ဥရောပနိုင်ငံများက အရေအတွက်အားဖြင့် ၃၀၀၀၀ မကျော်သည့် ငြိမ်းချမ်းမှုထိန်းသိမ်းရေး တပ်ဖွဲ့ဝင်များကို ယူကရိန်းနိုင်ငံအတွင်း ဖြန့်ကြက်မည့် အစီအစဉ်အား အမေရိကန်အစိုးရထံ  ကမ်းလှမ်းမည်ဖြစ်ကြောင်း ဗြိတိန်သတင်းစာကြီး တစ်စောင်က ဖော်ပြသည်။

ယူကရိန်းနိုင်ငံတွင် အနောက်နိုင်ငံများမှ ငြိမ်းချမ်းမှု ထိန်းသိမ်းရေး တပ်ဖွဲ့ဝင်များအား   ဖြန့်ကြက်မည့် အစီအစဉ်ကို   ပြင်သစ်နိုင်ငံ ပဲရစ်မြို့၌ ကျင်းပသည့် အလွတ်သဘော ဆွေးနွေးပွဲ၌ အတည်ပြုထားပြီး ဖြစ်ကြောင်း   The Daily Telegraph  သတင်းစာက ဖေဖော်ဝါရီလ ၁၉  ရက်တွင်ဖော်ပြသည်။

အဆိုပါ ကမ်းလှမ်းချက်အား   ဗြိတိန်ဝန်ကြီးချုပ် ကီယာစတားမားက အမေရိကန်သမ္မတ ဒေါ်နယ်ထရမ့်ထံသို့ လာမည့်ရက်သတ္တပတ်အတွင်း  ပေးပို့မည်ဖြစ်ကြောင်း သိရသည်။    အဆိုပါကမ်းလှမ်းချက်အား ဗြိတိန်နှင့် ပြင်သစ်နိုင်ငံတို့က တင်သွင်းခြင်းဖြစ်သည်။

အဆိုပါကမ်းလှမ်းချက်အရ  ဥရောပငြိမ်းချမ်းမှု ထိန်းသိမ်းရေးတပ်ဖွဲ့ဝင်များအား ယူကရိန်းနိုင်ငံရှိ အကြီးဆုံးမြို့ကြီးများဖြစ်သည့် ပိုတာဗာ၊ နီပရို၊ ခရီဗွိုင်ရော့တို့တွင် ဖြန့်ကြက်မည်ဖြစ်သည်။   သို့သော် ယူကရိန်းတွင် အဆိုပါတပ်ဖွဲ့ဝင်များ ဖြန့်ကြက်မည့် အစီအစဉ်ကို ဂျာမနီ၊ စပိန်နှင့် အီတလီတို့က ကန့်ကွက်ထားကြောင်း သိရသည်။

ဗြိတိန်ဝန်ကြီးချုပ်  စတားမားနှင့် ပြင်သစ်သမ္မတ အီမန်နျူယယ်မက်ခရွန်တို့ အနေဖြင့်   ယူကရိန်း ပဋိပက္ခအား အဆုံးသတ်နိုင်ရေးအတွက် ယူကရိန်းနိုင်ငံသို့ လာမည့် ရက်သတ္တပတ်အတွင်း သွားရောက်မည်ဟု အမေရိကန်အစိုးရက မျှော်လင့်သည်ဟု အမေရိကန်သမ္မတ ထရမ့်၏ အမျိုးသားလုံခြုံရေးအကြံပေး မိုက်ဝေါ့က ဖေဖော်ဝါရီလ ၁၉ ရက်တွင် Fox News ရုပ်သံနှင့် ပြုလုပ်သည့် တွေ့ဆုံမေးမြန်းခန်း တစ်ခု၌ ပြောကြားခဲ့ကြောင်း သိရသည်။

Source: Myawady Web Portal

အမေရိကန်လေတပ်မှ ကမ္ဘာလုံးဆိုင်ရာ တိုက်ခိုက်ရေးစစ်ဌာနချုပ်သည်    ၎င်းတို့၏ Minuteman III တိုက်ချင်းပစ်ဒုံးကျည်တစ်စင်းအား ကယ်လီဖိုးနီးယား ပြည်နယ်တွင် စမ်းသပ်ပစ်ခတ်ခဲ့ကြောင်း သိရသည်။

ကမ္ဘာလုံးဆိုင်ရာတိုက်ခိုက်ရေး စစ်ဌာနချုပ်သည်  အဆိုပါတိုက်ချင်းပစ် ဒုံးကျည်အား ဖေဖော်ဝါရီလ ၁၉  ရက်  ပစိဖိတ်စံတော်ချိန် နံနက် ၁ နာရီ ခန့်က ကယ်လီဖိုးနီးယားပြည်နယ်ရှိ ဗန်ဒါဘာ့ အာကာသတပ်ဖွဲ့၏ အခြေစိုက်စခန်းတွင် ပစ်ခတ်စမ်းသပ်ခြင်းဖြစ်ကြောင်း  စစ်ဌာနချုပ်၏ ဝက်ဆိုက်တွင်  ဖော်ပြထားသည်။

ယခုလုပ်ဆောင်သည့် တိုက်ချင်းပစ်ဒုံးကျည် စမ်းသပ်မှုသည် အမေရိကန်နျူကလီးယား တပ်ဖွဲ့၏  တိုက်ပွဲဝင်အသင့်ဖြစ်မှုနှင့် အမေရိကန်နျူကလီးယား တားဆီးရေးစနစ်၏    အစွမ်းထက်မြက်မှုအပေါ် ယုံကြည်မှုရှိစေရန် ထုတ်ဖော်ပြသခြင်းဖြစ်သည်ဟု အမေရိကန်ကမ္ဘာလုံးဆိုင်ရာ တိုက်ခိုက်ရေး စစ်ဌာနချုပ်က ထုတ်ပြန်ခဲ့ကြောင်း သိရသည်။

Source: Myawady Web Portal

မြန်မာနိုင်ငံအတွင်းသို့ဝင်ရောက်ကာ ဖုန်းနှင့်လိမ်လည်မှုများအပါအဝင် အခြားတရားမဝင်လုပ်ဆောင်မှုများ ကျူးလွန်ခဲ့ကြောင်း စွပ်စွဲခံထားရသည့် တရုတ်ရာဇ၀တ်ဂိုဏ်းတစ်ခု၏ အဖွဲ့ဝင်များကို တရုတ်နိုင်ငံ အရှေ့ပိုင်းရှိ တရားရုံးတစ်ခု၌ တံခါးဖွင့်ရုံးတင်စစ်ဆေးမှုများ ပြီးဆုံးခဲ့ကြောင်း သိရှိရပါသည်။

တရုတ်အာဏာပိုင်များသည် တရုတ်နိုင်ငံနှင့် နယ်နိမိတ်ချင်း ထိစပ်နေသော မြန်မာနိုင်ငံမြောက်ပိုင်းမှ ဖုန်းနှင့်လိမ်လည်မှုများအပါအဝင် အခြား ရာဇ၀တ်မှုများကို နှိမ်နင်းရန် မြန်မာနိုင်ငံမှ တာဝန်ရှိသူများနှင့် ပူးပေါင်းဆောင်ရွက်မှုများကို ၂၀၂၃ ခုနှစ်ကတည်းက အရှိန်မြှင့်လုပ်ဆောင်ခဲ့ပြီး သံသယရှိသူ တရုတ်နိုင်ငံသား ၅၃,၀၀၀ ကျော်ကို ဖမ်းဆီးစစ်ဆေး နေကြောင်း သိရှိရပါသည်။

Zhejiang ပြည်နယ်တရားရုံးတစ်ခုတွင် အကြီးစားရာဇ၀တ်ဂိုဏ်း၏ အဖွဲ့ဝင် ၂၃ ဦးကို တံခါးဖွင့်ရုံးတင်စစ်ဆေးမှုသည် ဖေဖော်ဝါရီ ၁၉ ရက်နေ့ တွင် ပြီးဆုံးခဲ့ကြောင်း တရုတ်နိုင်ငံ ဆင်ဟွာသတင်းဌာနက ဖော်ပြခဲ့ ပါသည်။

အဆိုပါဂိုဏ်းနှင့် ဆက်နွှယ်နေသောအုပ်စုများကိုပါ ထည့်သွင်းမည်ဆိုပါက အဖွဲ့ဝင်အရေအတွက် သောင်းနှင့်ချီရှိကာရှိကြောင်း ဥပဒေရေးရာ စုံစမ်းစစ်ဆေးရေး အရာရှိများက မှတ်ချက်ပြုခဲ့ပါသည်။၎င်းတို့သည် ၂၀၁၅ ခုနှစ်မှစတင်ကာ အမေရိကန်ဒေါ်လာ ၁.၃၇ ဘီလီယံ တန်ဖိုးရှိသည့် လောင်းကစားနှင့် လိမ်လည်မှုဆိုင်ရာ ငွေပေးငွေယူမှုများတွင် ပါဝင်ပတ်သက်ခဲ့သည်ဟု ဥပဒေရေးရာစုံစမ်းစစ်ဆေးရေးအရာရှိများက ဆိုပါသည်။

ထိုင်းနှင့် မြန်မာနယ်စပ်တွင်လည်း တရုတ်နှင့်အခြားနိုင်ငံသားများ လုပ်ကိုင်နေသည့် လိမ်လည်မှုနေရာများ ကျယ်ပြန့်လာနေကာ နိုင်ငံခြားသားများကို ချုပ်နှောင်ပြီး ရာဇဝတ်မှုများတွင် အတင်းအကျပ် ပါဝင်လုပ်ဆောင်စေခြင်းများတွေ့ရှိနေရပါသည်။

ကိုးကား-NHK World

ဥရောပရှိ အမေရိကန်၏ မဟာမိတ်များသည် ယူကရိန်းရှိ ပဋိပက္ခကို အဆုံးသတ်ရန် လိုအပ်ကြောင်း သိရှိလာပြီဖြစ်ကြောင်း၊ အဘယ်ကြောင့်ဆိုသော် ထိုပဋိပက္ခသည် “ကြာမြင့်လွန်းနေပြီ” ဖြစ်သောကြောင့်ဖြစ်သည်ဟု အမေရိကန် အောက်လွှတ်တော်ဥက္ကဋ္ဌ မိုက်ဂျွန်ဆင် က ဖေဖော်ဝါရီ ၂၀ ရက်နေ့တွင် ပြောကြားခဲ့ပါသည်။ 

ကိုးကား- RIA Novosti

Photo: CBS News

အပြည့်အစုံကိုဆက်လက်ဖတ်ရှုရန်- https://ria-ru.turbopages.org/ria.ru/s/20250220/merkuriy-1599002923.html?turbo_feed_type=full

AUKUS မိတ်ဖက်သဘောတူညီချက်အရ ဩစတြေးလျနှင့် နျူကလီးယား ရေငုပ်သင်္ဘောသဘောတူညီချက်အတွက် အမေရိကန်နိုင်ငံကို မြောက် ကိုရီးယားအစိုးရက ပြစ်တင်ဝေဖန်ခဲ့ကြောင်း သိရပါသည်။ အမေရိကန် နိုင်ငံသည် AUKUS မိတ်ဖက်သဘောတူညီမှု၊ အမေရိကန်၊ တောင် ကိုရီးယား၊ ဂျပန် သုံးနိုင်ငံ ပူးပေါင်းဆောင်ရွက်မှုတို့နှင့် ပတ်သက်ပြီးနောက်ဆက်တွဲအကျိုးဆက်များကို သတိထားသင့်သည်ဟု မြောက်ကိုရီးယားအစိုးရက သတိပေးပြောကြားခဲ့ပါသည်။

အမေရိကန်နှင့်နျူကလီးယားရေငုပ်သင်္ဘောသဘောတူညီချက်အတွက် ဩစတြေးလျသည် ပထမဆုံး အမေရိကန်ဒေါ်လာသန်း (၅၀၀) ပေးချေမှုကို လုပ်ဆောင်ခဲ့ကြောင်းလည်း သိရပါသည်။ AUKUS မိတ်ဖက် သဘောတူညီချက်အရ ဩစတြေးလျနိုင်ငံသည် ရေငုပ်သင်္ဘောစွမ်းဆောင်ရည်များကို မြှင့်တင်ရန်အတွက် အမေရိကန်ဒေါ်လာ (၃) ဘီလီယံ ပေးချေရမည်ဖြစ်ပြီး အမေရိကန်က ၂၀၃၀ ပြည့်နှစ် အစောပိုင်း၌ Virginia-class နျူကလီးယားစွမ်းအင်သုံး ရေငုပ်သင်္ဘောများကို ဩစတြေးလျထံ ရောင်းချသွားမည်ဖြစ်သည်ဟု သိရပါသည်။

မြောက်ကိုရီးယားအား အထင်မသေးရန်နှင့် ရန်စမှုများကို ငြိမ်ခံနေမည် မဟုတ်ကြောင်းလည်း မြောက်ကိုရီးယားက အမေရိကန်ကို သတိပေး ပြောဆိုခဲ့ပါသည်။ မြောက်ကိုရီးယားအစိုးရသည် အမေရိကန်၊ဂျပန်နှင့် တောင်ကိုရီးယားတို့၏ သုံးနိုင်ငံ စစ်ရေးပူးပေါင်းဆောင်ရွက်မှုကို အကြိမ်ကြိမ် ပြစ်တင်ရှုတ်ချခဲ့ပြီး သင့်လျော်သည့် လက်တုံ့ပြန်မှုများ လုပ်ဆောင်သွားမည်ဟု အကြိမ်ကြိမ်သတိပေး ပြောဆိုခဲ့ခြင်းလည်း ဖြစ်ပါသည်။

ကိုးကား-NP News

ဖေဖော်ဝါရီ ၁၈

ထိုင်း-မြန်မာနယ်စပ်ရှိ တရားမဝင်အွန်လိုင်းငွေကြေးလိမ်လည်မှုလုပ်ငန်းများကို နိုင်ငံစုံ ပူးပေါင်းဖြိုခွင်းခြင်း လုပ်ငန်းစဉ်၏ အစိတ်အပိုင်းတစ်ရပ်အနေဖြင့် တရုတ်နိုင်ငံက အဆိုပါလုပ်ငန်းများမှ ထိန်းသိမ်းထားရှိသည့် ၎င်းတို့၏နိုင်ငံသား ၂၀၀ ခန့်ကို ပြန်လည်ခေါ်ဆောင်သွားမည် ဖြစ်ကြောင်း ထိုင်းနိုင်ငံလုံခြုံရေးဆိုင်ရာ အရာရှိ တစ်ဦးက ထုတ်ဖော်ပြောကြားခဲ့ပါသည်။

ဒုစရိုက်အဖွဲ့များက ထိုင်း-မြန်မာနယ်စပ်အပါအဝင် အရှေ့တောင်အာရှဒေသတခွင်တွင် မယုံကြည်နိုင် လောက်အောင် ပျံ့နှံ့လာသည့် ယင်းကဲ့သို့သော တရားမဝင်အွန်လိုင်းငွေကြေး လိမ်လည်မှုလုပ်ငန်းများတွင် အဓမ္မလုပ်ကိုင်စေရန်အတွက် လူထောင်ပေါင်းများစွာကို လူကုန်ကူးခဲ့ကြောင်း ကုလသမဂ္ဂက ထုတ်ဖော်ပြောကြား ခဲ့သည်။

ထိန်းသိမ်းခံ တရုတ်နိုင်ငံသားများသည် ဖေဖော်ဝါရီ ၂၀ ရက် (ကြာသပတေးနေ့)တွင် ထိုင်းနိုင်ငံ၊ တာ့ခ်ခရိုင်၊ မဲဆောက်မြို့မှတစ်ဆင့် တရုတ်နိုင်ငံသို့ ခရီးသည်တင်လေယာဉ်ဖြင့် ပြန်လည်ထွက်ခွာကြမည်ဖြစ်ကြောင်း ထိုင်း ကာကွယ်ရေးဝန်ကြီးဌာန၏ ပြောရေးဆိုခွင့်ရှိသူ ဗိုလ်ချုပ် Thanathip Sawangsaeng က ပြောကြားခဲ့ကြောင်း Bangkokpost သတင်းစာတွင် ရေးသားဖော်ပြထားပါသည်။

ကိုးကား- Bangkokpost.com         

ဘာသာပြန်ဆိုသူ

ဦးထက်ထက်အောင်(နစက-၄)
 

အာဖဂန်နစ္စတန်နိုင်ငံနှင့် ထိစပ်နေသည့် နယ်စပ်အနီးမှ South Waziristan ခရိုင်တွင် အစွန်းရောက် စစ်သွေးကြွ ၃၀ ဦး ကို သုတ်သင်ခဲ့ကြောင်း ပါကစ္စတန်စစ်တပ်က ဖေဖော်ဝါရီလ ၁၈ ရက်၌ သတင်းထုတ်ပြန်ခဲ့ပါသည်။ အစွန်းရောက် စစ်သွေးကြွများ၏ အဓိကနယ်မြေဖြစ်သည့် South Waziristan ခရိုင်သည် သတင်းထောက်နှင့် လူ့အခွင့်အရေးအဖွဲ့များ သွားရောက်ရန်အတွက် မလွယ်ကူခြင်းကြောင့် အချက်အလက်များကို တိတိကျကျ စစ်ဆေးရန် ခက်ခဲသည်ဟုလည်း သိရပါသည်။

အစွန်းရောက်စစ်သွေးကြွအဖွဲ့များသည် အစိုးရကိုဖြုတ်ချပြီး တင်းကျပ်သည့် အုပ်ချုပ်မှုစနစ်ကို အစားထိုးရန်အတွက် ပါကစ္စတန်နိုင်ငံအတွင်း၌ တိုက်ပွဲများဆင်နွှဲနေခြင်းဖြစ်သည်ဟုလည်း သိရပါသည်။ သို့သော်လည်း ပါကစ္စတန်စစ်တပ်သည် စစ်သွေးကြွများအကြောင်းနှင့် မည်သည့်အဖွဲ့ က စစ်သွေးကြွများဖြစ်သည်ဟူသော နောက်ထပ်အသေးစိတ် အချက်အလက်များကို ထုတ်ပြန်ပြောဆိုထားခြင်းမျိုး မရှိကြောင်း သိရပါသည်။ အစွန်းရောက်စစ်သွေးကြွများသည်  ၂၀၂၂ ခုနှစ်တွင် ပါကစ္စတန်အစိုးရ နှင့်အပစ်အခတ်ရပ်စဲရေးကို ရုတ်သိမ်းပြီးနောက်ပိုင်း စစ်တပ်၏ အခြေစိုက်စခန်းများကို ပစ်မှတ်ထားသည့်တိုက်ခိုက်မှုများကို အရှိန်မြှင့်လုပ်ဆောင်လာခဲ့ခြင်းဖြစ်ကြောင်းလည်း သိရပါသည်။

ထို့အပြင် အစွန်းရောက်စစ်သွေးကြွများသည် အာဖဂန်နစ္စတန်နိုင်ငံအတွင်း၌ လေ့ကျင့်ရေးစခန်းများဖွင့်လှစ်ပြီး ပါကစ္စတန်နိုင်ငံအတွင်းတွင် တိုက်ခိုက်ရန် စီစဉ်နေကြောင်း ပါကစ္စတန်အစိုးရက စွပ်စွဲပြောဆိုထားသော်လည်း အာဖဂန်နစ္စတန်အစိုးရက အဆိုပါပြောဆိုချက်များကို ငြင်းဆန်ပယ်ချထားသည်ဟု သိရပါသည်။

ကိုးကား-NP News

Photo: Al Arabiya

ငြိမ်းချမ်းရေးအကြောင်းပြကာ ယူကရိန်း ပိုင်နက်အတွင်း NATO အဖွဲ့ဝင်နိုင်ငံများမှ တပ်ဖြန့်ထားရေးသဘောတူညီမှုအား လက်မခံကြောင်း ရုရှားနိုင်ငံခြားရေးဝန်ကြီးက သတိပေးလိုက်သည်။

ဆော်ဒီအာရေးဗီးယားတွင် ပြုလုပ်ခဲ့သည့် အမေရိကန်နှင့် ယူကရိန်း ရုရှားစစ်ပွဲ အဆုံးသတ်ရေးဆွေးနွေးပွဲအပြီးတွင် ရုရှားနိုင်ငံခြားရေး ဝန်ကြီး ဆာဂေးလက်ဗ်ရော့ဗ်က ယခုလိုပြောဆိုခဲ့ခြင်းဖြစ်သည်။ 

ယူကရိန်းတွင် အခြားနိုင်ငံများ၏ အလံအောက်မှ စစ်တပ်တချို့ ရောက်ရှိ နေရုံဖြင့် အခြေအနေ ကွာခြားသွားမည်မဟုတ်ဘဲ လုံးဝ လက်ခံမည်မဟုတ်ကြောင်း ၄င်းကဆိုသည်။

ပြီးခဲ့သည့်ရက်ပိုင်းက ဗြိတိန်ဝန်ကြီးချုပ် ကီယာစတာမာက ယူကရိန်းမြေပေါ်တွင် ဗြိတိန်အပါအဝင် နေတိုးအဖွဲ့ဝင်နိုင်ငံများမှ စစ်တပ်များ တပ်ဖြန့်ချထားရန် အဆင်သင့်ရှိကြောင်း ပြောဆိုခဲ့ပြီးနောက် ရုရှား နိုင်ငံခြား ရေးဝန်ကြီးက တုန့်ပြန်ခဲ့ခြင်းဖြစ်သည်။

ရုရှားနိုင်ငံက ယူကရိန်းနိုင်ငံသို့ အထူးစစ်ဆင်ရေးမဖော်ဆောင်မီ ယူကရိန်း သမ္မတ ဇီလန်စကီး၏ နေတိုးအဖွဲ့ဝင်ဖြစ်ရေး ကြိုးပမ်းမှုအား အကြိမ်ကြိမ် သတိပေးခဲ့ကြောင်း သတင်းများအရ သိရှိရပါသည်။

ကိုးကား- ဒေသတွင်းမီဒီယာ

Photo: Euractiv

 ယူကရိန်းပဋိပက္ခကို ဖြေရှင်းနိုင်ရန်အတွက်  ယူကရိန်းနိုင်ငံ၏ လုံခြုံရေးကို အာမခံချက်ပေးရန်   ဗြိတိန်နိုင်ငံက ၎င်းတို့၏တပ်ဖွဲ့ဝင်များကို စေလွှတ်ရန် အသင့်ရှိသည်ဟု ဗြိတိန်ဝန်ကြီးချုပ် ကီယာ စတားမားက ပြောကြားခဲ့ကြောင်း ဗြိတိန်သတင်းစာကြီးတစ်စောင်   ဖြစ်သည့် The Daily Telegraph တွင်  ဖော်ပြထားသည်။

ဗြိတိန်နိုင်ငံအနေဖြင့် ယူကရိန်းနိုင်ငံ၏ လုံခြုံရေးကိုအာမခံပေးနိုင်ရန် လုပ်ဆောင်မှုတွင်   ဦးဆောင်သည့် အခန်းကဏ္ဍမှ ပါဝင်ရန်အသင့်ရှိပြီး ယူကရိန်းတပ်မတော်သို့  အကူအညီအဖြစ် နှစ်စဉ် စတာလင်ပေါင်  ၃ ဘီလီယံ (ဒေါ်လာ ၃ ဒသမ ၈ ဘီလီယံခန့်)ကို လာမည့် ၂၀၃၀ ပြည့်နှစ်အထိ ပေးအပ်ရန်ကတိပြုပြီးဖြစ်ကြောင်း စတားမားကပြောသည်။

ထို့ပြင် လိုအပ်ပါက ဗြိတိန်အစိုးရက ၎င်းတို့တပ်ဖွဲ့ဝင်များအား ယူကရိန်းသို့ စေလွှတ်ရန်အတွက်လည်း အသင့်ရှိသည်ဟု ၎င်းကဆက်လက်ပြောကြားသည်။

ယူကရိန်း၏ အနာဂတ်အရေးသည် ဥရောပဒေသတစ်ခုလုံးနှင့် သက်ဆိုင်သည့်ကိစ္စရပ်တစ်ခုဖြစ်သောကြောင့် ဥရောပနိုင်ငံများအနေဖြင့် ၎င်းတို့၏ ကာကွယ်ရေးအတွက် အသုံးစရိတ်ကို တိုးမြှင့်၍ နေတိုးအဖွဲ့တွင် ပိုမိုအရေးပါသည့် အခန်းကဏ္ဍမှ ပါဝင်ရန်လိုအပ်ကြောင်း စတားမားက ပြောကြားခဲ့ကြောင်းသိရသည်။

ယူကရိန်းနိုင်ငံသို့ ဗြိတိန်တပ်များအား စေလွှတ်မည့်အစီအစဉ်အား စတားမားက ပထမဆုံးအကြိမ်အဖြစ် လူသိရှင်ကြား ထုတ်ဖော်ပြောဆိုခဲ့ခြင်းဖြစ်ကြောင်း The Daily Telegraph သတင်းစာတွင် ဆက်လက်ဖော်ပြထားသည်။ 

Source: Myawady Web Portal

ပြင်သစ်နိုင်ငံ ပါရီမြို့တွင် အရေးပေါ် ပြုလုပ်နေသော ပဲရစ် လုံခြုံရေးညီလာခံတွင် ဥရောပခေါင်းဆောင်များက ယူကရိန်းအတွက် လုံခြုံရေးအာမခံချက်ပေးရန် ဦးဆောင် လုပ်ဆောင်သွားရန် ဆန္ဒရှိကြောင်း ဆုံးဖြတ်ခဲ့ကြသည်။

အမေရိကန်သမ္မတနှင့် ရုရှားသမ္မတတို့၏ ယူကရိန်းအရေး စေ့စပ်ညှိနှိုင်းရန် ဥရောပကို ဖယ်ရှားထားမှုအပေါ် အမေရိကန်နှင့် ရုရှား ထိပ်တန်း ကိုယ်စားလှယ်များ ဆော်ဒီ၌ ရှေ့ပြေးတွေ့ဆုံဆွေးနွေးချိန်နှင့် ကိုက်ညီ၍ ပြုလုပ်သည့် ပဲရစ်အစည်းအဝေးတွင် ယူကရိန်းအတွက် စစ်ရေးအကူအညီများ ပိုမိုထောက်ပံ့နိုင်ရန်နှင့် လုံခြုံရေးအတွက် လိုအပ်သည့် ရင်းနှီးမြှုပ်နှံမှုများ ဆောင်ရွက်ပေးသွားရန် သဘောတူညီခဲ့ကြကြောင်း နေတိုးအကြီးအကဲ Mark Rutte က ပြောကြားထားပါသည်။

ကိုးကား-TASS

Photo: UNITED24 Media