ရုရှားသမ္မတဗလာဒီမာ ပူတင်နှင့် အမေရိကန်အထူးကိုယ်စားလှယ်စတီဗ် ဝစ်ကော့ဖ်တို့သည် မော်စကိုရှိ ကရင်မလင်နန်းတော်၌ စတင်တွေ့ဆုံချိန်တွင် အင်္ဂလိပ်ဘာသာဖြင့် စတင်နှုတ်ဆက်ခဲ့ပါသည်။

အမေရိကန်ကိုယ်စားလှယ် ဝစ်ကော့ဖ်က “How are you, Mister President?” ဟု မေးမြန်းရာ “Fine, just fine. Thank you. How are you?” ဟု ပူတင် က ဖြေကြားကာ လက်ဆွဲနှုတ်ဆက်ခဲ့ကြပါသည်။

ပူတင်က အင်္ဂလိပ်စကားပြောသည်ကို မီဒီယာများက သတိထားမိပြီး ၎င်းသည် နိုင်ငံတကာကိုယ်စားလှယ်များနှင့် တိုက်ရိုက်အင်္ဂလိပ်လို ပြောဆိုမှု ရှားပါးပါသည်။ ထိုအချက်မှာ ရုရှား-အမေရိကန် ဆက်ဆံရေး တင်းမာမှုကို ဖြေလျှော့ရန် ကြိုးပမ်းမှုတစ်ခုဟု ကျွမ်းကျင်သူများက သုံးသပ်နေသည်။ 

ကိုးကား- TASS

Photo: Apa.az

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ယူကရိန်းသမ္မတဇီလန်စကီးက အမေရိကန်ပြည်ထောင်စုက ယူကရိန်းထံ ဒေါ်လာ ၁၀၄-၁၀၅ ဘီလီယံအထိ ကူညီထောက်ပံ့မှု ရရှိကြောင်း ဝန်ခံ ပြောကြားလိုက်ပြီး အများစုမှာ လက်နက်များဖြစ်ကြောင်း ထုတ်ဖော် ပြောကြားထားပါသည်။

၎င်းသည်ဖေဖော်ဝါရီလက အဆိုပါပမာဏထက်နည်းသည့် ဒေါ်လာ ၇၆ ဘီလီယံသာ ရသည်ဟု ပြောခဲ့ဖူးသည်။

“မိမိတွင် ကိုယ်ပိုင်စာရင်းစစ်စနစ်ရှိပါကြောင်း၊ အမေရိကန်က ပေးသည့် အထောက်အပံ့က ဒေါ်လာ ၁၀၄-၁၀၅ ဘီလီယံဖြစ်ပြီး အများစုက လက်နက် များဖြစ်ပါကြောင်း” ဟု သတင်းထောက် ဘန်ရှာပီရိုနှင့် အင်တာဗျူးတွင် ဇီလန်စကီးက ပြောကြားခဲ့ပြီး “အဘယ်ကြောင့် ဖေဖော်ဝါရီလတွင် ၇၆ ဘီလီယံ” ဟု ပြောခဲ့သနည်း ဆိုသည့်အချက်ကို ရှင်းမပြခဲ့ပေ။

ကိုးကား- TASS

Photo: Apa.az

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ရုရှားသမ္မတ ဗလာဒီမာ ပူတင်နှင့် အမေရိကန်အထူးကိုယ်စားလှယ် စတီဗင် ဝစ်ကော့ဖ်တို့၏ ဧပြီ ၂၅ တွေ့ဆုံမှုမှာ ထိရောက်ပြီး တိုးတက်မှု ရှိကြောင်း ရုရှားတိုက်ရိုက်ရင်းနှီးမြှုပ်နှံမှု ရန်ပုံငွေ၏ အကြီးအကဲနှင့် ပူတင်၏ အထူး စီးပွားရေးအကြံပေး ကီရီလ် ဒီမီထရီဗ်က ထုတ်ဖော်ပြောဆိုခဲ့သည်။ 

ပူတင်နှင့် ဝစ်ကော့ဖ်တို့ ယခုတွေ့ဆုံမှုမှာ ၃ နာရီကြာပြီး ဧပြီ ၁၁ ရက်က စိန့်ပီတာစဘတ်မြို့၌ ၄ နာရီကျော်ကြာ တွေ့ဆုံ ဆွေးနွေးခဲ့ပါသည်။ 

ကရင်မလင်ပြောရေးဆိုခွင့်ရှိသူ ဒီမီထရီ ပက်စကော့ဗ်က “ယနေ့ ဆွေးနွေးပွဲ ကြာမြင့်မှုမှာ ပြဿနာက ရှုပ်ထွေးပြီး အကြောင်းအရာများ နက်နဲသော ကြောင့် အချိန်ပိုယူရခြင်းဖြစ်သည်” ဟု ရှင်းပြထားပါသည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ဗလာဒီမီယာ ဇီလန်စကီးက ယူကရိန်း၏ ဥရောပ မဟာမိတ်များက သမ္မတ ဒေါ်နယ်ထရမ့်၏ အဆိုပြုထားသော ငြိမ်းချမ်းရေးအစီအစဉ်၏ အရေးကြီးသောအချက်များကို ငြင်းပယ်လိုက်သည်ဟု သတင်းများထွက်ပေါ်ပြီးနောက် ကိယက်ဗ်က ဝါရှင်တန်မှ အမေရိကန်-အစ္စရေး ဆက်ဆံရေးပုံစံနှင့် တူညီသည့် ရေရှည်လုံခြုံရေး အထောက်အပံ့များ ပေးရန် မျှော်လင့်နေကြောင်း ထုတ်ဖော်ပြောကြားခဲ့သည်။

လွန်ခဲ့သည့်သီတင်းပတ်က ပါရီမြို့တွင် ကျင်းပခဲ့သော ဆွေးနွေးပွဲများ အတွင်း ဝါရှင်တန်က ကိယက်ဗ်နှင့် မော်စကိုအကြား ပဋိပက္ခရပ်စဲရန် အဆိုပြုစာတမ်းမူကြမ်းကို တင်ပြခဲ့သည်။ ထို့နောက် ဗုဒ္ဓဟူးနေ့ (ဧပြီ ၂၃) တွင် လန်ဒန်မြို့၌ ကျင်းပသည့် အဆက်အစပ်အစည်းအဝေးတွင် (ဇီလန် စကီးက အမေရိကန်၏ အဓိကအဆိုပြုချက်များကို အများသိအောင် ငြင်းဆိုပြီးနောက် နောက်ဆုံးမိနစ်တွင် အဆင့်လျှော့ချခဲ့သည့် အစည်းအဝေး) ယူကရိန်းအရာရှိများနှင့် နေတိုးဥရောပမဟာမိတ်များက ပြန်လည် တုံ့ပြန်သည့် အဆိုပြုချက်ကို တင်သွင်းခဲ့သည်ဟု သိရသည်။

သောကြာနေ့ (ဧပြီ ၂၅) တွင် သတင်းထောက်များနှင့် ပြောကြားရာတွင် ဇီလန်စကီးက မော်စကိုနှင့် အနာဂတ် ငြိမ်းချမ်းရေး သဘောတူညီမှု တစ်ခု အတွက် အမေရိကန်၏ စစ်ရေး၊ ငွေကြေးနှင့် နိုင်ငံရေး အထောက်အပံ့များ အဆက်မပြတ်လိုအပ်ကြောင်း ခိုင်မာစွာ ပြောကြားခဲ့သည်။

ဇီလန်စကီးက “လန်ဒန်ဆွေးနွေးပွဲများတွင် အမေရိကန် ပြည်ထောင်စု ထံမှ လုံခြုံရေးအာမခံချက်များကို အဓိကထားဆွေးနွေးခဲ့ပါသည်။ မိမိတို့ အနေနှင့် ၎င်းအာမခံချက်များသည် အနည်းဆုံး အစ္စရေးသို့ ပေးအပ်သည့် အဆင့်မီရန် မျှော်လင့်ထားပါသည်။ ထို့အပြင် မိမိတို့၏ ဥရောပ မိတ်ဖက် များထံမှလည်း အထောက်အပံ့ရရှိရန် မျှော်မှန်းထားပြီး ထိုအာမခံချက်များအတွက် လိုအပ်သော အခြေခံအဆောက်အအုံများကို အမြန် တည်ဆောက်လျက်ရှိပါသည်” ဟု ပြောဆိုခဲ့ပါသည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ယူကရိန်းသမ္မတဇီလန်စကီး၏ Megaphone Diplomacy (သတင်းမီဒီယာများကတစ်ဆင့် အပြန်အလှန်စွပ်စွဲခြင်း) နည်းလမ်းကို အမေရိကန်အစိုးရက လက်မခံနိုင်ကြောင်း အိမ်ဖြူတော် ပြောရေးဆိုခွင့်ရှိသူ Karoline Leavitt က သတင်းထောက်များအား ပြောကြားလိုက်ပါသည်။

“ဇီလန်စကီးသည် ငြိမ်းချမ်းရေးဆွေးနွေးမှုကို သတင်းစာများကတစ်ဆင့်လုပ်ဆောင်နေပြီး ၎င်းမှာ သမ္မတထရမ့်အတွက် လက်မခံနိုင်သောအရာ ဖြစ်ပါကြောင်း၊ အဆိုပါဆွေးနွေးမှုများကို တံခါးပိတ်အစည်းအဝေးများအနေဖြင့် ပြုလုပ်သင့်ပါကြောင်း” သူမက ဖြည့်စွက်ပြောဆိုခဲ့ပါသည်။ 

ထို့ပြင် “ယူကရိန်းသည် ခရိုင်းမီးယားကို ရုရှား၏အစိတ်အပိုင်းအဖြစ် အသိအမှတ်မပြုနိုင်” ဟု ဇီလန်စကီးက ယခုလတွင်ပြောကြားခဲ့ရာ ထရမ့် အစိုးရက ၎င်းစကားမှာ ငြိမ်းချမ်းရေးဆွေးနွေးမှုအတွက် အဟန့်အတားဖြစ်စေသည်ဟုမြင်ကြောင်း၊ ခရိုင်းမီးယားကိစ္စသည် ၂၀၁၄ ခုနှစ် ကတည်းက (အိုဘားမား သမ္မတသက်တမ်းအတွင်း) အဆုံးသတ်သွားပြီဖြစ်ကာ ဆွေးနွေးစရာမလိုဟု ထရမ့်က ယခုအပတ်တွင် ပြောကြားခဲ့ပါသည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ရုရှားနိုင်ငံခြားရေးဝန်ကြီး ဆာဂေးလာဗရော့ဗ် က ကြာသပတေးနေ့ (ဧပြီ ၂၄) တွင် CBS News နှင့် ပြုလုပ်သော တွေ့ဆုံမေးမြန်းခန်း၌ ယူကရိန်းပဋိပက္ခ အဆုံးသတ်ရန် သဘောတူညီမှုတစ်ရပ် ရရှိရေး အတွက် မော်စကိုနှင့် ဝါရှင်တန်တို့သည် “မှန်ကန်သောလမ်းကြောင်း” ပေါ်တွင် ရှိနေကြောင်း ပြော ကြားခဲ့သည်။

လာဗရော့ဗ်က “ကျွန်ုပ်တို့သည် ညှိနှိုင်းမှုများအတွက် အဆင်သင့်ဖြစ်နေပါသည်။ သို့သော် ဤဆွေးနွေးမှုများသည် လက်ရှိအခြေအနေများနှင့် နိုင်ငံတကာလုံခြုံရေးအတွက် ရုရှား၏ အခြေခံအကျိုးစီးပွား များကို ထည့်သွင်းစဉ်းစားရမည်”ဟု ရှင်းလင်းပြောကြားခဲ့သည်။ ဤကြေညာချက်သည် အမေရိကန်- ရုရှား ဆက်ဆံရေးတွင် ဖြစ်နိုင်ခြေရှိသော တင်းမာမှုလျှော့ချရေးနှင့် ယူကရိန်းစစ်ပွဲအဆုံးသတ်ရန် နိုင်ငံတကာကြိုးပမ်းမှုများကြားတွင် ထွက်ပေါ်လာခြင်းဖြစ်သည်။ သို့ရာတွင် လာဗရော့ဗ်က အနောက် နိုင်ငံများအနေဖြင့် ရုရှား၏ လုံခြုံရေးအကျိုးစီးပွားများကို အသိအမှတ်ပြုရန် လိုအပ်ကြောင်း ထပ်လောင်း အလေးပေးပြောကြားခဲ့သည်။

အမေရိကန်သမ္မတ ဒေါ်နယ်ထရမ့်သည် မကြာသေးမီသီတင်းပတ်များအတွင်း ယူကရိန်းအား ပဋိပက္ခကိုဖြေရှင်းရန် ၎င်း၏နောက်ဆုံးအဆိုပြုချက်ကိုလက်ခံရန် ဖိအားပေးခဲ့သည်ဟု သတင်းများ ထွက်ပေါ်နေသည်။သို့သော် အဆိုပြုချက်၏ အသေးစိတ်အချက်အလက်များကို လက်ရှိအချိန်ထိ ထုတ်ဖော်ပြောဆိုခြင်း မရှိသေးပေ။

ထရမ့်၏ အထူးကိုယ်စားလှယ် စတိဗ်ဝစ်ကော့ဖ်သည် သောကြာနေ့ (ဧပြီ ၂၅) ရက်နေ့တွင် ရုရှား

သမ္မတ ဗလာဒီမာပူတင်နှင့် နောက်ထပ်တွေ့ဆုံမည်ဟု မျှော်မှန်းထားသည်။ ဤဆွေးနွေးပွဲသည် ငြိမ်းချမ်းရေးလုပ်ငန်းစဉ်အတွက် အရေးပါသော အဆင့်တစ်ခုဖြစ်နိုင်သည်။

Face the Nation အစီအစဉ်တွင် လာဗရော့ဗ်က “အမေရိကန်သမ္မတက သဘောတူညီမှုတစ်ခုရရှိရန် ကြိုးပမ်းနေပြီး ကျွန်ုပ်တို့လည်း ထိုသဘောတူညီမှုအတွက် အဆင်သင့်ဖြစ်နေပါသည်။ သို့သော် အချို့သော အသေးစိတ်အချက်များကို ညှိနှိုင်းရန် လိုအပ်နေဆဲဖြစ်ပြီး ကျွန်ုပ်တို့သည် ယခုအချိန်တွင် ထိုလုပ်ငန်းစဉ်ကို ဆောင်ရွက်နေပါသည်” ဟု ရှင်းလင်းပြောကြားခဲ့သည်။

သုံးသပ်ချက်

• ဤကြေညာချက်သည်ယူကရိန်းစစ်ပွဲအဆုံးသတ်ရန် နိုင်ငံတကာကြိုးပမ်းမှုများ တိုးတက်နေကြောင်း ညွှန်းဆိုနေသော်လည်း၊ အဓိကအငြင်းပွားစရာများဖြစ်သည့် ယူကရိန်း၏ နယ်နိမိတ် အခြေအနေ၊ရုရှား၏ လုံခြုံရေးတောင်းဆိုချက်များ (ဥပမာ - ယူကရိန်းကို နေတိုးအဖွဲ့ဝင်အဖြစ် ဝင်ရောက်ခွင့်မပြုရန်) စသည့်အချက်များကို မည်သို့ဖြေရှင်းမည်ဆိုသည်မှာ အတိအကျ မသိရသေးပေ။

• ထရမ့်အုပ်ချုပ်ရေးအဖွဲ့သည် ယူကရိန်းကို စစ်ရေးအရ ပံ့ပိုးမှုလျှော့ချရန် ဦးတည်နေသည်ဟု သတင်းများရှိပြီး၊ ၎င်းသည် ရုရှားနှင့် သဘောတူညီမှုရရှိရန် အချက်တစ်ခု ဖြစ်နိုင် သည်။

• “ငြိမ်းချမ်းရေးလမ်းကြောင်းပေါ်သို့ ရောက်ရှိနေပြီဖြစ်သော်လည်း၊ အသေးစိတ်အချက်များကို ညှိနှိုင်းရန် အချိန်ယူရဦးမည်” ဟု နိုင်ငံရေးလေ့လာသူများက မှတ်ချက်ပြုထားသည်။

ကိုးကား-RT

“ပါကစ္စတန်နှင့် အိန္ဒိယတို့ ချုပ်ဆိုထားသော နှစ်နိုင်ငံသဘောတူညီချက်များအားလုံးကို ယာယီဆိုင်းငံ့မည်” ဟု ပါကစ္စတန် အမျိုးသားလုံခြုံရေးကောင်စီက ဧပြီ ၂၄ ရက်တွင် ကြေညာလိုက်ပါသည်။ 

၎င်းတို့တွင် ၁၉၇၂ ခုနှစ်က ချုပ်ဆိုခဲ့သည့် ရှင်းလာသဘောတူညီချက် (Simla Agreement) လည်း ပါဝင်ပြီး အဆိုပါဆုံးဖြတ်ချက်သည် ဂျမူးနှင့် ကက်ရှ်မီးယား အငြင်းပွားဒေသ (အိန္ဒိယထိန်းချုပ်ဧရိယာ) တွင် ဧပြီ ၂၂ ရက်က ဖြစ်ပွားခဲ့သော အကြမ်းဖက်တိုက်ခိုက်မှုနှင့်ပတ်သက်၍ အိန္ဒိယ၏ တုံ့ပြန်မှုများအပေါ် ပြန်လည်တုံ့ပြန်ခြင်းဖြစ်ပါသည်။ 

“အိန္ဒိယသည် အပြည်ပြည်ဆိုင်ရာ ဥပဒေများ၊ ကုလသမဂ္ဂလုံခြုံရေးကောင်စီ၏ ဆုံးဖြတ်ချက်များနှင့် ကမ္ဘာ့ကျင့်ဝတ်များကို လေးစားမှုမရှိဘဲ စည်းမျဉ်းချိုးဖောက်နေသည်” ဟု ပါကစ္စတန် အမျိုးသားလုံခြုံရေးကောင်စီ က ပြောကြားခဲ့သည်။ 

“အိန္ဒိယသည် ပါကစ္စတန်အတွင်း အကြမ်းဖက်မှုများ အားပေးခြင်း၊ နယ်စပ်ဖြတ်ကျော် လူသတ်မှုများ ပြုလုပ်ခြင်းနှင့် ကက်ရှ်မီးယားဆိုင်ရာ ကုလသမဂ္ဂဆုံးဖြတ်ချက်များကို လိုက်နာရန် ငြင်းဆန်ခြင်းများ ရပ်တန့်သည်အထိ ထိုသဘောတူညီချက်များကို ဆိုင်းငံ့ထားမည်” ဟု ပါကစ္စတန် ဝန်ကြီးချုပ်ရုံးကလည်း ဧပြီ ၂၄ ရက်တွင် ထုတ်ပြန်ထားပါသည်။

ရှင်းလာသဘောတူညီချက် (၁၉၇၂) သည် အိန္ဒိယ-ပါကစ္စတန် တတိယ စစ်ပွဲ (၁၉၇၁) အပြီး နှစ်နိုင်ငံကြား ပြေလည်ရေးအတွက် အခြေခံကျသော စာချုပ်ဖြစ်ပြီး ကက်ရှ်မီးယားပြဿနာကို နှစ်နိုင်ငံကြား တိုက်ရိုက် ဆွေးနွေးဖြေရှင်းရန် သတ်မှတ်ပေးခဲ့သည်။ ထိုစာချုပ်ကို ပါကစ္စတန်က ယာယီ ရပ်ဆိုင်းလိုက်ခြင်းသည် နှစ်နိုင်ငံဆက်ဆံရေးအတွက် ကြီးမားသော အကျိုးဆက်ရှိလာနိုင်ပါသည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ဘယ်လ်ဂျီယံ အစိုးရသည် ၂၀၂၅ ခုနှစ်တွင် ဥရောပကော်မရှင်၏ ယူကရိန်းထံ လက်နက်ထောက်ပံ့မှု ရန်ပုံငွေမှ ယူရို ၁.၂ ဘီလီယံကို နုတ်ယူ၍ ၎င်း၏ ကာကွယ်ရေးဘတ်ဂျက်ကို မြှင့်တင်ရန် အစီအစဉ်ရှိကြောင်း Le Soir သတင်းစာက ဖော်ပြထားပါသည်။ 

ထိုသို့လုပ်ဆောင်ခြင်းမှာ ဘယ်လ်ဂျီယံ၏ကာကွယ်ရေး အသုံးစရိတ်ကို GDP ၏ ၁.၃% မှ ၂% အထိ တိုးမြှင့်ရန် ဖြစ်ပါသည်။ သို့သော် ၂၀၂၅ တွင် ထိုရည်မှန်းချက်အောင်မြင်ရန် ယူရို ၃.၈ ဘီလီယံလိုအပ်နေပြီး၊ ဝန်ကြီးချုပ် Bart De Wever က ၁.၈ ဘီလီယံသာ အဆိုပြုထားသည်။

ဘယ်လ်ဂျီယံက နုတ်ယူမည့် ၁.၂ ဘီလီယံသည် ရုရှား၏ ပြည်ပရှိ ပိုင်ဆိုင်မှုများအပေါ် ထိန်းချုပ်ထားသော ရန်ပုံငွေများမှ အကျိုးအမြတ် (ဥရောပ Euroclear ဘဏ်တွင် သိမ်းဆည်းထားသည့် ရုရှားငွေကြေး) မှ ရရှိထား ပါသည်။ 

ဘယ်လ်ဂျီယံသည် နေတိုးအဖွဲ့ဝင်နိုင်ငံဖြစ်ပြီး၊ ၂၀၂၄ တွင် နေတိုး၏ ၂% ရည်မှန်းချက်အောက်ဖြစ်သော GDP ၏ ၁.၃% သာ ကာကွယ်ရေးစရိတ် အသုံးပြုခဲ့ပါသည်။ ၂၀၂၅ ခုနှစ်တွင် ၂% အထိ တိုးမြှင့်ရန် ကတိပြုထားသော်လည်း ဘဏ္ဍာရေး အခက်အခဲများ ရှိနေသည်။ 

၂၀၂၅ ခုနှစ် နေတိုးအစည်းအဝေးတွင် ကာကွယ်ရေးအသုံးစရိတ်ကို GDP ၏ ၃% မှ ၅% အထိ တိုးမြှင့်ရန် ဖိအားပေးမည်ဖြစ်သဖြင့် ဘယ်လ်ဂျီယံ သည် ယခုလုပ်ဆောင်ချက်ကြောင့် ပိုမိုကြီးမားသော စိန်ခေါ်မှုများကို ရင်ဆိုင်ရနိုင်ဖွယ် ရှိနေပါသည်။ 

ကိုးကား- TASS

Photo: Reuters

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ဂျီအွန်ဂျူခရိုင် အစိုးရရှေ့နေရုံး၏ ထုတ်ပြန်ချက်အရ သမ္မတဟောင်း မွန်းဂျေအင်း အား လာဘ်ပေးလာဘ်ယူမှုစွပ်စွဲချက်ဖြင့် ကြာသပတေးနေ့ (ဧပြီ ၂၄)တွင် တောင်ကိုရီးယား အစိုးရရှေ့နေများက စွဲချက်တင်ခဲ့ပြီး ၎င်းအား ထိုင်းလေကြောင်းလိုင်းတစ်ခုတွင် ၎င်း၏သားမက်ဖြစ်သူအား ခန့်အပ်မှုနှင့် ဆက်နွှယ်သည့်အမှုအတွက် တရားရင်ဆိုင်ရမည် ဖြစ်ပါသည်။ အသက် ၇၂ နှစ်ရှိ မွန်းကို လာဘ်ပေးလာဘ်ယူမှုဖြင့် စွဲချက်တင်ခံရပြီး ပါလီမန်အမတ်ဟောင်း လီဆန်ဂျစ်ကိုလည်း လာဘ်ပေးလာဘ်ယူမှုနှင့် ယုံကြည်မှုဖောက်ဖျက်မှုတို့ဖြင့် စွဲချက်တင်ထားကြောင်း ထုတ်ပြန်ချက်တွင် ဖော်ပြထားပါသည်။ 

SMEs နှင့် Startups Agency ၏ အကြီးအကဲအဖြစ် လီဆန်ဂျစ်ကို ခန့်အပ်မှုသည် မွန်း၏သားမက်ဖြစ်သူအား အလုပ်ရပြီး ၂၀၁၈-၂၀၂၀ တွင် လီ ထိန်းချုပ်ထားသော ထိုင်းအခြေစိုက် ကော်ပိုရေးရှင်းတွင် လစာနှင့် နေထိုင်စရိတ်များ ရရှိခြင်းအတွက် လဲလှယ်ခြင်း ရှိ၊ မရှိ အစိုးရ ရှေ့နေ များက စုံစမ်းစစ်ဆေးနေကြောင်း ထုတ်ပြန်ချက်တွင် ဖော်ပြထားပါသည်။ မွန်း၏သမက်ဖြစ်သူက အမှုဆောင်ဒါရိုက်တာအဖြစ် လက်ခံရရှိသည့်ငွေ စုစုပေါင်း ဘတ် ၅.၉၅ သန်း (ဒေါ်လာ ၁၇၇,၅၀၆) သည် မမှန်မကန် ဖြစ်ပြီး ထိုအချိန်က သမ္မတအား လာဘ်ထိုးသည်ဟု တရားစွဲဆိုထား ပါသည်။ 

အစိုးရရှေ့နေများသည် မွန်း၏တရားစွဲဆိုမှုအတွက် ရှေးယခင်က သမ္မတဟောင်း ပတ်ဂွန်ဟေးနှင့်လီမြောင်ဘက် တို့ပါဝင်သည့် လာဘ်ပေးလာဘ်ယူမှု အမှုများကို ကိုးကားဖော်ပြခဲ့ပါသည်။

ကိုးကား-Myanmar National Post

အမေရိကန်သမ္မတ ဒေါ်နယ်ထရမ့်သည် မေလတွင် အရှေ့အလယ်ပိုင်းသို့ သွားရောက်လည်ပတ်ပြီးနောက် ရုရှားသမ္မတဗလာဒီမာပူတင်နှင့် မကြာခင်တွင် တွေ့ဆုံနိုင်ကြောင်း ပြောကြားလိုက်ပါသည်။

ထရမ့်သည် မေလ ၁၃ ရက်မှ ၁၆ ရက်အထိ အရှေ့အလယ်ပိုင်းသို့ သွားရောက်ကာ ဆော်ဒီအာရေဗျ၊ ကာတာနှင့် အာရပ်စော်ဘွားများ ပြည်ထောင်စုတို့ကို လည်ပတ်မည်ဟု အိမ်ဖြူတော်က ဧပြီ ၂၂ (အင်္ဂါနေ့) တွင် သတင်းထုတ်ပြန်ထားပါသည်။

ကိုးကား- TASS

Photo: Axios

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃