ငံတို့ကြား ပူးပေါင်းဆောင်ရွက်မှုသည် ဒေသတွင်းတည်ငြိမ်ရေးနှင့် လုံခြုံရေးကို ထိန်းသိမ်းရန်အတွက် ၎င်းနှစ်နိုင်ငံက အာရုံစိုက် လုပ်ဆောင်မည် ဖြစ်ကြောင်း ရုရှားနိုင်ငံဆိုင်ရာ အီရန်သံအမတ်ကြီး ကာဇင်ဂျာလီလီက Sputnik သတင်းဌာနကို ပြောကြားခဲ့သည်။

ရုရှားသမ္မတ ဗလာဒီမာပူတင်သည် အီရန်သမ္မတ မာဆွတ် ပီဇက်ကီယန်းနှင့် ရုရှားနိုင်ငံ မော်စကိုမြို့၌ ဇန်နဝါရီလ ၁၇ ရက်တွင်တွေ့ဆုံ၍ ဒေသတွင်းနှင့် ကမ္ဘာလုံးဆိုင်ရာပြဿနာများကို ကျယ်ပြန့်စွာ ဆွေးနွေးမည်ဖြစ်သည်။ ထိုသို့တွေ့ဆုံစဉ် နှစ်နိုင်ငံခေါင်းဆောင်များသည် ရုရှားနှင့်အီရန်တို့ကြား နှစ်နိုင်ငံဆက်ဆံရေး ရေရှည်ဖွံ့ဖြိုးတိုးတက်ရေးအတွက် မူဘောင်တစ်ရပ်အဖြစ်  ရုရှားအစိုးရက ဖော်ပြထားသည့် ဘက်စုံမဟာဗျူဟာမြောက် မိတ်ဖက်ဆက်ဆံရေး သဘောတူညီချက်ကို  လက်မှတ်ရေးထိုးမည်ဟု မျှော်လင့်ရသည်။ အဆိုပါ နှစ်နိုင်ငံကြား ဘက်စုံမဟာဗျူဟာမြောက်မိတ်ဖက်ဆက်ဆံရေးသဘောတူညီချက်သည် နှစ်နိုင်ငံဆက်ဆံရေးကို ပိုမိုကျယ်ပြန့်နက်ရှိုင်းစေမည်ဖြစ်သည်။

ထို့ပြင်အဆိုပါဘက်စုံမဟာဗျူဟာမြောက်မိတ်ဖက်ဆက်ဆံရေးသဘောတူညီချက်ကြောင့် ရုရှားနှင့် အီရန်တို့ကြား ယခုနှစ်အတွင်း ဆက်လက်လုပ်ဆောင်မည့် နှစ်နိုင်ငံကုန်သွယ်မှုသည် စံချိန်သစ်တင်နိုင်မည့် အလားအလာရှိသည်။

နှစ်နိုင်ငံကြား  ချမှတ်လိုက်သည့် သဘောတူညီချက်သည် အီရန်အတွက် အကျိုးကျေးဇူးများစွာကို ဖြစ်ပေါ်လာစေနိုင်ကြောင်း တွေ့ရှိရသည်။ အကြောင်းမှာ အီရန်နိုင်ငံက ရုရှားနှင့်ဘက်စုံမဟာဗျူဟာမြောက် မိတ်ဖက်ဆက်ဆံရေး သဘောတူညီချက်ကို ချမှတ်လိုက်ခြင်းကြောင့်  အီရန် နိုင်ငံ၏ စီးပွားရေးဆက်ဆံရေး လုပ်ငန်းစဉ်များကို သိသိသာသာ ချောမွေ့လာစေနိုင်သည်။ ဒုတိယအချက်မှာ BRICS အဖွဲ့တွင်လည်း အီရန်နိုင်ငံ၏ ပူးပေါင်းဆောင်ရွက်မှုနှင့် အခန်းကဏ္ဍကိုပါ   ပိုမိုအားကောင်းလာစေနိုင်သည်။ BRICS အဖွဲ့တွင် ဘရာဇီး၊ ရုရှား၊ အိန္ဒိယ၊ တရုတ်နှင့် တောင်အာဖရိက စသည့်နိုင်ငံကြီးများ ပါဝင်လျက်ရှိရာ ယင်းနိုင်ငံကြီးများနှင့် ပူးပေါင်း ဆောင်ရွက်မှုကိုပါ တိုးမြှင့်လာနိုင်မည်ဖြစ်သည်။ နောက်တစ်ချက်ကို ကြည့်မည်ဆိုပါက ရှန်ဟိုင်းပူးပေါင်းဆောင်ရွက်ရေးအဖွဲ့ (SCO) အတွင်းရှိ အီရန်၏ ပူးပေါင်းဆောင်ရွက်မှုကိုပါ     ထူးထူးခြားခြား တိုးတက်လာစေမည်ဖြစ်သည်ကိုတွေ့ရမည်ဖြစ်သည်။

ရုရှားနှင့်အီရန်ကြား နှစ်နိုင်ငံကုန်သွယ်မှုပမာဏမှာ ၂၀၂၄  ခုနှစ်တွင် ဒေါ်လာ ၄ ဘီလီယံခန့်ရှိသည်ဟုခန့်မှန်းရပြီး ယခုချမှတ်သည့် ဘက်စုံမဟာဗျူဟာမြောက် မိတ်ဖက်ဆက်ဆံရေး သဘောတူညီချက်အရ ရုရှားနှင့်အီရန်တို့ကြား ကုန်သွယ်ရေးကဏ္ဍတွင်သာမက ပညာရေးနှင့် ယဉ်ကျေးမှုအပြန်အလှန်ဖလှယ်ရေး စသည့်အချက်များပါ ပါဝင်လျက်ရှိသောကြောင့် နှစ်နိုင်ငံကြား ကုန်သွယ်ရေးဆက်ဆံမှုကိုသာမက အခြားကဏ္ဍများရှိ ပူးပေါင်းဆောင်ရွက်မှုကိုပါ ပိုမိုကောင်းမွန် တိုးတက်လာစေမည်ဖြစ်သည်။

ပညာရေးနှင့်ယဉ်ကျေးမှု အပြန်အလှန်ဖလှယ်ရေး သဘောတူညီချက်အရ နှစ်နိုင်ငံစလုံးမှ ကျောင်းသား၊ ကျောင်းသူများနှင့် သင်ကြားပေးသည့်ဆရာနှင့် ဆရာမများအား  ရုရှားနှင့်အီရန်သို့ အပြန်အလှန် စေလွှတ်မည်ဖြစ်ရာ နှစ်နိုင်ငံကြားနည်းပညာ ပူးပေါင်းဆောင်ရွက်မှုကဏ္ဍတွင် လည်း ပိုမိုအားကောင်း လာစေမည်ဟု အီရန်က  မျှော်လင့်လျက်ရှိသည်။

ထို့ပြင် ရုရှားနှင့် အီရန်တို့အနေဖြင့် နှစ်နိုင်ငံကြား ရင်းနှီးမြှုပ်နှံမှု၊ ကုန်သွယ်မှု၊ ထောက်ပံ့ပို့ဆောင်မှုနှင့် သယ်ယူပို့ဆောင်ရေးဆိုင်ရာ အခြေခံအဆောက်အဦတည်ဆောက်ရေးတို့တွင် ပူးပေါင်းဆောင်ရွက်မှု ပိုမိုတိုးတက်လာစေမည့် နည်းလမ်းများကို ရှာဖွေသွားမည်ဖြစ်ကြောင်း ရုရှားအစိုးရက ထုတ်ပြန်ထားသည်။

ရုရှားနှင့် အီရန်နိုင်ငံတို့သည် လက်ရှိတွင်လည်း အဓိကအခြေခံအဆောက်အဦစီမံကိန်းကြီးတစ်ခုဖြစ်သည့် North-South Transport Corridor တွင်လည်း ပူးပေါင်းဆောင်ရွက်လျက်ရှိသည်။ အဆိုပါစီမံကိန်းသည် အိန္ဒိယ၊ အဇာဘိုင်ဂျန်၊ ရုရှား၊ ဗဟိုအာရှနှင့်ဥရောပတို့ကြား သယ်ယူပို့ဆောင်ရေးဆိုင်ရာ ချိတ်ဆက်မှုတစ်ရပ် တည်ဆောက်ရန်ရည်ရွယ်ထားသည့် စီမံကိန်းဖြစ်သည်။

အဆိုပါစီမံကိန်းကြီးတွင် ကုန်ပစ္စည်းစီးဆင်းမှုချောမွေ့စေရေး အထောက်အကူပြုစေမည့် မီးရထားလမ်း၊ ရေကြောင်းသယ်ယူပို့ဆောင်ရေးလမ်းကြောင်း၊ မော်တော်ကားလမ်းများ တည်ဆောက်ခြင်းတို့ ပါဝင်မည်ဖြစ်သည်။ ၎င်းသယ်ယူပို့ဆောင်ရေးလမ်းကြောင်းသည် ကမ္ဘာ့နိုင်ငံများကြား ပထဝီနိုင်ငံရေးခြိမ်းခြောက်မှုများဖြစ်ပွားပါက ကုန်ပစ္စည်းများကို ပို့ဆောင်ရာတွင် စူးအက်တူးမြောင်းအစား အသုံးပြုနိုင်သည့် သယ်ယူပို့ဆောင်ရေးလမ်းကြောင်းသစ် တစ်ခုဖြစ်လာနိုင်သည်ဟု ကျွမ်းကျင်သူများက ရှုမြင်လျက်ရှိသည်။

ရုရှားနှင့် အီရန်တို့ကြား ဆက်ဆံရေးသည် တစ်နိုင်ငံ၏အကျိုးစီးပွားကို အခြားတစ်နိုင်ငံက လျစ်လျူရှုခြင်းမရှိဘဲ စဉ်းစားပေးခြင်း၊ အပြန်အလှန်လေးစားခြင်းတို့အပေါ် အခြေခံထားခြင်းကြောင့် ယခင်ကထက် ပိုမိုတိုးတက်ကောင်းမွန်လာကြောင်း တွေ့ရှိရသည်။ ထို့ပြင်နှစ်နိုင်ငံကြား ယခုချမှတ်လိုက်သည့် ဘက်စုံမဟာဗျူဟာမြောက် မိတ်ဖက်ဆက်ဆံရေး သဘောတူညီချက်သည် ၂၀၀၁ ခုနှစ်က လက်မှတ်ရေးထိုးခဲ့သည့် နှစ်နိုင်ငံပူးပေါင်းဆောင်ရွက်ရေး သဘောတူညီချက်၏နေရာတွင် အစားထိုးဝင်ရောက်မည်ဖြစ်ပြီး နှစ်နိုင်ငံဆက်ဆံရေးနှင့် ပူးပေါင်းဆောင်ရွက်ရေးအား မဟာဗျူဟာမြောက်အဆင့်သို့ ရောက်ရှိလာစေရန် အထောက်အကူပြုမည်ဖြစ်ကြောင်း ရေးသားတင်ပြလိုက်ရပါသည်။    ။

Ref: RT, Sputnik

Source: Myawady Web Portal

ရုရှားသမ္မတဗလာဒီမာပူတင်သည် လာမည့် ရက်သတ္တပတ်များအတွင်း အိန္ဒိယနိုင်ငံ၊ နယူးဒေလီသို့ သွားရောက်ရန် စီစဉ်ထားပြီး ယခုနွေဦးရာသီတွင် အိန္ဒိယနှင့် ရုရှား နိုင်ငံအကြား ဗီဇာကင်းလွတ် ခရီးသွားလာမှုအတွက် အတိအကျ သတ်မှတ်နိုင်မည်ဟု မျှော်လင့်ရပါသည်။

ကိုးကား - ဒေသတွင်းမီဒီယာ

နိုင်ဂျီးရီးယားနိုင်ငံသည် BRICS အဖွဲ့တွင် မိတ်ဖက်နိုင်ငံအဖြစ်ပါဝင်သည့် နဝမမြောက်နိုင်ငံ ဖြစ်လာခဲ့ကြောင်း ဘရာဇီးနိုင်ငံခြားရေးဝန်ကြီးဌာနက ပြောကြားခဲ့ပါသည်။

BRICS အဖွဲ့၏ အလှည့်ကျဥက္ကဋ္ဌဖြစ်သည့် ဘရာဇီးအစိုးရအဖွဲ့က နိုင်ဂျီးရီးယားအား အုပ်စု၏ မိတ်ဖက် နိုင်ငံတစ်နိုင်ငံအဖြစ် ဇန်နဝါရီ ၁၇ ရက်တွင် တရားဝင် လက်ခံခဲ့ကြောင်း ကြေညာခဲ့ပြီး ဘရာဇီးအစိုးရသည် နိုင်ဂျီးရီးယား အစိုးရ၏ဆုံးဖြတ်ချက်ကို ကြိုဆိုပါကြောင်း အဆိုပါ စာတွင် ဖော်ပြထားပါသည်။

ထို့ကြောင့် နိုင်ဂျီးရီးယားသည် ဘီလာရုစ်၊ ဘိုလီးဗီးယား၊ ကျူးဘား၊ ကာဇက်စတန်၊ မလေးရှား၊ ထိုင်း၊ ယူဂန်ဒါနှင့် ဥဇဘက်ကစ္စတန်တို့ပြီးလျှင် BRICS ၏ နဝမမြောက် မိတ်ဖက်နိုင်ငံဖြစ်လာကြောင်း နိုင်ငံခြားရေးဝန်ကြီးဌာနက ပြောကြားခဲ့သည်။

ကိုးကား - RIA Novosti

Photo: You Tube