မတ်လ ၂၈ ရက်(တနင်္လာနေ့)တွင် စတင်အကျိုးသက်ရောက်မည့် နိုင်ငံခြားမှ ပိတ်ဆို့မှုများကို ဆန့်ကျင်သည့် ဥပဒေ အကောင်အထည်ဖော်ဆောင်ရွက်နိုင်ရေးအတွက် တရုတ်ဝန်ကြီးက စည်းမျဉ်းများအား ဖော်ပြထားသည့် နိုင်ငံတော်ကောင်စီအမိန့်စာတစ်စောင်ကို လက်မှတ်ရေးထိုးထားပါသည်။ ထိုဥပဒေတွင် ပုဒ်မစုစုပေါင်း (၂၂) ခု ပါဝင်ပါသည်။ 

အဆိုပါ စည်းမျဉ်းအရ တရုတ်နိုင်ငံသည် ပြည်ပမှ ၎င်းတို့နိုင်ငံအပေါ် ပိတ်ဆို့မှုများ ပြုလုပ်ခြင်းကို တုံ့ပြန်သွားနိုင်ရေး တိုးမြှင့်ဆောင်ရွက်သွားမည်ဖြစ်ပါသည်။ ထိုဥပဒေသည် တားမြစ်ထားသော သို့မဟုတ် ကန့်သတ်ထားသည့် ငွေကြေးပိုင်ဆိုင်မှုများ၊ ငွေကြေးကို လက်ဝယ်မထားသော ငွေပေးချေမှုများနှင့် အခြားသောလုပ်ငန်းများအား သိမ်းဆည်းခြင်း၊ ထိန်းသိမ်းထားခြင်းနှင့် ယာယီပိတ်သိမ်းမည့် အစီအစဉ်များကို အတိအကျ ဖော်ပြထားပါသည်။

အဆိုပါ စည်းမျဉ်းနှင့်အညီ ပြည်ပမှ ၎င်းတို့နိုင်ငံအပေါ် ပိတ်ဆို့မှုများကို တန်ပြန်ဆောင်ရွက်မည့်အစီအစဉ်များကို ပြန်လည်သတ်မှတ်သွားမည်ဖြစ်ပြီး နိုင်ငံတော်ကောင်စီလက်အောက်ရှိ ဌာနအချင်းချင်းအကြား ပူးပေါင်းပြီး ထိုကိစ္စအား ဆောင်ရွက်သွားမည်ဖြစ်ကြောင်း သတင်းရရှိပါသည်။ 

ကိုးကား- CGTN

ဘာသာပြန်ဆိုသူ-ဒေါ်မေသူဌေး၊ ဦးစီးအရာရှိ၊ နစက-၃

ယူကရိန်းနှင့်ပတ်သက်၍ မအောင်မြင်သောစီမံကိန်းများကြောင့် အနောက်နိုင်ငံများသည် ရုရှား၊ မော်လ်ဒိုဗာနှင့် ထရန်ကော့ကေးဆပ် ဒေသများတွင် မတည်ငြိမ်ဖြစ်အောင် လှုံ့ဆော်ရန် ကြိုးပမ်းလာမည်ဖြစ်ကြောင်း ရုရှား လုံခြုံရေးကောင်စီအတွင်းရေးမှူး ဆာဂေးရှိုးဂူက TASS သတင်းဌာနနှင့် အင်တာဗျူးတွင် ပြောကြားခဲ့ပါသည်။

“ဤသည်မှာ ရုရှားကို မဟာဗျူဟာမြောက်ရှုံးနိမ့်အောင်မလုပ်ဆောင်နိုင်ခြင်း၊ နိုင်ငံတကာတွင် ဂုဏ်သတင်းကို မထိခိုက်စေနိုင်ခြင်း၊ စီးပွားရေးကို မဖျက်ဆီးနိုင်ခြင်း၊ ပြည်တွင်းရေးရာတည်ငြိမ်မှုကို အားမနည်းစေနိုင်ခြင်းတို့ကို ရန်လိုသောနိုင်ငံများက နားလည်သဘောပေါက်လာကြသည်” ဟု ၎င်းက ထောက်ပြပြောဆိုခဲ့ပါသည်။ အနောက်နိုင်ငံများအတွက် ထိုကဲ့သို့ မထင်မှတ်ထားသော အခြေအနေများဖြစ်ပေါ်လာခြင်းသည် ၎င်းတို့၏ လွှမ်းမိုးမှုကို ထိန်းသိမ်းရန် နည်းလမ်းအသစ်များကိုရှာဖွေရန် တွန်းအားပေးလျက်ရှိကြောင်း ရုရှားလုံခြုံရေးကောင်စီအတွင်းရေးမှူး ဆာဂေးရှိုးဂူ က ပြောကြားခဲ့ပါသည်။ 

“ရုရှားကို စစ်မြေပြင်တွင်ဖြစ်စေ၊ သံတမန်ရေးအရဖြစ်စေ အနိုင်ယူရန် (ယူကရိန်းကို ‘ရုရှားဆန့်ကျင်ရေး’ အဖြစ် ဆက်လက်တည်ရှိစေရန်) သည် အနောက်တိုင်းအထက်တန်းလွှာများအတွက် အဓိက ဦးစားပေး ဖြစ်နေဆဲ ဖြစ်သည်” ဟု ၎င်းက ဆက်လက်ပြောကြားခဲ့သည်။ 

“ထို့အပြင် ရုရှားဖက်ဒရေးရှင်းနှင့် အိမ်နီးချင်းနိုင်ငံများ (အထူးသဖြင့် တောင်ကော့ကေးဆပ်စ်နှင့် မော်လ်ဒိုဗာ) တွင် အတွင်းပိုင်း မတည်ငြိမ်မှုများ ဖန်တီးရန်နှင့် အာဖရိက၊ အရှေ့အလယ်ပိုင်းနှင့် လက်တင်အမေရိက ရှိ စစ်မှန်သောလွတ်လပ်ရေးကို ရယူရန်ကြိုးပမ်းနေသော ကမ္ဘာ့တောင်ပိုင်း နိုင်ငံများတွင် ‘အရောင်တော်လှန်ရေးများ’ အတွက် ပြင်ဆင်ရန် လုံ့လ စိုက်ထုတ်အားထုတ်မှုများစွာကို ပြုလုပ်နေကြသည်” ဟု ဆာဂေးရှိုးဂူ က ပြောကြားခဲ့ပါသည်။

ထိုအရာအားလုံးသည် ရုရှား၏ အမျိုးသားလုံခြုံရေး ခြိမ်းခြောက်မှုများ၏ သဘောသဘာဝကို ပြောင်းလဲစေပြီး စိန်ခေါ်မှုအသစ်များ၊ အန္တရာယ်များနှင့် အခွင့်အလမ်းများကို ဖန်တီးနေကြောင်း ထောက်ပြခဲ့သည်။ လုံခြုံရေးနယ်ပယ်တွင်အခြေအနေများ ရှုပ်ထွေးနေဆဲဖြစ်သော်လည်း “ရုရှားသည် နိုင်ငံရေး၊ စစ်ရေး၊ စီးပွားရေးနှင့် သတင်းအချက်အလက်ဖိအားများကို အောင်မြင်စွာရင်ဆိုင်နေသည်” ဟု ရုရှားလုံခြုံရေးကောင်စီ အတွင်းရေးမှူး ဆာဂေးရှိုးဂူ က အလေးထားပြောကြားခဲ့ပါသည်။ 

ကိုးကား - Tass

အမေရိကန်သမ္မတ ဒေါ်နယ်ထရမ့်သည် မေလတွင် အရှေ့အလယ်ပိုင်းသို့ သွားရောက်လည်ပတ်ပြီးနောက် ရုရှားသမ္မတဗလာဒီမာပူတင်နှင့် မကြာခင်တွင် တွေ့ဆုံနိုင်ကြောင်း ပြောကြားလိုက်ပါသည်။

ထရမ့်သည် မေလ ၁၃ ရက်မှ ၁၆ ရက်အထိ အရှေ့အလယ်ပိုင်းသို့ သွားရောက်ကာ ဆော်ဒီအာရေဗျ၊ ကာတာနှင့် အာရပ်စော်ဘွားများ ပြည်ထောင်စုတို့ကို လည်ပတ်မည်ဟု အိမ်ဖြူတော်က ဧပြီ ၂၂ (အင်္ဂါနေ့) တွင် သတင်းထုတ်ပြန်ထားပါသည်။

ကိုးကား- TASS

Photo: Axios

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

အိမ်ဖြူတော်က ယူကရိန်းပဋိပက္ခကို အဆုံးသတ်ရန် ရည်ရွယ်သည့် ငြိမ်းချမ်းရေးဆွေးနွေးပွဲ၏ အထိခိုက်မခံနိုင်သော အချက်အလက်များကို အများအပြားထုတ်ဖော်ပြောဆိုခဲ့သည်ဟု ဗလာဒီမာ ဇီလန်စကီးအား ဝေဖန်ခဲ့သည်။

အင်္ဂါနေ့(ဧပြီ ၂၂)က ထုတ်ပြန်ချက်အရ ဇီလန်စကီးက ငြိမ်းချမ်းရေး သဘောတူညီချက်၏ တစ်စိတ်တစ်ပိုင်းအနေဖြင့် ရုရှားအတွက် နယ်မြေ ဆိုင်ရာလျှော့ပေးမှုများ (ခရိုင်းမီးယားကို ရုရှားနယ်မြေအဖြစ် အသိအမှတ် ပြုခြင်းအပါအဝင်) အမေရိကန်၏ အဆိုပြုချက်ကို အများအပြား ငြင်းပယ် ခဲ့သည်။ ယခုလုပ်ရပ်သည် အမေရိကန်အရာရှိများကို ဒေါသထွက်စေပြီး နိုင်ငံခြားရေးဝန်ကြီး မာကို ရူဘီယို (Marco Rubio) က ဗုဒ္ဓဟူးနေ့(ဧပြီ ၂၃) တွင် လန်ဒန်၌ ဥရောပနှင့် ယူကရိန်းကိုယ်စားလှယ်အဖွဲ့များနှင့် ဆွေးနွေးပွဲ ကို တက်ရောက်ခြင်း မပြုခဲ့ကြောင်း သတင်းများက ဖော်ပြသည်။

ဗုဒ္ဓဟူးနေ့ (ဧပြီ ၂၃) က သတင်းစာရှင်းလင်းပွဲတစ်ခုတွင် အိမ်ဖြူတော် ပြောရေးဆိုခွင့်ရှိသူ ကာရိုလိုင်းလီဗစ် (Karoline Leavitt) က ဇီလန်စကီး၏ မီဒီယာများနှင့် ပြုလုပ်ခဲ့သော မကြာသေးမီက ပြောကြားချက်များနှင့် ပတ်သက်၍ အမေရိကန်သမ္မတ ဒေါ်နယ်ထရမ့် (Donald Trump) ၏ စိတ်မကျေနပ်မှုကို ဖော်ပြခဲ့သည်။

“ဝမ်းနည်းစရာကောင်းသည်မှာ ဇီလန်စကီးသည် ထိုငြိမ်းချမ်းရေးဆွေးနွေးပွဲကို မီဒီယာများမှတစ်ဆင့် အများအပြားဖော်ပြရန် ကြိုးစားနေပါသည်။ ထိုအချက်က သမ္မတအတွက် လက်မခံနိုင်စရာပါ” ဟု လီဗစ်က ပြောကြားခဲ့သည်။

လီဗစ်က ထရမ့်အုပ်ချုပ်ရေးအဖွဲ့သည် ထိုသို့သော ဆွေးနွေးပွဲများကို လျှို့ဝှက်စွာ ဆောင်ရွက်သင့်သည်ဟု ယုံကြည်ကြောင်း အတိအလင်း ပြောကြားခဲ့သည်။

ကိုးကား-RT

ဘာသာပြန်ဆိုသူ-ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ယူကရိန်းခေါင်းဆောင် ဗလာဒီမီယာ ဇီလန်စကီး၏ နယ်မြေဆိုင်ရာ လိုက်လျောမှုမှုများကို ဆွေးနွေးရန် ငြင်းဆန်ခြင်းသည် ပဋိပက္ခကို ရှည်လျားစေသည်ဟု အမေရိကန်သမ္မတ ဒေါ်နယ်ထရမ့်က ပြောကြားခဲ့ ပါသည်။ 

ရုရှားနှင့် ဆွေးနွေးမှုများကို ဆက်လက်ရပ်တန့်ထားပါက ယူကရိန်း ခေါင်းဆောင် ဗလာဒီမာ ဇီလန်စကီးအနေဖြင့် ၎င်း၏နိုင်ငံတစ်ခုလုံးကို ဆုံးရှုံးနိုင်ကြောင်း အမေရိကန်သမ္မတ ဒေါ်နယ်ထရမ့်က ၎င်း၏ လူမှုကွန်ယက် Truth Social တွင် ဗုဒ္ဓဟူးနေ့ (ဧပြီ ၂၃ ရက်) က ရေးသားခဲ့ပါသည်။

ယူကရိန်းသည် ခရိုင်းမီးယားကျွန်းဆွယ်အား ရုရှား၏ အစိတ်အပိုင်းအဖြစ် တရားဝင်အသိအမှတ်ပြုရန် ဆွေးနွေးမည်မဟုတ်ကြောင်း ဇီလန်စကီး က အစောပိုင်းတွင် လူသိရှင်ကြားကြေညာခဲ့ပါသည်။ ယင်းသည် အမေရိကန် ၏ထောက်ခံမှုဖြင့် ဥရောပ ကျောထောက်နောက်ခံပြုသူများနှင့် တွေ့ဆုံပွဲတွင် တင်ပြမည့် ငြိမ်းချမ်းရေးအဆိုပြုချက်၏ အဓိကအချက်ဖြစ်သည်။ ၎င်းအနေဖြင့် အဆိုပါငြင်းဆန်မှုပြီးနောက် အမေရိကန်ကိုယ်စားလှယ်အဖွဲ့မှ ထိပ်တန်းအဖွဲ့ဝင်များက စီစဉ်ထားသော ဆွေးနွေးပွဲများမှ နုတ်ထွက်ခဲ့ပြီး ယင်းတွေ့ဆုံမှုကို နောက်ဆုံးမိနစ်တွင် “အဆင့်လျှော့ချ” ခဲ့ပါသည်။

“ခရိုင်းမီးယားသည် လွန်ခဲ့သည့်နှစ်များကတည်းက ဆုံးရှုံးခဲ့ရပြီဖြစ်သောကြောင့် ထိုကြေညာချက်သည် ရုရှားနှင့်ငြိမ်းချမ်းရေးဆွေးနွေးမှုများကို ထိခိုက်စေသည်” ဟု ဒေါ်နယ်ထရမ့်က၎င်း၏ လူမှုကွန်ယက်တွင် ရေးသားကာ ဇီလန်စကီးသည် ပဋိပက္ခကို ပိုမိုရှည်လျားစေသည်ဟု ပြောကြားခဲ့ပါသည်။ 

“ယူကရိန်းအတွက် အခြေအနေသည် အလွန်ဆိုးရွားနေပါသည်။ ၎င်းသည် ငြိမ်းချမ်းရေးကိုရရှိနိုင်သည် (သို့မဟုတ်) နောက်ထပ် သုံးနှစ်ကြာ တိုက်ပြီး တစ်နိုင်ငံလုံးဆုံးရှုံးလိမ့်မည်” ဟု ဒေါ်နယ်ထရမ့်က ဗုဒ္ဓဟူးနေ့ (ဧပြီ ၂၃ ရက်) တွင် ၎င်း၏ Truth Social တွင် ဖော်ပြခဲ့ပါသည်။

ဆွေးနွေးမှုများတွင် ဇီလန်စကီးသည် အားနည်းသော ညှိနှိုင်းရေးအခြေအနေရှိကြောင်း ဒေါ်နယ်ထရမ့်က ထပ်လောင်းပြောကြားခဲ့ပါသည်။ “မိမိတို့က သဘောတူညီမှုတစ်ခုနှင့် အလွန်နီးစပ်နေသော်လည်း ‘ကစားရန် ကတ်မရှိသော’ သူသည် နောက်ဆုံးတွင် ၎င်းကို ရရှိသင့်သည်” ဟု ၎င်းက ရေးသားခဲ့ပါသည်။

အမေရိကန်သည် ပဋိပက္ခကိုဖြေရှင်းရန်နှင့် ယူကရိန်းသို့အပ်နှံထားသော လက်နက်ငွေကြေးဘီလီယံချီကို ပြန်လည်ရယူရန် သတ္တုတူးဖော်ရေး သဘောတူညီချက်တစ်ရပ်ကို စီစဉ်နေစဉ် ဒေါ်နယ်ထရမ့်နှင့် ၎င်း၏ အစိုးရအဖွဲ့သည် နှစ်ဖက်ဆွေးနွေးမှုများ၏ အရှိန်နှေးနေမှုကို စိတ်ရှည်မှု မရှိတော့ဘဲ အဆိုပါကြိုးပမ်းမှုများကို စွန့်လွှတ်နိုင်ကြောင်း အရိပ်အမြွက် ပြောကြားခဲ့ပါသည်။

“လုံလောက်သောတိုးတက်မှုမရှိပါက အခြားဦးစားပေးမှုများဆီသို့ မိမိ တို့ရွှေ့ပြောင်းရန် လိုအပ်နိုင်သည်” ဟု နိုင်ငံခြားရေးဝန်ကြီး မာကိုရူဘီယို က အင်္ဂါနေ့(ဧပြီ ၂၂ရက်)တွင် Free Press နှင့်ပြုလုပ်သော အင်တာဗျူးတစ်ခုတွင် ပြောကြားခဲ့ပါသည်။ 

ကိုးကား - RT

ရုရှားသမ္မတ ဗလာဒီမာ ပူတင်သည် အိုမန်နိုင်ငံသို့ သွားရောက်ရန် အိုမန် ဆူလတန်၏ ဖိတ်ကြားချက်ကို ကျေးဇူးတင်စွာ လက်ခံခဲ့ပါသည်။

အိုမန်နိုင်ငံ ဆူလတန် ဟိုင်းသမ် ဘင်တာရက်က် အယ်လ်ဆာအီဒ်က ရုရှားသမ္မတ ဗလာဒီမာ ပူတင်အား အိုမန်သို့ လာရောက်လည်ပတ်ရန် ဖိတ်ကြားခဲ့ပြီး ရုရှားသမ္မတက ကျေးဇူးတင်စွာ လက်ခံခဲ့ကြောင်းကရင်မလင်နန်းတော်၏ ဝက်ဘ်ဆိုက်တွင် ထုတ်ပြန်သော ပူးတွဲ ကြေညာချက်တွင် ဖော်ပြထားပါသည်။

“အိုမန် ဆူလတန် ဟိုင်းသမ် ဘင်တာရက်က် အယ်လ်ဆာအီဒ်က ရုရှား ဖက်ဒရေးရှင်းသမ္မတ ဗလာဒီမာ ပူတင်၊ ရုရှားအစိုးရနှင့် ပြည်သူများ၏ စိတ်ထားဖြူစင်စွာ လက်ခံကြိုဆိုမှုနှင့် စေတနာပြည့်ဝသော ဧည့်ဝတ်ကျေပွန်မှုအတွက် အထူးကျေးဇူးတင်ကြောင်း ထည့်သွင်းပြောကြားခဲ့ပါသည်။ ထို့အပြင် ရုရှားဖက်ဒရေးရှင်းနိုင်ငံအား နောက်ထပ်တိုးတက်မှုနှင့် ဖွံ့ဖြိုးတိုးတက်မှုများ ရရှိပါစေဟု ဆုတောင်းပို့သကာ သမ္မတဗလာ ဒီမာ ပူတင်အား အိုမန်နိုင်ငံသို့ လာရောက်ရန် ဖိတ်ကြားခဲ့ပါသည်။ ထို ဖိတ်ကြားချက်ကို သမ္မတ ဗလာဒီမာ ပူတင်က ကျေးဇူးတင်စွာ လက်ခံခဲ့သည်” ဟု ထုတ်ပြန်ချက်တွင် ဖော်ပြထားပါသည်။

ဤဖိတ်ကြားမှုသည် နှစ်နိုင်ငံကြား နိုင်ငံရေးနှင့် စီးပွားရေးပူးပေါင်းဆောင်ရွက်မှုများ ပိုမိုနက်ရှိုင်းလာစေရန် ရည်ရွယ်သည်ဟု သိရှိရပြီး၊ အိုမန်နိုင်ငံသည် နိုင်ငံ၊ ပြည်နယ်များအကြား ငြိမ်းချမ်းရေး တည်ဆောက်ရာတွင် အရှေ့အလယ်ပိုင်းဒေသ၏ အဓိကအခန်းကဏ္ဍမှ ပါဝင်လျက်ရှိပြီး ရုရှားနှင့် သံတမန်ဆက်ဆံရေးကို အထူးအလေးထားလျက်ရှိပါသည်။

ကိုးကား - Tass

ရုရှားသမ္မတ ဗလာဒီမာ ပူတင်နှင့် မော်စကိုသို့ အလည်အပတ် ရောက်ရှိနေသော အိုမန်နိုင်ငံ ဆူလတန် Haitham bin Tariq Al Said တို့သည် တွေ့ဆုံဆွေးနွေးမှုများ ပြုလုပ်နေကြောင်း TASS သတင်းထောက်၏ သတင်းအရ သိရပါသည်။ 

အဆိုပါအစည်းအဝေးတွင် နှစ်နိုင်ငံအကြား ကုန်သွယ်ရေး၊ စီးပွားရေး၊ ငွေကြေး၊ ယဉ်ကျေးမှုနှင့် လူသားချင်းစာနာမှုဆိုင်ရာ ပူးပေါင်း ဆောင်ရွက်မှု များအပါအဝင် ပူးတွဲဆောင်ရွက်မှုများကို ဆွေးနွေးသွားမည်ဖြစ်သည်။ ထို့အပြင် နိုင်ငံတကာရေးရာ အရေးကြီးကိစ္စများနှင့် အီရန်၏ နျူကလီးယား အစီအစဉ်များလည်း ဆွေးနွေးမည့် အကြောင်းအရာ များတွင် ပါဝင်နိုင်သည်။ 

ဆွေးနွေးပွဲအပြီးတွင် နှစ်နိုင်ငံသည် သဘောတူညီချက် ၁၀ ခုကို လက်မှတ် ရေးထိုးရန် စီစဉ်ထားပြီး ယင်းတို့တွင် နှစ်နိုင်ငံ သာမန် နိုင်ငံကူးလက်မှတ် ကိုင်ဆောင်သူများအတွက် ဗီဇာလိုအပ်ချက် ပယ်ဖျက်ရေးဆိုင်ရာ သဘောတူညီချက်လည်း ပါဝင်ပါသည်။ ကုန်သွယ်ရေး၊ စီးပွားရေးနှင့် နည်းပညာဆိုင်ရာ ပူးပေါင်းဆောင်ရွက်မှုအတွက် ပူးတွဲကော်မရှင် ဖွဲ့စည်းရန် ပရိုတိုကောလ်လည်း လက်မှတ်ရေးထိုးသွားမည်ဖြစ်သည်။ 

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃

ရုရှားသမ္မတက မော်စကိုနှင့် ရုရှားတစ်ဝှမ်းလုံး၏ သာသနာ့ခေါင်းဆောင် ပထမဆုံးသော ပက်ထရီအာ့ချ် ကာရီးလ်နှင့် ဆားဘီးယား သာသနာ့ ခေါင်းဆောင် ပါ့ဖီရီးယပ်စ်တို့နှင့် တွေ့ဆုံစဉ် ဆားဘီးယားသမ္မတ အလက်ဇန်းဒါ ဗူချစ်အား မေလ ၉ ရက်နေ့၌ မော်စကိုမြို့တွင် လက်ခံ တွေ့ဆုံရန်မျှော်လင့်နေကြောင်း ပြောကြားခဲ့ပါသည်။ 

“ဒုတိယကမ္ဘာစစ်ကြီးတွင် အောင်ပွဲရရှိမှုနှစ် ၈၀ ပြည့် အထိမ်းအမှတ် အခမ်းအနားများအတွက် ဆားဘီးယားသမ္မတအား မေလ ၉ ရက်တွင် မော်စကိုမြို့၌ ကျင်းပမည့်အစီအစဉ်များတွင် လာရောက်ရန် မျှော်လင့်ပါသည်” ဟု သမ္မတဗလာဒီမာပူတင်က ပြောကြားခဲ့သည်။

ကိုးကား - Tass

အမေရိကန်သမ္မတ ဒေါ်နယ်ထရမ့်သည် မေလ ၁၃ ရက်မှ ၁၆ ရက် အတွင်း အရှေ့အလယ်ပိုင်းသို့ သွားရောက်လည်ပတ်မည်ဖြစ်ပြီး ယင်းခရီးစဉ်အတွင်း ဆော်ဒီအာရေဗျ၊ ကာတာနှင့် ယူအေအီးတို့ကို သွားရောက် လည်ပတ်မည်ဖြစ်ကြောင်း အိမ်ဖြူတော်၏ ပြောရေးဆိုခွင့်ရှိသူ ကယ်ရိုလိုင်း လီဗစ်တ်က သတင်းစာရှင်းလင်းပွဲ၌ ပြောကြားခဲ့ပါသည်။

“သမ္မတ၏ အရှေ့အလယ်ပိုင်းခရီးစဉ်ကို မေ ၁၃ ရက် မှ ၁၆ ရက်အတွင်း ပြုလုပ်မည်ဖြစ်ပြီး ဆော်ဒီအာရေဗျ၊ ကာတာနှင့် ယူအေအီးနိုင်ငံများသို့ သွားရောက်မည်ဟု အတည်ပြုပြောကြားနိုင်ပါသည်” ဟု ၎င်းမှ ဖော်ပြ ခဲ့ပါသည်။

မတ်လတွင် ရုရှားသမ္မတ၏ ပြောရေးဆိုခွင့်ရှိသူ ဒီမီထရီ ပက်စကော့ဗ်က အမေရိကန်သမ္မတဒေါ်နယ်ထရမ့်နှင့် ရုရှားဖက်ဒရေးရှင်းသမ္မတ ဗလာ ဒီမာပူတင်တို့သည် ဆော်ဒီအာရေဗျတွင် တွေ့ဆုံနိုင်သည့် ဖြစ်နိုင်ခြေကို မပယ်ရှားနိုင်ကြောင်း၊ သို့သော် မျက်နှာချင်းဆိုင် ထိပ်သီးအစည်းအဝေး ကျင်းပမည့်နေရာနှင့်ပတ်သက်၍ တိကျသော အသေးစိတ် အချက်အလက် များမရှိသေးကြောင်း ပြောကြားခဲ့ပါသည်။ အမေရိကန်သမ္မတ၏ အထူး သံတမန် စတီဗင် ဝစ်ကော့ဖ်က ဘလွန်းဘာ့ဂ် သတင်းဌာနနှင့် ပြုလုပ်သော အင်တာဗျူးတွင် ရုရှား-အမေရိကန်ထိပ်သီးအစည်းအဝေးကို ဆော်ဒီ အာရေဗျတွင် ကျင်းပနိုင်သည်ဟု ယူဆပြောကြားခဲ့သည်။ ၎င်းက သမ္မတ ဗလာဒီမာပူတင်နှင့် အမေရိကန်သမ္မတ ဒေါ်နယ်ထရမ့်ကိုယ်စား ၎င်းအနေဖြင့် ပြောဆိုနိုင်စွမ်းမရှိသော်လည်း ထိုနေရာတွင် ဖြစ်နိုင်ခြေအများဆုံး ဟု မိမိယုံကြည်သည်” ဟု ဖြည့်စွက်ပြောကြားခဲ့ပါသည်။

ကိုးကား - Tass

Photo: Al Arabiya

ယူကရိန်း၏ NATO အဖွဲ့ဝင်ဖြစ်နိုင်ခြေကို အမေရိကန်က ဖယ်ရှားလိုက် ကြောင်း ကြေညာချက်များကို ရုရှားက ကြိုဆိုကြောင်း ကရင်မလင် ပြောခွင့်ရ ပုဂ္ဂိုလ် ဒီမီထရီ ပက်စကိုဗ်က ဧပြီ ၂၁ ရက် (တနင်္လာနေ့)တွင် ပြောကြားလိုက်ပါသည်။ 

ယခုလအစောပိုင်းတွင် အမေရိကန်သမ္မတ ဒေါ်နယ်ထရမ့်က “ယူကရိန်း သမ္မတ ဗလာဒီမာ ဇီလန်စကီး၏ NATO အဖွဲ့ဝင်ဖြစ်လိုမှုဆန္ဒမှာ မည်သည့်အခါမျှ ဖြစ်လာနိုင်မည်မဟုတ်ကြောင်း ၊ ယူကရိန်းပဋိပက္ခမှာ ထိုကိစ္စက အစပျိုးခဲ့ခြင်းဖြစ်နိုင်ကြောင်း” ပြောကြားခဲ့သည်။ 

ထို့အပြင် အမေရိကန်၏ မူကြမ်းစာတမ်းတွင် ရုရှားက သိမ်းပိုက်ထားသော နယ်မြေအားလုံးသည် ရုရှား၏ ထိန်းချုပ်မှုအောက်တွင် ဆက်လက် ရှိနေရမည်ဟု ပြဋ္ဌာန်းထားသည်။ ယင်းအဆိုပြုချက်များနှင့်ပတ်သက်သည့် ဆွေးနွေးမှုများကို ယခုသီတင်းပတ်အတွင်း လန်ဒန်တွင် ဆက်လက် ကျင်းပမည်ဖြစ်သည်။ 

အစောပိုင်းက ဝါရှင်တန်သည် ပဲရစ်ရှိ မိတ်ဖက်များထံ ယူကရိန်း အရေးကိစ္စဖြေရှင်းရန် အဆိုပြုချက်များကို တင်ပြခဲ့ရာ ၎င်းတွင် Kyiv ၏ NATO အဖွဲ့ဝင်ဖြစ်မှုဆိုင်ရာ ဆွေးနွေးမှုများကို ငြင်းပယ်ခြင်းနှင့် ရုရှားအပေါ် ဒဏ်ခတ်ပိတ်ဆို့မှုများကို လျှော့ပေါ့ပေးခြင်းတို့ ပါဝင်ကြောင်း Bloomberg သတင်းဌာနက ဖော်ပြခဲ့သည်။ 

၂၀၀၈ ခုနှစ်၊ ဧပြီလအတွင်း ဘူခါရက်စ်ထ် အစည်းအဝေး ထိပ်သီးညီလာခံတွင် NATO က ယူကရိန်းနှင့် ဂျော်ဂျီယာနိုင်ငံတို့သည် အချိန်ကြာလာသည်နှင့်အမျှ NATO အဖွဲ့ဝင်များ ဖြစ်လာမည်ဟု နိုင်ငံရေးကြေညာချက်ကို အတည်ပြုခဲ့သော်လည်း အဖွဲ့ဝင်ဖြစ်ရန် တရားဝင်လုပ်ထုံးလုပ်နည်း၏ ပထမဆုံးအဆင့်ဖြစ်သော Membership Action Plan (MAP) ကို နိုင်ငံ နှစ်နိုင်ငံလုံးအား ပေးအပ်ရန် ငြင်းဆိုခဲ့သည်။ 

၂၀၂၃ ခုနှစ်၊ ဇူလိုင်လအတွင်း ဗီလ်နီးယပ်စ်တွင် ကျင်းပသော NATO အစည်းအဝေးတွင်လည်း မည်သည့်တိကျသောအချိန်ကာလကိုမှ ဖော်ပြ ခြင်းမရှိဘဲ ယူကရိန်း၏ အနာဂတ်သည် NATO တွင်ရှိသည် ဟု ပြောကြား ခဲ့သည်။ 

၂၀၂၄ ခုနှစ် ဝါရှင်တန် အစည်းအဝေးတွင် ယူကရိန်းသည် “NATO သို့ ပြန်လှည့်၍ မရသော လမ်းကြောင်းပေါ်တွင် ရှိသည်” ဟု ပြောကြားခဲ့သည်။ အဆိုပါအသုံးအနှုန်းကို ထိုစဉ်က NATO အထွေထွေ အတွင်းရေးမှူး Jens Stoltenberg နှင့် ၎င်း၏ ဆက်ခံသူ Mark Rutte တို့က လပေါင်းများစွာ ထပ်တလဲလဲ ပြောကြားခဲ့သည်။

၂၀၂၅ ခုနှစ်၊ ဇန်နဝါရီလတွင် အမေရိကန်သမ္မတ ဒေါ်နယ်ထရမ့် အိမ်ဖြူတော်သို့ ပြန်လည်ရောက်ရှိလာပြီး အစိုးရအသစ်က အမေရိကန် ၏ မူဝါဒအသစ်ကို ရှင်းလင်းစွာ ဖော်ပြခဲ့သည့်အခါ Rutte က NATO သည် ယူကရိန်း၏ အဖွဲ့ဝင်ဖြစ်မှုနှင့်ပတ်သက်၍ တိကျသော ကတိကဝတ်များ ဘယ်သောအခါမှ မပြုခဲ့ဟု ကြေညာခဲ့သည်။

ကိုးကား- TASS

ဘာသာပြန်ဆိုသူ-ဦးကျော်ဇေယျ၊ ဒုတိယညွှန်ကြားရေးမှူး၊ နစက-၃