ဇူလိုင်လ ၃၁ ရက်တွင် ကျင်းပသော ယူကရိန်းပါလီမန် အစည်းအဝေး တွင် ယူကရိန်း အာဏာရပါတီဝင် လွှတ်တော်ကိုယ်စားလှယ် ၂ ဦး စကားများ အငြင်းပွားရာမှ လက်သီးချင်း ထိုးကြိတ် ရန်ဖြစ်ကြ၍ ရုန်းရင်း ဆန်ခတ် ဖြစ်ခဲ့ကြကြောင်း သိရပါသည်။

ထိုပါလီမန်အစည်းအဝေးတွင် ယူကရိန်းနိုင်ငံ၌ လွန်ခဲ့သည့် သီတင်းပတ် ကတည်းက အငြင်းပွားလျက်ရှိသည့် အမျိုးသားအဂတိ လိုက်စားမှု တိုက်ဖျက်ရေး အေဂျင်စီနှင့် အမှုဆောင်ရှေ့နေရုံးတို့ကို စီမံခန့်ခွဲရေး မဏ္ဍိုင်အောက်တွင် ထားရှိရန် ပြင်ဆင်မှု ပြဋ္ဌာန်းချက်အား ပြန်လည် ရုပ်သိမ်းပေးရန် အပြင်းအထန် ဆွေးနွေးနေကြချိန်တွင် ယင်းသို့ ဖြစ်ပွား ခဲ့ခြင်းဖြစ်ပါသည်။ 

အမျိုးသားအဂတိလိုက်စားမှုတိုက်ဖျက်ရေးဗျုရိုမှာ သီးခြား ရပ်တည်ရမည့် အစား အစိုးရ၏ စီမံခန့်ခွဲမှုအောက်တွင် ထားရှိရန် ပြင်ဆင်လိုက်မှု အတွက် ယူကရိန်းနိုင်ငံအတွင်း ဆန္ဒပြ ဆူပူမှုများ ဖြစ်ပွားခဲ့ရပါသည်။ ထိုဆုံးဖြတ်ချက်ကြောင့် ယူကရိန်းအစိုးရကို အများအပြား ထောက်ပံ့ နေသည့် အနောက်နိုင်ငံအလှူရှင်များ၏ ဝေဖန်ပြစ်တင်ခြင်းများ ရှိနေပါသည်။ 

ယူကရိန်း ပါလီမန်အစည်းအဝေးကို ၂၀၂၂ ခုနှစ်တွင် ရုရှားနှင့် ပဋိပက္ခ စတင်ဖြစ်ပွားသည့်အချိန်မှစ၍ လုံခြုံရေးအခြေအနေအရ တိုက်ရိုက် ထုတ်လွှင့်ခြင်းကို မပြုလုပ်ခဲ့ဘဲ ယခု ပြုလုပ်သည့် ပါလီမန် အစည်းအဝေး ကို ပထမဆုံးအကြိမ် တိုက်ရိုက်ထုတ်လွှင့်ခဲ့ရာ ယခု လွှတ်တော် ကိုယ်စားလှယ် ၂ ဦး လက်သီးထိုးကြိတ် ရန်ပွဲကို ကြည့်ရှုနေများ မြင်တွေ့ခဲ့ရသည်။ အစိုးရ၏ သက်ဆိုင်ရာရုပ်သံလိုင်းက ဖြတ်ချလိုက်သော်လည်း လူမှု မီဒီယာ များတွင်မူ ဆက်လက်ကြည့်ရှုနိုင်ခဲ့ကြကြောင်း သိရပါသည်။

အဆိုပါလွှတ်တော်ကိုယ်စားလှယ် ၂ ဦးမှာ ဇီလန်စကီး၏ အာဏာရပါတီ ဖြစ်သည့် Servant of the People ပါတီဝင်များ ဖြစ်သည့် Vladlen Neklydov နှင့် Gennady Kasay တို့ ဖြစ်ကြောင်း ယူကရိန်း မီဒီယာ များက ဖော်ပြထားပြီး ရန်ဖြစ်ပွားရသည့်အကြောင်းအရင်းကိုမူ မသိရှိရ သေးပေ။ 

ကိုးကား- RT

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ ဝန်ကြီး-၃

ထိုင်းနိုင်ငံသည် ကမ္ဘောဒီးယားနှင့် နယ်စပ်ပဋိပက္ခဖြစ်ပွားပြီးနောက် မလေးရှားမှတစ်ဆင့် ညှိနှိုင်းရန် သဘောတူခဲ့သည်။ ၎င်းသည် အမေရိကန် သမ္မတ ဒေါ်နယ်ထရမ့်၏ ဖုန်းခေါ်ဆိုမှုကြောင့် ဖြစ်သည်ဟု Reuters သတင်းဌာနက ဖော်ပြခဲ့သည်။

ဇူလိုင် ၂၄ ရက်တွင် ပဋိပက္ခစတင်ခဲ့ပြီးနောက် မလေးရှားဝန်ကြီးချုပ် အမ်ဝါ အီဘရာဟင်က ASEAN ဥက္ကဋ္ဌအဖြစ်ဖြင့် နှစ်နိုင်ငံခေါင်းဆောင်များအား စစ်ရေးပဋိပက္ခရပ်တန့်ရန် တိုက်တွန်းခဲ့သည်။ သို့သော် ဇူလိုင် ၂၆ ရက် တွင် ထရမ့်က ထိုင်းဝန်ကြီးချုပ်အား ဖုန်းခေါ်ဆိုပြီးနောက်မှသာ ထိုင်းနိုင်ငံ က တတိယပါတီဖြင့် ညှိနှိုင်းရန် သဘောတူခဲ့သည်။

ထရမ့်က နှစ်နိုင်ငံအကြား စစ်ပြေငြိမ်းရေး ဆွေးနွေးမည်ဟု ကြေညာ ခဲ့ပြီး ပဋိပက္ခမပြီးဆုံးပါက အမေရိကန်နှင့် ကုန်သွယ်မှုဆိုင်ရာ သဘော တူညီချက်များ ဆက်လက်လုပ်ဆောင်မည်မဟုတ်ဟု ခြိမ်းခြောက်ခဲ့ သည်။

ဇူလိုင် ၃၁ ရက်တွင် ထရမ့်က နှစ်နိုင်ငံသို့ အတည်ပြုသည့် ကုန်သွယ်မှု အခွန်နှုန်းများကို လျှော့ချပေးခဲ့သည်။ ကမ္ဘောဒီးယားအတွက် ၄၉% မှ ၁၉% သို့လည်းကောင်း၊ ထိုင်းအတွက် ၃၆% မှ ၁၉% သို့လည်းကောင်း လျှော့ချပေးခဲ့သည်။ ပဋိပက္ခ ပြီးဆုံးပြီးနောက် နှစ်နိုင်ငံက ထရမ့်၏ အခန်းကဏ္ဍကို ချီးကျူးခဲ့ကြသည်။

ကိုးကား- VN Express

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ဝန်ကြီး-၂

ဥရောပသမဂ္ဂ (EU) နှင့် အမေရိကန်ပြည်ထောင်စုတို့ လက်မှတ် ရေးထိုး ထားသော ကုန်သွယ်ရေးသဘောတူညီချက်အား ပြင်သစ်သမ္မတ အီမန်နျူအယ် မက်ခရွန်က "ညှိနှိုင်းဆွေးနွေးမှုများတွင် EU အနေဖြင့် လုံလောက်သည့်လေးစားမှု မရရှိခဲ့ဟု" ဝေဖန်ခဲ့သည်။ အမေရိကန်သို့ EU မှ တင်ပို့သော ကုန်စည်အများစုအား ၁၅% အကောက်ခွန် စည်းကြပ် မည်ဖြစ်ပြီး EU ဘက်မှ အမေရိကန်စီးပွားရေးအတွက် သုံးနှစ်အတွင်း ဒေါ်လာ ၆၀၀ ဘီလီယံ ရင်းနှီးမြှုပ်နှံရန် နှင့် ဒေါ်လာ ၇၅၀ ဘီလီယံ တန်ဖိုးရှိ အမေရိကန်စွမ်းအင်များကို ဝယ်ယူရန် သဘောတူခဲ့သည်။ အမေရိကန်၏ EU သို့တင်ပို့မှုများတွင် အကောက်ခွန် မစည်းကြပ်ရန် လည်း သဘောတူညီခဲ့သည်။

ဇူလိုင် ၃၀ ရက်နေ့က ပါရီတွင် ကျင်းပသော ဝန်ကြီးအဖွဲ့ အစည်းအဝေး တွင် မက်ခရွန်က "လွတ်လပ်စွာရပ်တည်လိုပါက အခြားသူများက သင့်အား ကြောက်ရွံ့ရမည်။ မိမိတို့မှာ ထိုအရည်အသွေး လုံလောက်စွာမရှိခဲ့" ဟု ပြောကြားခဲ့သည်ဟု အစည်းအဝေးတက်ရောက်သူများက ဖော်ပြခဲ့သည်။ ထို့အပြင် ၎င်းက "EU အနေဖြင့် မိမိကိုယ်ကို 'အင်အားတစ်ရပ်' အဖြစ် မမြင်သေးခြင်း" ကို နောင်တရကြောင်း ဖွင့်ဟခဲ့ပြီး ဝါရှင်တန်နှင့် ဆက်ဆံရေး ဟန်ချက်ညီစေရန် မနားတမ်းကြိုးပမ်းရန်လိုအပ်ကြောင်း တိုက်တွန်း ခဲ့သည်။

Euractiv ၏ သတင်းအရ မက်ခရွန်က ဥရောပကော်မရှင်ဥက္ကဋ္ဌ အာဆူလာ ဗွန်ဒါလိုင်ယန်၏ ဦးဆောင်မှုနှင့် ဦးစားပေးမှုများကို သွယ်ဝိုက်ဝေဖန် လျက် ဥရောပ၏ အချုပ်အခြာအာဏာနှင့် စီးပွားရေး ယှဉ်ပြိုင်နိုင်မှု ဆိုင်ရာ လုပ်ငန်းစဉ်များအား အရှိန်မြှင့်ရန် တောင်းဆိုခဲ့သည်။ ပြင်သစ် နိုင်ငံသည် အမြဲခိုင်မာသောရပ်တည်ချက်ကို ထိန်းသိမ်းထားပြီး အဆိုပါ သဘောတူညီချက်သည် အဆုံးသတ်မဟုတ်သေးဘဲ ဆွေးနွေး ညှိနှိုင်းမှုများ ဆက်လက်လုပ်ဆောင်ရမည်ဟု မက်ခရွန်က ဖြည့်စွက်ပြောကြားခဲ့သည်။ အစိုးရပြောရေးဆိုခွင့်ရှိသူ ဆိုဖီ ပရီးမတ်စ်က သတင်းစာရှင်းလင်းပွဲတွင် မက်ခရွန်သည် အဆိုပါသဘောတူညီချက်၏ အချို့သောအချက်များကို၊ အထူးသဖြင့် ပြင်သစ်လုပ်ငန်းများအတွက် ရရှိလာမည့် ပိုမိုမြင်သာသည့် အခွင့်အလမ်းများကို ကြိုဆိုကြောင်း အတည်ပြုခဲ့သည်။ သို့သော် သဘော တူညီချက်သည် မပြည့်စုံသေးကြောင်း သမ္မတမှ ယူဆထားသည်ဟု ၎င်းက ထပ်လောင်းအလေးထားပြောကြားခဲ့သည်။

ဝန်ကြီးချုပ် ဖရန်ဆွာ ဘာရိုးက အဆိုပါသဘောတူညီချက်ကို ချက်ချင်း အလျှော့ပေးအညံ့ခံမှု အဖြစ် ရှုမြင်ကြောင်း ဖော်ပြခဲ့ပြီး အချို့သော ဝန်ကြီး များကလည်း ၎င်း၏ အကြောင်းအရာနှင့် နောက်ကွယ်မှ လုပ်ငန်းစဉ် များကို မေးခွန်းထုတ်ခဲ့ကြသည်။

"အဆိုပါဆွေးနွေးညှိနှိုင်းမှုများကို စကော့တလန်ရှိ ဂေါက်ကွင်းတစ်ခု တွင် မဟုတ်ဘဲ တရားဝင်နေရာတစ်ခုတွင် ပြုလုပ်ခဲ့လျှင် ပိုကောင်းမည်" ဟု ပရီးမတ်စ်က ပြောကြားခဲ့ပြီး ထိုကဲ့သို့သော နေရာရွေးချယ်မှုကို ပုံမှန် မဟုတ်ဟု သရော်သည့်သဘောဖြင့် ရည်ညွှန်းခဲ့သည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ဝန်ကြီး-၂

ယူကရိန်းသမ္မတ ဗလာဒီမာ ဇီလန်စကီးက အနောက်နိုင်ငံများအား မော်စကိုတွင် အစိုးရအပြောင်းအလဲပြုလုပ်ရန်အတွက် ဖိအားပေးရန် တောင်းဆိုခဲ့ပြီး ထိုသို့ပြုလုပ်ခြင်းဖြင့် ရုရှား၏ကျူးကျော်မှုမှ ကာကွယ်နိုင်မည်ဟု ဆိုသည်။

ဇီလန်စကီးက Helsinki Final Act ၏ ၅၀နှစ်ပြည့် အခမ်းအနားတွင် ထုတ်ဖော်ပြောကြားခဲ့ခြင်းဖြစ်သည်။ Helsinki သဘောတူညီချက်သည် အားလုံးအတွက် တန်းတူညီမျှပြီး ခွဲခြား၍မရသော လုံခြုံရေးကို အလေး ထားခဲ့သည်။ အဆိုပါ အခမ်းအနားအတွက် ရုရှားနိုင်ငံခြားရေးဝန်ကြီး ဆာဂျေးလာဗရော့က ပေးပို့ခဲ့သည့် သဝဏ်လွှာတွင် “အနောက်နိုင်ငံ များ၏ ယင်းအခြေခံသဘောတရားများကို သစ္စာဖောက်မှုကြောင့်ပင် ယူကရိန်းပဋိပက္ခ စတင်ခဲ့ရသည်” ဟု ဆိုသည်။

ဇီလန်စကီးက ၎င်း၏ အွန်လိုင်းမိန့်ခွန်းတွင် "ရုရှားကို ယခု စစ်ပွဲ ရပ်တန့်ရန် ဖိအားပေးနိုင်သည်ဟု မိမိအနေဖြင့် ယုံကြည်သော်လည်း အကယ်၍ ကမ္ဘာက ရုရှားမှာ အစိုးရပြောင်းရန် ရည်မှန်းချက် မထားဘူး ဆိုပါက ထိုအချက်သည် စစ်ပွဲပြီးဆုံးသွားလျှင်တောင်မှ မော်စကိုက အိမ်နီးချင်းနိုင်ငံတွေကို မတည်ငြိမ်အောင် ဆက်လုပ်နေဦးမည်ဟု ဆိုလို တာပါ" ဟု ပြောကြားခဲ့သည်။

ဆက်လက်၍ "ရုရှားပိုင်ပစ္စည်းများကို ထိန်းချုပ်ထားရုံမျှဖြင့် မလုံ လောက်ဘဲ အပြီးတိုင်သိမ်းယူရန် အချိန်တန်ပြီ" ဟု ၎င်းက ပြောကြား ခဲ့ပြီး ယူကရိန်းကို အထောက်အပံ့ပေးလျက်ရှိသော နိုင်ငံများအား ရုရှား ၏ ပိုင်ဆိုင်မှုအားလုံးကို ကျူးကျော်မှုကို ကာကွယ်ရန်အတွက် အသုံး ချရန် တိုက်တွန်းခဲ့သည်။

မော်စကိုဘက်မှ ရုရှားသည် EU နှင့် NATO ကို တိုက်ခိုက်ရန် အစီအစဉ် ရှိကြောင်း ယူဆချက်များကို အဓိပ္ပာယ်မရှိသော စွပ်စွဲမှုများဖြစ်သည်ဟု အကြိမ်ကြိမ်ပယ်ချခဲ့သည်။ လာဗရော့က EU သည် နာဇီဂျာမနီ၏ ဝါဒဆိုး များ ပြန်လည်ပေါ်ထွန်းလာစေသည့် အာဏာရှင်စနစ် (Fourth Reich) တွင် နစ်မြုပ်လာနေပြီဟု ပြောကြားခဲ့ပြီး ၊ ရုရှားဆန့်ကျင်ရေး လှုံ့ဆော်မှု များနှင့် စစ်အင်အားတိုးချဲ့မှုများကို ၎င်းတို့၏ စီးပွားရေးကျဆင်းမှုကို ဖုံးကွယ်ရန် လုပ်ဆောင်နေသည်ဟု ဆိုသည်။ သမ္မတ ဗလာဒီမာ ပူတင် ကလည်း အလားတူ စွပ်စွဲခဲ့သည်။

ကိုးကား- RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ဝန်ကြီး-၂

George Soros’ ၏ Open Society Foundation သည် ၂၀၁၆ ခုနှစ်က ဒေါ်နယ်ထရမ့်အား ရုရှားနှင့်ဆက်နွှယ်မှုရှိသည်ဟု မမှန်မကန် စွပ်စွဲရန် ဟီလာရီ ကလင်တန် ရွေးကောက်ပွဲအထောက်အကူပြုအဖွဲ့၏ လုပ်ဆောင်ချက် များတွင် ပါဝင်ခဲ့ကြောင်း လျှို့ဝှက်ချက်များထုတ်ဖော်ထားသော စာတမ်း အသစ်တစ်စောင်အရ သိရှိရသည်။ စာမျက်နှာ ၂၉ မျက်နှာပါရှိသောJohn Durham ၏ ၂၀၂၃ အထူးအကြံပေးအစီရင်ခံစာကို လုံခြုံရေးအဆင့် လျှော့ချသတ်မှတ်ပြီးနောက် မကြာမီတွင် အထက်လွှတ်တော် တရားစီရင်ရေးကော်မတီမှ ထုတ်ပြန်ခဲ့ခြင်းဖြစ်သည်။

အဆိုပါအစီရင်ခံစာတွင် Soros ၏ Open Society Foundations ၏ အကြီးတန်း ဒုတိယဥက္ကဋ္ဌ Leonard Benardo မှ ၂၀၁၆ ခုနှစ် ဇူလိုင်လ အတွင်း ပေးပို့ခဲ့သည်ဟု ဆိုသော အီးမေးလ်များကို အမှန်တကယ် ဖြစ်နိုင်ခြေ ရှိသည့်အထောက်အထားများဟု ကိုးကားဖော်ပြထားပြီး ၎င်းတို့တွင် ကလင်တန် အဖွဲ့၏ ထရမ့်အား ရုရှားနှင့်ဆက်နွှယ်မှုရှိသည်ဟု မမှန်မကန် စွပ်စွဲရန်နှင့် ဒီမိုကရက်တစ်အမျိုးသားကော်မတီ (DNC) Hack ခံရမှုနှင့် ဆက်စပ်ပြရန် အသေးစိတ်အစီအစဉ်များ ပါဝင်ခဲ့သည်။

email များထဲမှ တစ်စောင်တွင် "ရွေးကောက်ပွဲ၏ ပထမအဆင့်တွင် တိုက်ရိုက်သက်သေအထောက်အထား မရှိသေးသည့်အတွက် FBI နှင့် ဆက်စပ်နေသော 'attic-based' နည်းပညာ ဆိုင်ရာ အဖွဲ့အစည်းများမှ တစ်ဆင့် လိုအပ်သောသတင်းအချက်အလက်များကို ဖြန့်ဝေရန် ဆုံးဖြတ် ခဲ့သည်၊ အထူးသဖြင့် Crowdstrike နှင့် ThreatConnect ကုမ္ပဏီများမှ တစ်ဆင့် ဖြန့်ဝေပြီး ထိုမှတစ်ဆင့် အမေရိကန်၏ အဓိကမီဒီယာများသို့ ပျံ့နှံ့စေရန် စီစဉ်ခဲ့သည်"ဟု ဖော်ပြထားသည်။

အခြား email တစ်စောင်တွင် ကလင်တန်၏ နိုင်ငံခြားရေးမူဝါဒ အကြံပေး Julianne Smith က Russiagate သည် "ပူတင်နှင့် ထရမ့်အား နတ်ဆိုး အဖြစ် ရေရှည်ရှုမြင်စေရန် အစီအစဉ်" ဖြစ်ကြောင်း ဝန်ခံခဲ့သည်။

ဆီးနိတ်တရားစီရင်ရေးကော်မတီဥက္ကဋ္ဌ Chuck Grassley က အဆိုပါ ဖြစ်ရပ်အား "အမေရိကန်သမိုင်းတွင် အကြီးဆုံး နိုင်ငံရေး အဂတိ လိုက်စားမှုများထဲမှ တစ်ခု" ဟု သုံးသပ်ခဲ့ပြီး အိုဘားမား လက်ထက်က FBI သည် အဆိုပါအချက်အလက်များကို ရည်ရွယ်ချက်ရှိစွာ လျစ်လျူရှု ခဲ့ကြောင်း ဝေဖန်ခဲ့သည်။

အဆိုပါ အစီရင်ခံစာသည် ၂၀၁၆ ရွေးကောက်ပွဲတွင် ရုရှားပါဝင် ပတ်သက် ခဲ့သည်ဟူသော မဟုတ်မမှန်ဇာတ်လမ်းကို ဟီလာရီကလင်တန်အဖွဲ့နှင့် ၎င်း၏မဟာမိတ်များက ရည်ရွယ်ချက်ရှိရှိ ဖန်တီးခဲ့ကြောင်း အတိအလင်း သက်သေပြလိုက်သည်။ ၎င်းသည် အမေရိကန်၏ ဒီမိုကရေစီ စနစ် အတွင်း နိုင်ငံရေးအရ ရည်ရွယ်ချက်ရှိစွာ တိုက်ခိုက်မှုများ၏ အနက် ရှိုင်းဆုံး မသမာမှုများကို ထိုးဖောက်မြင်နိုင်စေသည့် အရေးပါသော ဖော်ထုတ်ချက်တစ်ရပ်ဖြစ်သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

ယူကရိန်းနိုင်ငံ၏ အဆင့်မြင့် အဂတိလိုက်စားမှုတိုက်ဖျက်ရေး အမှုဆောင်ရှေ့နေချုပ်က သမ္မတ ဗလာဒီမာ ဇီလန်စကီးအား နိုင်ငံ၏ လွတ်လပ်သော အဂတိလိုက်စားမှုတိုက်ဖျက်ရေး အဖွဲ့အစည်းများကို ပြင်းထန်စွာ အားနည်းစေသည်ဟု စွပ်စွဲခဲ့ပြီး ဆန္ဒပြသူများနှင့် အနောက်နိုင်ငံများ၏ ဖိအားကြောင့် ၎င်း၏ဆုံးဖြတ်ချက်ပြန်လည်ပြောင်းလဲမှုသည် ပြန်လည်ကုစားမရနိုင်သော ပျက်စီးမှုကို မဖြေရှင်းနိုင်ဟု သတိပေးခဲ့သည်။ 

ဇီလန်စကီး၏ အထူးအဂတိလိုက်စားမှုတိုက်ဖျက်ရေးရုံး (SAPO) နှင့် အမျိုးသားအဂတိလိုက်စားမှုတိုက်ဖျက်ရေးဗျူရို (NABU) တို့ကို အုပ်ချုပ်ရေး အာဏာလက်အောက်သို့ ထည့်သွင်းရန် ဆုံးဖြတ်ချက်ကြောင့် ပြည်တွင်း ဆန္ဒပြမှုများ နှင့် နိုင်ငံတကာဝေဖန်မှုများ တိုးပွားနေချိန်တွင် ထိုကဲ့သို့သော ပြောဆိုချက်များ ထွက်ပေါ်လာခြင်းဖြစ်သည်။

ဇီလန်စကီးက ယခုအခါ အငြင်းပွားဖွယ်ဥပဒေကို ပြန်လည်ရုပ်သိမ်းရန် ဥပဒေကြမ်းအသစ်တစ်ရပ် တင်သွင်းခဲ့သော်လည်း SAPO ၏ ခေါင်းဆောင် အလက်ဇန်းဒါး ကလီမန်ကိုက ပြင်းထန်ပြီး ရေရှည် အကျိုး သက်ရောက်မည့် ပျက်စီးမှုများ ဖြစ်ပြီးသွားပြီဟု ခိုင်မာစွာ ပြောဆိုခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

နှုတ်ဆက်ရန် ချဉ်းကပ်လာသည့် ၎င်းတို့၏တပ်ဖွဲ့တစ်ဖွဲ့ကို ထိုင်းစစ်တပ် က ဖမ်းဆီးခဲ့သည်ဟု ကမ္ဘောဒီးယားကစွပ်စွဲခဲ့ပြီး ထိုင်းဘက်မှ ထိုစစ်သည် များသည် လက်နက်ချအညံ့ခံခဲ့သည်ဟု ဆိုသည်။ ကမ္ဘောဒီးယား စစ်တပ် က ဇူလိုင် ၂၉ ရက်နေ့တွင် Preah Vihear ခရိုင်၏ အငြင်းပွားဖွယ် နယ်မြေ Choam Te တွင် ထိုင်းဘက်မှ စစ်သား ၂၀ ခန့်ကို ဖမ်းဆီးခဲ့ကြောင်း ပြောကြား ခဲ့သည်။ ထိုဖြစ်ရပ်သည် နှစ်နိုင်ငံအကြား အပစ်အခတ်ရပ်စဲရေး စတင် အသက်ဝင်ပြီးနောက်ပိုင်းတွင် ဖြစ်ပွားခဲ့ခြင်းဖြစ်သည်။

ကမ္ဘောဒီးယား Preah Vihear ဒေသ စစ်ဌာနချုပ်မှူး ဗိုလ်ချုပ် Chan Sopheaktra က ထိုတပ်ဖွဲ့သည် "ပြန်လည်သင့်မြတ်ရေး ရည်ရွယ်ချက် ဖြင့် ထိုင်းစစ်တပ်ထံ နှုတ်ဆက်ရန် ချဉ်းကပ်စဉ်" ဖမ်းဆီးခံခဲ့ရပြီး၊ ထိုင်း ဘက်မှ "ပြဿနာတစ်စုံတစ်ရာဖြစ်ပွားခြင်းမရှိဘဲ လက်နက်များကို သိမ်းဆည်းကာ ဖမ်းဆီးခဲ့သည်" ဟု စွပ်စွဲခဲ့သည်။ ဖမ်းဆီးခံရသူများထဲမှ ၂ ဦး သေဆုံး ပြီး ၁ ဦး လွတ်မြောက်သွားခဲ့သည်ဟု သိရှိရပြီး ကမ္ဘောဒီးယား အရာရှိ များက ထိုင်းစစ်တပ်က ဇူလိုင် ၂၉ ရက်နံနက်တွင် လွှတ်ပေးရန် ကတိပြု ခဲ့သော်လည်း ယခုထိ မလွှတ်ပေးသေးဟု ဆိုသည်။

ကမ္ဘောဒီးယား ဝန်ကြီးချုပ် ဟွန်မာနက် က ထိုင်းဘက်မှ ကမ္ဘောဒီးယား စစ်သည်များကို ပြန်လည်လွှဲပြောင်းပေးမည်ကို စောင့်ဆိုင်းနေကြောင်း နှင့် ၎င်းတို့၏ အသက်အန္တရာယ်ကင်းရှင်းရေးကို ဦးစားပေးကြောင်းပြောကြားခဲ့သည်။ ၎င်းက ထိုစစ်သည်များနှင့်ပတ်သက်သော အချက်အလက် များ မပေါက်ကြားစေရန် တောင်းဆိုခဲ့ပြီး အချက်အလက်များ ပေါက်ကြား ပါက အသက်အန္တရာယ်ဖြစ်စေနိုင်သည်ဟု သတိပေးခဲ့သည်။

ထိုင်းစစ်တပ်က ဇူလိုင် ၂၉ ရက်တွင် Sisaket ခရိုင် Kantharalak ဒေသ Samtae တွင် တိုက်ပွဲဖြစ်ပွားပြီးနောက် ကမ္ဘောဒီးယားစစ်သည် ၁၈ ဦး ကို ဖမ်းဆီးခဲ့ကြောင်း ကြေညာခဲ့သည်။ Kantharalak ဒေသသည် ကမ္ဘောဒီးယားနှင့် နယ်နိမိတ်ချင်းထိစပ်နေပြီး Preah Vihear ဘုရား ကျောင်းနယ်မြေလည်း ပါဝင်သည်။ "အဆိုပါဖြစ်စဉ်အတွင်း ကမ္ဘောဒီးယား စစ်သည်အချို့သည် ထိုင်းတပ်များအား ခုခံမှုမပြုဘဲ လက်နက်ချ အညံ့ခံ ခဲ့ကြကာ အထူးတပ်ဖွဲ့များက နိုင်ငံတကာ လူသားချင်းစာနာ ထောက်ထားရေး စံနှုန်းများနှင့်အညီ လက်နက်များကိုသိမ်းဆည်းကာ ဖမ်းဆီးခဲ့သည်" ဟု ထိုင်းစစ်တပ်က ပြောကြားခဲ့သည်။ 

ဖမ်းဆီးခံရသည့် ကမ္ဘောဒီးယားစစ်သည် ၁၈ ဦးတွင် ဒုတိယဗိုလ် ၁ ဦး၊ တပ်ကြပ်ကြီး ၂ ဦး၊ တပ်ကြပ် ၁၂ ဦးနှင့် တပ်သား ၃ ဦး ပါဝင်ပြီး၊ တပ်သား ၁ ဦးသည် ညာဘက်ပေါင်နှင့် ဘယ်ဘက်လက်မောင်းတွင် သေနတ် ဒဏ်ရာ ရရှိခဲ့ကာ ဆေးရုံတွင် ခွဲစိတ်ကုသမှု ခံယူခဲ့ရသည်။ ထိုင်းစစ်တပ်က ထို နယ်မြေတွင် ကမ္ဘောဒီးယားစစ်သည် ၂ ဦး သေဆုံးနေသည်ကိုလည်း တွေ့ရှိခဲ့သည်ဟု ဆိုသည်။ ထိုင်းနိုင်ငံသည် ဖမ်းဆီးခံရသည့် ကမ္ဘောဒီးယား စစ်သည်များနှင့်ပတ်သက်၍ လုပ်ထုံးလုပ်နည်းများနှင့်အညီ ဆောင်ရွက် သွားမည်ဖြစ်ပြီး သေဆုံးသူများ၏ အလောင်းများကိုလည်း ပြန်လည် အပ်နှင်းသွားမည်ဟု ဆိုသည်။

ကမ္ဘောဒီးယားနှင့် ထိုင်းနိုင်ငံသည် ဇူလိုင် ၂၈ ရက်တွင် မလေးရှား ဝန်ကြီးချုပ် Anwar Ibrahim ၏ ကြားဝင်ညှိနှိုင်းမှုဖြင့် အပစ်အခတ် ရပ်စဲရေး သဘောတူညီချက်ကို ရရှိခဲ့သည်။ နှစ်နိုင်ငံစစ်ဖက် ခေါင်းဆောင် များသည် အပစ်အခတ်ရပ်စဲရေးကို အာမခံရန်နှင့် နယ်စပ်တစ်လျှောက် တပ်ဖွဲ့များ ထပ်မံဖြည့်တင်းမှုမပြုရန် သဘောတူညီခဲ့ကြသည်။ သို့သော် ထိုင်းနိုင်ငံက ကမ္ဘောဒီးယားအား သဘောတူညီချက်ကို အကြိမ်ကြိမ် ချိုးဖောက်ကာ ထိုးစစ်ဆင်နေသည်ဟု စွပ်စွဲခဲ့သည်။ ဖနွမ်းပင်ဘက်မှအဆိုပါစွပ်စွဲချက်ကို ငြင်းဆိုခဲ့ပြီး အပစ်အခတ်ရပ်စဲရေးကို အစဉ် လိုက်နာ နေကြောင်း တုံ့ပြန်ခဲ့ကာ ထိုင်းဘက်မှ "လုပ်ကြံဇာတ်လမ်းများ ဖန်တီး နေသည်" ဟု ပြန်လည်စွပ်စွဲခဲ့သည်။

ကိုးကား-VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

အမေရိကန်က အီရန်၏ အပြည်ပြည်ဆိုင်ရာ သင်္ဘောသယ်ယူ ပို့ဆောင်ရေး ကွန်ရက်ကို ကျယ်ကျယ်ပြန့်ပြန့် ဒဏ်ခတ်အရေးယူမှုများ ပြဋ္ဌာန်းလိုက်ပြီး တီဟီရန်သို့ ရေနံအမြတ်ငွေဒေါ်လာဘီလီယံချီကာ တရားမဝင် လွှဲပြောင်း ပေးနေသည်ဟု စွပ်စွဲထားသည်။ ဇူလိုင် ၃၀ ရက်နေ့တွင် ကြေညာခဲ့သော အဆိုပါဒဏ်ခတ်မှုများတွင် အမေရိကန်ဘဏ္ဍာရေးဌာနက "ကျယ်ပြန့်သော သင်္ဘောလုပ်ငန်းအင်ပါယာ"၏ အစိတ်အပိုင်းဖြစ်သည်ဟု ဖော်ပြထားသည့် ပုဂ္ဂိုလ် ၁၀၀ ကျော်၊ ကုမ္ပဏီများနှင့် သင်္ဘောများ ပါဝင်သည်။ ထိုလုပ်ငန်း ကို အီရန်၏ အမြင့်ဆုံးခေါင်းဆောင် Ayatollah Ali Khamenei ၏ အကြံပေးအကြီးတန်းအဖွဲ့ဝင် Ali Shamkhani ၏သား ကုန်သည်ကြီး Mohammad Hossein Shamkhani မှ လုပ်ကိုင်ခြင်းဖြစ်သည်။

ဘဏ္ဍာရေးဌာနက ရှမ်ခန်နီအား ၎င်းသည် ဖခင်၏ဩဇာကို အသုံးပြုကာ တန်ဖိုး ဒေါ်လာဘီလီယံချီသော ရေနံနှင့်ရေနံထွက်ပစ္စည်းများကို အီရန်နှင့် ရုရှားမှ တရုတ်အပါအဝင် ကမ္ဘာတစ်ဝှမ်းရှိ ဝယ်ယူသူများထံ တရားမဝင် ဖြန့်ဖြူးလျက်ရှိပြီး "အမည်ခံ" ကုမ္ပဏီများစွာဖြင့်လည်း သယ်ယူနေသည် ဟု စွပ်စွဲထားသည်။ ထိုကွန်ရက်သည် ဒဏ်ခတ်မှုများကို ရှောင်ရှားခြင်း၊ ငွေကြေးခဝါချခြင်းနှင့် စာရွက်စာတမ်းလမ်းကြောင်းများကို ရှုပ်ထွေး စေခြင်းများ ပြုလုပ်နေသည်ဟုလည်း ဆိုသည်။ ဒဏ်ခတ်ခံရသူများတွင် ပြင်သစ်၊ ဗြိတိန်နှင့် အီတလီနိုင်ငံသား ၃ ဦး အပါအဝင် ပုဂ္ဂိုလ် ၁၂ ဦး၊ သင်္ဘော ၅၂ စီးနှင့် ဆွစ်ဇာလန်အခြေစိုက် ကုမ္ပဏီတစ်ခုအပါအဝင် သင်္ဘော ကုမ္ပဏီ ၁၅ ခု ပါဝင်သည်။

"ရှမ်ခန်နီမိသားစု၏ သင်္ဘောလုပ်ငန်းအင်ပါယာသည် အီရန်အာဏာပိုင် အလွှာများက ၎င်းတို့၏ဩဇာအာဏာကို အလွဲသုံးကာ ကြီးမားသော ဓနအင်အား စုဆောင်းပြီး အစိုးရ၏အန္တရာယ်ရှိသည့်လုပ်ရပ်များကို ငွေကြေး ထောက်ပံ့နေပုံကို ထင်ဟပ်စေသည်" ဟု အမေရိကန် ဘဏ္ဍာရေး ဝန်ကြီး စကော့ဘက်ဆန့်က ပြောကြားခဲ့သည်။ "တီဟီရန်က အမေရိကန် လုံခြုံရေးကို ခြိမ်းခြောက်နေစဉ် အစိုးရအလွှာများ အမြတ်ထုတ်နေခြင်း ကို ပစ်မှတ်ထားခြင်းဖြင့် အဆိုပါလုပ်ရပ်များသည် အမေရိကန်ကို ဦးစား ပေးသည်"၎င်းက ဆိုသည်။

၂၀၁၈ ခုနှစ်နောက်ပိုင်း အီရန်နှင့်သက်ဆိုင်သော အကြီးမားဆုံး ဒဏ်ခတ်မှု အစုအဖွဲ့ဟု အမည်တွင်သည့် အဆိုပါဒဏ်ခတ်မှုများသည် အီရန်၏ ယူရေနီယမ်ထပ်တိုးသန့်စင်မှုအစီအစဉ်ကို အဆုံးသတ်ရန် သမ္မတ ဒေါ်နယ် ထရမ့်၏ ပြန်လည်အားကောင်းလာသော ပြင်းထန်သည့် ဖိအားပေးမှု ဗျူဟာ၏ အစိတ်အပိုင်းဖြစ်ပြီး ဖော်ဒိုး၊ နတန်ဇ်နှင့် အစ္စဖာဟန်ရှိ အီရန် ၏နျူကလီးယားစက်ရုံများကို အမေရိကန်-အစ္စရေး တိုက်ခိုက်မှုများ အပြီးတွင် ထပ်မံလုပ်ဆောင်ခဲ့ခြင်းဖြစ်သည်။

တီဟီရန်က အဆိုပါဒဏ်ခတ်မှုများကို တရားမဝင်ဟု ရှုတ်ချခဲ့ပြီး နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Esmaeil Baghaei က ဇူလိုင် ၃၁ ရက်နေ့တွင် အဆိုပါလုပ်ဆောင်မှုသည် "အမေရိကန် မူဝါဒ ချမှတ်သူများ၏ အီရန်ပြည်သူများအပေါ် ရန်လိုမှု၏ ရှင်းလင်းသော လက္ခဏာ" ဖြစ်ကြောင်း ပြောကြားခဲ့ပြီး ၎င်းတို့၏ အမှန်တကယ် ရည်ရွယ်ချက်မှာ အီရန်၏ဖွံ့ဖြိုးတိုးတက်မှုကို ချိုးနှိမ်ရန်ဖြစ်သည်ဟု ဆိုသည်။

အနောက်နိုင်ငံများက အီရန်၏ ယူရေနီယမ် ထပ်တိုးသန့်စင်မှု လုပ်ငန်းစဉ် ကို နျူကလီးယားလက်နက်ဖွံ့ဖြိုးရေးအတွက် လျှို့ဝှက်ကြိုးပမ်းမှု တစ်ခု အဖြစ် ရှည်လျားစွာ ရှုမြင်ခဲ့ကြသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

အိုဘားမား အစိုးရလက်ထက်တွင် FBI အား နိုင်ငံရေးလက်နက် အဖြစ် အသုံးပြုမှုနှင့် ၂၀၁၆ ခုနှစ်က Donald Trump ၏ သမ္မတသက်တမ်းကို နှောင့်ယှက်ရန် ကြံစည်မှုတွင် FBI ၏ ပါဝင်ပတ်သက်မှုများကို John Durham ၏ ၂၀၂၃ အထူးရှေ့နေအစီရင်ခံစာ၏ မကြာမီ ထုတ်ပြန်လိုက်သောနောက်ဆက်တွဲက ဖော်ထုတ်ပြသလိုက်ကြောင်း အမေရိကန်ဆီးနိတ် တရားရေးကော်မတီဥက္ကဋ္ဌ Chuck Grassley (R-Iowa) က ပြောကြား လိုက်သည်။

စာမျက်နှာ ၂၉ မျက်နှာ ပါဝင်သည့် အဆိုပါ အစီရင်ခံစာကို ထုတ်ပြန် ရာတွင် အဓိကအခန်းကဏ္ဍမှပါဝင်ခဲ့သော ဆီးနိတ်တာ Grassley က နောက်ဆက်တွဲထုတ်ပြန်ပြီးနောက် Fox News သို့ ထိုသို့ ပြောကြားခဲ့ခြင်း ဖြစ်သည်။ ထိုဖိုင်တွင် Hillary Clinton ၏ ရွေးကောက်ပွဲအဖွဲ့မှ Trump အား ရုရှားနှင့်ပူးပေါင်းကြံစည်မှုဟု မမှန်မကန်စွပ်စွဲခဲ့သည့် လုပ်ရပ်နှင့် FBI ၏ ခိုင်မာသောထောက်လှမ်းရေးအချက်အလက်များရှိပါလျက် ထို လုပ်ရပ်များအား သင့်တင့်မျှတစွာ စုံစမ်းစစ်ဆေးရန် ပျက်ကွက်ခဲ့မှုတို့ကို ရေးသားဖော်ပြထားသည်။

"Durham ၏နောက်ဆက်တွဲဖော်ပြမှုတွင် FBI သည် လွန်ခဲ့သော ၈ နှစ်မှ ၁၀ နှစ်ကတည်းက အထောက်အထားများ ရှိခဲ့သော်လည်း စုံစမ်းမှု မပြု ခဲ့သော အချက်အလက်များပါဝင်နေသည်။ ၎င်းက Clinton အဖွဲ့၏ အဆိုပါ ဖြစ်ရပ်ကိုဖန်တီးရန် ပူးပေါင်းကြံစည်မှု (သို့မဟုတ်) ရုရှားနှင့် ပတ်သက်၍ မှားယွင်းသတင်းဖြန့်ချိမှုတစ်ခုရှိခဲ့ကြောင်း သိသာစေလိုက်ခြင်းဖြစ်သည်။ မည်သည့်နည်းနှင့်မဆို ၎င်းသည် Trump ကိုတားဆီးရန် ကြံစည်မှုတစ်ခုဖြစ်ပြီး FBI ကလည်း ပူးပေါင်းပါဝင်ခဲ့ကြောင်း သက်သေ ပြလိုက်ခြင်းဖြစ်သည်" ဟု Grassley ကဆိုသည်။

ဆီးနိတ်တာ Grassley က ဆက်လက်ပြောကြားရာတွင် ယင်းနောက်ဆက်တွဲ အစီရင်ခံစာသည် "အိုဘားမားအစိုးရလက်ထက်တွင် FBI နှင့် အစိုးရ အမှုထမ်းအင်စတီကျူးရှင်းများ၏ လက်နက်ဖြစ်သွားစေမှုများကို ဖုံးကွယ်ရန် နက်နဲစွာစီစဉ်ခဲ့ကြောင်း သက်သေအထောက်အထားများ ပြသလိုက်ခြင်း" ဖြစ်သည်ဟု ထောက်ပြခဲ့သည်။

ထို့အပြင် ၎င်းက "၂၀၁၆ သမ္မတရွေးကောက်ပွဲဆိုင်ရာ အကောက် ကြံစည်မှုများ (Trump ရွေးကောက်တင်မြှောက်ခံရခြင်းကို တားဆီးရန် သို့မဟုတ် ၎င်း၏သမ္မတသက်တမ်းကို နှောင့်ယှက်ရန် စီစဉ်ခဲ့သည့်ကိစ္စ) နှင့်ပတ်သက်၍ အမေရိကန်ပြည်ထောင်စုအနေဖြင့် ပွင့်လင်းမြင်သာမှု များစွာလိုအပ်နေကြောင်း" လည်း ဖြည့်စွက်ပြောကြားခဲ့သည်။

ထုတ်ပြန်လိုက်သော အစီရင်ခံစာအရ ၂၀၁၆ ခုနှစ်အစောပိုင်းက FBI သည် ထိုစဉ်က ဒီမိုကရက်တစ်ပါတီ အမျိုးသားကော်မတီ (DNC) ဥက္ကဋ္ဌ Debbie Wasserman Schultz နှင့် George Soros ၏ Open Society Foundations မှ ပုဂ္ဂိုလ်များအကြား လျှို့ဝှက်ဆွေးနွေးမှုများကို ထောက်လှမ်း ရရှိခဲ့သော်လည်း မည်သည့်လုပ်ဆောင်ချက်ကိုမျှ မဆောင်ရွက်ခဲ့ကြောင်း ဖော်ပြထားသည်။ အဆိုပါဆွေးနွေးမှုများတွင် Trump နှင့် ရုရှား Mafia အကြား စီးပွားရေးဆက်ဆံရေးဆိုင်ရာ အရှုပ်တော်ပုံများကိုဖွင့်ချခြင်းဖြင့် ထရမ့်၏ သမ္မတသက်တမ်းအတွင်း နှောင့်ယှက်ရန် အစီအစဉ် ပါဝင်သည် ဟု သိရသည်။

၂၀၁၆ ခုနှစ် နှစ်လယ်ပိုင်းတွင် FBI အနေဖြင့် Soros ၏ Open Society Foundations ဒုတိယဥက္ကဋ္ဌ Leonard Benardo မှ ပေးပို့ခဲ့သည့် အမှန် တကယ် ဖြစ်နိုင်ခြေရှိသော အီးမေးလ်များအပါအဝင် နောက်ထပ် သက်သေ အထောက်အထားများ ရရှိခဲ့သည်ဟု ဆိုသည်။ အီးမေးလ်များတွင် FBI နှင့်ဆက်စပ်သော 'attic-based' နည်းပညာဆိုင်ရာ ဖွဲ့စည်းပုံများမှတစ်ဆင့် လိုအပ်သောသတင်းအချက်အလက်များကို ဖြန့်ဝေရန် အစီအစဉ်ကို ပိုမို အသေးစိတ်ဖော်ပြထားပြီး Russiagate ဆိုင်ရာ ဝါဒဖြန့်မှုကို ပိုမို ထိရောက်စေမည့် အချက်အလက်များလည်းပါဝင်နေသည်ဟု ဖော်ပြ ခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ ဝန်ကြီး-၂

ဘရာဇီးနိုင်ငံ၏ တရားစီရင်ရေးစနစ်အပေါ် အမေရိကန်က ဝင်ရောက် စွက်ဖက်မှုကို မိမိတို့အနေဖြင့် လုံးဝ လက်မခံနိုင်ကြောင်း ဘရာဇီး သမ္မတ လူးဝစ် အီနာစီယို လူလာ ဒါ ဆီလဗာ ကပြောကြားလိုက်ပါသည်။ ဘရာဇီး နိုင်ငံအနေဖြင့် မိမိ၏ အချုပ်အခြာအာဏာကို ကာကွယ်ထိန်းသိမ်း သွားမည်ဖြစ်ပြီး နောင်တွင် ပူးပေါင်းဆောင်ရွက်မည့် မိတ်ဖက်အသစ် များ ရှာဖွေသွားမည်ဟု ၎င်းက ထပ်လောင်း ပြောကြားထားပါသည်။ 

"ဘရာဇီးသည် လူ့အခွင့်အရေးများကို အစဉ်တစိုက် လေးစားလျက် နိုင်ငံ များအကြား လွတ်လပ်စွာ ရပ်တည်နေသော အချုပ်အခြာအာဏာပိုင် ဒီမိုကရေစီတစ်နိုင်ငံဖြစ်ပါသည်၊ အမေရိကန်အစိုးရအဖွဲ့က  ဘရာဇီးနိုင်ငံ တရားစီရင်ရေးစနစ်အပေါ် ဝင်ရောက်စွက်ဖက်မှုကို လက်မခံနိုင်ပါ" ဟု လူလာက ၎င်း၏ X လူမှုကွန်ရက်တွင် ရေးသားထားပါသည်။ ကနဦး အစောပိုင်းက အမေရိကန်အစိုးရက ဘရာဇီးတရားလွှတ်တော်ချုပ် တရားသူကြီး Alexandre de Moraes ကို ပိတ်ဆို့အရေးယူမှုများ ချမှတ်လိုက်ကြောင်း ကြေညာချက်ထွက်ပေါ်လာပြီးနောက် လူလာက ယင်းသို့ ပြောကြားလိုက်ခြင်း ဖြစ်ပါသည်။ 

"တရားစီရင်ရေးလွတ်လပ်ခွင့်မှာ ဘရာဇီးနိုင်ငံ၏ ဒီမိုကရေစီနှင့် လူ့ အခွင့်အရေး လေးစားမှု၏ အခြေခံအုတ်မြစ်များထဲမှ တစ်ခုဖြစ်ပါသည်" ဟု ဘရာဇီးသမ္မတက မှတ်ချက်ပြုထားပါသည်။

အမေရိကန်သို့ တင်ပို့သည့် ဘရာဇီးထုတ်ကုန်များအတွက် အခွန် ၅၀ ရာခိုင်နှုန်း ကောက်ခံရန် ယခုလို နိုင်ငံရေးဆိုင်ရာ အကြောင်းပြချက်များကို အသုံးချခြင်းမှာ တရားမျှတမှု မရှိကြောင်း ၊ ဘရာဇီးကို ဆန့်ကျင်သည့် အဆိုပါအရေးယူမှုများမှာ နိုင်ငံရေးအရ လှုံ့ဆော်သွေးထိုးမှုဖြစ်ကြောင်း ၊ နိုင်ငံတော်အချုပ်အခြာအာဏာနှင့် နှစ်နိုင်ငံဆက်ဆံရေးသမိုင်းကြောင်း တစ်ခုလုံးကို ဦးတည်နေကြောင်း ဘရာဇီးခေါင်းဆောင်က   ထပ်လောင်း ပြောကြားထားပါသည်။

ကိုးကား - Tass

ဘာသာပြန်ဆိုသူ- ဦးကျော်ဇေယျ၊ ဒုတိယညွှန်ကြားရေးမှူး၊ ဝန်ကြီး-၃

Photo- Fars