ကာတာ၊ ဂျော်ဒန်၊ အာရပ်စော်ဘွားများ ပြည်ထောင်စု၊ ပါကစ္စတန် စသည့် အာရပ်နှင့် အစ္စလာမ်နိုင်ငံ ၂၁ နိုင်ငံ၏ နိုင်ငံခြားရေးဝန်ကြီး ဌာနများက ဇွန် ၁၆ ရက် ညပိုင်းတွင် ပူးတွဲထုတ်ပြန်ချက် ထုတ်ပြန်ကာ အီရန်အပေါ် အစ္စရေး၏ ရန်လိုသော လုပ်ဆောင်မှုများ ရပ်တန့်ရမည်ဟု အလေးအနက်ဖော်ပြခဲ့ကြောင်း ကာတာသတင်းဌာနက ဇွန် ၁၇ ရက် နံနက်အစောပိုင်း သတင်းထုတ်ပြန်ခဲ့သည်။

အဆိုပါပူးတွဲထုတ်ပြန်ချက်တွင် ဇွန် ၁၃ ရက် နံနက်အစောပိုင်းမှစ၍ အီရန် အား အစ္စရေး တိုက်ခိုက်ခဲ့ခြင်းကို ရှုတ်ချခဲ့ရာ အမျိုးသား အချုပ်အခြာ အာဏာနှင့် နယ်မြေပိုင်နက်ပြည့်စုံမှု၊ အိမ်နီးချင်း ချစ်ကြည် ရင်းနှီးမှု အခြေခံမူကို လေးစားရန်နှင့် အငြင်းပွားမှုများကို ငြိမ်းချမ်းစွာ ဖြေရှင်းရန် လိုအပ်ကြောင်း ထပ်လောင်းပြောကြားခဲ့ပြီး လက်ရှိတင်းမာမှု အခြေအနေ ဖြေလျှော့ရန်၊ အပစ်အခတ်ရပ်စဲရေးနှင့် ပဋိပက္ခ ဘက်စုံ ပြေလျော့ရေး အကောင်အထည်ဖော်ရန် တိုက်တွန်းခဲ့သည်။ လက်ရှိ အခြေအနေသည် အရှေ့အလယ်ပိုင်းဒေသတစ်ခုလုံး၏ လုံခြုံရေးနှင့် တည်ငြိမ်ရေးအပေါ် ဆိုးရွားသော နောက်ဆက်တွဲများ ဖြစ်ပေါ်လာနိုင်ကြောင်း နိုင်ငံ အသီးသီး ၏ နိုင်ငံခြားရေးဝန်ကြီးများက ယူဆကြသည်ဟု အဆိုပါ ပူးတွဲ ထုတ်ပြန်ချက် တွင် ပြောကြားထားသည်။ 

သက်ဆိုင်ရာ နိုင်ငံတကာဆုံးဖြတ်ချက်များအရ အရှေ့အလယ်ပိုင်း ဒေသ တွင် နျူကလီးယားလက်နက်နှင့် အခြားသော ကျယ်ကျယ်ပြန့်ပြန့် သေဆုံး၊ ဒဏ်ရာရစေနိုင်သော လက်နက်များ ကင်းစင်ရေး ရည်မှန်းချက်ကို တွန်းအားပေး အကောင်အထည်ဖော်သင့်ကြောင်း၊ ဒေသတွင်းရှိ နိုင်ငံ အားလုံးအား “နျူကလီးယားလက်နက်များ မပြန့်ပွားရေး သဘောတူညီချက်” တွင် အမြန်ဆုံး ပါဝင်ရန် တိုက်တွန်းကြောင်း ယင်းတွင် ပြောကြား ထားသည်။

အပြည်ပြည်ဆိုင်ရာ အဏုမြူစွမ်းအင်အေဂျင်စီ (IAEA) ၏ အာမခံချက် ယန္တရားအောက်တွင် ကြီးကြပ်ထားသည့် နျူကလီးယား အဆောက်အဦ များအား တိုက်ခိုက်ခြင်း မပြုရန်၊ စေ့စပ်ညှိနှိုင်းမှုလမ်းကြောင်းသို့ အမြန်ဆုံး ပြန်လည်ရောက်ရှိရန် လိုအပ်ကြောင်း၊ ယင်းမှာ အီရန်နျူကလီးယား အစီအစဉ်နှင့် စပ်လျဉ်း၍ စဉ်ဆက်မပြတ် သဘောတူညီမှုရရှိရန် တစ်ခု တည်းသော လမ်းကြောင်းဖြစ်ကြောင်း အဆိုပါပူးတွဲထုတ်ပြန်ချက်တွင် အလေးထား ပြောကြားခဲ့သည်။

လက်ရှိအကျပ်အတည်းသည် စစ်ရေးနည်းလမ်းများဖြင့် ဖြေရှင်း၍ မရကြောင်း၊ ဒေသတွင်း အကျပ်အတည်းအား ဖြေရှင်းနိုင်သည့် တစ်ခုတည်းသော လမ်းကြောင်းမှာ သံတမန်ရေး၊ ဆွေးနွေးမှုနှင့် အိမ်နီးချင်း ချစ်ကြည် ရင်းနှီးမှု အခြေခံမူအား လိုက်နာခြင်း၊ နိုင်ငံတကာ ဥပဒေနှင့် “ကုလသမဂ္ဂ ပဋိညာဉ်စာတမ်း” တို့ကို အရင်းခံ၍ လုပ်ဆောင်ခြင်း ဖြစ်ကြောင်း နိုင်ငံ အသီးသီး၏ နိုင်ငံခြားရေးဝန်ကြီးများက ဆက်လက်၍ ထပ်လောင်း ပြောကြားခဲ့သည်။

ဇွန် ၁၃ ရက် နံနက်အစောပိုင်းမှစ၍ အစ္စရေးသည် အီရန်နိုင်ငံ နေရာ အများအပြားကို လေကြောင်းတိုက်ခိုက်မှု အကြီးအကျယ်ပြုလုပ်ပြီး အီရန် နျူကလီးယားအဆောက်အဦနှင့် စစ်ရေးပစ်မှတ်များကို ဗုံးကြဲခဲ့ခြင်းကြောင့် လူအများအပြား သေဆုံးဒဏ်ရာရမှု ဖြစ်ပွားခဲ့သည်။ ယင်းအပေါ် လက်တုံ့ပြန်သည့်အနေဖြင့် အီရန်သည် အစ္စရေးနယ်နိမိတ်အတွင်းရှိ ပစ်မှတ်များစွာကို ဒုံးကျည်၊ ဒရုန်းများဖြင့် အကြိမ်ပေါင်းများစွာ တိုက်ခိုက် ခဲ့သည်။ 

ကိုးကား-Xinhua Myanmar

ယခုလအတွင်း နှစ်နိုင်ငံနယ်စပ်၌ အပြန်အလှန်ပစ်ခတ်မှုများ ဖြစ်ပွား ပြီးနောက် နှစ်နိုင်ငံအကြား တင်းမာမှုများမြင့်တက်လာခြင်းကြောင့် ကမ္ဘောဒီးယား နိုင်ငံက ထိုင်းနိုင်ငံမှ သစ်သီးဝလံနှင့် ဟင်းသီးဟင်းရွက် များတင်သွင်းမှုကို တားမြစ်ပိတ်ပင်လိုက်သည်။ 

ကမ္ဘောဒီးယား လူဝင်မှုကြီးကြပ်ရေး ညွှန်ကြားရေးမှူးချုပ် Sok Veasna က “ယနေ့နံနက်ကစပြီး ထိုင်းနိုင်ငံမှ သစ်သီးဝလံနှင့် ဟင်းသီးဟင်းရွက် တင်သွင်းမှုကို တားမြစ်ထားပြီ” ဟု ဇွန်လ ၁၇ ရက်နေ့တွင် ပြောကြား ခဲ့သည်။ ၎င်း၏အဆိုအရ နယ်စပ်ဖြတ်ကျော်သွားလာမှုကိုမူ ဆက်လက် ခွင့်ပြုထားဆဲဖြစ်သည်။

အဆိုပါတားမြစ်မှုသည် Preah Vihear ဘုရားကျောင်းအနီး နယ်စပ် အငြင်းပွားနယ်မြေတွင် မေလ ၂၈ ရက်က ကမ္ဘောဒီး-ထိုင်း စစ်တပ်များ ပစ်ခတ်တိုက်ခိုက်မှုဖြစ်ပွားပြီးနောက် နှစ်နိုင်ငံကြား တင်းမာမှု မြင့်တက်လာချိန်တွင် ထွက်ပေါ်လာခြင်းဖြစ်သည်။ အဆိုပါဖြစ်စဉ်တွင် ကမ္ဘောဒီးယား စစ်သား ၁ ဦး သေဆုံးခဲ့ပြီး နှစ်ဖက်စလုံးက မိမိတို့၏လုပ်ရပ်သည် ကာကွယ်ရေးအတွက်သာဖြစ်ကြောင်း ပြောဆိုခဲ့သည်။

မကြာသေးမီရက်ပိုင်းအတွင်း ထိုင်းနိုင်ငံသည် ကမ္ဘောဒီးယားနှင့် ဆက်စပ် နေသော နယ်စပ်ဒေသများတွင် ထိန်းချုပ်မှုများ မြှင့်တင်ခဲ့ပြီး နယ်စပ် ဖြတ်ကျော်စီးဆင်းမှုအချို့ကို ယာယီပိတ်ထားခဲ့သည်။ တစ်ဖက်တွင်လည်း ကမ္ဘောဒီးယားအစိုးရက ထိုင်းရုပ်ရှင်နှင့် ရုပ်မြင်သံကြားအစီအစဉ်များ ထုတ်လွှင့်မှုကို တားမြစ်ပိတ်ပင်ခဲ့ပြီး နယ်စပ်ဖြတ်ကျော်ဂိတ်တစ်ခုကို ပိတ်ကာ ထိုင်းမှအင်တာနက်လိုင်းများအားလုံးကို ဖြတ်တောက်ခဲ့သည်။

ဇွန် ၁၆ ရက်တွင် ကမ္ဘောဒီးယား ဆီးနိတ်ဥက္ကဋ္ဌ ဟွန်ဆန်က ထိုင်းနိုင်ငံ အား နယ်စပ်ကန့်သတ်ချက်များကို ၂၄ နာရီအတွင်း ရုပ်သိမ်းရန် နောက်ဆုံး သတ်မှတ်ချက် ထုတ်ပြန်ခဲ့သည်။ ထိုသို့မပြုလုပ်ပါက ကမ္ဘောဒီးယား အနေဖြင့် ထိုင်းနိုင်ငံမှ သစ်သီးဝလံနှင့် ဟင်းသီးဟင်းရွက် တင်သွင်းမှု အားလုံးကို တားမြစ်မည်ဟု သတိပေးခဲ့သည်။ ဇွန် ၁၇ ရက်တွင် ကမ္ဘော ဒီးယားအရာရှိများက ထိုင်းဘက်မှ ကန့်သတ်ချက်များ ဆက်လက် ကျင့်သုံးနေသောကြောင့် ဟွန်ဆန်၏အမိန့်အာဏာ စတင်အသက်ဝင်ကြောင်း ကြေညာခဲ့သည်။

ဟွန်ဆန်က နယ်စပ်တွင် တင်းမာမှုမြင့်တက်နေချိန်တွင် လက်နက်ကိုင် တပ်ဖွဲ့အားလုံးအား ၂၄ နာရီ သတိအပြည့်ဖြင့် အသင့်ပြင်ဆင်ထားရန်၊ ထိုင်းနှင့်နယ်စပ်ချင်းထိစပ်နေသော ပြည်နယ်များအနေဖြင့် ပြည်သူများကို ဘေးကင်းရာသို့ အရေးပေါ်ရွှေ့ပြောင်းနိုင်ရန်၊ အစားအစာ၊ ဆေးဝါးနှင့် အခြေခံလိုအပ်ချက်များ ဖူလုံစေရေး အဆင်သင့်ပြင်ဆင်ထားရန် ညွှန်ကြားချက်များထုတ်ပြန်ခဲ့သည်။

ထို့အပြင် ထိုင်းနိုင်ငံတွင် အလုပ်လုပ်ကိုင်နေသည့် သောင်းနှင့်ချီသော ကမ္ဘောဒီးယားရွှေ့ပြောင်းအလုပ်သမားများကို နယ်စပ်တင်းမာမှုကြောင့် နိုင်ငံသို့ အလျင်အမြန်ပြန်လာရန် တိုက်တွန်းခဲ့ပြီး အဆိုပါ အခြေအနေတွင် ထိုင်းဘက်မှ ခွဲခြားဆက်ဆံမှုများ ပိုမိုကြုံတွေ့ရနိုင်ကြောင်း သတိ ပေးခဲ့သည်။

ကိုးကား- VN Express

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ရုရှားနိုင်ငံသည် ယူကရိန်းနှင့်ဖြစ်ပွားသည့် ပဋိပက္ခအတွင်း ယူကရိန်းမှ ကျဆုံးသွားသည့် စစ်သည်များ၏ ရုပ်အလောင်း ၆၀၀၀ ကျော်ကို ယူကရိန်းသို့ပြန်လည်လွှဲပြောင်း ပေးအပ်လိုက်ကြောင်း ပဋိပက္ခနှင့် စပ်လျဉ်း၍ ရုရှားစေ့စပ် ညှိနှိုင်းရေးမှူးဖြစ်သည့် ဗလာဒီမာမက်ဒင်စကီ ကပြောသည်။

ရုရှားဘက်က   ယူကရိန်းသို့ ကျဆုံးစစ်သည် ၆၀၆၀ ၏ရုပ်အလောင်းများကို ပြန်လည်လွှဲပြောင်းပေးစဉ် ယူကရိန်းက ရုရှားသို့ ရုရှားနိုင်ငံမှ ကျဆုံးစစ်သည် ၇၈ ဦး၏  ရုပ်အလောင်းများကို  ပြန်လည်လွှဲပြောင်းပေးကြောင်း  ဗလာဒီမာမက်ဒင်စကီက ဇွန်လ ၁၆ ရက်တွင်ပြောသည်။

ယခုလအစောပိုင်းတွင် တူကီယဲနိုင်ငံ၌ ကျင်းပခဲ့သော ရုရှား-ယူကရိန်း မျက်နှာချင်းဆိုင် ဆွေးနွေးမှုအတွင်း ရရှိခဲ့သော သဘောတူညီချက်ကို အကောင်အထည် ဖော်သည့်အနေဖြင့် ယခုကဲ့သို့လွှဲပြောင်းပေးခြင်း ဖြစ်ကြောင်း မက်ဒင်စကီကပြော ထားသည်ဟု သိရသည်။

MWD Web Portal

သမ္မတ ဒေါ်နယ်ထရမ့်သည် တနင်္လာနေ့ (ဇွန် ၁၆) ညနေပိုင်းတွင် ကနေဒါမှ ထွက်ခွာစဉ် ပြင်သစ်သမ္မတ Emmanuel Macron အား ဝေဖန် ပြောဆိုခဲ့ပြီး အစ္စရေးနှင့် အီရန်ကြား စစ်ရပ်စဲရေးအတွက် ဝါရှင်တန်သို့ ပြန်လာရသည်ဟု မက်ခရွန်က မှားယွင်းစွာပြောဆိုခဲ့ကြောင်း ဖော်ပြ ခဲ့သည်။

“ပြင်သစ်သမ္မတ Emmanuel Macron က ထရမ့်သည် G7 ထိပ်သီး အစည်းအဝေးမှ “စစ်ရပ်စဲရေး” အတွက် ဝါရှင်တန် သို့ ပြန်နေသည် ဟု မှားယွင်းစွာ ပြောခဲ့သည်” ဟု ထရမ့်က Truth Social တွင် ရေးသားခဲ့သည်။ 

“ထရမ့်က ၎င်းသည် ဝါရှင်တန်သို့ မည်သည့်အတွက်ကြောင့် ပြန်နေသည်ဆိုသည်ကို မက်ခရွန်မသိရှိနိုင်ဘဲ စစ်ရပ်စဲရေးနှင့် မည်သို့မျှ သက်ဆိုင်မှု မရှိကြောင်း” “ထို့ထက်ပိုမိုအရေးကြီးသည့် ကိစ္စဖြစ်ပြီး မက်ခရွန်သည် ရည်ရွယ်ချက်ရှိသည်ဖြစ်စေ၊ မရှိသည်ဖြစ်စေ အမြဲမှားယွင်းတတ်သည်” ဟု ၎င်းက ဆက်လက်ရေးသားခဲ့သည်။ 

အစောပိုင်းတွင် မက်ခရွန်က ထရမ့်သည် အစ္စရေးနှင့် အီရန်ကြား စစ်ရပ်စဲရေး ကမ်းလှမ်းချက်တစ်ခု ပြုလုပ်ခဲ့ကြောင်း ပြောကြားခဲ့သည်။

“အထူးသဖြင့် စစ်ရပ်စဲပြီး ပိုကျယ်ပြန့်သည့် ဆွေးနွေးပွဲတွေ စတင်ရန် ကမ်းလှမ်းချက်တစ်ခု ရှိပါသည်” ဟု မက်ခရွန်က ကနေဒါနိုင်ငံ Kananaskis တွင် ကျင်းပသည့် G7 ထိပ်သီးအစည်းအဝေးတွင် သတင်းထောက်များအား ပြောကြားခဲ့သည်။

“အမေရိကန်ပြည်ထောင်စုက စစ်ရပ်စဲရေး လုပ်ဆောင်နိုင်မည်ဆိုပါက ထိုသို့ဆောင်ရွက်နိုင်ခြင်းကို ပြင်သစ်က ထောက်ခံနေသလို မျှော်လင့်နေပါသည်” ဟု မက်ခရွန်က ပြင်သစ်ဘာသာဖြင့် ပြောကြားခဲ့သည်။

ကိုးကား- CNN

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

အမေရိကန်သမ္မတ ဒေါ်နယ်ထရမ့်က ရုရှားကို G8 အုပ်စုမှ ထုတ်ပယ်လိုက်ခြင်းသည် မှားယွင်းသည့်ဆုံးဖြတ်ချက်ဖြစ်ကြောင်း၊ ရုရှား ပါဝင်နေမည်ဆိုပါက ယူကရိန်းပဋိပက္ခ အရှိန်မမြင့်မားစေရန် တားဆီးနိုင်မည်ဟု ပြောကြား ခဲ့ပါသည်။

ရုရှားသည် ၁၉၉၇ ခုနှစ်တွင် G7 ဟု ယခင်ကသတ်မှတ်ခဲ့သည့် အစုအဖွဲ့သို့ ပထမဆုံးပါဝင်ခဲ့ပြီး ၎င်းတွင် ကနေဒါ၊ ပြင်သစ်၊ ဂျာမနီ၊ အီတလီ၊ ဂျပန်၊ ဗြိတိန်၊ အမေရိကန်နဲ့ အီးယူတို့ “စာရင်းထည့်သွင်း မရေတွက်သော အဖွဲ့ဝင်” အဖြစ်ပါဝင်ပါသည်။ ၂၀၁၄ ခုနှစ်တွင် ခရိုင်မီးယားကျွန်းဆွယ် ရုရှားနှင့်ပူးပေါင်းသွားပြီးနောက် ရုရှား၏အဖွဲ့ဝင်  အခွင့်အရေးကို ဆိုင်းငံ့ လိုက်ကာ G8 မှ G7 အဖြစ် ပြန်ဖြစ်သွားခဲ့ပါသည်။ ခရိုင်မီးယားတွင် အနောက်နိုင်ငံများကထောက်ခံသည့် မိုင်ဒန်အာဏာသိမ်းမှုအပြီး ဆန္ဒခံ ယူပွဲပြုလုပ်ကာ ယူကရိန်းမှခွဲထွက်ခဲ့ပြီး ရုရှားနှင့်ပူးပေါင်းရန် ဆုံးဖြတ်ခဲ့ပါသည်။

ထရမ့်သည် တနင်္လာနေ့ (ဇွန် ၁၆) က ကနေဒါ၌ကျင်းပခဲ့သော G7 ထိပ်သီးအစည်းအဝေးဖွင့်ပွဲတွင် အထက်ပါအချက်ကိုပြောဆိုခဲ့ပြီး ရုရှားသည် ယခင်က အဆိုပါအုပ်စုတွင်ပါဝင်ခဲ့ကြောင်း ပြန်လည်သတိရစေခဲ့ပါသည်။

“G7 ဆိုသည်မှာ ယခင်က G8 ဖြစ်ခဲ့ပြီး အမေရိကန်သမ္မတဟောင်း ဘာရက်အိုဘားမားနှင့် ကနေဒါဝန်ကြီးချုပ်ဟောင်း ဂျစ်စတင် ထရူးဒိုး တို့က ရုရှားကိုမပါစေချင်ခဲ့ပါ” ဟု ၎င်းက ကနေဒါဝန်ကြီးချုပ် မာ့ခ်ကာနီ နှင့် ပထမဆုံးအကြိမ်အစည်းအဝေး၌ ပြောခဲ့ပါသည်။

“ဤသည်မှာမှားယွင်းသောဆုံးဖြတ်ချက်ဟု သတ်မှတ်လိုကြောင်း၊ အဘယ်ကြောင့်ဆိုသော် ရုရှားပါဝင်နေပါက စစ်ပွဲဖြစ်လာမည်မဟုတ်ဘဲ လွန်ခဲ့သည့်လေးနှစ်တွင် ၎င်း(ထရမ့်)သမ္မတဖြစ်နေပါက ယခုကဲ့သို့သော စစ်ပွဲဖြစ်လာမည်မဟုတ်” ဟု ၎င်းက ဆက်လက်ပြောကြားခဲ့ပါသည်။

ထရမ့်သည် ၎င်း၏ပထမသက်တမ်းအတွင်းတွင် ရုရှားကိုပြန်လည် ထည့်သွင်းရန် အကြိမ်ကြိမ်အဆိုပြုခဲ့သော်လည်း အခြားအဖွဲ့ဝင်များကပယ်ချခဲ့ပါသည်။

လွန်ခဲ့သည့် ဖေဖော်ဝါရီလအတွင်းကလည်း ထရမ့်က ရုရှားကို G8 တွင် ပြန်မြင်ချင်ကြောင်း ထပ်လောင်းပြောကြားခဲ့ပါသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ထရမ့်သည် ကနေဒါနိုင်ငံတွင် ကျင်းပလျက်ရှိသည့် G7 ထိပ်သီးအစည်းအဝေးမှ ဝါရှင်တန်သို့ ဆောလျင်စွာ ပြန်လာမည်ဖြစ်ကြောင်း အိမ်ဖြူတော်မှ ထုတ်ပြန်ပြောကြားခဲ့သည်။

ဆက်လက်ဖြစ်ပွားနေသည့် အရှေ့အလယ်ပိုင်းပြဿနာများကြောင့် သမ္မတထရမ့်သည် G7 ခေါင်းဆောင်များ ညစာစားပွဲအပြီး ပြန်လည်ထွက်ခွာလာမည်ဖြစ်ကြောင်း၊ သမ္မတထရမ့်အနေဖြင့် အရေးကြီးကိစ္စဆိုင်ရာ ဆွေးနွေးပွဲများ တက်ရောက်ရန်ရှိကြောင်း၊ အရှေ့အလယ်ပိုင်းဒေသတွင် ဖြစ်ပွားနေသည့် တင်းမာမှုများ မြင့်တက်လာမှုကို ကိုင်တွယ်ဖြေရှင်းရန်အတွက် အိမ်ဖြူတော်တွင် လုပ်ကိုင်ဆောင်ရွက်ဖွယ်ရာများရှိကြောင်း Karoline Leavitt က ဇွန်လ (၁၆) ရက်နေ့ လူမှုကွန်ရက်စာမျက်နှာတွင် ရေးသားဖော်ပြခဲ့သည်။

ကိုးကား - NHK

အလွတ်သဘောဘာသာပြန်သူ- ဦးထက်ထက်အောင်(နစက-၄)
 

အမေရိကန်သမ္မတ ဒေါ်နယ်ထရမ့်သည် G7 ထိပ်သီးအစည်းအဝေးမှ စောစီးစွာထွက်ခွာခဲ့ကြောင်း အိမ်ဖြူတော်က ပြောကြားခဲ့သည်။ ယူကရိန်း သမ္မတ ဗလာဒီမာ ဇီလန်စကီးနှင့် တွေ့ဆုံရန် အစီအစဉ်ရှိသော်လည်း အရှေ့အလယ်ပိုင်းဒေသတွင် စစ်ရေး အရှိန်အဟုန် မြင့်တက်လာမှုကြောင့် ထွက်ခွာခဲ့ခြင်းဖြစ်သည်ဟု ဆိုသည်။

အိမ်ဖြူတော် ပြောရေးဆိုခွင့်ရှိသူ Karoline Leavitt က တနင်္လာနေ့ (ဇွန် ၁၆) တွင် ထရမ့်သည် “အရေးကြီးသော အကြောင်းအရာများကို ကိုင်တွယ်ရန်” Alberta ပြည်နယ်၊ Kananaskis ရှိ G7 အစည်းအဝေးမှ ထွက်ခွာ ခဲ့ကြောင်း ပြောကြားခဲ့သည်။ သူမက X ၌ ရေးသားရာတွင် ထရမ့်သည် “G7 တွင် ကောင်းမွန်သောနေ့ရက်ကို ကုန်ဆုံးခဲ့သော်လည်း အရှေ့အလယ်ပိုင်း ဒေသတွင် ဖြစ်ပျက်နေသည့်အရာများကြောင့် နိုင်ငံခေါင်းဆောင်များနှင့် ညစာစားပြီးနောက် ညနေပိုင်းတွင် ထွက်ခွာခဲ့သည်” ဟု ဖော်ပြခဲ့သည်။

ဇီလန်စကီးသည် G7 ထိပ်သီးအစည်းအဝေး၏ အပြင်ဘက် အစီအစဉ် အဖြစ် ထရမ့်နှင့် တွေ့ဆုံရန် အစီအစဉ်ရှိခဲ့ပြီး ၎င်းသည် ရုရှားအပေါ် ပိုမိုတင်းကျပ်သော ဒဏ်ခတ်မှုများ ချမှတ်ရန်နှင့် ယူကရိန်းသို့ လက်နက် များ ပိုမိုပေးပို့ရန် အမေရိကန်ကို တိုက်တွန်းရန် အခွင့်အရေး တစ်ခု အဖြစ် အသုံးချရန်ကြိးပမ်းမှုအဖြစ် အများကရှုမြင်ခဲ့ကြသည်။

သို့သော် ထရမ့်သည် မော်စကိုအပေါ် ဖိအားများ တိုးမြှင့်ရန် မလိုလားဘဲ မီဒီယာများ၏ ဖော်ပြချက်အရ ၎င်းသည် ယူကရိန်းနှင့် ရုရှားနှစ်ဘက် စလုံးအပေါ် စိတ်ပျက်နေပြီး ငြိမ်းချမ်းရေးလုပ်ငန်းစဉ်မှ လုံးဝထွက်ခွာရန် စဉ်းစားနေသည်ဟု ဆိုသည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

ပါကစ္စတန်ကာကွယ်ရေးဝန်ကြီး Khawaja Asif က အီရန်နိုင်ငံရှိ စစ်ဘက်ဆိုင်ရာပစ်မှတ်များနှင့် နျူကလီးယားစက်ရုံများကို အစ္စရေးက ဝင်ရောက် တိုက်ခိုက်မှုအပြီး မွတ်စလင်နိုင်ငံများအား စည်းလုံးညီညွတ်စွာ ရပ်တည်ရန်တိုက်တွန်းလိုက်သည်။ ၎င်းကပူးပေါင်းဆောင်ရွက်မှု မရှိပါက အရှေ့ အလယ်ပိုင်း ဒေသတစ်ခုလုံးတွင် ထပ်မံတိုက်ခိုက်မှုများကို အားပေးရာ ရောက်ကြောင်း သတိပေးခဲ့သည်။

စနေနေ့ (ဇွန် ၁၄) က အမျိုးသားလွှတ်တော်၌ မိန့်ခွန်းပြောကြားရာတွင် အာဆစ်က အစ္စရေးသည် တစ်ဦးတည်း လုပ်ဆောင်ခြင်းမဟုတ်ဘဲ သတင်းထောက်လှမ်းရေး၊ အကာအကွယ်နှင့် အထောက်အပံ့များ ရရှိထားကြောင်း ပြောကြားခဲ့သည်။ မွတ်စလင်ကမ္ဘာသည် စစ်ရေးအရ အားနည်းနေဆဲဖြစ်ပြီး ပူးပေါင်းတုံ့ပြန်မှုတစ်ရပ် လိုအပ်ကြောင်း ၎င်းက ထောက်ပြ ခဲ့သည်။

“ယနေ့ အစ္စရေးက ယီမင်၊ အီရန်နှင့် ပါလက်စတိုင်းတို့ကို ပစ်မှတ်ထားသကဲ့သို့ အကယ်၍ မွတ်စလင်ကမ္ဘာက စည်းလုံးညီညွတ်စွာ မရပ်တည်ဘဲ မိမိတို့၏ အကျိုးစီးပွားနှင့် ရည်မှန်းချက်များကိုသာ ဦးစားပေးနေမည်ဆိုပါက တစ်ချိန်တွင်မိမိနိုင်ငံ အလှည့်ကျလာမည်” ဟု ၎င်းက လွှတ်တော်အမတ်များအား ပြောကြားခဲ့သည်။

အာဆစ်က အစ္စရေးကို ရင်ဆိုင်ရန် နည်းဗျူဟာရေးဆွဲရန်အတွက် အစ္စလာမ်မစ် ပူးပေါင်းဆောင်ရွက်ရေးအဖွဲ့ (OIC) ကို အရေးတကြီး အစည်းအဝေးခေါ်ယူရန် တောင်းဆိုခဲ့သည်။ “မွတ်စလင်ကမ္ဘာတွင် အစ္စရေးနှင့်သံတမန်ဆက်ဆံရေးရှိသမျှကို ဖြတ်တောက်သင့်သည်” ဟု ၎င်းက ဖြည့်စွက်ပြောကြားခဲ့သည်။

“မိမိတို့သည် အီရန်နိုင်ငံကို နောက်ကွယ်မှ ရပ်တည်ပြီး ၎င်းတို့၏ အကျိုးစီးပွားကို ကာကွယ်ရန်အတွက် နိုင်ငံတကာဖိုရမ်တိုင်းတွင် ပံ့ပိုးကူညီသွားမည်” ဟု ကာကွယ်ရေးဝန်ကြီးက ဖြည့်စွက်ပြောကြားခဲ့သည်။

ကိုးကား- RT

ဘာသာပြန်ဆိုသူ- ဦးဝင်းဇော်ထွန်း၊ ဒုတိယညွှန်ကြားရေးမှူး၊ နစက-၂

နှစ်(၂၅၀)ပြည့် အမေရိကန်တပ်မတော်နေ့ အထိမ်းအမှတ်စစ်ရေးပြ အခမ်းအနားကို အမေရိကန်သမ္မတ ဒေါ်နယ်ထရမ့်၏ အသက် ၇၉ နှစ်ပြည့် မွေးနေ့ဖြစ်သည့် ဇွန် လ ၁၄ ရက်တွင် ကျင်းပကြောင်း သိရသည်။

အဆိုပါစစ်ရေးပြ အခမ်းအနားကို ကွန်စတီကျူးရှင်း ရိပ်သာလမ်းတွင်ပြုလုပ်ခြင်း ဖြစ်ပြီး စစ်ရေးပြစစ်သည် ၇၀၀၀ ခန့်၊ အေဘရမ်တင့် ၂၅ စီးကျော်၊ စထရိုက်ကာ သံချပ်ကာယာဉ် ၂၈ စီး၊ ပလာဒင်ယာဉ်တင် အမြောက်လေးစီးအပါအဝင် စစ်ယာဉ်စုစုပေါင်း ၁၅၀ တို့က ပါဝင်စစ်ရေးပြခြင်းဖြစ် သည်။

အမေရိကန်နိုင်ငံအနေဖြင့် ယခုကဲ့သို့ စစ်အင်အားပြသမှုသည် ရှားပါးသည့်ဖြစ်စဉ်တစ်ခုဖြစ်ပြီး အခြားသောနိုင်ငံများက ၎င်းတို့၏အောင်ပွဲနေ့များကို အထိမ်းအမှတ်များအဖြစ် ကျင်းပလျက်ရှိကြောင်း၊ ယခုအခါ အမေရိကန်၏ အလှည့်ကျလာပြီဖြစ်ကြောင်း ထရမ့်ကပြောသည်။

အမေရိကန်နိုင်ငံက နောက်ဆုံးအနေဖြင့် စစ်ရေးပြအခမ်းအနား ကျင်းပခဲ့သည်မှာ ၁၉၉၁ ခုနှစ်တွင်ဖြစ်ပြီး ပင်လယ်ကွေ့စစ်ပွဲအပြီးတွင် အောင်ပွဲအထိမ်းအမှတ်အဖြစ် ကျင်းပခြင်းဖြစ်သည်။

ထရမ့်သည် ၎င်း၏ ပထမဆုံးအကြိမ် သမ္မတသက်တမ်းကတည်းက ထိုကဲ့သို့ သော စစ်ရေးပြအခမ်းအနားကို ကျင်းပရန် စိတ်ဝင်စားခဲ့သူဖြစ်ပြီး ယခုမှသာ စစ်ရေး ပြအခမ်းအနားကို ကျင်းပခြင်းဖြစ်သည်။

စစ်ရေးပြအခမ်းအနား ကျင်းပနေစဉ်အတွင်း အမေရိကန်နိုင်ငံ တစ်ဝန်းတွင် အစိုးရဆန့်ကျင်သည့် ဆန္ဒပြမှုများစွာ ဖြစ်ပွားလျက်ရှိကြောင်း၊ လော့အိန်ဂျလိမြို့ ၌ဖြစ်ပွားသည့် ဆူပူဆန္ဒပြမှုများမှအစပြု ၍   ယခုကဲ့သို့စစ်ရေးပြ အခမ်းအနားကျင်းပမှုအပေါ် အထူးသဖြင့် ဒီမိုကရက်တစ်ကို လိုလားသော ပြည်သူအချို့က ဆန့်ကျင် ဆန္ဒပြနေခြင်း ဖြစ်ကြောင်း သိရသည်။

MWD Web Portal

ဗီယက်နမ်အမျိုးသားလွှတ်တော်သည် ဇွန်လ ၁၆ ရက် (တနင်္လာနေ့)တွင် ဖွဲ့စည်းပုံ အခြေခံဥပဒေအပေါ် ပြင်ဆင်အတည်ပြုခဲ့ပြီး ခရိုင်အဆင့် အုပ်ချုပ်မှုယန္တရားအား အပြီးအပိုင် ဖျက်သိမ်းလိုက်သည်။ ကွန်မြူနစ် နိုင်ငံဖြစ်သည့် ဗီယက်နမ်၏ အုပ်ချုပ်ရေးစနစ်အပေါ် ကြီးမားသော ပြုပြင်ပြောင်းလဲမှုတစ်ရပ်လည်း ဖြစ်သည်။ 

ခရိုင်အဆင့်အုပ်ချုပ်ရေးကို ဖျက်သိမ်းရန် လွှတ်တော် ကိုယ်စားလှယ်များက တစ်ညီတစ်ညွတ်တည်း သဘောတူညီခဲ့ကြပြီး ၂၀၂၅ ခုနှစ်၊ ဇူလိုင်လ ၁ ရက်နေ့တွင် စတင်အကျိုးသက်ရောက်မည်ဖြစ်သည်။ ယခုအခါ အစိုးရအဖွဲ့ ယန္တရားတွင် ပြည်နယ် (သို့မဟုတ်) တိုင်းဒေသကြီးအဆင့်နှင့် ကွန်မြူး အဆင့် (မြို့၊ ရပ်ကွက်နှင့် အထူးဇုန်) ဟူ၍ နှစ်ဆင့်သာ ကျန်ရှိမည် ဖြစ်သည်။

ဗီယက်နမ်အစိုးရအဖွဲ့၏ အုပ်ချုပ်မှုယန္တရားတွင် ထိုသို့ ၅ ပုံ ၁ ပုံ လျှော့ချခြင်းဖြင့် နှစ်စဉ် အသုံးစရိတ်ကို ဒေါ်လာဘီလီယံနှင့်ချီ သက်သာစေရန် ရည်ရွယ်သည်။ ယခုနှစ် ဖေဖော်ဝါရီလတွင် အစိုးရဝန်ကြီးဌာနအရေအတွက်ကိုလည်း သိသိသာသာလျှော့ချခဲ့သဖြင့် အလုပ်အကိုင်နေရာ ၂၃,၀၀၀ ဆုံးရှုံးမှုဖြစ်ခဲ့သည်။ 

ဗီယက်နမ်အစိုးရအနေဖြင့် အမေရိကန်သမ္မတ ဒေါ်နယ်ထရမ့်နှင့် အာဂျင်တီးနား သမ္မတ Javier Milei တို့၏ အစိုးရအသုံးစရိတ်များ လျှော့ချသည့်နည်းလမ်းများအတိုင်း တူညီစွာ ဆောင်ရွက်ခြင်းဖြစ်သည်။

ဗီယက်နမ်နိုင်ငံအနေဖြင့် ၂၀၃၀ ပြည့်နှစ်တွင် အလယ်အလတ် ဝင်ငွေ ရှိသည့် နိုင်ငံဖြစ်လာစေရန်နှင့် မြန်ဆန်၊ တည်ငြိမ်ပြီး ရေရှည်တည်တံ့သော ဖွံ့ဖြိုးတိုးတက်မှုရရှိရန်အတွက် ယခုလိုအစိုးရ၏ အုပ်ချုပ်မှု ယန္တရားအတွင်း ပြုပြင်ပြောင်းလဲရေးများ အလျင်အမြန် လုပ်ဆောင်ရန် လိုအပ်ခြင်း ဖြစ်ကြောင်း ဗီယက်နမ်ကွန်မြူနစ်ပါတီ အတွင်းရေးမှူးချုပ်နှင့် ထိပ်ပိုင်း အမျိုးသားရေးခေါင်းဆောင် To Lam က ပြောကြားခဲ့သည်။ 

တနင်္လာနေ့ (ဇွန် ၁၆) တွင် လွှတ်တော်က ကွန်မြူးအဆင့် အုပ်ချုပ်မှုအဖွဲ့ကိုလည်း ပြင်ဆင်ဖွဲ့စည်းရန် မဲပေးအတည်ပြုခဲ့ပြီး ကွန်မြူး အရေအတွက်ကို ၁၀,၀၀၀ ကျော်မှ ၃,၃၀၀ အထိ လျှော့ချမည် ဖြစ်သည်။ ထိုသို့ဆောင်ရွက်မှုကြောင့် မြို့နှင့် ကွန်မြူးအဆင့်တွင် အချိန်ပိုင်း အလုပ်အကိုင် နေရာ ၁၂၀,၀၀၀ ခန့် ဆုံးရှုံးမည်ဖြစ်သည်။ 

ပို့ကုန်တင်ပို့မှုအပေါ် အဓိက မှီခိုသည့် ဗီယက်နမ်နိုင်ငံသည် ပြီးခဲ့သည့် နှစ်တွင် စီးပွားရေး ဖွံ့ဖြိုးတိုးတက်မှုရာခိုင်နှုန်း ၇.၁ ရာခိုင်နှုန်းသို့ ရောက်ရှိခဲ့ပြီးနောက် ယခုနှစ်တွင် ၈% ရရှိရန် ရည်မှန်းထားသည်။ ဗီယက်နမ် နိုင်ငံအပေါ် ကုန်သွယ်ခွန် ၄၆ % ကောက်ခံမည် ဟူ၍ အမေရိကန်သမ္မတ ထရမ့်က ခြိမ်းခြောက်ပြောဆိုသဖြင့် ဗီယက်နမ်အစိုးရသည် အမေရိကန် နှင့် အရေးပေါ် ညှိနှိုင်းဆွေးနွေးလျက်ရှိသည်။ 

ကိုးကား -MSN

ဘာသာပြန်ဆိုသူ- ဒေါ်မေသူခိုင်၊လက်ထောက်ညွှန်ကြားရေးမှူး၊ နစက-၃